ᱛᱟᱺᱜᱤᱧ ᱛᱟᱦᱮᱸ ᱠᱟᱱᱟ
ᱛᱤᱥ ᱠᱷᱚᱱ ᱢᱚᱱᱮ ᱜᱟᱺᱦᱤᱨ ᱨᱮ
ᱯᱷᱟᱹᱜᱩᱱ ᱵᱚᱸᱜᱟ ᱛᱤᱥᱚᱜ
ᱟᱹᱜᱩᱭᱮᱜ ᱟᱢ ᱥᱟᱹᱜᱩᱱ ᱚᱠᱛᱚ ᱾

ᱥᱮᱴᱮᱨ ᱮᱱᱟᱢ ᱟᱞᱟᱭ ᱟᱛᱮ
ᱦᱤᱥᱤᱫ ᱦᱚᱭ ᱦᱟᱞᱟᱭ ᱟᱛᱮ
ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱬᱤ
ᱫᱟᱞᱟᱭ ᱫᱟᱞᱟᱭ ᱟᱛᱮ ᱾

ᱥᱟᱢᱟᱝ ᱯᱟᱪᱷᱮᱧ ᱵᱮᱸᱜᱮᱫᱽ
ᱮᱛᱚᱢ ᱠᱚᱧᱮᱧ ᱞᱮᱵᱮᱫᱽ
ᱚᱠᱟ ᱵᱟᱦᱟ ᱥᱩᱫ ᱨᱮ
ᱤᱧ ᱫᱩᱧ ᱨᱮᱵᱮᱫᱽ ᱾

ᱯᱷᱟᱹᱜᱩᱱ ᱵᱚᱸᱜᱟ ᱥᱟᱹᱜᱩᱱ ᱚᱠᱛᱚ ᱨᱮ
ᱜᱟᱛᱮᱧ ᱞᱟᱹᱜᱤᱫ ᱤᱧ ᱢᱟ ᱪᱮᱦᱮᱞ ᱪᱮᱯᱮᱞ
ᱩᱱᱤ ᱛᱟᱺᱜᱤ ᱩᱱᱤ ᱛᱟᱬᱟᱜ ᱨᱮ ᱤᱧ ᱢᱟ
ᱜᱷᱟᱱᱮ ᱜᱮ ᱟᱡ ᱥᱟᱶ ᱥᱟᱹᱱᱟᱹᱧ ᱧᱮᱯᱮᱞ ᱾

ᱚᱠᱛᱚ ᱯᱚᱞᱚᱢ ᱮᱱᱟ
ᱟᱨ ᱦᱚᱸ ᱟᱹᱰᱤ ᱜᱮ ᱵᱤᱞᱚᱢ ᱮᱱᱟ
ᱚᱠᱟᱭᱮᱱᱟᱭ ᱜᱟᱛᱮᱧ ᱛᱤᱧ ᱫᱚ
ᱵᱟᱝᱜᱮᱭ ᱧᱮᱞᱚᱜ ᱠᱟᱱᱟ ᱾

ᱢᱚᱱᱮ ᱛᱤᱧ ᱢᱟ ᱞᱩᱠᱩᱫ ᱞᱩᱠᱩᱫ
ᱡᱤᱣᱤ ᱛᱤᱧ ᱫᱷᱩᱠᱩᱫ ᱫᱷᱩᱠᱩᱫ
ᱟᱹᱭᱠᱟᱹᱣ ᱜᱚᱫᱟᱹᱧ ᱟᱹᱠᱩᱞ ᱵᱟᱹᱠᱩᱞ
ᱟᱡ ᱛᱟᱺᱜᱤ ᱨᱮ ᱟᱠᱟᱞ ᱥᱟᱠᱟᱞ ᱾

ᱠᱩᱦᱩᱭ ᱢᱮᱥᱮ ᱠᱚᱭᱮᱞ ᱢᱟᱥᱮ
ᱥᱟᱹᱜᱩᱱ ᱚᱠᱛᱚ ᱟᱹᱜᱩᱭ ᱢᱮ ᱫᱮᱥᱮ
ᱯᱷᱟᱹᱜᱩᱱ ᱵᱚᱸᱜᱟᱨᱮ ᱜᱟᱛᱤᱧᱟᱜ ᱵᱮᱣᱨᱟ
ᱵᱩᱜᱤ ᱥᱮᱴᱮᱨᱟᱹᱧ ᱢᱮᱥᱮ ᱾

***