ᱢᱤᱫᱴᱟᱝ ᱠᱟᱰᱮᱡ ᱟᱨ ᱜᱮᱞᱴᱟᱝ ᱠᱟᱰᱮᱡ
ᱛᱚᱯᱷᱟᱛ ᱡᱟᱦᱟᱸ ᱢᱮᱱᱟᱜ,
ᱡᱩᱢᱤᱫᱽ ᱜᱮ ᱫᱟᱲᱮ
ᱫᱟᱲᱮᱜᱮ ᱫᱷᱚᱱ ᱥᱟᱣᱸᱨᱮ
ᱟᱯᱟᱥᱩᱞᱚᱜ ᱚᱱᱰᱮᱜᱮ ᱢᱮᱱᱟᱜ ।
ᱟᱹᱠᱤᱞ ᱵᱟᱝᱛᱮ
ᱟᱞᱚᱢ ᱠᱷᱟᱱᱰᱟᱣ ᱚᱠᱛᱚ
ᱦᱟᱴ ᱯᱟᱛᱟ ᱴᱟᱹᱱᱰᱤ ᱫᱟᱬᱟ,
ᱨᱚᱲ ᱯᱩᱥᱴᱟᱹᱣ ᱢᱮ
ᱟᱢᱟᱜ ᱚᱞ ᱥᱮᱬᱟᱭ ᱢᱮ
ᱟᱞᱚᱢ ᱛᱟᱦᱮᱱ ᱠᱟᱬᱟ।
ᱨᱟᱡᱽ ᱟᱹᱨᱤᱨᱮ ᱨᱟᱡᱽᱢᱮ
ᱮᱱᱮᱡ ᱥᱮᱨᱮᱧ ᱨᱮ ᱢᱚᱡᱽ
ᱨᱩᱻᱚᱨᱚᱝ ᱡᱚᱝ ᱢᱮ,
ᱡᱟ.ᱛᱤ ᱥᱟᱣᱸᱛᱟ ᱫᱷᱚᱨᱚᱢ
ᱢᱩᱪᱟᱹᱫᱚᱜ ᱠᱟᱱ ᱱᱟᱥᱮ ᱩᱭᱦᱟᱹᱨ ᱢᱮ ।
ᱞᱟᱦᱟ ᱟᱠᱟᱱᱟᱵᱚᱱ
ᱮᱴᱟᱜ ᱜᱟᱛᱟᱠ ᱰᱟᱦᱟᱨ ᱛᱮ
ᱛᱟᱲᱟᱢ ᱦᱚᱨ ᱨᱮ,
ᱮᱲᱮᱜ ᱠᱟᱱᱟᱢ ᱡᱩᱣᱟ.ᱱ
ᱟᱹᱲᱡᱷᱟᱹᱣ ᱟᱠᱟᱱᱟᱢ
ᱮᱱᱮᱡ ᱵᱚᱝᱜᱟ ᱵᱩᱨᱩ ᱨᱮ ।
ᱮᱲᱮ ᱞᱮᱱᱟᱭ ᱵᱟᱵᱟ ᱛᱤᱞᱠᱟ.
ᱞᱚᱵᱽᱞᱟᱞᱚᱪ ᱢᱟᱹᱱᱢᱤ ᱩᱭᱦᱟᱹᱨ ᱛᱮ,
ᱦᱤᱨᱤᱡ ᱯᱟᱹᱥᱤᱨ ᱦᱤᱴᱟᱹᱝ ᱡᱷᱟᱲᱟᱝ
ᱢᱮᱱᱟᱜ ᱵᱚ ᱡᱩᱢᱤᱫᱽ ᱵᱟᱝ ᱛᱮ।
ᱩᱭᱦᱟᱹᱨ ᱦᱟᱹᱡᱩᱜᱼᱟ “ᱜᱩᱱᱰᱩᱨᱤᱭᱟ.”
ᱱᱟᱜᱟᱢ ᱢᱩᱠᱨᱩᱲ ᱡᱩᱢᱤᱫᱽ ᱠᱮᱴᱮᱡ,
ᱚᱠᱟᱭᱮᱱᱟ ᱚᱱᱟ ᱤᱛᱟ. ᱫᱳᱲᱦᱚ
ᱵᱟᱝ ᱧᱮᱸᱞᱚᱜ ᱠᱟᱱ ᱚᱱᱟ ᱨᱮᱱᱟᱜ ᱯᱮᱴᱮᱡ?
ᱡᱚᱜᱟᱣ ᱟᱵᱚᱱ ᱡᱚᱛᱚᱱ ᱟᱵᱚᱱ
ᱮᱨ ᱚᱢᱚᱱ ᱥᱩᱞᱩᱠ ᱯᱚᱦᱟ ᱫᱟᱨᱮ,
ᱱᱤᱨᱟ.ᱭ ᱢᱚᱱᱮᱨᱮ
ᱥᱚᱨᱮᱥ ᱥᱚᱱᱮᱨ ᱥᱟᱣᱸᱛᱟᱨᱮ
ᱟᱨᱡᱟᱣ ᱟᱵᱚᱱ ᱚᱱᱟ ᱫᱟᱲᱮ।
ᱧᱤᱸᱨ ᱞᱮᱱᱟᱠᱟ ᱯᱩᱸᱰ ᱥᱟᱦᱮᱵᱽ ᱥᱚᱨᱠᱟᱨ
‘ᱦᱩᱞ’ ᱥᱮᱸᱜᱮᱞ ᱵᱚᱛᱚᱨ ᱛᱮ,
ᱥᱤᱫᱚᱼᱠᱟ.ᱱᱦᱩ ᱯᱷᱩᱞᱚ ᱡᱷᱟᱱᱚᱣᱟᱜ
ᱥᱩᱛᱩᱜ ᱰᱟᱦᱟᱨ ᱟᱹᱭᱩᱨ ᱛᱮ।
ᱡᱩᱣᱟᱹᱱ ᱵᱮᱲᱟᱨᱮ ᱟᱹᱜᱩᱣᱟᱹᱱ ᱩᱛᱤᱡ
ᱡᱩᱢᱤᱫᱽ ᱥᱟᱣᱸᱨᱮ ᱫᱚᱦᱚᱭ ᱢᱮ,
ᱥᱟᱣᱸᱛᱟ ᱟᱹᱨᱤ ᱟᱹᱠᱤᱞ ᱵᱮᱲᱟᱨᱮ
ᱥᱤᱠᱤᱛ ᱥᱮᱭᱟᱱ ᱥᱩᱥᱟᱹᱨ ᱥᱚᱨᱮᱥ ᱫᱚᱦᱚᱭ ᱢᱮ ।
ᱜᱟᱯᱟ ᱞᱟᱹᱜᱤᱱ ᱫᱚᱲᱦᱚ ᱵᱮᱱᱟᱣ ᱫᱚᱦᱚᱭ ᱢᱮ
ᱟᱞᱚᱢ ᱠᱚᱭᱚᱜᱽ ᱮᱴᱟᱜ ᱥᱮᱫ,
ᱛᱮᱦᱮᱧ ᱠᱚ ᱡᱩᱣᱟᱹᱱ ᱜᱮ
ᱦᱟᱹᱡᱩᱜᱠᱟᱱ ᱫᱤᱱ ᱨᱤᱱ ᱢᱟᱲᱟᱝ ᱥᱮᱫ।