ᱢᱟᱨᱮ ᱦᱟᱯᱲᱟᱢ ᱠᱚᱣᱟᱜ ᱢᱮᱱ ᱟᱨ ᱢᱟᱱᱟᱣ ᱞᱮᱠᱟ ᱛᱮ ᱠᱚ ᱢᱮᱱᱟ, ᱢᱤᱫ ᱚᱠᱛᱮ ᱢᱟᱹᱱᱢᱤ ᱟᱹᱲᱤᱡ ᱠᱚ ᱵᱟᱹᱰ ᱮᱱᱟ ᱟᱨ ᱥᱮᱜᱮᱵᱮᱜᱮ ᱠᱚ ᱥᱟᱸᱜᱮ ᱮᱱᱟ ᱾ ᱮᱱᱠᱷᱟᱱ ᱚᱠᱚᱭ ᱦᱚᱸ ᱚᱠᱚᱭ ᱵᱟᱠᱚ ᱢᱟᱱᱟᱣ ᱵᱟᱛᱟᱣ ᱞᱮᱫ ᱠᱚᱣᱟ᱾ ᱠᱟᱰᱟ ᱰᱟᱺᱜᱽᱨᱤ ᱪᱟᱵᱟ ᱮᱱᱟ ᱠᱚ᱾ ᱯᱟᱯ ᱠᱮᱜ ᱟ ᱠᱚ ᱟᱨ ᱠᱚ ᱯᱟᱹᱯᱤ ᱮᱱᱟ ᱾ ᱚᱱᱟ ᱧᱮᱞ ᱛᱮ ᱵᱟᱵᱟ ᱤᱥᱚᱨ ᱮ ᱮᱫᱽᱨᱮ ᱮᱱᱟᱭ ᱾ ᱥᱟᱱᱟᱢ ᱢᱟᱹᱱᱢᱤ ᱠᱚᱭ ᱦᱚᱦᱚ ᱥᱩᱨ ᱠᱮᱫ ᱠᱚᱛᱮ ᱫᱷᱚᱨᱚᱢ ᱰᱟᱦᱟᱨ ᱛᱮ ᱟᱹᱪᱩᱨ ᱨᱩᱣᱟᱹᱲᱚᱜ ᱮ ᱢᱮᱛᱟᱫ ᱠᱚᱣᱟ ᱾ ᱢᱮᱱᱠᱷᱟᱱ ᱩᱱᱠᱩ ᱢᱟᱹᱱᱢᱤ ᱩᱱᱤᱭᱟᱜ ᱠᱟᱛᱷᱟ ᱵᱟᱠᱚ ᱠᱷᱟᱹᱛᱤᱨᱟᱫᱼᱟ ᱾ ᱮᱱᱠᱷᱟᱱ ᱩᱱᱠᱩ ᱜᱚᱡ ᱢᱩᱪᱟᱹᱫ ᱠᱚ ᱞᱟᱹᱜᱤᱫ ᱮᱭᱟᱭ ᱥᱤᱧ ᱮᱭᱟᱭ ᱧᱤᱸᱫᱟᱹ ᱥᱮᱸᱜᱮᱞ ᱫᱟᱜ ᱮ ᱡᱟᱹᱲᱤ ᱠᱮᱫᱼᱟ ᱟᱨ ᱥᱟᱱᱟᱢ ᱢᱟᱹᱱᱢᱤ ᱜᱚᱡ ᱪᱟᱵᱟ ᱠᱮᱫ ᱠᱚᱣᱟᱭ ᱾ ᱚᱱᱟ ᱥᱟᱶᱛᱮ ᱮᱴᱟᱜ ᱡᱮᱜᱮ ᱡᱤᱣᱤ ᱦᱚᱸ ᱠᱚ ᱜᱚᱡ ᱢᱩᱪᱟᱹᱫ ᱮᱱᱟ ᱾ ᱵᱟᱨᱮᱭᱟ ᱥᱚᱱᱚᱛ ᱡᱩᱨᱤ ᱦᱟᱨᱛᱟ ᱵᱩᱨᱩ ᱜᱚᱝᱜᱷᱚᱨ ᱨᱮ ᱩᱠᱩ ᱫᱚᱦᱚ ᱞᱮᱫ ᱠᱤᱱᱟᱭ ᱟᱨ ᱩᱱᱠᱤᱱ ᱟᱛᱮ ᱫᱚᱦᱲᱟ ᱛᱮ ᱢᱟᱹᱱᱢᱤ ᱥᱤᱨᱡᱚᱱ ᱮ ᱛᱤᱸᱜᱩ ᱨᱩᱣᱟᱹᱲ ᱠᱮᱫᱼᱟᱭ ᱾
ᱱᱤᱛ ᱦᱚᱸ ᱫᱷᱟᱹᱨᱛᱤ ᱯᱩᱨᱤ ᱨᱮ ᱢᱟᱹᱱᱢᱤ ᱩᱛᱤ ᱥᱩᱛᱤ ᱠᱚ ᱩᱛᱯᱟᱛ ᱮᱱᱟ ᱟᱨ ᱚᱛ, ᱥᱮᱨᱢᱟ ᱟᱨ ᱚᱛ ᱞᱟᱛᱟᱨ ᱠᱚ ᱦᱚᱸ ᱠᱚ ᱟᱵᱟᱫ ᱠᱮᱫᱼᱟ ᱟᱨ ᱠᱚ ᱚᱡᱽᱨᱟ ᱡᱚᱵᱽᱨᱟ ᱪᱟᱵᱟ ᱠᱮᱫᱼᱟ ᱾ ᱚᱱᱟᱛᱮ ᱮᱴᱟᱜ ᱡᱮᱜᱮ ᱡᱤᱣᱤ ᱠᱚᱦᱚᱸ ᱢᱩᱪᱟᱹᱫᱚᱜ ᱦᱚᱨ ᱨᱮ ᱢᱮᱱᱟᱜ ᱠᱚᱣᱟ᱾ ᱢᱟᱹᱱᱢᱤ ᱟᱡ ᱥᱩᱢᱩᱸᱜ ᱜᱮ ᱱᱚᱶᱟ ᱢᱩᱧᱪᱩᱯᱩᱨᱤ ᱟᱢᱮᱴ ᱥᱟᱱᱟᱭ ᱠᱟᱱᱟ ᱾ ᱞᱟᱦᱟᱸᱛᱤ ᱧᱩᱛᱩᱢ ᱛᱮ ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱬᱤ ᱫᱷᱤᱨᱤ ᱠᱚ ᱩᱡᱟᱹᱲ ᱪᱟᱵᱟ ᱠᱮᱫᱼᱟ, ᱜᱟᱰᱟ ᱢᱩᱸᱰᱩ ᱟᱨ ᱫᱚᱨᱭᱟ ᱫᱟᱜ ᱠᱚ ᱵᱚᱠᱚᱞ ᱵᱚᱰᱮ ᱠᱮᱫᱼᱟ, ᱢᱟᱨᱟᱝ ᱢᱟᱨᱟᱝ ᱠᱚᱲ ᱠᱟᱹᱨᱠᱷᱟᱱᱟ ᱵᱟᱹᱭᱥᱟᱣ ᱠᱟᱛᱮ ᱚᱱᱟ ᱨᱮᱭᱟᱜ ᱪᱤᱢᱤᱱᱤ ᱠᱷᱚᱱ ᱚᱰᱚᱠᱚᱜ ᱫᱷᱩᱸᱜᱽᱭᱟᱹ ᱦᱚᱭᱞᱟᱝ (ᱟᱴᱢᱚᱥᱯᱦᱮᱨᱮ) ᱨᱮᱠᱚ ᱟᱲᱟᱜ ᱠᱟᱜ ᱠᱟᱱᱟ ᱾ ᱚᱱᱟᱛᱮ ᱡᱮᱜᱮᱛ ᱡᱟᱠᱟᱛ ᱨᱮᱭᱟᱜ ᱥᱟᱪᱟᱨᱦᱮ ᱢᱟᱹᱭᱞᱟᱹ ᱟᱨ ᱢᱟᱹᱞᱪᱷᱟᱹ ᱪᱟᱵᱟᱜ ᱠᱟᱱᱟ ᱾ ᱚᱱᱟᱛᱮ ᱱᱩᱠᱩ ᱩᱛᱯᱟᱛᱚᱜ ᱠᱟᱱ ᱢᱟᱹᱱᱢᱤ ᱩᱡᱟᱹᱲ ᱞᱟᱹᱜᱤᱫ “ᱠᱚᱨᱚᱱᱟ” ᱞᱮᱠᱟᱱ ᱞᱚᱦᱚᱢᱚᱜ ᱟᱡᱟᱨ ᱥᱮᱸᱜᱮᱞ ᱫᱟᱜ ᱡᱟᱹᱲᱤ ᱮᱦᱚᱵ ᱟᱠᱟᱱᱟ᱾
ᱥᱮᱫᱟᱭᱟᱜ ᱥᱮᱸᱜᱮᱞ ᱫᱟᱜ ᱡᱟᱹᱲᱤ ᱛᱮᱫᱚ ᱢᱟᱹᱱᱢᱤ ᱥᱟᱶᱛᱮ ᱮᱴᱟᱜ ᱡᱮᱜᱮ ᱡᱤᱣᱤ ᱦᱚᱸ ᱠᱚ ᱞᱚ ᱛᱚᱨᱚᱡ ᱞᱮᱱᱟ ᱾ ᱢᱮᱱᱠᱷᱟᱱ ᱱᱚᱶᱟ ᱟᱡᱟᱨ ᱥᱮᱸᱜᱮᱞ ᱫᱟᱜ ᱡᱟᱹᱲᱤ ᱛᱮ ᱫᱚ ᱮᱠᱮᱱ ᱢᱟᱹᱱᱢᱤ ᱠᱚ ᱞᱚ ᱜᱩᱡᱩᱜ ᱠᱟᱱᱟ᱾ ᱱᱤᱭᱟᱹ ᱫᱷᱟᱣ ᱫᱚ ᱵᱟᱵᱟ ᱤᱥᱚᱨ ᱱᱮᱭᱟᱭ ᱨᱮᱭᱟᱜ ᱮ ᱵᱤᱪᱟᱹᱨ ᱟᱠᱟᱫ ᱞᱮᱠᱟ ᱢᱚᱱᱮᱜ ᱠᱟᱱᱟ᱾ ᱪᱮᱠᱟᱛᱮ, ᱢᱟᱹᱱᱢᱤ ᱠᱚ ᱠᱟᱹᱭ ᱟ, ᱚᱱᱟ ᱞᱟᱹᱜᱤᱫ ᱫᱷᱟᱹᱨᱛᱤ ᱯᱩᱨᱤ ᱨᱤᱱ ᱮᱴᱟᱜ ᱡᱤᱭᱟᱹᱞᱤ ᱫᱚ ᱪᱮᱫᱟᱜ ᱥᱟᱹᱥᱛᱤ ᱠᱚ ᱧᱟᱢ ᱟ? ᱛᱚᱵᱮ, ᱢᱤᱫᱴᱟᱝ ᱠᱟᱛᱷᱟ ᱫᱚ ᱢᱟᱬᱟᱝ ᱟᱜ ᱫᱷᱟᱣ ᱞᱮᱠᱟ ᱜᱮ ᱛᱟᱦᱮᱸ ᱮᱱᱟ ᱾ ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ ᱩᱱ ᱡᱚᱦᱚᱜ ᱫᱚ ᱢᱟᱹᱱᱢᱤ ᱠᱚ ᱠᱟᱹᱭ ᱠᱮᱜ ᱟ, ᱥᱟᱱᱟᱢ ᱡᱮᱜᱮ ᱡᱤᱣᱤ ᱠᱚ ᱩᱡᱟᱹᱲ ᱮᱱᱟ᱾ ᱱᱤᱭᱟᱹ ᱡᱮᱠᱷᱟ ᱟᱜ “ᱠᱚᱨᱚᱱᱟ” ᱟᱡᱟᱨ ᱫᱚ ᱠᱟᱹᱭ ᱟᱠᱟᱫ ᱦᱚᱲ ᱠᱷᱟᱹᱛᱤᱨ, ᱵᱮᱥ ᱦᱚᱲ ᱦᱚᱸ ᱠᱚ ᱯᱟᱲᱟᱣᱜ ᱠᱟᱱᱟ ᱾
ᱱᱚᱶᱟ ᱠᱚᱨᱚᱱᱟ ᱟᱡᱟᱨ ᱦᱮᱡ ᱮᱱ ᱦᱤᱞᱚᱜ ᱠᱷᱚᱱ ᱡᱚᱛᱚ ᱦᱚᱲ ᱜᱮ ᱵᱚᱛᱚᱨ ᱵᱚᱞᱚ ᱟᱠᱟᱣᱟᱫ ᱠᱚᱣᱟ ᱾ ᱪᱮᱠᱟᱛᱮ ᱛᱤᱱ ᱨᱮ ᱚᱠᱚᱭ, ᱚᱠᱟᱨᱮ ᱱᱩᱭ ᱠᱚᱨᱚᱱᱟ ᱡᱩᱜᱽᱱᱤᱼᱟᱜ ᱦᱟᱵᱚᱲ ᱨᱮ ᱯᱟᱲᱟᱣᱜ ᱟᱭ, ᱚᱠᱚᱭ ᱦᱚᱸ ᱵᱟᱭ ᱵᱟᱰᱟᱭᱼᱟ᱾ ᱫᱤᱥᱚᱢ ᱨᱤᱱ ᱨᱟᱡᱽ ᱦᱚᱸ ᱵᱟᱠᱚ ᱥᱟᱢᱵᱲᱟᱣ ᱫᱟᱲᱮ ᱟᱫ ᱛᱮ ᱛᱤ ᱠᱚ ᱛᱩᱞ ᱩᱛᱟᱹᱨ ᱠᱮᱫᱼᱟ ᱾ ᱚᱱᱟ ᱛᱮ ᱱᱚᱶᱟ ᱟᱡᱟᱨ ᱠᱷᱚᱱ ᱵᱟᱧᱪᱟᱣᱜ ᱞᱟᱹᱜᱤᱫ ᱯᱚᱨᱡᱟ ᱠᱚ ᱥᱤᱧ ᱯᱚᱴᱚᱢᱚᱜ ᱠᱚ ᱢᱮᱛᱟᱫ ᱠᱚᱣᱟ᱾ “ᱚᱲᱟᱜ ᱠᱷᱚᱱ ᱵᱟᱦᱨᱮ ᱟᱞᱚᱯᱮ ᱚᱰᱚᱠᱚᱜ ᱟ, ᱥᱟᱶ ᱟᱨ ᱥᱩᱨ ᱵᱟᱝ ᱠᱟᱛᱮ ᱯᱷᱟᱨᱟᱠ ᱯᱷᱟᱨᱟᱠ ᱛᱟᱦᱮᱸᱱ ᱯᱮ, ᱟᱨ ᱢᱩ ᱟᱨ ᱢᱚᱪᱟ ᱵᱮᱫᱚᱜ ᱯᱮ” ᱢᱮᱱᱛᱮ ᱠᱚ ᱢᱮᱛᱟ ᱠᱚ ᱠᱟᱱᱟ ᱾
ᱦᱚᱲ ᱠᱚ ᱥᱤᱧ ᱯᱚᱴᱚᱢᱮᱱ ᱠᱷᱟᱱ ᱡᱚᱛᱚᱣᱟᱜ ᱥᱤᱧ ᱮᱱᱟ᱾ ᱜᱟᱹᱰᱤ ᱢᱚᱴᱚᱨ ᱨᱮᱞ ᱩᱰᱟᱹᱱ ᱜᱟᱹᱰᱤ, ᱟᱨ ᱡᱟᱦᱟᱡ ᱡᱚᱛᱚ ᱵᱚᱸᱫ ᱮᱱᱟ ᱾ ᱥᱮᱬᱟ ᱥᱮᱬᱟ ᱠᱚᱲ ᱠᱟᱹᱨᱠᱷᱟᱱᱟ ᱟᱨ ᱠᱩᱢᱯᱟᱹᱱᱤ ᱵᱚᱸᱫ ᱮᱱᱟ ᱾ ᱥᱚᱨᱠᱟᱨ ᱵᱟᱦᱟᱫᱩᱨ ᱡᱟᱦᱟᱸ ᱞᱮᱠᱟ ᱫᱤᱥᱟᱹᱭ ᱩᱫᱩᱜ ᱠᱮᱫ ᱟ ᱚᱱᱠᱟ ᱜᱮ ᱥᱟᱱᱟᱢ ᱦᱚᱲ ᱠᱚ ᱢᱟᱱᱟᱣ ᱠᱮᱫᱼᱟ᱾ ᱮᱱᱠᱷᱟᱱ ᱦᱚᱨ ᱰᱟᱦᱟᱨ,ᱥᱚᱲᱚᱠ ᱠᱚᱨᱮ ᱜᱟᱹᱰᱤ ᱢᱚᱴᱚᱨ ᱦᱚᱸ ᱵᱟᱠᱚ ᱞᱟᱜᱟ ᱞᱮᱫᱼᱟ ᱾ ᱨᱮᱞ ᱜᱟᱹᱰᱤ ᱦᱚᱸ ᱵᱟᱠᱚ ᱞᱟᱲᱟᱣ ᱮᱫᱼᱟ ᱾ ᱩᱰᱟᱹᱱ ᱜᱟᱹᱰᱤ ᱨᱮᱭᱟᱜ ᱥᱟᱰᱮ ᱦᱚᱸ ᱵᱟᱝ ᱟᱸᱡᱚᱢᱚᱜ ᱠᱟᱱᱟ ᱾ ᱡᱟᱦᱟᱸ ᱵᱟᱡᱟᱨ ᱱᱟᱸᱜᱟᱨ ᱨᱮ ᱵᱩᱡᱩᱫ ᱵᱩᱡᱩᱫ ᱦᱚᱲ ᱠᱚ ᱛᱟᱦᱮᱸᱱ ᱠᱟᱱᱟ ᱟᱨ ᱥᱤᱧ ᱧᱤᱫᱟᱹ ᱦᱟᱱᱟ ᱱᱷᱟᱣᱟ ᱯᱮᱸ ᱯᱟᱸ ᱥᱟᱰᱮ ᱛᱮ ᱞᱩᱛᱩᱨ ᱛᱤᱸᱜᱤᱫᱚᱜ ᱠᱟᱱ ᱛᱟᱦᱮᱸᱜ, ᱚᱱᱟ ᱠᱚ ᱢᱟᱲᱜᱷᱟᱹᱴᱤ ᱞᱮᱠᱟ ᱥᱩᱱᱥᱟᱱ ᱵᱩᱡᱟᱷᱟᱹᱣᱜ ᱠᱟᱱᱟ ᱾
ᱛᱩᱨᱩᱭ ᱪᱟᱸᱫᱚ ᱠᱷᱚᱱ ᱵᱟᱹᱲᱛᱤ ᱦᱩᱭᱩᱜ ᱠᱟᱱᱟ, ᱦᱚᱲ ᱚᱱᱠᱟ ᱫᱚᱨᱠᱟᱨ ᱵᱟᱝ ᱠᱷᱟᱱ ᱚᱲᱟᱜ ᱠᱷᱚᱱ ᱵᱟᱠᱚ ᱚᱰᱚᱠᱚᱜ ᱠᱟᱱᱟ ᱟᱨ ᱚᱰᱚᱠᱚᱜ ᱠᱟᱱ ᱨᱮᱦᱚᱸ ᱠᱚ ᱟᱹᱰᱤ ᱟᱹᱣᱲᱤ ᱱᱮᱭᱟᱢ,ᱠᱟᱹᱱᱩᱱ ᱠᱟᱹᱭᱫᱟᱹ ᱢᱟᱱᱟᱣ ᱛᱮ ᱦᱩᱭ ᱟᱠᱚ ᱠᱟᱱᱟ ᱾ ᱱᱚᱶᱟ “ᱠᱚᱨᱚᱱᱟ ᱞᱚᱠ ᱰᱟᱣᱱ”ᱦᱩᱭ ᱮᱱᱠᱷᱟᱱ ᱦᱚᱲ ᱠᱚᱣᱟᱜ ᱟᱹᱰᱤ ᱟᱹᱰᱤ ᱦᱟᱹᱱ ᱟᱨ ᱞᱚᱥᱠᱟᱱ ᱦᱩᱭ ᱮᱱᱟ ᱟᱨ ᱦᱩᱭᱩᱜ ᱠᱟᱱᱟ ᱾ ᱢᱟᱹᱱᱢᱤ ᱦᱚᱸ ᱠᱚ ᱩᱡᱟᱹᱲ ᱤᱫᱤᱜ ᱠᱟᱱ ᱜᱮᱭᱟ ᱟᱨ ᱫᱤᱱ ᱜᱮ ᱵᱮᱥ ᱦᱚᱲ ᱦᱚᱸ ᱟᱡᱟᱨ ᱨᱮ ᱠᱚ ᱯᱟᱲᱟᱣᱜ ᱠᱟᱱᱟ ᱾ ᱩᱱᱠᱩᱣᱟᱜ ᱮᱞ ᱦᱚᱸ ᱫᱤᱱ ᱜᱮ ᱰᱷᱮᱨ ᱤᱫᱤᱜ ᱠᱟᱱᱟ᱾ ᱚᱱᱟ ᱛᱮ ᱢᱟᱹᱱᱢᱤ ᱵᱚᱛᱚᱨ ᱛᱮ ᱞᱩᱠᱩᱫ ᱞᱩᱠᱩᱫ ᱩᱛᱟᱹᱨ ᱟᱠᱟᱱᱟ ᱠᱚ᱾
ᱛᱚᱵᱮ ᱧᱮᱞ ᱡᱚᱝ ᱟᱨ ᱠᱩᱥᱤ ᱡᱚᱝ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ, ᱢᱟᱹᱱᱢᱤ ᱠᱚᱣᱟᱜ ᱦᱟᱹᱱ ᱦᱩᱭᱩᱜ ᱠᱟᱱ ᱨᱮᱦᱚᱸ ᱮᱴᱟᱜ ᱠᱚᱣᱟᱜ ᱫᱚ ᱞᱟᱵᱷ ᱦᱩᱭᱩᱜ ᱠᱟᱱᱟ᱾ᱵᱤᱨ, ᱵᱩᱨᱩ, ᱫᱷᱤᱨᱤ, ᱫᱟᱨᱮ, ᱫᱩᱢᱦᱟᱹ ᱱᱟᱹᱬᱤ, ᱜᱟᱥ, ᱛᱟᱥᱟᱫ, ᱜᱟᱰᱟ, ᱢᱩᱸᱰᱩ, ᱡᱷᱟᱨᱱᱟ, ᱟᱦᱟᱨ ᱯᱩᱠᱷᱨᱤ ᱫᱟᱜ ᱫᱟᱨᱦᱟ ᱨᱮᱭᱟᱜ ᱥᱮᱫᱟᱭ ᱨᱩᱯ ᱟᱹᱪᱩᱨ ᱨᱩᱣᱟᱹᱲᱚᱜ ᱠᱟᱱᱟ᱾ ᱪᱮᱬᱮ ᱪᱤᱯᱨᱩᱡ, ᱡᱤᱱᱛᱤ ᱯᱤᱯᱲᱤ, ᱵᱤᱧ ᱠᱤᱫᱤᱧ, ᱦᱟᱹᱠᱩ ᱠᱟᱴᱠᱚᱢ ᱨᱚᱴᱮ, ᱚᱛ ᱨᱤᱱ, ᱫᱟᱜ ᱨᱤᱱ ᱟᱨ ᱫᱟᱨᱮ ᱨᱤᱱ ᱡᱤᱣᱤᱭᱟᱱ ᱠᱚᱣᱟᱜ ᱡᱩᱜᱽ ᱟᱹᱪᱩᱨ ᱨᱩᱣᱟᱹᱲ ᱟᱠᱟᱱᱟ ᱾ ᱦᱚᱲ ᱦᱤᱡᱩᱜ ᱥᱮᱱᱚᱜ ᱥᱤᱫ ᱮᱱ ᱠᱷᱟᱱ ᱵᱤᱨ ᱵᱩᱨᱩ ᱜᱟᱡᱟᱲ ᱫᱟᱣᱟᱲ ᱠᱚᱦᱚᱸ ᱛᱟᱺᱦᱩᱸ ᱡᱷᱩᱲ ᱟᱨ ᱡᱤᱭᱟᱹᱲ ᱨᱩᱣᱟᱹᱲ ᱮᱱᱟ ᱾ ᱦᱚᱲ ᱠᱚᱦᱚᱸ ᱟᱹᱰᱤ ᱫᱤᱱ ᱦᱩᱭᱩᱜ ᱠᱟᱱᱟ, ᱵᱤᱨ ᱵᱩᱨᱩ ᱜᱟᱡᱟᱲ ᱵᱟᱠᱚ ᱥᱮᱱ ᱵᱟᱲᱟ ᱞᱮᱱ ᱠᱷᱟᱱ ᱵᱤᱨ ᱨᱮᱱ ᱡᱤᱞ ᱡᱟᱱᱣᱟᱨ ᱠᱚ ᱦᱚᱸ ᱫᱚᱸᱫᱚ ᱨᱮᱠᱚ ᱧᱩᱨ ᱟᱠᱟᱱᱟ ᱾ ᱦᱚᱲ ᱠᱚᱫᱚ ᱠᱚᱨᱚᱱᱟ ᱟᱡᱟᱨ ᱛᱮ ᱠᱚ ᱜᱚᱡ ᱪᱟᱵᱟ ᱮᱱᱟ ᱪᱮ ᱯᱟᱪᱷᱮ! ᱩᱱᱠᱩ ᱦᱚᱸ ᱦᱚᱲ ᱥᱟᱶ ᱛᱟᱦᱮᱸᱱ ᱠᱚ ᱯᱟᱹᱨᱠᱟᱣ ᱪᱟᱵᱟ ᱟᱠᱟᱱᱟ᱾ ᱟᱵᱚ ᱦᱚᱲ ᱥᱮᱸᱫᱽᱨᱟ ᱠᱚᱨᱮ ᱡᱤᱞ ᱵᱚ ᱜᱚᱡᱮᱫ ᱠᱚ ᱨᱮ ᱦᱚᱸ ᱚᱱᱟ ᱛᱮᱫᱚ ᱩᱱᱠᱩ ᱫᱚ ᱵᱟᱠᱚ ᱩᱡᱟᱹᱲ ᱞᱮᱱᱟ ᱾ ᱢᱮᱱ ᱠᱷᱟᱱ ᱫᱤᱠᱩ ᱯᱩᱥᱤ ᱪᱮ ᱟᱨ ᱮᱴᱟᱜ ᱵᱚᱨᱚ ᱯᱟᱹᱴᱠᱤ ᱦᱚᱲ ᱨᱮᱦᱰᱟ (ᱥᱟᱞᱴᱭ ᱥᱚᱤᱞ) ᱨᱮ ᱮᱱᱰᱨᱮᱥ ᱞᱮᱠᱟᱱ ᱵᱤᱥ ᱠᱚ ᱮᱢ ᱠᱟᱛᱮ ᱠᱚ ᱜᱚᱡ ᱠᱮᱫ ᱠᱚᱣᱟ ᱾ ᱚᱱᱟ ᱛᱮ ᱵᱤᱨ ᱡᱤᱞ ᱛᱟᱦᱟᱬ ᱵᱤᱦᱟᱹᱬ ᱦᱟᱸᱰᱮ ᱱᱷᱟᱸᱰᱮ ᱠᱚ ᱜᱚᱡ ᱜᱤᱰᱤ ᱮᱱᱟ ᱾ ᱩᱱᱠᱩ ᱫᱚ ᱧᱟᱢ ᱦᱚᱸ ᱵᱟᱠᱚ ᱧᱟᱢ ᱫᱟᱲᱮ ᱟᱫ ᱠᱚᱣᱟ ᱾ ᱠᱷᱟᱹᱞᱤ ᱜᱮᱠᱚ ᱥᱮᱭᱟ ᱜᱤᱰᱤ ᱮᱱᱟ ᱾
ᱱᱤᱛ, ᱵᱤᱨ ᱵᱩᱨᱩ ᱨᱤᱱ ᱡᱤᱞ ᱡᱟᱱᱣᱟᱨ ᱠᱚ ᱵᱤᱨ ᱵᱩᱨᱩ ᱠᱷᱚᱱ ᱟᱬᱜᱚ ᱦᱮᱡ ᱠᱟᱛᱮ ᱟᱹᱛᱩ ᱫᱤᱥᱚᱢ ᱟᱨ ᱵᱟᱡᱟᱨ ᱠᱚᱨᱮ ᱱᱤᱨᱡᱟᱞᱟ ᱠᱚ ᱫᱟᱬᱟ ᱵᱟᱲᱟᱭ ᱠᱟᱱᱟ᱾ᱩᱱᱠᱩ ᱫᱚ ᱦᱚᱲ ᱞᱮᱠᱟ ᱫᱚ ᱵᱟᱠᱚ ᱦᱤᱸᱥᱟᱹᱼᱟ ᱾ ᱪᱮᱫ ᱦᱚᱸ ᱵᱟᱢ ᱪᱮᱠᱟ ᱵᱟᱲᱟ ᱠᱚ ᱠᱷᱟᱱ ᱩᱱᱠᱩ ᱦᱚᱸ ᱵᱟᱠᱚ ᱪᱮᱜᱠᱟᱼᱟ ᱾ ᱦᱟᱞᱮ ᱜᱮ ᱵᱷᱚᱸᱡ ᱫᱤᱥᱚᱢ ᱢᱟᱨᱟᱝ ᱵᱟᱡᱟᱨ ᱵᱟᱹᱨᱯᱟᱫᱟ ᱨᱮ ᱢᱟᱨᱟᱝ ᱫᱟᱸᱛᱟ ᱦᱟᱲᱟᱢ ᱠᱟᱰᱟ ᱥᱚᱲᱚᱠ ᱥᱚᱲᱚᱠ ᱛᱮ ᱱᱤᱨᱡᱟᱞᱟᱭ ᱫᱟᱬᱟ ᱵᱟᱲᱟ ᱠᱮᱫᱼᱟ ᱾ ᱪᱤᱞᱤ ᱦᱚᱸ ᱵᱟᱭ ᱪᱮᱠᱟ ᱞᱮᱫ ᱠᱚᱣᱟ ᱪᱮ ᱡᱟᱦᱟᱸᱱᱟᱜ ᱚᱱᱠᱟ ᱵᱟᱭ ᱠᱷᱤᱛᱤ ᱞᱮᱫᱼᱟ ᱾ ᱩᱱᱤ ᱦᱟᱲᱟᱢ ᱠᱟᱰᱟ ᱧᱮᱞ ᱛᱮ ᱱᱚᱸᱠᱟ ᱵᱩᱡᱷᱟᱹᱣ ᱜᱚᱫ ᱮᱱᱟ ᱡᱮ, “ᱟᱯᱮ ᱠᱚᱢᱟ “ᱠᱚᱨᱟᱱᱟ” ᱠᱷᱟᱹᱛᱤᱨ ᱧᱮᱧᱮᱞ ᱵᱟᱯᱮ ᱥᱮᱱ ᱫᱟᱲᱮ ᱟᱜ ᱠᱟᱱᱟ, ᱚᱱᱟ ᱠᱷᱟᱹᱛᱤᱨ ᱤᱧ ᱟᱯᱮ ᱧᱮᱧᱮᱞ ᱦᱤᱜᱨᱤᱧ ᱦᱮᱡ ᱟᱠᱟᱱᱟ᱾” ᱩᱱᱠᱩ ᱫᱚ ᱟᱵᱚ ᱦᱚᱲ ᱦᱚᱯᱚᱱ ᱥᱟᱶ ᱛᱟᱦᱮᱸᱱ ᱠᱚ ᱠᱟᱱᱟ ᱠᱚ ᱾ ᱥᱮᱫᱟᱭ ᱠᱟᱹᱦᱱᱤ ᱠᱟᱛᱷᱟ ᱠᱮᱠᱟ ᱛᱮ ᱢᱟᱨᱟᱝ ᱦᱚᱲ ᱫᱚ ᱪᱮᱞᱮᱱ ᱦᱚᱲ ᱜᱮᱠᱚ ᱛᱟᱦᱮᱸᱭᱟ ᱾ ᱱᱮᱛᱟᱨ ᱦᱚᱸ ᱵᱩᱰᱷᱤ ᱦᱚᱲ ᱜᱤᱫᱽᱨᱟᱹ ᱠᱚ ᱢᱮᱛᱟ ᱠᱚᱣᱟ, ᱦᱟᱴᱟᱜ ᱨᱮ ᱡᱚᱢ ᱞᱮᱠᱷᱟᱱ ᱦᱟᱹᱜᱛᱤᱼᱭᱟ ᱾ ᱟᱹᱰᱤ ᱫᱤᱱ ᱵᱤᱨ ᱵᱩᱨᱩ ᱦᱚᱲ ᱵᱟᱠᱚ ᱥᱮᱱ ᱵᱟᱲᱟ ᱞᱮᱱ ᱠᱷᱟᱱ, ᱯᱟᱪᱷᱮ ᱩᱱᱠᱩ ᱦᱚᱸ ᱮᱠᱞᱟ ᱦᱟᱭᱛᱟ ᱦᱩᱭᱛᱩ ᱠᱚ ᱵᱩᱡᱷᱟᱹᱣ ᱟᱠᱟᱜᱼᱟ ᱟᱨ ᱚᱱᱟ ᱛᱮ ᱵᱟᱹᱨᱯᱟᱫᱟ ᱵᱟᱡᱟᱨ ᱫᱟᱬᱟᱱ ᱠᱚᱦᱚᱸ ᱠᱚ ᱦᱤᱡᱩᱜ ᱠᱟᱱᱟ᱾
ᱱᱚᱸᱠᱟᱱ ᱜᱷᱚᱴᱚᱱ ᱫᱚ ᱑᱙᱘᱘ ᱥᱟᱞ ᱨᱮ ᱦᱚᱸ ᱦᱩᱭ ᱞᱮᱱᱟ ᱾ ᱵᱷᱚᱸᱡ ᱵᱤᱨ ᱥᱩᱱᱟᱨᱟᱢ ᱥᱚᱨᱮᱱ, ᱵᱚᱸᱜᱟ ᱫᱤᱥᱚᱢᱚᱜ ᱛᱤᱱᱟᱹᱜ ᱫᱤᱱ ᱢᱟᱬᱟᱝ ᱨᱮ ᱩᱱᱤᱭᱟᱜ ᱵᱟᱹᱨᱯᱟᱫᱟ ᱚᱲᱟᱜ ᱵᱟᱲᱜᱮ ᱥᱮᱫ ᱨᱮ ᱵᱟᱨᱭᱟ ᱦᱟᱲᱟᱢ ᱠᱟᱰᱟ ᱵᱩᱨᱩ ᱠᱷᱚᱱ ᱦᱮᱡ ᱠᱟᱛᱮ ᱟᱹᱰᱤ ᱜᱷᱟᱹᱲᱤᱠ ᱠᱤᱱ ᱛᱤᱸᱜᱩ ᱞᱮᱱᱟ ᱾ ᱩᱱ ᱡᱚᱦᱚᱜ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ, ᱦᱚᱲ ᱮ ᱢᱮᱛᱫ ᱠᱚᱣᱟ ᱼ “ᱱᱩᱠᱤᱱ ᱫᱚ ᱦᱟᱴᱟᱜ ᱨᱮ ᱦᱩᱲᱩ ᱮᱢᱟ ᱠᱤᱱ ᱯᱮ ᱾ ᱡᱚᱢ ᱠᱟᱛᱮ ᱠᱤᱱ ᱥᱮᱱ ᱡᱚᱝᱼᱟ ᱾ ᱱᱩᱠᱤᱱ ᱵᱤᱨ ᱨᱤᱱ ᱦᱩᱭ ᱠᱟᱛᱮ ᱦᱚᱸ ᱤᱧ ᱧᱮᱞ ᱠᱤᱱ ᱦᱮᱡ ᱟᱠᱟᱱᱟ᱾ ᱢᱮᱱᱠᱷᱟᱱ ᱤᱧ ᱫᱤᱥᱚᱢ ᱦᱚᱲ ᱵᱟᱠᱷᱨᱟ ᱩᱱᱟᱹᱜ ᱤᱧ ᱠᱟᱹᱢᱤ ᱟᱠᱟᱫ ᱨᱮᱦᱚᱸ ᱢᱤᱫ ᱦᱚᱲ ᱜᱟᱱ ᱧᱮᱧᱮᱞ ᱵᱟᱠᱚ ᱦᱤᱡᱩᱜ ᱠᱟᱱᱟ ᱾” ᱚᱱᱟ ᱢᱮᱱ ᱠᱟᱛᱮ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱢᱮᱫ ᱫᱟᱜ ᱮ ᱡᱚᱨᱚ ᱠᱮᱫᱼᱟ ᱾ ᱦᱟᱴᱟᱜ ᱨᱮ ᱩᱱᱠᱤᱱ ᱦᱟᱲᱟᱢ ᱠᱟᱰᱟ ᱦᱩᱲᱩ ᱠᱚ ᱮᱢᱟᱫ ᱠᱤᱱᱟ ᱟᱨ ᱚᱱᱟ ᱡᱚᱢ ᱠᱟᱛᱮ ᱛᱷᱤᱨ ᱛᱷᱟᱨ ᱠᱤᱱ ᱥᱮᱱ ᱮᱱᱟ ᱾ ᱚᱠᱟ ᱥᱮᱫ ᱠᱤᱱ ᱥᱮᱱ ᱮᱱᱟ, ᱚᱠᱚᱭ ᱦᱚᱸ ᱵᱟᱠᱚ ᱧᱮᱞ ᱧᱟᱢ ᱞᱮᱫ ᱠᱤᱱᱟ ᱾ ᱚᱸᱰᱮ ᱠᱷᱚᱱ ᱚᱱᱢᱟᱱᱮᱱᱟ, ᱩᱱᱠᱤᱱ ᱫᱚ ᱵᱚᱸᱜᱟ ᱜᱮ ᱦᱟᱲᱟᱢ ᱠᱟᱰᱟ ᱪᱤᱱ ᱛᱮ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱧᱮᱞ ᱠᱤᱱ ᱦᱮᱡ ᱞᱮᱱᱟ ᱾ ᱚᱸᱰᱮ ᱠᱷᱚᱱ ᱚᱱᱢᱟᱱᱚᱜ ᱠᱟᱱᱟ, ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱴᱷᱮᱱ ᱫᱚ ᱵᱚᱸᱜᱟ ᱫᱟᱲᱮ ᱛᱟᱦᱮᱸᱭᱟ ᱾ ᱵᱟᱝ ᱠᱷᱟᱱ ᱚᱠᱚᱭ ᱵᱚᱸᱜᱟ ᱪᱚ ᱩᱱᱤ ᱪᱤᱱ ᱛᱮ ᱚᱯᱮᱞ ᱞᱮᱱᱟ ᱾ ᱚᱱᱟ ᱛᱮᱥᱮ, ᱵᱩᱨᱩ ᱨᱤᱱ ᱦᱟᱲᱟᱢ ᱠᱟᱰᱟ ᱪᱤᱱ ᱛᱮ ᱟᱹᱠᱤᱱᱤᱡ ᱵᱚᱸᱜᱟ ᱜᱟᱛᱮ ᱧᱮᱧᱮᱞ ᱠᱤᱱ ᱦᱮᱡ ᱞᱮᱱᱟ ᱾
ᱞᱚᱠᱰᱟᱣᱱ ᱛᱮ ᱠᱚᱲ ᱠᱟᱹᱨᱠᱷᱟᱱᱟ ᱠᱩᱢᱯᱟᱹᱱᱤ ᱠᱚ ᱵᱚᱸᱫ ᱟᱠᱟᱱ ᱛᱮ ᱜᱟᱰᱟ ᱢᱩᱸᱰᱩ ᱟᱦᱟᱨ ᱯᱩᱠᱷᱨᱤ ᱜᱟᱹᱰᱤᱭᱟᱹ ᱫᱟᱜ ᱦᱚᱸ ᱨᱤᱲᱤᱢ ᱨᱤᱲᱤᱢ ᱯᱷᱩᱨᱪᱟᱹ ᱨᱩᱣᱟᱲ ᱮᱱᱟ᱾ ᱫᱟᱹᱭᱠᱟᱹ ᱞᱮᱠᱟᱛᱮ ᱢᱮᱱ ᱜᱟᱱᱚᱜ ᱟ, ᱜᱟᱸᱜ ᱜᱟᱰᱟ ᱫᱟᱜ ᱯᱷᱩᱨᱪᱟᱹᱭ ᱞᱟᱹᱜᱤᱫ ᱛᱤᱱᱟᱹᱜ ᱥᱮᱨᱢᱟ ᱠᱷᱚᱱ ᱥᱚᱨᱠᱟᱨ ᱮ ᱪᱷᱩᱴᱟᱹᱣ ᱟᱠᱟᱱᱟ ᱾ ᱚᱱᱟᱹ ᱧᱩᱛᱩᱢ ᱛᱮ ᱠᱩᱴᱤ ᱠᱩᱴᱤ ᱴᱟᱠᱟᱭ ᱠᱷᱟᱨᱵᱟᱣ ᱟᱠᱟᱜ ᱟ ᱾ ᱮᱱ ᱦᱚᱸ ᱚᱱᱟ ᱜᱟᱰᱟ ᱫᱟᱜ ᱵᱟᱠᱚ ᱯᱷᱩᱨᱪᱟᱹ ᱫᱟᱲᱮ ᱟᱫ ᱟ ᱾ ᱢᱮᱱᱠᱷᱟᱱ ᱠᱚᱨᱚᱱᱟ ᱞᱚᱠᱰᱚᱣᱱ ᱨᱮ ᱠᱟᱹᱨᱠᱷᱟᱱᱟ ᱟᱨ ᱮᱢᱟᱱ ᱛᱮᱭᱟᱜ ᱠᱟᱨᱵᱟᱨ ᱵᱚᱸᱫ ᱮᱱ ᱠᱷᱟᱱ ᱯᱮ ᱵᱚᱝᱜᱟ ᱵᱷᱤᱛᱨᱤ ᱨᱮ ᱜᱟᱰᱟ ᱫᱟᱜ ᱟᱹᱨᱥᱤ ᱞᱮᱠᱟ ᱪᱤᱠᱚᱱ ᱪᱚᱠᱚᱱ ᱟᱡ ᱟᱡ ᱛᱮᱜᱮ ᱯᱷᱩᱨᱪᱟᱹ ᱮᱱᱟ ᱾ ᱚᱱᱠᱟ ᱜᱮ ᱠᱷᱚᱵᱚᱨ ᱦᱮᱡ ᱮᱱᱟ, ᱵᱷᱩᱵᱮᱱᱥᱚᱨ ᱢᱟᱨᱮ ᱵᱟᱡᱟᱨ ᱨᱮ ᱢᱮᱱᱟᱜ ᱧᱩᱛᱩᱢᱟᱱ “ᱵᱤᱸᱫᱩᱥᱟᱜᱚᱨ” ᱯᱩᱠᱷᱨᱤ ᱫᱟᱜ ᱦᱚᱸ ᱞᱚᱠᱰᱟᱣᱱ ᱞᱟᱜᱟᱣᱮᱱ ᱦᱤᱞᱚᱜ ᱠᱷᱚᱱ ᱵᱟᱨ ᱵᱚᱝᱜᱟ ᱵᱷᱤᱛᱨᱤ ᱨᱮ ᱜᱮ ᱚᱱᱟ ᱯᱩᱠᱷᱨᱤ ᱫᱟᱜ ᱩᱱᱟᱹᱜ ᱯᱷᱩᱨᱪᱟᱹ ᱮᱱᱟ ᱫᱚ ᱚᱱᱟ ᱧᱮᱞ ᱛᱮ ᱦᱚᱲ ᱠᱚ ᱦᱟᱦᱟᱲᱟ ᱮᱱᱟ ᱾ ᱱᱚᱶᱟ ᱫᱚ ᱞᱚᱠᱰᱟᱣᱱ ᱨᱮᱭᱟᱜ ᱧᱮᱞ ᱧᱟᱢ ᱟᱨ ᱡᱚᱴᱮᱫ ᱧᱟᱢ ᱞᱮᱠᱟᱱᱟᱜ ᱞᱟᱵᱷ ᱠᱟᱱᱟ ᱢᱮᱱᱛᱮ ᱦᱚᱸ ᱢᱮᱱ ᱜᱟᱱᱚᱜ ᱟ ᱾
ᱞᱚᱠᱰᱟᱣᱱ ᱢᱟᱬᱟᱝ ᱨᱮ ᱫᱚ ᱚᱱᱟ ᱯᱩᱠᱷᱨᱤ ᱫᱟᱜ ᱩᱱᱟᱹᱜ ᱚᱡᱽᱨᱟ ᱛᱟᱦᱮᱸᱭᱟ ᱡᱮ, ᱡᱚᱴᱮᱫ ᱦᱚᱸ ᱦᱤᱚᱨᱠᱟᱹ ᱜᱮ ᱵᱩᱡᱷᱟᱹᱣᱜ ᱟ ᱾ ᱞᱚᱠᱰᱟᱣᱱ ᱨᱮ ᱦᱚᱲ ᱚᱱᱟ ᱯᱩᱠᱷᱨᱤ ᱫᱟᱜ ᱨᱮ ᱚᱡᱽᱨᱟ ᱡᱚᱵᱨᱟ ᱵᱟᱠᱚ ᱜᱤᱰᱤ ᱫᱟᱲᱮᱭᱟᱫ ᱟ ᱾ ᱚᱱᱟ ᱯᱩᱠᱷᱨᱤ ᱫᱟᱜ ᱨᱮ ᱡᱟᱦᱟᱸ ᱜᱮ ᱚᱡᱽᱨᱟ ᱡᱚᱵᱽᱨᱟ ᱫᱟᱜ ᱨᱮ ᱛᱟᱦᱮᱸᱭᱟ, ᱚᱱᱟ ᱠᱚ ᱫᱚ ᱫᱟᱜ ᱞᱟᱛᱟᱨ ᱚᱛ ᱨᱮ ᱵᱟᱹᱭᱥᱟᱹᱣ ᱮᱱᱟ ᱾ ᱢᱚᱴᱟᱢᱩᱴᱤ ᱢᱮᱱ ᱞᱮᱠᱷᱟᱱ ᱞᱚᱠᱰᱟᱣᱱ ᱛᱮ ᱫᱚ ᱦᱚᱭ ᱦᱤᱥᱤᱫ ᱯᱷᱩᱨᱪᱟᱹ ᱮᱱᱟ ᱾ ᱥᱟᱪᱟᱨᱦᱮ ᱞᱟᱹᱜᱤᱫ ᱫᱚ ᱱᱚᱶᱟ ᱠᱚᱨᱚᱱᱟ ᱠᱟᱨᱦᱟᱲ ᱠᱟᱯᱟᱴ ᱯᱟᱴᱮᱫ ᱨᱮ ᱫᱚ ᱞᱟᱵᱷ ᱟᱨ ᱞᱟᱵᱷ ᱜᱮ ᱾ ᱱᱚᱶᱟ ᱛᱮ ᱦᱚᱸ ᱫᱷᱟᱹᱨᱛᱤ ᱯᱩᱨᱤ ᱩᱰᱷᱟᱹᱣ ᱨᱩᱣᱟᱹᱲ ᱮᱱ ᱞᱮᱠᱟ ᱦᱚᱸ ᱢᱚᱱᱮᱜ ᱠᱟᱱᱟ ᱾ ᱢᱟᱹᱱᱢᱤ ᱠᱚᱦᱚᱸ ᱥᱟᱪᱟᱨᱦᱮ ᱥᱟᱨᱪᱷᱟ ᱟᱨ ᱯᱷᱩᱨᱪᱟᱹ ᱫᱚᱦᱚᱭ ᱨᱮᱭᱟᱜ ᱠᱚ ᱵᱚᱬᱦᱮᱜ ᱠᱱᱟ ᱟᱨ ᱵᱟᱝ ᱠᱷᱟᱱ ᱠᱚᱨᱚᱱᱟ ᱞᱮᱠᱟᱱ ᱢᱟᱹᱱᱢᱤ ᱩᱡᱟᱹᱲ ᱟᱡᱟᱨ ᱟᱨ ᱦᱚᱸ ᱦᱮᱡ ᱫᱟᱲᱮ ᱟᱜᱼᱟ ᱾
ᱟᱵᱚ ᱦᱚᱲ ᱦᱚᱯᱚᱱ ᱵᱟᱹᱲᱛᱤ ᱠᱟᱛᱮ ᱥᱟᱱᱛᱟᱲ ᱦᱚᱲ ᱠᱚᱫᱚ ᱥᱟᱪᱟᱨᱦᱮ ᱚᱠᱟ ᱞᱮᱠᱟ ᱯᱷᱩᱨᱪᱟᱹ ᱟᱨ ᱥᱟᱨᱪᱷᱟ ᱛᱟᱦᱮᱸᱱᱟ, ᱚᱱᱠᱟᱱ ᱢᱟᱱ ᱢᱟᱱᱟᱣ ᱵᱟᱛᱟᱣ ᱵᱟᱨᱚᱱ ᱟᱹᱜᱤᱞ ᱦᱟᱯᱲᱟᱢ ᱠᱚ ᱛᱤᱸᱜᱩ ᱚᱴᱚ ᱟᱠᱟᱣᱟᱫ ᱵᱚᱱᱟ ᱾ ᱡᱮᱞᱮᱠ, ᱟᱹᱛᱩ ᱠᱩᱞᱦᱤ ᱨᱮ ᱟᱺᱭᱴᱷᱟᱹ ᱡᱩᱴᱷᱟᱹ ᱟᱨ ᱚᱡᱽᱨᱟ ᱡᱚᱵᱽᱨᱟ ᱵᱟᱠᱚ ᱜᱤᱰᱤᱭᱟ ᱾ ᱢᱮᱱᱟᱠᱚ, ᱠᱩᱞᱦᱤ ᱛᱮ ᱫᱚ ᱧᱤᱫᱟᱹ ᱵᱚᱸᱜᱟ ᱠᱚ ᱫᱟᱬᱟᱱᱟ ᱾ ᱩᱱᱠᱩ ᱵᱚᱸᱜᱟ ᱵᱳᱨᱳ ᱫᱚ ᱟᱺᱭᱴᱷᱟᱹ ᱡᱩᱴᱷᱟᱹ ᱪᱮ ᱚᱡᱽᱨᱟ ᱡᱚᱵᱽᱨᱟ ᱵᱟᱝ ᱥᱟᱦᱟᱣ ᱠᱚᱣᱟ ᱾ ᱵᱚᱸᱜᱟ ᱵᱳᱨᱳ ᱧᱩᱛᱩᱢ ᱛᱮ ᱨᱮᱦᱚᱸ ᱪᱮ ᱟᱵᱚ ᱥᱩᱥᱟᱹᱨ ᱢᱟᱥᱟᱨ ᱛᱟᱦᱮᱸᱱ ᱯᱟᱹᱨᱠᱟᱣ ᱦᱚᱲ ᱦᱤᱥᱟᱹᱵ ᱛᱮ ᱨᱮᱦᱚᱸ, ᱟᱹᱛᱩ ᱠᱩᱞᱦᱤ ᱟᱨ ᱪᱷᱟᱴᱠᱟ ᱯᱷᱩᱨᱪᱟ ᱵᱚ ᱫᱚᱦᱚ ᱮᱜᱼᱟ ᱾ ᱚᱱᱟ ᱥᱩᱢᱩᱸᱜ ᱦᱚᱸ ᱵᱟᱝ ᱟ, ᱟᱹᱛᱩ ᱚᱲᱟᱜ ᱥᱩᱨ ᱠᱚᱨᱮ ᱦᱚᱸ ᱴᱟᱺᱰᱤ ᱡᱚᱝ ᱫᱚ ᱵᱟᱝ ᱵᱚ ᱫᱩᱲᱩᱵᱼᱟ ᱟᱨ ᱵᱟᱝ ᱵᱚ ᱚᱡᱽᱨᱟᱭᱟ ᱾ ᱚᱱᱟᱛᱮ ᱟᱹᱛᱩ ᱪᱟᱹᱨᱜᱤᱨᱫᱟᱹ ᱨᱮᱭᱟᱜ ᱥᱟᱪᱟᱨᱦᱮ ᱥᱩᱥᱟᱹᱨ ᱛᱟᱦᱮᱸᱱᱟ᱾ᱮᱱᱠᱷᱟᱱ ᱮᱢᱟᱱ ᱛᱮᱭᱟᱜ ᱟᱡᱟᱨ ᱵᱮᱢᱟᱨ ᱛᱤᱡᱩ ᱠᱚᱦᱚᱸ ᱵᱟᱠᱚ ᱯᱟᱨᱪᱟᱣ ᱫᱟᱲᱮᱭᱟᱜᱼᱟ ᱾
ᱟᱵᱚᱣᱟᱜ ᱵᱚᱸᱜᱟ ᱵᱩᱨᱩ ᱛᱷᱟᱱ ᱠᱚᱨᱮ ᱫᱟᱬᱮ ᱠᱚᱵᱚ ᱵᱚᱸᱜᱟ ᱠᱚ ᱨᱮᱦᱚᱸ, ᱵᱚᱸᱜᱟ ᱵᱳᱨᱳ ᱪᱷᱤᱸᱰᱟᱹᱣ ᱞᱮᱱ ᱠᱷᱟᱱ, ᱚᱱᱟ ᱴᱷᱟᱶ ᱫᱚ ᱵᱮᱥ ᱴᱷᱤᱠ ᱯᱷᱩᱨᱪᱟᱹ ᱠᱟᱛᱮ ᱛᱚᱣᱟ ᱛᱮ ᱵᱚ ᱡᱟᱹᱛᱤ ᱨᱩᱣᱟᱹᱲᱟ᱾ ᱚᱱᱟ ᱛᱷᱟᱱ ᱠᱚᱫᱚ ᱥᱤᱬᱤᱡ ᱪᱮ ᱥᱮᱭᱟ ᱦᱚᱸ ᱵᱟᱭ ᱥᱚᱣᱟ᱾ᱟᱵᱚᱣᱟᱜ ᱵᱚᱸᱜᱟ ᱵᱩᱨᱩ ᱠᱟᱹᱢᱤ ᱛᱮ ᱫᱚ ᱥᱟᱪᱟᱨᱦᱮ ᱫᱚ ᱵᱟᱭ ᱢᱟᱹᱭᱞᱟᱹ ᱟᱠᱟᱱᱟ ᱪᱮ ᱵᱟᱭ ᱢᱟᱹᱞᱪᱷᱟᱹ ᱟᱠᱟᱱᱟ ᱾ ᱢᱮᱱᱠᱷᱟᱱ ᱮᱴᱟᱜ ᱠᱚᱣᱟᱜ ᱵᱚᱸᱜᱟ ᱵᱳᱨᱳ ᱟᱨ ᱫᱷᱚᱨᱚᱢ ᱠᱚᱨᱚᱢ ᱛᱮ ᱫᱚ ᱥᱟᱪᱟᱨᱦᱮ ᱫᱩᱥᱤᱜ (ᱯᱚᱞᱞᱩᱴᱤᱚᱱ) ᱠᱟᱱᱟ ᱾ ᱫᱟᱹᱭᱠᱟᱹ ᱞᱮᱠᱟᱛᱮ ᱟᱦᱟᱨ, ᱯᱩᱠᱷᱨᱤ,ᱜᱟᱰᱟ ᱢᱩᱸᱰᱩ, ᱫᱟᱨᱦᱟ ᱫᱟᱜ ᱵᱚ ᱧᱮᱞ ᱫᱟᱲᱮᱭᱟᱜᱼᱟ᱾ᱜᱟᱸᱜ ᱜᱟᱰᱟ ᱨᱮᱭᱟᱜ ᱦᱚᱨᱤᱫᱩᱣᱟᱨ,ᱵᱚᱱᱟᱨᱚᱥ, ᱥᱮᱫᱟᱭ ᱫᱚ ᱤᱞᱟᱦᱟᱵᱟᱫ ᱱᱮᱛᱟᱨ ᱫᱚ ᱯᱨᱚᱭᱟᱜᱽ ᱨᱟᱡᱽ, ᱠᱟᱱᱯᱩᱨ, ᱯᱟᱴᱱᱟ, ᱠᱚᱞᱠᱟᱛᱟ,ᱟᱨ ᱜᱚᱸᱜᱟ ᱥᱟᱜᱚᱨ ᱟᱨ ᱫᱟᱢᱚᱫᱚᱨ ᱟᱨ ᱵᱷᱮᱲᱟ ᱜᱟᱰᱟ ᱫᱩᱞ ᱢᱤᱫ ᱰᱷᱤᱯ ᱨᱮᱱᱟᱜ ᱨᱟᱡᱽᱨᱟᱯᱟᱜ ᱪᱷᱤᱱᱱᱚ ᱢᱚᱥᱛᱟ ᱢᱩᱸᱫᱨᱤ ᱫᱟᱬᱮ ᱵᱚᱸᱜᱟ ᱨᱮᱭᱟᱜ ᱚᱡᱽᱨᱟ ᱞᱤᱧᱡᱤᱱ ᱫᱟᱜ ᱨᱮ ᱵᱚᱦᱮᱞ ᱜᱤᱰᱤ ᱡᱟᱦᱟᱸᱭ ᱧᱮᱞ ᱟᱠᱟᱜᱼᱟᱭ, ᱩᱱᱤ ᱴᱷᱤᱠᱟᱹ ᱫᱟᱲᱮᱭᱟᱜᱼᱟᱭ ᱟᱨ ᱜᱟᱸᱜᱟ ᱜᱟᱰᱟ ᱫᱟᱜ ᱨᱮᱦᱚᱸ ᱵᱚᱸᱜᱟ ᱠᱟᱛᱮ ᱮᱢᱟᱱ ᱛᱮᱭᱟᱜ ᱠᱚ ᱵᱚᱦᱮᱞ ᱜᱚᱫ ᱠᱟᱜᱼᱟ ᱾ ᱚᱱᱟ ᱛᱮ ᱜᱟᱰᱟ ᱫᱟᱜ ᱠᱚ ᱵᱚᱠᱚᱞ ᱵᱚᱠᱚᱞ ᱪᱟᱵᱟ ᱟᱠᱟᱱᱟ᱾
ᱩᱱᱠᱩᱣᱟᱜ ᱫᱷᱚᱨᱚᱢ ᱯᱟᱹᱛᱟᱹᱛ ᱛᱮ, ᱜᱚᱡ ᱦᱚᱲ ᱜᱟᱸᱜ ᱜᱟᱰᱟ ᱫᱟᱜ ᱨᱮ ᱵᱚᱦᱮᱞ ᱞᱮ ᱠᱷᱟᱱ ᱮ ᱥᱚᱨᱚᱜᱽᱯᱩᱨᱤᱜᱼᱟ ᱾ ᱟᱵᱚ ᱦᱚᱲ ᱚᱱᱠᱟ ᱫᱚ ᱜᱟᱰᱟ ᱫᱟᱜ ᱨᱮ ᱜᱚᱡ ᱦᱚᱲ ᱫᱚ ᱵᱟᱵᱚ ᱟᱹᱛᱩ ᱜᱚᱫ ᱠᱟᱭᱟ ᱟᱨ ᱚᱡᱽᱨᱟ ᱡᱚᱵᱽᱨᱟ ᱦᱚᱸ ᱵᱟᱝ ᱵᱚ ᱪᱟᱹᱰᱩᱭᱟ ᱪᱮ ᱵᱟᱝ ᱵᱚ ᱪᱟᱯᱟᱫ ᱜᱤᱰᱤᱭᱟ᱾ ᱮᱴᱟᱜ ᱠᱚᱫᱚ ᱡᱟᱦᱟᱸᱜᱮ ᱦᱟᱥᱟ ᱨᱤᱱ ᱵᱚᱸᱜᱟ ᱠᱚ ᱵᱮᱱᱟᱣ ᱠᱚᱣᱟ ᱵᱚᱸᱜᱟ ᱪᱟᱵᱟ ᱮᱱ ᱠᱷᱟᱱ ᱫᱟᱜ ᱨᱮᱠᱚ ᱵᱷᱟᱥᱟᱣ ᱮᱫ ᱠᱚᱣᱟ᱾ ᱚᱱᱟ ᱛᱮ ᱫᱟᱜ ᱟᱹᱰᱤ ᱛᱮᱫ ᱚᱡᱽᱨᱟᱜ ᱠᱟᱱᱟ ᱾ ᱩᱱᱠᱩ ᱦᱚᱲ ᱫᱚ ᱫᱟᱜ ᱠᱚᱨᱮ ᱜᱮᱠᱚ ᱤᱡ ᱫᱟᱜ ᱦᱚᱸ ᱠᱚ ᱜᱤᱰᱤ ᱭᱟ ᱾ ᱱᱚᱜᱼᱚᱭ ᱱᱚᱸᱠᱟ ᱠᱟᱛᱮ ᱟᱦᱟᱨ ᱯᱩᱠᱷᱨᱤ ᱜᱟᱰᱟ, ᱢᱩᱸᱰᱩ ᱫᱟᱜ ᱠᱚ ᱚᱡᱽᱨᱟ ᱪᱟᱵᱟ ᱠᱮᱫᱼᱟ ᱾ ᱱᱚᱶᱟ ᱠᱚᱢᱟ ᱛᱟᱠᱚ ᱫᱷᱚᱨᱚᱢ ᱠᱚᱨᱚᱢ ᱨᱮᱭᱟᱜ ᱠᱟᱨᱱᱟᱢᱟ ᱠᱟᱱᱟ᱾ ᱚᱱᱟ ᱪᱷᱟᱰᱟ, ᱠᱚᱲ ᱠᱟᱨᱠᱷᱟᱱᱟ ᱵᱟᱡᱟᱨ ᱱᱟᱸᱜᱟᱨ ᱨᱮᱱᱟᱜ ᱚᱡᱽᱨᱟ ᱡᱚᱵᱽᱨᱟ ᱠᱚᱦᱚᱸ ᱜᱟᱰᱟ ᱫᱟᱜ ᱨᱮ ᱠᱚ ᱟᱲᱟᱜ ᱠᱟᱜ ᱠᱟᱱᱟ ᱾ ᱚᱱᱟ ᱛᱮ ᱦᱚᱸ ᱥᱟᱪᱟᱨᱦᱮ ᱫᱚ ᱟᱹᱰᱤ ᱛᱮᱫ ᱥᱚᱡ ᱵᱚᱫᱽᱨᱚᱡᱚᱜ ᱠᱟᱱᱟ ᱾ ᱟᱵᱚ ᱦᱚᱲ ᱠᱚᱫᱚ ᱫᱟᱜ ᱨᱮ ᱫᱚ ᱵᱟᱵᱚ ᱚᱡᱨᱟᱭᱟ ᱟᱨ ᱫᱟᱜ ᱫᱩᱥᱤᱜ ᱞᱮᱠᱟᱱᱟᱜ ᱡᱤᱱᱤᱥ ᱦᱚᱸ ᱵᱟᱵᱚ ᱪᱟᱹᱰᱩᱭᱟ᱾ ᱪᱮᱠᱟᱛᱮ ᱟᱵᱚᱣᱟᱜ ᱵᱚᱛᱚᱨ ᱢᱮᱱᱟᱜᱼᱟ, ᱚᱡᱽᱨᱟ ᱞᱮᱠᱷᱟᱱ ᱫᱟᱜ ᱨᱤᱱ ᱵᱚᱸᱜᱟ ᱵᱳᱨᱳ ᱠᱚ ᱮᱫᱽᱨᱮᱜᱼᱟ ᱾ ᱨᱚᱵᱚᱞ ᱪᱮ ᱯᱤᱞᱟᱥᱴᱤᱠ ᱦᱚᱸ ᱵᱟᱝ ᱠᱚ ᱟᱛᱟᱨᱼᱟ ᱾ ᱟᱵᱚ ᱦᱚᱲᱟᱜ ᱯᱟᱹᱛᱟᱹᱛ ᱛᱮᱫᱚ ᱚᱱᱟ ᱨᱚᱵᱚᱞ ᱪᱮ ᱴᱟᱭᱟᱨ ᱠᱚ ᱟᱛᱟᱨ ᱞᱮᱠᱷᱟᱱ, ᱚᱱᱟ ᱨᱮᱭᱟᱜ ᱥᱚ ᱛᱮ ᱚᱱᱟ ᱥᱩᱨ ᱠᱚᱨᱤᱱ ᱵᱚᱸᱜᱟ ᱵᱳᱨᱳ ᱠᱚ ᱧᱤᱨᱼᱟ᱾ᱱᱤᱛ ᱥᱟᱪᱟᱨᱦᱮ ᱯᱩᱸᱰᱤᱛ ᱠᱚ ᱢᱮᱱᱮᱜᱼᱟ, ᱨᱚᱵᱚᱞ ᱟᱨ ᱯᱤᱞᱟᱥᱴᱤᱠ ᱟᱛᱟᱨ ᱞᱮᱠᱷᱟᱱ ᱚᱱᱟ ᱨᱮᱭᱟᱜ ᱫᱷᱩᱸᱜᱽᱭᱟᱹ ᱛᱮ ᱦᱚᱭᱞᱟᱝ ᱰᱷᱮᱨ ᱛᱮᱫ ᱚᱥᱠᱚᱨᱟᱜ ᱠᱟᱱᱟ ᱾
ᱵᱤᱨ ᱵᱩᱨᱩ ᱠᱷᱚᱱ ᱦᱚᱸ ᱟᱹᱛᱷᱟᱹᱣᱲᱤ ᱫᱟᱨᱮ ᱫᱚ ᱵᱟᱵᱚ ᱢᱟᱜᱽᱼᱟ ᱾ ᱠᱟᱨᱚᱱ ᱨᱮ ᱞᱟᱜᱟᱣᱜ ᱞᱮᱠᱟᱱ ᱫᱟᱨᱮ ᱜᱮ ᱞᱟᱹᱠᱛᱤ ᱡᱟᱹᱱᱤ ᱵᱚ ᱢᱟᱜᱽᱼᱟ ᱾ ᱧᱮᱞ ᱟᱠᱟᱱᱟ, ᱫᱟᱨᱮ ᱦᱚᱸ ᱯᱟᱠᱚᱲ ᱫᱟᱨᱮ ᱜᱮ ᱵᱚ ᱢᱟᱜᱽᱼᱟ ᱾ ᱚᱱᱟ ᱦᱚᱸ ᱢᱟᱜᱽ ᱢᱟᱬᱟᱝ ᱨᱮ ᱫᱟᱨᱮ ᱵᱚ ᱡᱚᱦᱟᱨᱟᱜᱼᱟ ᱾ ᱨᱟᱹᱱᱩ ᱨᱟᱱ ᱪᱮ ᱯᱤᱛᱟᱹᱲᱩ ᱵᱤᱨ ᱠᱷᱚᱱ ᱠᱚ ᱞᱟᱭ ᱠᱷᱟᱱ ᱯᱷᱮᱰᱟᱛ ᱛᱮᱫ ᱫᱚ ᱚᱛ ᱨᱮ ᱟᱨ ᱦᱚᱸ ᱠᱚ ᱛᱚᱯᱟ ᱨᱩᱣᱟᱹᱲ ᱠᱟᱜᱼᱟ ᱾ ᱚᱱᱟ ᱦᱚᱸ ᱫᱟᱜ ᱫᱤᱱ ᱵᱟᱝ ᱠᱷᱟᱱ, ᱫᱟᱥᱟᱸᱭ ᱵᱚᱝᱜᱟ ᱜᱮ ᱠᱚ ᱞᱟᱭᱼᱟ ᱾ ᱪᱮᱠᱟᱛᱮ ᱩᱱ ᱡᱚᱦᱚᱜ ᱫᱚ ᱚᱛ ᱦᱚᱸ ᱚᱫᱟ ᱛᱟᱦᱮᱸᱱᱟ ᱾ ᱯᱷᱮᱰᱟᱛ ᱠᱚ ᱛᱚᱯᱟ ᱠᱟᱜ ᱠᱷᱟᱱ ᱚᱸᱰᱮ ᱠᱷᱚᱱ ᱞᱚᱜᱚᱱ ᱜᱮ ᱟᱨ ᱦᱚᱸ ᱫᱟᱨᱟᱭ ᱠᱟᱱ ᱫᱤᱱ ᱵᱟᱠᱷᱨᱟ, ᱫᱟ ᱱᱟᱬᱤ ᱦᱟᱨᱟᱜᱼᱟ ᱾ ᱟᱵᱚ ᱫᱚ ᱥᱟᱨᱟᱣᱱᱟ ᱵᱤᱨ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹ ᱨᱮ ᱵᱚᱸᱜᱟ ᱵᱩᱨᱩᱜ ᱦᱚᱲ ᱠᱟᱱᱟ ᱵᱚ᱾ ᱥᱟᱨᱡᱚᱢ ᱫᱟᱨᱮ ᱫᱚ ᱟᱵᱚᱣᱟᱜ ᱵᱚᱸᱜᱟ ᱫᱟᱨᱮ ᱠᱟᱱᱟ ᱾ ᱚᱱᱟ ᱫᱟᱨᱮ ᱨᱮᱭᱟᱜ ᱫᱚ ᱡᱚᱛᱚ ᱡᱤᱱᱤᱥ ᱵᱚᱸᱜᱟ ᱵᱳᱨᱳ ᱠᱟᱹᱢᱤ ᱨᱮ ᱞᱟᱜᱟᱣᱜᱼᱟ ᱾ ᱫᱟᱨᱮ, ᱥᱟᱠᱟᱢ, ᱵᱟᱠᱽᱞᱟᱜ, ᱫᱷᱩᱬᱟᱹ, ᱥᱟᱦᱟᱱ, ᱡᱚ, ᱵᱟᱦᱟ, ᱡᱚᱛᱚ ᱜᱮ ᱠᱟᱹᱢᱤ ᱨᱮ ᱞᱟᱜᱟᱣᱜ ᱠᱟᱱᱟ᱾ ᱟᱵᱚ ᱦᱚᱲ, ᱚᱱᱟ ᱛᱮ ᱥᱟᱨᱡᱚᱢ ᱵᱤᱨ ᱫᱚ ᱠᱚ ᱨᱟᱠᱷᱟ ᱫᱚᱦᱚᱭᱟ ᱾ ᱟᱵᱚ ᱫᱚ ᱵᱚᱸᱜᱟ ᱵᱩᱨᱩ ᱪᱮ ᱫᱷᱚᱨᱚᱢ ᱠᱚᱨᱚᱢ ᱧᱩᱛᱩᱢ ᱛᱮ ᱫᱟᱨᱮ ᱵᱚ ᱨᱟᱠᱷᱟ ᱫᱚᱦᱚ ᱮᱜᱼᱟ ᱟᱨ ᱥᱟᱬᱮᱥᱤᱭᱟᱹ ᱟᱨ ᱥᱟᱪᱟᱨᱦᱮ ᱯᱩᱸᱰᱤᱛ ᱠᱚᱫᱚ ᱠᱚ ᱢᱮᱱᱮᱜᱼᱟ, ᱥᱟᱨᱡᱚᱢ ᱫᱟᱨᱮ ᱫᱚ ᱥᱤᱧ ᱧᱤᱫᱟᱹ ᱳᱽᱭᱜᱮᱱ ᱮ ᱟᱲᱟᱜᱟ ᱾
ᱟᱵᱚ ᱵᱚᱸᱜᱟ ᱵᱳᱨᱳ ᱧᱩᱛᱩᱢ ᱛᱮ ᱦᱩᱭ ᱮᱱ ᱪᱮ ᱫᱷᱚᱨᱚᱢ ᱠᱚᱨᱚᱢ ᱧᱩᱛᱩᱢ ᱛᱮ ᱦᱩᱭ ᱮᱱ ᱦᱚᱭ ᱦᱤᱥᱤᱫ ᱟᱨ ᱥᱟᱪᱟᱨᱦᱮ ᱫᱚ ᱥᱩᱥᱟᱹᱨ ᱟᱨ ᱥᱟᱨᱪᱷᱟ ᱜᱮ ᱵᱚ ᱫᱚᱦᱚ ᱮᱜᱼᱟ ᱾ ᱪᱮᱠᱟᱛᱮ ᱱᱤᱛ ᱥᱟᱪᱟᱨᱦᱮ ᱯᱩᱸᱰᱤᱛ ᱠᱚ ᱢᱮᱱ ᱮᱜᱼᱟ, ᱫᱟᱨᱮ ᱩᱡᱟᱹᱲ, ᱨᱚᱵᱚᱞ ᱟᱨ ᱯᱤᱞᱟᱥᱴᱤᱠ ᱟᱛᱟᱨ ᱛᱮ ᱦᱚᱭ ᱦᱤᱥᱤᱫ ᱩᱛᱤᱥᱩᱛᱤ ᱵᱟᱹᱲᱤᱡᱚᱜ ᱠᱟᱱᱟ᱾ ᱜᱟᱰᱟ ᱫᱟᱜ ᱨᱮ ᱠᱚᱲ ᱠᱟᱹᱨᱠᱷᱟᱱᱟ ᱨᱮᱭᱟᱜ ᱚᱡᱽᱨᱟ ᱫᱟᱜ ᱛᱮᱦᱚᱸ ᱜᱟᱰᱟ ᱫᱟᱜ ᱫᱩᱥᱤᱜ ᱠᱟᱱᱟ᱾ ᱫᱟᱜ ᱨᱮ ᱛᱟᱦᱮᱸᱱ ᱡᱤᱭᱟᱹᱞᱤ ᱠᱚᱦᱚᱸ ᱠᱚ ᱢᱩᱪᱟᱹᱫ ᱪᱟᱵᱟᱜ ᱠᱟᱱᱟ᱾ ᱢᱮᱱᱠᱷᱟᱱ ᱟᱵᱚ ᱦᱚᱲ ᱠᱚᱫᱚ ᱜᱟᱰᱟ, ᱢᱩᱸᱰᱩ, ᱟᱦᱟᱨ, ᱯᱩᱠᱷᱨᱤ, ᱫᱟᱨᱦᱟ, ᱫᱟᱜ ᱫᱚ ᱵᱟᱵᱚ ᱚᱡᱽᱨᱟᱭᱟ ᱾ ᱱᱚᱶᱟ ᱨᱮᱭᱟᱜ ᱫᱟᱹᱭᱠᱟᱹ ᱫᱚ ᱦᱩᱭᱩᱜ ᱠᱟᱱᱟ ᱠᱷᱟᱺᱴᱤ ᱥᱟᱱᱛᱟᱲ ᱦᱚᱲ ᱛᱟᱦᱮᱸᱱ ᱟᱹᱛᱩ ᱨᱮᱭᱟᱜ ᱟᱦᱟᱨ ᱯᱩᱠᱷᱨᱤ ᱪᱮ ᱚᱱᱟ ᱟᱹᱛᱩ ᱯᱷᱮᱰ ᱛᱮ ᱞᱤᱸᱡᱤ ᱪᱟᱞᱟᱜ ᱠᱟᱱ ᱜᱟᱰᱟ ᱢᱩᱸᱰᱩ ᱫᱟᱨᱦᱟ ᱨᱮᱭᱟᱜ ᱫᱟᱜ ᱫᱚ ᱟᱨ ᱠᱚᱨᱮᱱᱟᱜ ᱠᱷᱚᱱ ᱫᱚ ᱟᱹᱰᱤ ᱛᱮᱫ ᱯᱷᱩᱨᱪᱟᱹ ᱜᱮᱭᱟ ᱾ ᱯᱷᱩᱨᱪᱟᱹ ᱛᱟᱦᱮᱸᱱ ᱟᱨ ᱯᱷᱩᱨᱪᱟᱹ ᱫᱚᱦᱚᱭ ᱫᱚ ᱟᱵᱚ ᱦᱚᱲ ᱦᱚᱯᱚᱱᱟᱜ ᱢᱟᱭᱟᱢ ᱨᱮᱜᱮ ᱢᱮᱱᱟᱜᱼᱟ ᱾ ᱟᱵᱚ ᱯᱷᱩᱨᱪᱟᱹ ᱵᱚ ᱫᱚᱦᱚ ᱞᱮᱫᱼᱟ, ᱮᱴᱟᱜ ᱦᱚᱲ ᱠᱚ ᱚᱡᱽᱨᱟ ᱠᱮᱫᱼᱟ ᱾ ᱱᱤᱛ ᱫᱚ ᱠᱚᱨᱚᱱᱟ ᱯᱟᱹᱨᱤ ᱯᱷᱩᱨᱪᱟᱹ ᱨᱩᱣᱟᱲᱮᱜᱼᱟᱭ ᱟᱨ ᱥᱟᱪᱟᱨᱦᱮ ᱯᱷᱩᱨᱪᱟᱹ ᱥᱟᱶᱛᱮ ᱢᱟᱹᱱᱢᱤ ᱠᱚᱦᱚᱸᱭ ᱯᱷᱟᱨᱟᱠ ᱯᱷᱟᱨᱟᱠ ᱠᱟᱫ ᱠᱚᱣᱟᱭ᱾ ᱢᱮᱱᱠᱷᱟᱱ ᱟᱵᱚ ᱫᱚ ᱟᱹᱜᱤᱞ ᱦᱟᱯᱲᱟᱢ ᱵᱤᱫᱟᱹᱞ ᱠᱷᱚᱱ ᱜᱮ ᱯᱷᱟᱨᱟᱠ ᱯᱷᱟᱨᱟᱠ ᱛᱟᱦᱮᱸᱱ ᱨᱮᱭᱟᱜ ᱢᱟᱱ ᱢᱟᱱᱟᱣ ᱢᱮᱱᱟᱜ ᱟᱹᱜᱩ ᱟᱠᱟᱱᱟ ᱾ ᱦᱟᱧᱦᱟᱨ, ᱦᱚᱧᱦᱟᱨ, ᱦᱚᱱᱠᱤᱢᱤᱱ, ᱵᱚᱠᱚ ᱵᱟᱹᱦᱩ, ᱵᱟᱼᱦᱚᱧᱦᱟᱨ, ᱱᱤᱡ ᱵᱟᱞᱟᱭᱟ ᱠᱚ ᱫᱚ ᱥᱮᱫᱟᱭ ᱠᱷᱚᱱ ᱵᱟᱠᱚ ᱡᱚᱯᱚᱴᱮᱫ ᱟ ᱟᱨ ᱠᱚ ᱥᱟᱦᱟ ᱟᱠᱚᱣᱟ᱾ ᱟᱵᱚ ᱟᱹᱫᱤᱢ ᱦᱚᱲ ᱠᱚᱣᱟᱜ ᱱᱚᱸᱠᱟᱱ ᱱᱤᱨᱚᱲ ᱟᱨ ᱥᱟᱨᱪᱷᱟ ᱩᱭᱦᱟᱹᱨ, ᱵᱤᱪᱟᱹᱨ, ᱟᱪᱟᱨ, ᱵᱮᱵᱷᱟᱨ ᱧᱮᱞ ᱛᱮ ᱡᱮᱜᱮᱛ ᱡᱟᱹᱛᱤᱭᱟᱹᱨᱤ ᱜᱚᱱᱚᱴᱷᱚᱱ(ᱩᱹᱸᱹᱳᱹ) ᱱᱮᱥᱟᱜ, ᱡᱮᱜᱮᱛ ᱟᱹᱫᱤᱵᱟᱹᱥᱤ ᱢᱟᱦᱟ ᱢᱟᱱᱟᱣ ᱨᱮᱭᱟᱜ ᱢᱩᱲ ᱫᱤᱥᱟᱹ ᱫᱚ ᱠᱚᱨᱚᱱᱟ ᱞᱮᱠᱟᱱ ᱢᱟᱹᱱᱢᱤ ᱩᱡᱟᱹᱲ ᱟᱡᱟᱨ ᱴᱮᱠᱟᱣ ᱫᱟᱨᱟᱢ ᱞᱟᱹᱜᱤᱫ ᱠᱷᱟᱱ ᱟᱹᱫᱤᱵᱟᱹᱥᱤ ᱦᱚᱲᱟᱜ ᱥᱟᱶᱛᱟ ᱟᱹᱨᱤ ᱯᱟᱹᱛᱟᱹᱛ ᱟᱨ ᱥᱟᱹᱨᱭᱟᱹᱛ ᱯᱟᱸᱡᱟ ᱦᱩᱭᱩᱜ ᱟ ᱢᱮᱱᱛᱮ ᱪᱷᱟᱹᱯᱤᱞ ᱟᱠᱟᱫᱼᱟᱭ ᱾
ᱜᱟᱹᱰᱤ ᱢᱚᱴᱚᱨ ᱨᱮᱞ ᱟᱨ ᱩᱰᱟᱹᱱ ᱜᱟᱹᱰᱤ ᱠᱚ ᱵᱚᱸᱫ ᱮᱱ ᱠᱷᱟᱱ ᱢᱟᱬᱟᱝ ᱞᱮᱠᱟ ᱜᱷᱩᱸ ᱜᱷᱟᱸ ᱥᱟᱰᱮ ᱵᱟᱭ ᱟᱸᱡᱚᱢ ᱠᱟᱱᱟ ᱾ ᱚᱱᱠᱟᱱ ᱛᱷᱤᱨ ᱛᱷᱟᱨ ᱟᱨ ᱱᱤᱥᱚᱱ ᱵᱮᱲᱟ ᱨᱮ ᱪᱮᱬᱮ ᱪᱤᱯᱨᱩᱡᱽ ᱠᱚᱣᱟᱜ ᱨᱟᱹᱲ ᱟᱹᱰᱤ ᱱᱤᱥᱴᱟᱹ ᱯᱩᱥᱴᱟᱹᱣ ᱟᱨ ᱨᱟᱹᱥᱠᱟᱹ ᱜᱮ ᱟᱸᱡᱚᱢᱚᱜ ᱠᱟᱱᱟ ᱾ ᱱᱤᱨᱡᱟᱞᱟ ᱜᱮ ᱪᱮᱬᱮ ᱠᱚᱦᱚᱸ ᱚᱲᱟᱜ ᱯᱷᱮᱰ ᱵᱟᱲᱜᱮ ᱫᱟᱨᱮ ᱠᱚᱨᱮ ᱛᱩᱠᱟᱹ ᱠᱟᱛᱮ ᱦᱚᱯᱚᱱ ᱠᱚ ᱦᱟᱨᱟ ᱮᱫ ᱠᱚᱣᱟ ᱾ ᱚᱠᱟ ᱠᱚᱨᱮ ᱠᱷᱚᱱ ᱪᱚ ᱟᱹᱰᱤ ᱞᱮᱠᱟᱱ ᱪᱮᱬᱮ ᱦᱮᱡ ᱠᱟᱛᱮ ᱚᱲᱟᱜ ᱥᱩᱨ ᱫᱟᱨᱮ ᱠᱚᱨᱮ ᱟᱵ ᱠᱟᱛᱮ ᱠᱚ ᱠᱮᱱᱮᱠᱚᱛᱮᱜ ᱠᱟᱱᱟ ᱾ ᱯᱚᱛᱟᱢ, ᱯᱤᱭᱚ, ᱯᱟᱨᱣᱟ, ᱡᱤᱦᱩ, ᱠᱟᱞᱟᱭᱦᱟᱫ, ᱢᱟᱦᱠᱟᱹᱞ,ᱢᱤᱨᱩ, ᱦᱟᱹᱛᱤ ᱩᱲᱤᱡ, ᱠᱩᱴᱤᱥ, ᱯᱟᱹᱱᱤᱨᱯᱤᱭᱚ, ᱴᱤᱨᱩᱝ ᱪᱮᱬᱮ, ᱠᱩᱭᱞᱤ, ᱠᱚᱭᱮᱞ, ᱥᱤᱡ ᱥᱟᱠᱚᱣᱟ, ᱛᱩᱫ, ᱜᱩᱛᱨᱩᱫ, ᱵᱷᱚᱨᱚᱝᱜᱤᱭᱟᱹ ᱠᱚᱠᱚᱨ, ᱜᱟᱹᱭᱠᱚᱜ, ᱯᱩᱥᱤ ᱠᱚᱜ, ᱥᱮᱸᱜᱮᱞ ᱠᱚᱜ ᱠᱩᱲᱤᱴᱩᱠᱩᱡ, ᱴᱮᱴᱮᱴᱮᱸᱜᱚᱡ, ᱴᱤᱜᱴᱚᱲᱚᱜ, ᱰᱷᱤᱯᱪᱩᱭ, ᱰᱟᱺᱠ, ᱴᱚᱭᱟ, ᱠᱤᱥᱱᱤ, ᱪᱟᱨᱮᱡ ᱠᱤᱥᱱᱤ, ᱥᱩᱜᱤ, ᱠᱟᱹᱦᱩ, ᱠᱩᱲᱤᱫ, ᱠᱷᱮᱨᱲᱟ, ᱨᱤᱪᱤ, ᱫᱟᱜ ᱫᱟᱨᱟᱢ ᱪᱮᱬᱮ ᱮᱢᱟᱱ ᱚᱲᱟᱜ ᱟᱛᱚᱢ ᱫᱟᱨᱮ ᱟᱨ ᱵᱤᱡᱽᱞᱤ ᱛᱟᱨ ᱠᱚᱨᱮ ᱠᱚ ᱟᱵᱚᱜ ᱠᱟᱱᱟ ᱟᱨ ᱟᱵ ᱠᱟᱛᱮ ᱱᱤᱨᱡᱟᱞᱟ ᱠᱚ ᱨᱟᱹᱲ ᱡᱚᱝ ᱠᱟᱱᱟ᱾ ᱞᱚᱠᱰᱟᱣᱱ ᱢᱟᱬᱟᱝ ᱫᱚ ᱛᱤᱥ ᱦᱚᱸ ᱱᱚᱸᱠᱟ ᱟᱨ ᱱᱩᱱᱟᱹᱜ ᱥᱟᱸᱜᱮ ᱪᱮᱬᱮ ᱟᱯᱱᱟᱨ ᱚᱲᱟᱜ ᱟᱛᱚᱢ ᱫᱟᱨᱮ ᱨᱮ ᱟᱨ ᱵᱤᱡᱽᱞᱤ ᱛᱟᱨ ᱨᱮ ᱟᱵᱚᱜ ᱫᱚ ᱵᱟᱝ ᱠᱚ ᱧᱮᱞ ᱟᱠᱟᱱᱟ᱾ ᱱᱚᱶᱟ ᱠᱚᱫᱚ ᱠᱚᱨᱚᱱᱟ ᱞᱚᱠ ᱰᱟᱣᱱ ᱨᱮᱭᱟᱜ ᱮᱱᱮᱢ ᱜᱮ ᱢᱚᱱᱮᱜ ᱠᱟᱱᱟ ᱾
ᱯᱟᱹᱪᱨᱤ ᱵᱷᱤᱛᱨᱤ ᱵᱟᱦᱟ ᱫᱟᱨᱮ ᱠᱚᱨᱮ ᱟᱵ ᱠᱟᱛᱮ ᱟᱹᱰᱤ ᱱᱤᱨᱡᱟᱞᱟ ᱠᱚ ᱥᱚᱲᱚᱝ (ᱪᱚᱚᱤᱱᱜ ) ᱡᱚᱝ ᱠᱟᱱᱟ ᱾ ᱩᱱᱠᱩ ᱠᱚ ᱧᱮᱞ ᱛᱮ ᱟᱨ ᱟᱸᱡᱚᱢ ᱛᱮ ᱟᱹᱰᱤ ᱨᱟᱹᱥᱠᱟᱹ ᱟᱹᱭᱠᱟᱣᱜ ᱠᱟᱱᱟ᱾ ᱩᱱᱠᱩ ᱪᱮᱬᱮᱭᱟᱜ ᱠᱮᱱᱮᱠᱚᱛᱮ ᱨᱟᱹᱲ ᱟᱸᱡᱚᱢ ᱠᱟᱛᱮ ᱢᱚᱱᱮᱜ ᱟ, ᱯᱟᱹᱯᱤ ᱢᱟᱹᱱᱢᱤ “ᱠᱚᱨᱚᱱᱟ” ᱟᱡᱟᱨ ᱛᱮ ᱜᱩᱡᱩᱜ ᱧᱮᱞ ᱛᱮ ᱠᱚ ᱨᱟᱹᱥᱠᱟᱹ ᱡᱚᱝ ᱠᱟᱱᱟ᱾ ᱪᱮᱠᱟᱛᱮ ᱢᱟᱹᱱᱢᱤ ᱠᱚ ᱢᱮᱱᱮᱜ ᱟ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱫᱚ ᱟᱠᱚ ᱥᱩᱢᱩᱝ ᱟᱜ ᱠᱟᱱᱟ᱾ ᱚᱱᱟ ᱛᱮ ᱩᱱᱠᱩ ᱪᱮᱬᱮ, ᱞᱚᱠᱰᱟᱣᱱ ᱨᱮ ᱫᱚ ᱠᱚ ᱠᱩᱥᱤᱜ ᱠᱟᱱ ᱜᱮᱭᱟ ᱾ ᱦᱚᱲ ᱠᱚ ᱟᱹᱛᱷᱟᱹᱲᱤ ᱟᱨ ᱚᱱᱠᱟ ᱠᱟᱹᱢᱤ ᱵᱟᱝ ᱠᱷᱟᱱ ᱚᱲᱟᱜ ᱠᱷᱚᱱ ᱵᱟᱠᱚ ᱚᱰᱚᱠ ᱵᱟᱲᱟᱭ ᱠᱟᱱᱟ ᱾ ᱚᱱᱟ ᱪᱮᱠᱟ, ᱩᱱᱠᱩ ᱟᱹᱰᱤ ᱱᱤᱨᱡᱟᱞᱟ ᱟᱨ ᱢᱚᱱᱠᱩᱥᱤ ᱠᱚ ᱩᱰᱟᱹᱣ ᱟᱬᱜᱚ ᱟᱨ ᱩᱰᱟᱹᱣ ᱨᱟᱠᱟᱵ ᱠᱟᱱᱟ ᱾ ᱟᱠᱚᱣᱟᱜ ᱨᱟᱹᱲ ᱦᱚᱸ ᱯᱩᱥᱴᱟᱹᱣ ᱟᱸᱡᱚᱢᱚᱜ ᱠᱟᱱᱟ᱾ ᱞᱚᱠᱰᱟᱣᱱ ᱨᱮ ᱦᱚᱲᱟᱜ ᱦᱟᱹᱱ ᱦᱩᱭᱩᱜ ᱠᱟᱱ ᱨᱮᱦᱚᱸ ᱟᱨ ᱮᱴᱟᱜ ᱠᱚᱣᱟᱜ ᱫᱚ ᱞᱟᱵᱷ ᱦᱩᱭᱩᱜ ᱠᱟᱱ ᱜᱮᱭᱟ᱾
ᱟᱫᱷᱟᱱ ᱦᱚᱲᱟᱜ ᱦᱚᱸ ᱞᱟᱵᱷ ᱦᱩᱭᱩᱜ ᱠᱟᱱ ᱜᱮᱭᱟ ᱾ ᱩᱱᱠᱩ ᱫᱚ ᱠᱚ ᱦᱩᱭᱩᱜ ᱠᱟᱱᱟ ᱚᱱᱚᱞᱤᱭᱟᱹ, ᱜᱮᱭᱟᱱ ᱟᱨᱡᱟᱣ ᱨᱮ ᱠᱤᱛᱟᱹᱵ ᱯᱚᱛᱚᱵ ᱯᱟᱲᱦᱟᱣ ᱯᱟᱹᱨᱠᱟᱹᱣ ᱠᱚ, ᱮᱠᱞᱟ ᱨᱮ ᱫᱩᱲᱩᱵ ᱠᱟᱛᱮ ᱜᱩᱱ ᱵᱤᱨᱫᱟᱹᱯ ᱥᱟᱫᱷᱟᱣ ᱠᱚ, ᱠᱩᱢᱵᱲᱩ ᱮᱢᱟᱱ ᱠᱚ ᱾ ᱱᱩᱠᱩ ᱫᱚ ᱵᱟᱹᱲᱛᱤ ᱠᱟᱛᱮ ᱦᱚᱲ ᱠᱷᱚᱱ ᱥᱟᱦᱟ ᱨᱮ ᱛᱟᱦᱮᱸᱱ ᱠᱟᱛᱮ ᱜᱮ ᱟᱠᱚᱣᱟᱜ ᱠᱟᱹᱢᱤ ᱠᱚ ᱦᱟᱥᱚᱞᱟ ᱾ ᱱᱚᱶᱟ ᱠᱚᱨᱚᱱᱟ ᱞᱚᱠᱰᱟᱣᱱ ᱨᱮ ᱢᱟ ᱚᱠᱚᱭ ᱦᱚᱸ ᱚᱠᱚᱭ ᱵᱟᱢ ᱧᱟᱯᱟᱢ ᱫᱟᱲᱮ ᱟᱭᱟ ᱾ᱱᱚᱸᱠᱟᱱ ᱟᱠᱚᱴ ᱟᱨ ᱩᱴᱷᱵᱚᱥ ᱨᱮ ᱫᱚ ᱡᱟᱦᱟᱸᱭ ᱡᱟᱦᱟᱸ ᱨᱮ ᱛᱟᱦᱮᱸ ᱟᱠᱟᱱᱟᱭ, ᱩᱱᱤ ᱚᱸᱰᱮ ᱜᱮ ᱛᱟᱢᱵᱷᱟᱣ ᱩᱨᱤᱡ ᱮ ᱵᱚᱬᱦᱮ ᱮᱱᱟ ᱾ ᱮᱱᱠᱷᱟᱱ, ᱚᱱᱚᱞᱤᱭᱟᱹ ᱠᱚ ᱫᱚ ᱠᱚ ᱠᱩᱥᱤᱜ ᱠᱟᱱ ᱜᱮᱭᱟ ᱾ ᱚᱱᱟ ᱥᱟᱶᱛᱮ ᱮᱠᱞᱟ ᱨᱮ ᱫᱩᱲᱩᱵ ᱠᱟᱛᱮ ᱜᱩᱱ ᱵᱤᱨᱫᱟᱯ ᱥᱟᱫᱷᱟᱣ ᱦᱚᱲ ᱠᱚᱦᱚᱸ ᱠᱚ ᱠᱩᱥᱤᱜ ᱠᱟᱱᱟ᱾ ᱠᱩᱢᱵᱲᱩ ᱢᱟ ᱛᱟᱺᱦᱩᱸ ᱠᱚ ᱠᱩᱥᱤᱜ ᱠᱟᱱᱟ᱾ᱪᱮᱠᱟᱛᱮ ᱯᱩᱞᱤᱥ ᱠᱚᱫᱚ ᱠᱚᱨᱚᱱᱟ ᱟᱡᱟᱨ ᱴᱮᱠᱟᱣ ᱫᱟᱨᱟᱢ ᱞᱟᱹᱜᱤᱫ ᱦᱚᱲ ᱜᱮ ᱠᱚ ᱜᱩᱯᱤ ᱵᱟᱲᱟ ᱮᱫ ᱠᱚᱣᱟ ᱾ ᱩᱱᱠᱩ ᱚᱱᱛᱮ ᱨᱮ ᱠᱚ ᱡᱷᱮᱸᱜᱟ ᱟᱠᱟᱱ ᱵᱮᱲᱟ ᱨᱮ ᱱᱚᱛᱮ ᱨᱮ ᱠᱩᱢᱵᱲᱩ ᱠᱚ ᱥᱟᱠᱨᱟᱛᱚᱜ ᱠᱟᱱᱟ ᱾ ᱦᱚᱲ ᱠᱚᱦᱚᱸ ᱪᱷᱟᱰ ᱵᱤᱰ ᱵᱟᱦᱨᱮ ᱠᱚ ᱚᱰᱚᱠ ᱵᱟᱲᱟᱜ ᱠᱟᱱ ᱠᱷᱟᱱ ᱩᱱᱠᱩ ᱠᱩᱢᱵᱲᱩ ᱠᱚ ᱟᱞᱟᱜᱟᱜ ᱠᱟᱱᱟ ᱾
ᱡᱚᱛᱚ ᱠᱷᱚᱱ ᱢᱟᱨᱟᱝ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ, ᱱᱚᱶᱟ ᱠᱚᱨᱚᱱᱟ ᱞᱚᱠᱰᱟᱣᱱ ᱨᱮ ᱦᱚᱲ ᱠᱚ ᱦᱩᱞᱥᱤᱧ ᱮᱱᱟ ᱟᱨ ᱠᱚ ᱪᱮᱛᱟᱣ ᱮᱱᱟ᱾ ᱟᱹᱛᱷᱟᱹᱣᱲᱤ ᱦᱚᱲ ᱦᱟᱱᱛᱮ ᱱᱷᱟᱛᱮ ᱵᱟᱠᱚ ᱥᱮᱱ ᱦᱮᱡ ᱵᱟᱲᱟ ᱞᱮᱱ ᱠᱷᱟᱱ ᱚᱡᱚᱛᱷᱟ ᱠᱷᱚᱨᱪᱟ ᱠᱚᱦᱚᱸ ᱠᱚᱢ ᱮᱱᱟ ᱾ ᱠᱷᱚᱨᱪᱟ ᱠᱚᱢ ᱮᱱ ᱠᱷᱟᱱ ᱥᱟᱧᱪᱟᱣ ᱰᱷᱮᱨ ᱮᱱᱟ ᱾ ᱦᱟᱴ ᱵᱟᱡᱟᱨ ᱠᱚᱨᱮ ᱦᱚᱸ ᱞᱮᱠᱷᱟ ᱥᱤᱫ ᱡᱤᱱᱤᱥ ᱠᱚ ᱧᱟᱢᱚᱜ ᱠᱟᱱ ᱤᱭᱟᱹᱛᱮ ᱦᱚᱲ ᱦᱚᱸ ᱠᱚᱢᱥᱚᱢ ᱛᱮ ᱪᱚᱲᱟᱣᱜ ᱠᱚ ᱪᱮᱫ ᱩᱛᱟᱹᱨ ᱠᱮᱫᱼᱟ ᱾
ᱞᱚᱠ ᱰᱟᱣᱱ ᱨᱮ ᱯᱟᱹᱨᱩᱣᱟᱹ ᱫᱚᱠᱟᱱ ᱵᱚᱸᱫ ᱮᱱ ᱠᱷᱟᱱ, ᱯᱟᱹᱨᱣᱟᱹ ᱧᱩ ᱯᱟᱹᱨᱠᱟᱹᱣ ᱦᱚᱲ ᱠᱚ ᱠᱚᱥᱴᱚ ᱮᱱᱟ᱾ ᱢᱮᱱᱠᱷᱟᱱ ᱚᱲᱟᱜ ᱦᱚᱲ ᱫᱚ ᱠᱚ ᱠᱩᱥᱤ ᱮᱱᱟ ᱾ ᱪᱮᱠᱟᱛᱮ ᱯᱟᱹᱨᱣᱟᱹ ᱧᱩ ᱠᱟᱛᱮ ᱟᱠᱚ ᱨᱤᱱ ᱦᱮᱨᱮᱞ ᱡᱟᱦᱟᱸ ᱞᱮᱠᱟ ᱠᱚ ᱩᱛᱯᱟᱛ ᱠᱟᱱ ᱛᱟᱦᱮᱸᱜ ᱟᱨ ᱠᱚ ᱦᱚᱞᱚᱠᱚᱪᱚ ᱮᱫ ᱠᱚ ᱛᱟᱦᱮᱸᱜ, ᱚᱱᱟ ᱠᱚᱦᱚᱸ ᱪᱟᱵᱟ ᱮᱱᱟ ᱟᱨ ᱚᱲᱟᱜ ᱨᱮ ᱥᱩᱞᱩᱠ ᱨᱚᱲ ᱞᱟᱸᱫ ᱟᱹᱪᱩᱨ ᱨᱩᱣᱟᱹᱲ ᱟᱠᱟᱱᱟ ᱾ ᱱᱚᱶᱟ ᱠᱚᱨᱚᱱᱟ ᱟᱡᱟᱨ ᱟᱨ ᱚᱱᱟ ᱠᱷᱚᱱ ᱫᱩᱜ ᱫᱚᱦᱚᱜ ᱨᱮᱭᱟᱜ ᱠᱟᱨᱦᱟᱲ ᱠᱟᱯᱟᱴ ᱯᱟᱴᱮᱫ ( ᱞᱚᱪᱠ ᱰᱚᱣᱱ ) ᱦᱚᱲ ᱮ ᱡᱚᱵᱚᱫ ᱟᱠᱟᱫ ᱠᱚᱣᱟ᱾ ᱱᱤᱛ ᱫᱚ ᱤᱱᱠᱟᱹ ᱨᱮᱦᱚᱸ ᱠᱚ ᱟᱪᱮᱛ ᱟᱠᱟᱱ ᱞᱮᱠᱟ ᱠᱚ ᱧᱮᱞᱚᱜ ᱠᱟᱱᱟ᱾
ᱱᱚᱶᱟ “ᱠᱚᱨᱚᱱᱟ ᱞᱚᱠᱰᱟᱣᱱ” ᱠᱟᱛᱷᱟ ᱫᱚ ᱚᱱᱮ ᱠᱚ ᱢᱮᱱ ᱞᱮᱠᱟ ᱼ ᱚᱠᱚᱭ ᱫᱚᱭ ᱟᱜᱷᱟᱬᱚᱜ ᱠᱟᱱᱟ ᱚᱠᱚᱭ ᱫᱚᱭ ᱠᱟᱸᱜᱟᱲᱚᱜ ᱠᱟᱱ ᱞᱮᱠᱟᱱ ᱠᱟᱛᱷᱟ ᱾ ᱞᱟᱵᱷ ᱦᱚᱸ ᱦᱩᱭᱩᱜ ᱠᱟᱱᱟ ᱟᱨ ᱦᱟᱹᱱ ᱦᱚᱸ ᱦᱩᱭᱩᱜ ᱠᱟᱱᱟ ᱾ ᱱᱚᱶᱟ ᱫᱚ ᱢᱟᱹᱱᱢᱤ ᱠᱚᱣᱟᱜ ᱩᱛᱯᱟᱛ ᱠᱷᱚᱱ ᱜᱮ ᱮᱦᱚᱵ ᱟᱠᱟᱱᱟ ᱾ ᱚᱱᱟ ᱨᱮᱭᱟᱜ ᱦᱟᱹᱱ ᱞᱟᱵᱷ ᱫᱚ, ᱚᱱᱟ ᱛᱮ ᱢᱟᱹᱱᱢᱤ ᱥᱩᱢᱩᱝ ᱜᱮᱠᱚ ᱵᱷᱩᱸᱡᱟᱹᱣ ᱮᱜ ᱟ ᱾ ᱛᱚᱵᱮ, ᱠᱚᱨᱚᱱᱟ ᱞᱮᱠᱟᱱ ᱢᱟᱹᱱᱢᱤ ᱩᱡᱟᱹᱲ ᱟᱡᱟᱨ ᱱᱚᱸᱠᱟ ᱜᱮ ᱦᱮᱡ ᱟᱠᱟ ᱛᱟᱦᱮᱸᱱ ᱢᱟ ᱟᱨ ᱞᱚᱠᱰᱣᱱ ᱪᱟᱹᱞᱩ ᱠᱚᱜ ᱢᱟ ᱢᱮᱱᱛᱮ ᱟᱵᱚ ᱫᱚ ᱵᱟᱵᱚ ᱢᱮᱱᱮᱜᱼᱟ ᱾ ᱱᱚᱶᱟ ᱛᱮ ᱪᱮ ᱱᱚᱸᱠᱟᱱ ᱟᱡᱟᱨ ᱵᱮᱢᱟᱨ ᱛᱮ ᱢᱟᱹᱱᱢᱤ ᱵᱚ ᱢᱩᱪᱟᱹᱫᱚᱜ ᱢᱟ ᱢᱮᱱᱛᱮ ᱦᱚᱸ ᱵᱟᱵᱚ ᱩᱭᱦᱟᱹᱨᱚᱜ ᱠᱟᱱᱟ ᱾ ᱢᱮᱱ ᱨᱮᱭᱟᱜ ᱢᱩᱲ ᱩᱫᱤᱥ ᱫᱚ ᱦᱩᱭᱩᱜ ᱠᱟᱱᱟ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱫᱚ ᱥᱟᱱᱟᱢ ᱡᱮᱜᱮ ᱡᱤᱣᱤ ᱠᱚᱣᱟᱜ ᱠᱟᱱᱟ ᱾ ᱟᱵᱚ ᱢᱟᱹᱱᱢᱤ, ᱱᱚᱸᱠᱟ ᱟᱞ ᱚᱵᱚ ᱠᱟᱹᱢᱤ ᱢᱟ, ᱡᱟᱦᱟᱸ ᱛᱮ ᱟᱨ ᱮᱴᱟᱜ ᱠᱚᱣᱟᱜ ᱵᱟᱧᱪᱟᱣᱜ ᱦᱚᱠ ᱦᱩᱨᱩᱲᱚᱜ ᱢᱟ ᱾
ᱟᱵᱚ ᱥᱟᱱᱟᱢ ᱠᱚᱜᱮ ᱪᱟᱸᱫᱚ ᱵᱚᱸᱜᱟ ᱨᱤᱱ ᱥᱤᱨᱡᱚᱱ ᱠᱟᱱᱟ ᱵᱚ ᱾ ᱪᱟᱹᱫᱚ ᱵᱚᱸᱜᱟ ᱫᱚ ᱡᱚᱛᱚ ᱦᱚᱲᱤᱡ ᱠᱟᱱᱟᱭ ᱾ ᱟᱡᱟᱜ ᱥᱤᱨᱡᱚᱱ ᱢᱟᱹᱱᱢᱤ ᱠᱚ ᱨᱟᱹᱯᱩᱫ ᱠᱷᱟᱱ ᱫᱚ ᱵᱟᱭ ᱧᱮᱞ ᱥᱟᱦᱟᱣᱼᱟ ᱟᱨ ᱩᱱ ᱡᱚᱦᱚᱜ ᱫᱚ ᱥᱤᱢ ᱨᱚᱜᱟ ᱛᱮ ᱡᱟᱦᱟᱸ ᱞᱮᱠᱟ ᱠᱚ ᱜᱩᱡᱩᱜᱼᱟ ᱚᱱᱠᱟ ᱜᱮ ᱠᱚᱨᱚᱱᱟ ᱠᱷᱚᱱ ᱵᱤᱥᱛᱤ ᱵᱚᱛᱚᱨᱟᱱ ᱟᱡᱟᱨ ᱥᱮᱸᱜᱮᱞ ᱫᱟᱜ ᱮ ᱡᱟᱹᱲᱤᱭᱟ᱾ᱦᱩᱭ ᱫᱟᱲᱮᱭᱟᱜᱼᱟ, ᱩᱱ ᱡᱚᱦᱚᱜ ᱫᱚ ᱚᱠᱚᱭ ᱦᱚᱸ ᱵᱟᱧᱪᱟᱣ ᱵᱟᱵᱚ ᱛᱟᱦᱮᱸᱱᱟ᱾ ᱚᱱᱟ ᱛᱮ ᱱᱩᱱᱟᱹᱜ ᱱᱟᱯᱟᱭ ᱥᱤᱨᱡᱚᱱ, ᱟᱨ ᱱᱩᱱᱟᱹᱜ ᱱᱟᱯᱟᱭ ᱡᱤᱣᱤᱫ ᱡᱤᱵᱚᱱ, ᱟᱵᱚ ᱥᱟᱱᱟᱢ ᱠᱚ ᱜᱮ ᱡᱮᱢᱚᱱ ᱵᱚ ᱡᱚᱛᱚᱱ ᱫᱚᱦᱚᱭ ᱢᱟ ᱾
***