ᱡᱩᱨᱤ ᱯᱟᱹᱨᱤᱭᱟᱜ ᱫᱩᱞᱟᱹᱲ ᱥᱟᱹᱜᱟᱹᱭ,
ᱦᱩᱰᱤᱧ ᱜᱷᱟᱨᱚᱸᱡᱽ ᱨᱮ ᱛᱟᱦᱮᱸ ᱱᱟᱥᱩᱞᱩᱜ ᱱᱤᱨᱟᱹᱭ᱾
ᱡᱩᱫᱤ ᱥᱟᱹᱨᱤᱢ ᱢᱮᱱᱮᱜ ᱠᱟᱱ ᱠᱷᱟᱱ ᱟᱢᱟᱜ ᱠᱤᱨᱭᱟᱹ,
ᱪᱮᱠᱟ ᱠᱚᱣᱟᱢ ᱨᱟᱪᱟ ᱯᱮᱨᱮᱡ ᱫᱤᱯᱤᱞ ᱵᱷᱟᱹᱨᱤᱭᱟᱹ᱾
ᱫᱚᱦᱚ ᱞᱤᱠᱤᱱᱨᱮᱢ ᱵᱟᱨᱭᱟ,
ᱥᱩᱠᱛᱮᱢ ᱯᱟᱨᱚᱢ ᱡᱤᱭᱚᱱ ᱫᱚᱨᱤᱭᱟ᱾
ᱩᱱᱠᱤᱱ ᱜᱮ ᱪᱟᱸᱫᱳ ᱩᱱᱠᱤᱱ ᱜᱮ ᱤᱯᱤᱞ,
ᱩᱱᱠᱤᱱ ᱜᱮ ᱵᱷᱟᱹᱨᱤᱭᱟᱹ ᱩᱱᱠᱤᱱ ᱜᱮ ᱫᱤᱯᱤᱞ᱾
ᱯᱟᱹᱦᱤᱞ ᱟᱨ ᱫᱚᱥᱚᱨ ᱨᱮ ᱡᱮᱢᱚᱱ ᱛᱚᱯᱷᱟ ᱫᱚᱜ,
ᱟᱨ ᱛᱮᱥᱟᱨ ᱫᱚ ᱟᱞᱚᱢ ᱥᱟᱫᱚᱜ᱾
ᱵᱟᱝ ᱵᱮᱥᱟ ᱜᱤᱫᱽᱨᱟᱹ ᱛᱮ ᱠᱤᱥᱟᱹᱬᱚᱜ,
ᱱᱟᱞᱦᱟ ᱟᱹᱜᱩᱭ ᱨᱮᱦᱚᱸᱢ ᱵᱟᱨ ᱫᱤᱱ ᱨᱮ ᱩᱡᱟᱹᱲᱚᱜ᱾
ᱥᱮᱸᱬᱟ ᱜᱷᱟᱨᱚᱹᱡᱽ ᱨᱮ ᱫᱚ ᱵᱟᱹᱱᱩᱜ ᱥᱟᱦᱟᱨ,
ᱨᱟᱜ ᱨᱚᱫᱚᱱ ᱛᱮᱠᱚ ᱟᱹᱲᱟᱢ ᱦᱟᱡᱟᱨ᱾
ᱚᱲᱟᱜ ᱨᱮ ᱵᱟᱹᱱᱩᱜ ᱯᱟᱹᱭ-ᱯᱟᱹᱭᱞᱟᱹ,
ᱚᱠᱟᱨᱮᱢ ᱧᱟᱢᱟᱠᱳ ᱦᱟᱹᱛᱤ,ᱥᱟᱫᱚᱢ ᱟᱨ ᱯᱩᱛᱞᱟᱹ᱾
ᱥᱟᱱᱟᱢ ᱵᱚᱡᱷᱟ ᱛᱟᱦᱮᱸᱱᱟ ᱟᱢᱟᱜ ᱛᱟᱨᱮᱱᱨᱮ,
ᱟᱢᱫᱚᱢ ᱩᱱᱩᱢᱚᱜ ᱨᱤᱱᱨᱮ᱾
ᱥᱮᱸᱬᱟᱜ ᱨᱮᱭᱟᱜ ᱢᱤᱫᱴᱮᱱ ᱜᱮ ᱩᱯᱟᱹᱭ,
ᱦᱩᱰᱤᱧ ᱜᱷᱟᱨᱚᱸᱡᱽ ᱨᱮ ᱢᱮᱱᱟᱜ ᱵᱟᱹᱨᱯᱷᱟᱹᱭ᱾
ᱜᱤᱫᱽᱨᱟᱹ ᱫᱚ ᱠᱚᱲᱟ ᱪᱟᱦᱮ ᱠᱩᱲᱤ
ᱟᱞᱚᱢ ᱫᱚᱦᱚ ᱠᱤᱱ ᱟᱹᱠᱤᱞᱛᱮ ᱟᱹᱡᱟᱹᱣᱲᱤ᱾
ᱡᱩᱨᱤ ᱯᱟᱹᱨᱤᱭᱟᱜ ᱢᱚᱱᱮ ᱪᱮᱨᱮᱡ ᱞᱚᱠᱟ,
ᱚᱱᱛᱚᱨ ᱠᱷᱚᱱ ᱞᱤᱸᱜᱤᱫᱚᱜ ᱨᱟᱹᱥᱠᱟᱹ ᱰᱟᱹᱰᱤ ᱞᱮᱠᱟ᱾
ᱩᱱᱠᱤᱱᱜᱮ ᱨᱩᱯᱟᱹ ᱩᱱᱠᱤᱱ ᱜᱮ ᱥᱚᱱᱟ,
ᱩᱱᱠᱤᱱ ᱜᱮ ᱜᱷᱟᱨᱚᱸᱡᱽ ᱠᱤᱱ ᱥᱚᱦᱟᱱᱟ᱾
***
