“ᱩᱱᱤᱫᱚ ᱥᱟᱱᱟᱢ ᱯᱟᱲᱟᱜᱮ ᱤᱠᱷᱟᱱ ᱚᱠᱟᱨᱮᱦᱚᱸ ᱵᱟᱝ ᱾ ᱩᱱᱤ ᱵᱟᱰᱚᱦᱤ ᱠᱚ ᱛᱩᱞᱩᱡ ᱛᱮ ᱨᱟᱹᱥᱠᱟᱹ ᱨᱚᱢᱚᱡ ᱧᱮᱧᱮᱞᱤᱭᱟᱹ ᱠᱚᱣᱟᱜ ᱢᱮᱫᱦᱟᱣ ᱨᱮ ᱞᱟᱸᱫᱟᱭ ᱯᱟᱨᱥᱟᱞ-ᱟ ᱟᱨ ᱦᱚᱸ ᱛᱤᱱ ᱨᱮ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱮ ᱯᱮᱨᱮᱡᱟ ᱟᱨ ᱦᱚᱸ ᱛᱤᱱᱨᱮ ᱥᱟᱨᱥᱟᱣᱟᱭ ᱚᱜᱚᱢ ᱫᱚᱨᱭᱟ ᱨᱮᱱᱟᱜ ᱫᱩᱞᱟᱹᱲ ᱟᱨ ᱦᱚᱸ ᱛᱤᱱ ᱨᱮ ᱢᱟᱹᱱᱤᱭᱟ ᱢᱟᱱ ᱞᱟᱹᱜᱤᱫ-ᱮ ᱡᱩᱞ ᱚᱪᱚᱭᱟᱭ ᱦᱩᱞ ᱥᱮᱸᱜᱮᱞ ᱾ ᱦᱚᱭ ᱩᱱᱤᱫᱚ ᱠᱟᱛᱷᱟ ᱪᱤᱛᱟᱹᱨ ᱨᱮᱱᱟᱜ ᱫᱟᱱᱟᱝ ᱨᱤᱱᱤᱡ ᱥᱤᱨᱡᱚᱱᱤᱭᱟᱹ ᱠᱟᱱᱟᱭ ᱾ ᱟᱡᱟᱜ ᱚᱱᱛᱚᱨ ᱡᱤᱣᱤᱨᱮ ᱜᱟᱵᱮ ᱟᱠᱟᱱ ᱠᱟᱛᱷᱟ ᱡᱚᱠᱷᱚᱱ ᱯᱚᱨᱫᱟ ᱨᱮᱱᱟᱜ ᱛᱟᱨᱟᱥ ᱟᱨᱥᱟᱞ ᱛᱮ ᱟᱵᱚᱣᱟᱜ ᱢᱮᱫ ᱥᱟᱢᱟᱝ ᱨᱮ ᱡᱷᱟᱞᱠᱟᱣ-ᱟᱭ ᱚᱱᱟᱜᱮ ᱟᱡᱟᱜ ᱠᱟᱹᱦᱱᱤ , ᱡᱟᱦᱟᱸ ᱧᱮᱞ ᱛᱮ ᱢᱤᱫ ᱜᱟᱹᱲᱤᱠ ᱟᱵᱚᱭ ᱵᱷᱩᱞᱟᱹᱣ ᱠᱟᱵᱚᱱ ᱠᱟᱱᱟᱭ ᱟᱵᱚᱣᱟᱜ ᱥᱟᱱᱟᱢ ᱫᱩᱠ ᱡᱟᱸᱡᱟᱞ ᱟᱨ ᱦᱟᱨᱠᱮᱛ ᱦᱤᱲᱤᱧ ᱟᱛᱮ ᱾ ᱚᱱᱠᱟ ᱜᱮ ᱢᱤᱫ ᱠᱟᱛᱷᱟ ᱪᱤᱛᱟᱹᱨ ᱚᱱᱚᱞᱤᱭᱟᱹ ᱦᱩᱭᱩᱜ ᱠᱟᱱᱟ ᱠᱤᱱ ᱢᱟᱱ ᱥᱭᱟᱢ ᱥᱩᱱᱫᱚᱨ ᱢᱟᱡᱷᱤ ᱾ ᱵᱤᱨ ᱢᱟᱞᱤ ᱠᱟᱹᱢᱤᱭᱟᱹ ᱚᱥᱣᱚᱱᱤ ᱵᱚᱱᱡᱚᱱ ᱢᱩᱨᱢᱩ ᱜᱚᱢᱠᱮ ᱥᱭᱟᱢ ᱥᱩᱱᱫᱚᱨ ᱜᱚᱢᱠᱮ ᱛᱤᱠᱤᱱ ᱥᱟᱞᱟᱜ ᱠᱤᱱ ᱨᱚᱯᱚᱲ ᱞᱮᱱᱟ, ᱛᱮᱦᱮᱧ-ᱟᱜ ᱦᱟᱹᱴᱤᱧ ᱨᱮ ᱚᱱᱟ ᱨᱚᱯᱚᱲ ᱨᱮᱱᱟᱜ ᱢᱤᱫ ᱵᱟᱨ ᱠᱟᱛᱷᱟ ᱥᱚᱫᱚᱨ ᱥᱟᱶ ᱟᱹᱠᱤᱱᱟᱜ ᱡᱤᱭᱚᱱ ᱨᱮᱱᱟᱜ ᱱᱟᱥᱮ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱵᱚᱱ ᱵᱟᱰᱟᱭᱟ ᱾”
ᱵᱤᱨᱢᱟᱹᱞᱤ (ᱵᱤ ᱢᱟ)ᱺ ᱜᱚᱢᱠᱮ ᱵᱤᱨ ᱢᱟᱹᱞᱤ ᱜᱟᱞᱚᱪ ᱟᱠᱷᱲᱟ ᱛᱮ ᱥᱟᱹᱜᱩᱱ ᱫᱟᱨᱟᱢ ᱾ ᱥᱟᱶᱛᱮ ᱟᱵᱤᱱᱟᱜ “ᱠᱩᱠᱞᱤ” ᱯᱷᱤᱞᱤᱢ ᱨᱮᱱᱟᱜ ᱦᱟᱥᱞᱟ ᱠᱷᱟᱹᱛᱤᱨ ᱟᱭᱢᱟ ᱥᱟᱨᱦᱟᱣ ᱾ ᱟᱨ ᱠᱳᱨᱳᱱᱟ ᱟᱡᱟᱨ ᱨᱮ ᱪᱮᱫ ᱞᱮᱠᱟ ᱢᱮᱱᱟᱜ ᱵᱤᱱᱟ ?
ᱥᱭᱟᱢ ᱥᱩᱱᱫᱚᱨ ᱢᱟᱡᱷᱤ(ᱥᱟ ᱢᱟ) ᱺ ᱟᱛᱟᱝ ᱫᱟᱨᱟᱢ ᱜᱚᱢᱠᱮ, ᱟᱯᱮ ᱠᱚᱣᱟᱜ ᱠᱩᱨᱢᱩᱴᱩ ᱟᱨ ᱵᱤᱨᱢᱟᱹᱞᱤ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱦᱚᱸ ᱥᱟᱹᱜᱩᱱ ᱠᱚᱜ ᱢᱟ ᱾ ᱱᱤᱛᱚᱜ ᱫᱤᱥᱚᱢ ᱡᱟᱠᱟᱛ ᱯᱟᱥᱱᱟᱣ ᱟᱠᱟᱱ ᱠᱳᱨᱳᱱᱟ ᱟᱡᱟᱨ ᱛᱟᱞᱟ ᱨᱮ ᱥᱚᱨᱠᱟᱨ-ᱟ ᱠᱟᱛᱷᱟ ᱢᱟᱱᱟᱣ ᱵᱟᱛᱟᱣ ᱟᱛᱮ ᱱᱟᱯᱟᱭ ᱨᱮᱜᱮ ᱢᱮᱱᱟᱜ ᱞᱮᱧᱟ ᱾
ᱵᱤ ᱢᱟᱹ ᱺ ᱜᱚᱢᱠᱮ ᱟᱹᱵᱤᱱᱟᱜ ᱠᱷᱟᱴᱚ ᱩᱯᱩᱨᱩᱢ ᱠᱷᱚᱱ ᱜᱟᱞᱚᱪ ᱞᱟᱝ ᱞᱟᱦᱟ ᱤᱫᱤᱭᱟ ᱾
ᱥᱟ ᱢᱟ ᱺ ᱦᱚᱭ ᱤᱧ ᱫᱚ ᱥᱟᱢ ᱥᱩᱱᱫᱚᱨ ᱢᱟᱡᱷᱤ , ᱟᱹᱛᱩ ᱫᱚ ᱳᱰᱤᱥᱟ ᱯᱚᱱᱚᱛ ᱵᱟᱞᱮᱥᱚᱨ ᱦᱚᱱᱚᱛ ᱨᱟᱡᱽ ᱵᱚᱨᱦᱚᱢᱯᱩᱨ ᱵᱚᱞᱚᱠ ᱠᱩᱞᱰᱤᱦᱟᱹ ᱚᱵᱷᱚᱭᱨᱟᱬᱭᱚ ᱵᱷᱤᱲᱟᱹᱣ ᱛᱤᱱᱠᱩᱥᱤᱭᱟᱹ ᱵᱤᱨ ᱥᱩᱨ ᱚᱥᱛᱚᱨᱚᱥᱤ ᱟᱹᱛᱩ ᱾ᱵᱟᱵᱟ ᱟᱨ ᱟᱭᱚ ᱵᱟᱱᱟ ᱦᱚᱲ ᱠᱤᱱ ᱫᱟᱱᱟᱝ ᱟᱠᱟᱱᱟ ᱾ ᱵᱟᱵᱟ ᱚᱱᱚᱱᱛᱚ ᱢᱟᱡᱷᱤ ᱫᱚ ᱤᱧ ᱯᱮ ᱨᱮᱢᱟᱨ ᱩᱢᱮᱨ ᱨᱮ ᱥᱮᱨᱢᱟ ᱫᱤᱥᱚᱢ ᱮᱱᱟᱭ ᱟᱨ ᱟᱭᱚ ᱠᱟᱱᱫᱤᱱᱤ ᱫᱚ ᱒᱐᱐᱐ ᱥᱟᱞ ᱨᱮ ᱵᱚᱝᱜᱟ ᱮᱱᱟᱭ ᱾ ᱤᱧ ᱫᱟᱹᱭ ᱢᱮᱥᱟ ᱟᱛᱮᱫ ᱟᱞᱮ ᱛᱩᱨᱩᱭ ᱵᱚᱭᱦᱟ ᱟᱨ ᱤᱧ ᱡᱚᱛᱚ ᱠᱷᱚᱱ ᱦᱩᱰᱤᱧᱤᱡ ᱾
ᱵᱤ ᱢᱟ ᱺᱢᱮᱱ ᱠᱮᱫᱟ ᱵᱤᱱ ᱵᱟᱵᱟᱛᱤᱠᱤᱱ ᱯᱮ ᱥᱮᱨᱢᱟ ᱩᱢᱮᱨ ᱨᱮ ᱵᱟᱵᱟ ᱛᱤᱠᱤᱱ ᱠᱤᱱ ᱵᱟᱹᱜᱤ ᱦᱟᱫ ᱵᱤᱱᱟ , ᱮᱱ ᱠᱷᱟᱱ ᱟᱭᱚ ᱜᱮ ᱟᱵᱤᱱᱟᱜ ᱦᱟᱨᱟᱵᱩᱨᱩ ᱚᱞ ᱯᱟᱲᱦᱟᱣ ᱨᱮ ᱟᱭᱚ ᱛᱤᱠᱤᱱᱟᱜ ᱮᱱᱮᱢ ᱟᱹᱰᱤᱜᱟᱱ ᱮᱱᱮᱢ ᱢᱮᱱᱟᱜ-ᱟ !
ᱥᱟ ᱢᱟ ᱺ ᱦᱚᱭ ᱟᱭᱚ ᱛᱤᱠᱤᱱᱟᱜ ᱮᱱᱮᱢ ᱢᱟ ᱢᱮᱱᱟᱜ ᱜᱮᱭᱟ , ᱚᱱᱟᱥᱟᱶ ᱤᱧ ᱨᱤᱱ ᱫᱟᱫᱟ ᱛᱮᱠᱚ , ᱵᱟᱵᱟ ᱛᱮᱠᱚ ᱛᱩᱨᱩᱭ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ ᱩᱱᱠᱩ ᱠᱷᱚᱱ ᱢᱤᱫ ᱦᱚᱯᱚᱱ ᱵᱟ ᱟᱨ ᱦᱚᱯᱚᱱ ᱟᱭᱚ ᱥᱟᱶᱛᱮ ᱚᱠᱛᱚ ᱪᱟᱞᱟᱣ ᱤᱫᱤᱭᱮᱱᱟ ᱚᱱᱠᱟ ᱜᱮ ᱟᱭᱢᱟ ᱦᱚᱲ ᱠᱚ ᱜᱚᱲᱚ ᱟᱠᱟᱫᱤᱧᱟ , ᱡᱟᱦᱟᱸᱭ ᱠᱚᱣᱟᱜ ᱜᱚᱲᱚ ᱥᱚᱦᱚᱫ ᱡᱤᱭᱚᱱ ᱨᱮ ᱵᱟᱝ ᱦᱤᱲᱤᱧᱚᱜ-ᱟ ᱾
ᱵᱤ ᱢᱟ ᱺ ᱟᱹᱵᱤᱱᱟᱜ ᱟᱱᱟᱴ ᱡᱤᱭᱚᱱ ᱠᱷᱚᱱ ᱢᱤᱫ ᱵᱟᱨ ᱯᱚᱫᱽ ᱵᱤᱱ ᱞᱟᱹᱭ-ᱟ, ᱪᱮᱫ ᱞᱮᱠᱟᱨᱮ ᱩᱱᱟᱹᱜ ᱟᱱᱟᱴ ᱵᱤᱱ ᱯᱟᱨᱚᱢ ᱠᱮᱫ-ᱟ ?
ᱥᱟ ᱢᱟ ᱺ ᱵᱟᱵᱟ ᱫᱟᱱᱟᱝ ᱮᱱ ᱛᱟᱭᱚᱢ ᱟᱹᱰᱤ ᱟᱱᱟᱴ ᱟᱨ ᱱᱟᱪᱟᱨ ᱛᱮ ᱚᱠᱛᱚ ᱠᱷᱟᱱᱰᱟᱣ ᱞᱮᱱᱟ , ᱚᱠᱛᱚ ᱱᱚᱝᱠᱟ ᱛᱟᱦᱮᱸ ᱞᱮᱱᱟ ᱫᱟᱫᱟ ᱛᱮᱠᱚ ᱧᱤᱫᱟᱹ ᱧᱩᱛᱟᱹᱛ ᱵᱤᱨ ᱠᱷᱚᱱ ᱥᱟᱦᱟᱱ ᱢᱟᱜ ᱟᱜᱩ ᱟᱛᱮᱫ ᱥᱮᱛᱟᱜ ᱥᱮᱛᱟᱜ ᱥᱩᱨ ᱵᱟᱡᱟᱨ ᱨᱮᱠᱚ ᱟᱹᱠᱷᱨᱤᱧ-ᱟ ᱟᱨ ᱚᱱᱟ ᱯᱩᱭᱥᱟᱹᱛᱮ ᱨᱟᱥᱚᱱ ᱠᱤᱨᱤᱧ ᱠᱟᱛᱮ ᱚᱲᱟᱜ ᱪᱩᱞᱷᱟᱹ ᱨᱮ ᱥᱮᱸᱜᱮᱞ ᱡᱩᱞᱩᱜ-ᱟ ᱟᱨ ᱤᱥᱠᱩᱞ ᱠᱚ ᱪᱟᱞᱟᱜ ᱛᱟᱦᱮᱸᱫ ᱾ ᱚᱱᱮ ᱢᱮᱱ ᱠᱮᱫ ᱞᱮᱠᱟ ᱟᱸᱥ ᱟᱨ ᱢᱚᱱᱮ ᱛᱟᱦᱮᱱ ᱠᱷᱟᱱ ᱪᱚᱴ ᱪᱟᱸᱫᱚ ᱡᱟᱦᱟᱱ ᱨᱩᱯ ᱛᱮᱜᱮ ᱜᱚᱲᱚ ᱦᱟᱢᱟᱭ , ᱚᱱᱠᱟ ᱜᱮ ᱟᱹᱛᱩ ᱥᱩᱨ ᱟᱥᱲᱟ ᱨᱮ ᱢᱮᱴᱤᱨᱠ ᱮᱢ ᱠᱮᱫ ᱛᱟᱭᱚᱢ ᱠᱚᱴᱚᱠ ᱨᱮᱱᱟᱜ ᱵᱳᱥ ᱨᱮ ᱰᱤᱯᱞᱳᱢᱟ ᱞᱤᱧ ᱥᱟᱹᱛ ᱠᱮᱫ ᱚᱠᱛᱚ ᱟᱹᱰᱤᱜᱟᱱ ᱡᱚᱴᱟᱣ ᱠᱚ ᱜᱚᱲᱚ ᱟᱠᱟᱫᱤᱧᱟ , ᱡᱚᱴᱟᱣ ᱠᱚ ᱟᱠᱚ ᱠᱚ ᱯᱟᱲᱦᱟᱣ ᱦᱩᱭ ᱠᱮᱫ ᱛᱟᱭᱚᱢ ᱟᱠᱚᱣᱟ ᱯᱚᱛᱚᱵ ᱤᱧᱤᱧ ᱯᱟᱲᱦᱟᱣ ᱛᱟᱦᱮᱸᱫ ᱾ᱥᱟᱶᱛᱮ ᱦᱚᱯᱚᱱ-ᱵᱟ ᱟᱨ ᱟᱡᱤᱡ ᱦᱚᱯᱚᱱ ᱩᱱᱤ ᱦᱚᱸ ᱚᱞᱚᱜ ᱯᱟᱲᱦᱟᱣ ᱨᱮ ᱟᱰᱤᱜᱮᱠᱤᱱ ᱜᱚᱲᱚ ᱟᱠᱟᱫᱤᱧᱟ ᱾ ᱱᱩᱠᱩ ᱥᱟᱱᱟᱢ ᱠᱚ ᱡᱤᱣᱤᱫ ᱛᱟᱦᱮᱱ ᱵᱷᱩᱨ ᱩᱭᱦᱟᱹᱨ ᱠᱚ ᱛᱟᱦᱮᱱᱟ ᱾ᱚᱱᱰᱮ ᱯᱟᱲᱦᱟᱣ ᱥᱟᱹᱛ ᱠᱮᱫ ᱛᱟᱭᱚᱢ ᱤᱧ ᱑᱙᱙᱓ ᱚᱜᱚᱥᱴ ᱥᱟᱞ ᱨᱮ ᱠᱚᱬᱤᱦᱟ ᱮᱱ ᱴᱤ ᱯᱤ ᱥᱤ ᱨᱮ ᱪᱟᱹᱠᱨᱤᱧ ᱧᱟᱢ ᱠᱮᱫ-ᱟ ᱟᱨ ᱛᱮᱦᱮᱧ ᱵᱤᱦᱟᱨ ᱵᱟᱨᱰ ᱨᱮᱱᱟᱜ ᱮᱱ ᱴᱤ ᱯᱤ ᱥᱤ ᱨᱮ ᱥᱤ ᱮᱱᱰ ᱟᱭᱤ ᱤᱨᱮᱠᱥᱚᱱ ᱰᱤᱯᱟᱨᱴᱢᱮᱱᱴ ᱨᱮ ᱢᱮᱱᱮᱡᱚᱨ- ᱞᱮᱠᱟᱛᱮ ᱢᱤᱱᱟᱹᱧ ᱜᱮᱭᱟ ᱾
ᱵᱤᱹ ᱢᱟᱹ ᱺ ᱟᱹᱵᱤᱱ ᱟᱹᱛᱩ ᱨᱮᱱᱟᱜ ᱡᱟᱦᱟᱸ ᱵᱩᱴᱟᱹ ᱵᱤᱱ ᱮᱢ ᱠᱮᱫᱟ ᱚᱱᱟ ᱫᱚ ᱵᱷᱚᱸᱡᱽ ᱨᱮᱱᱟᱜ ᱵᱟᱞᱮᱥᱚᱨ ᱦᱚᱱᱚᱛ ᱡᱟᱦᱟᱸ ᱫᱚ ᱪᱷᱟᱹᱛᱤᱠ ᱜᱟᱡᱟᱲ ᱠᱟᱱᱟ ᱚᱱᱟ ᱥᱟᱶ ᱛᱮ ᱚᱲᱟᱜ ᱨᱮᱱᱟᱜ ᱱᱟᱪᱟᱨ ᱦᱟᱞᱟᱛ ᱨᱮ ᱪᱮᱫ ᱞᱮᱠᱟᱨᱮ ᱩᱱᱟᱹᱜ ᱨᱩᱥᱤᱠᱟ ᱫᱚᱵᱤᱱ ᱥᱟᱡᱟᱣ ᱮᱱᱟ ᱪᱮᱫ ᱞᱮᱠᱟᱨᱮ ᱨᱩᱥᱤᱠᱟ ᱡᱤᱭᱚᱱ ᱮᱛᱚᱦᱚᱵ ᱮᱱᱟ ?
ᱥᱟ ᱢᱟᱺ ᱟᱹᱛᱩ ᱫᱚ ᱵᱷᱚᱸᱡᱽ ᱟᱨ ᱵᱟᱞᱮᱥᱚᱨ ᱥᱤᱢᱟᱹ ᱨᱮ ᱢᱮᱱᱟᱜ-ᱟ , ᱟᱞᱮ ᱟᱛᱩ ᱠᱷᱚᱱ ᱡᱟᱦᱟᱸ ᱛᱤᱱᱟᱹᱜ ᱵᱮᱲᱟ ᱨᱟᱠᱟᱵ ᱥᱮᱫ ᱮᱢ ᱪᱟᱞᱟᱣ ᱤᱫᱤ ᱠᱷᱟᱱ ᱫᱤᱠᱩ ᱟᱹᱛᱩ ᱯᱟᱲᱟᱣ-ᱟ ᱾ᱚᱱᱟᱛᱮ ᱥᱟᱱᱛᱟᱲ ᱟᱨ ᱪᱷᱟᱹᱛᱤᱠ ᱵᱟᱱᱟᱨ ᱯᱟᱨᱥᱤ ᱨᱮᱱᱟᱟᱜ ᱟᱹᱨᱤᱪᱟᱹᱞᱤ ᱚᱨᱥᱚᱝ ᱯᱟᱲᱟᱣ ᱞᱮᱱᱟ ᱾ ᱤᱧᱟᱜ ᱩᱭᱦᱟᱹᱨ ᱛᱮᱫᱚ ᱟᱵᱚ ᱥᱟᱱᱛᱟᱲ ᱠᱷᱮᱨᱣᱟᱲ ᱦᱚᱯᱚᱱ ᱫᱚ ᱮᱱᱮᱡ ᱥᱮᱨᱮᱧ ᱫᱚ ᱢᱟᱭᱟᱢ ᱨᱮ ᱢᱮᱱᱟᱜ ᱛᱟᱵᱚᱱᱟ , ᱡᱚᱛᱚ ᱦᱚᱲ ᱜᱮᱵᱚᱱ ᱨᱩᱥᱤᱠᱟ ᱜᱮᱭᱟ ᱾ᱟᱞᱮ ᱟᱹᱛᱩ ᱴᱚᱞᱟ ᱯᱟᱲᱟ ᱨᱮ ᱥᱟᱱᱛᱟᱲ ᱡᱟᱛᱨᱟ ᱰᱟᱨᱢᱟ ᱦᱩᱭᱩᱜ ᱛᱟᱦᱮᱸᱫ ᱚᱱᱟᱠᱚ ᱧᱮᱞ ᱧᱤᱫᱟᱹ ᱞᱮ ᱪᱟᱞᱟᱜ ᱛᱟᱦᱮᱸᱫ, ᱤᱥᱠᱩᱞ ᱠᱚᱨᱮ ᱡᱟᱹᱛᱤᱭᱟᱹᱨᱤ ᱯᱟᱨᱟᱵ ᱠᱚᱨᱮ , ᱢᱟᱪᱮᱛ ᱠᱚᱣᱟᱜ ᱵᱤᱫᱟᱹᱭ ᱟᱠᱷᱲᱟ ᱠᱚᱨᱮᱵᱚᱱ ᱥᱮᱨᱮᱧ ᱵᱟᱲᱟᱭ ᱛᱟᱦᱮᱸᱫ ᱾ ᱱᱟᱥᱮᱱᱟᱜ ᱞᱮ ᱦᱟᱨᱟ ᱤᱫᱤᱭᱮᱱ ᱠᱷᱟᱱ ᱤᱥᱠᱩᱞ ᱨᱮᱱᱟᱜ ᱰᱟᱨᱢᱟ , ᱴᱚᱞᱟ ᱟᱨ ᱵᱟᱡᱟᱨ ᱨᱮᱱᱟᱜ ᱥᱟᱱᱛᱟᱲ ᱪᱷᱟᱹᱛᱤᱠ ᱡᱚᱛᱚ ᱦᱚᱲ ᱠᱚᱣᱟᱜ ᱠᱟᱞᱪᱟᱨ ᱠᱟᱹᱢᱤ ᱨᱮ ᱵᱟᱹᱭ ᱵᱟᱹᱭ ᱛᱮ ᱥᱮᱞᱮᱫ ᱦᱩᱭ ᱮᱱᱟ ᱾ ᱥᱟᱱᱛᱟᱲ ᱮᱱᱮᱡ ᱥᱮᱨᱮᱧ ᱨᱩ ᱚᱨᱚᱝ ᱢᱟ ᱥᱟᱵ ᱦᱩᱭ ᱮᱱ ᱜᱮᱭᱟ , ᱜᱚᱨᱚᱡᱽ ᱱᱩᱱᱟᱹᱜ ᱮᱱᱟ ᱡᱮ ᱪᱷᱟᱹᱛᱤᱠ ᱫᱟᱥᱠᱟᱴᱷᱤᱭᱟ ᱨᱮᱦᱚᱸ ᱤᱧᱜ ᱜᱮ ᱜᱟᱭᱚᱠ, ᱯᱟᱞᱟ ᱨᱮ ᱢᱤᱫ ᱡᱚᱴᱟᱣ ᱰᱮᱥᱠ ᱠᱚᱭ ᱨᱩ ᱵᱟᱲᱟᱭᱟ ᱛᱟᱦᱮᱸᱫ ᱩᱱᱤ ᱢᱮᱱ ᱠᱮᱫ-ᱟ ᱯᱟᱞᱟ ᱭᱟᱵᱚᱱ ᱟᱡ ᱮ ᱨᱩ ᱭᱟ ᱤᱧᱤᱧ ᱥᱮᱨᱮᱧ-ᱟ ᱟᱨ ᱪᱷᱟᱹᱛᱤᱠ ᱟᱹᱛᱩᱨᱮᱞᱮ ᱠᱚᱨᱟᱣ ᱠᱮᱫᱟ, ᱢᱟᱪᱮᱫ ᱠᱚᱦᱚᱸᱠᱚ ᱵᱟᱰᱟᱭ ᱠᱮᱫᱟ , ᱩᱱᱠᱩ ᱦᱚᱸ ᱠᱚ ᱥᱟᱨᱦᱟᱣ ᱠᱮᱫ-ᱟ ᱾
ᱵᱤ ᱢᱟ ᱺ ᱮᱱᱮᱡ ᱥᱮᱨᱮᱧ ᱢᱟ ᱡᱚᱛᱷᱟᱛ ᱜᱮᱭᱟ ᱥᱟᱱᱟᱢ ᱥᱟᱱᱛᱟᱲ ᱵᱚᱱ ᱨᱩᱥᱤᱠᱟ ᱜᱮᱭᱟ ᱤᱠᱷᱟᱹᱱ ᱱᱚᱣᱟ ᱚᱵᱷᱤᱱᱚᱭ ᱫᱚ ᱥᱟᱞᱟᱜ ᱥᱟᱹᱜᱟᱹᱭ ᱵᱟᱝ ᱵᱩᱡᱷᱟᱹᱣ ᱞᱮᱱᱟ ?
ᱥᱟ ᱢᱟ ᱺᱩᱱᱫᱤᱱ ᱥᱠᱩᱞ ᱨᱮ ᱜᱤᱛᱤᱱᱟᱴᱭᱚ ᱦᱩᱭᱩᱜ ᱛᱟᱦᱮᱸᱫ,ᱚᱱᱮ ᱯᱟᱞᱟ ᱫᱟᱥᱠᱟᱴᱷᱤᱭᱟ ᱠᱮᱫ ᱛᱟᱭᱚᱢ ᱤᱥᱠᱩᱞ ᱨᱮᱱᱤᱡ ᱢᱤᱫ ᱢᱟᱪᱮᱫ ᱢᱤᱫ ᱜᱤᱛᱤᱱᱟᱴᱭᱚ ᱨᱮ ᱢᱮᱥᱟ ᱠᱮᱫ ᱞᱤᱧᱟᱭ ᱟᱨ ᱚᱱᱟ ᱨᱮᱦᱚᱸ ᱯᱟᱴ ᱥᱟᱶ ᱫᱟᱥᱠᱟᱴᱷᱤᱭᱟ ᱠᱮᱫᱟᱞᱤᱧ ᱾ ᱚᱱᱟ ᱛᱟᱭᱚᱢ ᱡᱚᱠᱷᱚᱱ ᱤᱧ ᱑᱙᱘᱙ ᱥᱟᱞ ᱫᱚᱥᱟᱨ ᱥᱮᱨᱢᱟ ᱰᱤᱯᱞᱳᱢᱟ ᱚᱞᱚᱜ ᱡᱚᱦᱚ ᱥᱤᱱᱤᱭᱚᱨ ᱠᱚᱲᱟ ᱠᱚ ᱠᱷᱩᱱᱴᱟᱹ ᱨᱮᱱᱟᱜ ᱥᱤᱢᱜᱟᱹᱰᱤᱭᱟᱹ ᱯᱟᱛᱟ ᱨᱮ ᱡᱟᱛᱨᱟ ᱯᱚᱛᱚᱵ ᱥᱚᱫᱚᱨ ᱞᱟᱹᱜᱤᱫ ᱦᱚᱥᱴᱮᱞ ᱨᱮ ᱨᱤᱭᱮᱞᱥᱮᱞ ᱮᱫ ᱛᱟᱦᱮᱸᱫ ᱠᱚ, ᱩᱱ ᱡᱚᱦᱚ ᱢᱩᱲᱩᱛ ᱨᱩᱞ ᱮ ᱦᱟᱛᱟᱣ ᱞᱮᱫ ᱠᱚᱲᱟ ᱵᱟᱭ ᱛᱟᱦᱮᱸ ᱠᱟᱱᱟ , ᱧᱤᱤᱧ ᱢᱮᱱ ᱠᱮᱫᱟ ᱫᱮ ᱟᱡ ᱴᱷᱟᱶ ᱨᱮ ᱤᱧᱤᱧ ᱵᱤᱰᱟᱹᱣ ᱦᱟᱱᱛᱟᱲᱟ ᱾ ᱩᱱᱠᱩ ᱠᱚᱲᱟ ᱠᱚ ᱤᱧᱟᱜ ᱯᱟᱨᱴ ᱧᱮᱞ ᱟᱛᱮᱫ ᱠᱚ ᱢᱮᱱ ᱠᱮᱫᱟ ᱟᱢ ᱜᱮ ᱵᱮᱥ ᱮᱢ ᱠᱚᱨᱟᱣ ᱮᱫᱟ, ᱟᱢ ᱜᱮ ᱨᱩᱞ ᱢᱮ ᱾ᱚᱱᱟ ᱥᱮᱨᱢᱟ ᱫᱟᱥᱟᱸᱭ ᱪᱷᱩᱴᱤ ᱨᱮ ᱥᱤᱢᱜᱟᱹᱰᱤᱭᱟᱹᱨᱮᱞᱮ ᱠᱮᱢᱯ ᱠᱮᱫᱟ ᱟᱨ ᱯᱩᱭᱞᱩ ᱥᱤᱨᱯᱟᱹ ᱟᱢᱮᱴ ᱟᱛᱮᱫ ᱞᱮ ᱡᱤᱛᱠᱟᱹᱨ ᱮᱱᱟ ᱾ᱡᱟᱛᱨᱟ ᱨᱮ ᱯᱚᱛᱚᱵᱧᱩᱛᱩᱢ ᱛᱟᱦᱮᱸ ᱠᱟᱱᱟ “ᱥᱤᱠᱷᱱᱟᱹᱛ ᱨᱮᱱᱟᱜ ᱦᱚᱨ ᱰᱟᱦᱟᱨ”᱾ᱚᱱᱟ ᱡᱟᱛᱨᱟ ᱨᱮ ᱢᱤᱫ ᱤᱝᱞᱤᱥ ᱰᱟᱭᱞᱳᱜ ᱞᱟᱹᱜᱤᱫ ᱢᱤᱫ ᱦᱚᱲ ᱥᱴᱮᱡ ᱯᱮᱱᱰᱮᱞ ᱪᱮᱛᱟᱱ ᱨᱮ ᱜᱷᱚᱬᱟ ᱟᱬᱜᱚ ᱞᱤᱫᱤᱧᱟᱭ ᱩᱭᱦᱟᱹᱨ ᱢᱮᱱᱟᱜ-ᱟ ᱾ᱚᱱᱟ ᱫᱚᱥᱟᱨ ᱥᱮᱨᱢᱟ ᱦᱚᱸ ᱟᱨ ᱢᱤᱫ ᱯᱚᱛᱚᱵ “ᱟᱢᱟᱜ ᱪᱮᱫ ᱪᱟᱞᱟᱜ ᱠᱟᱱᱟ” ᱞᱮ ᱥᱚᱫᱚᱨ ᱞᱮᱫ-ᱟ ᱚᱱᱟ ᱦᱚᱸ ᱯᱩᱭᱞᱩ ᱥᱤᱨᱯᱟᱹᱭ ᱧᱟᱢ ᱞᱮᱫᱟ ᱾ᱚᱞ ᱯᱟᱲᱦᱟᱣ ᱢᱩᱪᱟᱹᱫ ᱮᱱ ᱛᱟᱭᱚᱢ ᱪᱟᱹᱠᱨᱤ ᱧᱟᱢ ᱛᱟᱞᱟ ᱨᱮ ᱟᱹᱛᱩ ᱨᱮ ᱚᱱᱟ ᱚᱯᱨᱟ ᱠᱷᱮᱞᱚᱸᱰ ᱪᱟᱹᱞᱩ ᱞᱮᱱ ᱜᱮᱭᱟ ᱾
ᱵᱤ ᱢᱟ ᱺᱚᱱᱰᱮ ᱠᱷᱚᱱ ᱪᱮᱫ ᱞᱮᱠᱟ ᱨᱮ ᱟᱞᱵᱚᱢ ᱟᱨ ᱯᱷᱤᱞᱤᱢ ᱥᱮᱫᱵᱤᱱ ᱢᱚᱱᱮ ᱠᱮᱭᱟ ?
ᱥᱟ ᱢᱟ ᱺ ᱪᱟᱹᱠᱨᱤ ᱠᱮᱫ ᱛᱟᱭᱚᱢ ᱒᱐᱑᱔ ᱥᱟᱞ ᱨᱮ ᱚᱱᱚᱞᱤᱭᱟᱹ ᱜᱟᱶᱛᱟ ᱦᱟᱜ ᱱᱮᱣᱛᱟ ᱛᱮ ᱢᱤᱫ ᱜᱟᱞᱚᱪ ᱨᱮᱞᱤᱧ ᱥᱮᱞᱮᱫ ᱞᱮᱱᱟ, ᱚᱱᱰᱮᱱᱟᱜ ᱜᱟᱞᱚᱪ ᱛᱟᱭᱚᱢ ᱵᱟᱸᱠᱩᱲᱟ ᱨᱤᱱᱤᱡ ᱢᱤᱫ ᱜᱚᱢᱠᱮ ᱥᱟᱶ ᱟᱭᱢᱟ ᱜᱚᱢᱠᱮ ᱠᱚ ᱢᱮᱛᱟ ᱦᱟᱹᱫᱤᱧ-ᱟ ᱟᱨ ᱫᱚᱦᱚᱲᱟ ᱤᱧᱟᱜ ᱠᱟᱹᱢᱤ ᱨᱮ ᱟᱬᱜᱚᱱ ᱞᱟᱹᱜᱤᱫ, ᱯᱷᱮᱥᱵᱩᱠ ᱟᱨ ᱥᱳᱥᱤᱭᱟᱞ ᱢᱤᱰᱤᱭᱟ ᱨᱮ ᱦᱚᱸ ᱟᱹᱰᱤᱜᱟᱱ ᱡᱚᱴᱟᱣ ᱠᱚ ᱱᱮᱦᱚᱨ ᱠᱤᱫᱤᱧᱟ ᱠᱟᱹᱢᱤ ᱛᱮ ᱟᱬᱜᱚᱱ ᱞᱟᱹᱜᱤᱫ ᱾ ᱤᱧ ᱦᱚᱸ ᱢᱚᱱᱮᱛᱤᱧ ᱵᱷᱟᱹᱵᱤ ᱤᱫᱤ ᱠᱮᱫ-ᱟ ᱡᱩᱣᱟᱹᱱ ᱠᱚ ᱡᱟᱹᱛᱤ ᱥᱟᱶᱛᱟ ᱯᱟᱹᱨᱥᱤ ᱞᱟᱹᱜᱤᱫ ᱵᱟᱝ ᱵᱚ ᱠᱟᱹᱢᱤ ᱞᱮᱠᱷᱟᱱ ᱟᱵᱚ ᱵᱚ ᱟᱫ ᱪᱟᱵᱟ-ᱟ ᱾ ᱚᱱᱟ ᱩᱭᱦᱟᱹᱨ ᱛᱮ ᱯᱩᱭᱞᱩ ᱟᱞᱵᱚᱢ ᱒᱐᱑᱕ ᱥᱟᱞ ᱨᱮ “ᱵᱤᱱ ᱜᱤᱨᱟᱹ ᱯᱮᱲᱟ” ᱥᱟᱯᱲᱟᱣ ᱮᱱᱟ ᱾ ᱵᱤᱱᱜᱤᱨᱟᱹ ᱯᱮᱲᱟ ᱟᱭᱢᱟ ᱦᱚᱲ ᱠᱚ ᱥᱟᱨᱦᱟᱣ ᱠᱮᱫᱟ ᱾ ᱡᱟᱦᱟᱸ ᱤᱧᱟᱜ ᱟᱥᱟ ᱠᱷᱚᱱ ᱵᱟᱹᱲᱛᱤ ᱜᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱥᱟᱨᱦᱟᱣ ᱟᱨ ᱨᱟᱹᱥᱠᱟᱹᱛᱮ ᱯᱷᱤᱪᱚᱨ ᱯᱷᱤᱞᱤᱢ ᱵᱮᱱᱟᱣ ᱥᱮᱫ ᱢᱚᱱᱮ ᱭᱮᱱᱟ ᱾ᱡᱩᱞᱟᱭ ᱒᱐᱑᱘ ᱨᱮ ᱟᱞᱮ “ᱥᱩᱵᱚᱨᱱᱟᱠᱷᱟ ᱥᱩᱨᱩᱵᱟᱹᱞᱤ” ᱞᱮ ᱨᱤᱮᱞᱤᱡ ᱠᱮᱫ-ᱟ ᱾ ᱚᱱᱟ ᱦᱚᱸ ᱟᱭᱢᱟ ᱦᱚᱲ ᱠᱚ ᱠᱩᱥᱤᱭᱟᱫᱟ ᱾ ᱟᱹᱰᱤᱜᱟᱱ ᱧᱮᱧᱮᱞᱤᱭᱟᱹ ᱱᱚᱝᱠᱟ ᱠᱚ ᱢᱮᱛᱟᱫᱤᱧᱟ ᱥᱟᱱᱛᱟᱲ ᱯᱷᱤᱞᱤᱢ ᱤᱱᱰᱚᱥᱴᱨᱤ ᱨᱮ ᱱᱚᱣᱟ ᱯᱷᱤᱞᱤᱢ ᱫᱚ ᱱᱟᱶᱟ ᱡᱚᱠᱷᱟᱭ ᱵᱮᱱᱟᱣ ᱠᱮᱫ-ᱟ ᱾ ᱟᱨ ᱦᱚᱲ ᱱᱚᱣᱟ ᱡᱚᱠᱷᱟ ᱨᱮ ᱯᱷᱤᱞᱤᱢ ᱠᱚ ᱵᱮᱱᱟᱣ-ᱟ ᱾ᱚᱱᱟ ᱛᱟᱭᱚᱢ ᱱᱚᱜᱚᱭ “ᱠᱩᱠᱞᱤ” ᱒᱐᱑᱙ ᱡᱩᱞᱟᱭ ᱨᱮ ᱨᱤᱞᱤᱡ ᱠᱮᱫ-ᱟᱞᱮ᱾
ᱵᱤ ᱢᱟ ᱺ ᱟᱹᱵᱤᱱᱟᱜ “ᱠᱩᱠᱩᱞᱤ” ᱯᱷᱤᱞᱤᱢ ᱤᱫᱤᱭᱟᱛᱮᱫ ᱠᱷᱟᱴᱚᱛᱮ ᱱᱟᱥᱮᱱᱟᱜ ᱞᱟᱹᱭ ᱵᱤᱱ ?
ᱥᱟ ᱢᱟ ᱺ ᱠᱩᱠᱞᱤ ᱫᱚ ᱱᱟᱜᱟᱨ ᱵᱟᱡᱟᱨ ᱠᱷᱚᱱ ᱟᱹᱰᱤ ᱥᱟᱦᱟᱨᱮ ᱢᱤᱫ ᱥᱟᱱᱛᱟᱲ ᱟᱹᱛᱩ ᱨᱤᱱᱤᱡ ᱢᱤᱫ ᱦᱩᱰᱤᱧ ᱥᱟᱱᱛᱟᱲ ᱥᱠᱩᱲᱤ ᱜᱤᱫᱨᱟᱹ ᱢᱚᱱᱮᱨᱮ ᱥᱤᱨᱡᱟᱹᱣ ᱟᱠᱟᱱ ” ᱠᱩᱠᱩᱞᱤ” ᱤᱫᱤ ᱭᱟᱛᱮᱫ ᱵᱮᱱᱟᱣ ᱟᱠᱟᱱᱟ ᱾ ᱱᱚᱣᱟ ᱨᱮ ᱫᱤᱵᱭᱚᱡᱭᱳᱛᱤ ᱢᱟᱺᱨᱰᱤ, ᱥᱚᱸᱠᱚᱨ ᱢᱟᱡᱷᱤ, ᱨᱟᱭᱢᱚᱬᱤ ᱢᱟᱡᱷᱤ, ᱚᱨᱡᱩᱱᱨᱟᱡᱽ ᱢᱩᱨᱢᱩ, ᱢᱚᱫᱚᱱ ᱢᱟᱡᱷᱤ, ᱡᱚᱫᱩᱱᱟᱛᱷ ᱢᱟᱡᱷᱤ, ᱥᱭᱟᱢ ᱥᱩᱱᱫᱚᱨ ᱢᱟᱡᱷᱤ ᱮᱢᱟᱱ ᱠᱚ ᱯᱟᱨᱴ ᱟᱠᱟᱫᱟ ᱾ᱱᱚᱣᱟ ᱨᱮ ᱤᱧᱟᱜ ᱫᱤᱥᱟᱹ ᱩᱫᱩᱜ, ᱠᱟᱹᱦᱱᱤ, ᱨᱚᱲ, ᱯᱷᱤᱞᱤᱢ ᱵᱮᱱᱟᱣ ᱨᱮ ᱡᱚᱭᱚᱱᱛᱤ ᱢᱟᱡᱷᱤ, ᱠᱮᱢᱨᱟ, ᱨᱟᱦᱟ, ᱥᱟᱰᱮ ᱟᱨ ᱥᱟᱯᱲᱟᱣ ᱨᱮ ᱨᱟᱡᱽ ᱢᱳᱦᱚᱱ ᱥᱚᱨᱮᱱ, ᱠᱟᱹᱢᱤᱭᱟᱹ ᱵᱮᱱᱟᱣᱤᱡ ᱢᱚᱫᱚᱱ ᱢᱟᱡᱷᱤ, ᱤᱸᱞᱤᱥ ᱥᱚᱵᱴᱟᱭᱴᱮᱞ ᱥᱚᱠᱩᱱᱛᱚᱲᱟ ᱢᱟᱨᱱᱰᱤ ᱟᱨ ᱥᱩᱡᱟᱛᱟ ᱦᱟᱸᱥᱫᱟ ᱛᱤᱠᱤᱱ ᱠᱤᱱ ᱛᱚᱨᱟᱣ ᱟᱠᱟᱫᱟ ᱾ ᱱᱚᱣᱟ ᱯᱷᱤᱞᱤᱢ ᱑᱑ ᱜᱚᱴᱟᱝ ᱫᱤᱥᱚᱢ ᱨᱮᱱᱟᱜ ᱔᱓ ᱜᱚᱴᱟᱝ ᱯᱷᱤᱞᱤᱢ ᱯᱷᱮᱥᱴᱤᱵᱟᱞ ᱨᱮ ᱥᱮᱞᱮᱫ ᱟᱛᱮᱫ ᱒᱑ ᱜᱚᱴᱟᱝ ᱥᱤᱨᱯᱟᱹᱭ ᱧᱟᱢ ᱟᱠᱟᱫᱟ ᱾
ᱵᱤ ᱢᱟ ᱺᱟᱹᱵᱤᱱᱟᱜ ᱠᱷᱟᱴᱚ ᱯᱷᱤᱞᱤᱢ “ᱠᱩᱠᱩᱞᱤ” ᱡᱮᱜᱮᱛᱟᱨᱤ ᱪᱷᱟᱢᱰᱟ ᱨᱮ ᱟᱹᱰᱤ ᱴᱷᱟᱶ ᱨᱮ ᱥᱤᱨᱯᱟᱹᱭ ᱧᱟᱢ ᱟᱠᱟᱫᱟ , ᱚᱱᱰᱮᱱᱟᱜ ᱦᱮᱯᱨᱟᱣ ᱪᱮᱫ ᱞᱮᱠᱟᱱᱟ ?
ᱥᱟ ᱢᱟ ᱺ ᱠᱩᱠᱩᱞᱤ ᱨᱮᱱᱟᱜ ᱯᱩᱭᱞᱩ ᱤᱱᱴᱮᱨᱱᱮᱥᱱᱟᱞ ᱥᱚᱵᱢᱤᱥᱚᱱ ᱫᱚ ᱤᱴᱟᱞᱤ ᱨᱮ ᱦᱩᱭ ᱞᱮᱱᱟ , ᱤᱱᱴᱮᱨᱱᱮᱥᱱᱟᱞ ᱯᱞᱟᱴᱯᱷᱚᱨᱢ ᱨᱮ ᱓᱐᱐᱐ ᱠᱷᱚᱱ ᱖᱐᱐᱐ ᱯᱷᱤᱞᱤᱢ ᱨᱮᱱᱟᱜ ᱥᱚᱵᱢᱤᱥᱚᱱ ᱛᱟᱦᱮᱱᱟ ᱾ ᱛᱩᱨᱩᱭ ᱜᱚᱴᱟᱝ ᱫᱷᱟᱯ ᱨᱮᱱᱟᱜ ᱦᱮᱯᱨᱟᱣ ᱛᱟᱭᱚᱢ ᱢᱤᱫ ᱯᱷᱤᱞᱤᱢ ᱢᱩᱪᱟᱹᱫ ᱫᱷᱟᱯ ᱨᱮ ᱥᱮᱴᱮᱨᱚᱜᱟᱭ ᱟᱨ ᱚᱱᱟ ᱛᱟᱭᱚᱢ ᱟᱡ ᱮ ᱵᱟᱰᱟᱭ ᱫᱟᱲᱮ ᱭᱟᱜ-ᱟ ᱟᱡ ᱮ ᱡᱤᱛᱠᱟᱹᱨᱚᱜ-ᱟ ᱥᱮ ᱵᱟᱝ ᱾ᱛᱮᱥᱟᱨ ᱫᱷᱟᱯ ᱦᱮᱯᱨᱟᱣ ᱨᱮ ᱢᱤᱫ ᱯᱷᱤᱞᱤᱢ ᱵᱟᱪᱷᱚᱱ ᱮᱱ ᱛᱟᱭᱚᱢ ᱵᱟᱪᱷᱱᱟᱣ ᱫᱚᱲ ᱚᱯᱷᱤᱥᱤᱭᱟᱞᱤ ᱠᱚ ᱞᱟᱹᱭ-ᱟ ᱯᱷᱤᱞᱤᱢ ᱦᱮᱯᱮᱨᱟᱣ ᱛᱮ ᱟᱬᱜᱚ ᱭᱮᱱᱟ ᱢᱮᱱᱛᱮᱫ ᱾
ᱵᱤ ᱢᱟ ᱺ ᱡᱮᱜᱮᱛᱟᱹᱨᱤ ᱪᱷᱟᱢᱰᱟ ᱨᱮ ᱟᱵᱤᱱ ᱢᱟᱱ ᱧᱟᱢ ᱠᱮᱫ ᱛᱟᱭᱚᱢ ᱪᱮᱫ ᱞᱮᱠᱟ ᱵᱤᱱ ᱟᱹᱭᱠᱟᱣ ᱠᱮᱫ-ᱟ ?
ᱥᱟ ᱢᱟ ᱺ ᱡᱟᱦᱟᱸ ᱛᱤᱱᱟᱜ ᱵᱷᱩᱨ ᱢᱟᱱ ᱵᱟᱹᱞᱤᱧ ᱟᱛᱟᱝ ᱞᱮᱫ ᱛᱟᱦᱮᱸᱫ ᱩᱱᱟᱹᱜ ᱵᱷᱩᱨ ᱵᱟᱹᱞᱤᱧ ᱵᱟᱰᱟᱭ ᱛᱟᱦᱮᱸᱫ ᱱᱚᱣᱟ ᱢᱟᱱ ᱫᱚ ᱪᱮᱫ ᱠᱟᱱᱟ ᱾ ᱚᱱᱟ ᱨᱮᱱᱟᱜ ᱦᱟᱢᱟᱞ ᱟᱨ ᱜᱚᱱᱚᱝ ᱫᱚ ᱚᱱᱟ ᱴᱷᱟᱶ ᱨᱮ ᱥᱮᱴᱮᱨ ᱟᱛᱮᱫ ᱤᱧ ᱵᱟᱰᱟᱭ ᱠᱮᱫ-ᱟ ᱾ ᱵᱤᱦᱟᱨ ᱨᱮᱱᱟᱜ ᱢᱤᱫ ᱤᱱᱴᱮᱨᱱᱮᱥᱱᱟᱞ ᱯᱷᱤᱞᱤᱢ ᱯᱦᱮᱥᱴᱤᱵᱟᱞ ᱤᱧ ᱟᱨ ᱨᱟᱡᱽ ᱢᱳᱦᱳᱱ ᱥᱚᱨᱮᱱ ᱠᱩᱠᱞᱤ ᱨᱤᱱᱤᱡ ᱠᱮᱢᱨᱟᱢᱮᱱ ᱥᱟᱶ ᱞᱤᱧ ᱪᱟᱞᱟᱣ ᱞᱮᱱᱟ ᱾ ᱚᱱᱰᱮᱱᱟᱜ ᱥᱠᱨᱤᱱᱤᱝ ᱡᱩᱨᱤ ᱠᱤᱱ ᱛᱟᱦᱮᱸ ᱠᱟᱱᱟ ᱚᱢᱨᱤᱛ ᱜᱚᱝᱜᱚᱨ ᱾ᱤᱱᱰᱤᱭᱟᱱ ᱥᱤᱱᱮᱢᱟ ᱤᱱᱰᱚᱨᱴᱨᱤ ᱨᱤᱱ ᱥᱮᱬᱟ ᱜᱚᱢᱠᱮ ᱟᱨ ᱠᱭᱩᱨᱮᱴᱚᱨ ᱠᱟᱱᱟ ᱠᱤᱱ ᱾ᱤᱧ ᱫᱚ ᱵᱟᱧ ᱵᱟᱰᱟᱭ ᱛᱟᱦᱮᱸᱫ ᱩᱱᱤ ᱫᱚ ᱚᱠᱚᱭ ᱠᱟᱱᱟᱭ ᱢᱮᱱᱛᱮᱫ ᱾ ᱯᱩᱥᱪᱤᱢ ᱵᱟᱝᱞᱟ ᱠᱷᱚᱱ ᱦᱚᱸ ᱢᱤᱫ ᱯᱷᱤᱞᱤᱢ ᱢᱮᱠᱚᱨ ᱢᱟᱱᱚᱥ ᱫᱟᱥ ᱢᱮᱱᱛᱮᱫ ᱩᱱᱠᱤᱱ ᱦᱚᱸ ᱟᱠᱤᱱᱟᱜ ᱯᱷᱤᱞᱤᱢ ᱤᱫᱤ ᱠᱟᱛᱮᱫ ᱠᱤᱱ ᱪᱟᱞᱟᱣ ᱞᱮᱱᱟ , ᱩᱱᱠᱤᱱ ᱫᱚ ᱚᱱᱰᱮ ᱠᱷᱚᱱ ᱞᱟᱜᱮ ᱨᱩᱣᱟᱹᱲ ᱠᱟᱛᱷᱟ ᱾ᱚᱢᱨᱤᱛ ᱜᱚᱢᱠᱮ ᱛᱤᱠᱤᱱ ᱢᱟᱱᱚᱥ ᱵᱟᱹᱵᱩ ᱠᱤᱱ ᱢᱮᱛᱟᱫᱮᱭᱟ “ᱛᱮᱦᱮᱧ ᱟᱢ ᱟᱢᱟᱜ ᱴᱤᱠᱮᱴ ᱠᱮᱱᱥᱮᱞ ᱢᱮ ᱟᱨ ᱟᱨ ᱠᱩᱠᱩᱞᱤ ᱨᱮᱱᱟᱜ ᱥᱠᱨᱤᱱᱤᱝ ᱧᱮᱞ ᱛᱟᱨᱟᱭ ᱢᱮ ᱾” ᱥᱠᱨᱤᱱᱤᱝ ᱪᱟᱵᱟᱭᱮᱱ ᱛᱟᱭᱚᱢ ᱟᱞᱤᱧ ᱞᱤᱧ ᱢᱮᱱᱮᱫ ᱛᱟᱦᱮᱸᱫ “ᱡᱟ ᱦᱚᱣ ᱤᱧ ᱱᱚᱰᱮ ᱦᱮᱡ ᱠᱟᱛᱮ ᱟᱯᱮ ᱠᱚ ᱥᱟᱶ ᱢᱮᱥᱟ ᱠᱟᱛᱮᱫ ᱟᱹᱰᱤ ᱨᱟᱹᱥᱠᱟᱹᱧ ᱵᱩᱡᱷᱟᱹᱣ ᱠᱮᱫ-ᱟ” ᱤᱱᱟᱹ ᱚᱠᱛᱚᱨᱮ “ᱚᱢᱨᱤᱛ ᱜᱚᱢᱠᱮ ᱛᱤᱠᱤᱱ ᱠᱤᱱ ᱢᱮᱱ ᱠᱮᱫ-ᱟ “ᱥᱟᱢ ᱡᱤ ᱦᱚᱢ ᱠᱳ ᱤᱥ ᱵᱟᱛᱯᱚᱨ ᱠᱷᱩᱥᱤ ᱦᱮ ᱠᱤ ᱦᱚᱢ ᱠᱩᱠᱞᱤ ᱠᱟ ᱢᱮᱠᱚᱨ ᱠᱮ ᱥᱟᱛᱷ ᱭᱚᱦᱟᱸ ᱠᱷᱚᱰᱟ ᱦᱳᱠᱮ ᱵᱟᱛ ᱠᱚᱨ ᱨᱚᱦᱮᱸ ᱦᱮᱸ” ᱩᱱᱡᱚᱦᱚᱜ ᱢᱟ ᱵᱟᱧ ᱵᱟᱰᱟᱭ ᱛᱟᱦᱮᱸᱫ ᱟᱡ ᱫᱚ ᱚᱠᱚᱭ ᱠᱟᱱᱟᱭ ᱛᱟᱭᱚᱢ ᱛᱮ ᱡᱚᱠᱷᱚᱱ ᱤᱧ ᱜᱩᱜᱩᱞ ᱨᱮ ᱟᱡ ᱵᱟᱵᱚᱫᱤᱧ ᱵᱟᱰᱟᱭ ᱠᱮᱫ-ᱟ , ᱟᱵᱤᱱ ᱵᱤᱪᱟᱹᱨ ᱵᱤᱱ ᱪᱮᱫ ᱞᱮᱠᱟ ᱵᱩᱡᱷᱟᱹᱣ-ᱟ ᱾ᱚᱱᱰᱮ ᱢᱟᱱᱚᱥ ᱵᱟᱹᱵᱩ ᱛᱤᱠᱤᱱ ᱦᱚᱸ ᱠᱩᱞᱤ ᱠᱮᱫ ᱨᱮ ᱢᱮᱱ ᱠᱮᱫ-ᱟᱭ ᱤᱧ ᱛᱮᱦᱮᱧ ᱨᱩᱣᱟᱹᱲ ᱠᱚᱜ ᱠᱷᱟᱱ ᱟᱹᱰᱤ ᱥᱮᱬᱟ ᱡᱤᱱᱤᱥ ᱤᱧ ᱯᱩᱪᱩᱡ ᱠᱮᱫ-ᱟ , ᱟᱹᱠᱤᱱᱟᱜ ᱟᱨ ᱢᱤᱫ ᱥᱮᱬᱟ ᱥᱟᱨᱦᱟᱣ ᱦᱩᱭᱩᱜ ᱠᱟᱱᱟ “ᱨᱤᱭᱮᱞ ᱥᱮᱱᱥ ᱢᱮ ᱯᱷᱤᱞᱢ ᱠᱭᱟ ᱦᱮ ᱵᱳ ᱢᱮᱱᱮ ᱠᱩᱠᱞᱤ ᱢᱮ ᱫᱮᱠᱷᱟ-ᱭᱮ ᱯᱷᱤᱞᱤᱢ ᱫᱮᱠᱷ ᱠᱮ ᱢᱩᱡᱷᱮ ᱯᱟᱛᱷᱮᱨ ᱯᱟᱸᱪᱟᱞᱤ ᱭᱟᱫ ᱟ ᱨᱟᱦᱟ ᱦᱮ, ᱟᱯ ᱠᱳ ᱯᱟᱛᱟ ᱱᱮᱦᱤ ᱟᱯᱱᱮ ᱠᱭᱟ ᱵᱟᱱᱟᱭᱟ ᱦᱮ ᱟᱯ ᱟᱯᱱᱮ ᱠᱳ ᱪᱷᱳᱴᱟ ᱢᱚᱛ ᱥᱚᱢᱡᱷᱤᱭᱮ” ᱾ ᱩᱱᱡᱚᱦᱚᱜ ᱢᱟ ᱱᱚᱣᱟ ᱠᱚ ᱨᱚᱲ ᱟᱧᱡᱚᱢ ᱟᱛᱮᱫ ᱜᱚᱨᱚᱵ ᱵᱩᱡᱷᱟᱣ ᱠᱟᱱ ᱛᱟᱦᱮᱸᱫ, ᱡᱚᱠᱷᱚᱱ ᱤᱧ ᱜᱩᱜᱩᱞ ᱨᱮ ᱟᱹᱠᱤᱱᱟᱜ ᱤᱫᱤᱭᱟᱛᱤᱧ ᱯᱟᱱᱛᱮ ᱠᱮᱫ-ᱟ ᱟᱨ ᱤᱧ ᱵᱟᱰᱟᱭ ᱠᱮᱫ-ᱟ ᱛᱤᱱ ᱥᱮᱬᱟ ᱜᱚᱢᱠᱮ ᱠᱟᱱᱟᱭ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱡᱚᱨᱚ ᱮᱱᱟ ᱾
ᱵᱤ ᱢᱟ ᱺ ᱤᱱᱴᱮᱨᱱᱮᱥᱱᱟᱞ ᱯᱷᱤᱞᱤᱢ ᱦᱮᱯᱨᱟᱣ ᱨᱮ ᱥᱮᱞᱮᱫ ᱮᱱ ᱛᱟᱭᱚᱢ ᱥᱟᱱᱛᱟᱲ ᱯᱷᱤᱞᱤᱢ ᱟᱨ ᱮᱴᱟᱜ ᱯᱷᱤᱞᱤᱢ ᱤᱱᱰᱚᱥᱴᱨᱤ ᱨᱮᱱᱟᱜ ᱴᱷᱟᱶ ᱚᱠᱟᱨᱮ ᱢᱮᱱᱟᱜ-ᱟ ᱢᱮᱱᱛᱮᱫ ᱵᱤᱱ ᱵᱷᱟᱹᱵᱤ ᱮᱫ-ᱟ ?
ᱥᱟ ᱢᱟ ᱺ ᱢᱤᱫᱴᱟᱝ ᱡᱤᱱᱤᱥ ᱨᱮ ᱯᱷᱚᱨᱠ ᱢᱮᱱᱟᱜ-ᱟ, ᱟᱠᱚ ᱡᱟᱦᱟᱸ ᱞᱮᱠᱟ ᱤᱠᱭᱩᱯᱢᱮᱱᱴ ᱠᱚ ᱵᱮᱵᱷᱟᱨ ᱮᱫᱟ ᱟᱨ ᱤᱱᱯᱷᱨᱟᱥᱴᱨᱚᱠᱪᱚᱨ ᱠᱚ ᱵᱮᱵᱷᱟᱨ ᱮᱫᱟ ᱚᱱᱟ ᱫᱚ ᱟᱵᱚ ᱴᱷᱮᱫ ᱵᱟᱹᱱᱩ ᱟᱹᱱᱤᱡ , ᱵᱟᱹᱱᱩ ᱟᱹᱱᱤᱡ ᱪᱮᱫᱟᱜ ᱟᱠᱚ ᱴᱷᱮᱫ ᱫᱚ ᱯᱨᱚᱢᱳᱴᱚᱨ ᱢᱮᱱᱟᱜ ᱠᱚᱣᱟᱜ ᱯᱷᱟᱭᱱᱟᱱᱥᱤᱭᱚᱨ ᱢᱮᱱᱟᱜ ᱠᱚᱣᱟᱜ ᱨᱤᱴᱚᱨᱱ ᱦᱟᱹᱡᱩᱜ ᱨᱮᱱᱟᱜ ᱦᱚᱨ ᱰᱟᱦᱟᱨ ᱢᱮᱱᱟᱜ-ᱟ, ᱚᱱᱟ ᱠᱷᱟᱹᱴᱤᱨ ᱯᱨᱚᱰᱩᱥᱚᱨ ᱠᱚᱦᱚᱸ ᱠᱚ ᱩᱰᱩᱠᱚᱜ ᱠᱟᱱᱟ ᱾ ᱟᱵᱚ ᱫᱚ ᱞᱤᱢᱤᱴᱮᱰ ᱨᱤᱥᱳᱨᱥ ᱥᱟᱶ ᱞᱤᱢᱤᱴᱮᱰ ᱴᱷᱟᱶ ᱨᱮᱵᱚᱱ ᱠᱟᱹᱢᱤ ᱠᱟᱱᱟ , ᱡᱮ ᱦᱮᱛᱩ ᱟᱵᱚᱣᱟᱜ ᱥᱤᱢᱟᱹ ᱠᱷᱟᱴᱚ ᱜᱮᱭᱟ ᱟᱵᱚ ᱯᱟᱧᱟ ᱦᱚᱲ ᱠᱚ ᱢᱟᱦᱟᱨᱚᱜ ᱜᱮᱭᱟ ᱾ ᱟᱵᱚ ᱫᱚ ᱱᱚᱰᱮ ᱥᱚᱱᱟ ᱢᱮᱱᱟᱜ ᱠᱷᱟᱱ ᱞᱩᱛᱩᱨ ᱵᱟᱹᱱᱩ ᱟᱹᱱᱤᱡ ᱞᱩᱛᱩᱨ ᱢᱮᱱᱟᱜ ᱠᱷᱟᱱ ᱥᱚᱱᱟ ᱵᱟᱹᱱᱩ ᱟᱹᱱᱤᱡ ᱾ᱟᱨ ᱡᱟᱦᱟᱸᱭ ᱠᱚᱴᱷᱮᱫ ᱛᱟᱠ ᱢᱮᱱᱟ-ᱜ ᱨᱮᱦᱚᱸ ᱩᱱᱠᱩᱫᱚ ᱯᱟᱞᱮᱱ ᱵᱟᱠᱚ ᱪᱷᱩᱴᱹᱟᱣ ᱠᱟᱱᱟ ᱟᱨ ᱵᱟᱝ ᱪᱷᱩᱴᱟᱹᱣ ᱜᱮ ᱵᱟᱠᱚ ᱵᱟᱰᱟᱭᱟ ᱾ᱱᱚᱰᱮ ᱥᱟᱱᱛᱟᱲ ᱯᱷᱤᱞᱤᱢ ᱟᱯᱟᱱ ᱟᱹᱯᱤᱱ ᱠᱩᱨᱩᱢᱩᱴᱩ ᱛᱮ ᱥᱮᱴᱮᱨ ᱟᱠᱟᱱᱟ ᱾ ᱥᱮᱫᱟᱭ ᱡᱟᱦᱟᱸᱭ ᱠᱚ ᱯᱷᱤᱞᱤᱢ ᱵᱮᱱᱟᱣ ᱵᱮᱱᱟᱣ ᱛᱮ ᱥᱟᱱᱛᱟᱲ ᱯᱷᱤᱞᱤᱢ ᱤᱱᱰᱚᱥᱴᱨᱤ ᱱᱚᱰᱮ ᱠᱚ ᱥᱮᱴᱮᱨ ᱦᱚᱪᱚ ᱟᱠᱟᱫ-ᱟ, ᱤᱧ ᱟᱨ ᱵᱟᱝ ᱡᱟᱦᱟᱸᱭ ᱜᱮ ᱛᱮᱦᱮᱧ ᱯᱷᱤᱞᱤᱢ ᱵᱚᱱ ᱵᱮᱱᱟᱣ ᱮᱫᱟ ᱚᱱᱟ ᱟᱠᱚᱣᱟᱜ ᱵᱮᱱᱟᱣ ᱪᱷᱟᱢᱰᱟ ᱪᱮᱛᱟᱱ ᱨᱮ ᱜᱮ ᱟᱯᱟᱱ ᱟᱯᱤᱱ ᱩᱭᱦᱟᱹᱨ ᱛᱮ ᱵᱚᱱ ᱵᱮᱱᱟᱣ ᱮᱫᱟ ᱾ ᱟᱠᱚᱣᱟᱜ ᱵᱮᱱᱟᱣ ᱟᱠᱟᱫ ᱵᱟᱜᱟᱱ ᱨᱮ ᱱᱟᱥᱮᱱᱟᱜ ᱥᱟᱠᱟᱢ ᱠᱚ ᱰᱟᱹᱨ ᱠᱚ ᱢᱟᱜ ᱜᱮᱫ ᱥᱚᱡᱷᱮ ᱭᱟᱛᱮᱫ ᱯᱷᱤᱞᱤᱢ ᱵᱚᱱ ᱵᱮᱱᱟᱣ ᱮᱫᱟ ᱾ ᱵᱚᱞᱤᱣᱩᱰ ᱨᱮ ᱢᱤᱫ ᱢᱤᱫ ᱥᱮᱠᱮᱱᱰ ᱨᱮᱱᱟᱜ ᱯᱩᱭᱥᱟᱹ ᱞᱮᱠᱷᱟᱜ-ᱟ , ᱚᱱᱰᱮ ᱪᱟᱛᱟᱢ ᱥᱟᱵ ᱞᱟᱹᱜᱤᱫ ᱢᱤᱫ ᱦᱚᱲ ᱟᱨ ᱟᱹᱨᱥᱤ ᱥᱟᱵ ᱞᱟᱹᱜᱤᱫ ᱢᱤᱫ ᱦᱚᱲ, ᱥᱟᱱᱛᱟᱲ ᱯᱷᱤᱞᱤᱢ ᱤᱱᱰᱚᱥᱴᱨᱤ ᱨᱮᱫᱚ ᱞᱟᱹᱠᱛᱤ ᱯᱟᱲᱟᱣ ᱞᱮᱱᱠᱷᱟᱱ ᱟᱢ ᱜᱮ ᱪᱟᱛᱚᱢ ᱮᱢ ᱥᱟᱵ-ᱟ , ᱟᱢ ᱜᱮ ᱟᱹᱨᱥᱤᱢ ᱥᱟᱵ-ᱟ ᱟᱨ ᱟᱢ ᱜᱮ ᱯᱷᱤᱞᱤᱢ ᱮᱢ ᱵᱮᱱᱟᱣ-ᱟ ᱾ᱱᱚᱣᱟ ᱠᱚ ᱪᱤᱛᱟᱹᱨ ᱵᱚᱫᱚᱞ ᱞᱮᱱ ᱠᱷᱟᱱ ᱟᱵᱚ ᱦᱚᱸ ᱱᱟᱯᱟᱭ ᱯᱷᱤᱞᱤᱢ ᱵᱚᱱ ᱵᱮᱱᱟᱣ ᱫᱟᱲᱮ ᱦᱟᱜ-ᱟ ᱾
ᱵᱤ ᱢᱟ ᱺ ᱟᱵᱤᱱᱟᱜ ᱱᱤᱛᱚᱜ ᱟᱨ ᱟᱜᱟᱢ ᱫᱟᱨᱟᱢ ᱠᱩᱠᱢᱩ ᱠᱚ ᱪᱮᱫ ᱢᱮᱱᱟᱜ- ᱟ ?
ᱥᱟ ᱢᱟ ᱺ ᱤᱧᱟᱜ ᱩᱭᱦᱟᱹᱨ ᱛᱮ ᱱᱟᱥᱮᱱᱟᱜ ᱟᱵᱚ ᱟᱵᱚᱣᱟᱜ ᱡᱟᱹᱛᱤ ᱞᱟᱠᱪᱟᱨ , ᱯᱟᱹᱨᱥᱤ ᱠᱷᱚᱱ ᱵᱚᱱ ᱥᱟᱦᱟᱜ- ᱟᱠᱟᱱᱟ, ᱤᱧᱟᱜ ᱩᱭᱦᱟᱹᱨ ᱪᱮᱫ ᱞᱮᱠᱟᱨᱮ ᱤᱧ ᱟᱵᱚ ᱥᱟᱶᱛᱟ ᱨᱮᱱᱟᱜ ᱮᱴᱠᱮᱴᱚᱬᱮ ᱟᱱᱟᱴ ᱥᱟᱶ ᱟᱵᱚ ᱟᱵᱚᱣᱟᱜ ᱞᱟᱠᱪᱟᱨ ᱟᱨ ᱯᱟᱨᱥᱤ ᱰᱤᱡᱤᱴᱟᱞ ᱨᱮᱠᱚᱰ ᱛᱮᱵᱚᱱ ᱟᱹᱜᱩᱭᱟ ᱚᱱᱟᱜᱤᱧ ᱪᱮᱥᱴᱟᱭᱟ ᱾
ᱵᱤ ᱢᱟ ᱺ ᱥᱟᱱᱛᱟᱲ ᱯᱷᱤᱞᱤᱢ ᱤᱱᱰᱚᱥᱴᱨᱤ ᱨᱮ ᱱᱟᱣᱟ ᱜᱮ ᱠᱚ ᱟᱬᱜᱚᱱ ᱠᱟᱱ ᱡᱩᱣᱟᱹᱱ ᱠᱚ ᱪᱮᱫ ᱵᱤᱱ ᱢᱮᱛᱟ ᱟᱠᱚᱣᱟ ?
ᱥᱟ ᱢᱟ ᱺ ᱱᱟᱣᱟ ᱱᱟᱣᱟ ᱡᱟᱦᱟᱸᱭ ᱱᱤᱛᱚᱜ ᱯᱷᱤᱞᱤᱢ ᱞᱟᱭᱤᱱ ᱛᱮᱠᱚ ᱦᱟᱹᱡᱩᱜ ᱠᱟᱱᱟ, ᱢᱮᱱ ᱫᱚ ᱱᱚᱣᱟᱜᱮ ᱡᱮ ᱡᱩᱫᱤ ᱫᱟᱲᱮ-ᱟᱜᱟ ᱵᱚᱱ ᱮᱱ ᱠᱷᱟᱱ ᱵᱚᱱ ᱪᱷᱩᱴᱟᱹᱣ ᱢᱟ, ᱮᱴᱠᱮᱴᱚᱬᱮ ᱦᱟᱹᱡᱩᱜ-ᱟ ᱤᱠᱷᱟᱹᱱ ᱠᱩᱲᱟᱹᱭ ᱫᱚ ᱧᱟᱢᱚᱜ ᱜᱮᱭᱟ , ᱟᱨ ᱡᱩᱫᱤ ᱫᱟᱲᱮ ᱵᱟᱱᱩ ᱟᱹᱱᱤᱡ ᱤᱠᱷᱟᱹᱱ ᱨᱟᱹᱥᱠᱟᱹ ᱟᱨ ᱜᱚᱨᱚᱡᱽ ᱢᱮᱱᱟᱜ-ᱟ ᱮᱱᱠᱷᱟᱱ ᱪᱮᱫ ᱞᱮᱠᱟᱨᱮ ᱫᱟᱲᱮ ᱦᱟᱹᱡᱩᱜ-ᱟ ᱚᱱᱟ ᱵᱚᱱ ᱪᱮᱥᱴᱟᱭ ᱢᱟ, ᱡᱮᱢᱚᱱ ᱦᱚᱲ ᱧᱮᱞ ᱠᱟᱛᱮᱫ ᱫᱚ ᱟᱞᱚ ᱵᱚ ᱦᱟᱹᱡᱩᱜ ᱢᱟ , ᱥᱟᱹᱨᱤ ᱨᱟᱹᱥᱠᱟᱹ ᱢᱮᱱᱟᱜ ᱠᱷᱟᱱ ᱦᱟᱹᱡᱩᱜ ᱢᱟ, ᱚᱲᱟᱜ ᱨᱤᱱ ᱥᱟᱱᱟᱢ ᱦᱚᱲ ᱠᱚ ᱞᱟᱹᱭ ᱠᱟᱛᱮᱫ ᱠᱚ ᱦᱟᱹᱡᱩᱜ ᱢᱟ ᱟᱨ ᱥᱟᱶᱛᱮ ᱟᱯᱱᱟᱨ ᱡᱟᱸᱜᱟ ᱨᱮ ᱛᱤᱝᱜᱩ ᱠᱮᱴᱮᱡ ᱨᱮᱱᱟᱜ ᱦᱚᱨᱰᱟᱦᱟᱨ ᱯᱟᱸᱡᱟ ᱴᱷᱤᱠ ᱟᱛᱮᱫ ᱠᱚ ᱦᱟᱹᱡᱩᱜ ᱢᱟ ᱵᱟᱝ ᱠᱷᱟᱱ ᱟᱞᱚ ᱠᱚ ᱠᱟᱹᱢᱤ ᱢᱟ ᱾
ᱵᱤ ᱢᱟ ᱺ ᱟᱹᱵᱤᱱᱟᱜ ᱱᱚᱣᱟ ᱯᱷᱤᱞᱤᱢ ᱨᱮ ᱟᱹᱵᱤᱱᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱜᱚᱲᱚ ᱥᱚᱦᱚᱫ ᱪᱮᱫ ᱞᱮᱠᱟ ᱢᱮᱱᱟᱜ-ᱟ, ᱢᱩᱪᱟᱹᱫ ᱨᱮ ᱟᱵᱤᱱᱟᱜ ᱜᱷᱟᱨᱚᱸᱡᱽ ᱤᱫᱤᱭᱟᱛᱮ ᱢᱤᱫ ᱵᱟᱨ ᱯᱚᱫᱽ ᱵᱤᱱ ᱞᱟᱹᱭ-ᱟ ?
ᱥᱟ ᱢᱟ ᱺ ᱤᱧᱤᱡ ᱡᱩᱨᱤ ᱡᱤᱛᱟᱹ ᱡᱚᱭᱚᱱᱛᱤ ᱢᱟᱡᱷᱤ ᱤᱧᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱨᱮ ᱟᱡᱟᱜ ᱟᱹᱰᱤ ᱜᱮ ᱜᱚᱲᱚ ᱢᱮᱱᱟᱜ-ᱟ , ᱚᱱᱮᱠᱚ ᱢᱮᱱ-ᱟ “ There is a woman behind every successful person” ᱚᱲᱟᱜ ᱦᱚᱲ-ᱟ ᱜᱚᱲᱚ ᱥᱚᱦᱚᱫ ᱵᱟᱝ ᱠᱷᱟᱱ ᱱᱩᱱᱟᱹᱜ ᱥᱟᱺᱜᱤᱧ ᱵᱟᱝ ᱦᱮᱡ ᱦᱩᱭ ᱠᱚᱣᱟ ᱾ᱤᱧᱤᱡ ᱵᱟᱹᱵᱩ ᱜᱤᱫᱽᱨᱟᱹ ᱥᱚᱢᱭᱚᱨᱚᱱᱡᱚᱱ ᱡᱟᱦᱟᱸᱭ ᱵᱤ ᱴᱮᱠ ᱮ ᱚᱞᱚᱜ ᱠᱟᱱᱟ ᱩᱱᱤᱴᱷᱮᱫ ᱠᱷᱚᱱ ᱦᱚᱸ ᱛᱟᱞᱟᱨᱮ ᱛᱟᱞᱮᱨᱮ ᱢᱚᱱᱚᱛ ᱤᱧ ᱤᱫᱤᱜᱮᱭᱟ ᱾ᱥᱟᱱᱟᱢ ᱩᱢᱮᱨ ᱟᱨ ᱥᱟᱱᱟᱢ ᱞᱮᱠᱟᱱ ᱦᱚᱲ ᱴᱷᱮᱫ ᱠᱷᱚᱱ ᱢᱚᱱᱚᱛᱤᱧ ᱦᱟᱛᱟᱣ ᱜᱮᱭᱟ ᱮᱱ ᱮᱱᱟ ᱵᱟᱰᱟᱭᱚᱜ-ᱟ ᱚᱠᱚᱭᱟᱜ ᱠᱩᱥᱤ ᱪᱮᱫ ᱞᱮᱠᱟᱱᱟᱜ ᱠᱟᱱᱟ ᱾
ᱵᱤ ᱢᱟᱺ ᱟᱭᱟᱢᱟ ᱥᱟᱨᱦᱟᱣ ᱜᱚᱢᱠᱮ ᱟᱞᱮ ᱥᱟᱶ ᱨᱚᱯᱚᱲ ᱞᱟᱹᱜᱤᱫ , ᱟᱵᱤᱱᱟᱜ ᱥᱟᱱᱟᱢ ᱠᱟᱹᱢᱤ ᱱᱚᱝᱠᱟ ᱜᱮ ᱥᱟᱨ ᱠᱚ ᱥᱟᱹᱜᱩᱱ ᱠᱚᱜ ᱢᱟ ᱱᱤᱭᱟᱹ ᱜᱮ ᱟᱞᱮᱭᱟᱜ ᱫᱷᱮᱭᱟᱱ ᱪᱚᱴ ᱪᱟᱸᱫᱚ ᱴᱷᱮᱫ ᱱᱮᱦᱚᱨ ᱾ ᱟᱵᱤᱱᱟᱜ ᱡᱤᱭᱚᱱ ᱱᱟᱯᱟᱭ ᱟᱨ ᱥᱩᱞᱩᱠ ᱛᱮᱜᱮ ᱠᱷᱟᱱᱰᱟᱣ ᱢᱟ ᱾ ᱡᱚᱦᱟᱨ ᱾
ᱥᱟ ᱢᱟ ᱺ ᱟᱵᱤᱱ ᱦᱚᱸ ᱟᱭᱢᱟ ᱥᱟᱨᱦᱟᱣ ᱟᱨ ᱡᱚᱦᱟᱨ ᱾
