ᱚᱞ ᱜᱩᱨᱩ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ, ᱯᱟᱹᱨᱥᱤ ᱥᱤᱧ ᱪᱟᱸᱫᱚ, ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ, ᱜᱩᱨᱩ ᱜᱚᱢᱠᱮ ᱟᱨ ᱦᱚᱸ ᱮᱢᱟᱱ ᱮᱢᱟᱱ ᱥᱚᱨᱮᱥ ᱜᱩᱱᱢᱟᱹᱱ ᱧᱩᱛᱩᱢ ᱨᱮᱱᱟᱜ ᱪᱷᱟᱹᱴᱭᱟᱹᱨ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱪᱤᱠᱤ ᱟᱨ ᱯᱟᱹᱨᱥᱤ ᱫᱚ ᱜᱩᱨᱩ ᱜᱚᱢᱠᱮ ᱵᱮᱜᱚᱨ ᱚᱯᱩᱨᱩᱱ ᱜᱮᱭᱟ ᱾ ᱜᱩᱨᱩ ᱜᱚᱢᱠᱮ ᱟᱨ ᱚᱞ ᱪᱤᱠᱤ ᱫᱚ ᱢᱤᱫᱴᱟᱹᱝ ᱟᱨ ᱢᱤᱫᱴᱟᱹᱝ ᱵᱮᱜᱚᱨ ᱯᱩᱨᱩᱱ ᱜᱮ ᱵᱟᱝ ᱢᱮᱱᱚᱜᱼᱟ ᱾
ᱱᱚᱶᱟ ᱫᱷᱟᱨᱛᱤ ᱯᱩᱨᱤ ᱨᱮ ᱥᱤᱨᱡᱚᱱ ᱟᱠᱟᱱ, ᱜᱚᱲᱦᱚᱱ ᱟᱠᱟᱱ ᱡᱚᱛᱚ ᱡᱟᱹᱛᱤ, ᱯᱟᱹᱨᱥᱤ ᱨᱮᱱᱟᱜ ᱜᱮ ᱟᱯᱟᱱ ᱟᱹᱯᱤᱱ ᱟᱜ ᱩᱯᱨᱩᱢ ᱞᱟᱹᱜᱤᱫ ᱫᱚ ᱟᱡᱟᱜ ᱨᱩᱯ ᱛᱟᱦᱮᱸᱱ ᱜᱮᱭᱟ ᱾ ᱟᱨ ᱢᱤᱫ ᱡᱟᱹᱛᱤ ᱯᱟᱹᱨᱥᱤ ᱨᱮᱱᱟᱜ ᱟᱡᱟᱜ ᱨᱩᱯ ᱢᱚᱦᱚᱸᱨ ᱛᱟᱦᱮᱸ ᱞᱮᱱ ᱮᱱᱟᱝ ᱜᱮ ᱡᱮᱜᱮᱛ ᱨᱮ ᱢᱤᱫ ᱥᱚᱨᱮᱥ ᱩᱯᱨᱩᱢ ᱮ ᱧᱟᱢᱟ ᱾ ᱟᱨ ᱡᱟᱦᱟᱸ ᱡᱟᱹᱛᱤ ᱯᱟᱹᱨᱥᱤ ᱨᱮᱱᱟᱜ ᱨᱩᱯ ᱢᱚᱦᱚᱸᱨ ᱵᱟᱝ ᱛᱟᱦᱮᱸᱱᱟ, ᱚᱱᱟ ᱡᱟᱹᱛᱤ ᱟᱨ ᱯᱟᱹᱨᱥᱤ ᱫᱚ ᱵᱟᱹᱭ ᱵᱟᱹᱭ ᱛᱮ ᱢᱟᱞᱚᱴᱚᱜ ᱦᱚᱨ ᱥᱮᱫ ᱢᱚᱦᱰᱟᱜᱼᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱦᱟᱞᱟᱛ ᱦᱚᱸ ᱱᱚᱝᱠᱟ ᱜᱮ ᱛᱟᱦᱮᱸ ᱠᱟᱱᱟ ᱾ ᱟᱡᱟᱜ ᱩᱯᱨᱩᱢᱚᱜ ᱨᱮᱱᱟᱜ, ᱮᱴᱟᱜ ᱥᱟᱢᱟᱝ ᱨᱮ ᱯᱚᱨᱢᱟᱬ ᱮᱢᱚᱜ ᱞᱟᱹᱜᱤᱫ ᱨᱩᱯ ᱢᱚᱦᱚᱸᱨ ᱨᱮᱱᱟᱜ ᱟᱱᱟᱴ ᱛᱟᱦᱮᱸ ᱠᱟᱱ ᱠᱷᱟᱹᱛᱤᱨ, ᱵᱟᱹᱭ ᱵᱟᱹᱭ ᱛᱮ ᱢᱟᱞᱚᱴᱚᱜ ᱦᱚᱨ ᱥᱮᱫ ᱢᱚᱦᱰᱟ ᱞᱮᱱᱟ ᱾ ᱤᱠᱷᱟᱹᱱ ᱡᱟᱦᱟᱸ ᱡᱤᱱᱤᱥ ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱟᱭᱡᱩᱜᱽ ᱡᱤᱣᱤᱫᱚᱜ ᱨᱮᱱᱟᱜ ᱛᱟᱦᱮᱸᱱᱟ, ᱚᱱᱟ ᱫᱚ ᱚᱦᱚ ᱜᱮ ᱢᱟᱞᱚᱴ ᱠᱚᱜᱼᱟ ᱾ ᱚᱱᱟ ᱚᱞ ᱛᱚᱞ ᱠᱟᱛᱮ ᱡᱟᱭᱡᱩᱜᱽ ᱡᱤᱭᱟᱹᱲ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱛᱮ ᱵᱚᱸᱜᱟ ᱵᱳᱨᱳ ᱢᱤᱫ ᱢᱟᱹᱱᱢᱤ ᱨᱩᱯᱨᱮ ᱚᱯᱮᱞᱚᱜ ᱛᱮᱜᱮ ᱦᱩᱭ ᱟᱠᱟᱣᱟᱜ ᱠᱚᱣᱟ ᱾ ᱴᱷᱤᱠ ᱱᱚᱝᱠᱟ ᱜᱮ ᱥᱟᱱᱛᱟᱲ ᱥᱟᱶᱛᱟ ᱢᱟᱞᱚᱴᱚᱜ ᱠᱷᱚᱱ ᱚᱣᱟᱨ ᱞᱟᱹᱜᱤᱫ ᱜᱮ ᱜᱩᱨᱩ ᱜᱚᱢᱠᱮ ᱫᱚ ᱢᱤᱫ ᱵᱚᱸᱜᱟ ᱫᱟᱲᱮ ᱜᱮ ᱢᱟᱹᱱᱢᱤ ᱨᱩᱯ ᱨᱮ ᱚᱯᱮᱞᱚᱜ ᱦᱩᱭ ᱟᱫᱮ ᱛᱟᱦᱮᱸᱫ ᱢᱮᱱᱛᱮ ᱥᱟᱱᱟᱢ ᱠᱚᱣᱟᱜ ᱢᱚᱱᱮᱨᱮ ᱜᱟᱹᱦᱤᱸᱨ ᱯᱟᱹᱛᱭᱟᱹᱣ ᱢᱮᱱᱟᱜ ᱛᱟᱵᱚᱱᱟ ᱾
ᱚᱱᱟᱛᱮ ᱡᱟᱱᱟᱢ ᱛᱟᱨᱟ ᱠᱷᱚᱱ ᱜᱮ ᱡᱟᱹᱛᱤ ᱥᱟᱶᱛᱟ ᱞᱟᱹᱜᱤᱫ, ᱯᱟᱹᱨᱥᱤ ᱯᱮᱨᱮᱡ ᱩᱢᱟᱹᱬ ᱞᱟᱹᱜᱤᱫ ᱜᱩᱨᱩ ᱜᱚᱢᱠᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱟᱜ ᱢᱚᱱᱮ ᱡᱤᱣᱤ ᱫᱚᱭ ᱨᱟᱜ ᱦᱚᱢᱚᱸᱨ ᱞᱮᱫᱼᱟ ᱾ ᱤᱛᱩᱱ ᱟᱥᱲᱟ ᱨᱮ ᱡᱟᱱᱟᱢ ᱯᱟᱹᱨᱥᱤ ᱛᱮ, ᱡᱟᱱᱟᱢ ᱚᱞ, ᱟᱲᱟᱝ ᱛᱮ ᱚᱞ ᱨᱚᱲ ᱵᱟᱝ ᱦᱩᱭᱩᱜ ᱠᱟᱱ ᱧᱮᱞᱛᱮ ᱮᱴᱟᱜ ᱯᱟᱹᱨᱥᱤ ᱞᱤᱯᱤ ᱛᱮᱦᱚᱸ ᱵᱟᱝ ᱜᱮ ᱚᱞ ᱯᱟᱲᱦᱟᱣ ᱥᱟᱱᱟ ᱞᱮᱫᱮᱭᱟ ᱾ ᱜᱤᱫᱽᱨᱟᱹ ᱢᱚᱱᱮᱨᱮ ᱨᱮᱦᱬᱟ ᱟᱨ ᱡᱤᱫᱽ ᱡᱮ “ᱤᱧ ᱫᱚ ᱡᱟᱦᱟᱸᱨᱮ ᱤᱧᱟᱜ ᱯᱟᱹᱨᱥᱤ ᱞᱤᱯᱤ ᱛᱮ ᱚᱞ ᱯᱟᱲᱦᱟᱣ ᱵᱟᱝ ᱦᱩᱭᱩᱜ ᱠᱟᱱᱟ, ᱚᱸᱰᱮ ᱫᱚ ᱚᱞᱚᱜ ᱦᱚᱸ ᱵᱟᱹᱧ ᱥᱮᱱᱚᱜᱼᱟ ᱾” ᱤᱠᱷᱟᱹᱱ ᱜᱩᱨᱩ ᱜᱩᱢᱠᱮᱭᱟᱜ ᱜᱤᱫᱽᱨᱟᱹ ᱢᱚᱱᱮ ᱵᱷᱩᱞᱟᱹᱣ ᱞᱟᱹᱜᱤᱫ ᱜᱮ ᱵᱟᱵᱟ ᱥᱤᱫᱚ ᱢᱩᱨᱢᱩ ᱫᱚᱭ ᱢᱮᱱ ᱞᱮᱫᱼᱟ, ᱮᱴᱟᱜ ᱯᱟᱹᱨᱥᱤ ᱛᱮ ᱚᱞᱼᱚᱞ ᱛᱮᱜᱮ ᱟᱵᱚᱣᱟᱜ ᱯᱟᱹᱨᱥᱤ ᱞᱤᱯᱤ ᱦᱚᱸᱢ ᱚᱞ ᱧᱟᱢᱟ ᱢᱮᱱᱛᱮ ᱾ ᱵᱟᱵᱟᱦᱟᱜ ᱟᱸᱫᱮ ᱟᱸᱜᱚᱪ ᱠᱟᱛᱮ ᱜᱩᱨᱩ ᱜᱚᱢᱠᱮ ᱫᱚ ᱤᱛᱩᱱ ᱟᱥᱲᱟᱭ ᱢᱚᱦᱰᱟ ᱮᱱᱟ ᱾ ᱤᱠᱷᱟᱹᱱ ᱚᱞᱼᱚᱞ ᱛᱮᱜᱮ ᱤᱧᱟᱜ ᱡᱟᱱᱟᱢ ᱯᱟᱹᱨᱥᱤ ᱨᱮᱱᱟᱜ ᱞᱤᱯᱤ ᱦᱚᱸᱧ ᱚᱞ ᱧᱟᱢᱟ ᱦᱩᱫᱤᱥ ᱠᱟᱛᱮ ᱜᱮ ᱚᱞᱚᱜ ᱛᱩᱞᱩᱡ ᱜᱮ ᱡᱟᱱᱟᱢ ᱯᱟᱹᱨᱥᱤ ᱨᱮᱱᱟᱜ ᱚᱞ ᱫᱚ ᱜᱚᱲᱦᱚᱱ ᱞᱟᱹᱜᱤᱫ ᱮ ᱠᱩᱨᱩᱢᱩᱴᱩ ᱞᱮᱫᱼᱟ ᱾ ᱫᱷᱟᱹᱨᱛᱤ ᱫᱷᱩᱲᱤ ᱨᱮ ᱜᱟᱨ ᱠᱟᱛᱮ, ᱠᱟᱰᱮᱡ ᱠᱚᱛᱮ ᱴᱮᱥᱟ ᱴᱟᱥᱟᱣ ᱠᱟᱛᱮ ᱥᱟᱱᱛᱟᱲ ᱟᱲᱟᱝ ᱨᱮᱱᱟᱜ ᱢᱤᱼᱢᱤᱫᱴᱟᱹᱝ ᱢᱮᱱᱮᱛᱟᱱ ᱟᱹᱲᱟᱹ ᱚᱞ ᱯᱩᱥᱴᱟᱹᱣᱜ ᱞᱮᱠᱟᱱᱟᱜ ᱚᱞ ᱠᱚᱭ ᱜᱚᱲᱦᱚᱱ ᱥᱟᱹᱛ ᱠᱮᱫᱼᱟ ᱾
ᱟᱡᱟᱜ ᱵᱚᱨᱚᱥ ᱨᱮᱱᱟᱜ ᱥᱩᱢᱩᱝ ᱒᱐ ᱵᱚᱪᱷᱚᱨ ᱨᱮ ᱢᱤᱫ ᱡᱟᱹᱛᱤ ᱨᱮᱱᱟᱜ, ᱢᱤᱫ ᱯᱟᱹᱨᱥᱤ ᱨᱮᱱᱟᱜ ᱨᱩᱯ ᱮ ᱜᱚᱲᱦᱚᱱ ᱯᱩᱨᱟᱹᱣ ᱟᱠᱟᱫ ᱛᱟᱦᱮᱸᱫ ᱾ ᱱᱤᱛᱚᱜ ᱡᱩᱜᱽ ᱨᱤᱱ ᱜᱤᱫᱽᱨᱟᱹ ᱫᱚ ᱒᱐ ᱵᱚᱪᱷᱚᱨ ᱛᱮᱫᱚ ᱰᱟᱸᱰᱟ ᱯᱟᱴᱷᱮ ᱜᱮ ᱵᱟᱠᱚ ᱠᱮᱴᱮᱡ ᱫᱟᱲᱮᱭᱟᱜ ᱠᱟᱱᱟ ᱾ ᱱᱚᱝᱠᱟᱱ ᱵᱮᱲᱟᱨᱮ ᱜᱩᱨᱩ ᱜᱚᱢᱠᱮ ᱫᱚ ᱢᱤᱫ ᱡᱟᱹᱛᱤ ᱯᱟᱹᱨᱥᱤ ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱟᱭᱡᱩᱜᱽ ᱡᱤᱭᱟᱹᱲ ᱫᱚᱦᱚᱭ ᱞᱟᱹᱜᱤᱫ ᱢᱤᱫ ᱨᱩᱯ ᱢᱚᱦᱚᱸᱨ ᱚᱞ ᱮ ᱜᱚᱲᱦᱚᱱ ᱥᱟᱹᱛ ᱞᱮᱫᱼᱟ ᱾ ᱜᱚᱲᱦᱚᱱ ᱥᱩᱢᱩᱝ ᱦᱚᱸ ᱵᱟᱝᱟ, ᱫᱤᱥᱚᱢ ᱦᱚᱲ ᱴᱷᱮᱱ ᱪᱷᱟᱨᱟᱣ ᱞᱟᱹᱜᱤᱫ, ᱯᱟᱥᱱᱟᱣ ᱞᱟᱹᱜᱤᱫ ᱥᱟᱦᱟᱥ ᱦᱚᱸ ᱥᱟᱢᱟᱝ ᱠᱟᱛᱮ ᱱᱚᱶᱟ ᱨᱮᱦᱚᱸᱭ ᱡᱤᱛᱠᱟᱹᱨ ᱞᱮᱱᱟ ᱾
ᱜᱩᱨᱩ ᱜᱚᱢᱠᱮᱭᱟᱜ ᱱᱚᱝᱠᱟᱱ ᱚᱦᱚᱣᱟᱱ ᱥᱟᱦᱟᱥ ᱠᱷᱟᱹᱛᱤᱨ ᱛᱮᱦᱮᱧ ᱥᱟᱱᱛᱟᱲ ᱥᱟᱶᱛᱟ ᱢᱟᱞᱚᱴᱚᱜ ᱠᱷᱚᱱ ᱫᱩᱜ ᱵᱟᱧᱪᱟᱣ ᱟᱠᱟᱱᱟ ᱾ ᱱᱤᱛᱚᱜ ᱨᱤᱱ ᱡᱩᱣᱟᱹᱱ ᱠᱚ ᱛᱟᱞᱟᱨᱮ ᱜᱩᱨᱩ ᱜᱚᱢᱠᱮᱭᱟᱜ ᱱᱚᱝᱠᱟᱱ ᱠᱩᱨᱩᱢᱩᱴᱩ ᱨᱮᱱᱟᱜ ᱥᱚᱨᱮᱥ ᱚᱨᱥᱚᱝ ᱟᱹᱰᱤ ᱜᱟᱹᱦᱤᱸᱨ ᱛᱮ ᱛᱮᱨᱟᱝ ᱥᱮᱴᱮᱨ ᱟᱠᱟᱣᱟᱫ ᱠᱚᱣᱟ ᱾ ᱯᱟᱹᱨᱥᱤ ᱫᱚ ᱵᱟᱧᱪᱟᱣ ᱢᱮ ᱟᱢᱟᱜ ᱞᱤᱯᱤ ᱛᱮ, ᱥᱟᱶᱛᱟ ᱨᱮᱱᱟᱜ ᱞᱟᱹᱭ ᱞᱟᱠᱪᱟᱨ ᱫᱚ ᱚᱞᱼᱛᱚᱞ ᱫᱚᱦᱚᱭ ᱢᱮ ᱟᱯᱚᱱᱟᱜ ᱯᱟᱹᱨᱥᱤ, ᱟᱯᱚᱱᱟᱜ ᱚᱞ, ᱟᱲᱟᱝ ᱛᱮ, ᱮᱱ ᱮᱱᱟᱝ ᱟᱢᱟᱜ ᱥᱟᱹᱨᱤ ᱩᱯᱨᱩᱢ ᱫᱚ ᱡᱮᱜᱮᱛ ᱨᱮ ᱡᱷᱟᱞᱠᱟᱣ ᱨᱟᱠᱟᱵᱼᱟ, ᱱᱚᱶᱟ ᱨᱮᱱᱟᱜ ᱜᱟᱹᱦᱤᱸᱨ ᱩᱭᱦᱟᱹᱨ ᱫᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱱᱤᱛᱚᱜ ᱨᱤᱱ ᱡᱩᱣᱟᱹᱱ ᱠᱚ ᱪᱮᱛᱟᱱ ᱨᱮ ᱫᱟᱹᱨᱭᱟᱹ ᱡᱷᱚᱞᱚᱠ ᱡᱷᱟᱞᱠᱟᱣ ᱨᱟᱠᱟᱵ ᱠᱟᱱᱟ ᱾ ᱱᱚᱶᱟ ᱠᱷᱚᱱ ᱜᱮ ᱵᱷᱟᱹᱜᱤ ᱥᱟᱹᱦᱤᱸᱡ ᱛᱮᱵᱟᱜ ᱧᱟᱢᱚᱜᱼᱟ, ᱚᱠᱟ ᱠᱟᱹᱢᱤ ᱨᱮᱱᱟᱜ ᱠᱩᱨᱩᱢᱩᱴᱩ ᱦᱚᱸ ᱵᱮᱨᱛᱷᱟ ᱫᱚ ᱛᱤᱥ ᱦᱚᱸ ᱵᱟᱝ ᱪᱟᱞᱟᱜᱼᱟ ᱾ ᱚᱠᱛᱚ ᱞᱟᱜᱟᱣᱜᱼᱟ ᱤᱠᱷᱟᱹᱱ ᱫᱚᱲᱦᱚ ᱠᱩᱨᱩᱢᱩᱴᱩ ᱨᱮᱱᱟᱜ ᱡᱤᱛᱠᱟᱹᱨ ᱫᱚ ᱱᱤᱛ ᱵᱟᱝ ᱫᱷᱤᱱᱟᱹᱝ ᱴᱷᱟᱹᱣᱠᱟᱹ ᱜᱮᱭᱟ ᱾
ᱱᱚᱶᱟ ᱠᱚᱨᱮ ᱠᱷᱚᱱ ᱟᱵᱚ ᱠᱚᱦᱚᱸ ᱟᱹᱰᱤ ᱵᱷᱟᱹᱜᱤ ᱥᱮᱪᱮᱫ ᱟᱢᱮᱴ ᱡᱚᱝ ᱨᱮᱱᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ, ᱡᱚᱛᱚ ᱜᱮ ᱵᱚ ᱢᱟᱹᱱᱢᱤ ᱠᱟᱱᱟ, ᱤᱠᱷᱟᱹᱱ ᱢᱟᱹᱱᱢᱤ ᱠᱟᱱ ᱨᱮᱦᱚᱸ ᱵᱚ ᱟᱵᱚ ᱴᱷᱮᱱ ᱦᱚᱸ ᱢᱤᱼᱢᱤᱫ ᱞᱮᱠᱟᱱ ᱵᱚᱸᱜᱟ ᱫᱟᱲᱮ ᱪᱮ ᱵᱚᱸᱜᱟ ᱵᱳᱨᱳ ᱠᱚᱣᱟᱜ ᱛᱷᱩᱢ ᱫᱚ ᱢᱮᱱᱟᱜ ᱜᱮᱭᱟ ᱾ ᱡᱟᱦᱟᱸ ᱠᱟᱹᱢᱤ ᱥᱟᱶᱛᱟ, ᱜᱟᱶᱛᱟ ᱨᱮᱱᱟᱜ ᱱᱟᱯᱟᱭ ᱚᱨᱡᱚ ᱞᱟᱹᱜᱤᱫ ᱵᱚ ᱠᱩᱨᱩᱢᱩᱴᱩᱭᱟ, ᱚᱱᱟ ᱨᱮᱱᱟᱜ ᱥᱟᱹᱨᱤ ᱡᱤᱛᱠᱟᱹᱨ ᱟᱢᱮᱴ ᱞᱟᱹᱜᱤᱫ ᱚᱱᱟ ᱚᱠᱛᱚ ᱫᱚ ᱢᱤᱫ ᱫᱤᱱ ᱵᱟᱝ ᱢᱤᱫ ᱫᱤᱱ ᱥᱮᱴᱮᱨᱚᱜ ᱛᱮᱜᱮ ᱦᱩᱭ ᱟᱭᱟ ᱾
***