᱑

ᱛᱮᱦᱮᱧ ᱠᱷᱚᱱ ᱛᱩᱜᱮ ᱥᱮᱨᱢᱟ ᱞᱟᱦᱟ ᱢᱤᱫ ᱪᱟᱹᱭᱛᱟᱹᱱ ᱧᱩᱛᱩᱢᱟᱱᱤᱡ ᱢᱤᱫ ᱯᱟᱨᱜᱟᱱᱟᱭ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱨᱤᱱᱤᱡ ᱵᱟᱵᱟ ᱫᱷᱟᱢᱟ ᱥᱚᱨᱮᱱ ᱫᱚ ᱤᱝᱜᱽᱨᱮᱡᱽ ᱠᱚᱢᱤᱥᱱᱚᱨ ᱤᱡ ᱜᱩᱛᱤ ᱛᱟᱦᱮᱸ ᱠᱟᱱᱟ᱾ ᱫᱷᱟᱢᱟ ᱫᱚ ᱡᱟᱣᱜᱮ ᱠᱚᱢᱤᱥᱱᱚᱨ ᱥᱟᱶ ᱟᱹᱛᱩ ᱴᱚᱞᱟ ᱨᱮ ᱫᱟᱬᱟᱱ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱤᱝᱜᱽᱨᱮᱡᱽ ᱠᱚ ᱥᱟᱶ ᱮ ᱫᱟᱬᱟᱱ ᱠᱟᱱ ᱫᱤ ᱛᱮ, ᱟᱫᱚ ᱵᱟᱝ ᱵᱟᱝ ᱛᱮ ᱨᱮᱸᱜᱮᱡ ᱚᱨᱮᱡ ᱦᱚᱲ ᱫᱚ ᱫᱷᱟᱢᱟ ᱦᱚᱸ ᱠᱚ ᱵᱚᱨᱚ ᱟᱭ ᱛᱟᱦᱮᱸ ᱠᱟᱱᱟ᱾ ᱪᱮᱫᱟᱜ ᱥᱮ ᱩᱱᱤ ᱜᱮ ᱟᱹᱛᱩ ᱴᱚᱞᱟ ᱨᱮᱱᱟᱜ ᱵᱮᱼᱵᱟᱹᱲᱤᱡ ᱠᱟᱛᱷᱟ ᱤᱝᱜᱽᱨᱮᱡᱽ ᱥᱟᱦᱮᱵᱽ ᱠᱚᱭ ᱞᱟᱹᱭ ᱟᱠᱚ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱛᱟᱭᱚᱢ ᱤᱝᱜᱽᱨᱮᱡᱽ ᱥᱤᱯᱟᱹᱦᱤ ᱨᱮᱸᱜᱮᱡ ᱦᱚᱲ ᱠᱚ ᱠᱚᱪᱞᱚᱱ ᱠᱚ ᱛᱟᱦᱮᱸᱫ ᱾ ᱥᱟᱱᱟᱢ ᱯᱤᱲ ᱨᱤᱱ ᱦᱚᱲ ᱠᱚ ᱵᱟᱰᱟᱭ ᱜᱚᱫᱟ ᱡᱮ ᱱᱚᱣᱟ ᱠᱟᱹᱢᱤ ᱫᱚ ᱫᱷᱟᱢᱟ ᱟᱜ ᱠᱟᱹᱨᱫᱷᱟᱹᱱᱤ ᱠᱟᱱᱟ ᱢᱮᱱᱛᱮ᱾ ᱡᱟᱸᱦᱟᱭ ᱨᱮᱸᱜᱮᱡ ᱪᱟᱹᱥᱤ ᱠᱚ ᱠᱷᱟᱡᱽᱱᱟ ᱵᱟᱝ ᱠᱚ ᱮᱢ ᱫᱟᱲᱮᱭᱟᱜᱼᱟ, ᱩᱱᱠᱩ ᱤᱝᱜᱽᱨᱮᱡᱽ ᱥᱤᱯᱟᱹᱦᱤ ᱴᱷᱮᱱ ᱮ ᱫᱟᱞ ᱚᱪᱚ ᱠᱚᱣᱟ᱾ ᱢᱤᱫ ᱦᱟᱴ ᱛᱟᱭᱚᱢ ᱩᱱᱠᱩ ᱪᱟᱹᱥᱤ ᱴᱷᱮᱱ ᱥᱮᱱ ᱠᱟᱛᱮ ᱢᱮᱛᱟ ᱦᱟᱠᱚᱼᱟᱭ, ᱤᱧ ᱠᱮ ᱢᱤᱫᱴᱟᱝ ᱵᱟᱹᱫ ᱤᱢᱟᱧ ᱯᱮ ᱠᱷᱟᱡᱽᱱᱟ ᱮᱢᱚᱜ ᱱᱚᱣᱟ ᱥᱮᱨᱢᱟ ᱛᱟᱯᱮᱧ ᱤᱠᱟᱹ ᱚᱪᱚ ᱠᱚᱣᱟ᱾ ᱚᱱᱠᱟ ᱚᱱᱠᱟ ᱛᱮ ᱟᱭᱢᱟ ᱪᱟᱹᱥᱤ ᱠᱚ ᱦᱟᱥᱟ ᱡᱟᱭᱜᱟᱭ ᱮᱲᱮ ᱠᱮᱫ ᱠᱚᱛᱮ ᱢᱟᱨᱟᱝ ᱠᱤᱥᱟᱺᱬ ᱮ ᱵᱮᱱᱟᱣ ᱮᱱᱟ᱾ ᱤᱝᱜᱽᱨᱮᱡᱽ ᱠᱚᱣᱟᱜ ᱜᱚᱵᱚᱞ ᱠᱷᱚᱱ ᱯᱷᱩᱨᱜᱟᱹᱞ ᱛᱟᱭᱚᱢ, ᱫᱷᱟᱢᱟ ᱫᱚ ᱚᱱᱟ ᱡᱟᱹᱱᱩᱢ ᱯᱤᱲ ᱨᱤᱱᱤᱡ ᱯᱟᱨᱜᱟᱱᱟ ᱟᱡ ᱟᱡ ᱛᱮᱜᱮ ᱧᱩᱢ ᱦᱟᱞᱟᱝ ᱮᱱᱟᱭ᱾ ᱵᱟᱝ ᱵᱟᱝ ᱛᱮ ᱩᱱᱤ ᱥᱟᱱᱟᱢ ᱯᱤᱲ ᱨᱤᱱ ᱦᱚᱲ ᱠᱚ ᱢᱟᱱᱟᱣ ᱵᱟᱛᱟᱣ ᱠᱮᱫᱮ ᱜᱮᱭᱟ᱾ ᱫᱷᱟᱢᱟ ᱤᱡ ᱢᱤᱫᱴᱟᱝ ᱜᱮ ᱦᱚᱯᱚᱱ ᱪᱟᱹᱭᱛᱟᱹᱱ ᱮ ᱛᱟᱦᱮᱸ ᱠᱟᱱᱟ᱾ ᱪᱟᱹᱭᱛᱟᱹᱱ ᱫᱚ ᱮᱠᱟᱞ ᱚᱞᱚᱜ ᱠᱚᱫᱚ ᱵᱟᱝ ᱮ ᱥᱮᱬᱟ ᱞᱮᱫᱟ᱾ ᱩᱱᱤ ᱦᱚᱸ ᱟᱡ ᱵᱟᱵᱟ ᱫᱷᱟᱢᱟ ᱞᱮᱠᱟ ᱜᱮ ᱦᱚᱲ ᱠᱚᱭ ᱫᱷᱚᱢᱟᱠᱟᱣ ᱵᱟᱲᱟ ᱠᱚᱛᱮ ᱦᱟᱥᱟ ᱡᱟᱭᱜᱟ ᱟᱨ ᱦᱚᱸᱭ ᱵᱟᱹᱲᱛᱤ ᱤᱫᱤ ᱠᱮᱫᱟ᱾ ᱡᱚᱛᱚ ᱠᱚᱛᱮ ᱥᱟᱭ ᱤᱥᱤ ᱵᱤᱜᱷᱟᱹ ᱜᱟᱱ ᱠᱷᱟᱹᱞᱤ ᱪᱟᱥ ᱡᱟᱭᱜᱟ ᱛᱟᱦᱮᱸ ᱠᱟᱱᱟ᱾ ᱪᱟᱹᱭᱛᱟᱹᱱ ᱨᱤᱱ ᱫᱚ ᱵᱟᱨᱭᱟ ᱠᱚᱲᱟ ᱟᱨ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱾ ᱢᱟᱨᱟᱝ ᱤᱡ ᱫᱚ ᱫᱷᱟᱢᱟ ᱟᱨ ᱦᱩᱰᱤᱧ ᱤᱡ ᱠᱚᱲᱟ ᱫᱚ ᱱᱟᱛᱷᱚ ᱟᱨ ᱠᱩᱲᱤ ᱫᱚ ᱢᱟᱞᱦᱚ ᱠᱚ ᱧᱩᱢ ᱟᱠᱟᱫ ᱫᱮᱭᱟ᱾ ᱫᱷᱟᱢᱟ ᱫᱚ ᱮᱭᱟᱭ ᱪᱟᱱᱟᱪ ᱫᱷᱟᱹᱵᱤᱡ ᱜᱮ ᱚᱞᱚᱜ ᱫᱚᱭ ᱥᱮᱬᱟ ᱠᱮᱫ ᱛᱮ ᱚᱞᱚᱜ ᱫᱚᱠᱚ ᱵᱟᱹᱜᱤ ᱦᱚᱪᱚ ᱠᱮᱫᱮᱭᱟ᱾ ᱪᱮᱫᱟᱜ ᱥᱮ ᱩᱱᱟᱹᱜ ᱦᱟᱥᱟ ᱡᱟᱭᱜᱟ ᱪᱟᱥ ᱠᱟᱹᱢᱤ ᱧᱮᱞ ᱞᱟᱹᱜᱤᱫ ᱛᱮ ᱦᱚᱲ ᱦᱚᱸᱠᱚ ᱠᱚᱢ ᱜᱚᱫ ᱞᱮᱱᱟ᱾ ᱱᱟᱛᱷᱚ ᱫᱚ ᱢᱚᱫᱷᱭᱟᱢᱤᱠ ᱵᱤᱱᱤᱰ ᱮ ᱯᱟᱥ ᱠᱮᱫᱛᱮ ᱢᱤᱞᱤᱴᱮᱨᱤ ᱨᱮ ᱵᱷᱩᱨᱛᱤ ᱮᱱᱟᱭ᱾ ᱪᱟᱹᱭᱛᱟᱹᱱ ᱫᱚ ᱩᱱᱤ ᱦᱚᱸ ᱪᱟᱥ ᱠᱟᱹᱢᱤ ᱨᱮᱜᱮ ᱫᱷᱩᱨᱟᱹᱣ ᱥᱟᱱᱟᱭ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱢᱮᱱᱠᱷᱟᱱ ᱱᱟᱛᱷᱚ ᱮᱠᱟᱞ ᱪᱟᱥ ᱠᱟᱹᱢᱤ ᱨᱮ ᱢᱚᱱ ᱜᱮ ᱛᱟᱭ ᱵᱟᱝ ᱞᱟᱜᱟᱣ ᱠᱟᱱ ᱛᱟᱦᱮᱸ ᱞᱮᱱᱟ᱾ ᱚᱱᱟ ᱪᱮᱠᱟ ᱩᱱᱤ ᱫᱚ ᱚᱲᱟᱜ ᱠᱷᱚᱱ ᱧᱤᱨ ᱯᱷᱟᱨᱟᱠᱚᱜ ᱠᱷᱟᱛᱤᱨ ᱛᱮ ᱢᱤᱞᱤᱴᱮᱨᱤ ᱨᱮ ᱡᱚᱵᱚᱨ ᱛᱮ ᱪᱟᱞᱟᱣ ᱮᱱᱟᱭ᱾
ᱫᱷᱟᱢᱟ ᱨᱤᱱ ᱵᱟᱨᱭᱟ ᱠᱩᱲᱤ ᱜᱤᱫᱽᱨᱟᱹ ᱾ ᱢᱟᱨᱟᱝ ᱠᱩᱲᱤ ᱫᱚ ᱯᱷᱩᱞᱚ ᱟᱨ ᱦᱩᱰᱤᱧ ᱤᱡ ᱫᱚ ᱡᱷᱟᱱᱚ᱾ ᱯᱷᱩᱞᱚ ᱫᱚ ᱮᱢᱼᱮ (M.A.) ᱯᱟᱥ ᱠᱟᱛᱮᱫ ᱵᱟᱨ ᱪᱟᱸᱫᱚ ᱦᱩᱭᱩᱜ ᱠᱟᱱᱟ᱾ ᱦᱩᱰᱤᱧ ᱤᱡ ᱫᱚ ᱱᱮᱥ ᱜᱮ ᱵᱤᱼᱮ (B.A.) ᱯᱟᱥ ᱠᱟᱛᱮ ᱟᱨᱦᱚᱸ ᱪᱮᱛᱟᱱ ᱥᱮᱫ ᱯᱟᱲᱦᱟᱣ ᱞᱟᱹᱜᱤᱫ ᱛᱮ ᱨᱟᱡᱽᱜᱟᱲ ᱥᱮᱱᱚᱜ ᱥᱟᱱᱟᱭ ᱠᱟᱱᱟ᱾ ᱡᱟᱣ ᱫᱚ ᱥᱟᱶᱼᱥᱟᱶ ᱡᱷᱟᱱᱚ ᱟᱡ ᱫᱟᱹᱭ ᱥᱟᱶ ᱵᱤᱨᱫᱟ ᱜᱟᱲ ᱛᱮ ᱪᱟᱞᱟᱣ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱱᱤᱛ ᱟᱡ ᱫᱟᱹᱭ ᱞᱟᱦᱟ ᱥᱮᱫ ᱵᱟᱝ ᱯᱟᱲᱦᱟᱣ ᱥᱟᱱᱟᱭ ᱠᱟᱱᱟ᱾ ᱪᱟᱹᱠᱨᱤ ᱠᱚ ᱥᱟᱵ ᱥᱟᱱᱟᱭ ᱠᱟᱱᱟ ᱾ ᱫᱷᱟᱢᱟ ᱡᱷᱟᱱᱚ ᱠᱮ ᱞᱟᱦᱟ ᱥᱮᱫ ᱯᱟᱲᱦᱟᱣ ᱚᱪᱚ ᱥᱟᱱᱟ ᱫᱚ ᱥᱟᱱᱟᱭ ᱠᱟᱱᱟ ᱢᱮᱱᱠᱷᱟᱱ ᱱᱚᱣᱟ ᱦᱚᱸᱭ ᱵᱚᱨᱚᱜ ᱠᱟᱱᱟ ᱨᱟᱡᱽᱜᱟᱲ ᱨᱮ ᱛᱟᱦᱮᱸ ᱠᱟᱛᱮ ᱯᱟᱪᱷᱮ ᱵᱟᱹᱲᱤᱡ ᱮᱢᱟᱱᱚᱜ ᱟᱭ᱾ ᱢᱤᱫ ᱦᱟᱴ ᱛᱟᱭᱚᱢ ᱤᱧ ᱞᱟᱹᱭ ᱟᱢᱟᱭ ᱢᱮᱱ ᱟᱠᱟᱣᱟᱫ ᱫᱮᱭᱟ᱾

᱒ᱹ
ᱛᱮᱦᱮᱧ ᱥᱤᱸᱜᱮ ᱢᱟᱦᱟ᱾ ᱜᱮᱞ ᱴᱟᱬᱟᱝ ᱦᱩᱭ ᱜᱚᱫ ᱟᱠᱟᱱᱟ᱾ ᱫᱷᱟᱢᱟ ᱫᱚ ᱟᱠᱚᱣᱟᱜ ᱪᱟᱹᱲᱤ ᱨᱮᱜᱮ ᱢᱤᱫ ᱯᱟᱨᱠᱚᱢ ᱨᱮ ᱫᱩᱲᱩᱵ ᱠᱟᱛᱮ ᱠᱷᱚᱵᱚᱨ ᱠᱟᱜᱚᱡᱽ ᱮ ᱯᱟᱲᱦᱟᱣ ᱮᱫ ᱛᱟᱦᱮᱸ ᱠᱟᱱᱟ ᱾ ᱩᱱ ᱚᱠᱛᱚ ᱢᱤᱫ ᱦᱟᱲᱟᱢ ᱦᱚᱲ ᱮ ᱦᱤᱡᱩᱜ ᱛᱮ ᱫᱷᱟᱢᱟ ᱠᱮ ᱞᱟᱹᱭ ᱟᱭᱟ᱾ ᱟᱞᱮ ᱚᱲᱟᱜ ᱪᱩᱠᱟᱹᱜ ᱵᱩᱨᱩ ᱥᱩᱨ ᱦᱮᱥᱮᱞᱜᱚᱰᱟ ᱨᱤᱱ ᱠᱚ ᱦᱮᱡ ᱟᱠᱟᱱᱟ᱾ ᱩᱱᱠᱩ ᱫᱚ ᱢᱟᱨᱟᱝ ᱢᱟᱹᱭ ᱧᱮᱞ ᱥᱟᱱᱟᱭᱮᱫ ᱠᱚᱣᱟ᱾ ᱫᱷᱟᱢᱟ ᱢᱤᱫ ᱜᱷᱟᱹᱲᱤᱠ ᱩᱭᱦᱟᱹᱨ ᱧᱚᱜ ᱠᱟᱛᱮ, ᱼ ”ᱮ ᱢᱟᱹᱭ ᱟᱭᱚ ᱦᱮᱡ ᱞᱮᱱ ᱢᱮᱥᱮ᱾ ” ᱚᱲᱟᱜ ᱫᱩᱣᱟᱹᱨ ᱠᱷᱚᱱ ᱚᱸᱰᱚᱠ ᱠᱟᱛᱮ ᱯᱷᱩᱞᱚ ᱟᱭᱚ ᱫᱷᱟᱢᱟ ᱛᱤᱠᱤᱱ ᱥᱩᱨ ᱦᱮᱡ ᱠᱟᱛᱮ ᱢᱮᱱᱟᱭ, ᱼ ‘ᱪᱮᱫ ᱠᱟᱛᱷᱟ?’ ᱼ ᱱᱩᱜᱼᱩᱭ ᱨᱮᱱᱴᱟ ᱛᱮᱠᱚ ᱚᱲᱟᱜ ᱦᱮᱥᱮᱞᱜᱚᱰᱟ ᱨᱤᱱ ᱠᱚ ᱦᱮᱡ ᱟᱠᱟᱱᱟ᱾ ᱩᱱᱠᱩ ᱢᱟᱨᱟᱝ ᱢᱟᱹᱭ ᱧᱮᱞ ᱥᱟᱱᱟᱭᱮᱫ ᱠᱚᱣᱟ᱾ ᱯᱮᱲᱟ ᱫᱚ ᱵᱟᱵᱚ ᱨᱩᱣᱟᱹᱲ ᱠᱚᱣᱟ , ᱩᱥᱟᱹᱨᱟ ᱥᱟᱺᱦᱤᱡ ᱱᱚᱣᱟ ᱨᱟᱪᱟ ᱠᱚ ᱠᱟᱹᱲᱢᱤ ᱯᱷᱟᱹᱨᱪᱟ ᱚᱪᱚ ᱮᱢ, ᱟᱨ ᱢᱟᱨᱟᱝ ᱢᱟᱹᱭ ᱥᱟᱯᱲᱟᱣ ᱢᱮᱛᱟᱭ ᱢᱮ ᱾ ᱼ ᱟᱹᱰᱤ ᱴᱟᱴᱠᱟ ᱫᱚ? ᱼ ᱦᱚᱭ ᱵᱟᱹᱦᱩ ᱟᱞᱮ ᱦᱚᱸ ᱵᱟᱝ ᱠᱚ ᱠᱷᱚᱵᱚᱨ ᱟᱠᱟᱣᱟᱫ ᱞᱮᱭᱟ ᱞᱟᱦᱟ ᱛᱮ ᱾ ᱼ ᱴᱷᱤᱠᱟ ᱢᱟ ᱥᱮᱱᱚᱜ ᱵᱤᱱ ᱟᱨ ᱢᱤᱫ ᱴᱟᱝ ᱛᱟᱭᱚᱢ ᱟᱹᱜᱩ ᱠᱚᱵᱤᱱ ᱫᱚᱦᱲᱟ ᱫᱚ ᱟᱞᱚ ᱵᱤᱱ ᱦᱤᱡᱩᱜᱼᱟ᱾ ᱼ ᱦᱚᱭ ᱛᱚᱵᱮ ᱚᱱᱮ ᱚᱱᱠᱟ, ᱢᱤᱫ ᱴᱟᱝ ᱯᱚᱨᱮ᱾ ᱨᱮᱱᱴᱟ ᱦᱟᱲᱟᱢ ᱮ ᱨᱩᱣᱟᱹᱲ ᱮᱱᱟ᱾

᱓ᱹ
ᱨᱮᱱᱴᱟ ᱫᱷᱟᱢᱟ ᱚᱲᱟᱜ ᱛᱮ ᱠᱟᱛᱷᱟ ᱞᱮᱫ ᱞᱮᱠᱟᱛᱮ, ᱢᱤᱫ ᱴᱟᱝ ᱛᱟᱭᱚᱢ ᱦᱮᱥᱮᱞᱜᱚᱰᱟ ᱨᱤᱱ ᱯᱮᱲᱟᱭ ᱟᱹᱜᱩ ᱥᱮᱴᱮᱨ ᱠᱮᱫ ᱠᱚᱣᱟ᱾ ᱨᱟᱪᱟ ᱨᱮ ᱢᱤᱫ ᱢᱟᱹᱪᱤ ᱟᱨ ᱵᱟᱨᱭᱟ ᱯᱟᱨᱠᱚᱢ ᱵᱤᱞ ᱛᱟᱦᱮᱸ ᱠᱟᱱᱟ᱾ ᱨᱮᱱᱴᱟ ᱢᱮᱥᱟ ᱯᱩᱱ ᱦᱚᱲ ᱠᱚ ᱛᱟᱦᱮᱸ ᱠᱟᱱᱟ᱾ ᱱᱟᱣᱟ ᱯᱮᱲᱟ ᱠᱚ ᱢᱤᱫ ᱯᱟᱨᱠᱚᱢ ᱨᱮ ᱟᱨ ᱨᱮᱱᱴᱟ ᱫᱚ ᱮᱛᱚᱦᱚᱵ ᱨᱮᱱᱟᱜ ᱮᱴᱟᱜ ᱯᱟᱨᱠᱚᱢ ᱨᱮ ᱫᱩᱲᱩᱵ ᱮᱱᱟᱭ ᱾ ᱫᱷᱟᱢᱟ ᱵᱟᱹᱦᱩ ᱦᱮᱡ ᱠᱟᱛᱮ ᱞᱚᱴᱟ ᱫᱟᱜ ᱮ ᱮᱢᱟᱫ ᱠᱚᱛᱮ, ᱥᱟᱱᱟᱢ ᱮ ᱡᱚᱦᱟᱨ ᱟᱫ ᱠᱚᱣᱟ ᱾ ᱩᱱ ᱫᱚ ᱫᱷᱟᱢᱟ ᱟᱠᱚᱣᱟᱜ ᱪᱟᱹᱲᱤ ᱨᱮ ᱛᱤᱸᱜᱩ ᱞᱮᱱ ᱛᱟᱦᱮᱸ ᱠᱟᱱᱟ᱾ ᱨᱮᱱᱴᱟ ᱛᱮᱠᱚ ᱥᱟᱱᱟᱢ ᱦᱚᱲ ᱡᱟᱝᱜᱟ ᱟᱹᱨᱩᱵᱚᱜ ᱞᱟᱹᱜᱤᱫ ᱫᱟᱜ ᱟᱨᱮᱡ ᱠᱚ ᱥᱮᱱ ᱮᱱᱛᱮ ᱠᱚ ᱟᱹᱨᱩᱵ ᱮᱱᱟ᱾ ᱨᱩᱣᱟᱹᱲ ᱦᱮᱡ ᱠᱟᱛᱮ ᱥᱟᱱᱟᱢ ᱠᱚ ᱫᱩᱲᱩᱵ ᱨᱩᱣᱟᱹᱲ ᱮᱱᱟ ᱡᱟᱸᱦᱟᱭ ᱡᱟᱸᱦᱟ ᱨᱮ ᱫᱩᱲᱩᱵ ᱞᱮᱱᱟᱭ ᱚᱱᱠᱟ ᱜᱮ᱾ ᱫᱩᱲᱩᱵ ᱮᱱ ᱥᱟᱶᱛᱮ ,ᱫᱷᱟᱢᱟ ᱫᱚ ᱥᱤᱜᱽᱨᱮᱴ ᱟᱹᱜᱩ ᱠᱟᱛᱮᱫ ᱮ ᱦᱮᱡ ᱮᱱᱟ᱾ ᱨᱮᱱᱴᱟ ᱠᱮ ᱢᱟᱬᱟᱝ ᱛᱮ ᱥᱤᱜᱽᱨᱮᱴ ᱮᱢ ᱠᱟᱛᱮ ᱡᱚᱦᱟᱨ ᱟᱫ ᱫᱮᱭᱟ, ᱚᱱᱟ ᱛᱟᱭᱚᱢ ᱦᱮᱡ ᱟᱠᱟᱱ ᱱᱟᱣᱟ ᱯᱮᱲᱟ ᱠᱚ ᱢᱤᱫ ᱢᱤᱫ ᱛᱮ ᱡᱚᱦᱟᱨ ᱥᱟᱶᱛᱮ ᱥᱤᱜᱽᱨᱮᱴ ᱦᱚᱸᱭ ᱪᱟᱞ ᱤᱫᱤ ᱟᱫ ᱠᱚᱣᱟ᱾ ᱫᱚᱥᱟᱨ ᱯᱟᱨᱠᱚᱢ ᱨᱮ ᱛᱟᱞᱟ ᱢᱟᱞᱟ ᱨᱮ ᱫᱩᱲᱩᱵ ᱞᱮᱱ ᱠᱚᱲᱟ ᱫᱚ ᱥᱤᱜᱽᱨᱮᱴ ᱵᱟᱝ ᱮ ᱦᱟᱛᱟᱣ ᱞᱮᱫᱼᱟ᱾ ᱨᱮᱱᱴᱟ ᱥᱤᱜᱽᱨᱮᱴ ᱮ ᱡᱮᱨᱮᱫ ᱠᱮᱫ ᱛᱟᱭᱚᱢ ᱩᱱᱠᱩ ᱱᱟᱣᱟ ᱯᱮᱲᱟ ᱠᱚ ᱢᱟᱹᱪᱤᱥ ᱮ ᱥᱟᱵ ᱟᱫ ᱠᱚᱣᱟ᱾ ᱫᱷᱟᱢᱟ ᱦᱚᱸ ᱛᱟᱭᱚᱢ ᱪᱤᱭᱟᱹᱨ ᱢᱟᱹᱪᱤ ᱨᱮ ᱫᱩᱲᱩᱵ ᱮᱱᱟᱭ᱾
ᱫᱷᱟᱢᱟ ᱠᱷᱩᱜ ᱵᱟᱲᱟ ᱧᱚᱜ ᱠᱟᱛᱮ ᱠᱩᱞᱤ ᱮᱦᱚᱵᱟᱭ, (ᱠᱩᱞᱤᱼ ᱠᱩᱯᱩᱞᱤ ᱱᱟᱣᱟ ᱯᱮᱲᱟ ᱠᱚ ᱥᱟᱶ) ᱼ ᱦᱮᱸ ᱟᱹᱯᱩᱧ ᱟᱯᱮ ᱢᱟ ᱟᱹᱰᱤ ᱱᱟᱣᱟ ᱜᱤᱧ ᱧᱮᱞᱮᱫ ᱯᱮᱭᱟ᱾ ᱪᱮᱫ ᱞᱮᱠᱟ ᱯᱮ ᱦᱮᱡ ᱥᱮᱴᱮᱨ ᱮᱱᱟ᱾ ᱼ ᱟᱞᱮ ᱫᱚ ᱟᱹᱯᱩᱧ ᱵᱟᱦᱟ ᱪᱤᱭᱟ ᱞᱮ ᱚᱸᱰᱚᱠ ᱟᱠᱟᱱᱟ᱾………

᱔ᱹ
ᱚᱱᱟ ᱛᱟᱭᱚᱢ ᱫᱷᱟᱢᱟ ᱢᱤᱥᱮᱨᱟ ᱟᱨ ᱫᱷᱟᱢᱟ ᱨᱤᱱ ᱵᱟᱱᱟᱨ ᱠᱩᱲᱤ ᱜᱤᱫᱽᱨᱟᱹ ᱡᱚᱦᱟᱨ ᱞᱟᱹᱜᱤᱫ ᱛᱮᱠᱤᱱ ᱚᱰᱚᱠ ᱦᱮᱡ ᱮᱱᱟ ᱾ ᱡᱚᱦᱟᱨ ᱵᱮᱵᱷᱟᱨ ᱮᱫᱟ ᱠᱚ, ᱩᱱ ᱚᱠᱛᱚ ᱨᱮᱱᱴᱟᱭ ᱢᱮᱱᱟ, ᱼ ᱢᱟᱬᱟᱝ ᱠᱷᱚᱱ ᱛᱟᱭᱚᱢ ᱤᱡ ᱜᱮ ᱱᱟᱦᱟᱜ ᱵᱟᱦᱟ ᱫᱚ ᱾ ᱦᱮᱥᱮᱞᱜᱚᱰᱟ ᱠᱷᱚᱱ ᱦᱮᱡ ᱟᱠᱟᱱ ᱥᱟᱱᱟᱢ ᱦᱚᱲᱟᱜ ᱢᱮᱫ ᱢᱟᱬᱟᱝ ᱠᱷᱚᱱ ᱛᱟᱭᱚᱢ ᱤᱡ ᱠᱩᱲᱤ ᱨᱮ ᱰᱷᱟᱝ ᱮᱱᱟ᱾ ᱫᱷᱟᱢᱟ ᱦᱚᱯᱚᱱ ᱮᱨᱟ ᱢᱟᱨᱟᱝ ᱤᱡ ᱯᱷᱩᱞᱚ ᱦᱚᱸ ᱛᱟᱞᱟ ᱨᱤᱱᱤᱡ ᱠᱚᱲᱟ ᱡᱚᱦᱟᱨ ᱚᱠᱛᱚ ᱫᱚ ᱟᱡ ᱦᱚᱸᱭ ᱠᱚᱭᱚᱜ ᱨᱟᱠᱟᱵ ᱞᱮᱫᱼᱟ᱾ ᱢᱮᱫ ᱢᱮᱫ ᱠᱤᱱ ᱠᱚᱯᱚᱭᱚᱜ ᱧᱟᱯᱟᱢ ᱮᱱᱟ᱾ ᱱᱟᱥᱮ ᱠᱚᱲᱟ ᱟᱜ ᱢᱮᱫᱼᱟᱦᱟ ᱨᱮ ᱢᱩᱞᱩᱡ ᱢᱟᱪᱷᱟ ᱞᱟᱸᱫᱟ ᱯᱷᱚᱴᱮᱞ ᱨᱟᱠᱟᱵ ᱜᱚᱫ ᱮᱱᱟ᱾ ᱵᱟᱝᱼᱵᱟᱝ ᱛᱮ ᱯᱷᱩᱞᱚ ᱟᱜ ᱢᱮᱫ ᱟᱦᱟ ᱨᱮᱦᱚᱸ ᱠᱩᱥᱤ ᱨᱟᱹᱥᱠᱟᱹ ᱧᱮᱞ ᱧᱟᱢ ᱮᱱᱟ᱾ ᱪᱮᱫᱟᱜ ᱥᱮ ᱠᱚᱲᱟ ᱫᱚ ᱟᱰᱤ ᱛᱮᱫᱜᱮ ᱢᱟᱨᱥᱟᱞ ᱟᱨ ᱮ ᱩᱥᱩᱞ ᱟ᱾ ᱯᱷᱩᱞᱚ ᱫᱚᱭ ᱛᱮᱞᱥᱟᱶᱟᱨ ᱜᱮᱭᱟ, ᱢᱮᱱᱠᱷᱟᱱ ᱢᱮᱫᱼᱢᱩᱴᱷᱟᱹᱱ ᱛᱟᱭ ᱟᱹᱰᱤ ᱜᱮ ᱱᱟᱯᱟᱭᱟ ᱾ ᱡᱟᱸᱦᱟᱭ ᱜᱮ ᱧᱮᱞᱮᱭᱟ ᱠᱩᱥᱤᱜ ᱜᱮᱭᱟᱭ᱾ ᱡᱚᱦᱟᱨ ᱢᱩᱪᱟᱹᱫ ᱠᱟᱛᱮ , ᱡᱚᱛᱚ ᱚᱲᱟᱜ ᱛᱮᱠᱚ ᱵᱚᱞᱚ ᱮᱱᱟ᱾
ᱫᱷᱟᱢᱟ ᱢᱤᱥᱮᱨᱟ ᱟᱨ ᱯᱷᱩᱞᱚ ᱫᱚ ᱢᱤᱫ ᱛᱷᱟᱹᱨᱤ ᱨᱮ ᱯᱩᱱᱤᱭᱟ ᱜᱤᱞᱟᱥ ᱨᱮ ᱫᱟᱜ ᱟᱹᱜᱩ ᱠᱟᱛᱮ ᱠᱤᱱ ᱦᱮᱡ ᱮᱱᱟ᱾ ᱫᱷᱟᱢᱟ ᱢᱤᱥᱮᱨᱟ ᱫᱚ ᱚᱱᱟ ᱫᱟᱜ ᱛᱷᱟᱹᱨᱤ ᱥᱟᱵ ᱟᱠᱟᱫᱟᱭ ᱟᱨ ᱯᱷᱩᱞᱚ ᱫᱚ ᱢᱤᱫ ᱢᱤᱫ ᱛᱮ ᱫᱟᱜ ᱮ ᱥᱟᱵ ᱤᱫᱤ ᱟᱠᱚ ᱠᱟᱱᱟ᱾ ᱫᱟᱜ ᱮᱢ ᱢᱩᱪᱟᱹᱫ ᱛᱟᱭᱚᱢ ᱪᱟᱱᱟᱪᱩᱨ ᱟᱨ ᱵᱤᱥᱠᱩᱴ ᱢᱤᱫ ᱛᱷᱟᱹᱨᱤ ᱨᱮ ᱫᱚᱦᱚ ᱟᱠᱟᱫᱟᱜ ᱡᱷᱟᱱᱚ ᱮ ᱥᱮᱯᱮᱧ ᱟᱹᱜᱩ ᱠᱮᱫᱟ᱾ ᱯᱷᱩᱞᱚ ᱫᱚ ᱚᱱᱟ ᱠᱚ ᱯᱟᱹᱨᱤ ᱢᱤᱫᱼᱢᱤᱫ ᱛᱮ ᱪᱟᱞ ᱟᱫ ᱠᱚᱣᱟᱭ᱾ ᱨᱮᱱᱴᱟᱭ ᱢᱮᱱᱟ – ᱢᱟ ᱱᱚᱣᱟ ᱠᱚ ᱵᱚ ᱧᱮᱞ ᱜᱚᱫ ᱠᱟᱜᱼᱟ ᱾ ᱡᱚᱛᱚ ᱦᱚᱲ ᱡᱚᱢ ᱠᱚ ᱮᱦᱚᱵᱟ ᱾ ᱡᱚᱢ ᱥᱟᱹᱛ ᱞᱟᱦᱟ ᱨᱮᱜᱮ ᱡᱷᱟᱱᱚ ᱢᱤᱫ ᱛᱷᱟᱹᱨᱤ ᱨᱮ ᱪᱟ ᱠᱩᱯ ᱟᱹᱜᱩ ᱠᱟᱛᱮ ᱦᱤᱡᱩᱜ ᱛᱮ ᱥᱟᱱᱟᱢ ᱠᱚ ᱪᱟᱭ ᱮᱢᱟ ᱠᱚᱣᱟ ᱾ ᱫᱷᱟᱢᱟ ᱢᱤᱥᱮᱨᱟ ᱫᱚ ᱟᱹᱨᱩᱵᱚᱜ ᱞᱟᱜᱤᱫ ᱛᱮ ᱞᱚᱴᱟ ᱫᱟᱜ ᱮ ᱥᱩᱨ ᱟᱠᱚᱣᱟ᱾ ᱪᱟ ᱧᱩ ᱥᱟᱹᱛ ᱠᱟᱛᱮ, ᱥᱟᱱᱟᱢ ᱦᱚᱲ ᱠᱚ ᱟᱹᱨᱩᱵᱚᱜ ᱟ᱾ ᱨᱩᱣᱟᱹᱲ ᱦᱮᱡ ᱠᱟᱛᱮ ᱟᱨᱦᱚᱸ ᱟᱯᱟᱱᱼᱟᱹᱯᱤᱱ ᱴᱷᱟᱶ ᱨᱮᱠᱚ ᱫᱩᱲᱩᱵ ᱨᱩᱣᱟᱹᱲᱚᱜᱼᱟ ᱾ ᱨᱮᱱᱴᱟ ᱦᱮᱥᱮᱞᱜᱚᱰᱟ ᱦᱚᱲ ᱥᱟᱶ ᱪᱮᱫ ᱠᱚᱪᱚᱭ ᱠᱷᱟᱭ ᱠᱷᱚᱭ ᱜᱚᱫᱽ ᱛᱮ, ᱨᱚᱲ ᱟᱭ,ᱼ ᱢᱟᱨᱟᱝ ᱢᱟᱹᱭ ᱥᱟᱶ ᱠᱟᱹᱡ ᱠᱟᱛᱷᱟ ᱥᱟᱱᱟᱭᱮᱫ ᱠᱚᱣᱟ᱾
ᱫᱷᱟᱢᱟ ᱢᱤᱫ ᱫᱷᱟᱣ ᱡᱚᱛᱚ ᱯᱮᱲᱟᱭ ᱠᱚᱭᱚᱜ ᱠᱚᱣᱟ᱾ ᱢᱮᱫ ᱟᱦᱟ ᱨᱮ ᱨᱟᱥᱠᱟᱹ ᱵᱟᱝ ᱧᱮᱞᱚᱜ ᱠᱟᱱᱟ ᱪᱮᱫ ᱠᱚᱪᱚ ᱨᱚᱲ ᱥᱟᱱᱟᱭ ᱠᱟᱱᱟ ᱢᱮᱱᱠᱷᱟᱱ ᱵᱟᱝ ᱮ ᱨᱚᱲ ᱫᱟᱲᱮᱭᱟᱜ ᱠᱟᱱᱟ᱾ᱛᱟᱭᱚᱢ ᱫᱩᱣᱟᱹᱨ ᱥᱮᱫ ᱮ ᱠᱚᱭᱚᱜᱽ ᱛᱮ, ᱼ ᱢᱟᱨᱟᱝ ᱢᱟᱹᱭ ᱫᱮᱞᱟ ᱱᱚᱛᱮ ᱦᱮᱡ ᱥᱩᱨᱩᱜ ᱢᱮ ᱾ ᱯᱷᱩᱞᱚ ᱫᱚ ᱟᱫᱚ ᱢᱤᱫ ᱢᱟᱹᱪᱤ ᱥᱟᱵ ᱛᱟᱨᱟᱭ ᱛᱮ ᱪᱟᱹᱲᱤ ᱨᱮᱱᱟᱜ ᱢᱤᱫ ᱠᱷᱩᱸᱴᱤ ᱡᱟᱯᱟᱜ ᱨᱮ ᱫᱩᱲᱩᱵ ᱮᱱᱟᱭ ᱟᱡ ᱥᱟᱶᱛᱮ ᱟᱡ ᱡᱷᱤ ᱚᱱᱟ ᱠᱷᱩᱸᱴᱤ ᱨᱮ ᱡᱟᱯᱟᱜ ᱠᱟᱛᱮ ᱛᱤᱸᱜᱩ ᱮᱱᱟᱭ᱾ ᱢᱤᱫ ᱦᱟᱲᱟᱢ ᱦᱚᱲ ᱮ ᱢᱮᱱᱟ, ᱼ ᱦᱮᱸ ᱢᱟᱹᱭ ᱪᱤᱞᱤ ᱧᱩᱛᱩᱢ ᱟᱢᱟ? ᱼᱯᱷᱩᱞᱚ! – ᱛᱤᱱᱟᱹᱜ ᱵᱚᱭᱦᱟ ᱟᱯᱮ? ᱼ ᱵᱟᱨ ᱦᱚᱲ ᱜᱮᱭᱟ ᱞᱤᱧ᱾ ᱼ ᱚᱞᱚᱜ ᱠᱚᱫᱚ? – ᱱᱮᱥ ᱜᱮ ᱵᱤᱼᱮ (B.A.) ᱦᱤᱥᱴᱤᱨᱤ ᱚᱱᱟᱨᱥ ᱤᱧ ᱯᱟᱥ ᱟᱠᱟᱫᱟ᱾ ᱼ ᱪᱮᱫ ᱟᱫᱚ ᱪᱟᱹᱠᱨᱤ ᱠᱚ ᱵᱟᱝ ᱥᱟᱱᱟᱢ ᱠᱟᱱᱟ? ᱟᱢ ᱢᱟ ᱦᱩᱱᱟᱹᱝ ᱢᱟᱪᱮᱛᱟᱱᱤ ᱪᱟᱹᱠᱨᱤ ᱟᱞᱵᱚᱛ ᱛᱮᱢ ᱧᱟᱢᱟ᱾ ᱯᱷᱩᱞᱚ ᱟᱡ ᱵᱟᱵᱟ ᱥᱮᱫ ᱢᱤᱫ ᱫᱷᱟᱣ ᱠᱚᱭᱚᱜ ᱧᱚᱜ ᱠᱟᱛᱮ , ᱩᱱ ᱚᱠᱛᱚ ᱟᱡ ᱵᱟᱵᱟ ᱦᱚᱸ ᱟᱡ ᱥᱮᱫ ᱮ ᱠᱚᱭᱚᱜ ᱞᱮᱫᱟ᱾ ᱢᱮᱫᱼᱢᱮᱫ ᱠᱤᱱ ᱠᱚᱯᱚᱭᱚᱜ ᱧᱟᱯᱟᱢ ᱞᱮᱱᱟ᱾ ᱛᱟᱭᱚᱢ ᱯᱷᱩᱞᱚ ᱢᱮᱱ ᱠᱮᱫᱟᱭ, ᱼ ᱡᱚᱢ ᱠᱚᱢᱟ ᱞᱮ ᱦᱩᱭᱩᱜ ᱠᱟᱱ ᱜᱮᱭᱟ᱾ ᱱᱤᱛ ᱵᱟᱹᱨᱥᱤᱧ ᱤᱧ ᱡᱤᱨᱟᱹᱣ ᱧᱚᱜᱚᱜ ᱟ ᱞᱮᱛᱟᱲ ᱞᱮᱛᱟᱲ ᱟᱹᱰᱤ ᱫᱤᱱ ᱚᱞᱚᱜ ᱤᱧ ᱥᱮᱬᱟ ᱠᱮᱫᱟ᱾ ᱨᱮᱱᱴᱟ – ᱮ ᱵᱟᱹᱵᱩ ᱟᱢ ᱡᱟᱦᱟᱸᱱᱟᱜ ᱠᱚ ᱠᱩᱞᱤ ᱥᱟᱱᱟᱢ ᱠᱟᱱ ᱠᱷᱟᱱ ᱛᱮᱦᱮᱧ ᱟᱨ ᱱᱤᱛ ᱨᱮᱜᱮ ᱠᱩᱞᱤ ᱡᱚᱝ ᱢᱮ ᱛᱟᱭᱚᱢ ᱛᱮ ᱟᱞᱚ ᱱᱟᱦᱟᱜ ᱮᱢ ᱢᱤᱛᱟᱹᱧᱟ, ᱱᱚᱣᱟ ᱠᱩᱞᱤ ᱥᱟᱱᱟ ᱞᱤᱫᱤᱧᱟ, ᱠᱩᱞᱤ ᱨᱮᱱᱟᱜ ᱫᱟᱣ ᱜᱮ ᱵᱟᱝ ᱠᱚ ᱮᱢᱟᱫ ᱫᱤᱧᱟ᱾ ᱼ ᱵᱟᱝᱟ ᱤᱧ ᱫᱚ ᱵᱟᱹᱧ ᱠᱩᱞᱤ ᱮᱭᱟ ᱢᱟ ᱟᱯᱮ ᱠᱚᱜᱮ? ᱼ ᱟᱞᱮ ᱥᱮᱫ ᱠᱷᱚᱱ ᱫᱚ ᱤᱱᱟᱹᱜ ᱜᱮ᱾ ᱟᱯᱮ ᱠᱚᱜᱮ ᱡᱩᱫᱤ ᱡᱟᱦᱟᱸ ᱱᱟᱜ ᱠᱚ ᱵᱟᱰᱟᱭ ᱥᱟᱱᱟᱭᱮᱫ ᱯᱮᱠᱷᱟᱱ , ᱱᱩᱭ ᱵᱟᱹᱵᱩ ᱠᱚᱲᱟ ᱠᱩᱞᱤ ᱮᱯᱮ᱾ ᱫᱷᱟᱢᱟ ᱢᱟᱹᱪᱤ ᱨᱮᱜᱮ ᱥᱚᱡᱷᱮ ᱧᱚᱜ ᱮ ᱫᱩᱲᱩᱵ ᱮᱱᱛᱮ ᱠᱩᱞᱤ ᱮᱦᱚᱵ ᱠᱮᱫᱟᱭ᱾ ᱼ ᱵᱟᱹᱵᱩ ᱠᱚᱲᱟ ᱟᱢᱟᱜ ᱧᱩᱛᱩᱢ ᱫᱚ? – ᱜᱮᱭᱟᱱ ᱦᱮᱢᱵᱽᱨᱚᱢ᱾ ᱼ ᱵᱚᱭᱦᱟ ᱠᱚᱫᱚ? – ᱯᱩᱱ ᱵᱚᱭᱦᱟᱜ ᱟᱞᱮ, ᱤᱧ ᱫᱚ ᱫᱚᱥᱟᱨ᱾ ᱢᱟᱨᱟᱝ ᱤᱡ ᱜᱮ ᱪᱟᱥ ᱵᱟᱥ ᱫᱚᱭ ᱥᱟᱢᱵᱽᱲᱟᱣ ᱮᱫ ᱛᱟᱞᱮᱭᱟ᱾ ᱤᱧ ᱠᱷᱚᱱ ᱦᱩᱰᱤᱧ ᱠᱤᱱ ᱫᱚ ᱱᱤᱛ ᱦᱚᱸ ᱠᱤᱱ ᱚᱞᱚᱜ ᱠᱟᱱ ᱜᱮᱭᱟ᱾ ᱵᱟᱵᱟ ᱫᱚ ᱪᱟᱞᱟᱣ ᱮᱱ ᱥᱮᱨᱢᱟᱭ ᱵᱚᱸᱜᱟ ᱛᱟᱞᱟᱭᱮᱱᱟ ᱱᱤᱛ ᱫᱚ ᱟᱭᱚ ᱜᱮ ᱢᱮᱱᱟᱭᱟ᱾ ᱼ ᱟᱢ ᱫᱚ ᱱᱤᱛᱚᱜ ᱪᱮᱫ ᱮᱢ ᱪᱤᱠᱟᱭᱮᱫᱼᱟ? ᱼ ᱤᱧ ᱫᱚ ᱰᱤᱯᱞᱚᱢᱟ ᱥᱟᱹᱛ ᱠᱟᱛᱮ ᱫᱟᱜ ᱡᱟᱦᱟᱡᱽ ᱨᱤᱧ ᱪᱟᱹᱠᱨᱤ ᱠᱟᱱᱟ᱾ ᱼ ᱪᱟᱥ ᱠᱚᱫᱚ ᱛᱤᱱᱟᱹᱜ ᱛᱟᱯᱮ ᱢᱮᱱᱟᱜᱼᱟ? –ᱤᱥᱤ ᱯᱩᱱ ᱵᱤᱜᱷᱟᱹ ᱢᱮᱱᱟᱜᱼᱟ᱾ ᱼ ᱦᱟᱹᱴᱤᱧ ᱞᱮᱠᱷᱟᱱ ᱯᱮ ᱛᱩᱨᱩᱭ ᱵᱤᱜᱷᱟᱹ ᱠᱟᱛᱮ ᱯᱮ ᱦᱩᱭᱩᱜᱼᱟ ᱾ ᱟᱞᱮᱭᱟᱜ ᱮᱢ ᱵᱟᱰᱟᱭ ᱟᱪᱮ ᱵᱟᱝ᱾ ᱢᱤᱫ ᱥᱟᱭ ᱢᱤᱫ ᱤᱥᱤ ᱵᱤᱜᱷᱟᱹ ᱪᱟᱥ ᱦᱟᱥᱟᱜᱮ ᱢᱮᱱᱟᱜᱼᱟ ᱾ ᱜᱮᱞ ᱵᱤᱜᱷᱟᱹ ᱦᱟᱥᱟ ᱱᱚᱝᱠᱟ ᱯᱩᱲᱭᱟᱹ ᱜᱮ ᱢᱮᱱᱟᱜᱼᱟ ᱪᱟᱥ ᱜᱮ ᱵᱟᱝ ᱞᱮ ᱫᱟᱲᱮᱭᱟᱜ ᱠᱟᱱᱟ᱾ ᱼ ᱤᱧ ᱢᱟᱹᱧ ᱪᱟᱹᱠᱨᱤ ᱠᱟᱱᱟ ᱦᱤᱡᱩᱜ ᱠᱟᱱ ᱫᱤᱱ ᱨᱮ ᱦᱟᱥᱟ ᱡᱟᱭᱜᱟ ᱫᱩᱧ ᱠᱤᱨᱤᱧ ᱫᱟᱲᱮᱭᱟᱜ ᱜᱮᱭᱟ ᱯᱟᱞᱮ᱾ ᱼ ᱟᱯᱮ ᱫᱟᱜ ᱡᱟᱦᱟᱡᱽ ᱪᱟᱠᱨᱤ ᱦᱚᱲ ᱢᱟ ᱛᱩᱨᱩᱭ ᱪᱟᱸᱫᱚ ᱪᱟᱹᱠᱨᱤ ᱨᱮ ᱟᱨ ᱛᱩᱨᱩᱭ ᱪᱟᱸᱫᱚ ᱪᱷᱩᱴᱤ᱾ ᱼ ᱦᱚᱭ ᱚᱱᱠᱟ ᱜᱮ ᱞᱟᱠᱛᱤ ᱞᱮᱠᱷᱟᱱ ᱛᱟᱞᱟ ᱨᱮᱦᱚᱸ ᱠᱚ ᱦᱚᱦᱚ ᱟᱞᱮᱭᱟ᱾ ᱨᱮᱱᱴᱟ ᱟᱹᱠᱤᱱᱟᱜ ᱠᱟᱛᱷᱟ ᱵᱟᱝ ᱢᱩᱪᱟᱹᱫᱚᱜ ᱠᱟᱱ ᱠᱷᱟᱹᱛᱤᱨ ᱥᱚᱠᱛᱚ ᱧᱚᱜ ᱱᱟᱹᱨᱲᱤ ᱛᱟᱭ ᱮ ᱥᱟᱯᱷᱟᱭ ᱛᱟᱭᱟ᱾ ᱮᱱ ᱠᱷᱟᱱ ᱥᱟᱱᱟᱢ ᱦᱚᱲ ᱟᱡ ᱥᱮᱱ ᱠᱚ ᱦᱮᱛᱟᱭᱟ, ᱩᱱᱨᱮ ᱢᱮᱱ ᱜᱚᱫᱟᱭ, ᱼ ᱪᱮᱞᱮ ᱟᱵᱚ ᱫᱚ ᱤᱱᱠᱟ ᱜᱮᱵᱚ ᱫᱩᱲᱩᱵ ᱟᱪᱮ, ᱥᱟᱸᱜᱤᱧ ᱦᱚᱨ ᱠᱚᱵᱚ ᱠᱷᱟᱴᱚ ᱤᱫᱤᱭᱟ? –ᱦᱚᱭ! ᱢᱩᱪᱟᱹᱫ ᱨᱮ ᱫᱩᱲᱩᱵ ᱟᱠᱟᱱᱤᱡ ᱦᱟᱲᱟᱢ ᱦᱚᱲ ᱮ ᱛᱮᱞᱟ ᱜᱚᱫ ᱠᱮᱫᱟ᱾ ᱼ ᱟᱪᱪᱷᱟ ᱫᱷᱟᱢᱟ ᱵᱟᱹᱵᱩ ᱟᱞᱮ ᱫᱚ ᱤᱱᱠᱟᱹᱜᱮ᱾ ᱜᱟᱯᱟ ᱢᱮᱭᱟᱝ ᱥᱮᱫ ᱟᱨ ᱡᱟᱦᱟᱸᱱᱟᱜ ᱠᱚᱫᱚ ᱞᱟᱝ ᱛᱩᱞᱟᱹ ᱡᱚᱠᱷᱟᱭᱟ᱾ ᱫᱷᱟᱢᱟ – ᱦᱚᱭ, ᱛᱚᱵᱮ ᱟᱫᱚ ᱫᱟᱠᱟ ᱫᱟᱜ ᱢᱟᱹᱰᱤ ᱠᱚᱜᱮ ᱦᱩᱱᱟᱹᱝ ᱯᱮ ᱥᱟᱵ ᱛᱟᱨᱟ ᱞᱮᱠᱷᱟᱱ ᱟᱹᱰᱤ ᱱᱟᱯᱟᱭ ᱠᱚᱜᱼᱟ᱾ ᱦᱟᱲᱟᱢ ᱦᱚᱲᱼ ᱵᱟᱝ ᱚᱱᱟ ᱠᱚᱫᱚ ᱴᱷᱤᱠ ᱜᱮᱭᱟ᱾ ᱢᱮᱱ ᱥᱟᱶᱛᱮ ᱠᱚ ᱵᱮᱨᱮᱫ ᱩᱛᱟᱹᱨ ᱮᱱᱟ᱾ ᱵᱤᱱ ᱡᱚᱦᱟᱨ ᱠᱟᱛᱮ ᱜᱮᱠᱚ ᱚᱸᱰᱚᱠ ᱮᱱᱟ᱾

᱕ᱹ
ᱩᱱᱠᱩ ᱠᱚ ᱚᱸᱰᱚᱠ ᱮᱱ ᱛᱟᱭᱚᱢ ᱫᱷᱟᱢᱟ ᱵᱟᱹᱦᱩ ᱫᱷᱟᱢᱟ ᱥᱩᱨ ᱦᱮᱡ ᱠᱟᱛᱮ, ᱪᱤᱭᱟᱹᱨ ᱢᱟᱹᱪᱤ ᱨᱮ ᱫᱩᱲᱩᱵ ᱮᱱᱟᱭ, ᱟᱨ ᱫᱷᱟᱢᱟ ᱥᱮᱫ ᱠᱚᱭᱚᱜ ᱠᱟᱛᱮ ᱢᱮᱱ ᱠᱮᱫᱟᱭ, ᱼ ᱦᱮᱸ ᱜᱚ ᱪᱮᱫᱟᱜ ᱚᱱᱟ ᱠᱚᱫᱚᱢ ᱢᱮᱱ ᱠᱮᱫᱟ? – ᱪᱮᱫ ᱠᱚ? – ᱵᱟᱝ ᱢᱟ ᱟᱞᱮᱭᱟᱜ ᱫᱚ ᱢᱤᱫ ᱥᱟᱭ ᱢᱤᱫ ᱤᱥᱤ ᱵᱤᱜᱷᱟᱹ ᱪᱟᱥ ᱦᱟᱥᱟ ᱛᱟᱞᱮ ᱢᱮᱱᱟᱜᱼᱟ᱾ ᱵᱟ ᱪᱮᱠᱚ ᱢᱚᱱᱮᱭᱟ ᱦᱟᱥᱟ ᱡᱟᱭᱜᱟ ᱨᱮᱱᱟᱜ ᱜᱚᱨᱚᱵᱽ ᱮ ᱥᱚᱫᱚᱨ ᱮᱫ ᱠᱟᱱᱟ᱾ ᱼ ᱢᱮᱱᱟᱜ ᱛᱟᱵᱚᱣᱟ ᱚᱱᱟ ᱪᱮᱠᱟᱹᱧ ᱢᱮᱱ ᱠᱮᱫᱟ, ᱡᱩᱫᱤ ᱩᱱᱠᱩ ᱚᱱᱟ ᱠᱚ ᱵᱷᱟᱹᱵᱤᱭᱟ ᱮᱱ ᱠᱷᱟᱱ ᱪᱮᱫ ᱮᱢ ᱪᱤᱠᱟᱹ ᱫᱟᱲᱮᱭᱟᱜᱼᱟ᱾ ᱼ ᱟᱡ ᱢᱟᱢᱚ ᱚᱲᱟᱜ ᱠᱚᱫᱚ ᱮᱱᱛᱮ ᱵᱟᱢ ᱠᱩᱞᱤ ᱞᱮᱫᱮᱭᱟ? ᱼ ᱤᱧ ᱫᱚ ᱯᱩᱱ ᱵᱚᱭᱦᱟ ᱟᱨ ᱤᱥᱤ ᱯᱩᱱ ᱵᱤᱜᱷᱟᱹ ᱦᱟᱥᱟᱭ ᱞᱟᱹᱭ ᱠᱮᱫ ᱠᱷᱟᱱ ᱜᱮ ᱚᱱᱮᱢ ᱵᱮᱡᱟᱨ ᱜᱚᱫ ᱮᱱᱟ, ᱩᱱ ᱨᱮᱜᱤᱧ ᱴᱷᱟᱹᱣᱠᱟᱹ ᱠᱮᱫᱟ ᱡᱮ ᱱᱩᱠᱩ ᱴᱷᱮᱱ ᱫᱚ ᱢᱟᱨᱟᱝ ᱢᱟᱹᱭ ᱵᱟᱹᱧ ᱴᱷᱟᱶ ᱮᱭᱟ᱾ ᱼ ᱠᱚᱲᱟ ᱜᱤᱫᱽᱨᱟᱹ ᱟᱜ ᱢᱮᱫ ᱢᱩᱴᱷᱟᱱ ᱫᱚ ᱟᱹᱰᱤ ᱱᱟᱯᱟᱭ ᱛᱟᱭᱟ ᱾ ᱢᱟᱨᱟᱝ ᱢᱟᱹᱭ ᱥᱟᱶ ᱫᱚ ᱦᱩᱱᱟᱝ ᱱᱟᱯᱟᱭ ᱠᱤᱱ ᱡᱚᱲᱚᱜᱼᱟ᱾ ᱼ ᱟᱯᱮ ᱠᱩᱲᱤ ᱠᱚᱢᱟ ᱱᱟᱯᱟᱭ ᱧᱮᱞ ᱛᱮᱜᱮ ᱯᱮ ᱪᱷᱟᱸᱫᱟ ᱜᱚᱫᱚᱜᱼᱟ᱾ ᱼ ᱦᱚᱭ ᱚᱱᱟ ᱫᱚ ᱥᱟᱹᱨᱤᱢ ᱢᱮᱱ ᱠᱮᱫᱟ᱾ ᱪᱮᱫᱟᱜ ᱪᱚ ᱤᱧ ᱦᱚᱸ ᱵᱟᱹᱧ ᱜᱩᱱᱤ ᱵᱷᱟᱹᱵᱤ ᱞᱮᱫ ᱟᱢ ᱜᱤᱧ ᱠᱩᱥᱤᱭᱟᱫ ᱢᱮ᱾ ᱼ ᱫᱮ ᱫᱟᱠᱟ ᱨᱮᱸᱜᱮᱡ ᱤᱧ ᱠᱟᱱᱟ᱾ ᱫᱟᱠᱟ ᱵᱷᱩᱨᱟᱹᱜ ᱟᱧ ᱢᱮ᱾ ᱪᱮᱫ ᱯᱮ ᱩᱛᱩ ᱟᱠᱟᱫᱼᱟ ᱾ ᱼᱟᱹᱞᱩ ᱟᱨ ᱵᱷᱩᱱᱰᱤ ᱜᱤᱧ ᱩᱛᱩ ᱟᱠᱟᱫ ᱟ᱾ ᱼ ᱟᱪᱪᱷᱟ ᱫᱮ ᱡᱟᱦᱟᱸ ᱢᱮᱱᱟᱜᱼᱟ, ᱚᱱᱟ ᱜᱤᱧ ᱡᱚᱢ ᱠᱟᱜᱼᱟ᱾

᱖ᱹ
ᱱᱚᱛᱮ ᱯᱷᱩᱞᱚ, ᱡᱷᱟᱱᱚ ᱟᱨ ᱟᱡ ᱡᱷᱤ ᱜᱩᱢᱤ ᱵᱟᱲᱜᱮ ᱥᱮᱫ ᱨᱮᱠᱚ ᱠᱩᱢᱵᱟᱹ ᱟᱠᱟᱫ ᱟ᱾ ᱡᱷᱟᱱᱚ ᱟᱡ ᱫᱟᱹᱭ ᱠᱮ ᱠᱩᱞᱤ ᱮ ᱠᱟᱱᱟᱭ, ᱼ ᱦᱮᱸ ᱫᱤ ᱠᱚᱲᱟ ᱫᱚᱢ ᱠᱩᱥᱤ ᱟᱫᱮᱭᱟ ᱥᱮ ᱵᱟᱝ? ᱼ ᱤᱧ ᱠᱩᱥᱤ ᱠᱟᱛᱮ ᱵᱟᱝ ᱜᱟᱱᱚᱜᱼᱟ ᱾ ᱵᱟᱵᱟ ᱢᱟᱬᱟᱝ ᱮ ᱠᱩᱥᱤᱜ ᱛᱟᱢᱟ ᱛᱚᱵᱮ ᱮᱱᱟᱝ ᱤᱧ ᱫᱩᱧ ᱩᱭᱦᱟᱹᱨᱟ ᱾ ᱼ ᱵᱟᱵᱟ ᱫᱚ ᱮᱠᱟᱞ ᱵᱟᱝ ᱮ ᱠᱩᱥᱤ ᱞᱮᱱᱟ ᱚᱱᱟ ᱪᱮᱠᱟ ᱜᱮ ᱪᱮᱫ ᱠᱚ ᱦᱟᱥᱟ ᱪᱟᱥ ᱵᱟᱥ ᱠᱚ ᱤᱫᱤ ᱠᱟᱛᱮ ᱠᱩᱞᱤ ᱠᱮᱫᱮᱭᱟᱭ᱾ ᱼᱤᱧ ᱤᱧ ᱵᱟᱰᱟᱭᱟ ᱟᱢ ᱵᱟᱵᱟ ᱫᱚ ᱟᱡ ᱞᱮᱠᱟᱱ ᱦᱟᱥᱟ ᱠᱤᱥᱟᱺᱬ ᱠᱚᱜᱮ ᱠᱩᱥᱤ ᱟᱠᱚᱣᱟᱭ᱾ ᱚᱞ ᱯᱟᱲᱦᱟᱣ ᱪᱟᱹᱠᱨᱤ ᱠᱚᱫᱚ ᱵᱟᱭ ᱠᱩᱥᱤ ᱟᱠᱚᱣᱟ᱾ ᱡᱷᱟᱱᱚᱼ ᱦᱩᱸ…!ᱥᱟᱹᱨᱤᱢ ᱞᱟᱹᱭ ᱠᱮᱫᱟ ᱡᱷᱤ᱾ ᱼ ᱛᱮᱦᱮᱧ ᱤᱧ ᱞᱟᱹᱭ ᱡᱩᱛ ᱟᱹᱵᱤᱱ ᱠᱟᱱᱟ᱾ ᱟᱹᱵᱤᱱ ᱫᱚ ᱟᱹᱵᱤᱱ ᱛᱮᱜᱮ ᱥᱟᱞᱟ ᱵᱟᱪᱷᱟᱣ ᱠᱟᱛᱮ ᱡᱟᱶᱟᱭᱚᱜ ᱵᱤᱱ᱾ ᱤᱧ ᱵᱟᱠᱷᱨᱟ ᱯᱮᱲᱟ ᱢᱚᱬᱮ ᱜᱚᱴᱟᱝ ᱠᱚ ᱦᱮᱡ ᱞᱮᱱᱟ ᱚᱠᱚᱭ ᱦᱚᱸ ᱵᱟᱭ ᱠᱩᱥᱤᱭᱟᱫ ᱠᱚᱣᱟ᱾ ᱡᱟᱦᱟᱸᱭ ᱤᱧ ᱢᱚᱱᱮ ᱢᱚᱱᱮ ᱛᱤᱧ ᱠᱩᱥᱤᱣᱟᱭ ᱛᱟᱦᱮᱸ ᱩᱱᱤ ᱦᱚᱸᱭ ᱦᱮᱡ ᱞᱮᱱᱟ᱾ ᱟᱢ ᱵᱟᱵᱟ ᱩᱱᱤ ᱴᱷᱮᱱ ᱦᱚᱸ ᱵᱟᱝ ᱮ ᱨᱮᱵᱮᱱ ᱞᱮᱱᱟ᱾ ᱟᱢ ᱟᱭᱚ ᱫᱩᱧ ᱞᱟᱹᱭ ᱟᱫᱮ ᱛᱟᱦᱮᱸ ᱜᱮ ᱢᱮᱱᱠᱷᱟᱱ ᱟᱢ ᱵᱟᱵᱟ ᱮᱠᱟᱞ ᱵᱟᱝ ᱮ ᱨᱮᱵᱮᱱ ᱞᱮᱱ ᱛᱮ ᱛᱮᱦᱮᱧ ᱦᱚᱸ ᱨᱟᱲᱟᱼᱯᱟᱛᱲᱟ ᱱᱚᱜᱼᱚᱭ ᱢᱤᱱᱟᱹᱧ ᱜᱮᱭᱟ᱾ ᱼ ᱦᱮᱸ ᱡᱷᱤ ᱟᱫᱚ ᱵᱟᱪᱮᱢ ᱧᱤᱨ ᱞᱮᱱᱟ᱾ ᱯᱷᱩᱞᱚᱭ ᱠᱩᱞᱤ ᱠᱮᱫᱮᱭᱟ᱾ ᱼ ᱚᱱᱟ ᱜᱮᱛᱚ ᱢᱟᱨᱟᱝ ᱵᱟᱹᱧ ᱵᱚᱨᱥᱟ ᱞᱮᱫ, ᱟᱭᱚ ᱵᱟᱵᱟ ᱟᱜ ᱢᱟᱹᱱ ᱥᱚᱢᱢᱟᱱ ᱤᱧ ᱩᱭᱦᱟᱹᱨ ᱞᱮᱫᱟ᱾ ᱛᱮᱦᱮᱧ ᱜᱚᱴᱟ ᱫᱤᱥᱚᱢ ᱯᱟᱲᱟ ᱦᱚᱲ ᱤᱧ ᱥᱮᱫ ᱜᱮ ᱠᱚ ᱰᱷᱮᱥ ᱮᱫᱟ ᱜᱩᱢᱤ ᱴᱷᱮᱱ ᱜᱮ ᱪᱮᱫ ᱠᱚᱪᱚ ᱵᱟᱹᱲᱤᱡ ᱜᱩᱱ ᱢᱮᱱᱟᱜ ᱛᱮ ᱯᱮᱲᱟ ᱵᱟᱝ ᱠᱚ ᱠᱩᱥᱤ ᱞᱮᱱᱟ᱾ ᱱᱚᱰᱮ ᱢᱟ ᱩᱞᱴᱟ ᱯᱮᱲᱟ ᱠᱚᱦᱚᱸ ᱟᱨ ᱤᱧ ᱦᱩᱧ ᱠᱩᱥᱤ ᱞᱮᱱᱟ ᱾ ᱟᱫᱚ ᱱᱤᱛ ᱚᱠᱚᱭ ᱠᱩᱧ ᱞᱟᱹᱭ ᱵᱟᱲᱟ ᱟᱠᱚᱣᱟ ᱡᱮ ᱤᱧ ᱫᱩᱧ ᱠᱩᱥᱤ ᱞᱮᱱ ᱜᱮᱭᱟ᱾ ᱤᱧᱨᱮ ᱪᱮᱫ ᱦᱚᱸ ᱵᱟᱹᱲᱤᱡ ᱫᱚ ᱵᱟᱹᱱᱩᱜ ᱟ᱾ ᱤᱧ ᱫᱟᱫᱟ ᱜᱮ ᱵᱟᱝ ᱮ ᱠᱩᱥᱤ ᱞᱮᱱᱟ ᱢᱮᱱᱛᱮ ᱱᱚᱣᱟ ᱠᱟᱛᱷᱟ ᱪᱤᱠᱟᱹᱧ ᱥᱚᱫᱚᱨᱟ᱾ ᱼ ᱦᱚᱭ ᱡᱷᱤ ᱠᱩᱲᱤ ᱢᱟ ᱠᱚᱲᱟ ᱞᱮᱠᱟ ᱯᱩᱥᱴᱟᱹᱣ ᱥᱟᱺᱦᱤᱡ ᱥᱟᱱᱟᱢ ᱦᱚᱲ ᱥᱟᱢᱟᱝ ᱨᱮ ᱟᱯᱱᱟᱨᱟᱜ ᱢᱚᱛ ᱨᱚᱲ ᱵᱟᱝ ᱵᱚ ᱫᱟᱲᱮᱭᱟᱜ ᱟ᱾ ᱼ ᱧᱮᱞ ᱢᱮ ᱢᱟᱨᱟᱝ ᱢᱟᱹᱭ ᱟᱢ ᱵᱟᱵᱟ ᱫᱚ ᱞᱚᱜᱚᱱ ᱚᱠᱟ ᱨᱮᱦᱚᱸ ᱵᱟᱝ ᱮ ᱠᱩᱥᱤ ᱜᱚᱫᱚᱜ ᱟ, ᱟᱢ ᱜᱮ ᱡᱩᱫᱤ ᱡᱟᱦᱟᱸᱭ ᱠᱚᱢ ᱠᱩᱥᱤᱭᱟᱠᱟᱫ ᱠᱚ ᱠᱷᱟᱱ ᱟᱨ ᱟᱢ ᱠᱩᱥᱤ ᱨᱟᱹᱥᱠᱟ ᱨᱮ ᱫᱚᱦᱚ ᱫᱟᱲᱮᱭᱟᱢ ᱠᱷᱟᱱ ᱩᱥᱟᱹᱨᱟ ᱧᱟᱯᱟᱢ ᱠᱟᱛᱮ ᱡᱟᱶᱟᱭᱚᱜ ᱢᱮ ᱤᱧ ᱤᱧ ᱜᱚᱲᱚᱣᱟᱢᱟ ᱟᱨ ᱟᱢ ᱟᱭᱚ ᱦᱩᱧ ᱨᱮᱵᱮᱱ ᱚᱪᱚ ᱮᱭᱟ᱾ ᱼ ᱮ ᱡᱷᱤ ᱫᱮᱞᱟ ᱫᱟᱠᱟ ᱠᱚᱵᱚ ᱡᱚᱢᱟ ᱨᱮᱸᱜᱮᱡ ᱤᱧ ᱠᱟᱱᱟ ᱤᱧ ᱫᱚ ᱥᱚᱠᱛᱚ᱾ ᱼ ᱦᱚᱭ ᱫᱮᱞᱟ, ᱦᱚᱯᱚᱱ ᱟᱢ ᱦᱩᱧ ᱞᱟᱹᱭ ᱟᱢ ᱠᱟᱱᱟ ᱱᱮᱛᱟᱨ ᱠᱷᱚᱱ ᱜᱮ ᱧᱟᱢ ᱡᱚᱝ ᱢᱮ ᱟᱢ ᱵᱟᱵᱟ ᱵᱚᱨᱥᱟ ᱫᱚ ᱪᱟᱹᱥᱤ ᱜᱮ᱾ ᱼᱤᱧ ᱫᱚ ᱮᱠᱟᱞ ᱪᱟᱹᱥᱤ ᱠᱚᱴᱷᱮᱱ ᱫᱩᱧ ᱵᱟᱝ ᱟᱜ ᱜᱮ᱾ ᱫᱤᱱ ᱜᱮ ᱜᱩᱨᱤᱡ ᱫᱤᱯᱤᱞ ᱦᱩᱭ ᱟᱹᱧᱟ, ᱚᱱᱟ ᱞᱟᱹᱜᱤᱫ ᱫᱚ ᱵᱟᱹᱧ ᱚᱞᱚᱜ ᱠᱟᱱᱟ, ᱵᱚᱨᱚᱢ ᱪᱚ ᱪᱟᱹᱠᱨᱤᱭᱟᱹᱧ ᱡᱷᱤ ᱵᱟᱹᱧ ᱡᱟᱶᱟᱭᱚᱜᱼᱟ᱾ ᱟᱫᱚ ᱡᱚᱛᱚ ᱵᱟᱲᱜᱮ ᱠᱷᱚᱱ ᱚᱲᱟᱜ ᱥᱮᱫ ᱠᱚ ᱵᱚᱞᱚᱭᱮᱱᱟ᱾

᱗ᱹ
ᱫᱚᱥᱟᱨ ᱦᱤᱞᱚᱜ ᱨᱮᱱᱴᱟ ᱫᱷᱟᱢᱟ ᱚᱲᱟᱜ ᱛᱮ ᱦᱤᱡᱩᱜ ᱟᱭ ᱾ ᱫᱷᱟᱢᱟ ᱪᱟᱹᱲᱤ ᱨᱮ ᱜᱮ ᱢᱤᱫ ᱴᱮᱸᱰᱟᱨ ᱢᱟᱹᱪᱤ ᱨᱮ ᱫᱩᱲᱩᱵ ᱞᱮᱱ ᱛᱟᱦᱮᱸ ᱠᱟᱱᱟᱭ ᱾ ᱨᱮᱱᱴᱟ ᱠᱩᱞᱦᱤ ᱫᱩᱣᱟᱹᱨ ᱠᱷᱚᱱ ᱦᱚᱦᱚ ᱟᱛᱮ ᱵᱚᱞᱚᱱ ᱟᱭ, ᱼ ᱜᱚᱢᱠᱮ ᱚᱲᱟᱜ ᱨᱮ ᱢᱮᱱᱟᱜ ᱵᱤᱱᱟ ᱥᱮ? ᱼ ᱦᱮᱸ ᱢᱮᱱᱟᱜ ᱞᱤᱧ ᱜᱮᱭᱟ ᱾ ᱢᱟ ᱱᱚᱛᱮ ᱜᱮ ᱵᱚᱞᱚᱱ ᱵᱤᱱ᱾ ᱫᱷᱟᱢᱟ ᱟᱡ ᱥᱩᱨ ᱨᱮ ᱛᱟᱦᱮᱸ ᱠᱟᱱ ᱢᱤᱫ ᱢᱟᱹᱪᱤ ᱜᱮ ᱚᱨ ᱥᱩᱨ ᱠᱮᱫ ᱛᱮ ᱨᱮᱱᱴᱟ ᱠᱮ ᱢᱮᱛᱟᱫ ᱫᱮᱭᱟ ᱢᱟ ᱱᱚᱰᱮ ᱜᱮ ᱟᱥᱟᱱ ᱢᱟᱰᱟᱣ ᱢᱮ᱾ ᱨᱮᱱᱴᱟ ᱫᱩᱲᱩᱵ ᱮᱱ ᱛᱟᱭᱚᱢ ᱫᱷᱟᱢᱟ ᱜᱮ ᱨᱮᱱᱴᱟ ᱠᱮ ᱠᱩᱞᱤ ᱮᱭᱟᱭ, ᱼ ᱪᱮᱞᱮ ᱪᱮᱫ ᱞᱮᱠᱟᱢ ᱦᱮᱡ ᱮᱱᱟ᱾ ᱼ ᱚᱦ, ᱦᱚᱞᱟ ᱱᱟᱜ, ᱩᱱᱠᱩ ᱯᱮᱲᱟ ᱠᱚᱣᱟᱜ ᱠᱟᱛᱷᱟ ᱠᱚ ᱤᱫᱤ ᱠᱟᱛᱮ ᱜᱮ, ᱪᱮᱫ ᱞᱮᱠᱟᱢ ᱟᱹᱭᱠᱟᱣ ᱠᱮᱫ ᱠᱚᱣᱟ᱾ ᱼ ᱤᱧ ᱫᱚ ᱪᱟᱥ ᱵᱟᱥ ᱡᱟᱦᱟᱸᱭᱟᱜ ᱛᱟᱦᱮᱸᱱᱟ ᱟᱨᱠᱚ ᱪᱟᱹᱠᱨᱤᱭᱟ ᱩᱱᱠᱩ ᱴᱷᱮᱱ ᱜᱤᱧ ᱜᱚᱝ ᱠᱚᱣᱟ ᱦᱚᱯᱚᱱ ᱮᱨᱟ ᱢᱤᱥᱮᱨᱟ ᱫᱚ᱾ ᱪᱟᱹᱠᱨᱤ ᱫᱚ ᱵᱟᱹᱨᱥᱤᱧ ᱞᱟᱹᱜᱤᱫ ᱠᱟᱱᱟ᱾ ᱪᱟᱥ ᱫᱚ ᱪᱤᱨᱚ ᱫᱤᱱ ᱞᱟᱹᱜᱤᱫ᱾ ᱪᱟᱹᱠᱨᱤ ᱠᱷᱚᱱ ᱡᱟᱦᱟᱸᱱ ᱠᱟᱨᱚᱱ ᱤᱫᱤ ᱠᱟᱛᱮ ᱜᱮᱠᱚ ᱥᱟᱦᱟ ᱞᱮᱢ ᱠᱷᱟᱱ ᱟᱨ ᱦᱚᱸ ᱮᱴᱟᱜ ᱪᱟᱹᱠᱨᱤ ᱥᱟᱵ ᱛᱮ ᱛᱤᱱᱟᱹᱜ ᱥᱚᱢᱚᱭ ᱞᱟᱜᱟᱛᱚᱜᱼᱟ, ᱩᱱᱤ ᱞᱟᱹᱜᱤᱫ ᱮᱴᱟᱜ ᱨᱮ ᱪᱟᱹᱠᱨᱤ ᱫᱚᱦᱚ ᱢᱟ ᱵᱟᱝ ᱛᱟᱦᱮᱸᱱ ᱟ᱾ ᱢᱤᱫ ᱦᱚᱲ ᱪᱟᱹᱠᱨᱤ ᱠᱟᱛᱮ ᱫᱚ ᱞᱟᱡ ᱜᱮ ᱵᱷᱟᱛᱟᱣ ᱫᱟᱲᱮᱭᱟᱜ ᱟ᱾ ᱪᱟᱹᱠᱨᱤ ᱢᱟᱱᱮ ᱫᱚ ᱠᱤᱥᱟᱺᱬ ᱠᱚᱭᱤᱡ ᱜᱩᱛᱤ᱾ ᱟᱵᱚ ᱫᱚ ᱟᱵᱚ ᱜᱮ ᱜᱩᱛᱤ ᱦᱚᱸ ᱟᱨ ᱠᱤᱥᱟᱺᱬ ᱦᱚᱸ ᱾ ᱛᱩᱨᱩᱭ ᱪᱟᱸᱫᱚ ᱠᱷᱟᱴᱟᱣᱜ ᱢᱮ ᱟᱨ ᱛᱩᱨᱩᱭ ᱪᱟᱸᱫᱚ ᱫᱩᱲᱩᱵ ᱠᱟᱛᱮ ᱡᱚᱢ ᱢᱮ᱾ ᱚᱠᱚᱭ ᱟᱜ ᱠᱟᱛᱷᱟ/ ᱨᱚᱲ ᱪᱮ ᱮᱜᱮᱨ ᱦᱚᱸ ᱵᱟᱝ ᱮᱢ ᱟᱸᱡᱚᱢ ᱟ᱾ ᱜᱤᱫᱽᱨᱟᱹ ᱠᱚ ᱯᱟᱲᱦᱟᱣᱜ ᱠᱟᱱᱟ ᱫᱚ ᱦᱤᱡᱩᱜ ᱠᱟᱱ ᱫᱤᱱ ᱟᱨ ᱡᱩᱜᱽ ᱥᱟᱶᱛᱮ ᱛᱟᱲᱟᱢ ᱞᱟᱹᱜᱤᱫ ᱜᱮ᱾ ᱦᱤᱡᱩᱜ ᱠᱟᱱ ᱫᱤᱱ ᱨᱮ ᱟᱠᱚ ᱨᱤᱱ ᱜᱤᱫᱟᱹᱨ ᱠᱚ ᱵᱮᱥ ᱥᱤᱠᱷᱱᱟᱹᱛ ᱠᱚ ᱮᱢ ᱫᱟᱲᱮᱭᱟᱠᱚᱢᱟ, ᱚᱱᱟ ᱞᱟᱹᱜᱤᱫ ᱠᱟᱱᱟ᱾ ᱼ ᱜᱚᱢᱠᱮ ᱩᱭᱦᱟᱹᱨ ᱢᱟ ᱟᱹᱰᱤ ᱡᱚᱛᱷᱟᱛ ᱜᱮᱭᱟ ᱮᱱᱦᱚᱸ ᱢᱤᱫ ᱡᱮᱠᱷᱟ ᱩᱭᱦᱟᱹᱨ ᱟᱹᱪᱩᱨ ᱧᱚᱜᱽ ᱵᱤᱱ ᱠᱚᱲᱟ ᱟᱨ ᱟᱠᱚ ᱚᱲᱟᱜ ᱦᱚᱲ ᱠᱚᱫᱚ ᱠᱚ ᱠᱩᱥᱤ ᱟᱠᱟᱱᱟ᱾ ᱼ ᱦᱟᱯᱮ ᱟᱲᱟᱜ ᱥᱟᱠᱟᱢ ᱟᱹᱣᱨᱤ ᱡᱚᱢ ᱵᱷᱟᱜᱟᱣ ᱟᱭ, ᱱᱚᱝᱠᱟ ᱞᱟᱹᱭ ᱨᱩᱣᱟᱹᱲ ᱟᱠᱚᱢᱮ ᱾ ᱼ ᱴᱷᱤᱠᱟ ᱚᱱᱠᱟ ᱜᱤᱧ ᱞᱟᱹᱭ ᱨᱩᱣᱟᱹᱲ ᱟᱠᱚᱣᱟ᱾ ᱢᱟ ᱛᱚᱵᱮ ᱤᱧ ᱫᱚ ᱤᱱᱠᱟᱹ ᱜᱤᱧ ᱫᱩᱲᱩᱵ ᱟ᱾ ᱼ ᱞᱚᱞᱚ ᱫᱟᱜ ᱠᱚ ᱵᱟᱢ ᱥᱤᱲᱩᱵ ᱛᱟᱨᱟᱭᱟ᱾ ᱼ ᱵᱟᱝ, ᱛᱮᱦᱮᱧ ᱫᱚ ᱵᱟᱝ ᱟᱹᱛᱤᱧᱟ᱾ ᱨᱮᱱᱴᱟ ᱢᱟᱹᱪᱤ ᱠᱷᱚᱱ ᱵᱮᱨᱮᱫ ᱠᱟᱛᱮ ᱚᱸᱰᱚᱠᱚᱜ ᱟᱭ᱾

᱘ᱹ
ᱯᱷᱩᱞᱚ ᱟᱡᱤᱡ ᱜᱟᱛᱮ ᱥᱟᱶ ᱮ ᱧᱟᱯᱟᱢ ᱟᱠᱟᱱᱟ᱾ ᱯᱮᱲᱟ ᱠᱚ ᱦᱮᱡ ᱞᱮᱱᱟ, ᱚᱱᱟ ᱥᱟᱶᱛᱮ, ᱵᱟᱵᱟ ᱟᱜ ᱩᱭᱦᱟᱹᱨ ᱠᱚᱭ ᱞᱟᱹᱭ ᱟᱸᱡᱚᱢ ᱟᱫ ᱫᱮᱭᱟ᱾ ᱞᱚᱜᱚᱱ ᱛᱮ ᱞᱚᱜᱚᱱ ᱩᱭᱦᱟᱹᱨ ᱟᱹᱪᱩᱨ ᱠᱟᱛᱮᱢ ᱞᱟᱹᱭ ᱟᱹᱧᱟ᱾ ᱤᱧ ᱠᱚᱭ ᱞᱟᱹᱜᱤᱫ ᱵᱟᱵᱟ ᱴᱷᱮᱱᱮᱢ ᱥᱮᱱᱚᱜ ᱨᱮᱦᱚᱸ ᱵᱟᱵᱟ ᱫᱚ ᱵᱟᱭ ᱨᱮᱵᱮᱱ ᱟ᱾ ᱡᱷᱤ ᱠᱮ ᱟᱞᱟᱝ ᱟ ᱫᱩᱞᱟᱹᱲ ᱤᱫᱤ ᱠᱟᱛᱮ ᱥᱟᱱᱟᱢᱟᱜ ᱤᱧ ᱞᱟᱹᱭ ᱟᱠᱟᱣᱟᱫ ᱫᱮᱭᱟ᱾ ᱵᱟᱯᱞᱟ ᱢᱟᱞᱟᱝ ᱵᱟᱯᱞᱟᱜ ᱜᱮᱭᱟ ᱟᱫᱚ ᱚᱠᱟ ᱨᱮ ᱟᱨ ᱪᱮᱫ ᱞᱮᱠᱟ ᱚᱱᱟ ᱩᱭᱦᱟᱹᱨ ᱞᱟᱹᱜᱤᱫ ᱚᱠᱛᱚ ᱤᱢᱟᱹᱧ ᱢᱮ᱾ ᱼ ᱴᱷᱤᱠᱟ, ᱞᱚᱜᱚᱱ ᱮᱢ ᱞᱟᱹᱭ ᱟᱹᱧᱟ, ᱰᱮᱦᱮᱨ ᱫᱤᱱ ᱫᱚ ᱚᱲᱟᱜ ᱨᱮ ᱵᱟᱭ ᱛᱟᱦᱮᱱ ᱥᱟᱹᱱᱟᱹᱧ ᱠᱟᱱᱟ᱾ ᱚᱠᱚᱭ ᱪᱟᱹᱥᱤ ᱠᱚ ᱴᱷᱮᱱ ᱮ ᱴᱷᱮᱞᱟᱣ ᱜᱚᱫ ᱠᱟᱹᱧᱟ, ᱵᱟᱝ ᱦᱚᱸ ᱵᱟᱹᱧ ᱢᱮᱱ ᱫᱟᱲᱮᱣᱟᱭᱟ ᱱᱟᱦᱟᱜ᱾ ᱼ ᱡᱩᱫᱤ ᱠᱩᱪᱨᱤ ᱨᱮᱞᱟᱝ ᱵᱟᱯᱞᱟᱜ ᱠᱷᱟᱱ? ᱼ ᱡᱟᱦᱟᱸ ᱨᱮᱜᱮ, ᱚᱱᱟ ᱦᱚᱸ ᱱᱟᱯᱟᱭᱚᱜ ᱜᱮᱭᱟ, ᱟᱢ ᱦᱚᱢ ᱛᱚᱞ ᱠᱚᱜᱼᱟ ᱟᱨ ᱤᱧ ᱦᱚᱸ ᱵᱟᱱᱟ ᱦᱚᱲ ᱟᱹᱱᱼᱟᱹᱨᱤ ᱛᱮᱞᱟᱝ ᱛᱚᱞ ᱠᱚᱜᱼᱟ, ᱱᱚᱣᱟ ᱫᱚ ᱵᱟᱵᱟ ᱦᱚᱸ ᱵᱟᱝ ᱮ ᱨᱟᱪᱟᱜ ᱛᱚᱯᱟᱜ ᱫᱟᱲᱮᱭᱟᱜᱼᱟ᱾ ᱼ ᱴᱷᱤᱠᱟ ᱛᱚᱵᱮ ᱜᱟᱛᱮ ᱠᱩᱧ ᱞᱟᱹᱭ ᱟᱠᱚᱣᱟ᱾ ᱵᱟᱨᱭᱟ ᱜᱟᱱ ᱜᱟᱹᱣᱟᱭ ᱦᱚᱸ ᱧᱟᱢ ᱡᱩᱛ ᱦᱩᱭᱩᱜᱼᱟ᱾ ᱼ ᱤᱧ ᱫᱚ ᱡᱷᱤ ᱟᱨ ᱦᱚᱯᱚᱱ ᱤᱧ ᱥᱟᱶ ᱛᱚᱨᱟ ᱠᱤᱱᱟ᱾ ᱼᱴᱷᱤᱠᱟ ᱛᱚᱵᱮ ᱦᱤᱡᱩᱜ ᱠᱟᱱ ᱵᱟᱞᱮ ᱢᱟᱦᱟ ᱦᱤᱞᱚᱜ ᱛᱤᱠᱤᱱ ᱟᱹᱪᱩᱨ ᱠᱩᱪᱨᱤ ᱨᱮ᱾ ᱼ ᱦᱚᱭ ᱛᱚᱵᱮ ᱢᱟ ᱤᱱᱠᱟᱹ ᱜᱮ᱾

᱙ᱹ
ᱯᱷᱩᱞᱚ ᱚᱲᱟᱜ ᱨᱮ ᱦᱮᱡ ᱠᱟᱛᱮ ᱟᱡ ᱡᱷᱤ ᱠᱮ ᱥᱟᱱᱟᱢᱟᱜ ᱮ ᱞᱟᱹᱭ ᱟᱫᱮᱭᱟ᱾ ᱦᱚᱯᱚᱱ ᱦᱚᱸ ᱠᱤᱱ ᱞᱟᱹᱭ ᱟᱫᱮᱭᱟ᱾ ᱪᱮᱫ ᱞᱮᱠᱟ ᱛᱮᱵᱚ ᱪᱟᱞᱟᱣ ᱟ,ᱠᱩᱪᱨᱤ ᱛᱮ ᱚᱱᱟ ᱱᱤᱛ ᱫᱚ ᱵᱚ ᱩᱭᱦᱟᱹᱨ ᱟ᱾ ᱦᱚᱯᱚᱱ ᱮ ᱢᱮᱱᱟᱼ ᱫᱤ ᱟᱞᱚᱢ ᱵᱷᱟᱵᱤᱛᱚᱜ ᱟ ᱤᱧ ᱢᱤᱱᱟᱧ ᱟ᱾ ᱡᱚᱛᱚ ᱠᱚ ᱯᱷᱩᱥᱩᱨ ᱯᱩᱥᱩᱨᱚᱜ ᱟ, ᱪᱮᱫ ᱦᱚᱸ ᱨᱚᱲ ᱛᱟᱠᱚ ᱵᱟᱝ ᱟᱸᱡᱚᱢᱚᱜᱼᱟ᱾

᱑᱐ᱹ
ᱫᱤᱱ ᱵᱟᱞᱮ ᱢᱟᱦᱟ
ᱯᱷᱩᱞᱚ ᱚᱲᱟᱜ ᱠᱷᱚᱱ ᱜᱮ ᱵᱟᱹᱦᱩ ᱠᱩᱲᱤ ᱞᱮᱠᱟ ᱥᱟᱡᱟᱣ ᱠᱟᱛᱮ ᱚᱸᱰᱚᱠᱚᱜ ᱠᱟᱱᱟᱭ᱾ ᱫᱷᱟᱢᱟ ᱫᱚ ᱠᱩᱞᱦᱤ ᱫᱩᱣᱟᱹᱨ ᱥᱮᱫ ᱠᱷᱚᱱ ᱮ ᱵᱚᱞᱚ ᱜᱚᱫᱚᱜ ᱠᱟᱱᱟ᱾ ᱛᱟᱞᱟ ᱨᱟᱪᱟ ᱨᱮᱠᱚ ᱧᱟᱯᱟᱢ ᱮᱱᱟ᱾ᱫᱷᱟᱢᱟ ᱢᱟᱨᱟᱝ ᱢᱟᱹᱭ ᱠᱮ ᱵᱟᱦᱩ ᱠᱩᱲᱤ ᱞᱮᱠᱟ ᱥᱟᱡᱟᱣ ᱧᱮᱞ ᱛᱮ ᱟᱪᱠᱟ ᱜᱚᱫ ᱮᱱᱟᱭ᱾ ᱢᱟᱨᱟᱝ ᱢᱟᱹᱭ ᱠᱮ ᱠᱩᱞᱤ ᱜᱚᱫ ᱠᱮᱫᱮᱭᱟ, ᱢᱟᱨᱟᱝ ᱚᱠᱟᱛᱮ ᱱᱚᱝᱠᱟ ᱱᱟᱣᱟ ᱵᱟᱦᱩ ᱠᱩᱲᱤ ᱞᱮᱠᱟ ᱥᱟᱡᱟᱣ ᱠᱟᱛᱮ? ᱼᱮᱸᱻᱻ` ᱵᱟᱵᱟ ᱵᱟᱯᱞᱟᱜ! – ᱵᱟᱯᱞᱟᱜ? – ᱦᱚᱭ ᱵᱟ ᱵᱤᱨᱫᱟᱹᱜᱟᱲ ᱨᱮ ᱢᱟᱬᱟᱝ ᱟᱹᱰᱤ ᱫᱤᱱ ᱨᱮ ᱢᱤᱫ ᱜᱟᱭᱟᱱ ᱞᱮ ᱩᱫᱩᱜ ᱞᱮᱫᱟ ᱟᱫᱚ ᱚᱱᱟ ᱨᱮ ᱤᱧ ᱫᱚ ᱱᱟᱣᱟ ᱵᱟᱹᱦᱩ ᱣᱟᱜ ᱯᱟᱴ ᱤᱧ ᱯᱟᱴ ᱞᱮᱫ ᱛᱟᱦᱮᱸ ᱠᱟᱱᱟ ᱟᱫᱚ ᱦᱚᱞᱟ ᱜᱮ ᱠᱷᱚᱵᱚᱨ ᱠᱚ ᱵᱷᱮᱡᱟ ᱠᱮᱫᱟ ᱡᱮ ᱵᱟᱝ ᱢᱟ ᱜᱟᱯᱟ ᱟᱨ ᱦᱚᱸ ᱜᱟᱭᱟᱱ ᱩᱫᱩᱜ ᱦᱩᱭᱩᱜ ᱟ᱾ ᱚᱱᱟ ᱛᱟᱠ ᱨᱮ ᱡᱷᱟᱱᱚ ᱟᱨ ᱜᱩᱢᱤ ᱛᱤᱠᱤᱱ ᱦᱚᱸ ᱠᱤᱱ ᱚᱸᱰᱚᱠ ᱮᱱᱟ ᱾ ᱼ ᱟᱵᱤᱱ ᱫᱚ? – ᱜᱟᱣᱟᱹᱭ ᱮᱢ᱾ ᱚᱦ ᱵᱟᱵᱟ ᱟᱢ ᱦᱚᱸ ᱵᱟᱪᱮᱢ ᱴᱷᱤᱠᱟᱭᱮᱫ ᱟ᱾ ᱫᱤ ᱡᱩᱫᱤ ᱯᱟᱴ ᱠᱷᱟᱱ ᱚᱲᱟᱜ ᱦᱚᱲ ᱦᱚᱸ ᱛᱚ ᱛᱟᱦᱮᱱ ᱦᱩᱭᱩᱜ ᱟ᱾ ᱢᱟ ᱫᱤ ᱵᱤᱫᱟᱹᱭ ᱟᱹᱥᱤᱥ ᱦᱟᱛᱟᱣ ᱠᱟᱛᱮ ᱵᱟᱵᱟ ᱴᱷᱮᱱ ᱠᱷᱚᱱ ᱫᱩᱣᱟᱹᱨ ᱫᱚᱢ ᱚᱸᱰᱚᱠᱚᱜ ᱟ᱾ᱼ ᱢᱟ ᱵᱟ ᱛᱷᱩᱢᱼᱟᱹᱥᱤᱥ ᱪᱟᱞ ᱟᱧ ᱢᱮ ᱛᱮᱦᱮᱧ ᱟᱜ ᱠᱟᱹᱢᱤ ᱦᱚᱨᱟ ᱱᱟᱯᱟᱭ ᱛᱮ ᱥᱟᱹᱜᱩᱱ ᱠᱚᱜ ᱢᱟ᱾ ᱯᱷᱩᱞᱚ ᱟᱡ ᱵᱟᱵᱟ ᱠᱮ ᱜᱚᱰ ᱟᱭᱟᱭ᱾ ᱟᱡ ᱵᱟᱵᱟ ᱦᱚᱸ ᱟᱡᱟᱜ ᱵᱚᱦᱚ ᱨᱮ ᱪᱟᱯᱩ ᱠᱟᱛᱮ ᱢᱮᱱ ᱟᱭ ᱢᱟ ᱵᱤᱴᱤ ᱟᱢᱟᱜ ᱠᱟᱢᱤ ᱥᱟᱹᱜᱩᱱ ᱠᱚᱜ ᱢᱟ᱾ ᱚᱱᱟ ᱛᱟᱭᱚᱢ ᱦᱚᱨᱚ ᱵᱚᱨᱚ ᱯᱮᱱᱮ ᱦᱚᱲ ᱡᱟᱠᱮ ᱚᱲᱟᱜ ᱫᱩᱣᱟᱹᱨ ᱠᱷᱚᱱ ᱠᱚ ᱫᱟᱹᱲ ᱚᱸᱰᱚᱠᱚᱜ ᱟ᱾ ᱟᱹᱰᱤ ᱩᱥᱟᱹᱨᱟ ᱠᱚ ᱛᱟᱲᱟᱢ ᱛᱮ ᱰᱟᱦᱟᱨ ᱛᱮᱠᱚ ᱪᱟᱞᱟᱣ ᱟ ᱵᱟᱥ ᱜᱟᱹᱰᱤ ᱨᱮ ᱫᱮᱡᱚᱜ ᱞᱟᱜᱤᱫ ᱛᱮ᱾

᱑᱑ᱹ
ᱠᱩᱪᱨᱤ ᱨᱮ ᱵᱟᱯᱞᱟ ᱠᱟᱛᱮ ᱚᱲᱟᱜ ᱛᱮᱠᱚ ᱨᱩᱣᱟᱹᱲᱦᱤᱡᱩᱜ ᱟ᱾ ᱯᱷᱩᱞᱚᱼ ᱫᱮ ᱵᱟ ᱡᱟᱶᱟᱭ ᱛᱮᱞᱤᱧ ᱟᱹᱥᱤᱥ ᱮᱢᱟᱞᱤᱧ ᱵᱤᱱ᱾(ᱯᱷᱩᱞᱚ ᱟᱨ ᱩᱱᱤ ᱡᱟᱶᱟᱭ ᱠᱚᱲᱟ ᱵᱟᱱᱟᱦᱚᱲ ᱫᱷᱟᱢᱟ ᱠᱮ ᱠᱤᱱ ᱜᱚᱰ ᱟᱭᱟ᱾) ᱼ ᱪᱮᱫ ᱱᱤᱛᱚᱜ ᱦᱚᱸ ᱜᱟᱭᱟᱱ/ ᱠᱷᱮᱞᱚᱸᱰ ᱵᱟᱝ ᱢᱩᱪᱟᱹᱫ ᱟᱠᱟᱱ ᱛᱟᱹᱵᱤᱱᱟ᱾ ᱼᱵᱟᱝ ᱠᱷᱮᱞᱚᱸᱰ ᱫᱚ ᱱᱚᱣᱟ ᱵᱟᱝ ᱠᱟᱱᱟ ᱵᱟ ᱱᱚᱣᱟ ᱫᱚ ᱥᱟᱹᱨᱤᱭᱟᱜ ᱠᱟᱱᱟ᱾ ᱛᱮᱦᱮᱧ ᱟᱹᱞᱤᱧ ᱫᱚ ᱠᱩᱪᱨᱤ ᱨᱮᱞᱤᱧ ᱵᱟᱯᱞᱟ ᱮᱱᱟ᱾ ᱼ ᱫᱟᱫᱟ, ᱦᱚᱲ ᱢᱟᱱᱼᱥᱚᱢᱢᱟᱱ ᱮᱢ ᱮᱢᱟᱠᱚᱣᱟ ᱛᱚᱵᱮ ᱟᱢ ᱦᱚᱸ ᱢᱟᱱᱼᱥᱚᱢᱢᱟᱱ ᱮᱢ ᱧᱟᱢᱟ᱾ ᱥᱟᱱᱟᱢ ᱫᱚ ᱠᱤᱥᱟᱺᱬ ᱵᱟᱝ ᱠᱚ ᱦᱩᱭ ᱫᱟᱲᱮᱭᱟᱜ ᱟ᱾ ᱠᱤᱥᱟᱺᱬ ᱥᱟᱶ ᱜᱮ ᱯᱮᱲᱟᱜ ᱮᱢ ᱩᱭᱦᱟᱹᱨ ᱠᱷᱟᱱ ᱚᱠᱟ ᱨᱮᱢ ᱧᱟᱢ ᱠᱚᱣᱟ ᱠᱤᱥᱟᱺᱬ, ᱫᱷᱟᱹᱨᱛᱤ ᱨᱮ ᱠᱟᱹᱴᱩᱵ ᱨᱮᱢ ᱞᱮᱠᱷᱟ ᱫᱟᱲᱮᱭᱟᱠᱚᱣᱟ᱾ ᱨᱮᱸᱜᱮᱡ ᱦᱚᱲ ᱜᱮ ᱫᱷᱟᱹᱨᱛᱤ ᱨᱮ ᱵᱟᱹᱲᱛᱤ ᱢᱮᱱᱟᱜ ᱠᱚᱣᱟ᱾ ᱛᱮᱦᱮᱧ ᱩᱱᱠᱩ ᱠᱚ ᱨᱮᱜᱮᱡ ᱟ, ᱜᱟᱯᱟ ᱦᱩᱭ ᱫᱟᱲᱮᱭᱟᱜ ᱩᱱᱠᱩ ᱠᱚ ᱠᱤᱥᱟᱺᱬᱚᱜᱼᱟ, ᱟᱨ ᱠᱤᱥᱟᱺᱬ ᱠᱚ ᱨᱮᱸᱜᱮᱡ ᱫᱟᱲᱮᱭᱟᱜ ᱟ᱾ ᱫᱟᱫᱟ ᱛᱤᱥᱦᱚᱸ ᱵᱟᱝ ᱜᱚᱨᱚᱵᱽ ᱫᱚᱨᱠᱟᱨ᱾ ᱨᱮᱸᱜᱮᱡ ᱚᱨᱮᱡ ᱠᱚ ᱛᱤᱭᱟᱜ ᱨᱟᱠᱟᱵ ᱦᱩᱭᱩᱜᱼᱟ᱾ ᱛᱚᱵᱮ ᱮᱱᱟᱝ ᱢᱤᱫ ᱫᱤᱱ ᱵᱚ ᱥᱚᱢᱟᱱ ᱪᱮ ᱵᱟᱨᱟᱼᱵᱟᱹᱨᱤ ᱫᱟᱲᱮᱭᱟᱜ ᱟ, ᱨᱮᱸᱜᱮᱡ ᱠᱤᱥᱟᱺᱬ ᱛᱟᱞᱟ ᱨᱮ ᱢᱮᱱᱟᱜ ᱚᱱᱟ ᱵᱷᱮᱜᱮᱫ ᱰᱚᱰᱦᱟᱜ ᱠᱤᱥᱟᱺᱬ ᱠᱚᱜᱮ ᱞᱟᱦᱟ ᱠᱟᱛᱮ ᱵᱷᱟᱛᱟᱣ ᱦᱩᱭᱩᱜᱼᱟ ᱾ ᱼ ᱥᱟᱹᱨᱤ ᱠᱟᱛᱷᱟᱢ ᱩᱭᱦᱟᱹᱨᱟᱫ ᱫᱤᱧᱟ, ᱢᱟᱥᱮ ᱟᱢᱟᱜ ᱡᱤᱭᱚᱱ ᱦᱚᱸ ᱤᱧᱜᱤᱧ ᱧᱩᱛᱟᱹᱛ ᱟᱠᱟᱫᱼᱟ᱾ ᱤᱠᱟ ᱠᱟᱹᱧᱼᱟᱢ ᱜᱩᱢᱤ ᱢᱟᱹᱭ᱾ ᱫᱟᱫᱟ ᱟᱢ ᱦᱚᱯᱚᱱ ᱞᱟᱹᱜᱤᱫ ᱦᱚᱸ ᱯᱮᱲᱟ ᱠᱚ ᱦᱤᱡᱩᱜ ᱠᱷᱟᱱ ᱪᱟᱹᱥᱤ ᱠᱤᱥᱟᱺᱬ ᱫᱚ ᱟᱞᱚᱢ ᱧᱮᱞᱟ ᱩᱱᱠᱩᱣᱟᱜ ᱜᱩᱱ ᱟᱨ ᱵᱮᱵᱷᱟᱨ ᱧᱮᱞ ᱠᱟᱛᱮᱢ ᱯᱮᱲᱟᱜᱼᱟ᱾ ᱼᱦᱚᱭ ᱢᱟᱹᱭ᱾ ᱢᱟ ᱱᱩᱠᱤᱱ ᱡᱟᱸᱜᱟ ᱫᱟᱜ ᱠᱚ ᱮᱢᱟ ᱠᱤᱱ ᱢᱮ, ᱚᱠᱟ ᱫᱩᱣᱟᱹᱨ ᱨᱮᱢ ᱛᱤᱸᱜᱩ ᱠᱮᱴᱠᱮᱴᱮ ᱟᱠᱟᱱᱟ᱾ ᱥᱟᱱᱟᱢ ᱦᱚᱲ ᱠᱚ ᱞᱟᱸᱫᱟ ᱠᱮᱫᱼᱟ᱾ ᱫᱷᱟᱢᱟ ᱵᱟᱱᱟ ᱦᱚᱲ ᱯᱷᱩᱞᱚ ᱟᱨ ᱡᱟᱶᱟᱭ ᱠᱚᱲᱟ ᱠᱤᱱ ᱛᱤᱭᱟᱹᱜ ᱤᱫᱤ ᱠᱤᱱᱟᱭ ᱚᱲᱟᱜ ᱫᱩᱣᱟᱹᱨ ᱛᱮ᱾

***