ᱥᱤᱨᱡᱚᱱᱤᱭᱟᱹ ᱦᱟᱜ ᱦᱟᱦᱟᱲᱟ ᱜᱮ ᱥᱤᱨᱤᱡᱽ ᱥᱤᱨᱡᱚᱱ ᱟᱠᱟᱫ ᱵᱚᱱ ᱢᱟᱹᱱᱢᱤ ᱠᱚ ᱱᱚᱶᱟ ᱢᱚᱧᱪᱚᱯᱩᱨᱤ ᱨᱮ ᱟᱹᱰᱤ ᱞᱮᱠᱟᱱ ᱡᱟᱹᱛ ᱵᱮᱱᱟᱣ ᱨᱟᱠᱟᱵ ᱟᱠᱟᱣᱟᱱᱟ ᱵᱚᱱ ᱟᱯᱟᱱ ᱟᱹᱯᱤᱱ ᱡᱟᱹᱛ ᱡᱚᱠᱷᱟ ᱚᱞ ᱨᱚᱲ ᱥᱟᱶᱦᱮᱫ ᱥᱟᱶᱛᱟ ᱫᱷᱚᱨᱚᱢ ᱠᱟᱹᱢᱤ ᱮᱢᱟᱱ ᱠᱚ ᱾ ᱱᱚᱶᱟ ᱛᱮᱜᱮ ᱢᱤᱫᱴᱟᱝ ᱡᱟᱹᱛᱤ ᱟᱨᱢᱤᱫᱴᱟᱝ ᱡᱟᱹᱛᱤ ᱠᱷᱚᱱ ᱵᱷᱮᱜᱟᱨ ᱵᱚᱱ ᱧᱮᱞᱚᱜᱼᱟ ᱾
ᱥᱚᱨᱮᱥ ᱥᱤᱨᱡᱚᱱ ᱢᱟᱱᱣᱟ ᱡᱤᱣᱤ ᱨᱮ ᱦᱟᱯᱲᱟᱢ ᱠᱚᱫᱚ ᱵᱳᱸᱜᱟ ᱜᱮᱠᱚ ᱛᱟᱦᱮᱸ ᱠᱟᱱᱟ ᱾ ᱦᱟᱯᱲᱟᱢ ᱠᱚᱣᱟᱜ ᱠᱟᱹᱢᱤ ᱦᱚᱸ ᱞᱟᱥᱟᱬᱦᱮᱫ ᱜᱮ ᱛᱟᱦᱮᱸ ᱠᱟᱱᱟ ᱾ ᱵᱤᱨ ᱵᱩᱨᱩ ᱢᱟᱜ ᱠᱟᱛᱮ ᱚᱛ ᱦᱟᱥᱟ ᱠᱚ ᱵᱮᱱᱟᱣ ᱞᱟᱫᱼᱟ ᱾ ᱟᱹᱛᱩ ᱫᱤᱥᱚᱢ ᱡᱟᱦᱮᱨ ᱜᱟᱲ ᱠᱚ ᱛᱮᱝᱜᱮᱱ ᱞᱮᱜᱼᱟ ᱾ ᱟᱹᱛᱩ ᱫᱤᱥᱚᱢ ᱱᱤᱨᱟᱹᱭ ᱱᱟᱯᱟᱭ ᱫᱚᱦᱚᱭ ᱞᱟᱹᱜᱤᱱ ᱛᱮ ᱢᱟᱹᱡᱷᱤ ᱱᱟᱭᱠᱮ ᱜᱚᱰᱮᱛ ᱠᱚ ᱟᱹᱛᱩ ᱨᱤᱱ ᱢᱩᱛᱩᱞ ᱠᱷᱩᱱᱴᱤ ᱞᱮᱠᱟᱛᱮ ᱠᱚ ᱫᱚᱲᱚᱢ ᱫᱚᱦᱚ ᱠᱮᱫ ᱠᱚᱣᱟ ᱾ ᱩᱱᱠᱩ ᱠᱚᱣᱟᱜ ᱥᱩᱡᱽ ᱵᱩᱡᱽ ᱫᱤᱥᱟᱹ ᱤᱫᱤ ᱠᱟᱛᱮ ᱜᱮ ᱟᱹᱛᱩ ᱨᱮᱱᱟᱝ ᱞᱟᱭ ᱞᱟᱠᱪᱟᱨ ᱠᱟᱹᱢᱤ ᱦᱚᱨᱟ ᱠᱚ ᱥᱩᱛᱩᱜ ᱥᱚᱡᱷᱮ ᱠᱮᱫᱼᱟ ᱾ ᱞᱟᱠᱪᱟᱨ ᱠᱟᱹᱢᱤᱦᱚᱨᱟ ᱟᱹᱱᱟᱹᱨᱤ ᱛᱚᱞ ᱫᱚᱦᱚᱭ ᱞᱟᱹᱜᱤᱱ ᱛᱮ ᱜᱮᱞᱵᱟᱨ ᱪᱟᱸᱫᱳ ᱠᱚ ᱟᱪᱟᱨ ᱞᱮᱫ ᱵᱤᱪᱟᱹᱨ ᱞᱮᱫ ᱛᱟᱦᱮᱸ ᱠᱟᱱᱟ, ᱥᱮᱫᱟᱭ ᱦᱟᱯᱲᱟᱢ ᱠᱚᱣᱟᱜ ᱵᱤᱱᱛᱤ ᱠᱚᱨᱮ ᱠᱷᱚᱱ ᱵᱟᱰᱟᱭᱚᱜᱼᱟ ᱾
ᱦᱟᱯᱲᱟᱢ ᱠᱚᱫᱚ ᱜᱚᱴᱟ ᱦᱤᱦᱤᱲᱤ ᱯᱤᱯᱤᱲᱤ ᱫᱟᱬᱟ ᱠᱟᱛᱮ ᱚᱠᱟ ᱠᱷᱚᱫᱮ ᱢᱟᱛᱠᱚᱢ ᱫᱟᱨᱮ ᱵᱩᱴᱟᱹ, ᱚᱠᱟ ᱮᱨᱮ ᱟᱛᱱᱟᱜ ᱫᱟᱨᱮ ᱵᱩᱴᱟᱹ, ᱚᱠᱟ ᱯᱮᱴᱮᱨ ᱵᱟᱲᱮ ᱫᱟᱨᱮ ᱵᱩᱴᱟᱹ, ᱚᱠᱟ ᱞᱮᱯᱮᱡ ᱛᱤᱨᱤᱞ ᱫᱟᱨᱮ ᱵᱩᱴᱟᱹ, ᱚᱠᱟ ᱫᱩᱜᱽᱫᱟᱹ ᱨᱟᱦᱮᱲ ᱫᱟᱨᱮ ᱵᱩᱴᱟᱹ ᱮᱢᱟᱱ ᱫᱷᱤᱨᱤ ᱪᱟᱹᱴᱟᱹᱱᱤ ᱠᱚᱨᱮ ᱠᱚ ᱟᱪᱟᱨ ᱞᱮᱫ ᱵᱤᱪᱟᱹᱨ ᱞᱮᱫ ᱛᱟᱦᱮᱸ ᱠᱟᱱᱟ ᱾ ᱚᱠᱟ ᱨᱮᱦᱚᱸ ᱠᱟᱛᱷᱟ ᱜᱮ ᱵᱟᱭ ᱜᱟᱯᱟᱱ ᱞᱮᱱ ᱛᱟᱠᱚᱣᱟ ᱾ ᱡᱚᱠᱷᱚᱱ ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹ ᱨᱮᱠᱚ ᱵᱤᱪᱟᱹᱨ ᱠᱮᱫ ᱛᱟᱭᱚᱢ ᱛᱚᱲᱮ ᱯᱩᱠᱷᱨᱤ ᱯᱚᱨᱟᱭᱱᱤ ᱥᱟᱠᱟᱢ ᱪᱮᱛᱟᱱ ᱛᱮᱠᱚ ᱯᱟᱨᱚᱢ ᱮᱱᱟ ᱟᱨ ᱯᱚᱨᱟᱭᱱᱤ ᱥᱟᱠᱟᱢ ᱱᱟᱥᱮ ᱦᱚᱸ ᱵᱟᱭ ᱨᱚᱪᱚᱫ ᱞᱮᱱᱟ ᱾ ᱤᱱᱟᱹ ᱠᱷᱟᱱ ᱜᱮ ᱦᱟᱯᱲᱟᱢ ᱠᱚ ᱵᱩᱡᱷᱟᱹᱣ ᱠᱮᱫᱼᱟ ᱡᱮ ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹ ᱨᱮᱱᱟᱜ ᱵᱤᱪᱟᱹᱨ ᱠᱟᱛᱷᱟ ᱠᱚ ᱫᱚ ᱥᱟᱹᱨᱤ ᱜᱮᱭᱟ ᱢᱮᱱᱛᱮ ᱾ ᱟᱨ ᱚᱱᱟ ᱵᱤᱪᱟᱹᱨ ᱠᱟᱛᱷᱟ ᱠᱚ ᱜᱮ ᱠᱚ ᱢᱟᱱᱟᱣ ᱠᱮᱫᱼᱟ ᱾ ᱟᱵᱚ ᱠᱷᱮᱨᱣᱟᱲ ᱞᱟᱹᱜᱤᱱ ᱛᱮ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱢ ᱠᱟᱡᱽ ᱟᱹᱱᱟᱹᱨᱤ ᱠᱚ ᱜᱟᱺᱴ ᱠᱟᱛᱮ ᱠᱚ ᱮᱢ ᱪᱟᱞ ᱟᱠᱟᱫ ᱵᱚᱱᱟ ᱾
ᱦᱟᱯᱲᱟᱢ ᱠᱚ ᱠᱚ ᱵᱮᱱᱟᱣ ᱟᱠᱟᱫ ᱞᱟᱥᱟᱬᱦᱮᱫ ᱜᱮ ᱨᱤᱞᱟᱹᱢᱟᱞᱟ ᱥᱚᱱᱚᱛ ᱥᱟᱨᱱᱟ ᱫᱷᱚᱨᱚᱢ ᱥᱟᱶᱛᱟ ᱥᱟᱶᱦᱮᱫ ᱟᱱᱮᱡ ᱫᱷᱟᱱᱮᱡ ᱟᱞᱟᱭ ᱚᱴᱚ ᱟᱠᱟᱫ ᱠᱟᱹᱢᱤ ᱠᱚ ᱡᱩᱜᱽ ᱮᱛᱚᱦᱚᱵ ᱛᱟᱭᱚᱢ ᱠᱷᱚᱱ ᱠᱟᱹᱢᱤ ᱠᱟᱹᱢᱤ ᱛᱮ ᱦᱟᱱᱛᱮ ᱱᱷᱟᱛᱮ ᱦᱤᱨᱤᱡ ᱯᱟᱹᱥᱤᱨ ᱟᱠᱟᱱ ᱞᱮᱵᱮᱫ ᱞᱟᱯᱟ ᱞᱩᱸᱰᱟᱹ ᱟᱠᱟᱱ ᱥᱟᱶᱛᱟ ᱠᱟᱹᱢᱤ ᱠᱚ ᱠᱚᱱᱰᱚᱞ ᱛᱩᱢᱟᱹᱞ ᱦᱟᱞᱟᱝ ᱥᱟᱢᱴᱟᱣ ᱫᱚ ᱟᱵᱚ ᱡᱤᱣᱤᱭᱟᱱ ᱠᱚᱲᱟᱢᱟᱱ ᱦᱚᱲ ᱟᱜ ᱠᱟᱹᱢᱤ ᱠᱟᱱᱟ ᱾
ᱦᱟᱯᱲᱟᱢ ᱠᱚᱠᱚ ᱞᱟᱹᱭ ᱟᱠᱟᱫ ᱞᱮᱠᱟ ᱛᱮᱜᱮ ᱪᱟᱸᱫᱚ ᱞᱮᱠᱷᱟ ᱢᱟᱦᱟᱸ ᱟᱨ ᱟᱹᱢᱤ ᱞᱮᱠᱷᱟ ᱠᱚᱦᱚᱸ ᱵᱚ ᱩᱨᱩᱢ ᱮᱫᱼᱟ, ᱪᱟᱸᱫᱳ ᱧᱮᱞ ᱠᱟᱛᱮ ᱥᱟᱹᱜᱩᱱ ᱚᱥᱟᱹᱜᱩᱱ ᱢᱟᱦᱟᱸ ᱵᱟᱝᱢᱟ ᱟᱹᱢᱤ ᱦᱚᱸ ᱵᱚ ᱵᱟᱰᱟᱭ ᱡᱚᱝ ᱠᱟᱱᱟ ᱾ ᱦᱟᱯᱲᱟᱣ ᱠᱚᱣᱟᱜ ᱞᱟᱹᱭ ᱞᱮᱠᱟᱛᱮᱜᱮ ᱡᱚᱛᱚ ᱜᱮᱵᱚ ᱵᱟᱰᱟᱭ ᱟᱠᱟᱫᱼᱟ ᱪᱟᱸᱫᱳ ᱢᱩᱞᱩᱜ ᱠᱷᱚᱱ ᱠᱩᱱᱟᱹᱢᱤ ᱦᱟᱹᱵᱤᱡ ᱫᱚ ᱥᱟᱹᱜᱩᱱ ᱟᱱᱟᱜ ᱢᱟᱦᱟᱸ ᱢᱮᱱᱛᱮ ᱾ ᱚᱱᱟᱛᱮ ᱵᱟᱯᱞᱟ, ᱡᱟᱦᱮᱨ ᱨᱮ ᱵᱳᱸᱜᱟ ᱵᱳᱨᱳ, ᱮᱨᱚᱜ ᱦᱳᱲᱳ ᱢᱩᱴ, ᱱᱟᱶᱟ ᱠᱷᱤᱭᱟᱹ ᱮᱢᱟᱱ ᱟᱭᱢᱟ ᱞᱮᱠᱟᱱ ᱯᱟᱨᱟᱵᱽ ᱯᱩᱱᱟᱹᱭ ᱠᱟᱹᱢᱤ ᱦᱚᱨᱟ ᱦᱚᱸ ᱵᱚᱱ ᱥᱟᱹᱛᱼᱟ ᱾
ᱢᱩᱞᱩᱜ ᱠᱷᱚᱱ ᱠᱩᱱᱟᱹᱢᱤ ᱵᱷᱤᱛᱨᱤ ᱨᱮᱜᱮ ᱵᱮᱲ ᱟᱹᱢᱤ ᱥᱚᱜᱮ ᱟᱠᱟᱱᱟ ᱾ ᱵᱮᱲ ᱟᱹᱢᱤ ᱫᱚ ᱡᱚᱛᱚ ᱠᱷᱚᱱ ᱥᱟᱹᱜᱩᱱ ᱢᱟᱦᱟᱸ ᱢᱮᱱᱛᱮ ᱦᱟᱯᱲᱟᱢ ᱠᱚ ᱠᱚ ᱞᱟᱹᱭ ᱚᱴᱚ ᱟᱠᱟᱫᱼᱟ ᱾ ᱱᱚᱶᱟ ᱵᱮᱲ ᱟᱹᱢᱤ ᱫᱚ ᱦᱟᱯᱲᱟᱢ ᱠᱚ ᱫᱚ ᱢᱩᱞᱩᱜ ᱢᱚᱬᱮ ᱢᱟᱦᱟᱸ ᱪᱮ ᱵᱳᱸᱜᱟ ᱟᱹᱢᱤ ᱢᱮᱱᱛᱮ ᱠᱚ ᱧᱩᱢ ᱟᱠᱟᱫᱼᱟ ᱾ ᱢᱩᱞᱩᱜ ᱢᱚᱬᱮ ᱢᱟᱦᱟᱸ ᱨᱮᱜᱮ ᱚᱱᱟᱛᱮ ᱟᱹᱛᱩ ᱨᱮᱱᱟᱜ ᱯᱟᱨᱟᱵᱽ ᱯᱩᱱᱟᱹᱭ ᱵᱟᱝᱢᱟ ᱱᱟᱭᱠᱮ ᱦᱚᱸ ᱡᱟᱦᱮᱨᱜᱟᱲ ᱨᱮ ᱵᱳᱸᱜᱟ ᱵᱳᱨᱳ ᱠᱟᱹᱢᱤᱭᱮ ᱠᱟᱹᱢᱤᱭᱟ ᱾
ᱚᱱᱠᱟ ᱜᱮ ᱟᱨᱦᱚᱸ ᱵᱚ ᱢᱮᱱᱟ ᱮᱭᱟᱭ ᱢᱟᱦᱟᱸ, ᱱᱚᱶᱟ ᱮᱭᱟᱭ ᱢᱟᱦᱟᱸ ᱦᱚᱸ ᱢᱩᱞᱩᱜ ᱢᱚᱬᱮ ᱢᱟᱦᱟᱸ ᱞᱮᱠᱟᱜᱮ ᱟᱹᱰᱤ ᱵᱮᱲ ᱟᱹᱢᱤ ᱠᱟᱱ ᱜᱮᱭᱟ ᱾ ᱚᱱᱟᱛᱮ ᱱᱚᱶᱟ ᱮᱭᱟᱭ ᱢᱟᱦᱟᱸ ᱨᱮᱦᱚᱸ ᱵᱳᱸᱜᱟ ᱵᱳᱨᱳ ᱠᱟᱹᱢᱤ ᱦᱚᱸ ᱠᱚ ᱠᱟᱹᱢᱤᱭᱟ ᱾ ᱱᱚᱶᱟ ᱮᱭᱟᱭ ᱢᱟᱦᱟᱸ ᱦᱟᱯᱲᱟᱢ ᱠᱚ ᱫᱚ ᱟᱴᱷᱣᱟᱢᱤ ᱢᱮᱱᱛᱮ ᱠᱚ ᱢᱮᱛᱟᱜᱼᱟ ᱾ ᱟᱴᱷᱣᱟᱨ ᱨᱮ ᱫᱚ ᱦᱟᱯᱲᱟᱢ ᱠᱚ ᱟᱵᱚᱭᱤᱡ ᱚᱡᱷᱟ ᱜᱩᱨᱩ ᱠᱟᱹᱢᱨᱩ ᱜᱩᱨᱩ ᱵᱟᱵᱟ ᱨᱤᱱ ᱪᱮᱞᱟ ᱠᱚᱲᱟ ᱠᱚ ᱜᱩᱨᱩ ᱟᱠᱷᱲᱟ ᱨᱮ ᱟᱴᱷᱣᱟᱨ ᱵᱳᱸᱜᱟ ᱵᱳᱨᱳ ᱠᱟᱹᱢᱤ ᱦᱚᱨᱟ ᱠᱚ ᱠᱟᱹᱢᱤᱭᱟ, ᱚᱱᱟᱛᱮ ᱢᱩᱞᱩᱜ ᱮᱭᱟᱭ ᱢᱟᱦᱟᱸ ᱫᱚ ᱟᱴᱷᱣᱟᱢᱤ ᱠᱚ ᱢᱮᱛᱟᱜᱼᱟ ᱾
ᱦᱟᱯᱲᱟᱢ ᱠᱚ ᱞᱟᱹᱭᱟ ᱠᱩᱱᱟᱹᱢᱤ ᱦᱚᱸ ᱟᱹᱰᱤ ᱜᱮ ᱥᱟᱹᱜᱩᱱ ᱪᱮ ᱵᱮᱲ ᱟᱹᱢᱤ ᱢᱟᱦᱟᱸ ᱢᱮᱱᱛᱮ ᱾ ᱠᱩᱱᱟᱹᱢᱤ ᱫᱚ ᱚᱠᱟ ᱚᱠᱟ ᱪᱟᱸᱫᱚ ᱨᱮᱫᱚ ᱯᱮ ᱢᱟᱦᱟᱸ ᱫᱷᱟᱹᱵᱤᱡ ᱮ ᱛᱟᱦᱮᱸᱱᱟ ᱾ ᱫᱚ ᱪᱚᱴ ᱠᱩᱱᱟᱹᱢᱤ, ᱵᱩᱨᱩ ᱠᱩᱱᱟᱹᱢᱤ, ᱚᱛ ᱠᱩᱱᱟᱹᱢᱤ ᱢᱮᱱᱛᱮ ᱠᱚ ᱢᱮᱛᱟᱜᱼᱟ ᱾ ᱱᱚᱶᱟ ᱯᱮ ᱠᱩᱱᱟᱹᱢᱤ ᱨᱮᱜᱮ ᱟᱵᱚᱣᱟᱜ ᱥᱚᱦᱨᱟᱭ ᱯᱟᱨᱟᱵᱽ ᱦᱚᱸ ᱵᱚ ᱢᱟᱱᱟᱣᱟ ᱾ ᱥᱚᱦᱨᱟᱭ ᱯᱟᱨᱟᱵᱽ ᱫᱚ ᱡᱚᱛᱚ ᱦᱚᱲ ᱜᱮ ᱵᱚ ᱵᱟᱰᱟᱭᱟ ᱟᱨ ᱰᱟᱱᱴᱟ ᱮᱱᱮᱡ ᱥᱮᱨᱮᱧ ᱨᱮᱦᱚᱸ ᱵᱚ ᱢᱮᱱᱟ “ᱜᱚᱨ ᱜᱩᱰᱤ ᱢᱟᱞᱦᱟᱱ ᱞᱮᱴᱚ ᱢᱚᱬᱮ ᱢᱟᱦᱟᱸ ᱥᱚᱦᱨᱟᱭ” ᱢᱮᱱᱛᱮ ᱾ ᱢᱟᱬᱟᱝᱛᱮ ᱞᱟᱹᱭ ᱟᱠᱟᱱᱟ ᱡᱮ, ᱥᱚᱦᱨᱟᱭ ᱠᱩᱱᱟᱹᱢᱤ ᱫᱚ ᱯᱮ ᱢᱟᱦᱟᱸᱭ ᱛᱟᱦᱮᱸᱱᱟ, ᱚᱱᱟᱛᱮ ᱪᱚᱴ ᱠᱩᱱᱟᱹᱢᱤ ᱦᱤᱞᱚᱜ ᱫᱚ ᱩᱢᱠᱚ-ᱜᱚᱴ ᱵᱳᱸᱜᱟ ᱵᱚ ᱵᱳᱸᱜᱟᱭᱟ ᱾ ᱫᱚᱥᱟᱨ ᱫᱚ ᱵᱩᱨᱩ ᱠᱩᱱᱟᱹᱢᱤ – ᱫᱟᱠᱟᱭ ᱟᱨ ᱚᱠᱚᱭ ᱚᱠᱚᱭ ᱜᱩᱥᱴᱤ ᱨᱮ ᱫᱚ ᱜᱚᱲᱟ ᱵᱳᱸᱜᱟ ᱵᱳᱨᱳ ᱠᱟᱹᱢᱤ ᱦᱚᱸ ᱵᱚ ᱠᱟᱹᱢᱤᱭᱟ ᱾ ᱛᱮᱥᱟᱨ ᱫᱚ ᱚᱛ ᱠᱩᱱᱟᱹᱢᱤ – ᱟᱲᱟᱜ ᱠᱚᱣᱟ ᱵᱚᱱ ᱵᱟᱝᱢᱟ ᱰᱟᱺᱜᱽᱨᱤ ᱵᱚᱱ ᱠᱷᱩᱱᱴᱟᱹᱣ ᱠᱚᱣᱟ ᱾ ᱯᱩᱱᱟᱹᱜ ᱫᱚ ᱡᱟᱡᱽᱞᱮ ᱮᱱᱮᱡ ᱥᱮᱨᱮᱧ ᱟᱨ ᱢᱚᱬᱮᱭᱟᱜ ᱫᱚ ᱟᱠᱷᱲᱟ ᱢᱮᱴᱟᱣ ᱥᱮ ᱫᱩᱦᱩᱸᱜ ᱫᱚᱝ ᱵᱚ ᱮᱱᱮᱡᱼᱟ ᱾ ᱱᱚᱜ-ᱚᱭ ᱱᱚᱝᱠᱟ ᱛᱚᱵᱮ ᱢᱚᱬᱮ ᱢᱟᱦᱟᱸ ᱥᱚᱦᱨᱟᱭ ᱫᱚ ᱦᱟᱹᱴᱤᱧ ᱟᱠᱟᱱᱟ ᱾
( ᱱᱚᱜᱼᱚᱭ ᱱᱚᱝᱠᱟ ) ᱠᱷᱮᱨᱣᱟᱲ ᱠᱚᱣᱟᱜ ᱥᱟᱱᱟᱢᱟᱜ ᱥᱚᱢᱟᱡᱽ ᱨᱮᱭᱟᱜ ᱵᱳᱸᱜᱟ ᱵᱳᱨᱳ ᱠᱟᱹᱢᱤ ᱵᱚ ᱵᱟᱰᱟᱭ ᱠᱮᱫᱼᱟ ᱾ ᱡᱟᱦᱟᱸ ᱛᱤᱱᱟᱹᱜ ᱢᱩᱞᱩᱜ ᱠᱷᱚᱱ ᱠᱩᱱᱟᱹᱢᱤ ᱫᱷᱟᱹᱵᱤᱡ ᱨᱮᱭᱟᱜ ᱟᱹᱢᱤ ᱪᱮ ᱢᱟᱦᱟᱸ ᱥᱟᱨᱮᱡ ᱮᱱᱟ, ᱚᱱᱟ ᱢᱟᱦᱟᱸ ᱠᱚᱨᱮ ᱫᱚ ᱵᱟᱯᱞᱟ, ᱱᱟᱶᱟ ᱚᱲᱟᱜ ᱥᱟᱹᱜᱩᱱ ᱠᱷᱩᱱᱴᱤ ᱵᱤᱫ ᱟᱨ ᱟᱯᱟᱱ ᱟᱹᱯᱤᱱ ᱜᱩᱥᱴᱤ ᱡᱟᱹᱱᱤ ᱴᱟᱺᱰᱤ ᱵᱳᱸᱜᱟ ᱵᱳᱨᱳ, ᱵᱟᱲᱜᱮ ᱵᱳᱸᱜᱟ ᱵᱳᱨᱚ ᱠᱟᱹᱢᱤ ᱠᱚ ᱵᱚᱱ ᱛᱚᱨᱟᱣᱟ ᱾ ᱚᱱᱟᱛᱮ ᱦᱟᱯᱲᱟᱢ ᱠᱚ ᱫᱚ ᱢᱩᱞᱩᱜ ᱠᱷᱚᱱ ᱠᱩᱱᱟᱹᱢᱤ ᱫᱷᱟᱹᱵᱤᱡ ᱫᱚ ᱥᱟᱹᱜᱩᱱ ᱢᱟᱦᱟᱸ ᱪᱮ ᱵᱮᱲ ᱟᱹᱢᱤ ᱢᱮᱱᱛᱮ ᱠᱚ ᱞᱟᱹᱭ ᱚᱴᱚ ᱟᱠᱟᱫᱼᱟ ᱾
ᱟᱵᱚᱣᱟᱜ ᱡᱚᱛᱚ ᱞᱮᱠᱟᱱᱟᱜ ᱢᱮᱱᱟᱜ ᱛᱩᱞᱩᱡ ᱪᱮᱫ ᱦᱚᱸ ᱵᱟᱹᱱᱩᱜ ᱞᱮᱠᱟ ᱵᱚ ᱠᱟᱹᱢᱤ ᱠᱟᱱᱟ ᱾ ᱠᱟᱬᱟ ᱠᱟᱰᱟ ᱞᱮᱠᱟ ᱛᱟᱦᱟᱢ ᱛᱩᱠᱩᱡ ᱦᱟᱱᱟ ᱱᱷᱟᱣᱟ ᱫᱷᱚᱨᱚᱢ ᱨᱮ ᱵᱚ ᱥᱚᱲᱚ ᱢᱮᱥᱟᱜ ᱠᱟᱱᱟ ᱾ ᱮᱴᱟᱜ ᱫᱷᱚᱨᱚᱢ ᱨᱮᱱᱟᱜ ᱵᱳᱸᱜᱟ ᱵᱳᱨᱳ ᱨᱮ ᱯᱟᱹᱛᱭᱟᱹᱣ ᱵᱚᱱ ᱫᱚᱦᱚᱭᱮᱫᱼᱟ ᱾ ᱟᱵᱚᱣᱟᱜ ᱥᱟᱨᱱᱟ ᱫᱷᱚᱨᱚᱢ ᱨᱮᱱᱟᱜ ᱵᱳᱸᱜᱟ ᱵᱳᱨᱳ ᱵᱟᱹᱜᱤ ᱠᱟᱛᱮ, ᱟᱯᱱᱟᱨᱟᱜ ᱯᱟᱨᱟᱵᱽ ᱟᱹᱢᱤ ᱢᱟᱦᱟᱸ ᱵᱟᱹᱜᱤ ᱠᱟᱛᱮ, ᱪᱷᱟᱹᱛᱤᱠ ᱟᱜ ᱫᱤᱱ ᱞᱮᱠᱷᱟᱛᱮ ᱞᱮᱠᱷᱟ ᱠᱟᱛᱮ ᱵᱚ ᱢᱟᱱᱟᱣ ᱮᱫᱼᱟ ᱾ ᱟᱵᱚ ᱧᱮᱞ ᱫᱚ ᱪᱟᱸᱫᱳ ᱵᱚ ᱧᱮᱞᱮᱭᱟ ᱢᱩᱞᱩᱜ ᱮᱱᱟᱭ ᱪᱮ ᱵᱟᱝᱟ ᱟᱨ ᱱᱚᱛᱮ ᱫᱚ ᱫᱤᱱ ᱵᱚ ᱧᱮᱞᱟ ᱢᱚᱝᱜᱚᱲᱵᱟᱨ (ᱵᱟᱞᱮ ᱢᱟᱦᱟᱸ) ᱟᱨ ᱥᱚᱱᱤᱵᱟᱨ (ᱧᱩᱦᱩᱢ ᱢᱟᱦᱟᱸ) ᱫᱤᱱ ᱫᱚ ᱠᱷᱚᱨᱚ ᱫᱤᱱ ᱠᱟᱱᱟ ᱢᱮᱱᱛᱮ ᱟᱨ ᱱᱚᱶᱟ ᱢᱟᱦᱟᱸ ᱨᱮ ᱫᱚ ᱵᱳᱸᱜᱟ ᱵᱳᱨᱳ ᱫᱚ ᱵᱟᱭ ᱜᱟᱱᱟᱜᱼᱟ ᱢᱮᱱᱛᱮ ᱢᱚ ᱢᱮᱱᱟ ᱾ ᱤᱠᱷᱟᱹᱱ ᱟᱵᱚ ᱡᱩᱫᱤ ᱪᱟᱸᱫᱳ ᱵᱚ ᱧᱮᱞᱮᱭᱟ ᱟᱨ ᱢᱟᱦᱟᱸ ᱪᱮ ᱟᱹᱢᱤ ᱵᱚ ᱞᱮᱠᱷᱟᱭᱟ ᱾ ᱮᱱᱠᱷᱟᱱ ᱡᱚᱛᱚ ᱢᱟᱦᱟᱸ ᱨᱮᱜᱮ ᱵᱳᱸᱜᱟ ᱵᱳᱨᱳ ᱦᱩᱭᱩᱜ ᱜᱮᱭᱟ ᱾ ᱠᱷᱟᱹᱞᱤ ᱢᱩᱞᱩᱜ ᱢᱚᱬᱮ ᱢᱟᱦᱟᱸ, ᱮᱭᱟᱭ ᱢᱟᱦᱟᱸ ᱪᱮ ᱵᱳᱸᱜᱟ ᱟᱹᱢᱤ ᱟᱨ ᱟᱴᱷᱣᱟᱢᱤ ᱜᱮ ᱦᱩᱭ ᱠᱚᱜ ᱢᱟ, ᱤᱱᱟᱹᱜ ᱠᱷᱟᱱ ᱜᱮ ᱵᱳᱸᱜᱟ ᱵᱳᱨᱳ ᱠᱟᱹᱢᱤ ᱫᱚ ᱡᱚᱛᱚ ᱢᱟᱦᱟᱸ ᱨᱮᱜᱮ ᱜᱟᱱᱚᱜ ᱜᱮᱭᱟ ᱾ ᱢᱟ ᱛᱚᱵᱮ ᱥᱟᱱᱟᱢ ᱯᱟᱹᱴᱷᱣᱟᱹ ᱠᱚ ᱟᱹᱠᱤᱞ ᱢᱚᱦᱚᱞ ᱠᱚ ᱱᱚᱶᱟ ᱨᱮᱭᱟᱜ ᱵᱩᱜᱤ ᱵᱟᱹᱲᱤᱡ ᱵᱤᱪᱟᱹᱨ ᱠᱟᱛᱮ ᱫᱤᱥᱼᱦᱩᱫᱤᱥ ᱛᱟᱵᱚᱱ ᱢᱟ ᱾
