ᱛᱤᱞᱟᱹᱭ ᱡᱷᱟᱹᱨᱤ ᱟᱹᱛᱩ ᱫᱚ ᱢᱤᱫ ᱢᱟᱨᱟᱝ ᱨᱟᱹᱥᱤ ᱟᱹᱛᱩ ᱠᱟᱱᱟ᱾ ᱞᱚᱫᱷᱮᱭᱟ ᱴᱩᱰᱩ ᱫᱚ ᱤᱱᱟᱹ ᱫᱷᱟᱨᱟ ᱯᱟᱹᱥᱤ ᱨᱤᱱᱤᱡ ᱧᱩᱛᱩᱢᱟᱱ ᱠᱤᱥᱟᱹᱬ ᱠᱟᱱᱟ ᱟᱨ ᱟᱹᱛᱩ ᱨᱤᱱᱤᱡ ᱢᱟᱹᱡᱷᱤ ᱦᱚᱸᱭ ᱛᱟᱦᱮᱱ ᱠᱟᱱᱟ᱾ ᱥᱮᱫᱟᱭ ᱦᱟᱯᱲᱟᱢ ᱠᱚᱨᱮ ᱠᱷᱚᱱ ᱜᱮ ᱴᱩᱰᱩ ᱜᱤᱥᱴᱤᱭᱟᱜ ᱵᱚᱸᱥᱚ ᱵᱩᱱᱤᱭᱟᱹᱫ ᱧᱩᱛᱩᱢ ᱛᱟᱠᱚ ᱢᱮᱱᱟᱜᱼᱟ᱾ ᱞᱚᱫᱷᱮᱭᱟ ᱢᱟᱹᱡᱷᱤ ᱡᱟᱹᱥᱛᱤ ᱵᱟᱭ ᱚᱞ ᱯᱟᱲᱦᱟᱣ ᱟᱠᱟᱱ ᱨᱮᱦᱚᱸ ᱟᱹᱰᱤ ᱪᱟᱞᱟᱠ ᱪᱚᱛᱩᱨ ᱦᱚᱲ ᱠᱟᱱᱟᱭ᱾ ᱟᱹᱡᱤᱡ ᱢᱟᱨᱟᱝ ᱦᱚᱯᱚᱱ ᱠᱟᱹᱨᱩ ᱜᱮ ᱱᱟᱭᱠᱮ ᱟᱠᱟᱱᱟᱭ᱾
ᱟᱹᱛᱩ ᱢᱩᱪᱟᱹᱫ ᱨᱮ ᱢᱤᱫ ᱢᱟᱨᱟᱝ ᱯᱩᱠᱷᱨᱤ ᱢᱮᱱᱟᱜᱼᱟ᱾ ᱚᱱᱟ ᱯᱩᱠᱷᱨᱤ ᱫᱚ ᱥᱚᱨᱠᱟᱨᱤ ᱯᱩᱲᱭᱟᱹ ᱜᱮ ᱛᱟᱦᱮᱸ ᱠᱟᱱᱛᱮ ᱟᱹᱛᱩ ᱦᱚᱲ ᱠᱚ ᱜᱟᱞᱢᱟᱨᱟᱣ ᱜᱚᱴᱟ ᱠᱟᱛᱮ ᱟᱹᱛᱩ ᱨᱮᱱᱟᱜ ᱯᱷᱚᱸᱰ ᱴᱟᱠᱟ ᱛᱮᱠᱚ ᱞᱟ ᱚᱪᱚ ᱞᱮᱜᱼᱟ ᱟᱨ ᱥᱮᱨᱢᱟ ᱯᱤᱪᱷᱤ ᱟᱹᱛᱩ ᱡᱟᱠ ᱛᱮᱜᱮ ᱦᱟᱹᱠᱩ ᱠᱚ ᱟᱲᱟᱜ ᱠᱚᱣᱟ᱾ ᱦᱟᱹᱠᱩ ᱦᱚᱸ ᱟᱹᱛᱩ ᱡᱟᱠ ᱛᱮᱜᱮᱠᱚ ᱜᱚᱡ ᱠᱚᱣᱟ᱾ ᱟᱹᱛᱩ ᱨᱮᱭᱟᱜ ᱯᱷᱚᱸᱰ ᱴᱟᱠᱟ ᱠᱚᱫᱚ ᱠᱞᱚᱵᱽ ᱨᱤᱱᱤᱡ ᱥᱩᱛᱨᱮᱛ ᱠᱚ ᱵᱟᱪᱷᱟᱣ ᱟᱠᱟᱫᱮ ᱢᱟᱹᱰᱜᱩ ᱵᱮᱥᱨᱟ ᱜᱮ ᱦᱤᱥᱟᱹᱵ ᱠᱤᱛᱟᱹᱵ ᱫᱚᱭ ᱫᱚᱦᱚ ᱮᱫ ᱛᱟᱦᱮᱸᱫ᱾ ᱩᱱᱤᱜᱮ ᱠᱞᱚᱵᱽ ᱨᱤᱱᱤᱡ ᱢᱩᱠᱷᱤᱭᱟᱹ ᱫᱚ᱾
ᱢᱮᱱᱠᱷᱟᱱ ᱞᱚᱫᱷᱮᱭᱟ ᱢᱟᱹᱡᱷᱤ ᱫᱚ ᱟᱹᱰᱤ ᱪᱟᱞᱟᱠ ᱪᱚᱛᱩᱨ ᱠᱟᱛᱮ ᱪᱟᱞᱟᱣᱮᱱ ᱥᱮᱴᱮᱞᱢᱮᱱᱴ ᱨᱮ ᱚᱱᱟ ᱯᱩᱠᱷᱨᱤ ᱡᱟᱭᱜᱟ ᱫᱚ ᱟᱡᱟᱜ ᱧᱩᱛᱩᱢ ᱨᱮ ᱩᱠᱩ ᱩᱠᱩᱛᱮ ᱴᱤᱠᱚᱴ ᱠᱟᱫᱼᱟᱭ᱾ ᱱᱚᱶᱟ ᱠᱟᱛᱷᱟ ᱫᱚ ᱟᱹᱛᱩ ᱡᱟᱠ ᱦᱚᱲ ᱚᱠᱚᱭ ᱦᱚᱸ ᱵᱟᱠᱚ ᱵᱟᱰᱟᱭ ᱧᱟᱢ ᱞᱮᱜᱼᱟ᱾ ᱱᱮᱛᱟᱨ ᱦᱚᱸ ᱡᱚᱛᱚ ᱜᱮᱠᱚ ᱵᱟᱰᱟᱭᱟ ᱯᱩᱠᱷᱨᱤ ᱫᱚ ᱟᱹᱛᱩ ᱡᱟᱠ ᱦᱚᱲᱟᱜ ᱠᱟᱱᱟ ᱢᱮᱱᱛᱮ᱾
ᱞᱚᱫᱷᱮᱭᱟ ᱢᱟᱹᱡᱷᱤ ᱜᱚᱡ ᱠᱟᱛᱮ ᱯᱮ ᱯᱩᱱ ᱥᱮᱨᱢᱟ ᱦᱚᱸ ᱟᱹᱛᱩ ᱦᱚᱲᱟᱜ ᱜᱮ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱛᱟᱭᱚᱢ ᱫᱚ ᱟᱹᱛᱩ ᱨᱤᱱᱤᱡ ᱢᱟᱹᱡᱷᱤ ᱫᱚ ᱠᱟᱹᱨᱩᱭ ᱛᱟᱦᱮᱸ ᱮᱱᱟ᱾ ᱪᱟᱞᱟᱣᱮᱱ ᱯᱚᱧᱪᱟᱛ ᱵᱷᱚᱴ ᱠᱷᱚᱱ ᱨᱟᱡᱡᱽᱱᱤᱛᱤ ᱠᱷᱟᱹᱛᱤᱨ ᱟᱹᱛᱩ ᱨᱮ ᱠᱚ ᱵᱟᱨ ᱫᱚᱲ ᱮᱱᱟ᱾ ᱚᱸᱰᱮ ᱠᱷᱚᱱ ᱜᱮ ᱟᱹᱛᱩ ᱨᱮ ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹ ᱥᱤᱨᱡᱟᱹᱣ ᱮᱱᱟ᱾ ᱩᱱᱨᱮ ᱠᱟᱹᱨᱩ ᱢᱟᱹᱡᱷᱤ ᱚᱱᱟ ᱯᱩᱠᱷᱨᱤ ᱨᱮᱱᱟᱜ ᱴᱤᱠᱚᱴ ᱠᱟᱜᱚᱡᱽ ᱮ ᱚᱰᱚᱠ ᱟᱫ ᱠᱚᱣᱟ ᱟᱨ ᱟᱹᱛᱩ ᱦᱚᱲ ᱮ ᱢᱮᱛᱟᱫ ᱠᱚᱣᱟ ᱱᱚᱶᱟ ᱯᱩᱠᱷᱨᱤ ᱫᱚ ᱤᱧ ᱵᱟᱵᱟ ᱦᱟᱜ ᱧᱩᱛᱩᱢ ᱨᱮ ᱢᱮᱱᱟᱜᱼᱟ᱾ ᱤᱧᱟᱜ ᱥᱩᱢᱩᱝ ᱦᱚᱠ ᱢᱮᱱᱟᱜᱼᱟ᱾ ᱚᱠᱚᱭ ᱦᱚᱸ ᱵᱟᱯᱮ ᱫᱟᱹᱵᱤ ᱫᱟᱲᱮᱭᱟᱜᱼᱟ᱾ ᱟᱨ ᱵᱟᱝ ᱠᱷᱟᱱ ᱟᱹᱛᱩ ᱡᱟᱠ ᱦᱚᱲ ᱡᱚᱛᱚᱧ ᱠᱮᱥ ᱟᱯᱮᱭᱟ᱾ ᱠᱚᱨᱴ ᱠᱚᱪᱨᱤ ᱫᱟᱹᱲ ᱛᱮᱯᱮ ᱟᱸᱫᱟᱜᱚᱜᱼᱟ᱾
ᱠᱟᱹᱨᱩ ᱢᱟᱹᱡᱷᱤᱭᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱹᱛᱩ ᱦᱚᱲ ᱠᱚ ᱦᱟᱦᱟᱲᱟ ᱪᱟᱵᱟ ᱮᱱᱟ ᱟᱨ ᱯᱩᱠᱷᱨᱤ ᱨᱮᱭᱟᱜ ᱴᱤᱠᱚᱴ ᱠᱟᱜᱚᱡᱽ ᱠᱚ ᱧᱮᱞ ᱠᱮᱜᱼᱟ᱾ ᱥᱟᱹᱨᱤ ᱜᱮ ᱴᱤᱠᱚᱴ ᱫᱚ ᱞᱚᱫᱷᱮᱭᱟ ᱦᱟᱲᱟᱢᱟᱜ ᱨᱮ ᱢᱮᱱᱟᱜᱼᱟ᱾ ᱚᱱᱟ ᱛᱟᱭᱚᱢ ᱠᱷᱚᱱ ᱜᱮ ᱠᱟᱹᱨᱩ ᱫᱚ ᱟᱹᱛᱩ ᱡᱟᱠ ᱦᱚᱲ ᱟᱨ ᱠᱞᱚᱜᱽ ᱨᱤᱱᱤᱡ ᱢᱩᱠᱷᱤᱭᱟᱹ
ᱢᱟᱹᱰᱜᱩ ᱵᱮᱥᱨᱟ ᱥᱟᱶ ᱛᱟᱯᱟᱢ ᱜᱚᱯᱚᱡ ᱫᱷᱟᱹᱵᱤᱡ ᱠᱟᱛᱷᱟ ᱪᱟᱞᱟᱣ ᱮᱱᱟ᱾ ᱩᱱᱠᱷᱚᱱ ᱜᱮ ᱠᱟᱹᱨᱩ ᱫᱚ ᱟᱹᱛᱩ ᱦᱚᱲ ᱛᱮᱠᱚ ᱮᱠᱜᱷᱩᱨᱤᱭᱟᱹ ᱟᱨᱵᱟᱝ ᱠᱚ ᱵᱟᱨᱚᱱ ᱠᱮᱫᱮᱭᱟ᱾ ᱡᱟᱦᱮᱨ ᱵᱚᱸᱜᱟ ᱵᱳᱨᱳᱜ ᱠᱷᱚᱱ ᱜᱩᱡᱩᱜ ᱵᱩᱨᱩᱜ ᱪᱷᱩᱛ ᱪᱷᱟᱹᱴᱭᱟᱹᱨ ᱠᱷᱚᱱ ᱮᱦᱚᱵ ᱠᱟᱛᱮ ᱫᱟᱜ ᱜᱷᱟᱴ ᱩᱢ ᱜᱷᱟᱴ ᱡᱚᱛᱚᱣᱟᱜ ᱠᱚ ᱵᱟᱨᱚᱱ ᱟᱠᱟᱫᱮᱭᱟ᱾
ᱚᱱᱟᱛᱮ ᱱᱚᱜᱼᱚᱭ ᱜᱮᱞ ᱢᱚᱬᱮ ᱥᱮᱨᱢᱟ ᱦᱩᱭᱩᱜ ᱠᱟᱱᱟ ᱠᱟᱹᱨᱩ ᱫᱚ ᱮᱠᱞᱟ ᱜᱮᱠᱚ ᱵᱟᱨᱚᱱ ᱟᱠᱟᱫᱮ ᱠᱷᱟᱹᱛᱤᱨ ᱛᱷᱟᱱᱟ ᱨᱮ ᱟᱹᱛᱩ ᱡᱟᱠ ᱦᱚᱲ ᱮ ᱠᱮᱥ ᱟᱠᱟᱣᱟᱫ ᱠᱚᱛᱮ ᱠᱚᱨᱴ ᱨᱮ ᱵᱤᱪᱟᱹᱨ ᱪᱟᱹᱞᱩ ᱟᱠᱟᱱᱟ᱾ ᱛᱚᱵᱮ ᱚᱱᱟ ᱚᱯᱚᱴ ᱵᱟᱹᱭᱨᱤ ᱥᱟᱹᱜᱟᱹᱭ ᱛᱟᱞᱟ ᱨᱮ ᱠᱟᱹᱨᱩ ᱢᱟᱹᱡᱷᱤ ᱦᱚᱯᱚᱱ ᱥᱚᱵᱟᱱ ᱟᱨ ᱢᱟᱹᱰᱜᱩ ᱵᱮᱥᱨᱟ ᱦᱚᱯᱚᱱ ᱮᱨᱟ ᱥᱩᱢᱤ ᱥᱟᱶ ᱢᱤᱫ ᱵᱤᱨᱫᱟᱹᱜᱟᱲ ᱨᱮ ᱚᱞᱚᱜ ᱛᱩᱞᱩᱡ ᱛᱮᱜᱮ ᱩᱠᱩ ᱩᱠᱩ ᱥᱤᱯᱤᱵᱤᱞ ᱥᱟᱹᱜᱟᱹᱭ ᱛᱟᱹᱠᱤᱱ ᱛᱚᱯᱚᱞ ᱢᱤᱫ ᱟᱠᱟᱱᱟ᱾ ᱚᱱᱟᱛᱮᱠᱚ ᱢᱮᱱᱟ ᱥᱤᱯᱤᱵᱤᱞ ᱫᱚ ᱨᱮᱸᱜᱮᱡ ᱠᱤᱥᱟᱹᱬ ᱪᱮ ᱡᱟᱹᱛᱤ ᱯᱟᱹᱨᱤᱥ ᱵᱟᱭ ᱵᱟᱪᱷᱟᱣᱟ᱾ ᱥᱚᱵᱟᱱ ᱟᱨ ᱥᱩᱢᱤ ᱛᱤᱠᱤᱱᱟᱜ ᱢᱟᱭᱟ ᱱᱟᱹᱬᱤ ᱫᱩᱯᱩᱞᱟᱹᱲ ᱠᱟᱛᱷᱟ ᱵᱟᱰᱟᱭ ᱠᱟᱛᱮ ᱨᱟᱹᱜᱤᱛᱮ ᱛᱟᱞᱟ ᱫᱮᱭᱟ ᱨᱮ ᱟᱸᱜᱽᱨᱟ ᱥᱮᱸᱜᱮᱞ ᱩᱵ ᱟᱠᱟᱣᱟᱫᱮ ᱞᱟᱠᱟᱭ ᱵᱩᱡᱷᱟᱹᱣ ᱠᱮᱜᱼᱟ ᱟᱨ ᱦᱚᱯᱚᱱᱛᱮᱫ ᱨᱚᱠ ᱴᱷᱚᱠ ᱮ ᱢᱟᱱᱟ ᱟᱠᱟᱫᱮᱭᱟ ᱼ “ᱴᱩᱰᱩ ᱵᱮᱥᱨᱟ ᱟᱱᱟᱱᱤᱭᱟᱹ ᱫᱚ ᱛᱤᱥ ᱦᱚᱸ ᱵᱟᱭ ᱦᱩᱭ ᱠᱮᱭᱟ᱾ ᱥᱮᱫᱟᱭ ᱠᱷᱚᱱ ᱵᱟᱭ ᱦᱩᱭ ᱟᱠᱟᱱᱟ᱾ ᱱᱤᱛᱚᱝ ᱦᱚᱸ ᱵᱟᱭ ᱦᱩᱭᱩᱜᱼᱟ᱾ ᱱᱩᱠᱩ ᱫᱚ ᱱᱤᱛᱚᱝ ᱨᱤᱱ ᱵᱟᱹᱭᱨᱤ ᱫᱚᱠᱚ ᱵᱟᱝ ᱠᱟᱱᱟ᱾ ᱴᱩᱰᱩ ᱵᱮᱥᱨᱟ ᱫᱚ ᱦᱟᱯᱲᱟᱢ ᱠᱚᱣᱟᱜ ᱵᱟᱹᱭᱨᱤ ᱥᱟᱹᱜᱟᱹᱭ ᱠᱟᱱᱟ᱾ ᱟᱵᱚᱨᱤᱱ ᱚᱲᱟᱜ ᱵᱚᱸᱜᱟ ᱠᱚ ᱵᱟᱹᱲᱤᱡ ᱪᱟᱵᱟᱜᱼᱟ᱾”
ᱛᱚᱵᱮ ᱥᱚᱵᱟᱱ ᱟᱨ ᱥᱩᱢᱤᱭᱟᱜ ᱫᱩᱞᱟᱹᱲ ᱢᱟᱭᱟ ᱫᱚ ᱟᱹᱰᱤ ᱜᱟᱹᱦᱤᱨ ᱟᱠᱟᱱᱟ᱾ ᱥᱩᱢᱤᱭᱟᱜ ᱦᱚᱲᱢᱚ ᱨᱮ ᱥᱚᱵᱟᱱᱟᱜ ᱵᱮᱨᱮᱞ ᱢᱟᱭᱟᱢ ᱤᱛᱟᱹ ᱚᱢᱚᱱ ᱨᱟᱠᱟᱵ ᱠᱟᱱᱟ᱾ ᱚᱱᱟᱛᱮ ᱥᱚᱵᱟᱱ ᱫᱚ ᱥᱩᱢᱤ ᱡᱚᱛᱚᱫᱤᱱ ᱞᱟᱹᱜᱤᱫ ᱟᱡᱟᱜ ᱠᱚᱞᱮ ᱨᱮ ᱟᱥᱨᱟᱭ ᱮᱢᱟᱫᱮᱭᱟ᱾ ᱢᱮᱱᱫᱚ ᱧᱟᱯᱟᱢ ᱠᱟᱛᱮ ᱟᱠᱚ ᱚᱲᱟᱜ ᱛᱮ ᱟᱠᱟᱫᱮᱭᱟ᱾
ᱡᱚᱠᱷᱚᱱ ᱥᱚᱵᱟᱱ ᱟᱨ ᱥᱩᱢᱤ ᱧᱟᱯᱟᱢ ᱠᱟᱛᱮ ᱚᱲᱟᱜ ᱮ ᱤᱫᱤ ᱟᱠᱟᱫᱮᱭᱟ, ᱠᱟᱹᱨᱩ ᱦᱟᱲᱟᱢ ᱮᱫᱽᱨᱮ ᱛᱮ ᱦᱚᱯᱚᱱ ᱛᱮᱫ ᱮ ᱢᱮᱛᱟᱭ ᱠᱟᱱᱟ ᱼ ᱛᱮᱦᱮᱧ ᱟᱹᱵᱤᱱᱟᱜ ᱱᱚᱶᱟ ᱵᱟᱯᱞᱟ ᱫᱚ ᱵᱟᱹᱧ ᱥᱟᱹᱠᱭᱟᱹᱛᱟᱜᱼᱟ ᱟᱨ ᱤᱧᱟᱜ ᱢᱩᱪᱟᱹᱫ ᱠᱟᱛᱷᱟ ᱟᱸᱡᱚᱢ ᱫᱚᱦᱚᱭ ᱢᱮ᱾ ᱛᱮᱦᱮᱧ ᱠᱷᱚᱱ ᱟᱢᱫᱚ ᱤᱧ ᱞᱟᱹᱜᱤᱫ ᱛᱮᱫᱚᱢ ᱜᱚᱡ ᱥᱟᱹᱨᱤ ᱟᱠᱟᱱᱟ᱾ ᱤᱧᱟᱜ ᱥᱚᱢᱯᱩᱛᱤ ᱨᱮᱭᱟᱜ ᱦᱚᱠ ᱦᱚᱸ ᱚᱦᱚᱢ ᱦᱩᱭ ᱠᱚᱜᱼᱟ᱾ ᱟᱢᱟᱜ ᱢᱮᱫ ᱞᱩᱛᱩᱨ ᱡᱟᱦᱟᱸᱥᱮᱫ ᱥᱮᱱᱚᱜᱼᱟ ᱚᱱᱛᱮᱜᱮ ᱪᱟᱞᱟᱣ ᱡᱚᱝᱢᱮ᱾ᱠᱟᱹᱨᱩ ᱢᱟᱹᱡᱷᱤᱭᱟᱜ ᱱᱚᱝᱠᱟᱱ ᱮᱜᱮᱨ ᱟᱸᱡᱚᱢ ᱠᱟᱛᱮ ᱥᱚᱵᱟᱱ ᱫᱚ ᱟᱡ ᱵᱵᱟ ᱪᱮᱫ ᱡᱚᱵᱟᱵ ᱜᱮ ᱵᱟ ᱮᱢ ᱞᱮᱜᱼᱟ᱾ ᱢᱤᱫ ᱯᱟᱦᱴᱟ ᱨᱮ ᱟᱹᱛᱩ ᱨᱮ ᱵᱟᱨᱚᱱ ᱠᱷᱟᱹᱛᱤᱨ ᱟᱹᱠᱤᱱᱟᱜ ᱵᱟᱯᱞᱟ ᱥᱟᱶᱛᱟ ᱵᱟᱭ ᱥᱟᱹᱠᱷᱤ ᱥᱚᱵᱷᱟ ᱠᱮᱭᱟ ᱟᱨ ᱢᱤᱫ ᱯᱟᱦᱴᱟ ᱨᱮ ᱴᱩᱰᱩ ᱵᱮᱥᱨᱟ ᱡᱟᱹᱛᱤ ᱯᱟᱹᱨᱤᱥ ᱨᱮ ᱵᱟᱝ ᱟᱱᱟᱱᱤᱭᱟᱹ ᱠᱷᱟᱹᱛᱤᱨ ᱜᱷᱟᱨᱚᱸᱡᱽ ᱨᱮᱱᱟᱜ ᱵᱟᱨᱚᱱ᱾ ᱥᱚᱵᱟᱱ ᱟᱨ ᱥᱩᱢᱤ ᱥᱟᱺᱜᱤᱧ ᱵᱟᱡᱟᱨ ᱫᱤᱥᱚᱢ ᱵᱟᱝᱜᱟᱞᱚᱨ ᱵᱟᱡᱟᱨ ᱠᱤᱱ ᱧᱤᱨ ᱪᱟᱞᱟᱣ ᱮᱱᱟ᱾ ᱟᱵᱚ ᱥᱟᱶᱛᱟ ᱨᱮᱭᱟᱜ ᱟᱹᱱ ᱟᱹᱨᱤ ᱞᱮᱠᱟᱛᱮ ᱵᱟᱯᱞᱟ ᱠᱟᱛᱮ ᱛᱤᱨᱤ ᱯᱩᱨᱩᱥ
ᱢᱟᱹᱱ ᱥᱟᱹᱠᱭᱟᱹᱛ ᱵᱟᱝ ᱧᱟᱢ ᱠᱟᱛᱮ ᱱᱚᱝᱠᱟ ᱡᱟᱞᱟᱝᱜᱤ ᱜᱮ ᱵᱟᱡᱟᱨ ᱫᱤᱥᱚᱢ ᱨᱮ ᱱᱟᱞᱦᱟ ᱛᱩᱢᱟᱹᱞ ᱠᱟᱛᱮ ᱠᱤᱱ ᱟᱹᱥᱩᱞᱚᱜ ᱠᱟᱱᱟ᱾
ᱡᱤᱵᱚᱱ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱟᱹᱠᱤᱱᱟᱜ ᱡᱤᱭᱚᱱ ᱪᱟᱨᱠᱷᱟ ᱦᱚᱸ ᱟᱹᱪᱩᱨ ᱟᱹᱪᱩᱨ ᱯᱟᱨᱚᱢ ᱪᱟᱞᱟᱜ ᱠᱟᱱᱟ᱾ ᱟᱹᱠᱤᱱᱟᱜ ᱥᱚᱸᱥᱟᱨ ᱛᱟᱞ ᱨᱮ ᱟᱨ ᱢᱤᱫ ᱱᱟᱶᱟ ᱥᱚᱦᱮᱫ ᱢᱮᱱᱫᱚ ᱢᱤᱫ ᱠᱚᱲᱟ ᱜᱤᱫᱽᱨᱟᱹᱭ ᱦᱩᱭ ᱟᱠᱟᱱᱟ᱾ ᱟᱹᱠᱤᱱᱟᱜ ᱫᱤᱥᱟᱹ ᱛᱮᱜᱮ ᱩᱭᱦᱟᱹᱨ ᱠᱟᱛᱮ ᱩᱱᱤ ᱠᱚᱲᱟ ᱜᱤᱫᱽᱨᱟᱹ ᱫᱚ ᱠᱷᱮᱨᱣᱟᱲ ᱠᱤᱱ ᱧᱩᱛᱩᱢ ᱟᱠᱟᱫᱮᱭᱟ᱾
ᱥᱚᱵᱟᱱ ᱟᱨ ᱥᱩᱢᱤ ᱵᱟᱡᱟᱨ ᱫᱤᱥᱚᱢ ᱨᱮᱜᱮ ᱱᱚᱜᱼᱚᱭ ᱱᱩᱱᱟᱹᱜ ᱫᱤᱱ ᱠᱤᱱ ᱛᱟᱦᱮᱸ ᱮᱱᱟ᱾ ᱟᱹᱛᱩ ᱫᱤᱥᱚᱢ ᱠᱷᱚᱱ ᱧᱤᱨ ᱥᱟᱦᱟ ᱟᱠᱟᱱ ᱦᱚᱲ ᱟᱨ ᱠᱤᱱ ᱚᱠᱟ ᱛᱮᱜᱼᱟ? ᱛᱚᱵᱮ ᱢᱟᱹᱱᱢᱤ ᱡᱤᱵᱚᱱ ᱨᱮ ᱛᱤᱱᱡᱷᱚᱜ ᱫᱩᱠ ᱵᱤᱯᱚᱫ ᱦᱤᱡᱩᱜᱼᱟ ᱢᱤᱫ ᱥᱮᱫ ᱠᱷᱚᱱ ᱵᱟᱭ ᱦᱤᱡᱩᱜᱼᱟ᱾ ᱟᱹᱰᱤ ᱥᱮᱫ ᱛᱮ ᱦᱤᱡᱩᱜ ᱛᱮ ᱥᱚᱸᱥᱟᱨ ᱜᱷᱟᱨᱚᱸᱡᱽ ᱦᱚᱸᱭ ᱩᱛᱩᱲ ᱛᱟᱨᱟᱭᱟ ᱟᱨ ᱚᱠᱟ ᱥᱮᱫ ᱠᱷᱚᱱ ᱦᱤᱡᱩᱜᱼᱟ ᱚᱠᱚᱭ ᱦᱚᱸ ᱵᱟᱭ ᱴᱷᱤᱠᱟᱹ ᱡᱚᱝᱼᱟ᱾ ᱥᱚᱵᱟᱱ ᱟᱨ ᱥᱩᱢᱤᱭᱟᱜ ᱡᱤᱵᱚᱱ ᱨᱮᱦᱚᱸ ᱫᱚᱨᱮᱭᱟ ᱨᱮ ᱥᱩᱱᱟᱹᱢᱤ ᱦᱮᱡ ᱮᱱ ᱞᱮᱠᱟᱱ ᱜᱷᱚᱴᱚᱱ ᱜᱮ ᱥᱟᱢᱟᱝ ᱟᱠᱟᱱᱟ᱾
ᱢᱤᱫ ᱫᱤᱱ ᱫᱚ ᱥᱚᱵᱟᱱ ᱟᱡᱟᱜ ᱠᱩᱢᱯᱟᱹᱱᱤ ᱠᱟᱹᱢᱤ ᱴᱦᱟᱶ ᱨᱮ ᱚᱵᱷᱟᱨ ᱰᱤᱭᱩᱴᱤ ᱯᱟᱲᱟᱣ ᱮᱱ ᱠᱷᱟᱱ ᱚᱲᱟᱜ ᱦᱤᱡᱩᱜ ᱮ ᱵᱤᱞᱚᱢ ᱟᱠᱟᱱᱟ᱾ ᱰᱤᱭᱩᱴᱤ ᱪᱟᱵᱟ ᱠᱟᱛᱮ ᱵᱟᱥᱟ ᱛᱮ ᱨᱩᱣᱟᱹᱲ ᱮ ᱧᱤᱸᱫᱟᱹ ᱮᱱᱟ᱾ ᱥᱟᱭᱠᱚᱞ ᱛᱮ ᱨᱩᱣᱟᱹᱲ ᱡᱷᱚᱜ ᱢᱤᱫ ᱞᱟᱭᱮᱱ ᱴᱨᱟᱠ ᱛᱮ ᱴᱷᱚᱠᱚᱨ ᱵᱟᱡᱟᱣ ᱚᱪᱚ ᱮᱱᱟᱭ᱾ ᱥᱚᱵᱟᱱᱟᱜ ᱜᱷᱟᱹᱞ ᱦᱚᱲᱢᱚ ᱵᱚᱦᱚᱜ ᱯᱚᱥᱟᱜ ᱠᱟᱛᱮ ᱢᱟᱭᱟᱢ ᱜᱮ ᱞᱤᱸᱜᱤᱜ ᱠᱟᱱᱟ᱾ ᱚᱪᱮᱛ ᱠᱟᱛᱮ ᱥᱚᱲᱚᱠ ᱫᱷᱟᱨᱮ ᱨᱮ ᱢᱮᱱᱟᱜᱼᱟ᱾ ᱧᱤᱸᱫᱟᱹ ᱯᱮᱴᱨᱚᱞᱤᱝ ᱯᱩᱞᱤᱥ ᱟᱡᱟᱜ ᱡᱚᱠᱷᱚᱢ ᱦᱚᱲᱢᱚ ᱠᱚ ᱧᱟᱢ ᱠᱮᱫ ᱛᱮ ᱩᱱᱠᱩ ᱯᱩᱞᱤᱥ ᱜᱮ ᱥᱚᱵᱟᱱᱟᱜ ᱩᱯᱩᱨᱩᱢ ᱥᱟᱠᱟᱢ ᱦᱚᱴᱚᱜ ᱨᱮ ᱢᱟᱞᱟ ᱠᱚ ᱧᱮᱞ ᱠᱮᱜᱼᱟ, ᱵᱟᱝᱢᱟ ᱱᱩᱭᱫᱚ ᱢᱤᱫ ᱠᱩᱢᱯᱟᱹᱱᱤ ᱠᱟᱹᱢᱤᱭᱟᱹ ᱠᱚᱲᱟ ᱠᱟᱱᱟᱭ᱾ ᱛᱟᱭᱚᱢ ᱩᱱᱠᱩ ᱯᱩᱞᱤᱥ ᱮᱢᱵᱩᱞᱮᱱᱥ ᱛᱮ ᱴᱟᱣᱱ ᱦᱚᱥᱯᱤᱴᱟᱞ ᱛᱮᱠᱚ ᱤᱫᱤ ᱠᱮᱫᱮᱭᱟ᱾ ᱦᱚᱥᱯᱤᱴᱟᱞ ᱨᱮ ᱰᱟᱠᱛᱚᱨ ᱛᱩᱱᱩᱢ ᱵᱟᱲᱟ ᱠᱟᱛᱮ ᱧᱮᱞ ᱠᱮᱫᱮᱭᱟᱭ ᱥᱚᱵᱟᱱ ᱫᱚ ᱱᱚᱶᱟ ᱫᱷᱟᱹᱨᱛᱤ ᱨᱮᱫᱚ ᱵᱟᱹᱱᱩᱜ ᱮᱭᱟ᱾ ᱢᱮᱱᱫᱚ ᱴᱷᱚᱠᱚᱨ ᱴᱷᱟᱶᱨᱮᱜᱮ ᱟᱡᱟᱜ ᱡᱤᱵᱚᱱ ᱫᱚ ᱪᱟᱞᱟᱣ ᱮᱱᱟ᱾
ᱫᱚᱥᱟᱨ ᱦᱤᱞᱚᱜ ᱥᱮᱛᱟᱜ ᱠᱷᱚᱵᱚᱨ ᱠᱟᱜᱚᱡᱽ ᱴᱤᱵᱷᱤ ᱢᱮᱰᱤᱭᱟ ᱠᱚᱨᱮ ᱠᱷᱚᱵᱚᱨ ᱯᱟᱥᱱᱟᱣ ᱮᱱᱟ ᱵᱟᱝᱢᱟ ᱥᱚᱵᱟᱱ ᱴᱩᱰᱩ ᱧᱩᱛᱩᱢ ᱟᱱ ᱢᱤᱫ ᱦᱚᱲ ᱵᱟᱡᱟᱨ ᱨᱮᱱᱟᱝ ᱛᱟᱞᱟ ᱥᱚᱲᱚᱠ ᱨᱮ ᱞᱟᱭᱮᱱ ᱜᱟᱹᱰᱤ ᱛᱮ ᱴᱦᱚᱠᱚᱨ ᱠᱟᱛᱮ ᱜᱚᱡ ᱟᱠᱟᱱᱟᱭ᱾ ᱥᱩᱢᱤ ᱥᱚᱵᱟᱱᱟᱜ ᱜᱚᱡ ᱠᱷᱚᱵᱚᱨ ᱟᱸᱡᱚᱢ ᱠᱟᱛᱮ ᱟᱡᱟᱜ ᱡᱟᱸᱜᱟ ᱞᱟᱛᱟᱨ ᱠᱷᱚᱱ ᱚᱛ ᱯᱟᱲᱟᱜ ᱧᱩᱨ ᱥᱟᱦᱟ ᱮᱱ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱜᱼᱟ᱾ ᱫᱷᱟᱹᱨᱛᱤ ᱜᱚᱴᱟ ᱧᱩᱛᱟᱹᱛ ᱜᱮ ᱧᱮᱞ ᱠᱮᱜᱼᱟᱭ᱾ ᱠᱩᱢᱯᱟᱹᱱᱤ ᱨᱮ ᱠᱟᱹᱢᱤ ᱠᱟᱱ ᱥᱴᱟᱯ ᱠᱚᱜᱮ ᱥᱚᱵᱟᱱ ᱜᱚᱡ ᱦᱚᱲᱢᱚ ᱵᱟᱥᱟ ᱛᱮᱠᱚ ᱟᱹᱜᱩ ᱥᱮᱴᱮᱨ ᱠᱮᱜᱼᱟ ᱟᱨ ᱩᱱᱠᱩ ᱜᱮ ᱥᱚᱵᱟᱱᱟᱜ ᱢᱟᱬᱟ ᱫᱚ ᱜᱟᱰᱟ ᱟᱲᱮ ᱥᱮᱫ ᱨᱮᱠᱚ ᱫᱚᱦᱚᱱ ᱠᱮᱫ ᱛᱟᱭᱟ᱾ ᱥᱩᱢᱤ ᱫᱚ ᱠᱩᱢᱯᱟᱹᱱᱤ ᱠᱷᱚᱱ ᱛᱤᱱᱟᱹᱜ ᱜᱟᱱ ᱠᱟᱹᱣᱰᱤ ᱜᱚᱲᱚ ᱠᱚ ᱮᱢᱟᱫᱮᱭᱟ᱾
ᱥᱩᱢᱤ ᱫᱚ ᱱᱤᱛᱚᱝ ᱢᱤᱫᱴᱟᱝ ᱰᱟᱹᱨ ᱠᱷᱚᱱ ᱡᱚᱯᱚᱨ ᱡᱚᱞᱮ ᱡᱚᱲ ᱯᱚᱛᱟᱢ
ᱵᱤᱡᱡᱚᱲ ᱮᱱ ᱞᱮᱠᱟᱭ ᱮᱠᱞᱟ ᱛᱟᱞᱟ ᱴᱟᱺᱰᱤ ᱮᱱᱟ᱾ ᱚᱠᱟ ᱦᱚᱸ ᱵᱟᱭ ᱫᱤᱥᱟᱹ ᱡᱚᱝ ᱠᱟᱱᱟ᱾ ᱚᱠᱟᱛᱮᱜᱼᱟᱭ ᱪᱮᱫ ᱮ ᱪᱮᱠᱟᱭᱟ? ᱚᱠᱚᱭ ᱮ ᱟᱸᱡᱚᱢᱟ ᱟᱡᱟᱜ ᱨᱟᱜ ᱦᱚᱢᱚᱨ᱾ ᱢᱮᱫ ᱨᱮᱱᱟᱜ ᱢᱮᱫ ᱫᱟᱜ ᱜᱮ ᱵᱟᱭ ᱦᱟᱣᱮᱫᱚᱜ ᱠᱟᱱᱟ᱾ ᱨᱟᱜ ᱟᱛᱮ ᱟᱡᱤᱡ ᱫᱩᱞᱟᱹᱲ ᱵᱮᱴᱟ ᱠᱷᱮᱨᱣᱟᱲ ᱜᱮ ᱟᱹᱠᱤᱱ ᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱵᱟᱨᱚᱱ ᱟᱨ ᱥᱟᱶᱛᱟ ᱨᱮᱱᱟᱜ ᱵᱟᱨᱚᱱ ᱟᱹᱠᱤᱱᱟᱜ ᱡᱤᱭᱚᱱ ᱠᱟᱹᱦᱱᱤ ᱢᱤᱢᱤᱫ ᱴᱟᱝ ᱛᱮ ᱡᱚᱛᱚ ᱠᱟᱛᱷᱟ ᱠᱟᱹᱦᱱᱤ ᱞᱮᱠᱟᱭ ᱞᱟᱹᱭ ᱟᱭᱠᱟᱱᱟ᱾ ᱥᱚᱵᱟᱱ ᱛᱩᱞᱩᱡ ᱥᱩᱢᱤᱭᱟᱜ ᱫᱩᱠ ᱡᱤᱭᱚᱱ ᱠᱟᱛᱷᱟ ᱩᱭᱦᱟᱹᱨ ᱩᱭᱦᱟᱹᱨ ᱛᱩᱞᱩᱡ ᱛᱮ ᱥᱩᱢᱤᱭᱟᱜ ᱵᱚᱦᱚᱜ ᱛᱟᱭ ᱠᱷᱟᱨᱟᱯ ᱮᱱᱟ᱾ ᱥᱩᱢᱤ ᱪᱮᱫ ᱦᱚᱸ ᱵᱟᱭ ᱴᱦᱤᱠᱟᱹ ᱧᱟᱢ ᱞᱮᱜᱼᱟ᱾ ᱠᱩᱝᱠᱤᱜ ᱧᱟᱢ ᱠᱮᱫᱮᱭᱟ᱾ ᱜᱟᱞᱟᱫ ᱥᱚᱞᱟᱫ ᱪᱟᱵᱟ ᱮᱱᱟᱭ ᱟᱨ ᱟᱡᱤᱡ ᱦᱚᱯᱚᱱ ᱠᱷᱮᱨᱣᱟᱲ ᱦᱚᱸᱭ ᱦᱤᱲᱤᱧ ᱟᱠᱟᱫᱮᱭᱟ᱾ ᱮᱸᱜᱟᱛ ᱟᱨ ᱦᱚᱯᱚᱱ ᱦᱚᱸᱠᱤᱱ ᱟᱯᱟᱫ ᱵᱟᱯᱟᱜ ᱮᱱᱟ᱾
ᱱᱤᱛᱚᱝ ᱠᱷᱮᱨᱣᱟᱲ ᱡᱟᱱᱟᱢ ᱟᱭᱳ ᱠᱷᱚᱱ ᱪᱦᱩᱰᱟᱹᱨ ᱠᱟᱛᱮ ᱛᱟᱞᱟ ᱴᱟᱺᱰᱤ ᱮᱱᱟᱭ᱾ ᱨᱮᱸᱜᱮᱡ ᱛᱮᱛᱟᱝ ᱡᱟᱞᱟ ᱛᱮ ᱡᱟᱞᱟᱫ ᱡᱟᱯᱟᱫ ᱮ ᱛᱟᱦᱮᱸ ᱮᱱᱟ᱾ ᱪᱮᱫ ᱦᱚᱸ ᱫᱤᱥᱟᱹ ᱵᱟᱝ ᱛᱮ ᱵᱟᱡᱟᱨ ᱨᱮᱱᱟᱜ ᱦᱚᱴᱮᱞ ᱠᱚᱨᱮ ᱜᱟᱥᱟᱣ ᱠᱮᱜᱼᱟ᱾ ᱟᱺᱭᱴᱷᱟᱹ ᱵᱟᱥᱚᱱ ᱮ ᱥᱟᱯᱷᱟ ᱠᱮᱜᱼᱟ᱾ ᱦᱚᱴᱮᱞ ᱢᱟᱹᱞᱤᱠ ᱟᱡ ᱠᱩᱥᱤᱛᱮ ᱡᱟᱦᱟᱸᱭ ᱮᱢᱟᱫᱮᱭᱟ ᱚᱱᱟᱠᱚ ᱡᱚᱢ ᱠᱟᱛᱮ ᱟᱡᱟᱜ ᱨᱮᱸᱜᱮᱡ ᱛᱮᱛᱟᱝ ᱮ ᱢᱟᱨᱛᱚᱠ ᱠᱮᱜᱼᱟ᱾
ᱠᱷᱮᱨᱣᱟᱲ ᱦᱚᱴᱮᱞ ᱨᱮ ᱠᱟᱹᱢᱤ ᱠᱟᱱ ᱵᱮᱲᱟ ᱜᱮ ᱢᱤᱫ ᱫᱷᱟᱣ ᱠᱚᱞᱮᱠᱴᱚᱨ ᱥᱟᱦᱮᱵᱽ ᱦᱩᱠᱩᱢ ᱮ ᱡᱟᱹᱨᱤ ᱠᱮᱜᱼᱟ ᱵᱟᱝᱢᱟ ᱵᱟᱡᱟᱨ ᱱᱟᱜᱟᱨ ᱠᱚᱨᱮ ᱦᱚᱼ ᱴᱮᱞ ᱟᱨ ᱵᱟᱝ ᱠᱟᱹᱨᱜᱟᱲ ᱠᱚᱨᱮ ᱖ ᱵᱚᱪᱷᱚᱨ ᱠᱷᱚᱱ ᱑᱕ ᱵᱚᱪᱷᱚᱨ ᱱᱟᱵᱟᱞᱚᱠ ᱜᱤᱫᱽᱨᱟᱹ ᱠᱚᱫᱚ ᱠᱟᱹᱢᱤ ᱟᱞᱚᱯᱮ ᱟᱹᱪᱩ ᱠᱚᱣᱟ᱾ ᱱᱚᱶᱟ ᱫᱚ ᱵᱷᱟᱨᱚᱛ ᱥᱚᱨᱠᱟᱨ ᱱᱟᱵᱟᱞᱚᱠ ᱟᱹᱱ ᱟᱹᱨᱤ ᱞᱮᱠᱟᱛᱮ ᱡᱟᱦᱟᱸᱭ ᱵᱟᱭ ᱢᱟᱱᱟᱣ ᱵᱟᱛᱟᱣᱟ ᱩᱱᱤᱫᱚᱭ ᱡᱤᱦᱚᱞᱚᱜᱼᱟ ᱟᱨ ᱵᱟᱝᱠᱷᱟᱱ ᱠᱟᱹᱣᱰᱤ ᱠᱚ ᱰᱟᱸᱰᱚᱢ ᱮᱭᱟ᱾ ᱜᱤᱫᱽᱨᱟᱹ ᱠᱚ ᱠᱚᱢ ᱩᱢᱟᱹᱨ ᱨᱮ ᱠᱷᱟᱴᱟᱣ ᱫᱚ ᱥᱟᱶᱛᱟ ᱨᱮᱱᱟᱜ ᱢᱟᱨᱟᱝ ᱵᱟᱹᱲᱤᱡ ᱠᱟᱹᱢᱤ ᱠᱟᱱᱟ᱾ ᱱᱚᱶᱟ ᱠᱷᱚᱵᱚᱨ ᱵᱟᱰᱟᱭ ᱠᱟᱛᱮ ᱦᱚᱴᱮᱞ ᱢᱟᱹᱞᱤᱠ ᱮ ᱵᱚᱛᱚᱨᱮᱱ ᱛᱮ ᱠᱷᱮᱨᱣᱟᱲ ᱫᱚ ᱢᱤᱫ ᱴᱩᱣᱟᱹᱨ ᱟᱥᱲᱟ ᱨᱮᱠᱚ ᱵᱷᱩᱨᱛᱤ ᱠᱟᱫᱮᱭᱟ ᱟᱨ ᱠᱷᱮᱨᱣᱟᱲ ᱫᱚ ᱥᱟᱣᱠᱟᱹᱨᱟᱜ ᱡᱚᱢ ᱧᱩ ᱠᱟᱛᱮ ᱴᱩᱣᱟᱹᱨ ᱟᱥᱲᱟ ᱨᱮᱜᱮ ᱚᱞ ᱯᱟᱲᱦᱟᱣ ᱮᱱᱟᱭ᱾
ᱠᱷᱮᱨᱣᱟᱲ ᱫᱚ ᱴᱩᱣᱟᱹᱨ ᱟᱥᱲᱟ ᱨᱮ ᱛᱟᱦᱮᱸ ᱠᱟᱛᱮ ᱚᱞ ᱯᱟᱲᱦᱟᱣ ᱮᱱᱛᱮ ᱟᱹᱠᱤᱞ ᱜᱮᱭᱟᱱ ᱦᱚᱸᱭ ᱥᱮᱬᱟ ᱟᱱᱟ᱾ ᱱᱤᱛᱚᱝ ᱟᱡᱛᱮ ᱟᱡᱟᱜ ᱵᱩᱜᱤ ᱵᱟᱹᱲᱤᱡ ᱮ ᱩᱭᱦᱟᱹᱨ ᱫᱟᱲᱮᱭᱟᱜ ᱠᱟᱱᱟ᱾ ᱟᱡ ᱛᱮ ᱟᱡᱮ ᱩᱨᱩᱢᱚᱜ ᱠᱟᱱ ᱨᱮᱦᱚᱱ ᱱᱚᱶᱟ ᱥᱟᱶᱛᱟ ᱛᱟᱞᱟ ᱨᱮ ᱟᱡᱟᱜ ᱩᱯᱩᱨᱩᱢ ᱚᱠᱟ ᱨᱮ ᱧᱟᱢᱼᱟᱭ ᱟᱨ ᱚᱠᱚᱭ ᱮᱢᱟᱭᱟ ᱩᱯᱩᱨᱩᱢ? ᱟᱡᱟᱜ ᱡᱟᱸᱜᱟ ᱛᱮ ᱟᱡ ᱮ ᱛᱤᱸᱜᱩ ᱠᱮᱴᱮᱡᱚᱜ ᱥᱟᱶᱛᱮ ᱱᱚᱶᱟ ᱠᱷᱮᱨᱣᱟᱲ ᱥᱟᱶᱛᱟ ᱥᱚᱢᱟᱡᱽ ᱛᱟᱞᱟ ᱨᱮ ᱩᱯᱩᱨᱩᱢᱚᱜ ᱟᱨ ᱷᱤᱜᱦᱮᱨ ᱮᱰᱩᱪᱟᱴᱤᱚᱱ ᱞᱟᱹᱜᱤᱫ ᱦᱚᱸ ᱟᱨ ᱵᱟᱝ ᱪᱟᱹᱠᱨᱤ ᱱᱩᱠᱨᱤ ᱞᱟᱹᱜᱤᱫ ᱠᱷᱟᱱ ᱱᱤᱡᱚᱨᱟᱜ ᱡᱟᱹᱛᱤ ᱥᱟᱠᱟᱢ (ᱪᱟᱥᱴᱮ ᱪᱮᱨᱴᱤᱝᱤᱪᱟᱴᱮ) ᱚᱲᱟᱜ ᱰᱤᱦᱤ ᱵᱟᱹᱲᱤ ᱥᱟᱠᱟᱢ (ᱨᱮᱥᱤᱰᱮᱱᱴ ᱪᱮᱨᱴᱤᱝᱤᱪᱟᱴᱮ) ᱤᱰᱮᱱᱴᱤᱴᱭ ᱪᱟᱨᱰ (ᱶᱚᱴᱮᱨ ᱪᱟᱨᱰ) ᱟᱰᱦᱟᱨ ᱪᱟᱨᱰ ᱠᱚ ᱱᱤᱦᱟᱹᱛᱤ ᱞᱟᱹᱠᱛᱤᱜ ᱠᱟᱱ ᱛᱟᱭᱟ᱾
ᱛᱮᱦᱮᱧ ᱤᱥᱤ ᱥᱮᱨᱢᱟ ᱛᱟᱭᱚᱢ ᱠᱷᱮᱨᱣᱟᱲ ᱫᱚ ᱛᱤᱞᱟᱹᱭ ᱡᱷᱟᱹᱨᱤ ᱟᱹᱛᱩ
ᱛᱮ ᱦᱮᱡ ᱟᱠᱟᱱᱟᱭ᱾ ᱡᱟᱦᱟᱸᱨᱮ ᱟᱡ ᱜᱚᱲᱚᱢ ᱦᱟᱲᱟᱢ ᱠᱟᱹᱨᱩ ᱢᱟᱹᱡᱷᱤ ᱴᱷᱮᱱ ᱟᱡᱟᱜ ᱩᱯᱩᱨᱩᱢ ᱮ ᱞᱟᱹᱭᱟ ᱵᱟᱝᱢᱟ ᱟᱡᱰᱚ ᱥᱚᱵᱟᱱ ᱦᱚᱯᱚᱱ ᱠᱟᱱᱟᱭ ᱢᱮᱱᱛᱮ᱾ᱢᱮᱱᱠᱷᱟᱱ ᱠᱟᱹᱨᱩ ᱦᱟᱲᱟᱢ ᱴᱷᱮᱱ ᱠᱷᱮᱨᱣᱟᱲ ᱟᱡᱟᱜ ᱩᱯᱩᱨᱩᱢ ᱮ ᱞᱟᱹᱭ ᱥᱚᱫᱚᱨ ᱟᱠᱟᱫ ᱨᱮᱦᱚᱸ ᱟᱡᱤᱡ ᱱᱤᱡᱚᱨ ᱜᱚᱲᱚᱢ ᱠᱚᱲᱟ ᱢᱮᱱᱛᱮ ᱵᱟᱭ ᱩᱨᱩᱢ ᱟᱠᱟᱫᱮᱛᱮ ᱵᱟᱭ ᱦᱮᱸᱥᱤᱠᱟᱹᱨ ᱟᱠᱟᱱᱟ᱾ ᱩᱱᱨᱮ ᱠᱷᱮᱨᱣᱟᱲ ᱟᱹᱛᱩ ᱢᱟᱹᱡᱷᱤ ᱢᱚᱬᱮ ᱦᱚᱲ ᱴᱷᱮᱱ ᱮ ᱱᱮᱦᱚᱨ ᱟᱠᱟᱱᱟ᱾ ᱟᱡᱫᱚ ᱥᱚᱵᱟᱱ ᱟᱨ ᱥᱩᱢᱤ ᱛᱤᱠᱤᱱᱤᱡ ᱦᱚᱯᱚᱱ ᱠᱟᱱᱟᱭ᱾ ᱛᱚᱵᱮ ᱟᱹᱛᱩ ᱢᱟᱹᱡᱷᱤ ᱢᱚᱬᱮ ᱦᱚᱲ ᱦᱚᱸᱠᱚ ᱢᱟᱱᱟ ᱟᱠᱟᱫᱮᱭᱟ᱾ ᱢᱮᱱ ᱟᱠᱟᱣᱟᱫᱮᱭᱟ ᱠᱚ ᱼ “ᱟᱢ ᱵᱟᱵᱟ ᱟᱨ ᱟᱭᱳ ᱛᱤᱠᱤᱱ ᱠᱤᱱ ᱵᱟᱯᱞᱟ ᱞᱮᱱᱟ ᱢᱮᱱᱛᱮ ᱵᱟᱞᱮ ᱵᱟᱰᱟᱭᱟ᱾ ᱟᱨ ᱟᱹᱠᱤᱱᱟᱜ ᱛᱤᱨᱤᱞ ᱛᱟᱨᱚᱵ ᱪᱮ ᱢᱟᱹᱡᱷᱤ ᱢᱚᱬᱮ ᱛᱮ ᱥᱟᱹᱠᱷᱤ ᱥᱚᱵᱷᱟ ᱵᱟᱭ ᱦᱩᱭ ᱟᱠᱟᱱᱟ᱾ ᱪᱮᱫᱟᱜ ᱪᱮ ᱟᱢ ᱜᱚᱲᱚᱢ ᱦᱟᱲᱟᱢ ᱫᱚ ᱟᱹᱛᱩ ᱦᱚᱲ ᱠᱷᱚᱱ ᱮ ᱵᱟᱨᱚᱱ ᱟᱠᱟᱱᱟ᱾ ᱟᱨ ᱟᱢ ᱮᱢ ᱡᱟᱱᱟᱢ ᱟᱠᱟᱱᱟ ᱚᱱᱟ ᱦᱚᱸ ᱟᱹᱛᱩ ᱫᱤᱥᱚᱢ ᱨᱮ ᱟᱢᱟᱜ ᱪᱷᱩᱛ ᱪᱦᱟᱹᱴᱭᱟᱹᱨ ᱪᱮ ᱡᱟᱹᱛᱤ ᱠᱟᱹᱢᱤ ᱦᱚᱸ ᱵᱟᱭ ᱦᱩᱭ ᱟᱠᱟᱱᱟ᱾” ᱠᱷᱮᱨᱣᱟᱲ ᱟᱹᱛᱩ ᱢᱟᱹᱡᱷᱤ ᱢᱚᱬᱮ ᱠᱚᱣᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱢᱚᱱᱮ ᱡᱤᱣᱤ ᱨᱮ ᱟᱹᱰᱤ ᱫᱩᱠ ᱮᱱᱟᱭ ᱟᱨ ᱮ ᱢᱮᱱ ᱟᱠᱟᱜᱼᱟ ᱼ ᱛᱚᱵᱮ ᱪᱮᱫ ᱱᱚᱶᱟ ᱥᱟᱶᱛᱟ ᱦᱚᱸ ᱤᱧ ᱩᱯᱩᱨᱩᱢ ᱵᱟᱭ ᱮᱢ ᱫᱟᱲᱮᱭᱟᱹᱧᱟ?
ᱱᱚᱶᱟ ᱠᱟᱛᱷᱟ ᱤᱫᱤ ᱠᱟᱛᱮ ᱱᱟᱭ ᱵᱤᱪᱟᱹᱨ ᱮ ᱠᱷᱚᱡ ᱟᱠᱟᱫ ᱛᱮ ᱥᱟᱶᱛᱟ ᱢᱟᱹᱡᱷᱤ ᱴᱦᱮᱱ ᱵᱤᱪᱟᱹᱨ ᱞᱟᱹᱜᱤᱫ ᱠᱟᱛᱷᱟ ᱥᱮᱴᱮᱨ ᱟᱠᱟᱱᱟ᱾ ᱩᱱᱤ ᱦᱚᱸ ᱱᱚᱶᱟ ᱵᱤᱪᱟᱹᱨ ᱵᱟᱭ ᱛᱚᱯᱟᱜ ᱫᱟᱲᱮᱭᱟᱫ ᱠᱷᱟᱱ ᱯᱤᱲ ᱯᱟᱨᱜᱟᱱᱟ ᱴᱷᱮᱱ ᱵᱤᱪᱟᱹᱨ ᱪᱟᱞᱟᱣ ᱟᱠᱟᱱᱟ᱾ ᱚᱸᱰᱮ ᱠᱷᱚᱱ ᱛᱚᱞᱟᱴ ᱯᱟᱨᱜᱟᱱ᱾ ᱯᱚᱱᱚᱛ ᱯᱟᱨᱜᱟᱱᱟ ᱚᱱᱟ ᱛᱟᱭᱚᱢ ᱫᱮᱥ ᱯᱟᱨᱜᱟᱱᱟ, ᱢᱩᱪᱟᱹᱫ ᱨᱮ ᱵᱷᱟᱨᱚᱛ ᱡᱟᱠᱟᱛ ᱢᱟᱹᱡᱷᱤ ᱵᱟᱯᱨᱜᱟᱱ ᱢᱚᱦᱚᱞ ᱴᱷᱮᱱ ᱵᱤᱪᱟᱹᱨ ᱪᱟᱞᱟᱣ ᱟᱠᱟᱱᱟ᱾ ᱱᱩᱠᱩ ᱵᱷᱟᱨᱚᱛ ᱡᱟᱠᱟᱛ ᱢᱟᱹᱡᱷᱤ ᱯᱟᱨᱜᱟᱱᱟ ᱢᱚᱦᱚᱞ ᱦᱚᱸ ᱛᱤᱞᱟᱹᱭᱡᱷᱟᱹᱨᱤ ᱟᱹᱛᱩ ᱢᱟᱹᱡᱷᱤᱭᱟᱜ ᱤᱡᱷᱟᱹᱨ ᱠᱟᱛᱷᱟ ᱞᱮᱠᱟᱛᱮ ᱩᱪᱤᱛ ᱱᱟᱭ ᱵᱤᱪᱟᱹᱨ ᱫᱚ ᱠᱷᱮᱨᱣᱟᱲ ᱵᱟᱠᱚ ᱮᱢ ᱫᱟᱲᱮ ᱟᱠᱟᱣᱟᱫᱮᱭᱟ᱾ ᱥᱟᱹᱨᱤ ᱜᱮ ᱠᱷᱮᱨᱣᱟᱲ ᱫᱚ ᱥᱚᱵᱟᱱ ᱦᱚᱯᱚᱱ ᱠᱟᱱᱟᱭ ᱟᱨ ᱠᱟᱹᱨᱩ ᱦᱟᱲᱟᱢ ᱤᱡ ᱜᱚᱲᱚᱢ ᱠᱚᱲᱟ ᱠᱟᱱᱟᱭ ᱢᱮᱱᱛᱮ᱾
ᱚᱱᱟ ᱠᱷᱟᱹᱛᱤᱨ ᱠᱷᱮᱨᱣᱟᱲ ᱫᱚ ᱥᱟᱱᱛᱟᱲ ᱥᱟᱶᱛᱟ ᱟᱹᱱ ᱟᱹᱨᱤ ᱥᱟᱥᱚᱱ ᱵᱮᱵᱚᱥᱛᱟ, ᱵᱷᱟᱨᱚᱛ ᱡᱟᱠᱟᱛ ᱢᱟᱹᱡᱷᱤ ᱯᱟᱨᱜᱟᱱᱟ ᱢᱚᱦᱚᱞ ᱪᱮᱛᱟᱱ ᱯᱟᱹᱛᱭᱟᱹᱣ ᱥᱟᱦᱟ ᱟᱠᱟᱱᱟ᱾ ᱠᱟᱹᱴᱩᱵ ᱩᱫᱩᱜ ᱠᱟᱛᱮ ᱫᱩᱥᱟᱹᱣ ᱟᱠᱟᱫᱼᱟᱭ ᱟᱨ ᱥᱟᱱᱛᱟᱲ ᱥᱟᱶᱛᱟ ᱨᱤᱱ ᱢᱟᱹᱡᱷᱤ ᱯᱟᱨᱜᱟᱱᱟ ᱠᱚᱭ ᱠᱩᱠᱞᱤ ᱟᱠᱟᱫ ᱠᱚᱣᱟ ᱼ “ᱚᱠᱟᱨᱤᱧ ᱧᱟᱢᱟ ᱤᱧᱟᱜ ᱡᱟᱹᱛᱤ ᱥᱟᱠᱟᱢ, ᱚᱠᱚᱭ ᱮᱢᱟᱹᱧᱟ ᱵᱚᱸᱥᱚ ᱵᱩᱱᱤᱭᱟᱹᱫ ᱨᱮᱱᱟᱜ ᱩᱯᱩᱨᱩᱢ, ᱚᱲᱟᱜ ᱰᱤ ᱨᱮᱱᱟᱝ ᱩᱯᱩᱨᱩᱢ ᱥᱟᱠᱟᱢ᱾ ᱚᱠᱚᱭ ᱮᱢᱟᱹᱧᱟ ᱤᱧᱟᱜ ᱩᱯᱩᱨᱩᱢ? ᱦᱚᱸ ᱦᱚᱸ ᱚᱠᱚᱭ ᱮᱢᱟᱹᱧᱟ ᱤᱧᱟᱜ ᱩᱯᱩᱨᱩᱢ???
***