ᱢᱤᱫ ᱚᱠᱛᱚ ᱛᱟᱦᱮᱸ ᱠᱟᱱᱟ ᱟᱵᱚᱣᱟᱜ ᱯᱟᱹᱨᱥᱤ ᱫᱚ ᱨᱚᱲ ᱯᱟᱹᱨᱥᱤ ᱨᱮ ᱞᱮᱠᱷᱟᱜ ᱠᱟᱱ ᱛᱟᱦᱮᱸᱫ ᱾ ᱜᱩᱨᱩ ᱜᱚᱢᱠᱮ ᱚᱯᱮᱞ ᱮᱱᱟ ᱟᱵᱚᱣᱟᱜ ᱯᱟᱹᱨᱥᱤ ᱨᱚᱲ ᱯᱟᱹᱨᱥᱤ ᱠᱷᱚᱱ ᱚᱞ ᱯᱟᱹᱨᱥᱤ ᱛᱮ ᱟᱹᱨᱩ ᱮᱱᱟ ᱾ ᱟᱵᱚᱣᱟᱜ ᱯᱟᱹᱨᱥᱤ ᱛᱮᱦᱚᱸ ᱯᱚᱛᱚᱵ ᱯᱩᱛᱷᱤ ᱚᱞ ᱮᱱᱟ, ᱥᱟᱶᱦᱮᱫ ᱪᱟᱨᱪᱟ ᱮᱱᱟ ᱾ ᱤᱱᱟᱹ ᱛᱟᱭᱚᱢ ᱰᱤᱡᱤᱴᱟᱞ, ᱤᱱᱴᱟᱨᱱᱮᱴ ᱡᱩᱜᱽ ᱥᱮᱴᱮᱨ ᱮᱱᱟ ᱾ ᱯᱟᱹᱨᱥᱤ, ᱥᱟᱶᱦᱮᱫ, ᱥᱟᱬᱮᱥ, ᱮᱞᱠᱷᱟ, ᱚᱛᱱᱚ ᱡᱚᱛᱚᱣᱟᱜ ᱰᱤᱡᱤᱴᱟᱭᱤᱡᱽ ᱮᱱᱟ ᱾
ᱤᱠᱷᱟᱹᱱ ᱟᱵᱚ ᱫᱚ ᱚᱱᱟ ᱨᱮᱥ ᱨᱮᱵᱚ ᱛᱟᱭᱚᱢ ᱧᱚᱜ ᱞᱮᱱᱟ ᱾ ᱚᱱᱟ ᱰᱤᱡᱤᱴᱟᱭᱡᱮᱥᱚᱱ ᱨᱮᱥ ᱨᱮᱵᱚ ᱛᱟᱭᱚᱢ ᱟᱠᱟᱱᱟ ᱵᱟᱰᱟᱭ ᱠᱟᱛᱮ ᱡᱟᱦᱟᱸᱭ ᱠᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱰᱤᱡᱤᱴᱟᱭᱡᱮᱥᱚᱱ ᱠᱟᱹᱢᱤ ᱯᱩᱭᱞᱩ ᱠᱚ ᱮᱦᱚᱵ ᱞᱮᱫᱟ ᱩᱱᱠᱩ ᱠᱚ ᱢᱩᱫᱽ ᱨᱮ ᱨᱟᱢᱡᱤᱛ ᱴᱩᱰᱩ ᱟᱜ ᱧᱩᱛᱩᱢ ᱫᱚ ᱢᱟᱬᱟᱝ ᱨᱮᱜᱮ ᱦᱮᱡ ᱜᱚᱫᱚᱜᱼᱟ ᱾
ᱦᱟᱞᱮ ᱜᱮ ᱢᱟᱨᱟᱝ ᱢᱚᱱᱛᱨᱤ ᱱᱚᱨᱮᱱᱫᱽᱨᱚ ᱢᱳᱫᱤ ᱢᱚᱱ ᱠᱤ ᱵᱟᱛ ᱨᱮ ᱨᱟᱢᱡᱤᱛ ᱟᱨ ᱥᱟᱶᱛᱮᱱ ᱠᱚᱣᱟᱜ ᱰᱤᱡᱤᱴᱟᱭᱡᱮᱥᱚᱱ ᱠᱟᱹᱢᱤ ᱟᱹᱰᱤᱡ ᱮ ᱠᱩᱥᱤ ᱟᱠᱟᱣᱟᱫ ᱟ᱾
ᱜᱟᱛᱮ ᱠᱚ ᱛᱟᱞᱟ ᱨᱮ ᱠᱩᱥᱤ ᱛᱮ ᱦᱚᱯᱚᱱ ᱵᱟᱹᱵᱩ ᱢᱮᱱᱛᱮ ᱠᱚ ᱦᱚᱦᱚ ᱟᱭ ᱠᱟᱱ ᱨᱟᱢᱡᱤᱛ ᱫᱚ ᱱᱚᱶᱟ ᱟᱹᱦᱤᱵᱟᱹᱦᱤ ᱨᱮ ᱵᱤᱨᱢᱟᱹᱞᱤ ᱜᱷᱟᱨᱚᱸᱧᱡᱽ ᱯᱟᱦᱴᱟ ᱠᱷᱚᱱ ᱟᱭᱢᱟ ᱥᱟᱨᱦᱟᱣ ᱪᱟᱞ ᱦᱩᱭᱩᱜ ᱠᱟᱱᱟ ᱾
ᱨᱟᱢᱡᱤᱛ ᱫᱚ ᱱᱤᱛ ᱡᱚᱥᱤᱯᱩᱨ ᱛᱚᱦᱥᱤᱞ ᱨᱮ ᱮ. ᱟᱨ. ᱟᱭ. ᱞᱮᱠᱟᱛᱮ ᱠᱟᱹᱢᱤ ᱥᱟᱶᱛᱮ ᱚᱞᱪᱤᱠᱤ ᱴᱮᱠ, ᱵᱤᱨᱢᱟᱹᱞᱤ ᱟᱨ ᱥᱟᱱᱛᱟᱲᱤ ᱣᱤᱠᱤᱯᱮᱰᱤᱭᱟ ᱮᱢᱟᱱ ᱜᱟᱶᱛᱟ ᱥᱟᱶ ᱡᱚᱲᱟᱣ ᱢᱮᱱᱟᱭᱟ ᱾
ᱰᱤᱡᱤᱴᱟᱭᱡᱮᱥᱚᱱ ᱠᱟᱹᱢᱤ ᱫᱚ ᱟᱹᱰᱤ ᱢᱟᱨᱟᱝ ᱠᱟᱹᱢᱤ ᱠᱟᱱᱟ ᱾ ᱮᱴᱟᱜ ᱯᱟᱹᱨᱥᱤ ᱥᱟᱶ ᱛᱷᱚᱯᱟ ᱨᱮ ᱛᱷᱚᱯᱟ ᱢᱮᱥᱟ ᱠᱟᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱟᱲᱟᱢ ᱚᱪᱚᱭ ᱞᱟᱹᱜᱤᱫ ᱠᱷᱟᱱ ᱟᱵᱚ ᱡᱚᱛᱚ ᱦᱚᱲᱟᱜ ᱜᱚᱲᱚ ᱮᱠᱟᱞ ᱜᱮ ᱞᱟᱹᱠᱛᱤ ᱠᱟᱱᱟ ᱾ ᱫᱮᱞᱟ ᱟᱵᱚ ᱦᱚᱸ ᱚᱱᱟ ᱠᱟᱹᱢᱤ ᱨᱮ ᱜᱚᱲᱚ ᱵᱚ ᱮᱢᱟ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ, ᱚᱞᱪᱤᱠᱤ ᱰᱤᱡᱤᱴᱟᱞ ᱫᱩᱱᱤᱭᱟᱹ ᱨᱮᱵᱚ ᱡᱷᱟᱞᱠᱟᱣ ᱚᱪᱚᱭᱟ ᱾
