ᱟᱞᱮ ᱡᱩᱣᱟᱹᱱ ᱠᱚᱲᱟ ᱠᱩᱲᱤ
ᱢᱮᱛᱟᱞᱮ ᱠᱟᱱᱟᱭ ᱚᱠᱚᱭ ᱵᱷᱚᱝᱠᱚᱲ
ᱧᱮᱞ ᱯᱮ ᱟᱞᱮᱭᱟᱜ ᱠᱟᱹᱨᱤᱠᱚᱞ ᱾
ᱛᱤᱠᱤ ᱦᱩᱲᱩᱞᱮ ᱚᱢᱚᱱ ᱚᱪᱚᱭᱟ
ᱫᱷᱟᱹᱨᱛᱤ ᱞᱮ ᱫᱷᱩᱲᱤᱭᱟ ᱢᱤᱫ ᱰᱚᱸᱰᱮᱠ ᱨᱮ
ᱮᱢ ᱫᱟᱲᱮᱭᱟᱜ ᱞᱮ ᱡᱤᱵᱚᱱ
ᱜᱩᱡᱩᱜ ᱠᱟᱱᱟᱭ ᱡᱟᱦᱟᱸᱭ ᱦᱚᱲ,
ᱠᱟᱴᱟ ᱞᱮᱵᱮᱫ ᱠᱟᱛᱮ ᱧᱤᱫᱟᱹ ᱪᱟᱸᱫᱚ ᱨᱮ
ᱪᱷᱩᱴᱟᱹᱣ ᱟᱠᱟᱱ ᱟᱞᱮ
ᱟᱨ ᱦᱚᱸ ᱱᱟᱣᱟ ᱱᱟᱣᱟᱱᱟᱜ ᱩᱜᱼᱨᱟᱹᱞ ᱾
ᱨᱟᱹᱜᱤᱜ ᱨᱮᱦᱚᱸ ᱯᱮ
ᱟᱨ ᱵᱟᱝ ᱮᱜᱮᱨ ᱨᱮᱦᱚᱸ ᱯᱮ
ᱵᱟᱹᱜᱤ ᱭᱟᱜᱼᱟ ᱞᱮ,
ᱟᱛᱟᱨ ᱛᱚᱨᱚᱡ ᱤᱫᱤᱭᱟᱞᱮ
ᱵᱟᱹᱲᱤᱡ ᱨᱟᱭᱨᱤᱛ ᱢᱟᱬᱟᱝᱼᱟᱜ,
ᱢᱟᱱᱟᱞᱮ ᱨᱮᱦᱚᱸ ᱯᱮ
ᱵᱟᱯᱮ ᱠᱩᱥᱤᱜ ᱨᱮᱦᱚᱸ
ᱟᱯᱱᱟᱨᱟᱞᱮ ᱱᱟᱣᱟ ᱱᱟᱜ ᱾
ᱱᱟᱣᱟ ᱫᱟᱹᱨᱛᱤ ᱨᱤᱱ
ᱱᱟᱣᱟ ᱯᱷᱟᱹᱠᱬᱟᱹᱜ ᱟᱱ ᱪᱮᱬᱮ ᱟᱞᱮ
ᱩᱰᱟᱹᱣᱚᱜ ᱟᱞᱮ ᱞᱤᱞ ᱥᱮᱨᱢᱟ ᱛᱮ
ᱟᱸᱫᱚᱲᱟᱞᱮ ᱜᱚᱴᱟ ᱯᱟᱲᱟ
ᱯᱷᱟᱹᱜᱩᱱ ᱵᱚᱝᱜᱟ ᱠᱚᱭᱮᱞ ᱞᱮᱠᱟ
ᱢᱟᱹᱱᱢᱤ ᱫᱩᱞᱟᱹᱲ ᱥᱮᱨᱮᱧ ᱨᱟᱦᱟᱛᱮ ᱾
ᱟᱹᱰᱤ ᱟᱹᱰᱤ ᱞᱮ ᱞᱟᱜᱟ ᱭᱮᱭᱟ
ᱵᱟᱹᱲᱤᱡ ᱵᱟᱰᱚᱦᱤ, ᱡᱟᱸᱦᱟᱭ
ᱥᱟᱨᱟᱣᱱᱟ ᱵᱤᱨ ᱠᱷᱟᱪᱟ ᱵᱟᱪᱟᱭᱟᱭ
ᱟᱹᱰᱤ ᱟᱹᱰᱤ ᱥᱟᱨᱦᱟᱣ ᱟᱞᱮᱭᱟᱜ ᱧᱟᱢᱟᱭ
ᱢᱟᱹᱱᱢᱤ ᱠᱚᱣᱟᱜ ᱢᱩᱨᱟᱹᱫᱽ ᱡᱟᱦᱟᱸᱭ ᱫᱚᱦᱚ ᱭᱟᱭ ᱾
ᱮᱲᱮ ᱮᱯᱲᱮ ᱛᱟᱞᱚᱢ ᱤᱫᱤᱢᱟ
ᱯᱟᱹᱯᱤ ᱠᱚᱣᱟᱜ ᱨᱟᱡᱽ ᱢᱩᱪᱟᱹᱫ ᱤᱫᱤ ᱢᱟ
ᱪᱷᱤᱛᱤ ᱵᱤᱛᱤᱢᱟ ᱟᱹᱰᱤ ᱞᱚᱜᱚᱱ
ᱞᱩᱜᱩ ᱵᱩᱨᱩ ᱯᱩᱦᱩ ᱞᱮᱠᱟ
ᱱᱤᱨᱢᱟᱭᱟ ᱢᱟᱹᱱᱢᱤ ᱭᱟᱜ ᱢᱩᱞᱩᱠ
ᱟᱨ ᱵᱟᱝᱠᱷᱟᱱ ᱵᱟᱹᱱᱩᱜᱼᱟ ᱥᱩᱞᱩᱠ ᱾
ᱵᱚᱦᱚᱜ ᱪᱮᱛᱟᱱ ᱨᱮ ᱦᱟᱹᱨᱭᱟᱹᱲ ᱪᱤᱨ
ᱛᱤ~ᱨᱮ ᱛᱟᱞᱮ ᱥᱟᱥᱟᱝ ᱥᱟᱠᱣᱟ
ᱯᱚᱲᱚᱭ ᱯᱚᱲᱚᱭ ᱪᱮᱬᱮ ᱟᱞᱮ
ᱞᱤ~ᱞ ᱥᱮᱨᱢᱟ ᱨᱮ ᱩᱰᱟᱹᱣ ᱵᱟᱲᱟᱭᱟ ᱞᱮ ᱾
ᱧᱮᱞ ᱠᱮᱜᱼᱟ ᱞᱮ, ᱧᱮᱞ ᱠᱮᱜᱼᱞᱮ
ᱟᱹᱰᱤ ᱰᱮᱦᱮᱨ ᱞᱮ ᱧᱮᱞ ᱠᱮᱜᱼᱟ
ᱧᱮᱧᱮᱞ ᱨᱮᱭᱟᱜ ᱡᱩᱜᱽ ᱯᱟᱨᱚᱢᱮᱱᱟ
ᱮᱴᱟᱜ ᱪᱟᱸᱫᱚ ᱱᱤᱛ ᱮ ᱨᱟᱠᱟᱵ ᱮᱱᱟ
ᱫᱩ~ᱫᱩ~ ᱧᱤᱨ ᱯᱮ ᱞᱚᱜᱚᱱ ᱞᱚᱜᱚᱱ
ᱠᱩᱸᱵᱽᱲᱩ ᱛᱩᱞᱩᱡ ᱟᱯᱮᱯᱮ
ᱟᱸᱜᱟ ᱧᱟᱢ ᱮᱱᱟ ᱾
ᱩᱭᱦᱟᱹᱨ ᱨᱮ ᱛᱟᱞᱮ ᱱᱟᱣᱟ ᱵᱤᱪᱟᱹᱨ
ᱦᱚᱲᱢᱚ ᱨᱮ ᱮᱴᱟᱜ ᱞᱮᱠᱚᱢ
ᱥᱟᱹᱨᱤ ᱫᱷᱚᱨᱚᱢ ᱨᱤᱱ ᱫᱟᱜᱼᱨᱟᱢ ᱠᱚ ᱟᱞᱮ
ᱮᱲᱮ ᱠᱟᱛᱷᱟ ᱵᱟᱝ ᱞᱮ ᱟᱸᱜᱼᱡᱚᱢ ᱾
ᱧᱮᱞ ᱠᱚᱣᱟᱞᱮ ᱡᱚᱛᱚ ᱢᱟᱹᱱᱢᱤ
ᱢᱤᱫᱴᱤᱡ ᱢᱮᱫ ᱛᱮ
ᱛᱚᱞ ᱠᱚᱣᱟᱞᱮ ᱡᱚᱛᱚ ᱢᱟᱹᱱᱢᱤ
ᱫᱩᱯᱩᱞᱟᱹᱲ ᱥᱟᱹᱜᱟᱹᱭ ᱛᱮ
ᱱᱟᱣᱟ ᱡᱩᱜᱽ ᱨᱤᱱ ᱢᱟᱹᱱᱢᱤ ᱟᱞᱮ
ᱱᱟᱦᱟᱜ ᱡᱩᱜᱽ ᱨᱤᱱ ᱢᱟᱹᱱᱢᱤ
ᱠᱟᱛᱷᱟ ᱫᱚ ᱵᱟᱝᱼᱟ, ᱨᱚᱲ ᱦᱚᱸ ᱵᱟᱝᱼᱟ
ᱧᱮᱞ ᱧᱟᱢ ᱚᱪᱚᱭᱟᱞᱮ ᱠᱟᱹᱢᱤ ᱾
