ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱠᱩᱸᱭ ᱟᱦᱟᱨ ᱛᱚᱸᱵᱟ ᱫᱟᱜ
ᱢᱤᱥᱤᱱ ᱠᱳᱞ ᱫᱟᱨᱟᱭ ᱛᱮ ᱪᱟᱥ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱞᱤᱸᱡᱤ ᱜᱤᱰᱤᱜ ᱠᱟᱱ ᱫᱟᱜ
ᱪᱟᱥ ᱵᱟᱹᱫ ᱨᱮ ᱯᱟᱴᱟᱱ ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱥᱚᱨᱠᱟᱨ ᱪᱟᱹᱠᱨᱤ ᱞᱟᱹᱜᱤᱫ
ᱪᱟᱱᱚᱪ ᱠᱟᱸᱫᱷᱟ ᱨᱮᱭᱟᱜ ᱥᱮᱪᱮᱫ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱱᱤᱫᱷᱟᱹᱱ ᱱᱟᱪᱟᱨ ᱞᱟᱢᱟᱴ ᱠᱚᱣᱟᱜ
ᱟᱜᱟᱢ ᱢᱟᱨᱥᱟᱞ ᱾
᱐᱒
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱟᱢ ᱨᱮᱹᱱ ᱱᱤᱡᱚᱨ ᱦᱚᱯᱚᱱ
ᱥᱚᱦᱟᱜᱽ ᱫᱩᱞᱟᱹᱲ ᱧᱟᱢ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱜᱩᱱ ᱢᱟᱱᱟᱣ
ᱢᱟᱱᱣᱟ ᱫᱷᱚᱨᱢ ᱢᱟᱹᱱ ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱚᱲᱟᱜ ᱴᱩᱭ ᱴᱩᱥᱟᱹᱣ
ᱟᱱᱮᱡ ᱫᱷᱟᱱᱮᱡ ᱫᱷᱚᱱ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱯᱮᱲᱟ ᱯᱟᱹᱬᱦᱟᱹ
ᱨᱮᱸᱜᱮᱡ ᱨᱟᱲᱮᱡ ᱡᱩᱲᱩ ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱞᱟᱡ ᱯᱮᱨᱮᱡ ᱫᱟᱠᱟ ᱩᱛᱩ
ᱛᱳᱣᱟ ᱫᱟᱦᱮ ᱡᱚᱢ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱥᱚᱵᱮᱱ ᱛᱩᱞᱩᱡ
ᱢᱚᱪᱟ ᱯᱮᱨᱮᱡ ᱨᱚᱲ᱾
᱐᱓
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱤᱧᱟᱜ ᱡᱤᱛᱠᱟᱹᱨ ᱞᱟᱹᱜᱤᱫ
ᱥᱟᱨᱟ ᱠᱷᱚᱱ ᱪᱤᱲᱤᱠ ᱪᱮᱸᱜᱷᱟᱭᱤᱧ ᱢᱮ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱡᱤᱣᱤ ᱟᱞᱟᱭ ᱟᱠᱟᱫ ᱦᱚᱲᱟᱜ
ᱦᱚᱨ ᱨᱮ ᱟᱞᱚᱢ ᱡᱟᱸᱜᱮᱜᱼᱟ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱟᱢ ᱜᱮᱢ ᱟᱹᱜᱩᱣᱟᱹᱧ
ᱞᱟᱯᱷᱟᱝ ᱥᱮᱪᱮᱫ ᱥᱤᱫᱽ ᱥᱟᱠᱟᱢ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱥᱟᱶᱛᱟ ᱰᱷᱚᱸᱜᱟ
ᱥᱟᱶᱦᱮᱫ ᱩᱛᱷᱱᱟᱹᱣ ᱾
᱐᱔
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱢᱟᱹᱱᱢᱤ ᱡᱤᱭᱚᱱ ᱵᱷᱩᱸᱡᱟᱹᱣ ᱞᱟᱹᱜᱤᱫ
ᱪᱷᱟᱹᱛᱤᱠ ᱯᱟᱴᱚ ᱨᱤᱡᱷᱟᱹᱣ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱡᱟᱹᱛᱤ ᱡᱟᱝ ᱨᱮ ᱜᱩᱪᱟᱹᱣ ᱡᱷᱟᱲᱟ
ᱢᱚᱴᱮ ᱟᱞᱚ ᱵᱚᱞᱚᱱ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱢᱚᱱ ᱢᱤᱞᱚᱱ ᱩᱠᱩ ᱫᱟᱱᱟᱝ
ᱫᱩᱞᱟᱹᱲ ᱥᱚᱦᱟᱜᱽ ᱢᱚᱡᱽ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱥᱟᱶᱛᱟ ᱛᱟᱞᱟ ᱩᱯᱨᱩᱢ
ᱚᱠᱨᱟᱲ ᱥᱟᱹᱜᱟᱹᱭ ᱥᱚᱡᱽ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱯᱩᱭᱞᱩ ᱨᱮᱜᱮ
ᱠᱚᱲᱟ ᱦᱚᱯᱚᱱ ᱵᱟᱞᱚᱠ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱡᱩᱛᱤ ᱠᱚᱞᱮ ᱟᱭᱳ ᱫᱟᱲᱮ
ᱟᱞᱚᱢ ᱫᱚᱦᱚᱭ ᱟᱹᱡᱟᱹᱲᱤ᱾
᱐᱕
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱟᱹᱵᱤᱱ ᱮᱯᱮᱨᱦᱮᱸᱰᱮ ᱠᱟᱛᱷᱟ
ᱢᱟᱹᱡᱷᱤ ᱢᱟᱺᱯᱟᱧᱡᱤ ᱠᱚ ᱵᱤᱪᱟᱹᱨ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱟᱹᱵᱤᱱ ᱟᱹᱵᱤᱱᱟᱜ ᱠᱟᱹᱭᱡᱟᱹ
ᱟᱹᱵᱤᱱ ᱛᱮᱜᱮ ᱥᱟᱞᱟ ᱜᱚᱴᱟᱭ ᱵᱤᱱ᱾
ᱤᱧ ᱫᱚ ᱵᱟᱹᱧ ᱠᱷᱚᱡᱚᱜ ᱠᱟᱱᱟ
ᱟᱯᱟᱱ ᱟᱹᱯᱤᱱ ᱫᱟᱲᱮ ᱛᱮ
ᱫᱷᱚᱨᱚᱢ ᱵᱟᱧᱪᱟᱣ,
ᱤᱧ ᱫᱚᱹᱧ ᱠᱷᱚᱡᱚᱜ ᱠᱟᱱᱟ
ᱢᱤᱫ ᱜᱮ ᱢᱤᱫ ᱛᱮ ᱢᱤᱫ ᱫᱤᱱ ᱛᱮ
ᱫᱷᱚᱨᱚᱢ ᱨᱮᱭᱟᱜ ᱢᱟᱱᱚᱛ᱾
