ᱥᱟᱱᱛᱟᱲ ᱥᱟᱶᱛᱟ ᱨᱮ ᱫᱚ ᱟᱹᱰᱤ ᱞᱮᱠᱟᱱ ᱵᱟᱯᱞᱟ ᱢᱮᱱᱟᱜᱼᱟ ᱡᱮᱞᱮᱠᱟ ᱠᱚᱸᱰᱮᱞ ᱥᱮ ᱜᱩᱲᱫᱟᱹᱣ ᱧᱟᱯᱟᱢ, ᱫᱤᱠᱩ ᱵᱟᱯᱞᱟ, ᱦᱟᱲᱟᱢ ᱵᱟᱹᱨᱭᱟᱹᱛ ᱥᱮ ᱴᱩᱝᱠᱤ ᱫᱤᱯᱤᱞ, ᱥᱟᱸᱜᱮ ᱵᱟᱹᱨᱭᱟᱹᱛ, ᱜᱷᱟᱹᱨᱫᱤ ᱡᱟᱶᱟᱭ, ᱮᱢᱟᱱ ᱾ ᱢᱤᱫ ᱠᱚᱲᱟ ᱢᱤᱫ ᱠᱩᱲᱤ ᱵᱟᱯᱞᱟ ᱠᱟᱹᱠᱤᱱ ᱨᱮ ᱟᱹᱰᱤ ᱛᱚᱦᱚᱨ ᱡᱚᱠᱷᱮᱡ ᱡᱚᱠᱷᱮᱡ ᱛᱮ ᱦᱮᱡ ᱥᱮᱱ ᱦᱩᱭᱩᱜᱼᱟ ᱨᱟᱭᱵᱟᱨ ᱤᱫᱤ ᱟᱛᱮ ᱾ ᱱᱚᱝᱠᱟᱱ ᱦᱮᱡ ᱥᱮᱱ ᱨᱮ ᱠᱚᱲᱟ ᱠᱩᱲᱤ ᱭᱟᱜ ᱞᱟᱜᱟᱛ ᱢᱟ ᱢᱮᱱᱟᱜ ᱜᱮ, ᱚᱱᱟ ᱥᱟᱶᱛᱮ ᱵᱟᱨ ᱚᱲᱟᱜ ᱨᱮᱱ ᱦᱚᱲ, ᱵᱟᱨ ᱜᱚᱨᱟᱢ ᱥᱮ ᱟᱹᱛᱩ ᱨᱮᱱ ᱢᱟᱹᱡᱷᱤ ᱢᱟᱹᱯᱟᱹᱡᱷᱤ ᱠᱚᱣᱟᱜ ᱦᱚᱸ ᱞᱟᱜᱟᱛ ᱢᱮᱱᱟᱜᱼᱟ ᱾ ᱚᱱᱟ ᱞᱮᱠᱟᱛᱮ ᱢᱤᱫ ᱵᱟᱯᱞᱟ ᱫᱚ ᱠᱚᱲᱟᱼᱠᱩᱲᱤ ᱟᱜ ᱢᱚᱱᱮ ᱥᱮ ᱥᱟᱹᱜᱟᱹᱭ ᱛᱚᱯᱚᱞ ᱠᱟᱹᱢᱤ ᱥᱩᱢᱩᱝ ᱫᱚ ᱵᱟᱝ ᱠᱟᱱᱟ ᱵᱚᱨᱚᱢ ᱵᱟᱨᱭᱟ ᱢᱩᱲ ᱟᱹᱛᱩ ᱥᱟᱶᱛᱮ ᱤᱱᱰᱟᱭᱨᱮᱠᱴᱞᱤ ᱟᱹᱰᱤᱜᱟᱱ ᱯᱮᱲᱟ ᱠᱚᱣᱟᱜ ᱟᱹᱛᱩ ᱛᱚᱯᱚᱞᱚᱜ ᱠᱟᱱᱟ ᱾ ᱱᱚᱝᱠᱟᱱ ᱛᱚᱯᱚᱞᱚᱜ ᱟᱹᱨᱤ ᱢᱮᱱᱟᱜ ᱛᱮᱜᱮ ᱯᱟᱞᱮᱱ ᱟᱵᱚ ᱥᱟᱶᱛᱟ ᱨᱮ ᱥᱚᱥᱟᱞ ᱵᱚᱱᱰᱤᱝ ᱥᱮ ᱥᱟᱶᱛᱟ ᱛᱚᱯᱚᱞ ᱫᱚ ᱩᱱᱟᱹᱜ ᱯᱚᱠᱛᱚ ᱢᱮᱱᱟᱜᱼᱟ ᱾ ᱱᱚᱝᱠᱟᱱ ᱛᱚᱯᱚᱞ ᱠᱷᱟᱹᱛᱤᱨ ᱜᱮ ᱦᱟᱯᱲᱟᱢ ᱠᱚ ᱫᱚ ᱠᱚ ᱢᱮᱱᱟ – ‘ᱦᱚᱲ ᱠᱷᱟᱱ ᱜᱮ ᱯᱮᱲᱟ, ᱫᱤᱠᱩ ᱠᱷᱟᱱ ᱜᱮ ᱵᱟᱹᱭᱨᱤ’ ᱾ ᱢᱮᱱᱠᱷᱟᱱ ᱱᱮᱵᱮᱛᱟᱨ ᱫᱚ ᱢᱤᱫ ᱵᱟᱯᱞᱟ ᱛᱟᱞᱟᱛᱮ ᱛᱚᱯᱚᱞ ᱟᱠᱟᱱ ᱥᱟᱹᱜᱟᱭ ᱥᱟᱶᱛᱮ ᱥᱟᱶᱛᱟ ᱛᱚᱯᱚᱞ ᱠᱚᱨᱮᱦᱚᱸ ᱜᱷᱩᱬᱪᱤ ᱧᱮᱞᱚᱜ ᱠᱟᱱᱟ ᱾
᱑ᱹ ᱥᱟᱱᱛᱟᱲ ᱥᱟᱶᱛᱟ ᱨᱮᱫᱚ ᱵᱟᱹᱲᱛᱤ ᱠᱟᱭᱛᱮ ᱵᱟᱯᱞᱟ ᱫᱚ ᱠᱚᱸᱰᱮᱞ ᱥᱮ ᱜᱩᱲᱫᱟᱹᱣ ᱧᱟᱯᱟᱢ ᱵᱟᱯᱞᱟ ᱜᱮ ᱦᱩᱭᱩᱜ ᱠᱟᱱᱟ ᱾ ᱱᱚᱣᱟᱜᱮ ᱥᱚᱨᱮᱥ ᱦᱚᱸ ᱥᱚᱨᱮᱥ ᱵᱟᱯᱞᱟ ᱠᱟᱱᱟ ᱥᱟᱶᱛᱟ ᱛᱟᱞᱟᱨᱮ ᱞᱮᱠᱟᱱ ᱞᱮᱠᱟᱱ ᱵᱟᱯᱞᱟ ᱠᱚ ᱢᱩᱫᱽ ᱨᱮ, ᱪᱮᱫᱟᱜ ᱥᱮ ᱵᱟᱯᱞᱟ ᱢᱟᱲᱟᱝ ᱨᱮ ᱟᱹᱰᱤᱜᱟᱱ ᱚᱠᱛᱚ ᱢᱤᱫ ᱛᱮ ᱜᱟᱛᱮ ᱜᱟᱯᱟᱛᱮ ᱠᱚᱸᱰᱮᱞ ᱧᱟᱯᱟᱢ ᱟᱛᱮ ᱠᱤᱱ ᱠᱷᱮᱢᱟᱣ ᱠᱟᱜᱼᱟ ᱟᱨ ᱠᱚᱲᱟᱼᱠᱩᱲᱤ ᱟᱯᱟᱱᱼᱟᱹᱯᱤᱱ ᱵᱮᱥ ᱴᱷᱤᱠ ᱠᱤᱱ ᱵᱟᱯᱟᱰᱟᱭ ᱵᱩᱯᱩᱡᱷᱟᱹᱣ ᱠᱚᱜᱼᱟ ᱾ ᱛᱤᱱᱨᱮ ᱫᱩᱞᱟᱹᱲ ᱥᱟᱨᱥᱟᱜ, ᱛᱤᱱᱨᱮ ᱨᱟᱹᱜᱤ ᱨᱟᱠᱟᱵ, ᱫᱟᱨᱮ ᱱᱟᱹᱲᱤ ᱵᱮᱫᱷᱟᱣ ᱞᱮᱠᱟ ᱢᱚᱱᱮ ᱟᱨ ᱦᱚᱲᱢᱚ ᱯᱮᱴᱮᱨ ᱨᱟᱸᱡᱟᱣ ᱪᱤᱱᱦᱟᱹ ᱞᱮᱱ ᱛᱟᱭᱚᱢ ᱛᱤᱨᱤᱞ ᱛᱟᱨᱚᱵ ᱛᱟᱞᱟᱛᱮ ᱵᱟᱨ ᱚᱲᱟᱜ ᱦᱚᱲ ᱟᱨ ᱵᱟᱨ ᱟᱹᱛᱩ ᱥᱮ ᱜᱚᱨᱟᱢ ᱛᱚᱯᱚᱞᱚᱜᱼᱟ ᱾ ᱱᱮᱵᱮᱛᱟᱨ ᱫᱚ ᱟᱭᱚᱼᱵᱟᱵᱟ ᱠᱚ ᱦᱚᱸ ᱯᱟᱞᱮᱱ ᱱᱟᱥᱮ ᱠᱚ ᱱᱤᱨᱡᱟᱞᱟᱜ ᱠᱟᱱ ᱥᱮ ᱪᱮᱫ, ᱦᱟᱨᱟᱜ ᱠᱟᱱ ᱡᱩᱣᱟᱹᱱ ᱠᱚᱲᱟᱼᱠᱩᱲᱤ ᱠᱚ ᱥᱟᱶᱛᱟ ᱜᱷᱮᱨ ᱠᱷᱚᱱ ᱵᱟᱦᱮᱨ ᱢᱮᱱᱫᱚ ᱮᱴᱟᱜ ᱡᱟᱹᱛ ᱨᱮᱱ ᱠᱚᱲᱟᱼᱠᱩᱲᱤ ᱥᱟᱶ ᱠᱚ ᱞᱚᱴᱜᱷᱩᱴᱤ ᱭᱮᱜᱼᱟ᱾ ᱫᱩᱯᱩᱞᱟᱹᱲ ᱥᱮ ᱥᱤᱯᱤᱵᱤᱞ ᱫᱚ ᱠᱚᱲᱟᱼᱠᱩᱲᱤᱭᱟᱜ ᱱᱤᱡᱮᱨ ᱟᱹᱭᱫᱟᱹᱨᱤ ᱠᱟᱱ ᱜᱮᱭᱟ ᱮᱱᱛᱮ ᱨᱮᱦᱚᱸ ᱥᱟᱶᱛᱟ ᱜᱷᱮᱨ ᱵᱷᱤᱛᱤᱨ ᱨᱮ ᱠᱷᱟᱱ ᱜᱮ ᱱᱟᱯᱟᱭᱟ ᱾ ᱪᱮᱫᱟᱜ ᱥᱮ ᱥᱟᱶᱛᱟ ᱡᱟᱹᱱᱤ ᱡᱩᱫᱟᱹ ᱜᱮᱭᱟ ᱨᱟᱭᱼᱨᱤᱛ ᱟᱹᱨᱤᱪᱟᱹᱞᱤ, ᱥᱮᱨᱣᱟ ᱞᱟᱠᱪᱟᱨ, ᱮᱢᱟᱱ ᱾ ᱡᱟᱸᱦᱟ ᱫᱚ ᱢᱤᱫ ᱥᱩᱛᱟᱹᱢ ᱛᱮ ᱜᱟᱞᱟᱝ ᱵᱟᱭ ᱜᱟᱱᱚᱜᱼᱟ, ᱢᱤᱫ ᱫᱷᱟᱹᱲ ᱛᱮ ᱢᱟᱱᱟᱣ ᱵᱟᱭ ᱜᱟᱱᱚᱜᱼᱟ, ᱠᱟᱛᱷᱟ ᱜᱮ ᱵᱟᱝ ᱯᱚᱲᱛᱟᱜᱼᱟ ᱾ ᱮᱱᱠᱷᱟᱱ ᱡᱩᱫᱟᱹ ᱡᱩᱫᱟᱹ ᱥᱟᱶᱛᱟ ᱫᱚ ᱯᱮᱲᱟᱜ ᱟᱢ ᱪᱮᱠᱟᱛᱮ ? ᱛᱚᱯᱚᱞᱚᱜ ᱟᱢ ᱪᱮᱠᱟᱛᱮ ? ᱟᱵᱚ ᱥᱟᱶᱛᱟ ᱨᱮᱫᱚ ᱚᱱᱚᱨ ᱠᱤᱞᱤᱝ ᱵᱟᱹᱱᱩᱜ ᱨᱮᱦᱚᱸ ᱮᱴᱟᱜ ᱡᱟᱹᱛ ᱨᱮ ᱡᱟᱶᱟᱭᱮᱱ ᱠᱩᱲᱤ ᱫᱚ ᱚᱠᱟ ᱚᱠᱟ ᱠᱚᱨᱮ ᱫᱚ ᱡᱤᱣᱤᱫ ᱛᱮ ᱵᱷᱟᱸᱰᱟᱱ ᱨᱮᱱᱟᱜ ᱟᱹᱨᱤ ᱢᱮᱱᱟᱜᱼᱟ ᱟᱨ ᱟᱯᱟᱼᱵᱟᱨᱮ ᱚᱲᱟᱜ ᱦᱤᱡᱩᱜ ᱥᱮᱱᱚᱜ ᱠᱚ ᱵᱟᱨᱚᱱᱮᱭᱟ ᱾ ᱮᱴᱟᱜ ᱡᱟᱹᱛ ᱠᱩᱲᱤ ᱵᱟᱹᱦᱩᱭ ᱟᱹᱜᱩ ᱟᱠᱟᱫᱮ ᱠᱚᱲᱟ ᱦᱚᱸ ᱥᱟᱶᱛᱟ ᱛᱟᱞᱟ ᱨᱮᱱᱟᱜ ᱵᱚᱸᱜᱟ ᱵᱩᱨᱩ ᱠᱚᱨᱮ ᱫᱚ ᱜᱮᱫ ᱵᱷᱮᱜᱟᱨ ᱠᱟᱭᱟ ᱠᱚ, ᱵᱟᱝᱠᱚ ᱥᱟᱵᱼᱫᱟᱵ ᱥᱮ ᱥᱩᱨ ᱚᱪᱚᱣᱟᱭᱟ ᱾ ᱥᱟᱱᱛᱟᱲ ᱥᱟᱶᱛᱟ ᱱᱤᱨᱞᱟᱹ ᱛᱟᱸᱦᱮᱱ ᱢᱟ ᱢᱮᱱᱛᱮ ᱜᱮ ᱯᱟᱞᱮᱱ ᱱᱚᱝᱠᱟᱱ ᱥᱮᱨᱣᱟ ᱨᱮᱱᱟᱜ ᱪᱚᱞᱚᱱ ᱫᱚ ᱱᱟᱜᱟᱢ ᱠᱷᱚᱱ ᱦᱮᱡ ᱟᱹᱜᱩᱜ ᱠᱟᱱᱟ ᱾ ᱮᱴᱟᱜ ᱡᱟᱹᱛ ᱨᱮ ᱡᱟᱶᱟᱭᱮᱱ ᱠᱩᱲᱤᱭᱟᱜ ᱥᱟᱹᱜᱟᱹᱭ ᱫᱚ ᱟᱹᱛᱩ ᱚᱲᱟᱜ ᱢᱟ ᱦᱮᱸ ᱜᱮ ᱥᱟᱶᱛᱟ ᱨᱮᱱᱟᱜ ᱨᱮᱡᱤᱥᱴᱟᱨ ᱠᱷᱚᱱ ᱦᱚᱸ ᱜᱮᱫ ᱵᱷᱮᱜᱟᱨ ᱥᱮ ᱢᱟᱞᱚᱴ ᱩᱛᱟᱹᱨᱚᱜᱼᱟ ᱟᱨ ᱠᱚᱲᱟ ᱫᱚ ᱟᱹᱰᱤᱜᱟᱱ ᱮᱲᱮᱼᱤᱲᱩᱜ ᱞᱮᱠᱟᱭ ᱵᱩᱡᱷᱟᱹᱣ ᱛᱮ ᱨᱟᱹᱜᱤ ᱛᱮ ᱢᱟᱦᱟᱰᱮᱵᱽ ᱞᱮᱠᱟᱭ ᱦᱚᱸᱠᱟᱭᱟ, ᱥᱟᱶᱛᱟᱭ ᱨᱟᱹᱜᱤᱭᱟᱜᱼᱟ, ᱯᱮᱲᱛᱟ ᱛᱮ ᱠᱩᱠᱞᱤᱭ ᱫᱚᱦᱚᱭᱟ – ‘ᱥᱟᱶᱛᱟ ᱪᱮᱫ ᱮ ᱮᱢᱟᱫ ᱫᱤᱧᱟ?” ᱱᱚᱝᱠᱟᱛᱮ ᱟᱹᱛᱩ ᱦᱚᱲ ᱛᱟᱞᱟᱨᱮ, ᱥᱟᱶᱛᱟ ᱛᱟᱞᱟᱨᱮ ᱥᱟᱜᱟᱹᱭ ᱢᱚᱥᱨᱟᱜ ᱠᱟᱱᱟ, ᱛᱚᱯᱚᱞ ᱜᱷᱩᱬᱪᱤᱜ ᱠᱟᱱᱟ᱾
᱒ᱹ ᱵᱟᱯᱞᱟ ᱵᱟᱵᱚᱫᱽ ᱛᱤᱱᱤᱱ ᱟᱹᱱ ᱟᱹᱨᱤ ᱫᱚ ᱢᱟᱱᱟᱣ ᱵᱟᱛᱟᱣ ᱛᱮᱜᱮ ᱦᱩᱭᱩᱜᱼᱟ ᱾ ᱢᱮᱱᱫᱚ, ᱛᱤᱱᱤᱱ ᱜᱟᱱᱚᱜ ᱵᱟᱝᱼᱜᱟᱱᱚᱜ ᱛᱟᱞᱟᱨᱮ ᱥᱟᱹᱜᱟᱹᱭ ᱡᱚᱲᱟᱣ ᱫᱚ ᱥᱟᱶᱛᱟ ᱛᱟᱞᱟᱨᱮ ᱥᱟᱹᱜᱟᱹᱭ ᱛᱚᱯᱚᱞᱼᱮ ᱢᱚᱥᱨᱟᱭᱟ᱾ ᱱᱟᱜᱟᱢ ᱨᱮ ᱪᱮᱫ ᱞᱮᱠᱟ ᱴᱩᱰᱩᱼᱵᱮᱥᱨᱟ, ᱢᱟᱹᱨᱰᱤᱼᱠᱤᱥᱠᱩ ᱛᱟᱞᱟᱨᱮ ᱵᱟᱯᱞᱟ ᱵᱟᱨᱚᱱ ᱜᱮᱭᱟ ᱢᱮᱱᱛᱮ ᱵᱚᱱ ᱵᱟᱰᱟᱭᱟ, ᱱᱮᱛᱟᱨ ᱫᱚ ᱵᱟᱵᱚᱱ ᱢᱟᱱᱟᱣ ᱵᱟᱛᱟᱣᱮᱜᱼᱟ ᱾ ᱠᱷᱟᱹᱞᱤ ᱠᱩᱠᱞᱤ ᱼ “ᱪᱮᱫ ᱪᱮᱠᱟᱜ ᱛᱮ”? ᱱᱚᱣᱟ ᱠᱩᱠᱞᱤ ᱨᱮᱱᱟᱜ ᱞᱟᱹᱱᱟᱹᱭ ᱛᱩᱱᱠᱷᱤ ᱛᱚᱞᱟᱥ ᱨᱮ ᱠᱷᱚᱸᱫᱽᱨᱚᱸᱫᱤᱭᱟᱹ ᱠᱚ ᱪᱷᱩᱴᱟᱹᱣ ᱟᱠᱟᱱᱟ, ᱚᱠᱛᱮ ᱡᱟᱹᱱᱤᱡ ᱵᱩᱴᱟᱹ ᱫᱚ ᱵᱤᱥᱲᱤ ᱟᱛᱮ ᱠᱚ ᱥᱚᱫᱚᱨᱟ ᱾ ᱱᱮᱵᱮᱛᱟᱨ ᱫᱚ ᱵᱟᱝᱼᱜᱟᱱᱚᱜ ᱯᱟᱹᱨᱤᱥ ᱨᱮ ᱵᱟᱯᱞᱟ ᱢᱟ ᱜᱟᱱᱚᱜ ᱠᱟᱱ ᱜᱮ, ᱵᱟᱝ ᱜᱟᱱᱚᱜ ᱥᱟᱹᱜᱟᱹᱭ ᱦᱚᱸ ᱵᱟᱠᱚ ᱵᱟᱛᱟᱣᱮᱜᱼᱟ, ᱟᱹᱛᱩ ᱨᱮᱜᱮ ᱡᱟᱸᱦᱟᱭ ᱠᱚ ᱱᱟᱹᱭᱦᱟᱹᱨᱮᱜᱼᱟ ᱚᱱᱠᱟᱱ ᱛᱚᱯᱚᱞ ᱨᱮ ᱵᱟᱹᱲᱛᱤ ᱠᱟᱭᱛᱮ ᱥᱟᱹᱜᱟᱹᱭ ᱞᱚᱴᱚᱢ ᱫᱚ ᱧᱮᱞᱚᱜ ᱠᱟᱱᱟ᱾ ᱠᱟᱛᱷᱟ ᱨᱮᱜᱮ ᱠᱚ ᱢᱮᱱ – “ᱟᱹᱛᱩ ᱥᱟᱜᱟᱹᱭ ᱜᱷᱟᱱᱴᱟᱲ ᱵᱟᱦᱟ…………” ᱾ ᱱᱚᱝᱠᱟᱛᱮ ᱟᱹᱛᱩ ᱛᱟᱞᱟᱨᱮ ᱜᱟᱹᱞᱤᱢ ᱠᱚᱣᱟᱜ ᱡᱩᱢᱤᱫ ᱛᱚᱯᱚᱞ ᱨᱟᱹᱯᱩᱫᱚᱜ ᱠᱟᱱᱟ ᱟᱨ ᱡᱩᱲᱩ ᱨᱮᱠᱚ ᱦᱟᱹᱴᱤᱧᱚᱜ ᱠᱟᱱᱟ᱾
᱓ᱹ ᱵᱟᱯᱞᱟ ᱠᱟᱛᱮ ᱢᱤᱫ ᱠᱚᱲᱟᱼᱠᱩᱲᱤ ᱛᱟᱞᱟᱨᱮ ᱡᱩᱫᱟᱹ ᱞᱮᱠᱟᱱ ᱥᱤᱯᱤᱵᱤᱞ ᱥᱟᱨᱥᱟᱜᱼᱟ ᱟᱨ ᱜᱟᱰᱟ ᱨᱮᱱᱟᱜ ᱮᱛᱚᱦᱚᱵ ᱥᱚᱛᱟ ᱠᱷᱚᱱ ᱫᱚᱨᱭᱟ ᱥᱮᱴᱮᱨᱚᱜ ᱛᱮ ᱚᱥᱟᱨᱚᱜ ᱞᱮᱠᱟ ᱚᱥᱟᱨ ᱤᱫᱤᱜᱼᱟ ᱢᱮᱱᱠᱷᱟᱱ ᱱᱮᱵᱮᱛᱟᱨ ᱫᱚ “ᱱᱩᱶᱟ ᱱᱩᱶᱟ ᱞᱚᱞᱤᱛᱟ, ᱠᱷᱟᱭ ᱠᱷᱟᱭ ᱵᱤᱥᱯᱤᱛᱟ” ᱾ ᱵᱟᱯᱞᱟ ᱛᱟᱭᱚᱢ ᱜᱤᱫᱟᱹᱨ ᱯᱤᱫᱟᱹᱨ ᱫᱚ ᱦᱩᱭᱮᱱ ᱠᱷᱟᱱ ᱚᱱᱟ ᱥᱤᱵᱤᱞ ᱫᱚ ᱦᱮᱞᱣᱮᱫ ᱤᱫᱤᱜ ᱠᱟᱱᱟ ᱾ ᱵᱟᱹᱲᱛᱤ ᱫᱚ ᱟᱹᱛᱩ ᱚᱲᱟᱜ ᱠᱷᱚᱱ ᱵᱟᱦᱮᱨ ᱛᱮ ᱠᱟᱹᱢᱤ ᱪᱟᱞᱟᱜ ᱠᱟᱱ ᱠᱚᱲᱟᱼᱠᱩᱲᱤ ᱠᱚᱴᱷᱮᱱ ᱛᱤᱨᱤᱼᱡᱩᱨᱤ ᱥᱟᱶ ᱥᱤᱯᱤᱵᱤᱞ ᱦᱮᱞᱣᱮᱫᱚᱜ ᱫᱚ ᱧᱮᱞᱚᱜ ᱠᱟᱱᱟ ᱾ ᱥᱤᱵᱤᱞ ᱥᱤᱯᱤᱵᱤᱞ ᱫᱚ ᱡᱚᱢ ᱡᱤᱱᱤᱥ ᱞᱮᱠᱟ ᱠᱚ ᱢᱚᱱᱮᱭᱟ ᱟᱨ ᱪᱟᱠᱷᱟ, ᱪᱮᱨᱮᱡ, ᱪᱮᱯᱮᱡ ᱦᱟᱹᱴᱤᱧ ᱥᱟᱱᱟ ᱠᱚᱣᱟ ᱾ ᱚᱲᱟᱜ ᱨᱮ ᱵᱟᱝᱠᱚ ᱟᱱᱴᱟᱜ ᱠᱩᱲᱟᱹᱜ ᱠᱷᱟᱹᱛᱤᱨ ᱵᱟᱦᱮᱨ ᱠᱟᱹᱢᱤ ᱠᱟᱛᱮ ᱴᱟᱠᱟ ᱟᱨᱡᱟᱣ ᱛᱮ ᱚᱲᱟᱜ ᱫᱩᱣᱟᱹᱨ ᱜᱤᱫᱟᱹᱨ ᱯᱤᱫᱟᱹᱨ ᱠᱮᱴᱮᱡ ᱨᱮᱱᱟᱜ ᱢᱚᱱᱥᱩᱵᱟᱹ ᱠᱟᱛᱮ ᱠᱚ ᱚᱰᱚᱠᱚᱜᱼᱟ ᱢᱮᱱᱠᱷᱟᱱ ᱴᱟᱠᱟ ᱟᱨᱡᱟᱣ ᱟᱨᱡᱟᱣ ᱜᱷᱟᱨᱚᱸᱡᱽ ᱜᱮᱠᱚ ᱵᱚᱫᱚᱞᱟ ᱾ ᱰᱟᱺᱜᱩᱣᱟᱹ ᱠᱩᱲᱤ ᱠᱷᱟᱱ ᱢᱟ ᱢᱤᱫ ᱚᱲᱟᱜ ᱨᱮᱜᱮ ᱱᱮᱭᱟᱣ ᱥᱤᱨᱡᱟᱹᱣᱚᱜᱼᱟ ᱾ ᱵᱟᱹᱦᱩ ᱠᱩᱲᱤ ᱠᱷᱟᱱ ᱢᱟᱲᱟᱝ ᱡᱟᱶᱟᱭ ᱚᱲᱟᱜ ᱩᱡᱟᱹᱲᱚᱜᱼᱟ, ᱜᱤᱫᱟᱹᱨ ᱠᱚ ᱴᱩᱣᱟᱹᱨᱚᱜᱼᱟ ᱟᱨ ᱛᱟᱭᱚᱢ ᱡᱟᱶᱟᱭ ᱚᱲᱟᱜ ᱨᱮ ᱠᱷᱟᱹᱯᱟᱹᱨᱤᱭᱟᱹᱣ ᱥᱤᱨᱡᱟᱹᱣᱚᱜ ᱛᱮ ᱛᱤᱱᱟᱹᱜ ᱡᱚᱱᱚᱜ ᱨᱟᱹᱯᱩᱫᱚᱜᱼᱟ, ᱛᱤᱱᱟᱹᱜ ᱪᱩᱞᱦᱟᱹ ᱨᱚᱪᱚᱫᱚᱜᱼᱟ, ᱴᱷᱟᱹᱣᱠᱟᱹ ᱫᱚ ᱵᱟᱹᱱᱩᱜᱼᱟ ᱾ ᱚᱱᱟ ᱪᱷᱟᱰᱟ, ᱵᱟᱦᱨᱮ ᱠᱟᱹᱢᱤ ᱵᱟᱝ ᱪᱟᱞᱟᱜ ᱢᱮᱱᱫᱚ ᱵᱟᱦᱨᱮ ᱠᱟᱹᱢᱤ ᱪᱟᱞᱟᱜ ᱠᱚᱲᱟᱼᱠᱩᱲᱤ ᱠᱷᱚᱱ ᱥᱟᱨᱮᱡ ᱠᱚᱲᱟᱼᱠᱩᱲᱤ ᱛᱟᱞᱟᱨᱮᱦᱚᱸ ᱱᱚᱝᱠᱟᱱ ᱞᱚᱴᱚᱨ ᱯᱚᱴᱚᱨ ᱥᱟᱹᱜᱟᱹᱭ ᱛᱚᱯᱚᱞᱚᱜ ᱫᱚ ᱧᱮᱞᱚᱜ ᱠᱟᱱᱟ ᱪᱮᱫᱟᱜ ᱥᱮ ᱵᱟᱡᱟᱨ ᱠᱟᱹᱢᱤ ᱠᱚ ᱪᱟᱞᱟᱜ ᱱᱚᱝᱠᱟᱱ ᱟᱹᱛᱩ ᱫᱚ ᱵᱟᱨᱟᱵᱟᱹᱨᱤ ᱜᱟᱱ ᱩᱡᱟᱹᱲᱚᱜ ᱠᱟᱱᱟ, ᱥᱟᱨᱮᱡ ᱛᱟᱸᱦᱮᱱ ᱡᱟᱞᱩᱹᱣᱟ ᱦᱚᱲ ᱦᱟᱹᱱᱤ ᱫᱩᱣᱟᱹᱨ ᱱᱷᱟᱹᱭ ᱫᱩᱣᱟᱹᱨ ᱦᱩᱯᱩᱡ ᱦᱩᱯᱩᱡ ᱠᱚ ᱚᱸᱵᱟᱜ ᱤᱠᱲᱩᱢ ᱵᱟᱲᱟᱭ ᱠᱟᱱᱟ ᱾ ᱛᱷᱤᱛ ᱚᱪᱚᱭᱮᱱ ᱠᱷᱟᱱ ᱫᱚ ᱵᱷᱟᱜᱚᱞ ᱛᱟᱵ ᱾ ᱚᱲᱟᱜ ᱫᱩᱣᱟᱹᱨ ᱵᱟᱹᱜᱤ ᱠᱟᱛᱮ, ᱰᱤᱼᱰᱟᱹᱦᱤ ᱵᱟᱹᱜᱤ ᱠᱟᱛᱮ, ᱜᱤᱫᱟᱹᱨ ᱯᱤᱫᱟᱹᱨ ᱵᱟᱹᱜᱤ ᱠᱟᱛᱮ ᱚᱠᱟ ᱥᱮᱫ ᱪᱚᱝ, ᱱᱟᱼᱯᱟᱛᱛᱟ ᱾ ᱱᱚᱝᱠᱟᱛᱮ ᱟᱹᱛᱩ ᱚᱲᱟᱜ ᱧᱩᱛᱩᱢ ᱨᱮ ᱠᱩᱭᱟᱹ ᱞᱟᱜᱟᱜ ᱠᱟᱱᱟ ᱾
᱔ᱹ ᱵᱟᱝ ᱵᱟᱝ ᱛᱮ ᱨᱮᱦᱚᱸ ᱟᱹᱰᱤᱜᱟᱱ ᱠᱚᱲᱟᱼᱠᱩᱲᱤ ᱚᱞᱼᱯᱟᱲᱦᱟᱜ ᱠᱟᱱᱟ ᱠᱚ, ᱥᱮᱪᱮᱫᱚᱜ ᱠᱟᱱᱟ ᱠᱚ ᱱᱮᱛᱟᱨ ᱫᱚ ᱾ ᱠᱚᱲᱟᱼᱠᱩᱲᱤ ᱛᱟᱞᱟᱨᱮ ᱵᱩᱯᱩᱡᱷᱟᱹᱣ ᱟᱹᱰᱤ ᱟᱞᱜᱟᱜ, ᱵᱟᱹᱲᱛᱤᱜ ᱠᱟᱱᱟ ᱾ ᱠᱩᱲᱤ ᱠᱚ ᱦᱚᱸ ᱟᱹᱰᱤ ᱜᱟᱱ ᱟᱹᱭᱫᱟᱹᱨᱤ ᱠᱚ ᱧᱟᱢ ᱛᱩᱫ ᱡᱚᱝ ᱠᱟᱱᱟ, ᱥᱟᱶᱛᱟ ᱨᱮ ᱢᱮᱱᱟᱜ ᱟᱹᱰᱤᱜᱟᱱ ᱢᱤᱛᱷ ᱥᱮ ᱪᱚᱞᱚᱱ ᱨᱟᱹᱯᱩᱫ ᱥᱟᱱᱟᱭᱮᱫ ᱠᱚᱣᱟ ᱾ ᱱᱚᱣᱟᱠᱚ ᱫᱚ ᱥᱟᱶᱛᱟ ᱥᱟᱢᱮᱞᱟᱭ ᱛᱮ ᱞᱟᱦᱟᱜ ᱨᱮ ᱵᱷᱟᱜᱮ ᱦᱤᱫᱮᱥᱼᱮ ᱥᱚᱫᱚᱨᱮᱜᱼᱟ ᱢᱮᱱᱠᱷᱟᱱ ᱠᱤᱪᱷᱤ ᱜᱟᱱ ᱨᱮᱫᱚ ᱵᱟᱹᱲᱛᱤ ᱜᱚᱫᱚᱜ ᱠᱟᱱᱟ ᱾ ᱡᱮᱢᱚᱱ ᱱᱟᱶᱟ ᱵᱟᱹᱦᱩ ᱠᱩᱲᱤ ᱵᱷᱟᱹᱨᱤᱭᱟ ᱫᱚ ᱵᱟᱭ ᱜᱚᱜᱟ, ᱟᱹᱭᱫᱟᱹᱨᱤ ᱫᱚᱭ ᱴᱟᱰᱮ ᱚᱰᱚᱠᱟ ᱾ ᱥᱟᱸᱜᱮ ᱦᱚᱲ ᱛᱟᱞᱟᱨᱮ ᱫᱚ ᱵᱟᱝ ᱛᱟᱸᱦᱮ ᱥᱟᱱᱟ ᱠᱚᱣᱟ ᱾ ᱵᱟᱯᱞᱟ ᱛᱟᱭᱚᱢ ᱦᱟᱱᱤᱢᱩᱱ ᱨᱮᱱᱟᱜ ᱠᱚᱱᱥᱮᱯᱴ ᱵᱚᱞᱚᱱ ᱠᱟᱱᱟ ᱾ ᱱᱤᱡᱮᱨᱤᱱ ᱡᱟᱶᱟᱭ ᱥᱩᱢᱩᱝ ᱵᱮᱵᱷᱟᱨ, ᱱᱤᱡᱮᱨ ᱠᱩᱥᱤ ᱛᱟᱸᱦᱮᱱ ᱥᱟᱱᱟ ᱠᱚᱣᱟ ᱾ ᱦᱟᱱᱦᱟᱨ ᱦᱚᱧᱦᱟᱨ ᱥᱟᱶ ᱢᱟ ᱡᱮᱦᱚᱞ ᱨᱮ ᱞᱮᱠᱟ ᱾ ᱱᱚᱝᱠᱟᱛᱮ ᱫᱟᱨᱟ ᱦᱟᱨᱟ ᱚᱲᱟᱜ ᱦᱚᱸ ᱟᱫᱚ ᱠᱩᱴᱨᱤ ᱠᱩᱴᱨᱤ ᱠᱩᱴᱨᱟᱹᱜ ᱠᱟᱱᱟ ᱾ ᱢᱤᱫ ᱚᱲᱟᱜ ᱨᱮ ᱵᱟᱯᱞᱟ ᱛᱟᱭᱚᱢ ᱱᱚᱝᱠᱟᱱ ᱵᱚᱱᱚᱫᱚᱞ, ᱚᱲᱟᱜ ᱦᱚᱲ ᱛᱟᱞᱟᱨᱮ ᱛᱚᱯᱚᱞ ᱥᱟᱹᱜᱟᱹᱭᱼᱮ ᱪᱷᱤᱢᱲᱤ ᱭᱮᱜᱼᱟ ᱾
᱕ᱹ ᱱᱮᱛᱟᱨ ᱫᱚ ᱟᱨᱦᱚᱸ ᱯᱟᱹᱨᱤᱥ ᱨᱮ ᱵᱷᱮᱜᱟᱨ ᱞᱮᱠᱟᱱ ᱵᱚᱱᱚᱫᱚᱞ ᱧᱮᱞᱚᱜ ᱠᱟᱱᱟ᱾ ᱠᱤᱪᱷᱤ ᱥᱮᱨᱢᱟ ᱢᱟᱲᱟᱝ ᱦᱚᱸ ᱵᱟᱯᱞᱟ ᱛᱟᱭᱚᱢ ᱫᱚ ᱠᱚᱲᱟ ᱣᱟᱜ ᱯᱟᱹᱨᱤᱥ ᱛᱮᱜᱮ ᱠᱩᱲᱤ ᱦᱚᱸᱭ ᱜᱚᱭᱚᱱᱚᱜ, ᱵᱟᱰᱟᱭᱚᱜ ᱠᱟᱱ ᱛᱟᱸᱦᱮᱫ ᱢᱮᱱᱠᱷᱟᱱ ᱱᱮᱛᱟᱨ ᱫᱚ ᱡᱟᱱᱟᱢ ᱯᱟᱹᱨᱤᱥ ᱦᱚᱸ ᱛᱟᱸᱦᱮᱱ ᱠᱟᱱ, ᱡᱟᱸᱣᱟᱭ ᱯᱟᱹᱨᱤᱥ ᱦᱚᱸ ᱛᱟᱸᱦᱮᱱ ᱠᱟᱱ ᱾ ᱤᱧᱫᱚ ᱵᱟᱹᱧ ᱩᱭᱦᱟᱹᱨ ᱫᱟᱲᱮᱭᱟᱜ ᱠᱟᱱᱟ, ᱧᱩᱛᱩᱢ ᱛᱟᱭᱚᱢ ᱵᱟᱨᱼᱵᱟᱨᱭᱟ ᱯᱟᱹᱨᱤᱥ ᱫᱚᱦᱚ ᱨᱮᱭᱟᱜ ᱯᱚᱨᱦᱚ ᱫᱚ ᱪᱮᱫ ? ᱯᱟᱞᱮᱱ ᱵᱩᱠᱟᱹᱛᱚᱯᱟ ᱵᱩᱱᱤᱭᱟᱹᱫ ᱪᱤᱱᱷᱟᱹ ᱟᱞᱚ ᱢᱟᱞᱚᱴᱚᱜ ᱢᱟ ᱢᱮᱱᱛᱮ ! ᱥᱮ ᱧᱩᱛᱩᱢᱟᱱ ᱟᱭᱚᱼᱵᱟᱵᱟ, ᱟᱯᱟᱼᱵᱟᱨᱮᱭᱟᱜ ᱫᱚᱲ ᱛᱮ ᱯᱟᱵᱞᱤᱥᱤᱴᱤ ᱥᱮ ᱡᱷᱟᱞᱠᱟᱣᱚᱜ ᱞᱟᱹᱜᱤᱫ, ᱡᱮᱢᱚᱱ ᱦᱚᱲᱠᱚ ᱢᱮᱱ ᱢᱟ ᱩᱱᱤᱫᱚ ᱯᱷᱟᱞᱱᱟ ᱦᱚᱯᱚᱱᱼᱮᱨᱟ ᱠᱟᱱᱟᱭ ! ᱥᱮ ᱪᱮᱫ ?? ᱡᱮᱞᱮᱠᱟ ᱠᱚᱲᱟ ᱪᱷᱩᱴᱠᱤᱭ ᱟᱹᱜᱩ ᱫᱟᱲᱮ ᱠᱚᱣᱟ, ᱚᱱᱠᱟ ᱜᱮ ᱠᱩᱲᱤ ᱦᱚᱸ ᱟᱹᱰᱤ ᱜᱟᱱ ᱠᱚᱲᱟ ᱴᱷᱮᱱ ᱪᱷᱩᱴᱠᱤᱭ ᱵᱚᱞᱚ ᱫᱟᱲᱮᱭᱟᱜᱼᱟ ᱾ ᱚᱱᱠᱟᱱ ᱢᱟᱢᱞᱟ ᱨᱮᱫᱚ, ᱠᱩᱲᱤᱭᱟᱜ ᱯᱟᱹᱨᱤᱥ ᱵᱚᱫᱚᱞ ᱨᱮ ᱟᱱᱟᱴ ᱦᱩᱭᱩᱜᱼᱟ ᱾ ᱠᱩᱲᱤᱭᱟᱜ ᱢᱤᱫ ᱧᱩᱛᱩᱢ ᱛᱟᱭᱚᱢ ᱡᱮᱛᱮ ᱡᱟᱶᱟᱭᱟᱜ ᱯᱟᱹᱨᱤᱥ ᱵᱟᱦᱟ ᱞᱮᱠᱟᱭ ᱜᱟᱞᱟᱝᱼᱟ ᱥᱮ ᱢᱟᱨᱮ ᱡᱟᱶᱟᱭᱟᱜ ᱯᱟᱹᱨᱤᱥ ᱫᱚᱭ ᱵᱟᱹᱲᱤᱡᱽ ᱛᱮ ᱱᱟᱶᱟ ᱡᱟᱶᱟᱭᱟᱜ ᱯᱟᱹᱨᱤᱥ ᱮ ᱠᱷᱚᱫᱟᱭᱟ ??
ᱤᱧᱟᱜ ᱩᱭᱦᱟᱹᱨ ᱫᱚ ᱟᱭᱚᱼᱵᱟᱵᱟᱣᱟᱜ ᱵᱷᱟᱹᱨᱤᱭᱟ ᱫᱚ ᱟᱢᱟᱜ ᱱᱟᱵᱟᱞᱚᱠ ᱵᱮᱲᱟᱨᱮ ᱵᱩᱜᱤ ᱦᱚᱨ ᱞᱟᱹᱭ ᱠᱟᱛᱮ ᱦᱚᱲ ᱞᱮᱠᱟᱱ ᱦᱚᱲ ᱵᱮᱱᱟᱣ ᱾ ᱚᱱᱟ ᱛᱟᱭᱚᱢ ᱫᱚ ᱜᱤᱫᱟᱹᱨ ᱠᱚᱫᱚ ᱱᱤᱡᱮᱛᱮ ᱧᱩᱛᱩᱢ ᱠᱟᱢᱟᱣ ᱞᱟᱹᱠᱛᱤᱜ ᱠᱟᱱᱟ ᱾ ᱡᱟᱸᱣᱟᱭᱮᱱ ᱛᱟᱭᱚᱢ ᱦᱚᱸ ᱡᱩᱫᱤ ᱡᱟᱱᱟᱢ ᱟᱭᱚᱼᱵᱟᱵᱟ ᱦᱟᱜ ᱧᱩᱛᱩᱢ ᱜᱮᱢ ᱡᱚᱢᱟ, ᱛᱟᱦᱚᱞᱮ ᱠᱷᱟᱱ ᱱᱤᱡᱮᱨᱟᱜ ᱛᱮᱫᱚ ᱛᱤᱥ ᱮᱢ ᱟᱨᱡᱟᱣᱟ ᱾ ᱱᱚᱰᱮ ᱞᱟᱹᱭ ᱛᱚᱨᱟ ᱞᱟᱹᱠᱛᱤᱜ ᱠᱟᱱᱟ, ᱵᱩᱜᱤᱢ ᱠᱟᱹᱢᱤ ᱞᱮᱠᱷᱟᱱ ᱡᱟᱸᱣᱟᱭ ᱚᱲᱟᱜ ᱦᱚᱲ ᱥᱮ ᱟᱹᱛᱩ ᱥᱩᱢᱩᱝ ᱫᱚ ᱵᱟᱠᱚ ᱧᱩᱢᱟ, ᱡᱟᱱᱟᱢ ᱚᱲᱟᱜ ᱡᱟᱱᱟᱢ ᱟᱹᱛᱩ ᱧᱩᱛᱩᱢ ᱦᱚᱸ ᱩᱱᱟᱹᱜ ᱜᱮ ᱠᱚ ᱪᱟᱨᱪᱟᱭᱟ᱾
ᱢᱩᱪᱟᱹᱫ ᱨᱮ, ᱥᱚᱦᱚᱨ ᱵᱟᱡᱟᱨ ᱨᱮ ᱢᱮᱱᱟᱜ ᱦᱚᱲ ᱫᱚ, ᱱᱟᱥᱮ ᱨᱮᱦᱚᱸ ᱦᱟᱛᱟᱝ ᱞᱟᱥᱮᱨ ᱜᱮ ᱛᱟᱠᱚᱣᱟ, ᱥᱟᱶᱛᱟ ᱨᱮᱱᱟᱜ ᱥᱚᱨᱮᱥ ᱡᱤᱱᱤᱥ ᱥᱮ ᱟᱹᱨᱤ ᱠᱚ ᱫᱩᱱᱤᱭᱟᱹ ᱛᱟᱞᱟᱨᱮ ᱡᱷᱟᱞᱠᱟᱣ ᱵᱟᱠᱷᱨᱟ ᱢᱟᱲᱚᱢ, ᱢᱟᱫᱷᱭᱚᱢ ᱠᱚ ᱛᱮᱭᱟᱨ ᱫᱟᱲᱮᱭᱟᱜᱼᱟ ᱟᱨ ᱵᱟᱹᱲᱤᱡᱟᱜ ᱠᱚ ᱫᱚ, ᱥᱚᱨᱮᱥ ᱵᱮᱱᱟᱣ ᱞᱟᱹᱜᱤᱫ ᱞᱟᱹᱠᱛᱤᱭᱟᱱ ᱟᱹᱨᱩᱼᱯᱷᱮᱨᱟᱣ ᱠᱟᱹᱢᱤᱦᱚᱨᱟ ᱠᱚ ᱜᱚᱜ ᱫᱟᱲᱮᱭᱟᱜᱼᱟ ᱾ ᱴᱟᱠᱟ ᱟᱨᱡᱟᱣ ᱥᱩᱢᱩᱝ ᱫᱚ ᱡᱚᱲ ᱟᱞᱚ ᱫᱚᱦᱚᱭ ᱢᱟ ᱪᱮᱫᱟᱜ ᱥᱮ, ᱡᱮ ᱞᱮᱠᱟ ᱴᱟᱠᱟ ᱟᱨᱡᱟᱣ ᱵᱟᱹᱲᱛᱤ ᱤᱫᱤᱜᱼᱟ, ᱚᱱᱠᱟ ᱜᱮ ᱟᱹᱛᱩ ᱫᱤᱥᱚᱢ ᱥᱟᱞᱟᱜ ᱡᱚᱲᱟᱣ ᱟᱠᱟᱱ ᱨᱮᱦᱮᱫ ᱫᱚᱨᱢᱚᱡᱽ ᱤᱫᱤᱜᱼᱟ᱾ ᱥᱟᱶᱛᱟ ᱥᱟᱹᱲᱤᱢ ᱵᱚᱡ ᱠᱟᱛᱮ ᱥᱤᱢᱟᱹ ᱯᱟᱨᱚᱢ ᱪᱷᱤᱱᱜᱟᱹᱣ ᱢᱟᱲᱟᱝ, ᱱᱟᱥᱮ ᱫᱚ ᱥᱟᱶᱛᱟ ᱞᱟᱹᱜᱤᱫ ᱩᱭᱦᱟᱹᱨ ᱞᱟᱹᱠᱛᱤᱜ ᱠᱟᱱᱟ ᱾ ᱟᱨ ᱟᱹᱛᱩ ᱫᱤᱥᱚᱢ ᱦᱚᱲ ᱦᱚᱸ ᱡᱩᱢᱤᱫ ᱫᱚᱲᱦᱚ ᱫᱚᱦᱚ ᱨᱮᱱᱟᱜ ᱨᱤᱠᱟᱹ ᱞᱟᱠᱛᱤᱜ ᱠᱟᱱᱟ ᱾ ᱡᱮᱢᱚᱱ ᱥᱟᱶᱛᱟ ᱛᱚᱯᱚᱞ ᱨᱮ ᱜᱷᱩᱬᱪᱤ ᱠᱟᱛᱮ ᱥᱟᱹᱜᱟᱹᱭ ᱟᱞᱚ ᱛᱚᱯᱟᱜᱚᱜ ᱢᱟ ᱾
***
