ᱟᱞᱮ ᱫᱚ ᱥᱟᱫᱽ ᱛᱮᱫᱚ ᱵᱟᱝ
ᱨᱮᱸᱜᱮᱡ ᱛᱮ ᱾
ᱟᱞᱮ ᱫᱚ ᱫᱟᱲᱟᱱ ᱞᱟᱹᱜᱤᱫ ᱫᱚ ᱵᱟᱝ
ᱞᱟᱡ ᱟᱥᱩᱞᱚᱜ ᱛᱮ᱾
ᱚᱝᱠᱟ ᱢᱟᱛᱚ ᱵᱟᱝ ᱜᱮ ᱵᱟᱹᱱᱩᱜ
ᱚᱲᱟᱜ ᱨᱮ᱾
ᱠᱟᱹᱢᱤ ᱠᱚᱫᱚ ᱚᱲᱟᱜ ᱨᱮᱫᱚ
ᱵᱟᱝ ᱧᱟᱢᱚᱜ ᱛᱮ᱾
ᱟᱞᱮ ᱫᱚ ᱚᱱᱟ ᱠᱷᱟᱹᱛᱤᱨ ᱜᱮ
ᱵᱟᱦᱮᱨ ᱠᱟᱹᱢᱤ᱾
ᱞᱟᱡ ᱟᱥᱩᱞᱚᱜ ᱥᱩᱢᱩᱝ ᱜᱮ
ᱵᱟᱝᱞᱮ ᱫᱟᱢᱤ᱾
ᱚᱠᱚᱭ ᱠᱚᱫᱚ ᱮᱨᱟ-ᱩᱨᱩ ᱵᱟᱜᱤ ᱟᱛᱮᱜ
ᱦᱮᱡ ᱟᱠᱟᱱᱟᱞᱮ᱾
ᱟᱠᱚᱭ ᱠᱚᱫᱚ ᱥᱟᱱᱟᱢ ᱛᱮᱜᱮ
ᱠᱟᱹᱢᱤ ᱠᱟᱱ ᱛᱟᱦᱮᱱᱟᱞᱮ᱾
ᱥᱟᱱᱟᱢ ᱜᱮ ᱛᱷᱤᱨ ᱩᱛᱟᱹᱨ ᱮᱱᱟ
ᱠᱟᱹᱢᱤ ᱫᱚ ᱛᱷᱩᱠᱩᱢ᱾
ᱡᱟᱦᱟ ᱛᱤᱱᱟᱹᱜ ᱟᱨᱡᱟᱣᱟᱜ
ᱢᱮᱱᱟᱜ ᱚᱱᱟ ᱥᱩᱢᱩᱝ᱾
ᱟᱫᱚ ᱵᱟᱦᱮᱨ ᱛᱟᱦᱮ ᱠᱟᱛᱮᱜ
ᱪᱮᱫᱞᱮ ᱪᱤᱠᱟᱹᱭ ᱾
ᱠᱟᱹᱢᱤ ᱠᱚᱫᱚ ᱡᱷᱚᱛᱚ ᱵᱚᱱᱫᱽ ᱟᱠᱟᱱ
ᱨᱩᱣᱟᱹᱲᱚᱜ ᱞᱮ ᱨᱤᱠᱟᱹᱭ᱾
ᱛᱟᱲᱟᱢ ᱟᱛᱮᱜ ᱦᱟᱱᱮ ᱥᱟᱜᱤᱧ ᱠᱷᱚᱱ
ᱱᱤᱛ ᱰᱟᱦᱟᱨ ᱨᱮ ᱾
ᱥᱤᱛᱩᱝ ᱛᱮ ᱩᱫᱜᱟᱹᱨ ᱡᱚᱨᱚᱜ
ᱛᱟᱲᱟᱢ ᱟᱞᱮ ᱦᱟᱨᱮ ᱯᱷᱟᱨᱮ᱾
ᱦᱟᱱᱮ ᱵᱷᱳᱨ ᱨᱮᱞᱮ ᱩᱰᱩᱠ ᱟᱠᱟᱱ
ᱜᱷᱮᱸᱴ ᱢᱚᱴ ᱟᱛᱮᱜ᱾
ᱛᱟᱲᱟᱢ ᱰᱟᱦᱟᱨ ᱥᱟᱺᱜᱤᱧ ᱟᱠᱟᱱ
ᱡᱟᱸᱜᱟ ᱨᱟᱦᱟᱜ ᱱᱚᱛᱮ᱾
ᱩᱰᱟᱹᱱ ᱜᱟᱰᱤ ᱨᱮ ᱫᱮᱡ ᱠᱟᱛᱮᱜ
ᱨᱩᱣᱟᱹᱲ ᱟᱰᱤ ᱟᱨᱟᱢ᱾
ᱥᱤᱧ ᱚᱛ ᱨᱮᱜᱮ ᱠᱟᱢᱤ ᱠᱟᱛᱮᱜ
ᱟᱞᱮ ᱠᱷᱟᱱ ᱫᱚ ᱛᱟᱲᱟᱢ᱾
ᱰᱟᱦᱟᱨ ᱨᱮᱜᱮ ᱥᱮᱛᱟᱜ ᱟᱹᱭᱩᱵ
ᱢᱟᱦᱟ ᱠᱷᱟᱸᱰᱟᱣᱜ ᱠᱟᱱ᱾
ᱚᱲᱟᱜ ᱫᱚ ᱥᱟᱺᱜᱤᱧ ᱜᱮᱭᱟ
ᱧᱤᱫᱟᱹ ᱦᱚᱞᱮ ᱛᱟᱲᱟᱢ ᱠᱟᱱ᱾
ᱛᱟᱲᱟᱢ ᱡᱟᱸᱜᱟ ᱰᱟᱦᱟᱨ ᱪᱮᱛᱟᱱ
ᱪᱚᱨᱦᱚᱫ ᱯᱟᱱᱟᱦᱤ ᱛᱟᱲᱟᱢ᱾
ᱛᱟᱲᱟᱢ ᱛᱟᱲᱟᱢ ᱩᱫᱜᱟᱹᱨᱚᱜ ᱡᱟᱸᱜᱟ
ᱮᱱᱦᱚ ᱥᱮᱱᱚᱜ ᱢᱟᱲᱟᱝ᱾
ᱚᱠᱚᱭ ᱠᱚᱫᱚ ᱜᱤᱫᱽᱨᱟᱹ-ᱯᱤᱫᱽᱨᱟᱹ
ᱜᱩᱜᱩ – ᱦᱮᱢ ᱠᱟᱛᱮᱜ᱾
ᱛᱟᱲᱟᱢ ᱠᱟᱱᱟᱞᱮ ᱚᱲᱟᱜ ᱥᱮᱴᱮᱨᱚᱜ
ᱰᱟᱦᱟᱨ ᱨᱮᱠᱚ ᱜᱟᱛᱮᱜ᱾
ᱥᱮᱛᱟᱜ ᱟᱭᱩᱯ ᱛᱟᱲᱟᱢ ᱛᱟᱲᱟᱢ ᱛᱮ
ᱯᱟᱱᱟᱦᱤ ᱯᱷᱤᱛᱟᱹ ᱛᱚᱯᱟᱜ᱾
ᱟᱞ-ᱠᱟᱛᱨᱟ ᱛᱮ ᱵᱮᱱᱟᱣ ᱰᱟᱦᱟᱨ
ᱢᱮᱫ ᱨᱮᱜᱮ ᱞᱟᱜᱟᱜ᱾
ᱰᱟᱦᱟᱨ ᱨᱮᱜᱮ ᱡᱚᱢ ᱧᱩᱭ ᱟᱞᱮ
ᱟᱨᱡᱟᱣ ᱠᱟᱣᱰᱤ ᱠᱷᱚᱱᱟᱜ ᱾
ᱪᱟᱸᱫᱳ ᱨᱩᱯᱤ ᱢᱟᱱᱢᱤ ᱠᱚᱫᱚ
ᱜᱚᱲᱚ ᱦᱚᱸ ᱠᱚ ᱮᱢᱟᱜ᱾
ᱵᱮᱝᱜᱚᱞ,ᱟᱥᱟᱢ ᱥᱟᱱᱟᱢ ᱯᱚᱱᱚᱛ
ᱟᱞᱮ ᱚᱲᱟᱜ ᱞᱮ ᱨᱩᱣᱟᱹᱲ᱾
ᱥᱟᱱᱟᱢ ᱯᱚᱱᱚᱛ ᱥᱟᱱᱟᱢ ᱰᱟᱦᱟᱨ
ᱡᱟᱸᱜᱟ ᱢᱟᱭᱟᱢ ᱩᱡᱟᱹᱲ᱾
ᱰᱟᱦᱟᱨ ᱨᱮᱜᱮ ᱚᱠᱚᱭ ᱠᱚᱫᱚ
ᱛᱟᱲᱟᱢ ᱢᱩᱪᱟᱹᱛ ᱥᱟᱸᱦᱮᱫᱽ᱾
ᱟᱥᱟ ᱫᱚ ᱚᱲᱟᱜ ᱥᱮᱴᱮᱨ
ᱰᱟᱦᱟᱨ ᱨᱮ ᱵᱟᱝᱠᱚ ᱵᱮ°ᱜᱮᱫᱽ᱾
ᱜᱤᱫᱽᱨᱟᱹᱭ ᱠᱩᱞᱤ ᱚᱠᱟᱛᱮ ᱪᱟᱞᱟᱜ
ᱱᱟᱣᱟ ᱟᱝᱜᱚᱨᱚᱜ ᱦᱚᱨᱚᱜ᱾
ᱛᱤᱱᱟᱹᱜ ᱥᱟᱺᱜᱤᱧ ᱮᱻᱜᱚ,ᱮᱻᱵᱟ?
ᱟᱡᱚᱢᱛᱮ ᱢᱮᱫ ᱫᱟᱜ ᱡᱚᱨᱚᱜ᱾
ᱚᱲᱟᱜ ᱠᱷᱚᱱᱟᱜ ᱟᱭᱳᱭ ᱯᱷᱳᱱ-ᱟ
ᱚᱠᱟᱨᱮ ᱵᱮᱴᱟ ᱱᱤᱛᱚᱜ?
ᱨᱟᱜ-ᱨᱟᱜᱛᱮ ᱛᱮᱞᱟᱧ ᱮᱢ-ᱟ
ᱥᱮᱴᱮᱨ ᱤᱫᱟᱹᱧ ‘ᱱᱚᱜ-ᱚᱭᱛᱚ’᱾
***
