ᱤᱧ ᱫᱩᱧ ᱡᱟᱱᱟᱢ ᱮᱱᱟ ᱵᱩᱨᱩ ᱪᱮᱛᱟᱱ ᱠᱷᱚᱱ
ᱞᱟᱦᱟ ᱭᱮᱱᱟᱹᱧ ᱠᱚᱸᱫᱷᱟ ᱦᱚᱨ ᱛᱮ,
ᱪᱟᱞᱟᱣ ᱪᱟᱞᱟᱣ ᱛᱮ ᱦᱚᱨ ᱢᱟ ᱮᱥᱮᱫ ᱮᱱ
ᱯᱟᱨᱚᱢ ᱮᱱᱟᱹᱧ ᱚᱱᱟ ᱪᱮᱛᱟᱱ ᱛᱮ ᱾
ᱤᱱᱟᱹ ᱛᱟᱭᱚᱱ ᱟᱫᱚ ᱦᱚᱨᱤᱧ ᱧᱟᱢ ᱠᱮᱫ
ᱚᱸᱰᱮᱠᱷᱚᱱ ᱵᱟᱧ ᱞᱟᱦᱟ ᱫᱟᱲᱮᱭᱟᱫ,
ᱵᱩᱨᱩ ᱫᱷᱤᱨᱤ ᱠᱚᱦᱚᱸᱧ ᱜᱩᱸᱰᱟᱹ ᱤᱫᱤ ᱠᱮᱫ
ᱪᱚᱴ ᱠᱷᱚᱱᱤᱧ ᱟᱬᱜᱚᱱ’ ᱱᱚᱣᱟ ᱜᱤᱧ ᱥᱟᱭᱟᱛ ᱾
ᱪᱮᱦᱮᱞ ᱪᱮᱯᱮᱞᱤᱧ ᱠᱷᱤᱞᱰᱩ ᱮᱱᱮᱡ
ᱤᱧ ᱨᱤᱱ ᱜᱟᱛᱮ ᱠᱚ ᱥᱟᱞᱟᱜ,
ᱦᱮᱢᱟᱞ ᱦᱤᱸᱥᱤᱫ ᱦᱚᱭᱛᱮ ᱥᱮᱱ ᱦᱮᱡ
ᱥᱚᱠᱚᱲ ᱵᱚᱠᱚᱲ ᱞᱟᱸᱫᱟ ᱠᱟᱛᱤᱧ ᱪᱟᱞᱟᱜ ᱾
ᱱᱚᱝᱠᱟ ᱜᱮ ᱱᱚᱸᱰᱤᱧ ᱛᱚᱸᱜᱮ ᱠᱚᱜ ᱟ
ᱟᱨ ᱦᱚᱧ ᱞᱟᱦᱟᱜ ᱟᱰᱤ ᱥᱟᱸᱜᱤᱧ,
ᱤᱧ ᱤᱡ ᱴᱷᱟᱹᱠᱩᱨ ᱡᱤᱣ ᱴᱷᱮᱱ ᱞᱚᱜᱚᱱ ᱤᱧ ᱥᱮᱴᱮᱨ ᱠᱚᱜ ᱟ
ᱱᱚᱣᱟ ᱜᱮ ᱤᱧᱟᱜ ᱫᱷᱚᱨᱚᱢ ᱛᱤᱧ ᱾
ᱦᱚᱲ ᱠᱚ ᱦᱟᱡᱩᱜ ᱟ ᱟᱨ ᱦᱚᱸ ᱠᱚ ᱥᱮᱱᱚᱜ ᱟ
ᱤᱧ ᱢᱟᱹᱧ ᱪᱟᱞᱟᱜ ᱠᱟᱱ ᱱᱚᱝᱠᱟ ᱜᱤᱧ ᱪᱟᱞᱟᱜ,
ᱦᱚᱲ ᱠᱚ ᱫᱩᱠᱷᱩᱜ ᱟ ᱟᱨ ᱦᱚᱸ ᱠᱚ ᱡᱚᱞᱚᱱᱚᱜ ᱟ
ᱢᱤᱫ ᱢᱚᱱᱮ ᱥᱮᱵᱟ ᱱᱮᱦᱚᱨ ᱫᱤᱥᱟᱹ ᱚᱱᱟᱛᱮ ᱵᱟᱹᱧ ᱡᱟᱞᱟᱜ ᱾
ᱞᱩᱢᱩᱸᱡ ᱵᱟᱞᱤ ᱛᱤᱧ ᱞᱤᱸᱜᱤ ᱜᱚᱫᱚᱜ
ᱟᱰᱤ ᱪᱮᱸᱜᱷᱟ ᱫᱚᱢᱮᱞ ᱫᱚᱢᱮᱞ,
ᱵᱮᱲᱟ ᱛᱟᱨᱟᱥ ᱛᱤᱧ ᱡᱷᱟᱞᱠᱟᱣ ᱜᱚᱫᱚᱜ
ᱡᱮᱢᱚᱱ ᱥᱮᱨᱢᱟ ᱤᱯᱤᱞ ᱮᱸᱜᱮᱞ ᱾
ᱞᱤᱸᱜᱤ ᱤᱫᱤᱭᱟᱧ ᱥᱚᱱᱫᱷᱟᱲ ᱵᱟᱦᱟ
ᱯᱮᱨᱮᱡ ᱱᱟᱹᱭ ᱨᱤᱧ ᱥᱮᱴᱮᱨᱟ,
ᱜᱟᱵᱞᱟ ᱠᱟᱠᱚᱣᱟᱧ ᱦᱟᱠᱩ ᱨᱮᱴᱚ ᱡᱟᱦᱟ
ᱢᱮᱴᱟᱣᱜ ᱛᱟᱠᱚ ᱢᱚᱱᱮ ᱤᱧ ᱴᱷᱮᱱ ᱡᱟᱸᱦᱟᱸᱭ ᱯᱟᱸᱡᱟ ᱠᱚ ᱵᱮᱨᱟ ᱾
ᱪᱟᱸᱫᱚ ᱛᱟᱨᱟᱥ ᱛᱮ ᱜᱷᱟᱸᱥ ᱵᱩᱫᱟᱹ ᱫᱟᱱᱟᱝ ᱛᱮ
ᱞᱤᱸᱜᱤᱜ ᱟᱹᱧ ᱞᱮᱜᱮᱢ ᱞᱮᱜᱮᱢ,
ᱦᱩᱞᱩᱭ ᱦᱩᱞᱩᱭ ᱦᱚᱭ ᱤᱧ ᱥᱟᱶ ᱟᱱᱛᱮ
ᱫᱩᱞᱟᱹᱲ ᱫᱩᱯᱞᱟᱹᱲ ᱮ ᱛᱮᱸᱜᱮᱱ ᱾
ᱵᱟᱦᱟ ᱵᱟᱜᱟᱱ ᱞᱮᱠᱟᱛᱮ ᱤᱧ ᱫᱩᱧ ᱪᱟᱞᱟᱜ ᱨᱮ
ᱟᱰᱤ ᱱᱤᱨᱚᱲ ᱜᱤᱧ ᱟᱹᱭᱠᱟᱹᱣᱜ,
ᱥᱟᱜᱮᱱ ᱯᱚᱦᱟᱞ ᱜᱤᱫᱨᱟᱹ ᱤᱧᱟᱜ ᱠᱚᱞᱮ ᱨᱮ
ᱠᱷᱤᱞᱰᱩ ᱮᱱᱮᱡ ᱟᱰᱤ ᱠᱚ ᱨᱟᱹᱥᱠᱟᱹᱜ ᱾
ᱵᱩᱨᱩ ᱫᱷᱤᱨᱤᱧ ᱯᱟᱨᱚᱢᱟ, ᱯᱳᱞᱳ ᱠᱚ, ᱚᱲᱟᱜ ᱠᱚ
ᱟᱨ ᱦᱚᱧ ᱯᱟᱨᱚᱢ ᱤᱫᱤ ᱥᱟᱸᱜᱤᱧ ᱥᱮᱨᱢᱟ,
ᱪᱮᱬᱮ ᱪᱤᱯᱨᱩ, ᱡᱟᱱᱣᱟᱨ, ᱦᱚᱲ ᱠᱚ
ᱛᱮᱛᱟᱝ ᱡᱤᱣᱤ ᱟᱨᱩᱠᱚᱜ ᱢᱟ ᱾
ᱤᱧ ᱫᱚ ᱡᱷᱟᱨᱱᱟ ᱟᱯᱮ ᱫᱚ ᱥᱟᱨᱱᱟ
ᱟᱯᱮ ᱥᱟᱶ ᱨᱮᱜᱤᱧ ᱛᱟᱦᱮᱸ ᱠᱚᱜ ,
ᱤᱧ ᱛᱩᱞᱩᱡ ᱛᱮᱜᱮ ᱟᱯᱮ ᱯᱮ ᱟᱥᱩᱞ ᱞᱮᱱᱟ
ᱵᱟᱝ ᱠᱷᱟᱱ ᱵᱟᱯᱮ ᱛᱟᱦᱮᱸ ᱠᱚᱜ ᱾
ᱤᱧ ᱜᱮᱛᱚ ᱟᱫᱤᱢ ᱠᱟᱭᱨᱟ ᱜᱟᱡᱟᱲ ᱠᱷᱚᱱ
ᱥᱤᱛᱟᱹ ᱱᱟᱞᱟ ᱨᱤᱧ ᱵᱮᱱᱟᱣ ᱮᱱ,
ᱤᱧ ᱛᱩᱞᱩᱡ ᱛᱮ ᱞᱩᱜᱩ ᱵᱩᱨᱩ ᱠᱷᱚᱱ ᱜᱚᱥᱟᱸᱭ ᱠᱚ ᱟᱬᱜᱚ ᱦᱮᱡ ᱮᱱ ᱾
ᱤᱧ ᱥᱟᱶ ᱨᱮ ᱢᱮᱱᱟᱭ ᱜᱷᱟᱱᱴᱟ ᱵᱟᱲᱮ
ᱟᱨ ᱦᱚᱸ ᱫᱚᱨᱵᱟᱨ ᱪᱟᱴᱟᱱ ᱢᱚᱦᱚᱨ,
ᱟᱞᱚᱢ ᱢᱮᱱᱟ ᱫᱮᱞᱟ ᱢᱮᱱ ᱢᱮ ᱫᱩ ᱡᱟᱲᱤ
ᱞᱩᱜᱩ ᱵᱟᱵᱟ ᱴᱷᱮᱱ ᱥᱮᱴᱮᱨ ᱢᱮ ᱤᱧᱟᱜ ᱜᱚᱰ ᱡᱚᱦᱟᱨ ᱱᱮᱦᱚᱨ ᱾
ᱦᱚᱲ ᱠᱚ ᱪᱟᱞᱟᱜ ᱟ ᱟᱨ ᱦᱚᱸ ᱠᱚ ᱦᱟᱡᱩᱜ ᱟ
ᱤᱧ ᱢᱟᱹᱧ ᱪᱟᱞᱟᱜ ᱟ ᱱᱚᱝ ᱠᱟ ᱜᱮ ᱫᱤᱱ,
ᱤᱧ ᱢᱟᱧ ᱪᱟᱞᱟᱜ ᱟ ᱯᱟᱞᱮᱛ ᱤᱧ ᱟᱫᱚᱜ ᱟ
ᱤᱧᱤᱡ ᱜᱚᱥᱟᱸᱭ ᱤᱧᱤᱡ ᱟᱫᱤᱢ ᱢᱩᱞᱩᱠ ᱫᱷᱨᱤᱡ ᱤᱧ ᱥᱮᱵᱟ ᱵᱤᱱ ᱾
***