ᱠᱷᱮᱨᱣᱟᱲ ᱵᱤᱨᱟᱹᱫ ᱨᱮ ᱠᱩᱲᱤ ᱦᱚᱯᱚᱱ-ᱟᱜ ᱢᱟᱱ ᱫᱚ ᱟᱹᱰᱤ ᱪᱮᱛᱟᱱ ᱨᱮᱜᱮ, ᱠᱚᱲᱟ ᱵᱟᱨᱟ ᱵᱟᱹᱨᱤ ᱱᱟᱞᱦᱟ ᱛᱩᱢᱟᱹᱞ ᱟᱛᱮ ᱚᱲᱟᱜ ᱟᱹᱥᱩᱞ ᱫᱚ ᱟᱹᱰᱤ ᱢᱟᱨᱮ ᱠᱟᱛᱷᱟ ᱭᱮᱱᱟ , ᱱᱮᱛᱟᱨ ᱫᱚ ᱚᱞᱚᱜ ᱯᱟᱲᱦᱟᱣᱜ ᱫᱟᱹᱲ ᱫᱚᱱ ᱪᱟᱹᱠᱨᱤ ᱱᱩᱠᱨᱤ ᱠᱚᱨᱮ ᱦᱚᱸ ᱥᱟᱱᱛᱟᱲ ᱮᱨᱟ ᱥᱟᱱᱛᱟᱲ ᱠᱚᱲᱟ ᱠᱚ ᱯᱟᱨᱚᱢ ᱟᱠᱟᱫ ᱠᱚᱣᱟ ᱾ ᱛᱮᱦᱮᱧ ᱚᱱᱠᱟᱜᱮ ᱢᱤᱫ ᱯᱮᱲᱟ ᱦᱚᱲ ᱵᱤᱨ ᱢᱟᱞᱤᱭᱟ ᱢᱮᱞᱟᱸᱠᱤ ᱨᱮᱵᱚᱱ ᱨᱚᱯᱚᱲ ᱮᱭᱟ , ᱡᱟᱦᱟᱸᱭ ᱫᱚ ᱟᱡᱟᱜ ᱠᱟᱹᱢᱤ ᱠᱩᱨᱩᱢᱩᱴᱩ ᱛᱮ ᱟᱵᱚ ᱥᱟᱱᱟᱢ ᱥᱟᱱᱛᱟᱲ ᱠᱚᱣᱟᱜ ᱢᱟᱱ ᱟᱨ ᱧᱩᱛᱩᱢ ᱟᱹᱰᱤ ᱠᱤᱱ ᱥᱮᱬᱟ ᱟᱠᱟᱫᱟ ᱾ ᱡᱟᱦᱟᱸᱭ ᱫᱚ ᱦᱚᱰᱚᱞᱥ ᱠᱩᱭᱤᱱ ᱢᱮᱱᱛᱮᱫ ᱵᱚᱱ ᱵᱟᱰᱟᱭ ᱟᱠᱟᱫᱮᱭᱟ ᱡᱟᱦᱟᱸᱭᱟᱜ ᱧᱩᱛᱩᱢ ᱫᱚ ᱡᱟᱹᱣᱱᱟᱹ ᱢᱩᱨᱢᱩ ᱠᱟᱱᱟ ᱾ ᱡᱟᱹᱣᱱᱟᱹ ᱢᱨᱩᱢᱩ ᱟᱡᱟᱜ ᱠᱷᱮᱞᱚᱸᱰ ᱡᱤᱭᱚᱱ ᱨᱮ ᱥᱟᱩᱛᱷ ᱟᱥᱤᱭᱟᱱ ᱜᱮᱢ ᱜᱩᱦᱟᱴᱤ, ᱮᱥᱤᱭᱟᱱ ᱚᱞ ᱥᱴᱟᱨ ᱟᱛᱷᱞᱮᱴᱤᱠ ᱢᱤᱴ, ᱮᱥᱤᱭᱟᱱ ᱚᱞ ᱥᱴᱟᱨ ᱟᱛᱷᱞᱮᱴᱤᱠ ᱢᱤᱴ, ᱤᱱᱰᱳᱨ ᱟᱛᱷᱞᱮᱴᱤᱠ ᱟᱥᱤᱭᱟᱱ ᱤᱱᱰᱳᱨ ᱜᱮᱢ ᱵᱷᱤᱭᱮᱛᱱᱟᱢ, ᱭᱩᱛᱷ ᱠᱚᱢᱚᱱ ᱣᱮᱞᱛᱷ ᱜᱮᱢ ᱯᱩᱱᱮ, ᱟᱥᱤᱭᱟᱱ ᱡᱩᱱᱤᱭᱚᱨ ᱟᱛᱷᱞᱮᱴᱤᱠ ᱪᱟᱢᱯᱭᱟᱱᱥᱤᱯ ᱡᱟᱠᱚᱨᱛᱟ, ᱮᱥᱤᱭᱟᱱ ᱜᱮᱢ ᱟᱨ ᱠᱚᱢᱚᱱ ᱣᱮᱞᱛᱷ ᱜᱮᱢ ᱠᱚᱨᱮ ᱥᱤᱧᱚᱛ ᱫᱤᱥᱚᱢ ᱞᱟᱹᱜᱤᱫ ᱠᱷᱮᱞ ᱟᱛᱮ ᱟᱭᱢᱟ ᱥᱚᱱᱟ ᱨᱩᱯᱟᱹᱭ ᱫᱟᱥᱮ ᱟᱠᱟᱱᱟ ᱟᱨ ᱟᱵᱚ ᱥᱟᱱᱟᱢ ᱥᱟᱱᱛᱟᱲ ᱡᱟᱹᱛᱤᱭᱟ ᱢᱟᱱ ᱮ ᱫᱚᱦᱚ ᱟᱠᱟᱫ-ᱟ ᱾
ᱵᱤᱨ ᱢᱟᱹᱞᱤ (ᱵᱤ ᱢᱟ) ᱺ ᱡᱚᱦᱟᱨ ! ᱥᱟᱹᱜᱩᱱ ᱫᱟᱨᱟᱢ
ᱡᱟᱹᱣᱱᱟᱹ ᱢᱩᱨᱢᱩ ( ᱡᱟᱹ ᱢᱩ) ᱺ ᱡᱚᱦᱟᱨ ᱟᱭᱢᱟ ᱥᱟᱨᱦᱟᱣ
ᱵᱤ ᱢᱟᱺ ᱯᱩᱭᱞᱩ ᱨᱮ ᱟᱢᱟᱜ ᱟᱹᱛᱩ ᱫᱤᱥᱚᱢ ᱟᱨ ᱜᱷᱟᱨᱚᱸᱡᱽ ᱠᱟᱛᱷᱟ ᱞᱟᱹᱭ ᱢᱮ ᱾
ᱡᱟᱹ ᱢᱩ ᱺ ᱟᱞᱮᱭᱟᱜ ᱢᱩᱲᱩᱛ ᱫᱤᱥᱚᱢ ᱫᱚ ᱚᱰᱤᱥᱟ ᱯᱚᱱᱚᱛ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱛᱤᱨᱤᱝ ᱵᱞᱚᱠ ᱨᱮᱱᱟᱜ ᱵᱚᱰᱽᱠᱩᱢᱨᱩᱢ ᱟᱹᱛᱩ ᱠᱟᱱᱟ ᱤᱠᱷᱟᱹᱱ ᱟᱞᱮ ᱫᱚ ᱟᱹᱰᱤ ᱥᱮᱫᱟᱭ ᱠᱷᱚᱱ ᱚᱱᱟ ᱛᱤᱨᱤᱝ ᱥᱩᱨ ᱨᱮᱱᱟᱜ ᱥᱮᱭᱟᱡᱟᱝ ᱟᱹᱛᱩ ᱨᱮ ᱱᱤᱛᱚᱜ ᱫᱚᱞᱮ ᱫᱤᱥᱚᱢ ᱟᱠᱟᱫ-ᱟ ᱾ ᱟᱞᱮ ᱚᱲᱟᱜ ᱨᱮ ᱤᱧ ᱵᱟᱵᱟ ᱥᱩᱨᱮᱱᱫᱨᱚ ᱢᱩᱨᱢᱩ ᱟᱭᱚ ᱧᱩᱛᱩᱢ ᱠᱟᱹᱯᱩᱨᱟᱹ ᱢᱩᱨᱢᱩ ᱛᱤᱠᱤᱱ ᱢᱮᱱᱟᱜ ᱠᱤᱱᱟ ᱾ ᱤᱧ ᱪᱮᱛᱟᱱᱨᱮ ᱫᱟᱫᱟ ᱛᱤᱠᱤᱱ ᱵᱟᱨ ᱦᱚᱲ ᱤᱧ ᱠᱷᱚᱱ ᱞᱟᱛᱟᱨᱨ ᱢᱤᱫᱴᱟᱝ ᱢᱟᱺᱭ ᱟᱨ ᱵᱟᱹᱵᱩ ᱢᱤᱫᱴᱟᱝ ᱢᱮᱱᱟᱭᱟ ᱾ ᱫᱤᱥᱚᱢ ᱨᱮ ᱫᱟᱫᱟ ᱛᱤᱠᱤᱱ ᱪᱟᱥᱵᱟᱥ ᱥᱟᱶ ᱵᱟᱵᱟᱭ ᱠᱟᱨᱵᱟᱨ ᱵᱟᱲᱟᱭᱟ ᱾
ᱵᱤ ᱢᱟᱺ ᱱᱚᱣᱟ ᱠᱷᱮᱞᱚᱸᱰ ᱡᱤᱭᱚᱱ ᱨᱮ ᱪᱮᱫ ᱞᱮᱠᱟ ᱛᱮᱢ ᱵᱚᱞᱚᱭᱮᱱᱟ ?
ᱡᱟᱹ ᱢᱩ ᱺ ᱟᱹᱛᱩ ᱫᱤᱥᱚᱢ ᱨᱮ ᱯᱷᱩᱴᱵᱚᱞ ᱤᱧ ᱠᱷᱮᱞ ᱛᱟᱦᱮᱸᱫ ᱵᱟᱵᱟᱭ ᱪᱟᱦᱟᱶ ᱮᱫ ᱛᱟᱦᱮᱸᱫ ᱤᱧ ᱯᱷᱩᱴᱵᱚᱞ ᱤᱧ ᱠᱷᱷᱮᱞ ᱢᱟ , ᱤᱠᱷᱟᱹᱱ ᱤᱧᱟᱜ ᱢᱚᱱᱮ ᱫᱟᱹᱲ ᱫᱚᱱ ᱨᱮ ᱛᱟᱦᱮᱸ ᱠᱟᱱᱟ ᱾ᱤᱧ ᱛᱤᱨᱤᱝ ᱨᱮ ᱚᱞᱚᱜ ᱡᱚᱦᱚᱜ ᱱᱚᱰᱮ ᱯᱩᱭᱞᱩ ᱫᱷᱟᱣ ᱛᱤᱨᱤᱝ ᱨᱮᱠᱚ ᱵᱟᱪᱷᱟᱣ ᱠᱤᱫᱤᱧ-ᱟ ᱚᱱᱰᱮ ᱡᱤᱛᱠᱟᱹᱨ ᱮᱱ ᱛᱟᱭᱚᱢ ᱵᱤᱥᱩᱭ , ᱵᱟᱨᱤᱯᱚᱫᱟ ᱟᱨ ᱢᱩᱪᱟᱹᱫ ᱨᱮ ᱵᱷᱩᱵᱚᱱᱮᱥᱣᱚᱨ ᱨᱮ ᱵᱟᱪᱷᱟᱣ ᱦᱩᱭ ᱞᱮᱱᱟ ᱾ ᱚᱱᱰᱮ ᱠᱷᱳᱱ ᱥᱯᱚᱨᱴᱥ ᱦᱚᱥᱴᱮᱞ ᱟᱨ ᱚᱱᱟ ᱛᱟᱭᱚᱢ ᱢᱤ ᱢᱤᱫ ᱜᱷᱟᱹᱴᱤ ᱯᱟᱨᱚᱢ ᱠᱟᱛᱮ ᱱᱤᱛ ᱫᱷᱟᱹᱵᱤᱡ ᱠᱷᱮᱞ ᱪᱟᱹᱞᱩ ᱟᱠᱟᱱᱟ ᱾
ᱵᱤ ᱢᱟ ᱺ ᱥᱤᱧᱚᱛ ᱫᱤᱥᱚᱢ ᱞᱟᱹᱜᱤᱫ ᱠᱷᱮᱞ ᱟᱛᱮ ᱪᱮᱫ ᱞᱮᱠᱟᱢ ᱵᱩᱡᱷᱟᱹᱣ ᱮᱫ-ᱟ ?
ᱡᱟᱹ ᱢᱩᱺ ᱥᱤᱧᱚᱛ ᱞᱟᱹᱜᱤᱫ ᱟᱨ ᱵᱟᱝ ᱫᱤᱥᱚᱢ ᱞᱟᱹᱜᱤᱫ ᱠᱷᱮᱞ ᱫᱚ ᱟᱹᱰᱤ ᱨᱟᱹᱥᱠᱟ ᱟᱨ ᱜᱚᱨᱚᱵᱽ ᱜᱮ ᱵᱩᱡᱷᱟᱹᱣ-ᱟ ᱾ ᱪᱮᱫᱟᱜ ᱥᱮ ᱥᱤᱧᱚᱛ ᱡᱟᱠᱟᱛ ᱨᱮ ᱟᱭᱢᱟ ᱯᱚᱱᱚᱛ ᱠᱷᱚᱱ ᱛᱤᱱᱟᱜ ᱠᱷᱮᱞᱚᱱᱰᱤᱭᱟᱹ ᱦᱮᱯᱨᱟᱣ ᱨᱮᱠᱚ ᱦᱟᱹᱡᱩᱜ ᱠᱟᱱᱟ ᱚᱱᱟ ᱠᱷᱚᱱ ᱟᱢ ᱡᱤᱛᱠᱟᱹᱨ ᱟᱛᱮ ᱱᱚᱣᱟ ᱴᱷᱟᱶ ᱮᱢ ᱟᱢᱮᱴ ᱮᱫ-ᱟ ᱟᱨ ᱦᱚᱸ ᱥᱟᱱᱛᱟᱲ ᱦᱩᱭ ᱛᱩᱞᱩᱡ ᱚᱱᱰᱮ ᱥᱮᱴᱮᱨᱚᱜ ᱫᱚ ᱟᱹᱰᱤ ᱨᱟᱹᱥᱠᱟᱹ ᱟᱨ ᱜᱚᱨᱚᱵ ᱜᱮ ᱵᱩᱡᱷᱟᱹᱣ-ᱟ ᱾
ᱵᱤ ᱢᱟ ᱺ ᱟᱵᱚ ᱥᱟᱱᱛᱟᱲ ᱟᱹᱛᱩ ᱟᱹᱛᱩ ᱨᱮ ᱴᱚᱞᱟ ᱴᱚᱞᱟ ᱨᱮ ᱥᱯᱳᱨᱴ, ᱯᱷᱩᱴᱵᱚᱞ ᱴᱩᱨᱱᱟᱢᱮᱱᱴ , ᱫᱟᱹᱲ ᱫᱚᱱ ᱦᱮᱯᱨᱟᱣ ᱦᱩᱭᱩᱜ ᱛᱩᱞᱩᱡ ᱥᱤᱧᱚᱛ ᱟᱨ ᱵᱟᱝ ᱯᱚᱱᱚᱛ ᱨᱮᱱᱟᱜ ᱫᱚᱞ ᱨᱮᱦᱚᱸ ᱪᱮᱫᱟᱜ ᱥᱟᱸᱜᱮ ᱫᱷᱟᱨᱟ ᱵᱟᱵᱚᱱ ᱥᱮᱴᱮᱨ ᱫᱟᱲᱮᱭᱟᱜ ᱠᱟᱱᱟ ?
ᱡᱟᱹ ᱢᱩ ᱺ ᱥᱚᱨᱠᱟᱨ ᱟᱨ ᱵᱟᱝ ᱥᱚᱨᱠᱟᱨ-ᱟ ᱡᱟᱦᱟᱸ ᱵᱮᱵᱚᱥᱛᱟ ᱢᱮᱱᱟᱜ-ᱟ ᱟᱨ ᱟᱵᱚᱨᱤᱱ ᱜᱤᱫᱽᱨᱟᱹ ᱡᱟᱦᱟᱸ ᱨᱮᱠᱚ ᱫᱟᱹᱲ ᱫᱚᱱ ᱵᱟᱲᱟᱭᱮᱫ-ᱟ ᱚᱱᱟ ᱵᱷᱤᱛᱨᱤ ᱨᱮ ᱥᱟᱹᱜᱟᱹᱭ ᱴᱷᱤᱠ ᱫᱷᱟᱨᱟ ᱵᱟᱝ ᱡᱚᱯᱲᱟᱣ ᱟᱠᱟᱱᱟ ᱾ ᱟᱵᱚ ᱟᱹᱛᱩ ᱴᱚᱞᱟ ᱯᱟᱲᱟ ᱡᱟᱦᱟᱸ ᱨᱮᱜᱮ ᱠᱷᱮᱞ ᱦᱩᱭᱩᱜ ᱠᱟᱱᱟ ᱵᱟᱰᱟᱭ ᱫᱚᱨᱠᱟᱨ ᱚᱱᱟᱠᱚ ᱦᱚᱱᱚᱛ ᱟᱨ ᱯᱚᱱᱚᱛ ᱨᱮ ᱢᱮᱱᱟᱜ ᱚᱱᱟ ᱠᱷᱮᱞ ᱨᱮᱱᱟᱜ ᱯᱷᱮᱰᱮᱨᱮᱥᱚᱱ ᱠᱷᱚᱱ ᱟᱯᱷᱤᱞᱤᱭᱮᱥᱚᱱ ᱧᱟᱢ ᱟᱠᱟᱱ ᱥᱮ ᱵᱟᱝ , ᱚᱱᱟ ᱵᱟᱫᱽ ᱥᱚᱨᱠᱟᱨ ᱡᱚᱠᱷᱚᱱ-ᱡᱚᱠᱷᱚᱱ ᱠᱷᱮᱞᱚᱸᱰᱤᱭᱟᱹ ᱵᱟᱪᱷᱟᱣ ᱞᱟᱹᱜᱤᱫ ᱮ ᱞᱟᱹᱭ ᱥᱚᱫᱚᱨ ᱮᱫ-ᱟ ᱚᱱᱰᱮ ᱟᱵᱚᱨᱤᱱ ᱜᱤᱫᱽᱨᱟᱹ ᱠᱚ ᱥᱮᱴᱮᱨᱚᱜ ᱠᱟᱱᱟ ᱥᱮ ᱵᱟᱝ , ᱱᱚᱣᱟ ᱠᱚ ᱤᱫᱤᱭᱟᱛᱮ ᱪᱮᱨᱜᱟᱹᱞ ᱵᱟᱝ ᱛᱮ ᱟᱵᱚᱨᱤᱱ ᱜᱤᱫᱨᱟᱹ ᱟᱹᱛᱩ ᱠᱷᱮᱞ ᱨᱮᱜᱮ ᱟᱠᱚᱣᱟᱜ ᱦᱩᱱᱟᱹᱨ ᱢᱩᱪᱟᱹᱫᱚᱜ ᱠᱟᱱᱟ ᱾
ᱵᱤ ᱢᱟ ᱺ ᱟᱵᱚᱨᱤᱱ ᱥᱟᱱᱛᱟᱲ ᱜᱤᱫᱨᱟᱹ ᱛᱤᱱᱟᱹᱜ ᱠᱚ ᱫᱟᱲᱮᱭᱟᱜ-ᱟ ᱵᱤᱱ ᱵᱷᱟᱹᱵᱤ ᱮᱫ-ᱟ ?
ᱡᱟᱹ ᱢᱩ ᱺ ᱫᱟᱲᱮᱭᱟᱜ-ᱟ ᱠᱚ !!! ᱛᱟᱠ ᱟᱨ ᱫᱟᱣ ᱧᱟᱢ ᱞᱮᱠᱷᱟᱱ ᱤᱧᱟᱜ ᱯᱟᱹᱛᱭᱟᱹᱣ ᱑᱐᱐% ᱠᱚ ᱰᱟᱲᱮᱭᱟᱜ-ᱟ ᱾
ᱵᱤ ᱢᱟ ᱺ ᱠᱩᱲᱤ ᱦᱚᱯᱚᱱ ᱛᱩᱞᱩᱡ ᱫᱟᱹᱲ ᱫᱚᱱ ᱨᱮ ᱟᱬᱜᱚ ᱪᱮᱫ ᱞᱮᱠᱟ ᱟᱱᱟᱴ ᱠᱚᱢ ᱵᱩᱡᱷᱟᱹᱣ ᱞᱮᱫ-ᱟ ?
ᱡᱟᱹ ᱢᱩ ᱺ ᱟᱱᱟᱴ ᱢᱟ ᱛᱟᱦᱮᱱ ᱜᱮᱭᱟ, ᱯᱩᱭᱞᱩ ᱨᱮ ᱥᱟᱱᱛᱟᱲ ᱫᱚᱥᱟᱨ ᱠᱩᱲᱤ ᱦᱚᱯᱚᱱ ᱮᱴᱠᱮᱴᱚᱬᱮ ᱟᱨ ᱟᱱᱟᱴ ᱢᱟ ᱛᱟᱦᱮᱱ ᱜᱮᱭᱟ ᱡᱚᱛᱚ ᱠᱟᱛᱷᱟ ᱞᱟᱹᱭ ᱵᱟᱝ ᱜᱟᱱᱚᱜ-ᱟ , ᱟᱭᱚ ᱵᱟᱵᱟ ᱟᱨ ᱚᱲᱟᱜ ᱦᱚᱲ-ᱟ ᱜᱚᱲᱚ ᱥᱚᱦᱚᱫ ᱛᱟᱦᱮᱸ ᱠᱟᱱᱟ ᱚᱱᱟᱛᱮ ᱠᱷᱮᱞᱤᱧ ᱫᱟᱲᱮ ᱦᱟᱫ-ᱟ, ᱵᱟᱹᱭ ᱵᱟᱹᱭ ᱛᱮ ᱵᱮᱥ ᱤᱧ ᱠᱦᱮᱞ ᱤᱫᱤ ᱠᱮᱫ ᱠᱷᱟᱱ ᱫᱤᱥᱚᱢ ᱦᱚᱲ ᱠᱚᱣᱟᱜ ᱦᱚᱸ ᱥᱟᱨᱦᱟᱣ ᱟᱨ ᱛᱷᱩᱢ ᱧᱟᱢ ᱮᱱᱟ ᱟᱨ ᱤᱧ ᱠᱷᱮᱞ ᱮᱫ ᱜᱮᱭᱟ ᱾
ᱵᱤ ᱢᱟ ᱺ ᱠᱷᱮᱞ ᱡᱤᱭᱚᱱ ᱨᱮ ᱟᱢᱟᱜ ᱡᱚᱛᱚ ᱠᱷᱚᱱ ᱨᱟᱹᱥᱠᱟ ᱚᱠᱛᱚ ᱚᱠᱟ ᱛᱟᱦᱮᱸ ᱠᱟᱱᱟ ᱟᱨ ᱚᱠᱟ ᱫᱩᱠ ᱚᱠᱛᱚ ᱚᱠᱟ ᱛᱟᱦᱮ ᱠᱟᱱᱟ?
ᱡᱟᱹ ᱢᱩ ᱺ ᱫᱩᱠ ᱠᱟᱛᱷᱟ ᱫᱚ ᱵᱟᱝ ᱞᱟᱹᱭ ᱜᱮ ᱴᱷᱤᱠᱚᱜ-ᱟ ᱪᱮᱫᱟ ᱥᱮ ᱤᱧ ᱮᱠᱞᱟ ᱫᱚ ᱵᱟᱝ ᱡᱟᱦᱟᱸᱭ ᱜᱮ ᱱᱚᱣᱟ ᱠᱷᱮᱞ ᱨᱮᱞᱮ ᱟᱬᱜᱚ ᱟᱠᱟᱱᱟ ᱫᱤᱱ ᱜᱮ ᱱᱚᱰᱮ ᱥᱚᱸᱜᱷᱚᱨᱥ ᱦᱩᱭᱩᱜ ᱠᱟᱱᱟ ᱟᱨ ᱱᱚᱣᱟ ᱨᱮᱱᱟᱜ ᱢᱩᱪᱟᱹᱫ ᱵᱟᱹᱱᱩ ᱟᱹᱱᱤᱡ, ᱡᱟᱦᱟᱸ ᱛᱤᱱᱟᱹᱜ ᱵᱷᱩᱨ ᱫᱟᱲᱮ ᱢᱮᱱᱟᱜ-ᱟ ᱚᱱᱟ ᱫᱚ ᱛᱚᱸᱜᱮ ᱛᱟᱦᱮᱱ ᱜᱮᱭᱟ ᱾ ᱮᱱ ᱨᱮᱦᱚᱸ ᱒᱐᱑᱖ ᱥᱟᱞ ᱨᱮ ᱚᱞᱚᱢᱯᱤᱠ ᱴᱤᱢ ᱨᱮ ᱥᱮᱞᱮᱫ ᱦᱩᱭ ᱟᱛᱮ ᱵᱟᱝ ᱥᱮᱞᱮᱫ ᱫᱟᱲᱮᱭᱟᱜ ᱜᱮ ᱱᱤᱛ ᱫᱷᱟᱹᱵᱤᱡ ᱥᱮᱬᱟ ᱫᱩᱠ ᱠᱟᱱᱟ ᱾ ᱡᱚᱠᱷᱚᱱ ᱒᱐᱒᱐ ᱨᱮ ᱟᱥᱤᱭᱟᱱ ᱜᱮᱢ ᱨᱤᱧ ᱠᱣᱟᱞᱤᱯᱷᱟᱭ ᱞᱮᱫ-ᱟ ᱩᱱ ᱡᱚᱦᱚᱜ ᱤᱧᱟᱜ ᱩᱢᱮᱨ ᱒᱐ ᱥᱟᱞ ᱜᱮ ᱛᱟᱦᱮᱸ ᱞᱮᱱᱟ ᱟᱨ ᱤᱧ ᱥᱤᱧᱚᱛ ᱨᱮ ᱫᱚᱥᱟᱨ ᱥᱚᱨᱮᱥ ᱠᱷᱮᱞᱱᱰᱤᱭᱟᱹᱧ ᱛᱟᱦᱮ ᱠᱟᱱᱟ ᱾ ᱱᱚᱣᱟ ᱜᱮ ᱤᱧᱟᱜ ᱩᱭᱦᱟᱹᱨ ᱨᱮ ᱤᱧᱟᱜ ᱨᱟᱹᱥᱠᱟᱹ ᱚᱠᱛᱚ ᱛᱟᱦᱮᱸ ᱠᱟᱱᱟ ᱾
ᱵᱤ ᱢᱟ ᱺ ᱱᱮᱛᱟᱨ ᱡᱟᱦᱟᱸᱭ ᱜᱤᱫᱽᱨᱟᱹ ᱠᱚᱠᱚ ᱪᱷᱩᱴᱟᱹᱣ ᱟᱠᱟᱱᱟ ᱩᱱᱠᱩ ᱠᱚ ᱪᱮᱫ ᱵᱮᱣᱨᱟ ᱮᱢ ᱥᱟᱱᱟ ᱢᱮᱭᱟ ?
ᱡᱟᱹ ᱢᱩ ᱺ ᱠᱷᱟᱹᱞᱤ ᱠᱷᱮᱞ ᱥᱩᱢᱩᱜ ᱫᱚ ᱵᱟᱝ ᱥᱟᱱᱟᱢᱟᱜ ᱨᱮᱜᱮ ᱟᱹᱰᱤ ᱠᱩᱨᱩᱢᱩᱴᱩ ᱞᱟᱹᱠᱛᱤ ᱠᱟᱱᱟ ᱚᱱᱟ ᱥᱟᱶ ᱵᱟᱰᱟᱭᱟᱱ ᱦᱚᱲ ᱠᱚᱴᱷᱮᱫ ᱫᱤᱥ ᱦᱩᱫᱤᱥ ᱤᱫᱤ ᱞᱟᱹᱠᱛᱤ ᱠᱟᱱᱟ ᱾ ᱢᱤᱫ ᱢᱚᱱᱮ ᱛᱮ ᱵᱟᱝ ᱟᱹᱲᱤᱥ ᱟᱛᱮᱫ ᱪᱷᱩᱴᱟᱹᱣ ᱞᱮᱱ ᱠᱷᱟᱱ ᱠᱟᱹᱢᱤ ᱦᱟᱥᱚᱞᱚᱜ ᱜᱮᱭᱟ ᱾
ᱵᱤ ᱢᱟ ᱺ ᱡᱟ ᱦᱚᱣ ᱟᱞᱮ ᱟᱢᱟᱜ ᱵᱷᱤᱲ ᱚᱠᱛᱚ ᱠᱷᱚᱱ ᱥᱚᱢᱚᱩ ᱮᱢ ᱞᱮᱹᱟᱜᱤᱫ ᱵᱤᱨᱢᱟᱹᱞᱤ ᱜᱷᱟᱨᱸᱡᱽ ᱯᱟᱦᱟᱴᱟ ᱠᱷᱚᱱ ᱥᱟᱨᱦᱟᱣ ᱞᱮ ᱪᱟᱞ ᱮᱫ-ᱟ ᱾
ᱡᱟᱹ ᱢᱩ ᱺ ᱤᱧ ᱦᱚᱸ ᱟᱯᱮᱭᱟᱜ ᱠᱟᱹᱢᱤ ᱦᱚᱨᱟ ᱧᱮᱞ ᱟᱛᱮ ᱟᱨ ᱨᱚᱯᱚᱲ ᱟᱛᱮ ᱟᱹᱰᱤ ᱨᱟᱹᱥᱠᱟᱹᱧ ᱟᱭᱠᱟᱹᱣ ᱠᱮᱫ-ᱟ, ᱵᱤᱨᱢᱟᱞᱤ ᱤ-ᱯᱷᱟᱛᱟᱢ ᱜᱚᱴᱟ ᱫᱤᱥᱚᱢ ᱢᱚᱦᱚᱠᱟᱣ-ᱟ ᱢᱮᱱᱛᱮᱫ ᱤᱧᱟᱜ ᱯᱟᱹᱛᱭᱟᱹᱣ ᱾
