ᱟᱯᱷᱨᱤᱠᱟ ᱨᱮᱱ ᱟᱹᱫᱤᱵᱟᱹᱥᱤ ᱟᱜ ᱮᱱᱮᱡ ᱥᱮᱨᱮᱧ, ᱞᱟᱭ ᱞᱟᱠᱪᱟᱨ, ᱟᱹᱨᱤ ᱪᱟᱹᱞᱤ, ᱵᱚᱸᱜᱟ ᱵᱩᱨᱩ, ᱫᱷᱚᱨᱚᱢ ᱠᱚᱨᱚᱢ ᱮᱢᱟᱱ ᱵᱟᱵᱚᱛ ᱜᱮᱭᱟᱱ ᱟᱨᱡᱟᱣ ᱞᱟᱹᱜᱤᱫ ᱢᱤᱫ ᱥᱟᱱᱟᱥᱤᱭᱟᱹ (ᱫᱟᱨᱥᱚᱱᱤᱠ) ᱫᱚ ᱟᱹᱛᱩ ᱛᱮ ᱦᱮᱡ ᱞᱮᱱᱟ᱾ ᱩᱱᱠᱩ ᱟᱹᱫᱤᱵᱟᱹᱥᱤ ᱥᱟᱶ ᱮ ᱢᱮᱥᱟ ᱮᱱᱟ, ᱟᱠᱚ ᱥᱟᱶ ᱮ ᱛᱟᱦᱮᱸ ᱮᱱᱟ᱾ ᱡᱚᱛᱚᱣᱟᱜ ᱮ ᱚᱞ ᱛᱚᱞ ᱠᱮᱫ ᱛᱟᱭᱚᱢ ᱟᱫᱚ ᱚᱲᱟᱜ ᱨᱩᱣᱟᱹᱲ ᱞᱟᱹᱜᱤᱫ ᱮ ᱥᱟᱯᱲᱟᱣ ᱮᱱᱟ᱾ ᱨᱩᱣᱟᱹᱲ ᱡᱷᱚᱜ ᱮ ᱧᱮᱞ ᱠᱮᱫ ᱠᱚᱣᱟ ᱟᱹᱰᱤ ᱜᱟᱱ ᱜᱤᱫᱽᱨᱟᱹ ᱠᱚ ᱮᱱᱮᱡ ᱡᱚᱝ ᱠᱟᱱᱟ᱾ ᱟᱫᱚ ᱟᱡ ᱦᱚᱸ ᱩᱱᱠᱩ ᱥᱟᱶ ᱮᱱᱮᱡ ᱡᱚᱝ ᱥᱟᱱᱟ ᱠᱮᱫᱮᱭᱟ᱾ ᱩᱱᱤ ᱫᱚ ᱡᱟᱣ ᱜᱮ ᱜᱤᱫᱽᱨᱟᱹ ᱞᱟᱹᱜᱤᱫ ᱵᱟᱡᱟᱨ ᱠᱷᱚᱱᱟᱜ ᱞᱟᱹᱰᱩ ᱠᱚᱭ ᱟᱹᱜᱩ ᱵᱟᱲᱟᱭ ᱜᱮᱭᱟ᱾ ᱦᱚᱞᱟ ᱵᱟᱡᱟᱨ ᱠᱷᱚᱱᱟᱜ ᱮ ᱟᱹᱜᱩ ᱞᱮᱫ ᱞᱟᱹᱰᱩ ᱫᱚ ᱵᱟᱭ ᱦᱟᱹᱴᱤᱧ ᱟᱠᱟᱣᱟᱫ ᱠᱚ ᱛᱟᱦᱮᱸᱫ᱾ ᱟᱫᱚ ᱟᱠᱚ ᱥᱟᱶ ᱮᱱᱮᱡ ᱡᱚᱝ ᱵᱟᱲᱟ ᱠᱟᱛᱮ ᱚᱱᱟᱭ ᱮᱢᱟ ᱠᱚᱣᱟ ᱢᱮᱱᱛᱮ ᱴᱷᱟᱹᱣᱠᱟᱹ ᱠᱮᱜ-ᱟ᱾
ᱟᱫᱚ ᱜᱤᱫᱽᱨᱟᱹ ᱥᱩᱨ ᱮ ᱥᱮᱱ ᱮᱱᱛᱮ ᱢᱤᱫᱴᱟᱝ ᱴᱩᱯᱞᱟᱹᱜ ᱨᱮ ᱡᱚᱛᱚ ᱞᱟᱹᱰᱩᱭ ᱥᱟᱢᱵᱟᱣ ᱠᱮᱜ-ᱟ ᱟᱨ ᱫᱟᱨᱮ ᱵᱩᱴᱟᱹ ᱨᱮᱭ ᱫᱚᱦᱚ ᱠᱮᱜ-ᱟ᱾ ᱟᱫᱚᱭ ᱢᱮᱛᱟᱫ ᱠᱚᱣᱟ ᱢᱟ ᱱᱚᱰᱮ ᱠᱷᱚᱟᱱᱜ ᱫᱟᱹᱲ ᱯᱮ, ᱚᱠᱚᱭ ᱢᱟᱬᱟᱝ ᱚᱱᱟ ᱞᱟᱹᱰᱩ ᱴᱷᱮᱱ ᱮ ᱥᱮᱴᱮᱨᱚᱜ-ᱟ ᱡᱚᱛᱚ ᱞᱟᱹᱰᱩ ᱟᱡᱟᱜ ᱦᱩᱭᱩᱜ-ᱟ᱾ ᱜᱤᱫᱟᱹᱨ ᱠᱚ ᱢᱮᱱ ᱠᱮᱜ-ᱟ, ‘ᱦᱚᱭ᱾’ ᱥᱟᱱᱟᱥᱤᱭᱟᱹ ᱢᱤᱫ, ᱵᱟᱨ, ᱯᱮ ᱞᱮᱠᱷᱟ ᱠᱮᱫ ᱠᱷᱟᱱ ᱡᱚᱛᱚ ᱜᱤᱫᱽᱨᱟᱹ ᱫᱟᱹᱲ ᱠᱚ ᱮᱦᱚᱵ ᱠᱮᱜ-ᱟ᱾
ᱤᱠᱷᱟᱹᱱ ᱱᱚᱶᱟ ᱫᱚ ᱪᱮᱫ? ᱚᱠᱚᱭ ᱦᱚᱸ ᱵᱟᱠᱚ ᱛᱟᱭᱚᱢᱚᱜ ᱠᱟᱱᱟ ᱥᱮ ᱚᱠᱚᱭ ᱦᱚᱸ ᱵᱟᱠᱚ ᱢᱟᱬᱟᱝᱚᱜ ᱠᱟᱱᱟ, ᱡᱚᱛᱚ ᱦᱚᱲ ᱛᱤ ᱥᱟᱯᱟᱵ ᱠᱟᱛᱮ ᱠᱚ ᱫᱟᱹᱲ ᱟᱠᱟᱜ-ᱟ᱾ ᱡᱚᱛᱚ ᱦᱚᱲ ᱢᱤᱫ ᱫᱷᱟᱣ ᱛᱮ ᱞᱟᱹᱰᱩ ᱴᱷᱮᱱ ᱠᱚ ᱥᱮᱴᱮᱨ ᱮᱱᱟ ᱟᱨ ᱥᱚᱢᱟᱱ ᱛᱮ ᱦᱟᱹᱴᱤᱧ ᱠᱟᱛᱮ ᱠᱚ ᱡᱚᱢ ᱠᱮᱜ-ᱟ᱾ ᱥᱟᱱᱟᱥᱤᱭᱟᱹᱭ ᱠᱩᱞᱤ ᱠᱮᱫ ᱠᱚᱣᱟ, ‘ᱪᱮᱫᱟᱜ ᱱᱚᱝᱠᱟ ᱫᱚᱯᱮ ᱫᱟᱹᱲ ᱠᱮᱜ-ᱟ? ᱢᱤᱫ ᱦᱚᱲᱮ ᱡᱤᱛᱠᱟᱹᱨ ᱠᱚᱜ ᱠᱷᱟᱱ ᱦᱩᱱᱟᱹᱝ ᱡᱚᱛᱚ ᱞᱟᱹᱰᱩ ᱟᱡᱟᱜ ᱦᱩᱭ ᱠᱚᱜ-ᱟ᱾’
ᱢᱤᱫᱴᱟᱝ ᱠᱩᱲᱤ ᱠᱤᱫᱽᱨᱟᱹ ᱥᱟᱢᱟᱝ ᱛᱮ ᱦᱮᱡ ᱠᱟᱛᱮ ᱢᱮᱱ ᱠᱮᱜ-ᱟ, ‘ᱩᱵᱩᱱᱴᱩ᱾’
ᱩᱵᱩᱱᱴᱩ?
ᱩᱵᱩᱱᱴᱩ ᱫᱚ ᱪᱮᱫ?
ᱟᱫᱚ ᱩᱱᱤ ᱠᱩᱲᱤ ᱜᱤᱫᱽᱨᱟᱹᱭ ᱢᱮᱱ ᱠᱮᱜ-ᱟ, ‘ᱢᱤᱫ ᱦᱚᱲ ᱦᱩᱱᱟᱹᱝ ᱮ ᱡᱤᱛᱠᱟᱹᱨ ᱠᱚᱜ ᱠᱷᱟᱱ ᱡᱚᱛᱚ ᱞᱟᱹᱰᱩ ᱟᱡᱟᱜ ᱦᱩᱭ ᱠᱚᱜ-ᱟ᱾ ᱢᱤᱫ ᱦᱚᱲ ᱮ ᱨᱟᱹᱥᱠᱟᱹ ᱠᱚᱜ-ᱟ, ᱤᱠᱷᱟᱹᱱ ᱟᱹᱰᱤ ᱦᱚᱲ ᱞᱮ ᱟᱹᱲᱤᱥ ᱠᱚᱜ-ᱟ᱾ ᱡᱚᱛᱚ ᱦᱚᱲᱟᱜ ᱨᱟᱹᱥᱠᱟᱹ ᱨᱮᱜᱮ ᱢᱤᱫ ᱦᱚᱲᱟᱜ ᱨᱟᱹᱥᱠᱟᱹ ᱢᱮᱱᱟᱜ-ᱟ ᱤᱠᱷᱟᱹᱱ ᱥᱩᱢᱩᱝ ᱢᱤᱫ ᱦᱚᱲᱟᱜ ᱨᱟᱹᱥᱠᱟᱹ ᱨᱮᱫᱚ ᱡᱚᱛᱚ ᱦᱚᱲᱟᱜ ᱨᱟᱹᱥᱠᱟᱹ ᱫᱚ ᱵᱟᱹᱱᱩᱜ-ᱟ᱾ ᱡᱚᱛᱚ ᱦᱚᱲ ᱱᱟᱯᱟᱭ ᱨᱮᱠᱚ ᱛᱟᱦᱮᱸᱱ ᱠᱷᱟᱱ ᱢᱤᱫ ᱦᱚᱲ ᱦᱚᱸ ᱱᱟᱯᱟᱭ ᱨᱮᱜᱮᱭ ᱛᱟᱦᱮᱸᱱᱟ ᱤᱠᱷᱟᱹᱱ ᱢᱤᱫ ᱦᱚᱲ ᱮ ᱫᱩᱠ ᱟᱠᱟᱱ ᱠᱷᱟᱱ ᱡᱚᱛᱚ ᱦᱚᱲ ᱠᱚ ᱫᱩᱠᱩᱜ-ᱟ᱾ ᱚᱱᱟᱛᱮ ᱟᱞᱮ ᱫᱚ ᱡᱚᱛᱚ ᱦᱚᱲ ᱢᱤᱫ ᱛᱮᱜᱮ ᱞᱮ ᱨᱟᱹᱥᱠᱟᱹᱜ-ᱟ, ᱢᱤᱫ ᱛᱮᱜᱮ ᱞᱮ ᱮᱱᱮᱡ ᱟ, ᱢᱤᱫ ᱛᱮᱜᱮ ᱞᱮ ᱥᱮᱨᱮᱧᱟ᱾ ᱱᱚᱶᱟ ᱜᱮ ᱟᱞᱮᱭᱟᱜ ᱩᱵᱩᱱᱴᱩ᱾’ ᱠᱟᱛᱷᱟ ᱟᱧᱡᱚᱢ ᱠᱟᱛᱮ ᱥᱟᱱᱟᱥᱤᱭᱟᱹ ᱟᱜ ᱢᱮᱫ ᱫᱚ ᱢᱟᱨᱥᱟᱞ ᱩᱛᱟᱹᱨ ᱮᱱ ᱛᱟᱭᱟ᱾ ᱟᱹᱰᱤ ᱢᱟᱨᱟᱝ ᱜᱮᱭᱟᱱ ᱜᱟᱵᱽᱞᱟ ᱠᱟᱛᱮ ᱩᱱᱤ ᱫᱚ ᱨᱟᱹᱥᱠᱟᱹ ᱛᱮ ᱚᱲᱟᱜ ᱮ ᱨᱩᱣᱟᱹᱲ ᱮᱱᱟ᱾
ᱥᱟᱹᱨᱤ ᱜᱮ! ᱛᱤᱱᱟᱹᱝ ᱥᱚᱨᱮᱥᱟ, ᱛᱤᱱᱟᱹᱝ ᱞᱟᱯᱷᱟᱝ-ᱟ ᱟᱵᱚ ᱟᱹᱫᱤᱵᱟᱹᱥᱤ ᱟᱜ ᱩᱭᱦᱟᱹᱨ ᱫᱚ!!
