ᱜᱩᱨᱩ ᱜᱚᱢᱠᱮ ᱫᱚ ᱤᱧ ᱞᱟᱹᱜᱤᱫ ᱵᱚᱸᱜᱟ ᱠᱟᱱᱟᱭ, ᱜᱚᱥᱟᱸᱭ ᱠᱟᱱᱟᱭ, ᱜᱩᱨᱩ ᱜᱚᱥᱟᱸᱭ ᱠᱟᱱᱟᱭ; ᱚᱱᱟᱛᱮ ᱩᱱᱤ ᱫᱚ ᱥᱮᱛᱟᱜ ᱟᱹᱭᱩᱵ ᱤᱧ ᱫᱷᱩᱬᱟᱹ ᱫᱷᱩᱯ ᱟᱭᱟ ᱾ ᱦᱚᱨᱛᱮ ᱥᱮᱱᱚᱜ ᱡᱷᱚᱜ ᱡᱟᱦᱮᱨ ᱛᱷᱟᱱ ᱠᱚᱸᱧ ᱧᱮᱞ ᱧᱟᱢ ᱡᱷᱚᱜ ᱤᱧ ᱡᱚᱲ ᱛᱤ ᱟᱛᱮᱧ ᱡᱚᱦᱟᱨ ᱞᱮᱠᱟ ᱜᱩᱨᱩ ᱜᱚᱢᱠᱮ ᱭᱟᱜ ᱢᱩᱴᱷᱟᱹᱱ ᱦᱚᱸᱧ ᱧᱮᱞ ᱧᱟᱢ ᱠᱷᱟᱱ ᱫᱚᱸᱧ ᱡᱚᱦᱟᱨ ᱜᱮᱭᱟ ᱾ ᱱᱚᱶᱟ ᱠᱟᱛᱟᱷᱟ ᱫᱚ ᱤᱧ ᱥᱩᱢᱩᱝᱟᱜ ᱫᱚ ᱵᱟᱝ ᱠᱟᱱᱟ, ᱟᱯᱮ ᱵᱷᱤᱛᱨᱤ ᱠᱷᱚᱱᱟᱜ ᱟᱹᱰᱤ ᱦᱚᱲ ᱜᱮ ᱜᱩᱨᱩ ᱜᱚᱢᱠᱮ ᱫᱚ ᱵᱚᱸᱜᱟ ᱞᱮᱠᱟ ᱜᱮᱯᱮ ᱢᱟᱱᱟᱣ ᱮᱭᱟ ᱾ ᱦᱚᱭ, ᱩᱱᱤ ᱫᱚᱭ ᱵᱚᱸᱜᱟ ᱠᱟᱱ ᱜᱮᱭᱟ; ᱵᱚᱸᱜᱟ ᱜᱮ ᱢᱟᱹᱱᱢᱤ ᱨᱩᱯ ᱛᱮ ᱡᱟᱱᱟᱢ ᱞᱮᱱᱟᱭ ᱥᱟᱱᱛᱟᱲ ᱡᱟᱹᱛᱤ ᱫᱩᱜ ᱫᱚᱦᱚᱭ ᱞᱟᱹᱜᱤᱫ ᱾ ᱟᱡᱟᱜ ᱡᱟᱱᱟᱢ ᱛᱟᱭᱚᱢ ᱜᱮ ᱥᱟᱱᱛᱟᱲ ᱡᱟᱹᱛᱤ ᱢᱤᱫᱴᱟᱝ ᱡᱟᱹᱛᱤ ᱞᱮᱠᱟ ᱧᱮᱞ ᱮᱱᱟ ᱟᱨ ᱥᱟᱱᱛᱟᱲ ᱡᱟᱹᱛᱤ ᱢᱤᱫ ᱱᱟᱶᱟ ᱰᱟᱦᱟᱨ ᱛᱮ ᱛᱟᱲᱟᱢ ᱮ ᱮᱦᱚᱵ ᱠᱮᱜ-ᱟ ᱾ ᱤᱧᱟᱜ ᱢᱤᱫᱴᱟᱝ ᱟᱹᱭᱠᱟᱹᱣ ᱠᱟᱛᱷᱟ ᱱᱚᱰᱮ ᱦᱟᱹᱴᱤᱧ ᱩᱪᱤᱛ ᱤᱧ ᱢᱚᱱᱮᱭᱮᱜ-ᱟ ᱾ ᱢᱤᱫ ᱫᱷᱟᱣ ᱤᱧᱟᱜ ᱪᱟᱹᱠᱨᱤ ᱨᱮ ᱟᱹᱰᱤ ᱢᱟᱨᱟᱝ ᱟᱱᱟᱴ ᱦᱮᱡ ᱮᱱᱟ ᱪᱮᱫ ᱤᱧ ᱪᱮᱠᱟᱭᱟ ᱪᱮᱫ ᱫᱚ ᱵᱟᱝ ᱪᱮᱫ ᱦᱚᱸ ᱵᱟᱹᱧ ᱩᱭᱦᱟᱹᱨ ᱫᱟᱲᱮᱭᱟᱫ ᱟ ᱾ ᱟᱫᱚ ᱥᱮᱛᱟᱜ ᱨᱮ ᱩᱢ ᱯᱷᱟᱨᱪᱟ ᱵᱟᱲᱟ ᱠᱟᱛᱮ ᱜᱩᱨᱩ ᱜᱚᱢᱠᱮ ᱭᱟᱜ ᱢᱩᱴᱷᱟᱹᱱ ᱴᱷᱮᱱ ᱤᱧ ᱥᱮᱱ ᱮᱱᱟ ᱟᱨᱤᱧ ᱱᱮᱦᱚᱸᱨ ᱡᱚᱦᱟᱨ ᱮᱱᱟ, “ᱜᱩᱨᱩ ᱜᱚᱥᱟᱸᱭ ᱱᱚᱶᱟ ᱢᱩᱦᱤᱢ ᱠᱷᱚᱱᱟᱜ ᱚᱣᱟᱨ ᱠᱟᱹᱧ ᱢᱮ, ᱫᱟᱨᱟᱭ ᱠᱟᱱ ᱜᱩᱨᱩ ᱠᱩᱱᱟᱹᱢᱤ ᱨᱮ ᱩᱠᱷᱲᱟᱹ ᱢᱤᱴᱷᱟᱹᱭ ᱮᱢ ᱠᱟᱛᱮᱹᱧ ᱥᱮᱵᱟ ᱢᱮᱭᱟ ᱾” ᱜᱩᱨᱩ ᱜᱚᱢᱠᱮ ᱤᱧᱟᱜ ᱱᱮᱦᱚᱸᱨ ᱮ ᱟᱧᱡᱚᱢ ᱠᱮᱜ-ᱟ; ᱤᱧᱟᱜ ᱪᱟᱹᱠᱨᱤ ᱪᱮᱛᱟᱱ ᱨᱮ ᱦᱮᱡ ᱞᱮᱱ ᱢᱩᱦᱤᱢ ᱧᱩᱛᱩᱢᱟᱱ ᱦᱮᱱᱫᱮ ᱨᱤᱢᱤᱞ ᱫᱚ ᱥᱟᱦᱟᱭᱮᱱᱟ ᱾ ᱜᱩᱨᱩ ᱠᱩᱱᱟᱹᱢᱤ ᱨᱮ ᱜᱩᱨᱩ ᱜᱚᱥᱟᱸᱭ ᱤᱧ ᱯᱮᱨᱮᱡ ᱩᱢᱟᱹᱬ ᱠᱮᱫᱮᱭᱟ ᱾ ᱱᱚᱝᱠᱟᱱ ᱦᱟᱦᱟᱲᱟ ᱟᱱ ᱠᱟᱛᱷᱟ ᱫᱚ ᱤᱧᱟᱜ ᱡᱤᱭᱚᱱ ᱨᱮ ᱥᱩᱢᱩᱝ ᱫᱚ ᱵᱟᱝ ᱦᱩᱭ ᱟᱠᱟᱱᱟ, ᱟᱹᱰᱤ ᱦᱚᱲᱟᱜ ᱡᱤᱭᱚᱱ ᱨᱮᱦᱚᱸ ᱱᱚᱝᱠᱟ ᱦᱩᱭ ᱟᱠᱟᱱᱟ ᱢᱮᱱᱛᱮ ᱤᱧᱤᱧ ᱟᱧᱡᱚᱢ ᱟᱠᱟᱜ-ᱟ ᱾
ᱱᱚᱝᱠᱟᱱ ᱯᱩᱱᱟᱹᱭ ᱫᱤᱱ ᱨᱮ ᱵᱤᱨᱢᱟᱹᱞᱤ ᱥᱟᱯᱲᱮᱫ ᱠᱩᱢᱩᱴ ᱫᱚ “ᱜᱩᱨᱩ ᱜᱚᱢᱠᱮ ᱠᱷᱟᱥ ᱞᱮᱠᱷᱟ” ᱩᱪᱷᱟᱹᱱ ᱞᱟᱹᱜᱤᱫ ᱮ ᱴᱷᱟᱹᱣᱠᱟᱹ ᱠᱮᱜ-ᱟ ᱾ ᱦᱚᱭᱫᱟᱜ “ᱭᱟᱥ” ᱠᱷᱟᱹᱛᱤᱨ ᱱᱤᱭᱟᱹ ᱫᱷᱟᱣᱟᱜ ᱞᱮᱠᱷᱟ ᱱᱟᱥᱮᱱᱟᱜ ᱵᱤᱞᱚᱢ ᱨᱮ ᱞᱮ ᱩᱪᱷᱟᱹᱱᱮᱫ ᱠᱷᱟᱹᱛᱤᱨ ᱤᱠᱟᱹ ᱞᱮ ᱠᱷᱚᱡᱚᱜ ᱠᱟᱱᱟ ᱾
