ᱮ ᱵᱟᱹᱵᱩ ! ᱦᱚᱯᱚᱱ ᱵᱟᱹᱵᱩ ᱨᱮ !
ᱦᱤᱲᱤᱧ ᱮᱫ ᱞᱤᱧᱟᱢ ᱱᱤᱛᱚᱜ ᱦᱟᱭᱨᱮ !
ᱪᱮᱫᱟᱜ ᱱᱩᱱᱟᱹᱜ ᱨᱟᱹᱜᱤ ᱟᱹᱲᱤᱥ ᱫᱚ
ᱨᱮ?
ᱥᱟᱦᱟ ᱜᱤᱰᱤ ᱟᱢ ᱠᱷᱚᱱᱟᱜ,
ᱟᱹᱞᱤᱧ ᱞᱟᱹᱜᱤᱫ ᱟᱹᱲᱤᱥ ᱩᱱᱟᱹᱜ !
ᱢᱮᱱᱟᱜ ᱛᱟᱢᱟ ᱦᱚᱯᱚᱱ ᱵᱟᱹᱵᱩ ᱨᱮ,
ᱨᱟᱹᱜᱤ ᱟᱢᱟᱜ ᱟᱹᱞᱤᱧ ᱪᱮᱛᱟᱱᱨᱮ !
ᱟᱹᱞᱤᱧ ᱞᱟᱹᱜᱤᱫ ᱡᱟᱦᱟᱸ ᱫᱩᱠ,
ᱟᱢ ᱞᱟᱹᱜᱤᱫ ᱚᱱᱟ ᱟᱹᱰᱤ ᱥᱩᱠ ᱾
ᱟᱹᱞᱤᱧᱟᱜ ᱵᱤᱪᱷᱚᱠ ᱞᱟᱹᱜᱤᱫ ᱟᱪᱷᱟ,
ᱪᱮᱫ ᱵᱟᱢ ᱪᱮᱠᱟ ᱞᱮᱫᱟ ᱵᱟᱪᱷᱟ !
ᱥᱟᱹᱨᱫᱤ ᱥᱤᱛᱩᱝ ᱡᱷᱮᱸᱴ ᱵᱚᱸᱜᱟ,
ᱛᱤᱱᱟᱹᱜ ᱞᱚᱞᱚ ᱦᱚᱲᱢᱚ ᱡᱟᱸᱜᱟ !
ᱟᱢᱮᱢ ᱪᱟᱞᱟᱣ ᱮᱱᱟ ᱵᱟᱹᱦᱩ ᱠᱟᱛᱷᱟᱨᱮ,
ᱵᱚᱦᱮᱞ ᱠᱮᱫᱟ ᱞᱤᱧᱟᱢ ᱫᱩᱠ ᱫᱚᱨᱭᱟᱨᱮ !
ᱱᱚᱣᱟ ᱦᱚᱲᱢᱚ ᱛᱤᱱᱟᱹᱜ ᱫᱤᱱ ᱢᱟᱥᱮ,
ᱟᱸᱥ ᱞᱮᱱᱟᱞᱤᱧ ᱟᱢᱟᱜ ᱫᱩᱞᱟᱹᱲ ᱱᱟᱥᱮ ᱾
ᱥᱤᱧᱼᱧᱤᱫᱟᱹ ᱨᱮᱸᱜᱮᱡ ᱛᱮᱛᱟᱝ ᱛᱮ,
ᱛᱟᱦᱮᱸ ᱞᱮᱱᱟᱞᱤᱧ ᱟᱢ ᱞᱟᱹᱜᱤᱫ ᱛᱮ ᱾
ᱨᱚᱜᱽ ᱟᱡᱟᱨ ᱮ ᱜᱷᱮᱨᱟᱣ ᱞᱮᱫ ᱢᱮᱨᱮ,
ᱛᱤᱱᱟᱹᱜ ᱫᱩᱠ ᱞᱤᱧ ᱥᱟᱦᱟᱣ ᱞᱮᱫᱟ ᱵᱟᱹᱵᱩ ᱨᱮ !
ᱟᱞᱤᱧᱟᱜ ᱥᱩᱠ ! ᱟᱢᱟᱜ ᱥᱩᱠ !
ᱵᱩᱡᱷᱟᱹᱣ ᱠᱟᱜ ᱢᱮ ᱥᱮᱨᱢᱟ ᱥᱩᱠ !
ᱟᱢᱟᱜ ᱞᱟᱸᱫᱟ ᱧᱮᱞ ᱞᱟᱹᱜᱤᱫ ᱛᱮ,
ᱦᱤᱲᱤᱧ ᱞᱮᱫᱟᱞᱤᱧ ᱫᱩᱠ ᱢᱩᱦᱤᱢ ᱡᱮᱛᱮ !
ᱟᱢᱟᱜ ᱨᱟᱜ ᱵᱟᱹᱞᱤᱧ ᱥᱟᱦᱟᱣ ᱠᱷᱟᱹᱛᱤᱨ,
ᱫᱚᱦᱚ ᱞᱮᱫ ᱢᱮᱭᱟ ᱞᱤᱧ ᱦᱮᱸᱭᱚ ᱦᱚᱵᱚᱨ !
ᱨᱟᱜ ᱞᱮᱫᱟᱢ ᱡᱟᱦᱟᱸ ᱞᱟᱹᱜᱤᱫ ᱛᱮ,
ᱟᱹᱜᱩ ᱞᱮᱫᱟᱞᱤᱧ ᱚᱱᱟ ᱟᱢ ᱞᱟᱹᱜᱤᱫ ᱛᱮ ᱾
ᱥᱟᱱᱟᱢᱟᱜ ᱮᱢ ᱦᱤᱲᱤᱧ ᱠᱮᱫ ᱱᱟᱦᱟᱜ ᱫᱚ,
ᱚᱱᱟᱛᱮ ᱟᱹᱞᱤᱧᱟᱜ ᱡᱤᱣᱤ ᱨᱟᱜᱮᱫ ᱫᱚ !
ᱢᱮᱫ ᱥᱟᱢᱟᱝᱨᱮ ᱵᱟᱢ ᱧᱮᱞ ᱞᱤᱧ ᱠᱷᱟᱱ ᱫᱚ,
ᱟᱢᱟᱜ ᱨᱟᱜ ᱛᱮ ᱟᱹᱛᱩ ᱥᱟᱱᱟᱢ ᱪᱚᱦᱚᱲᱚᱜ ᱫᱚ ᱾
ᱟᱢᱟᱜ ᱫᱩᱞᱟᱹᱲ ᱵᱟᱹᱵᱩ ᱨᱮ,
ᱟᱸᱥ ᱞᱮᱱᱟᱞᱤᱧ ᱱᱚᱣᱟ ᱢᱩᱪᱟᱹᱫ ᱵᱮᱲᱟᱨᱮ ᱾
ᱚᱦᱚᱢ ᱵᱩᱡᱷᱟᱹᱣ ᱞᱮᱱᱟ ᱱᱟᱥᱮ ᱛᱷᱚᱲᱟ,
ᱯᱮᱨᱮᱡ ᱠᱮᱭᱟᱞᱤᱧ ᱟᱹᱞᱤᱧᱟᱜ ᱢᱚᱱᱮ ᱜᱚᱲᱟ ᱾
ᱵᱟᱹᱵᱩ ᱨᱮ ! ᱠᱚᱭᱚᱜ ᱮᱫᱟᱭ ᱫᱤᱱᱟᱹᱢ ᱟᱸᱜᱟ,
ᱥᱮᱨᱢᱟ ᱪᱚᱴ ᱠᱷᱚᱱᱟᱜ ᱩᱱᱤ ᱥᱤᱧ ᱵᱚᱸᱜᱟ ᱾
ᱛᱟᱦᱮᱱ ᱢᱮᱜᱳ ᱵᱟᱹᱵᱩ ᱟᱹᱞᱤᱧ ᱵᱮᱜᱚᱨ,
ᱥᱚᱱᱚᱛ ᱞᱟᱹᱜᱤᱫ ᱡᱤᱭᱚᱱ ᱵᱷᱩᱨ ᱾
ᱛᱤᱱᱟᱹᱜ ᱥᱚᱱᱚᱛ ᱮᱢ ᱟᱸᱥ ᱞᱮᱫᱟ ᱫᱷᱟᱹᱨᱛᱤ ᱨᱮᱱᱟᱜ,
ᱫᱩᱠ ᱟᱹᱞᱤᱧᱟᱜ ᱤᱫᱤ ᱠᱮᱫᱟᱢ ᱨᱤᱱᱛᱮ ᱩᱱᱟᱹᱜ ᱾
ᱟᱞᱚᱢ ᱨᱟᱜ ᱚᱪᱚ ᱞᱤᱧᱟ ᱱᱤᱛ ᱵᱮᱲᱟᱨᱮ,
ᱵᱟᱝ ᱠᱷᱟᱱ ᱨᱟᱜᱟᱢ ᱫᱷᱤᱱᱟᱹᱝ ᱵᱮᱲᱟᱨᱮ ᱾
ᱮ ᱵᱟᱹᱵᱩ ! ᱦᱚᱯᱚᱱ ᱵᱟᱹᱵᱩ !
ᱵᱟᱢ ᱡᱚᱜᱟᱣ ᱡᱚᱛᱚᱱ ᱞᱤᱧ ᱨᱮᱦᱚᱸ ᱵᱟᱹᱵᱩ,
ᱱᱟᱥᱮ ᱫᱚ ᱥᱤᱵᱤᱞ ᱟᱹᱞᱤᱧ ᱢᱮᱥᱮ ᱵᱟᱹᱵᱩ !
ᱚᱱᱟᱛᱮᱼ
ᱚᱠᱚᱭ ᱚᱠᱟ ᱞᱮᱠᱟᱭ ᱠᱟᱹᱢᱤ ᱡᱚᱝᱟ,
ᱚᱱᱠᱟ ᱜᱮ ᱩᱱᱤ ᱠᱩᱲᱟᱹᱭ ᱮ ᱟᱛᱟᱝ ᱡᱚᱝᱟ ᱾
ᱡᱟᱦᱟᱸᱭ ᱠᱷᱟᱹᱛᱤᱨ ᱫᱷᱩᱲᱤ ᱫᱷᱟᱹᱨᱛᱤ ᱵᱚ ᱞᱮᱵᱮᱫ ᱠᱮᱜᱼᱟ,
ᱩᱱᱠᱤᱱᱟᱜ ᱥᱩᱠᱼᱫᱩᱠ ᱪᱮᱠᱟᱛᱮᱵᱚ ᱦᱤᱲᱤᱧ ᱠᱮᱜᱼᱟ ?
ᱵᱚᱸᱜᱟ ᱵᱟᱨᱟ ᱵᱟᱹᱨᱤ ᱟᱭᱳᱼᱵᱟᱵᱟ,
ᱟᱞᱚ ᱵᱚ ᱦᱤᱲᱤᱧ ᱢᱟ ᱩᱱᱠᱤᱱ ᱫᱮᱵᱟ ᱥᱮᱵᱟ ᱾
-ᱺ( ᱢᱩᱪᱟᱹᱫ)ᱺ-
