ᱚᱛ ᱦᱟᱥᱟ ᱞᱚᱞᱚ ᱥᱤᱛᱩᱝ
ᱦᱚᱭ ᱫᱟᱜ ᱢᱮᱥᱟ ᱠᱟᱛᱮ,
ᱵᱮᱱᱟᱣ ᱮᱱᱟ ᱡᱤᱣᱤ ᱤᱛᱟᱹ
ᱞᱩᱥᱩᱯᱩᱸᱰᱩ ᱚᱛ ᱨᱮ ᱾
ᱵᱩᱥᱟᱹᱲᱮᱱᱟ ᱦᱟᱨᱟᱭᱮᱱᱟ
ᱚᱛ ᱠᱷᱚᱱ ᱩᱥᱩᱞᱮᱱᱟ,
ᱞᱮᱜᱮᱡ ᱞᱮᱜᱮᱡ ᱜᱚᱴᱟ ᱚᱱᱠᱟ
ᱦᱟᱹᱨᱭᱟᱹᱲ ᱧᱮᱞᱮᱱᱟ ᱾
ᱚᱱᱠᱟ ᱜᱮ ᱦᱟᱨᱟᱭᱮᱱᱟ
ᱟᱰᱤ ᱩᱥᱩᱞ ᱩᱥᱩᱞ,
ᱥᱮᱨᱢᱟ ᱧᱟᱞᱟᱛ ᱡᱚᱴᱮᱛ ᱞᱮᱠᱟ
ᱟᱨ ᱦᱚᱸ ᱦᱮᱢᱟᱞ ᱩᱢᱩᱞ ᱾
ᱢᱟᱨᱟᱝ ᱟᱠᱟᱱ ᱠᱮᱴᱮᱡ ᱟᱠᱟᱱ
ᱚᱛ ᱯᱚᱥᱟᱜ ᱠᱟᱛᱮ,
ᱯᱚᱦᱟᱞ ᱟᱠᱟᱱ ᱡᱷᱩᱲ ᱟᱠᱟᱱ
ᱡᱮᱢᱚᱱ ᱟᱴᱟᱞ ᱥᱟᱛᱮ ᱾
ᱵᱮᱱᱟᱣ ᱟᱠᱟᱱ ᱢᱟᱨᱟᱝ ᱫᱟᱨᱮ
ᱟᱨ ᱦᱚᱸ ᱠᱟᱹᱴᱤᱡ ᱫᱟᱨᱮ,
ᱫᱷᱟᱨᱛᱤ ᱟᱭᱳ ᱟᱧᱪᱟᱨ ᱩᱢᱩᱞ
ᱞᱚᱞᱚ ᱥᱤᱛᱩᱝ ᱠᱚᱨᱮ ᱾
ᱪᱮᱬᱮ ᱪᱤᱯᱨᱩ ᱵᱤᱨ ᱡᱤᱵ
ᱵᱟᱥᱟ ᱠᱚᱜ ᱠᱚ ᱡᱷᱩᱲ ᱩᱢᱩᱞ ᱨᱮ,
ᱨᱮᱸᱜᱮᱡ ᱵᱮᱲᱟ ᱨᱮ ᱡᱚᱻ ᱵᱤᱞᱤ ᱡᱚᱢ
ᱛᱟᱦᱮᱸ ᱠᱚᱜ ᱠᱚ ᱱᱟᱯᱟᱭ ᱛᱮ ᱾
ᱩᱢᱩᱞ ᱠᱚᱜ ᱟᱠᱚ ᱡᱤᱨᱟᱹᱣ ᱠᱚᱜ ᱟᱠᱚ
ᱚᱠᱚᱭ ᱦᱚᱸ ᱵᱟᱭ ᱢᱟᱱᱟ ᱠᱚ,
ᱫᱟᱭᱟ ᱫᱩᱞᱟᱹᱲ ᱱᱤᱨᱚᱲ ᱥᱟᱱᱛᱤ
ᱜᱩᱱᱛᱮ ᱡᱚᱛᱚᱭ ᱦᱩᱞᱟᱹᱥ ᱠᱚ ᱾
ᱜᱩᱱᱦᱟᱹ ᱠᱟᱛᱮ ᱫᱩᱲᱩᱵ ᱠᱚᱜ ᱮ
ᱮᱠᱞᱟ ᱫᱟᱨᱮ ᱵᱩᱴᱟᱹᱨᱮ,
ᱵᱟᱭ ᱞᱟᱜᱟᱭᱮ ᱱᱤᱴᱷᱩᱨ ᱠᱟᱛᱮ
ᱱᱤᱨᱟᱹᱭ ᱩᱭᱦᱟᱹᱨ ᱟᱸᱜᱚᱪᱮ ᱾
ᱫᱩᱠᱷ ᱡᱟᱞᱟ ᱛᱮ ᱧᱤᱨ ᱟᱠᱟᱱᱮ
ᱮᱠᱞᱟ ᱫᱟᱨᱮ ᱵᱩᱴᱟᱹ,
ᱥᱮᱬᱟ ᱦᱟᱭᱮ ᱨᱟᱹᱥᱠᱟᱹ ᱛᱟᱦᱮᱸᱱ
ᱫᱩᱠᱷ ᱚᱠᱛᱚ ᱤᱠᱟᱹ ᱾
ᱡᱚᱛᱚ ᱵᱮᱲᱟ ᱨᱮ ᱢᱟᱹᱱᱢᱤ ᱞᱟᱹᱜᱤᱫ
ᱩᱭᱦᱟᱹᱨ ᱟᱰᱤ ᱫᱟᱭᱟ,
ᱢᱟᱹᱱᱢᱤ ᱠᱷᱚᱱ ᱦᱚᱸ ᱥᱚᱨᱮᱥ ᱞᱮᱠᱟ
ᱟᱰᱤ ᱜᱟᱱ ᱜᱩᱱ ᱛᱟᱭᱟ ᱾
ᱴᱟᱴᱠᱟ ᱜᱮ ᱢᱟᱹᱱᱢᱤ ᱦᱚᱯᱚᱱ
ᱥᱟᱝᱜᱮ ᱠᱚ ᱦᱮᱡ ᱮᱱᱟ,
ᱴᱟᱝᱜᱟ ᱵᱩᱰᱽᱭᱟᱹ ᱠᱚᱨᱟᱛᱽ ᱟᱱᱛᱮ
ᱪᱮᱛ ᱪᱚᱠᱚ ᱨᱚᱯᱚᱲ ᱠᱟᱱᱟ ᱾
ᱦᱟᱱᱛᱮ ᱩᱫᱩᱜ ᱱᱷᱟᱱᱛᱮ ᱩᱫᱩᱜ
ᱫᱟᱨᱮ ᱥᱮᱛ ᱠᱚ ᱩᱫᱩᱜᱽ,
ᱫᱩᱠᱷ ᱡᱟᱞᱟᱛᱮ ᱴᱟᱝᱜᱟ ᱵᱩᱰᱽᱭᱟᱹ ᱰᱟᱸᱰᱚᱢ
ᱜᱷᱟᱱᱮ ᱜᱮ ᱛᱩᱫᱩᱜ ᱾
ᱵᱟᱰᱟᱭ ᱴᱷᱤᱠᱟᱹ ᱩᱛᱟᱹᱨ ᱠᱮᱛ ᱠᱚ
ᱱᱩᱠᱩ ᱜᱮᱠᱚ ᱢᱟᱢᱟᱜ ᱠᱟᱱ,
ᱴᱟᱝᱜᱟ ᱵᱩᱰᱽᱭᱟᱹ ᱨᱮ ᱟᱵᱚᱤᱡ ᱜᱮ ᱜᱚᱲᱚ
ᱡᱩᱢᱤᱫᱚᱜ ᱜᱮ ᱵᱟᱵᱚᱱ ᱜᱟᱱ ᱾
ᱫᱟᱨᱮ ᱢᱟᱜ ᱠᱚ ᱪᱷᱩᱴᱟᱹᱣ ᱮᱱᱟ
ᱟᱰᱤ ᱱᱤᱴᱷᱩᱨ ᱜᱮ,
ᱫᱟᱭᱟ ᱜᱮᱠᱚ ᱨᱟᱨᱟᱜ ᱠᱟᱱᱟ
ᱫᱟᱭᱟ ᱵᱟᱹᱱᱩᱜ ᱧᱮᱞ ᱛᱮ ᱾
ᱫᱟᱭᱟ ᱫᱩᱞᱟᱹᱲ ᱵᱟᱹᱱᱩᱜ ᱚᱠᱚᱭ
ᱫᱩᱠᱷ ᱫᱚ ᱪᱤᱠᱟᱹᱭ ᱵᱩᱡᱷᱟᱹᱣ,
ᱫᱟᱭᱟ ᱫᱩᱞᱟᱹᱲ ᱢᱮᱱᱟᱜ ᱡᱟᱦᱟᱸᱭ
ᱵᱤᱱ ᱨᱚᱲ ᱛᱮᱜᱮ ᱨᱤᱡᱷᱟᱹᱣ ᱾
ᱫᱟᱨᱮ ᱩᱭᱦᱟᱹᱨᱮᱜ ᱟᱭ
ᱱᱟᱯᱟᱭ ᱢᱟᱹᱧ ᱠᱟᱢᱤ ᱠᱟᱱ,
ᱟᱱᱟ ᱞᱟᱹᱜᱤᱫ ᱠᱩᱲᱟᱹᱭ ᱪᱮᱫᱟᱜ
ᱫᱩᱠᱷ ᱜᱤᱧ ᱧᱟᱢᱟᱱ ᱾
ᱫᱩᱠᱷ ᱦᱟᱨᱠᱮᱛ ᱡᱤᱣᱤ ᱥᱟᱦᱮᱸᱛ
ᱫᱟᱨᱮ ᱜᱮ ᱨᱟᱱᱟᱭ,
ᱢᱟᱹᱱᱢᱤ ᱜᱮᱵᱟᱱ ᱵᱟᱹᱲᱤᱡᱮᱜ ᱛᱮ
ᱫᱟᱨᱮ ᱨᱟᱨᱟᱜ ᱠᱟᱱᱟᱭ ᱾
