ᱤᱧ ᱫᱚ ᱥᱮᱸᱜᱮᱞ
ᱟᱨᱟᱜ ᱥᱟᱫᱚᱢ ᱞᱮᱠᱟ
ᱠᱟᱢᱥᱟᱣ ᱟᱛᱮ,
ᱤᱧ ᱫᱩᱧ ᱥᱮᱴᱮᱨᱚᱜ ᱾
ᱵᱷᱩᱛ ᱥᱮᱸᱜᱮᱞ ᱞᱮᱠᱟ
ᱪᱷᱟᱱ ᱟᱛᱮ,
ᱤᱧ ᱫᱩᱧ ᱢᱟᱞᱠᱟᱜ᱾

ᱫᱷᱟᱣ ᱫᱷᱟᱣ ᱤᱧ ᱡᱳᱞᱳᱜ
ᱵᱚᱸᱜᱟ ᱥᱮᱸᱜᱮᱞ ᱞᱮᱠᱟ,
ᱢᱚᱰᱚᱜ ᱢᱚᱰᱚᱜ ;
ᱞᱟᱜᱟ ᱛᱮᱸᱦᱚ ᱵᱟᱢ ᱥᱟᱵᱤᱧ,
ᱯᱟᱸᱡᱟ ᱛᱮᱸᱦᱚ ᱵᱟᱢ ᱧᱟᱢᱤᱧ,
ᱵᱟᱧ ᱤᱬᱤᱡᱚᱜ ᱡᱷᱟᱹᱨᱱᱤ ᱢᱟᱱᱛᱟᱨ ᱛᱮ᱾
ᱥᱩᱞᱛᱟᱹ ᱥᱮᱸᱜᱮᱞ ᱞᱮᱠᱟᱧ
ᱡᱳᱞ ᱨᱩᱣᱟᱹᱲᱚᱜ ,
ᱢᱟᱱᱢᱤ ᱢᱚᱱᱮ ᱨᱮᱭᱟᱜ ᱚᱸᱡᱨᱟ ᱡᱷᱚᱛᱚᱧ
ᱞᱚ ᱟᱛᱟᱨ ᱛᱚᱨᱚᱡ ᱾
ᱢᱟᱱᱢᱤ ᱥᱤᱨᱡᱟᱹᱣ ᱡᱟᱸᱦᱟ ᱛᱤᱱᱟᱹᱜ ᱯᱟᱯ
ᱤᱧ ᱫᱩᱧ ᱨᱟᱯᱟᱜ ᱨᱚᱸᱜᱚᱭ,
ᱫᱟᱵᱟᱱᱚᱞ ᱞᱮᱠᱟ ᱜᱚᱢᱟ ᱫᱷᱟᱨᱛᱤᱧ ;
ᱡᱟᱨ ᱠᱷᱟᱨ ᱪᱟᱵᱟᱭ᱾
ᱟᱯᱮ ᱜᱮᱯᱮ ᱛᱮᱨᱟᱝ ᱮᱫᱟ ᱥᱮᱸᱜᱮᱞ ᱥᱟᱨ
ᱟᱯᱮ ᱜᱮᱯᱮ ᱩᱥᱠᱩᱨ ᱟᱧ ᱠᱟᱱ ,
ᱟᱯᱮ ᱜᱮᱯᱮ ᱚᱝ ᱟᱧ ᱠᱟᱱ,
ᱨᱟᱜᱤ ᱟᱸᱜᱨᱟ ᱯᱮ ᱡᱩᱸᱰᱤ ᱟᱧ ᱠᱟᱱ,
ᱱᱚᱣᱟ ᱫᱷᱟᱹᱨᱛᱤ ᱫᱚᱧ ᱢᱟᱞᱚᱴ ᱪᱟᱵᱟᱭ ᱾

ᱡᱩᱞᱩᱜ ᱟᱠᱚ ᱰᱤᱜ ᱰᱤᱜ
ᱫᱷᱟᱨᱛᱤ ᱨᱮᱱ ᱮᱯᱤᱞ ᱮᱸᱜᱮᱞ,
ᱤᱧ ᱫᱚ ᱫᱷᱟᱣ ᱫᱷᱟᱣ ᱜᱮ
ᱡᱚᱠᱷᱚᱱ ᱤᱧ ᱫᱚ ᱥᱟᱨᱟ ᱥᱮᱸᱜᱮᱞ ᱾
ᱦᱚᱭ ᱨᱩᱯ ᱛᱮᱧ ᱚᱴᱟᱝ ᱦᱤᱡᱩᱜ
ᱥᱮᱸᱜᱮᱞ ᱥᱩᱥᱩᱨ ᱵᱟᱝ ᱞᱮᱠᱟ ,
ᱫᱟᱜ ᱨᱩᱯ ᱛᱮᱧ ᱡᱚᱨᱚ ᱦᱩᱡᱩᱜ
ᱥᱮᱸᱜᱮᱞ ᱡᱟᱲᱤ ᱫᱟᱜ ᱞᱮᱠᱟ᱾

ᱵᱚᱛᱚᱨᱟᱧ ᱯᱮ ᱟᱯᱮ ᱢᱟᱱᱢᱤ
ᱦᱩᱸᱥᱤᱭᱟᱨᱚᱜ ᱯᱮ ᱟᱯᱮ ᱢᱟᱱᱢᱤ
ᱥᱚᱱᱛᱚᱨᱚᱜ ᱯᱮ ᱟᱯᱮ ᱢᱟᱱᱢᱤ᱾

ᱤᱧ ᱫᱚ ᱥᱮᱸᱜᱮᱞ
ᱫᱚᱸᱜᱚᱭ ᱫᱚᱸᱜᱚᱭ ᱤᱧ ᱡᱩᱞ ᱨᱟᱠᱟᱵᱚᱜᱼᱟ ᱾
ᱤᱧ ᱫᱩᱧ ᱛᱚᱸᱜᱮ ᱠᱚᱜᱼᱟ
ᱡᱩᱞ ᱟᱠᱟᱱ ᱜᱩᱱᱛᱮ,
ᱤᱧ ᱫᱩᱧ ᱨᱩᱣᱟᱹᱲ ᱦᱩᱡᱩᱜ
ᱫᱩᱞᱟᱹᱲ ᱥᱮᱸᱜᱮᱞ ᱨᱩᱯ ᱛᱮ,
ᱡᱟᱸᱦᱟ ᱥᱮᱸᱜᱮᱞ ᱫᱚ
ᱵᱟᱝ ᱤᱸᱬᱤᱡᱚᱜ ᱫᱟᱜ ᱛᱮ
ᱵᱟᱝ ᱤᱸᱬᱤᱡᱚᱜ ᱦᱚᱭ ᱛᱮ ᱾