ᱢᱟᱜᱽ ᱯᱷᱟᱹᱜᱩᱱ ᱥᱮᱴᱮᱨ ᱜᱚᱫᱚᱜ
ᱞᱮᱜᱮᱡ ᱵᱟᱞᱮ ᱥᱟᱠᱟᱢ ᱟᱱᱛᱮ,
ᱵᱟᱦᱟ ᱠᱚ ᱡᱚ ᱠᱚ ᱟᱜᱩ ᱠᱟᱛᱮ
ᱟᱰᱤ ᱞᱮᱠᱟᱱ ᱨᱚᱝ ᱛᱮ ᱾
ᱢᱚᱡᱽ ᱜᱮ ᱵᱩᱡᱷᱟᱹᱜ ᱨᱟᱹᱥᱠᱟᱹ ᱵᱩᱡᱷᱟᱹᱜ
ᱚᱱᱠᱟ ᱥᱟᱡᱟᱣ ᱧᱮᱞ ᱛᱮ,
ᱢᱟᱱᱢᱤ ᱠᱚᱣᱟᱜ ᱢᱚᱱᱮ ᱥᱟᱡᱟᱣ
ᱥᱤᱵᱤᱞ ᱫᱩᱞᱟᱹᱲᱮ ᱜᱟᱛᱮ ᱾
ᱢᱚᱱᱮ ᱠᱟᱛᱷᱟ ᱚᱱᱠᱟ ᱢᱟᱥᱮ
ᱚᱠᱟᱨᱮᱪᱚ ᱰᱷᱟᱝᱚᱜ ᱟ,
ᱫᱩᱞᱟᱹᱲ ᱢᱚᱱᱮ ᱟᱠᱩᱛ ᱵᱮᱲᱟ
ᱱᱲᱥᱮ ᱦᱚᱸ ᱵᱟᱝ ᱜᱟᱱᱚᱜ ᱟ ᱾
ᱵᱤᱸᱫᱤ ᱥᱩᱛᱟᱹᱢ ᱞᱮᱠᱟ
ᱱᱟᱥᱮ ᱛᱚᱯᱚᱞ ᱠᱚᱜ ᱟ,
ᱛᱟᱭᱚᱢ ᱛᱮ ᱫᱚ ᱚᱱᱟᱜᱮ
ᱢᱮᱲᱦᱮᱫ ᱥᱤᱠᱲᱤ ᱞᱮᱠᱟᱜ ᱟ ᱾
ᱥᱮᱸᱜᱮᱞ ᱦᱚᱸ ᱵᱟᱝ ᱠᱟᱱᱟ
ᱢᱚᱱᱮ ᱡᱤᱣᱤ ᱞᱚᱭᱟ,
ᱫᱟᱜ ᱦᱚᱸ ᱵᱟᱝ ᱠᱟᱱᱟ
ᱜᱚᱴᱟᱭ ᱩᱱᱩᱢ ᱢᱮᱭᱟ ᱾
ᱵᱟᱦᱟ ᱦᱚᱸ ᱵᱟᱝ ᱠᱟᱱᱟ
ᱢᱚᱱᱮ ᱢᱚᱦᱠᱟᱣᱮ,
ᱡᱟᱹᱱᱩᱢ ᱦᱚᱸ ᱵᱟᱝ ᱠᱟᱱᱟ
ᱢᱚᱱᱮ ᱪᱚᱢᱠᱟᱣᱮ ᱾
ᱞᱟᱸᱫᱟ ᱦᱟᱣᱟ ᱦᱚᱸ ᱵᱟᱝ ᱠᱟᱱᱟ
ᱥᱟᱨᱟ ᱜᱷᱟᱱᱮ ᱞᱟᱸᱫᱟ ᱦᱚᱪᱚ ᱢᱮ,
ᱜᱮᱛ ᱯᱮᱭᱟᱸᱡᱽ ᱦᱚᱸ ᱵᱟᱝ ᱠᱟᱱᱟ
ᱢᱮᱛ ᱫᱟᱜ ᱮ ᱡᱚᱨᱚ ᱦᱚᱪᱚ ᱢᱮ ᱾
ᱵᱟᱬᱥᱤ ᱦᱚᱸ ᱵᱟᱝ ᱠᱟᱱᱟ
ᱱᱟᱥᱮ ᱜᱮᱢ ᱵᱟᱬᱥᱤ ᱜᱮᱞᱟᱜ
ᱫᱟᱜ ᱦᱟᱹᱠᱩ ᱞᱮᱠᱟᱭ ᱨᱟᱠᱟᱵᱽ ᱢᱮ
ᱢᱚᱱᱮ ᱯᱷᱮᱰᱟᱛᱽ ᱥᱟᱞᱟᱜ ᱾
ᱵᱮᱱᱟᱣ ᱢᱮᱭᱟᱭ ᱚᱱᱚᱞᱤᱭᱟᱹ
ᱟᱨ ᱦᱚᱸ ᱚᱱᱚᱬᱦᱤᱭᱟᱹ,
ᱨᱟᱜ ᱦᱚᱸᱢ ᱚᱞᱟ ᱞᱟᱸᱫᱟᱦᱚᱸᱢ ᱚᱞᱟ
ᱱᱚᱣᱟ ᱜᱮ ᱯᱟᱹᱨᱩᱠᱷᱤᱭᱟᱹ ᱾
ᱦᱚᱲᱢᱚ ᱞᱟᱜᱤᱛ ᱥᱟᱦᱮᱸᱛ ᱦᱚᱭ
ᱟᱰᱤ ᱞᱠᱛᱤᱭᱟᱱᱟ,
ᱢᱚᱱᱮ ᱡᱤᱣᱤ ᱞᱟᱹᱜᱤᱫ ᱫᱩᱞᱟᱹᱲ
ᱚᱱᱠᱟ ᱩᱭᱦᱟᱹᱨᱟᱱᱟ ᱾
ᱫᱩᱞᱟᱹᱲ ᱠᱟᱛᱷᱟ ᱢᱩᱪᱟᱫ ᱵᱟᱱᱩᱜ
ᱥᱤᱵᱤᱞ ᱜᱮ ᱥᱟᱨᱮᱲᱚᱜ,
ᱫᱷᱮᱭᱟᱱ ᱪᱮᱞᱟᱢ ᱵᱮᱱᱟᱜ ᱨᱮᱦᱚᱸ
ᱩᱞᱤᱫᱟᱜ ᱜᱮ ᱵᱷᱟᱨᱟᱲᱚᱜ ᱾
