ᱵᱩᱨᱩ ᱞᱚᱭᱚᱝ ᱨᱮ ᱢᱚᱱᱮᱫᱚ
ᱟᱠᱚᱴ ᱟᱠᱟᱱ,
ᱜᱟᱺᱦᱤᱨ ᱚᱛ ᱨᱮ ᱟᱹᱠᱤᱞ ᱫᱚ
ᱛᱚᱯᱟ ᱟᱠᱟᱱ
ᱪᱤᱠᱟᱹᱛᱮ ᱫᱚ ᱦᱮᱸ ᱢᱚᱱᱮ ᱩᱛᱱᱟᱹᱣᱜ
ᱫᱚᱢ ᱢᱮᱱᱡᱚᱝ ᱠᱟᱱ?
ᱡᱷᱚᱛᱚ ᱜᱮ ᱠᱚ ᱞᱟᱹᱭᱩᱜ ᱠᱟᱱᱟ
ᱤᱧᱼᱜᱤᱧ ᱟᱹᱠᱤᱞᱟᱱᱟ,
ᱡᱷᱚᱛᱚ ᱜᱮ ᱠᱚ ᱞᱟᱹᱭᱩᱜ
ᱟᱹᱰᱤ ᱜᱤᱧ ᱥᱚᱨᱮᱥᱼᱟᱱᱟ
ᱤᱠᱷᱟᱹᱡ ᱢᱟᱱᱚᱵᱽᱛᱟ ᱫᱚ
ᱩᱠᱩᱨᱤᱡ ᱛᱟᱢ ?
ᱫᱷᱚᱨᱚᱢ ᱢᱟ ᱢᱮᱱᱟᱜ ᱚᱱᱛᱚᱨ ᱨᱮ
ᱱᱤᱨᱟᱹᱭᱮ ᱛᱚᱞᱟᱥ ᱡᱤᱭᱚᱱ ᱨᱮ
ᱟᱡ ᱢᱟ ᱢᱮᱱᱟᱭ ᱟᱡ ᱨᱮ
ᱟᱡᱟᱜ ᱡᱟᱹᱛ ᱜᱚᱵᱚᱞ ᱨᱮ
ᱟᱨᱦᱚᱸ ᱢᱚᱱᱮ ᱪᱟᱜ ᱫᱚᱢ
ᱵᱟᱪᱷᱱᱟᱣ ?
ᱢᱟᱺᱱᱢᱤ ᱢᱟᱺᱱᱢᱤ ᱛᱟᱞᱟ ᱨᱮᱜᱮ
ᱥᱩᱵᱩᱲ ᱵᱟᱹᱱᱩᱜᱼᱟᱱᱟ,
ᱵᱟᱪᱷᱼᱵᱤᱪᱟᱹᱨ, ᱦᱤᱸᱥᱟᱹᱼᱥᱩᱭᱟᱹ ᱛᱮ
ᱫᱤᱱ ᱢᱟ ᱠᱷᱟᱸᱰᱟᱣᱜ ᱠᱟᱱᱟ
ᱛᱤᱥᱚᱜ ᱫᱚ ᱢᱟᱺᱱᱢᱤᱢ
ᱢᱟᱱᱚᱣᱟ ᱟᱹᱨᱩᱜᱼᱟ ?
ᱱᱟᱦᱟᱜ ᱧᱮᱞᱚᱜᱨᱮ ᱵᱚᱭᱦᱟᱼᱵᱚᱭᱦᱟ ᱠᱚ
ᱵᱷᱟᱭᱟᱫᱚᱜ ᱠᱟᱱᱟ,
ᱟᱭᱳᱼᱵᱟᱵᱟ ᱛᱩᱞᱩᱡ ᱢᱟᱺᱱᱼᱢᱚᱦᱚᱛ
ᱠᱷᱟᱴᱚᱜ ᱠᱟᱱᱟ
ᱚᱠᱟᱨᱮᱫᱚ ᱢᱟᱱᱚᱣᱟ ᱛᱮᱫ ᱫᱚ
ᱛᱚᱵᱮ ᱛᱟᱸᱦᱮᱸᱱ ᱠᱟᱱᱟ ?
ᱟᱨᱡᱟᱣ ᱵᱟᱹᱱᱩᱜ ᱨᱮᱦᱚᱸ ᱢᱚᱱᱮ ᱛᱟᱢ ᱫᱚ
ᱚᱴᱟᱝ ᱵᱟᱲᱟᱭ ᱠᱟᱱᱟ,
ᱚᱫᱷᱞᱟ ᱩᱯᱟᱹᱭ ᱨᱮᱱᱟᱜ ᱵᱟᱹᱱᱩᱜ
ᱜᱷᱟᱸᱨᱚᱸᱡᱽ ᱠᱩᱸᱨᱰᱟᱹ ᱦᱚᱸᱢ
ᱟᱠᱟᱣᱟᱱᱟ
ᱪᱤᱠᱟᱹ ᱛᱮ ᱫᱚ ᱦᱮᱸ ᱢᱚᱱᱮ
ᱟᱜᱟᱢ ᱫᱚᱢ ᱵᱟᱦᱟᱣᱼᱟ ?
ᱵᱩᱨᱩ ᱞᱚᱭᱚᱝ ᱨᱮ ᱢᱚᱱᱮᱫᱚ
ᱟᱠᱚᱴ ᱟᱠᱟᱱ,
ᱵᱷᱟᱹᱴᱤ, ᱛᱟᱢᱥᱟ ᱴᱟᱺᱰᱤ,ᱫᱷᱩᱞᱟᱹᱴ ᱛᱮ
ᱢᱚᱱᱮ ᱢᱟ ᱦᱟᱨᱦᱟᱣᱜ ᱠᱟᱱ
ᱱᱚᱝᱠᱟ ᱛᱮ ᱫᱚ ᱥᱟᱶᱛᱟ,
ᱜᱷᱟᱸᱨᱚᱸᱡᱽ ᱫᱚ ᱢᱚᱱᱮ
ᱛᱤᱥᱮᱢ ᱟᱹᱨᱩᱭᱟᱹᱹᱹᱹᱹ???
