ᱦᱟᱦᱲᱟ ᱜᱮ ᱱᱚᱣᱟ ᱫᱷᱟᱹᱨᱛᱤᱯᱩᱨᱤ ᱢᱟᱹᱱᱢᱤ ᱡᱤᱭᱚᱱ ᱚᱱᱟ ᱠᱷᱚᱱ ᱟᱨ ᱦᱚᱸ ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱾ ᱚᱱᱟ ᱛᱮᱜᱮ ᱯᱟᱞᱮ ᱢᱟᱹᱱᱢᱤ ᱦᱚᱯᱚᱱ ᱴᱷᱮᱱ ᱟᱸᱴ ᱟᱞᱜᱟ ᱢᱮᱱᱛᱮ ᱪᱮᱫ ᱦᱚᱸ ᱚᱱᱠᱟᱱ ᱠᱟᱹᱢᱤᱦᱚᱨᱟ ᱵᱟᱹᱱᱩᱜᱼᱟ ᱾ ᱟᱡᱟᱜ ᱱᱚᱨᱚᱢ ᱞᱟᱹᱵᱤᱫ ᱛᱤ ᱛᱟᱞᱠᱷᱟ ᱵᱟᱡᱟᱣ ᱞᱮᱱᱠᱷᱟᱱ ᱡᱚᱛᱚ ᱞᱮᱠᱟᱱ ᱠᱟᱹᱢᱤᱦᱚᱨᱟ ᱱᱟᱯᱟᱭᱚᱜᱼᱟ ᱾ ᱫᱷᱟᱹᱨᱛᱤ ᱨᱮ ᱢᱟᱹᱱᱢᱤ ᱦᱚᱯᱚᱱ ᱫᱚ ᱵᱟᱨ ᱞᱮᱠᱟ ᱨᱩᱯ ᱛᱮ ᱢᱮᱱᱟᱜ ᱟᱠᱟᱫ ᱠᱤᱱᱟ ᱩᱱᱠᱤᱱ ᱫᱚ ᱠᱚᱲᱟ ᱟᱨ ᱠᱩᱲᱤ ᱡᱮᱢᱚᱱ ᱴᱟᱠᱟ ᱠᱟᱹᱣᱰᱤ ᱨᱮᱱᱟᱜ ᱵᱟᱨ ᱥᱟᱦᱟᱴᱟ ᱞᱮᱠᱟ ᱾ ᱩᱱᱠᱤᱱ ᱠᱚᱲᱟ ᱠᱩᱲᱤ ᱜᱮ ᱢᱤᱫ ᱫᱤᱱ ᱛᱤᱨᱤ ᱯᱩᱨᱩᱥ ᱨᱮᱠᱤᱱ ᱟᱹᱨᱩᱯᱷᱮᱨᱟᱣᱜ ᱠᱟᱱᱟ ᱾ ᱛᱤᱨᱤ ᱯᱩᱨᱩᱥ ᱦᱩᱭ ᱮᱱ ᱛᱟᱭᱚᱢ ᱛᱤᱱᱟᱹᱜ ᱫᱤᱱ ᱯᱚᱞᱚᱢ ᱨᱮᱫᱚ ᱟᱭᱳ ᱟᱨ ᱵᱟᱵᱟ ᱨᱮᱠᱤᱱ ᱦᱤᱥᱟᱹᱵᱚᱜ ᱠᱟᱱᱟ ᱾ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱦᱩᱭ ᱮᱱ ᱛᱟᱭᱚᱢ ᱦᱩᱰᱤᱧ ᱦᱩᱰᱤᱧ ᱥᱩᱞᱩᱠ ᱜᱷᱟᱸᱨᱚᱡ ᱛᱟᱹᱠᱤᱱ ᱥᱩᱞᱩᱠ ᱥᱟᱶᱟᱨ ᱛᱮ ᱞᱟᱦᱟᱜ ᱞᱟᱹᱜᱤᱫ ᱠᱤᱱ ᱨᱤᱠᱟᱹ ᱮᱫᱟ ᱾ ᱥᱩᱞᱩᱠ ᱜᱷᱟᱸᱨᱚᱡ ᱥᱟᱺᱜᱤᱧ ᱥᱮᱫ ᱞᱟᱦᱟᱜ ᱨᱮ ᱵᱟᱱᱟ ᱦᱚᱲᱟᱜ ᱵᱟᱱᱟ ᱦᱚᱲᱟᱜ ᱮᱱᱮᱢ ᱢᱮᱱᱟᱜ ᱨᱮᱦᱚᱸ ᱛᱮᱦᱮᱸᱧ ᱫᱚ ᱡᱟᱹᱥᱛᱤ ᱟᱭᱳ ᱠᱚᱣᱟᱜ ᱫᱟᱨᱟᱭ ᱛᱮᱧ ᱚᱞ ᱥᱚᱡᱷᱮ ᱮᱫᱟ ᱾

 ᱜᱤᱫᱟᱹᱨ ᱯᱤᱫᱟᱹᱨ ᱣᱟᱜ ᱪᱚᱨᱤᱛ ᱱᱟᱯᱟᱭ ᱵᱮᱱᱟᱣᱜ ᱨᱮ ᱟᱭᱳᱣᱟᱜ ᱮᱱᱮᱢ ᱫᱚ ᱟᱭᱢᱟ ᱜᱮᱭᱟ ᱾ ᱱᱮᱦᱟᱹᱞᱤ ᱡᱟᱹᱛᱤ ᱥᱟᱶᱛᱟ ᱨᱮᱱᱟᱜ ᱫᱤᱥᱟᱹ ᱠᱚ ᱧᱮᱞ ᱛᱮ ᱯᱚᱨᱛᱟᱲ ᱞᱮᱠᱷᱟᱱ ᱢᱚᱱ ᱨᱮ ᱠᱩᱠᱞᱤ ᱨᱟᱠᱟᱵᱟ ᱥᱟᱹᱨᱤᱜᱮ ᱟᱭᱳ ᱫᱚᱠᱚ ᱚᱠᱚᱭ ᱠᱟᱱᱟ ?? ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱵᱟᱞᱚᱠ ᱩᱢᱮᱨ ᱨᱮ ᱟᱭᱳ ᱠᱚᱞᱮᱨᱮ ᱜᱩᱸᱜᱩᱫ ᱦᱟᱹᱯᱤ ᱠᱟᱛᱮ ᱫᱷᱟᱹᱨᱛᱤ ᱨᱮᱱᱟᱜ ᱵᱟᱹᱲᱤᱡ ᱚᱨᱥᱚᱝ ᱠᱷᱚᱱ ᱠᱚ ᱫᱩᱜᱚᱜᱼᱟ ᱾ ᱩᱱᱤ ᱟᱭᱳ ᱫᱚ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱩᱭᱦᱟᱹᱨ ᱠᱟᱛᱮ ᱥᱤᱧ ᱧᱤᱫᱟᱹ ᱟᱠᱚ ᱦᱟᱨᱟ ᱡᱚᱛᱚᱱ ᱞᱟᱹᱜᱤᱫ ᱮ ᱨᱤᱠᱟᱹᱭᱟ ᱾ ᱟᱨ ᱢᱤᱫ ᱞᱮᱠᱟᱱ ᱟᱭᱳ ᱫᱚ ᱥᱤᱢ ᱥᱩᱠᱨᱤ ᱞᱮᱠᱟ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱡᱟᱱᱟᱢ ᱠᱟᱛᱮ ᱩᱱᱠᱩᱣᱟᱜ ᱟᱜᱟᱢ ᱠᱟᱛᱷᱟ ᱠᱚ ᱢᱚᱴᱷᱮ ᱵᱟᱭ ᱩᱭᱦᱟᱹᱨᱟ ᱪᱮᱫ ᱩᱱᱤᱦᱚᱸ ᱥᱟᱹᱨᱤ ᱟᱭᱳᱭ ᱦᱩᱭ ᱠᱚᱜᱼᱟ ! ᱜᱤᱫᱟᱹᱨ ᱯᱤᱫᱟᱹᱨ ᱠᱚᱣᱟᱜ ᱟᱜᱟᱢ ᱰᱟᱦᱟᱨ ᱥᱚᱡᱷᱮᱜ ᱛᱟᱦᱮᱸᱱ ᱞᱟᱹᱜᱤᱫ ᱟᱭᱳ ᱵᱟᱵᱟ ᱜᱮ ᱡᱟᱹᱥᱛᱤ ᱟᱺᱜᱤᱵᱷᱟᱨ ᱫᱚᱵᱚ ᱢᱚᱱᱮ ᱠᱤᱱ ᱨᱮᱦᱚᱸ ᱥᱟᱹᱨᱤ ᱛᱮᱫᱚ ᱟᱭᱳᱣᱟᱜ ᱜᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱣᱟᱜ ᱟᱜᱟᱢ ᱡᱤᱭᱚᱱ ᱥᱟᱶᱟᱨ ᱥᱚᱡᱷᱮ ᱛᱟᱦᱮᱸᱱ ᱨᱮ ᱵᱟᱹᱲᱛᱤ ᱦᱚᱠ ᱛᱟᱭ ᱛᱟᱦᱮᱸᱱᱟ ᱾ ᱟᱭᱳ ᱠᱚᱞᱮ ᱜᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱟᱥᱟ ᱵᱚᱨᱥᱟ ᱠᱚ ᱫᱚᱦᱚ ᱠᱟᱜᱼᱟ ᱾ ᱥᱟᱹᱨᱤᱜᱮ ᱟᱭᱳ ᱫᱚ ᱢᱤᱫᱴᱟᱝ ᱚᱱᱠᱟᱱ ᱟᱹᱲᱟᱹ ᱠᱟᱱᱟ – ᱡᱟᱦᱟᱸᱭ ᱫᱟᱞ ᱢᱮᱭᱟᱭ ᱛᱚᱞ ᱢᱮᱭᱟᱭ ᱟᱨ ᱦᱚᱸᱭ ᱜᱩᱸᱜᱩᱫ ᱠᱚᱞᱮ ᱢᱮᱭᱟ ᱾ ᱟᱵᱚ ᱥᱟᱶᱛᱟ ᱨᱮᱱᱟᱜ ᱪᱟᱹᱭ ᱪᱚᱞᱚᱱ ᱨᱮ ᱵᱟᱵᱟ ᱠᱚᱫᱚ ᱵᱟᱦᱨᱮ ᱠᱚᱨᱮᱱᱟᱜ ᱠᱚ ᱠᱟᱢ ᱯᱟᱹᱭᱴᱤ ᱵᱤᱫᱟᱹᱞ ᱨᱮ ᱟᱭᱳ ᱠᱚᱫᱚ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱚ ᱧᱮᱞ ᱥᱟᱶᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱧᱮᱞ ᱥᱟᱢᱴᱷᱟᱣ ᱠᱚᱣᱟ ᱾ ᱟᱵᱚ ᱠᱷᱮᱨᱣᱟᱲ ᱥᱟᱶᱛᱟ ᱨᱤᱱ ᱟᱭᱳ ᱠᱚᱫᱚ ᱯᱟᱹᱦᱤᱞ ᱠᱷᱚᱱ ᱜᱮ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱚ ᱧᱮᱞ ᱥᱟᱸᱜᱮ ᱥᱟᱶᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱥᱮᱣᱟ ᱡᱚᱛᱚᱱ ᱛᱚᱨᱟᱣ ᱠᱟᱛᱮ ᱵᱟᱦᱨᱮ ᱠᱚᱨᱮ ᱦᱚᱸᱠᱚ ᱠᱟᱹᱢᱤ ᱟᱠᱟᱫ ᱜᱮᱭᱟ ᱾ ᱛᱤᱱᱟᱹᱜ ᱥᱤᱛᱩᱝ ᱛᱤᱱᱟᱹᱜ ᱡᱟᱹᱯᱩᱫ ᱠᱚ ᱵᱟᱝ ᱠᱷᱟᱹᱛᱤᱨ ᱠᱟᱛᱮ ᱚᱲᱟᱜ ᱫᱩᱣᱟᱹᱨ ᱟᱨ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱱᱟᱯᱟᱭ ᱛᱮ ᱛᱟᱦᱮᱸᱱ ᱞᱟᱹᱜᱤᱫ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱚ ᱪᱟᱵᱟ ᱵᱟᱲᱟ ᱠᱟᱛᱮ ᱱᱟᱞᱦᱟ ᱠᱟᱹᱢᱤ ᱠᱚ ᱵᱟᱦᱨᱮ ᱠᱚ ᱳᱰᱠᱚᱜ ᱠᱟᱱᱟ ᱾ ᱟᱹᱰᱤ ᱠᱚᱢ ᱥᱚᱢ ᱟᱭᱳ ᱠᱚᱜᱮ ᱜᱤᱫᱟᱹᱨ ᱯᱤᱫᱟᱹᱨ ᱞᱟᱹᱜᱤᱫ ᱵᱟᱠᱚ ᱪᱤᱱᱛᱟᱹ ᱵᱷᱟᱵᱽᱱᱟᱜ ᱠᱟᱱᱟ ᱤᱠᱷᱟᱹᱱ ᱵᱟᱹᱲᱛᱤ ᱠᱷᱚᱱ ᱵᱟᱹᱲᱛᱤ ᱟᱭᱳ ᱠᱚᱫᱚ ᱜᱤᱫᱟᱹᱨ ᱯᱤᱫᱟᱹᱨ ᱞᱟᱹᱜᱤᱫ ᱜᱷᱟᱱᱮ ᱠᱚ ᱠᱩᱨᱩᱢᱩᱴᱩ ᱡᱚᱝ ᱠᱟᱱᱟ ᱟᱨ ᱩᱱᱠᱩᱣᱟᱜ ᱟᱜᱟᱢ ᱰᱟᱦᱟᱨ ᱚᱠᱟ ᱞᱮᱠᱟᱛᱮ ᱡᱤᱭᱟᱹᱲ ᱛᱟᱦᱮᱸᱱᱟ ᱚᱱᱟ ᱠᱚ ᱨᱤᱠᱟᱹ ᱮᱫᱟ ᱾ ᱠᱟᱹᱢᱤ ᱛᱚᱜᱼᱞᱟᱥ ᱨᱮ ᱵᱟᱦᱨᱮ ᱠᱚ ᱪᱟᱞᱟᱜ ᱠᱟᱱ ᱨᱮᱦᱚᱸ ᱦᱮᱡ ᱠᱟᱛᱮ ᱩᱱᱠᱩ ᱣᱟᱜ ᱵᱩᱜᱤ ᱵᱟᱹᱲᱤᱡ ᱟᱨ ᱚᱞᱚᱜ ᱯᱟᱲᱦᱟᱣ ᱠᱟᱛᱷᱟ ᱠᱚ ᱠᱩᱞᱤ ᱵᱩᱡᱷᱟᱹᱣ ᱠᱚᱜᱮᱭᱟ ᱾ ᱡᱟᱦᱟᱸᱭ ᱟᱭᱳ ᱠᱚ ᱱᱤᱱᱟᱹᱜ ᱠᱟᱛᱷᱟ ᱠᱚ ᱢᱮᱫ ᱞᱩᱛᱩᱨ ᱟᱠᱟᱫᱟ ᱩᱱᱠᱩ ᱨᱤᱱ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱵᱷᱟᱹᱜᱤ ᱢᱟᱹᱱᱢᱤ ᱜᱮᱠᱚ ᱵᱮᱱᱟᱣᱜ ᱠᱟᱱᱟ ᱾ ᱱᱮᱦᱟᱹᱞᱤ ᱨᱮᱱᱟᱜ ᱦᱟᱞᱟᱛ ᱫᱚ ᱱᱚᱝᱠᱟ ᱟᱠᱟᱱᱟ ᱵᱟᱡᱟᱨ ᱫᱤᱥᱚᱢ ᱟᱨ ᱟᱹᱛᱩ ᱫᱤᱥᱚᱢ ᱨᱮ ᱡᱟᱦᱟᱸ ᱨᱮᱜᱮ ᱛᱤᱨᱤ ᱯᱩᱨᱩᱥ ᱟᱹᱠᱤᱱᱟᱜ ᱠᱟᱹᱢᱤ ᱜᱮᱠᱤᱱ ᱧᱮᱞ ᱠᱟᱱᱟ ᱟᱨ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱠᱤᱱ ᱰᱷᱤᱞᱟᱹᱣ ᱠᱟᱠᱚ ᱠᱟᱱᱟ ᱩᱱ ᱡᱚᱠᱷᱮᱡ ᱱᱚᱣᱟ ᱧᱮᱞᱚᱜᱚᱜ ᱠᱟᱱᱟ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱞᱚᱝ ᱵᱷᱩᱸᱜᱤᱭᱟᱹ ᱵᱷᱚᱸᱠᱚᱲ ᱠᱚ ᱯᱟᱞᱴᱟᱣᱜ ᱠᱟᱱᱟ ᱾ ᱱᱚᱣᱟ ᱡᱟᱭᱜᱟ ᱨᱮ ᱦᱩᱱᱟᱹᱝ ᱱᱟᱥᱮᱱᱟᱜ ᱟᱭᱳ ᱜᱮ ᱵᱩᱡᱷᱟᱹᱣ ᱥᱩᱡᱷᱟᱹᱣ ᱠᱟᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱱᱟᱯᱟᱭ ᱰᱟᱦᱟᱨ ᱛᱮ ᱟᱹᱜᱩ ᱫᱟᱲᱮ ᱟᱠᱚᱟᱭ ᱾ ᱟᱭᱳ ᱫᱚ ᱡᱚᱛᱚᱣᱟᱜ ᱮ ᱠᱟᱹᱢᱤ ᱨᱮᱦᱚᱸ ᱜᱤᱫᱟᱹᱨ ᱠᱚᱫᱚ ᱚᱱᱦᱮᱲᱟ ᱵᱟᱭ ᱞᱟᱹᱠᱛᱤᱜ ᱠᱟᱱᱟ ᱾ ᱠᱩᱪᱤ ᱩᱢᱮᱨ ᱨᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱟᱹᱰᱤ ᱞᱟᱜᱮ ᱠᱷᱟᱨᱟᱯ ᱡᱤᱱᱤᱥ ᱟᱨ ᱵᱟᱹᱲᱤᱡ ᱠᱟᱹᱢᱤ ᱠᱚ ᱟᱯᱱᱟᱨ ᱜᱚᱫᱟ ᱟᱫᱚ ᱚᱱᱟ ᱠᱚᱨᱮ ᱠᱷᱚᱱ ᱫᱩᱜ ᱫᱟᱵᱚᱱ ᱫᱚ ᱟᱭᱳᱣᱟᱜ ᱜᱮ ᱞᱮᱜᱽ ᱠᱟᱹᱢᱤ ᱠᱟᱱᱟ ᱾ ᱢᱟᱲᱟᱝ ᱠᱷᱚᱱ ᱞᱤᱧ ᱞᱟᱹᱭ ᱫᱚᱦᱚ ᱟᱠᱟᱫᱟ ᱟᱭᱳᱣᱟᱜ ᱜᱩᱱ ᱪᱚᱨᱤᱛ ᱠᱚᱜᱮ ᱡᱟᱹᱥᱛᱤᱱᱫᱚ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱟᱯᱱᱟᱨᱟ ᱾ ᱪᱮᱫᱟᱜ ᱥᱮ ᱟᱭᱳᱣᱟᱜ ᱠᱚᱞᱮ ᱠᱷᱚᱱ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱡᱟᱱᱟᱢ ᱠᱟᱛᱮ ᱠᱚ ᱦᱟᱨᱟ ᱵᱩᱨᱩᱜᱼᱟ ᱾ ᱜᱮᱞ ᱪᱟᱸᱫᱚ ᱜᱮᱞ ᱫᱤᱱ ᱟᱡᱟᱜ ᱠᱚᱞᱮᱨᱮ ᱛᱤᱱᱟᱹᱜ ᱠᱚ ᱨᱟᱜ ᱨᱚᱫᱚᱱᱟ ? ᱤᱱᱟᱹ ᱛᱟᱭᱚᱢ ᱫᱷᱟᱹᱨᱛᱤ ᱛᱮ ᱱᱟᱶᱟ ᱯᱮᱲᱟ ᱨᱩᱯ ᱛᱮᱠᱚ ᱦᱤᱡᱩᱜᱼᱟ ᱾ ᱳᱶᱟᱻᱳᱶᱟ ᱟᱭᱳ ᱠᱚᱞᱮ ᱨᱮᱠᱚ ᱜᱩᱸᱜᱩᱫᱚᱜᱼᱟ ᱟᱨ ᱟᱭᱳᱣᱟᱜ ᱠᱚᱲᱟᱢ ᱠᱚᱞᱮ ᱨᱮᱱᱟᱜ ᱢᱟᱭᱟᱢ ᱛᱚᱣᱟ ᱠᱚ ᱧᱩᱭᱟ ᱾ ᱟᱡᱟᱜ ᱟᱸᱪᱟᱨ ᱫᱟᱱᱟᱝ ᱠᱷᱚᱱ ᱫᱷᱟᱹᱨᱛᱤ ᱯᱩᱨᱤ ᱥᱮᱫ ᱠᱚ ᱠᱚᱭᱚᱜᱟ ᱥᱟᱹᱨᱤᱜᱮ ᱫᱷᱟᱹᱨᱛᱤ ᱯᱩᱨᱤ ᱫᱚ ᱛᱤᱱᱟᱹᱜ ᱨᱤᱞᱟᱹᱢᱟᱞᱟ ᱜᱮᱭᱟ !! ᱵᱟᱞᱮ ᱵᱮᱠᱮᱨ – ᱵᱮᱠᱮᱨ ᱦᱩᱰᱤᱧ – ᱦᱩᱰᱤᱧ ᱠᱷᱚᱱ ᱠᱚ ᱢᱟᱨᱟᱝ ᱣᱚᱜᱼᱟ ᱾ ᱟᱭᱳ ᱠᱚᱞᱮ ᱠᱷᱚᱱ ᱜᱮ ᱫᱩᱲᱩᱵ ᱛᱤᱸᱜᱩ ᱨᱟᱜ ᱞᱟᱸᱫᱟ ᱛᱟᱲᱟᱢ ᱮᱢᱟᱱ ᱠᱚ ᱪᱮᱫᱚᱜᱼᱟ ᱾ ᱚᱱᱟᱛᱮᱠᱚ ᱢᱮᱱᱟ ᱟᱭᱳ ᱜᱮ ᱜᱤᱫᱟᱹᱨ ᱠᱚᱭᱤᱡ ᱯᱩᱭᱞᱩ ᱢᱟᱪᱮᱛᱟᱹᱱᱤ ᱫᱚ ᱾ ᱟᱭᱳᱣᱟᱜ ᱟᱲᱟᱝ ᱜᱮ ᱟᱭᱳ ᱟᱲᱟᱜ ᱟᱨ ᱟᱭᱳ ᱠᱚᱞᱮ ᱠᱷᱚᱱ ᱫᱷᱟᱹᱨᱛᱤ ᱞᱮᱵᱮᱫ ᱫᱤᱥᱚᱢ ᱜᱮ ᱡᱟᱱᱟᱢ ᱫᱤᱥᱚᱢ ᱫᱚ ᱾ ᱟᱭᱳᱣᱟᱜ ᱴᱷᱟᱶ ᱫᱚ ᱥᱟᱱᱟᱢ ᱠᱚᱨᱮ ᱠᱷᱚᱱ ᱪᱮᱛᱟᱱ ᱨᱮᱜᱮ ᱛᱟᱦᱮᱸᱱᱟ ᱾ ᱟᱭᱳ ᱴᱷᱮᱱ ᱫᱚ ᱡᱚᱛᱚ ᱞᱮᱠᱟᱱᱟᱜ ᱥᱟᱦᱟᱣ ᱫᱟᱲᱮ ᱢᱮᱱᱟᱜ ᱛᱟᱭᱟ ᱚᱱᱟ ᱛᱮᱜᱮ ᱵᱟᱝ ᱦᱮᱢᱚᱧ ᱜᱚᱨᱚᱧ ᱟᱨ ᱡᱟᱦᱟᱸᱱᱟᱜ ᱟᱥᱟ ᱵᱟᱝ ᱫᱚᱦᱚ ᱠᱟᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱣᱟᱜ ᱥᱮᱣᱟ ᱡᱚᱛᱚᱱ ᱨᱮ ᱜᱷᱟᱱᱮ ᱜᱮᱭ ᱛᱟᱦᱮᱸᱱᱟ ᱾ ᱟᱭᱳ ᱫᱚ ᱥᱟᱹᱨᱤᱜᱮ ᱢᱤᱫ ᱦᱩᱰᱤᱧ ᱫᱷᱟᱹᱨᱛᱤ ᱟᱭᱳ ᱠᱟᱱᱟᱭ ᱾

 ᱫᱦᱟᱹᱨᱛᱤ ᱟᱭᱳ ᱫᱚ ᱡᱚᱛᱚᱣᱟᱜ ᱥᱟᱦᱟᱣ ᱠᱟᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱚᱠᱟ ᱞᱮᱠᱟᱛᱮ ᱪᱚᱨᱚᱠ ᱪᱚᱨᱤᱛ ᱜᱩᱱ ᱜᱮᱭᱟᱱ ᱠᱚ ᱵᱮᱱᱟᱣᱜᱼᱟ ᱚᱱᱟ ᱜᱮᱭ ᱨᱤᱠᱟᱹ ᱮᱫᱟ ᱾ ᱡᱟᱦᱟᱸᱭ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱟᱭᱳᱣᱟᱜ ᱫᱩᱜ ᱫᱟᱵᱚᱱ ᱠᱟᱛᱷᱟ ᱠᱚ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱠᱚ ᱛᱟᱦᱮᱸ ᱟᱠᱟᱱᱟ ᱩᱱᱠᱩ ᱫᱚ ᱥᱟᱶᱛᱟᱨᱮ ᱵᱷᱟᱹᱜᱤ ᱢᱟᱹᱱᱢᱤ ᱠᱚ ᱵᱮᱱᱟᱣᱜ ᱠᱟᱱᱟ ᱾ ᱡᱟᱹᱛᱤ ᱥᱟᱶᱛᱟ ᱯᱚᱱᱚᱛ ᱥᱮ ᱫᱤᱥᱚᱢ ᱨᱮ ᱵᱷᱟᱹᱜᱤ ᱱᱟᱜᱟᱨᱤᱭᱟᱹ ᱞᱮᱠᱟ ᱩᱯᱨᱩᱢ ᱛᱟᱠᱚ ᱛᱟᱦᱮᱸᱱ ᱠᱟᱱᱟ ᱾ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱵᱷᱟᱹᱜᱤ ᱢᱟᱹᱱᱢᱤ ᱞᱮᱠᱟᱛᱮ ᱩᱯᱨᱩᱢ ᱫᱚᱦᱚ ᱠᱟᱛᱮ ᱚᱠᱚᱭ ᱠᱚᱫᱚ ᱰᱟᱠᱛᱚᱨ, ᱤᱸᱡᱤᱱᱤᱭᱚᱨ, ᱯᱳᱞᱤᱥ, ᱠᱚᱞᱮᱠᱴᱚᱨ ᱠᱚ ᱵᱮᱱᱟᱣᱜ ᱠᱟᱱᱟ ᱾ ᱱᱟᱯᱟᱭ – ᱱᱟᱯᱟᱭ ᱴᱷᱟᱶ ᱠᱚᱨᱮ ᱛᱟᱦᱮᱸ ᱠᱟᱛᱮ ᱟᱠᱚᱯᱟᱹᱨᱤ ᱵᱟᱦᱟ ᱥᱟᱶᱦᱟ ᱠᱟᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱛᱩᱞᱩᱡ ᱦᱩᱰᱤᱧ – ᱦᱩᱰᱤᱧ ᱥᱩᱞᱩᱠ ᱜᱦᱟᱨᱚᱸᱡ ᱠᱚ ᱵᱮᱱᱟᱣ ᱡᱚᱝ ᱠᱟᱱᱟ ᱩᱱ ᱵᱤᱫᱟᱹᱞ ᱫᱚ ᱟᱭᱳ ᱥᱮ ᱟᱭᱳᱣᱟᱜ ᱠᱚᱞᱮᱨᱮ ᱜᱩᱸᱜᱩᱫ ᱠᱟᱛᱷᱟ ᱠᱚᱫᱚ ᱮᱠᱟᱞ ᱜᱮ ᱵᱟᱠᱚ ᱩᱭᱦᱟᱹᱨ ᱡᱚᱝ ᱠᱟᱱᱟ ᱵᱮᱪᱨᱟ ᱟᱭᱳ ᱠᱚᱫᱚ ᱢᱩᱪᱟᱹᱫ ᱵᱮᱲᱟᱨᱮ ᱛᱤᱱᱟᱹᱜ ᱠᱚ ᱨᱟᱜ ᱦᱚᱢᱚᱨ ᱮᱫᱟ !! ᱩᱱᱠᱩ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱣᱟᱜ ᱢᱟ ᱱᱤᱛᱚᱜ ᱚᱠᱛᱚ ᱜᱮ ᱵᱟᱝ ᱠᱩᱲᱟᱹᱣᱜ ᱠᱟᱱᱟ ᱟᱭᱳ ᱥᱟᱞᱟᱜ ᱧᱮᱯᱮᱞ ᱠᱟᱛᱮ ᱢᱤᱫ ᱵᱟᱨ ᱯᱚᱫᱽ ᱨᱚᱯᱚᱲ ᱞᱟᱹᱜᱤᱫ ᱾ ᱛᱤᱱᱟᱹᱜ ᱵᱮᱴᱟ ᱛᱤᱧ, ᱵᱤᱴᱤ ᱛᱤᱧ,ᱥᱚᱱᱟ ᱛᱤᱧ ᱫᱷᱚᱱ ᱛᱤᱧ ᱫᱮᱞᱟ ᱥᱮ ᱦᱤᱡᱩᱜ ᱢᱮ ᱢᱩᱪᱟᱹᱫ ᱵᱮᱲᱟᱨᱮ ᱡᱟᱦᱟᱸᱱᱟᱜ ᱫᱚ ᱵᱟᱢ ᱮᱢ ᱠᱮ ᱨᱮᱦᱚᱸ ᱤᱧᱟᱜ ᱟᱭᱳ ᱠᱚᱞᱮ ᱨᱮᱱᱟᱜ ᱜᱩᱸᱜᱩᱫ ᱵᱟᱫᱟᱞ ᱛᱮ ᱟᱢᱟᱜ ᱠᱚᱞᱮᱨᱮ ᱯᱟᱹᱨᱤ ᱜᱩᱸᱜᱩᱫ ᱦᱟᱹᱯᱤ ᱦᱚᱪᱚ ᱟᱹᱧ ᱢᱮ ᱢᱮᱱᱛᱮ ᱠᱚ ᱢᱮᱱ ᱡᱚᱝ ᱠᱟᱱᱟ ᱾ ᱢᱮᱱᱠᱷᱟᱱ ᱩᱠᱩᱨ ᱱᱟᱦᱟᱜ ᱡᱩᱜᱽ ᱨᱤᱱ ᱛᱤᱱᱟᱹᱜ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱟᱭᱳ ᱥᱮ ᱟᱭᱳ ᱠᱚᱞᱮᱨᱮ ᱜᱩᱸᱜᱩᱫ ᱠᱟᱛᱷᱟ ᱠᱚ ᱩᱭᱦᱟᱹᱨ ᱡᱚᱝ ᱠᱟᱱᱟ ? ᱵᱮᱪᱨᱟ ᱟᱭᱳ ᱠᱚᱣᱟᱜ ᱡᱤᱭᱚᱱ ᱫᱚ ᱛᱤᱱᱟᱹᱜ ᱦᱟᱨᱠᱮᱛ ᱥᱟᱥᱮᱛ ᱛᱮ ᱫᱷᱟᱹᱨᱛᱤ ᱠᱷᱚᱱ ᱵᱤᱫᱟᱹᱭ ᱮ ᱤᱫᱤ ᱮᱫᱟ ᱚᱱᱛᱚᱨ ᱢᱚᱱᱮᱨᱮ ᱵᱷᱮᱫᱟᱣ ᱟᱠᱟᱱ ᱪᱤᱛᱟᱹᱨ ᱠᱚ ᱧᱮᱞ ᱟᱠᱟᱫ ᱢᱟᱹᱱᱢᱤ ᱜᱮᱠᱚ ᱵᱟᱰᱟᱭᱟ ᱾ ᱢᱮᱱᱠᱷᱟᱱ ᱩᱱᱠᱩ ᱜᱤᱫᱟᱹᱨ ᱯᱤᱫᱟᱹᱨ ᱠᱚᱦᱚᱸ ᱢᱤᱫ ᱵᱮᱲᱟ ᱱᱟᱥᱮᱱᱟᱜ ᱩᱭᱦᱟᱹᱨ ᱞᱟᱹᱠᱛᱤᱜ ᱠᱟᱱᱟ ᱱᱚᱣᱟ ᱦᱚᱨ ᱰᱟᱦᱟᱨ ᱜᱮ ᱯᱟᱪᱷᱮ ᱢᱤᱫ ᱫᱤᱱ ᱤᱧᱟᱜ ᱦᱚᱸ !!!

***