ᱫᱤᱥᱟ ᱠᱚᱢ ᱪᱮ ᱠᱚᱝᱠᱟ
ᱩᱱᱠᱩ ᱟᱢ ᱞᱮᱠᱟ ᱾
ᱨᱟᱜ, ᱥᱮᱨᱮᱧ, ᱨᱚᱲ, ᱞᱟᱸᱫᱟ ᱜᱮ
ᱵᱟᱠᱚ ᱜᱟᱱᱟ ᱱᱚᱝᱠᱟ ᱿
ᱠᱚᱝᱠᱟ ᱦᱚᱸ ᱚᱸ~ ᱟᱸ~ ᱠᱟᱛᱮ ᱠᱚ
ᱟᱥᱩᱞ ᱡᱚᱝ ᱠᱟᱱ ,
ᱢᱚᱪᱟ ᱢᱮᱱᱟᱜ ᱨᱮᱦᱚᱸ ᱵᱟᱢ ᱨᱚᱲ
ᱦᱟᱯᱤ ᱟᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ ᱿
ᱫᱤᱥᱟ ᱠᱚᱢ ᱥᱮ ᱠᱟᱸᱬᱟ
ᱪᱤᱠᱟ ᱛᱮ ᱠᱚ ᱫᱟᱸᱬᱟ ᱾
ᱥᱤᱧ ᱧᱤᱸᱫᱟ ᱧᱩᱛᱟᱹᱛ ᱜᱮ ᱛᱟᱠᱚ
ᱫᱤᱥᱚᱢ ᱯᱟᱲᱟ ᱿
ᱠᱟᱸᱬᱟ ᱦᱚᱸ ᱴᱷᱮᱸᱜᱟ ᱛᱤᱨᱩᱵ ᱛᱤᱨᱩᱵ
ᱟᱥᱩᱞ ᱡᱚᱝ ᱠᱟᱱ,
ᱢᱮᱫ ᱢᱮᱱᱟᱜ ᱨᱮᱦᱚᱸ ᱵᱟᱢ ᱵᱮᱸᱜᱮᱫ
ᱟᱢ ᱫᱚᱢ ᱵᱮᱫ ᱟᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ ᱿
ᱫᱤᱥᱟ ᱠᱚᱢ ᱪᱮ ᱠᱟᱞᱟ
ᱩᱱᱠᱩ ᱫᱚ ᱵᱷᱟᱞᱟ᱾
ᱵᱮᱥ ᱵᱟ.ᱲᱤᱡ ᱪᱤᱠᱟᱭ ᱵᱩᱡᱽ
ᱟ.ᱰᱤ ᱜᱮ ᱛᱟᱠᱚ ᱡᱟᱞᱟ ᱿
ᱠᱟᱞᱟ ᱦᱚᱸ ᱛᱤ ᱛᱮ ᱤᱥᱟᱨᱟ ᱠᱟᱛᱮ
ᱟ.ᱥᱩᱞ ᱡᱚᱝ ᱠᱟᱱ,
ᱞᱩᱛᱩᱨ ᱢᱮᱱᱟᱜ ᱨᱮᱦᱚᱸ ᱵᱟᱢ ᱟᱸᱡᱚᱢ
ᱴᱷᱩᱞᱤ ᱟᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ ᱿
ᱫᱤᱥᱟ ᱠᱚᱢ ᱪᱮ ᱴᱷᱩᱱᱴᱟ
ᱡᱟᱦᱟᱸᱱᱟᱜ ᱪᱮᱠᱟᱭ ᱥᱟᱵ ᱜᱩᱴᱟ ᱾
ᱛᱟᱵᱮᱨ ᱟᱛᱮᱫ ᱫᱟᱠᱟ ᱡᱚᱢ
ᱟ.ᱰᱤ ᱜᱮ ᱱᱚᱣᱟ ᱟᱸᱴᱟ ᱿
ᱴᱷᱩᱱᱴᱟ ᱦᱚᱸ ᱧᱮᱞᱮ ᱢᱮᱥᱮ
ᱟᱥᱩᱞ ᱡᱚᱝ ᱠᱟᱱ,
ᱛᱤ ᱛᱟᱢ ᱢᱮᱱᱟᱜ ᱨᱮᱦᱚᱸ
ᱛᱟᱭᱚᱢ ᱥᱮᱱᱮᱢ ᱩᱠᱩ ᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ. ᱿
ᱫᱤᱥᱟ ᱠᱚᱢ ᱪᱮ ᱞᱮᱲᱦᱟ ᱠᱷᱚᱸᱲᱫᱟ
ᱢᱮᱱᱟᱜ ᱠᱚᱣᱟ ᱟᱢᱫᱟ ᱾
ᱪᱮᱠᱟ ᱠᱟᱛᱮ ᱩᱱᱠᱩ
ᱫᱤᱱ ᱠᱚ ᱟᱸᱜᱟ ᱮᱫᱟ ᱿
ᱞᱮᱲᱦᱟ ᱠᱷᱚᱸᱲᱫᱟ ᱮᱦᱮᱨ ᱡᱤᱠᱤ
ᱟᱥᱩᱞ ᱡᱚᱝ ᱠᱟᱱ,
ᱡᱟᱸᱜᱟ ᱢᱮᱱᱟᱜ ᱨᱮᱦᱚᱸ
ᱵᱟᱢ ᱛᱟᱲᱟᱢ ᱛᱤᱸᱜᱩ ᱟᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ ᱿
ᱫᱤᱥᱟ ᱠᱚᱢ ᱪᱮ ᱠᱚᱠᱚᱭ ᱡᱩᱜᱤ
ᱵᱟᱱᱩᱜ ᱚᱲᱟᱜ ᱫᱩᱣᱟᱨ ᱾
ᱮᱱᱦᱚᱸ ᱫᱤᱱ ᱠᱚ ᱟᱸᱜᱟ ᱮᱫᱟ
ᱥᱩᱞᱩᱠ ᱥᱟᱶᱦᱟᱨ ᱿
ᱠᱚᱠᱚᱭ ᱡᱩᱜᱤ ᱴᱩᱣᱟᱨ ᱦᱚᱸᱠᱚ
ᱟᱥᱩᱞ ᱡᱚᱝ ᱠᱟᱱ ,
ᱡᱚᱛᱚᱱᱟᱜ ᱢᱮᱱᱟᱜ ᱛᱟᱢ ᱨᱮᱦᱚᱸ
ᱟᱢ ᱪᱮᱠᱟ ᱣᱟᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ ᱿
ᱢᱚᱡᱽ ᱜᱮᱛᱟᱢ ᱥᱚᱱᱮᱨ ᱫᱮᱦᱤ
ᱮᱢᱟ.ᱫ ᱢᱮᱭᱟᱭ ᱫᱷᱚᱨᱢᱚ ᱾
ᱵᱟ.ᱧᱪᱟᱣ ᱟᱭᱫᱟᱨ ᱦᱟᱛᱟᱣ
ᱪᱟᱜ ᱵᱟᱢ ᱠᱚᱨᱢᱚ ᱿
ᱟᱢ ᱠᱷᱚᱱ ᱱᱤᱫᱷᱟᱱ ᱦᱚᱲ
ᱦᱚᱸ ᱠᱚ ᱪᱷᱩᱴᱟᱣ ᱟᱠᱟᱱ,
ᱛᱚᱵᱮ ᱟᱢ ᱫᱚ ᱪᱮᱫ ᱛᱮᱢ
ᱪᱤᱠᱟ ᱣᱟᱠᱟᱱ ᱾
ᱟᱢ ᱫᱚ ᱟᱨ ᱪᱮᱫ ᱮᱢ ᱠᱷᱚᱡᱽ ᱠᱟᱱ ᱿
