ᱪᱮᱫ ᱪᱚ ᱯᱟᱞᱮ ᱪᱟᱸᱫᱚ
ᱚᱱᱠᱟ ᱤᱧ ᱴᱷᱮᱱᱮᱢ ᱞᱮᱫ ᱧᱮᱞ ᱧᱟᱢ
ᱡᱟᱦᱟᱸ ᱠᱷᱟᱹᱛᱤᱨ ᱚᱯᱮᱞ ᱠᱮᱫᱤᱧᱟᱢ
ᱢᱟᱹᱱᱢᱤ ᱨᱩᱯ ᱨᱮ
ᱱᱚᱶᱟ ᱢᱩᱧᱪᱩ ᱯᱩᱨᱤ ᱨᱮ ᱾
ᱵᱟᱝ ᱜᱮᱹᱧ ᱵᱩᱡᱽ ᱧᱟᱢ
ᱟᱢᱟᱜ ᱠᱟᱦᱮᱫ
ᱟᱢᱟᱜ ᱨᱚᱦᱚᱭ ᱨᱮᱦᱮᱫ
ᱫᱤᱥᱟᱹᱦᱟᱨᱟ ᱩᱛᱩᱫ ᱛᱩᱸᱵᱩᱫ
ᱟᱹᱣᱟᱹᱯᱟᱯᱟ ᱛᱤᱧ ᱥᱟᱦᱮᱫ ᱾
ᱵᱤᱱ ᱫᱤᱥᱟᱹ ᱦᱚᱨ ᱨᱮ ᱛᱟᱲᱟᱢ
ᱫᱤᱱ ᱜᱮ ᱛᱟᱦᱟᱢ ᱛᱩᱠᱩᱡ
ᱟᱹᱛᱷᱟᱹᱣᱲᱤ ᱜᱮ
ᱟᱫᱷᱲᱟ ᱟᱹᱫᱷᱲᱤ
ᱞᱮᱸᱡᱮᱫ ᱞᱮᱸᱜᱮᱫ ᱥᱚᱯᱚᱫ ᱾
ᱵᱩᱡᱽ ᱧᱟᱢᱤᱧ ᱯᱟᱞᱮ
ᱟᱢᱟᱜ ᱫᱩᱞᱟᱹᱲ ᱛᱮᱦᱮᱧ
ᱪᱮᱫᱟᱜ ᱮᱢ ᱡᱚᱨᱚᱭ ᱛᱤᱧ
ᱠᱚᱲᱟᱢ ᱪᱮᱛᱟᱱ ᱦᱤᱰᱤᱨ ᱦᱤᱰᱤᱨ
ᱱᱚᱝᱠᱟ ᱤᱧᱟᱜ ᱢᱮᱫ ᱫᱟᱜ ᱾
ᱤᱧᱟᱜ ᱚᱱᱛᱚᱨ ᱜᱟᱥᱟᱣ ᱥᱟᱯᱷᱟᱭ
ᱤᱧᱟᱜ ᱛᱟᱲᱟᱢ ᱰᱟᱦᱟᱨ ᱨᱚᱯᱷᱟᱭ
ᱤᱧᱟᱜ ᱢᱮᱫ ᱫᱟᱜ ᱛᱮᱢ
ᱟᱹᱨᱩᱵ ᱠᱮᱫ ᱤᱧᱟᱜ
ᱢᱟᱬᱟᱝ ᱞᱟᱦᱟᱜ ᱰᱟᱦᱟᱨ ᱾
ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ
ᱞᱤᱪᱟᱹᱲ ᱢᱚᱱᱮ ᱛᱤᱧ ᱚᱪᱚᱲ
ᱵᱚᱦᱚᱜ ᱦᱟᱛᱟᱝ ᱮᱛᱟᱝ ᱮᱛᱟᱝ
ᱵᱟᱝ ᱜᱮᱧ ᱵᱩᱡᱽ ᱧᱟᱢ ᱟᱢᱟᱜ ᱵᱷᱮᱭᱟᱬ
ᱟᱢᱟᱜ ᱜᱚᱲᱦᱚᱱ ᱜᱚᱱᱚᱝ ᱾
ᱛᱤᱨᱮᱢ ᱛᱤᱭᱟᱹᱜ ᱠᱮᱫᱤᱧ
ᱦᱚᱨᱮᱢ ᱫᱮᱞᱟ ᱟᱹᱫᱤᱧ
ᱡᱤᱭᱚᱱ ᱡᱮᱸᱜᱮᱫ ᱡᱤᱭᱟᱹᱛ ᱰᱟᱦᱟᱨ
ᱥᱩᱠ ᱥᱟᱦᱟᱣ ᱥᱟᱶᱟᱨ ᱥᱟᱦᱟᱨ
ᱤᱧᱮᱢ ᱩᱫᱩᱜ ᱟᱹᱫᱤᱧ ᱾
ᱮᱱ ᱦᱚᱸ ᱩᱠᱩᱨᱤᱧ ᱵᱩᱡᱽ ᱧᱟᱢ
ᱟᱢᱟᱜ ᱛᱷᱩᱢ ᱜᱮᱧ ᱠᱷᱚᱡᱽ ᱟᱱ
ᱦᱤᱸᱥᱟᱹ ᱦᱤᱨᱠᱟᱹ ᱦᱮᱱᱚᱛ ᱦᱚᱨ ᱨᱮ
ᱥᱩᱭᱟᱹ ᱥᱩᱸᱜᱟᱹ ᱥᱮᱸᱜᱮᱞ ᱰᱟᱦᱟᱨ ᱨᱮ
ᱤᱧ ᱫᱚᱹᱧ ᱩᱰᱩᱰᱩᱵᱩᱭᱮᱱ ᱾
ᱵᱮᱨ ᱫᱚᱭ ᱞᱟᱦᱟ ᱟᱠᱟᱱ
ᱤᱧᱟᱜ ᱨᱩᱣᱟᱹᱲ ᱦᱚᱨ ᱫᱚ ᱥᱮᱴᱮᱨᱚᱜ ᱠᱟᱱ
ᱮᱱ ᱦᱚᱸ ᱵᱟᱝ ᱜᱮᱹᱧ ᱫᱤᱥᱟᱹ ᱡᱚᱝ
ᱟᱢᱟᱜ ᱵᱷᱮᱡᱟ ᱟᱢᱟᱜ ᱠᱷᱚᱸᱡᱟ ᱤᱧ ᱥᱟᱶ
ᱪᱮᱫᱟᱜ ᱵᱟᱝ ᱜᱮᱧ ᱵᱩᱡᱽ ᱡᱚᱝ ᱾
ᱢᱟᱹᱱᱢᱤ ᱜᱟᱫᱮᱞ ᱫᱟᱹᱱᱢᱤ ᱨᱩᱯ ᱜᱮ
ᱤᱧᱮ ᱜᱟᱥᱮᱨ ᱮᱥᱮᱫ ᱤᱧ ᱠᱟᱱ
ᱦᱤᱸᱥᱟᱹ ᱦᱤᱨᱠᱟᱹ ᱦᱤᱥᱠᱟᱹ ᱦᱮᱱᱚᱛ
ᱟᱹᱠᱩᱛ ᱟᱹᱲᱤᱥ ᱠᱟᱹᱦᱤᱸᱥ ᱠᱟᱛᱚᱨ ᱜᱮ
ᱤᱧᱮ ᱴᱚᱯᱟᱨ ᱮᱥᱮᱫ ᱤᱧ ᱠᱟᱱ ᱾
ᱵᱮᱸᱜᱮᱫ ᱢᱟᱨᱥᱟᱞᱮ ᱡᱷᱟᱹᱞᱥᱟᱹᱭᱮᱫ ᱛᱤᱧ
ᱫᱷᱟᱹᱨᱛᱤ ᱫᱷᱩᱲᱤ ᱞᱩᱴᱩᱯᱩᱸᱰᱩ
ᱥᱚᱱᱚᱛ ᱚᱱᱛᱚᱨ ᱮ ᱚᱡᱽᱨᱟ ᱮᱫ ᱛᱤᱧ
ᱢᱟᱭᱟ ᱢᱩᱦᱱᱤ ᱢᱩᱦᱤᱛ ᱢᱟᱱᱛᱟᱨ
ᱟᱦᱟᱨ ᱨᱮ ᱰᱩᱵᱩᱡᱮᱫ ᱛᱤᱧ ᱾
ᱛᱮᱦᱮᱧ ᱟᱹᱴᱩᱯᱟᱹᱴᱩ
ᱛᱟᱲᱟᱢ ᱦᱚᱨ ᱨᱮ ᱟᱴᱚᱜᱴᱟᱸᱵᱚᱜ
ᱫᱤᱥᱟᱹᱦᱟᱨᱟ ᱩᱛᱩᱫᱛᱩᱸᱵᱩᱫ
ᱵᱟᱹᱭᱨᱤ ᱛᱤᱛᱮ ᱥᱮᱵᱮᱫ ᱡᱮᱸᱵᱮᱫ
ᱡᱤᱣᱤ ᱛᱤᱧ ᱨᱮᱸᱡᱮᱫ ᱟᱸᱡᱮᱫ ᱾
ᱫᱮ ᱫᱮᱥᱮ ᱫᱤᱥᱟᱹ ᱟᱹᱧ ᱢᱮ ᱪᱟᱸᱫᱚ
ᱟᱺᱜᱤᱵᱷᱟᱨ ᱦᱤᱲᱤᱧ ᱥᱟᱹᱨᱤ ᱮᱱ ᱫᱚ
ᱵᱟᱝ ᱩᱨᱩᱢ ᱵᱟᱝ ᱯᱩᱨᱩᱱ ᱠᱟᱛᱮ
ᱪᱤᱠᱟᱹᱧ ᱨᱩᱣᱟᱹᱲ ᱟᱢ ᱴᱷᱮᱱ ᱟᱢᱟᱜ
ᱛᱟᱺᱜᱤ ᱪᱤᱠᱟᱹᱧ ᱥᱟᱹᱜᱩᱱ ᱾
