ᱵᱟᱦᱟ ᱫᱚ ᱢᱟᱹᱨᱰᱤ ᱠᱤᱥᱟᱹᱬᱤᱡ ᱜᱮᱞ ᱦᱚᱯᱚᱱ, ᱦᱚᱯᱚᱱ ᱮᱨᱟ ᱠᱷᱚᱱ ᱡᱚᱛᱚ ᱠᱷᱚᱱ ᱦᱩᱰᱤᱧ ᱦᱚᱯᱚᱱ ᱮᱨᱟ ᱠᱟᱱᱟᱭ ᱾ ᱤᱨᱟᱹᱞ ᱦᱚᱯᱚᱱ ᱮᱨᱟ ᱟᱨ ᱵᱟᱨᱭᱟ ᱦᱚᱯᱚᱱ ᱠᱚ ᱢᱟᱹᱫᱽᱨᱮ ᱦᱚᱯᱚᱱ ᱜᱮᱠᱤᱱ ᱚᱞᱚᱜ ᱠᱟᱱᱟ ᱟᱨ ᱦᱚᱯᱚᱱ ᱮᱨᱟ ᱠᱚᱫᱚ ᱚᱠᱚᱭ ᱦᱚᱸ ᱚᱞᱚᱜ ᱟᱥᱲᱟ ᱫᱚ ᱵᱟᱝ ᱠᱚ ᱞᱮᱵᱮᱫ ᱟᱠᱟᱫᱼᱟ ᱾ ᱛᱩᱨᱩᱭ ᱵᱚᱪᱷᱚᱨ ᱩᱢᱮᱨ ᱠᱩᱲᱤ ᱜᱤᱫᱽᱨᱟᱹ ᱵᱟᱦᱟ ᱫᱚ ᱟᱹᱛᱩ ᱨᱤᱱ ᱜᱟᱛᱮ ᱠᱩᱲᱤ ᱜᱤᱫᱽᱨᱟᱹ ᱠᱚ ᱥᱟᱶ ᱠᱩᱞᱦᱤ ᱫᱷᱩᱲᱤ ᱠᱚᱨᱮ ᱠᱚ ᱮᱱᱮᱡ ᱡᱚᱝᱟ ᱾ ᱛᱟᱭᱚᱢ ᱫᱚ ᱵᱟᱦᱟ ᱨᱤᱱ ᱡᱚᱛᱚ ᱡᱚᱴᱟᱣ ᱜᱤᱫᱽᱨᱟᱹ ᱟᱥᱲᱟ ᱥᱮᱱᱚᱜ ᱠᱚ ᱮᱛᱚᱦᱚᱵ ᱠᱮᱫᱼᱟ ᱾ ᱤᱠᱷᱟᱹᱱ ᱵᱟᱦᱟ ᱫᱚ ᱵᱟᱝ ᱠᱚ ᱵᱷᱮᱡᱟ ᱮ ᱠᱟᱱᱟ ᱾ ᱛᱤᱱᱟᱹᱝ ᱫᱤᱱ ᱪᱚ ᱱᱚᱝᱠᱟ ᱜᱮ ᱯᱚᱞᱚᱢ ᱮᱱᱟ ᱾ ᱵᱟᱦᱟ ᱩᱱᱠᱩ ᱠᱚ ᱥᱟᱶᱮ ᱮᱱᱮᱡ ᱡᱚᱝᱟ, ᱩᱱᱠᱩ ᱟᱥᱲᱟ ᱠᱚ ᱥᱮᱱ ᱞᱮᱱ ᱠᱷᱟᱱ ᱛᱟᱭᱚᱢ ᱫᱚ ᱛᱷᱤᱨᱛᱷᱟᱨ ᱩᱱᱠᱩ ᱠᱚᱭᱚᱜ ᱨᱮᱜᱮᱭ ᱛᱟᱦᱮᱸ ᱠᱚᱜᱼᱟ, ᱛᱤᱱᱨᱮ ᱟᱥᱲᱟ ᱠᱷᱚᱱ ᱠᱚ ᱨᱩᱣᱟᱹᱲᱟ ᱾ ᱢᱤᱫ ᱫᱤᱱ ᱫᱚ ᱵᱟᱦᱟ ᱦᱚᱸ ᱟᱥᱲᱟ ᱛᱮ ᱡᱚᱴᱟᱣ ᱠᱚᱭ ᱯᱟᱸᱡᱟ ᱠᱮᱫ ᱠᱚᱣᱟ᱾ ᱵᱟᱦᱟ ᱡᱚᱴᱟᱣ ᱨᱟᱹᱦᱤ ᱫᱚ ᱠᱩᱞᱦᱤ ᱢᱩᱪᱟᱹᱫ ᱠᱷᱚᱱ ᱫᱟᱹᱲ ᱨᱩᱣᱟᱹᱲ ᱠᱟᱛᱮ ᱵᱟᱦᱟ ᱟᱡ ᱫᱟᱹᱭ ᱠᱩᱱᱟᱹᱢᱤᱭ ᱞᱟᱹᱭ ᱟᱭ ᱠᱟᱱᱟᱼ ᱫᱟᱹᱭ, ᱵᱟᱦᱟ ᱢᱟ ᱟᱥᱲᱟ ᱛᱮᱭ ᱯᱟᱸᱡᱟ ᱮᱫ ᱞᱮᱭᱟ᱾ ᱱᱚᱶᱟ ᱟᱸᱡᱚᱢ ᱠᱟᱛᱮ ᱠᱩᱱᱟᱹᱢᱤ ᱫᱚ ᱦᱚᱦᱚ ᱟᱛᱮ ᱠᱩᱞᱦᱤ ᱢᱩᱪᱟᱹᱫ ᱥᱮᱫ ᱮ ᱥᱮᱱ ᱮᱱᱟ᱾ ᱤᱠᱷᱟᱹᱱ ᱵᱟᱦᱟ ᱨᱟᱜ ᱟᱛᱮᱭ ᱢᱮᱱ ᱠᱮᱫᱼᱟᱼ ᱫᱟᱹᱭ, ᱤᱧ ᱦᱚᱸ ᱟᱥᱲᱟ ᱛᱮ ᱚᱞᱚᱜ ᱤᱧ ᱥᱮᱱᱚᱜᱼᱟ᱾ ᱤᱧ ᱦᱩᱸᱧ ᱚᱞᱚᱜᱼᱟ ᱫᱟᱹᱭ, ᱤᱧ ᱦᱩᱸᱧ ᱚᱞᱚᱜ ᱜᱮᱭᱟ᱾ ᱠᱩᱱᱟᱹᱢᱤ ᱛᱟᱭᱚᱢ ᱢᱟᱬᱟᱝ ᱠᱚᱭᱚᱜ ᱧᱚᱜ ᱠᱟᱛᱮᱭ ᱢᱮᱛᱟ ᱫᱮᱭᱟᱼ ᱦᱚᱯᱚᱱ ᱴᱤ, ᱚᱱᱠᱟ ᱫᱚ ᱵᱟᱠᱚ ᱢᱮᱱᱟ᱾ ᱫᱮᱞᱟ ᱚᱲᱟᱜ ᱛᱮ ᱨᱩᱣᱟᱹᱲ ᱢᱮ ᱾
ᱚᱲᱟᱜ ᱛᱮᱭ ᱜᱚᱦᱚᱲ ᱨᱩᱣᱟᱹᱲ ᱠᱮᱫᱮᱭᱟ ᱵᱟᱦᱟ᱾ ᱵᱟᱦᱟ ᱫᱚ ᱟᱹᱰᱤ ᱡᱩᱨ ᱮ ᱨᱟᱜ ᱠᱮᱫᱼᱟ᱾ ᱱᱚᱶᱟ ᱟᱸᱡᱚᱢ ᱠᱟᱛᱮ ᱡᱚᱛᱚ ᱦᱚᱲ ᱚᱲᱟᱜ ᱠᱷᱚᱱ ᱠᱚ ᱚᱰᱚᱠ ᱮᱱᱟ ᱟᱨ ᱵᱟᱦᱟ ᱟᱡ ᱫᱟᱫᱟ ᱛᱟᱨᱟᱥ ᱫᱚ ᱨᱟᱹᱜᱤ ᱟᱛᱮ ᱠᱩᱱᱟᱹᱢᱤᱭ ᱠᱩᱞᱤ ᱠᱮᱫᱮᱭᱟᱼ ᱵᱟᱦᱟ ᱫᱚ ᱪᱮᱫᱟᱜ ᱮ ᱨᱟᱜᱮᱫᱼᱟ?ᱠᱩᱱᱟᱹᱢᱤ ᱠᱩᱴᱵᱩᱨ ᱠᱟᱛᱮ ᱴᱷᱟᱠᱮᱫ ᱴᱷᱟᱠᱮᱫ ᱛᱮᱭ ᱨᱚᱲ ᱠᱮᱫᱼᱟᱼ ᱫᱟᱫᱟ, ᱟᱥᱲᱟ ᱥᱮᱱᱚᱜ ᱥᱟᱱᱟᱭᱮ ᱠᱟᱱᱟ᱾ ᱟᱥᱲᱟ ᱥᱮᱱᱚᱜ ᱥᱟᱱᱟ ᱮ ᱠᱟᱱᱟ! ᱟᱹᱰᱤ ᱡᱩᱨ ᱚᱞᱚᱜ ᱢᱟᱢ ᱵᱟᱰᱟᱭ ᱫᱚ᱾ ᱱᱤᱛ ᱜᱮ ᱱᱷᱟᱜ ᱚᱫᱷᱟᱣ ᱟᱠᱟᱫ ᱢᱮ ᱠᱷᱟᱱ ᱢᱤᱫ ᱫᱷᱟᱣ ᱨᱮ ᱜᱚᱴᱟ ᱫᱩᱱᱤᱭᱟᱹ ᱨᱮᱱᱟᱜ ᱟᱥᱲᱟᱢ ᱧᱮᱞ ᱯᱩᱨᱟᱹᱣᱟ, ᱢᱮᱱᱛᱮ ᱛᱟᱨᱟᱥ ᱮ ᱢᱮᱱ ᱠᱮᱫᱼᱟ᱾ ᱟᱡ ᱫᱟᱫᱟ ᱟᱜ ᱨᱟᱹᱜᱤ ᱧᱮᱞ ᱛᱮ ᱵᱟᱦᱟ ᱫᱚ ᱟᱨ ᱦᱚᱸ ᱵᱚᱛᱚᱨ ᱛᱮ ᱟᱹᱰᱤᱜᱮᱭ ᱨᱟᱜ ᱠᱮᱫᱼᱟ᱾ ᱛᱟᱨᱟᱥ ᱫᱚ ᱚᱲᱟᱜ ᱠᱷᱚᱱ ᱚᱰᱚᱠᱚᱜ ᱡᱚᱦᱚᱜ ᱥᱟᱛᱮ ᱠᱷᱚᱱ ᱡᱚᱡᱚ ᱪᱷᱤᱨᱠᱤᱬᱤᱡ ᱮ ᱦᱟᱛᱣᱟ ᱛᱟᱨᱟ ᱞᱮᱫᱼᱟ᱾ ᱵᱟᱦᱟ ᱟᱜ ᱨᱟᱜ ᱟᱸᱡᱚᱢ ᱛᱮ ᱨᱟᱹᱜᱤ ᱛᱮ ᱟᱹᱰᱤᱜᱮᱭ ᱪᱟᱨᱱᱟᱣ ᱠᱮᱫᱮᱭᱟ ᱾
ᱵᱟᱦᱟ, ᱡᱚᱴᱟᱣ ᱜᱤᱫᱽᱨᱟᱹ ᱥᱟᱶ ᱮᱱᱮᱡ ᱡᱚᱝᱟᱭ, ᱨᱚᱲ ᱞᱟᱸᱫᱟᱭᱟᱭ ᱤᱠᱷᱟᱹᱱ ᱚᱲᱟᱜ ᱨᱮᱫᱚ ᱛᱷᱤᱨᱛᱷᱟᱨ ᱮ ᱛᱟᱦᱮᱸᱱᱟ᱾ ᱱᱚᱝᱠᱟ ᱜᱮ ᱥᱮᱨᱢᱟ ᱯᱩᱨᱟᱹᱣᱜ ᱠᱟᱱᱟ᱾ ᱱᱚᱶᱟ ᱠᱚ ᱧᱮᱞ ᱠᱟᱛᱮ ᱵᱟᱦᱟ ᱟᱡ ᱫᱟᱹᱭ ᱠᱩᱱᱟᱹᱢᱤ ᱫᱚ ᱟᱹᱰᱤ ᱜᱮ ᱠᱟᱹᱦᱤᱸᱥ ᱮ ᱵᱩᱡᱷᱟᱹᱣᱟ᱾ ᱢᱤᱫ ᱫᱤᱱ ᱫᱚ ᱚᱲᱟᱜᱨᱮ ᱡᱚᱛᱚ ᱦᱚᱲ ᱢᱮᱱᱟᱜ ᱠᱚ ᱚᱠᱛᱚᱨᱮ ᱠᱩᱱᱟᱹᱢᱤ ᱫᱚ ᱥᱟᱦᱟᱥ ᱡᱚᱴᱟᱣ ᱠᱟᱛᱮᱭ ᱢᱮᱱ ᱠᱮᱫᱼᱟᱼ ᱵᱟᱵᱟ, ᱦᱚᱯᱚᱱ ᱴᱤ ᱫᱚ ᱱᱤᱭᱟᱹ ᱥᱮᱨᱢᱟ ᱠᱷᱚᱱ ᱟᱥᱲᱟ ᱛᱮᱭ ᱥᱮᱱ ᱚᱪᱚᱱᱚᱜ ᱵᱟᱝᱠᱷᱟᱱ᱾ ᱱᱚᱶᱟ ᱟᱸᱡᱚᱢ ᱠᱟᱛᱮ ᱟᱡ ᱵᱟᱵᱟᱭ ᱢᱮᱱ ᱠᱮᱫᱼᱟ, ᱜᱟᱱᱚᱜ ᱜᱮᱭᱟ, ᱥᱮᱱᱚᱜ ᱢᱟᱭ᱾ ᱤᱱᱠᱟᱹ ᱛᱮᱦᱚᱸ ᱦᱩᱰᱤᱧ ᱦᱩᱰᱤᱧ ᱨᱮ ᱟᱢ ᱟᱭᱳᱭ ᱜᱚᱡ ᱵᱟᱹᱜᱤ ᱟᱫᱮᱭᱟ᱾ ᱛᱟᱲᱟᱢ ᱪᱮᱫᱚᱜ ᱠᱷᱚᱱ ᱡᱚᱴᱟᱣ ᱜᱤᱫᱽᱨᱟᱹ ᱠᱚ ᱥᱟᱶ ᱜᱮᱭ ᱦᱟᱨᱟ ᱟᱠᱟᱱᱟ᱾ ᱟᱨ ᱱᱤᱛᱚᱜ ᱩᱱᱤ ᱩᱱᱠᱩ ᱴᱷᱮᱱ ᱠᱷᱚᱱ ᱪᱩᱰᱟᱹᱨ ᱮ ᱵᱟᱝ ᱵᱩᱜᱤᱜ ᱠᱟᱱᱟ᱾ ᱱᱚᱶᱟ ᱟᱸᱡᱚᱢ ᱠᱟᱛᱮ ᱠᱩᱱᱟᱹᱢᱤ ᱫᱚ ᱦᱚᱦᱚ ᱟᱛᱮᱭ ᱫᱟᱹᱲ ᱠᱮᱫᱼᱟ ᱵᱟᱦᱟ ᱴᱷᱮᱱ, ᱦᱚᱯᱚᱱ ᱴᱤ, ᱦᱚᱯᱚᱱ ᱴᱤ, ᱟᱢ ᱦᱚᱸ ᱚᱞᱚᱜ ᱞᱟᱹᱜᱤᱫ ᱟᱥᱲᱟ ᱥᱮᱱᱚᱜ ᱛᱟᱞᱟᱝ ᱢᱮ ᱵᱟᱵᱟᱭ ᱢᱮᱱᱮᱫᱼᱟ᱾ ᱤᱧ ᱵᱟᱠᱷᱨᱟ ᱠᱚ ᱟᱹᱰᱤ ᱰᱷᱮᱨ ᱚᱞᱚᱜ ᱛᱟᱞᱟᱝ ᱢᱮ ᱦᱚᱭ ᱪᱮ? ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱵᱟᱦᱟᱭ ᱪᱚᱢᱠᱟᱣ ᱮᱱᱟ᱾ ᱜᱟᱺᱦᱤᱨ ᱟᱲᱟᱝ ᱛᱮᱭ ᱢᱮᱱ ᱠᱮᱫᱼᱟ ᱵᱟᱦᱟ, ᱥᱟᱹᱨᱤ ᱪᱮ ᱫᱟᱹᱭ?ᱥᱟᱹᱨᱤ ᱜᱮ ᱴᱤ, ᱟᱢ ᱫᱚ ᱥᱟᱯᱲᱟᱣᱜ ᱛᱟᱞᱟᱝ ᱢᱮᱥᱮ, ᱟᱥᱲᱟ ᱥᱮᱱ ᱠᱟᱛᱮ ᱟᱹᱰᱤ ᱰᱷᱮᱨ ᱚᱞᱚᱜ ᱪᱮᱫᱚᱜ ᱛᱟᱞᱟᱝ ᱢᱮ᱾ ᱵᱟᱦᱟ ᱪᱮᱫ ᱦᱚᱸ ᱵᱟᱝ ᱢᱮᱱ ᱠᱟᱛᱮ ᱟᱡ ᱫᱟᱹᱭ ᱴᱷᱮᱱ ᱦᱟᱹᱲᱩᱵ ᱩᱨᱤᱡ ᱠᱟᱛᱮ ᱯᱷᱮᱸᱠᱮᱨ ᱯᱷᱮᱸᱠᱮᱨ ᱮ ᱨᱟᱜ ᱠᱮᱫ ᱛᱮᱭ ᱢᱮᱱ ᱠᱮᱫᱼᱟᱼ ᱫᱟᱹᱭ, ᱤᱧ ᱦᱚᱸ ᱚᱞᱚᱜ ᱫᱚ ᱥᱮᱱᱚᱜ ᱥᱟᱹᱱᱟᱹᱧ ᱠᱟᱱ ᱜᱮᱭᱟ, ᱤᱠᱷᱟᱹᱱ ᱵᱚᱛᱚᱨ ᱛᱮ ᱪᱮᱫ ᱦᱚᱸ ᱵᱟᱹᱧ ᱢᱮᱱᱮᱫᱼᱟ, ᱫᱟᱫᱟ ᱢᱟ ᱟᱹᱰᱤᱡᱩᱨ ᱜᱮᱭ ᱫᱟᱞᱤᱧ ᱫᱚ, ᱪᱮᱫᱟᱜ ᱫᱟᱹᱭ, ᱫᱟᱫᱟ ᱫᱚ ᱚᱱᱠᱟᱭ ᱫᱟᱞᱤᱧᱟ?
ᱠᱩᱱᱟᱹᱢᱤ ᱢᱚᱴᱟ ᱥᱟᱺᱦᱤᱡ ᱥᱟᱦᱮᱫ ᱠᱟᱛᱮᱭ ᱢᱮᱱ ᱠᱮᱫᱼᱟ, ᱵᱟᱰᱟᱭᱟᱢ ᱦᱚᱯᱚᱱ ᱴᱤ, ᱫᱟᱫᱟ ᱫᱚ ᱟᱹᱰᱤᱡᱩᱨ ᱟᱢ ᱫᱚᱭ ᱫᱩᱞᱟᱹᱲ ᱢᱮᱭᱟ, ᱚᱱᱟ ᱠᱷᱟᱹᱛᱤᱨ ᱜᱮᱭ ᱫᱟᱞ ᱢᱮᱭᱟ᱾ ᱟᱥᱲᱟ ᱥᱮᱱᱚᱜ ᱛᱟᱞᱟᱝ ᱢᱮᱥᱮ, ᱫᱟᱫᱟ ᱦᱚᱸ ᱱᱷᱟᱜ ᱫᱟᱞ ᱞᱟᱹᱜᱤᱫ ᱦᱚᱸ ᱵᱟᱭ ᱧᱟᱢ ᱢᱮᱭᱟ᱾ ᱱᱤᱭᱟᱹ ᱥᱮᱨᱢᱟ ᱠᱷᱚᱱ ᱫᱚ ᱵᱟᱦᱟ ᱦᱚᱸ ᱟᱥᱲᱟᱭ ᱥᱮᱱ ᱮᱱᱟ᱾ ᱟᱹᱰᱤ ᱱᱟᱯᱟᱭ ᱜᱮᱭ ᱚᱞ ᱠᱮᱫᱼᱟ ᱟᱨ ᱟᱹᱰᱤ ᱱᱟᱯᱟᱭ ᱛᱮ ᱫᱤᱱ ᱦᱚᱸ ᱯᱚᱞᱚᱢ ᱮᱱᱟ᱾ ᱵᱟᱦᱟ ᱟᱜ ᱱᱟᱯᱟᱭ ᱚᱞᱚᱜ ᱧᱮᱞ ᱛᱮ ᱢᱤᱫ ᱫᱤᱱ ᱫᱚ ᱟᱡ ᱫᱟᱫᱟ ᱛᱤᱠᱤᱱ ᱠᱤᱱ ᱨᱚᱯᱚᱲ ᱠᱟᱱᱟ, ᱱᱚᱝᱠᱟ ᱜᱮ ᱦᱚᱯᱚᱱ ᱵᱤᱴᱤ ᱜᱮᱞ ᱪᱟᱱᱚᱪ ᱦᱚᱸᱭ ᱥᱟᱹᱛ ᱠᱷᱟᱱ, ᱪᱮᱛᱟᱱ ᱥᱮᱫ ᱫᱚ ᱰᱟᱠᱛᱚᱨᱤ ᱞᱟᱝ ᱯᱟᱲᱦᱟᱣ ᱦᱚᱪᱚ ᱮᱭᱟ᱾ ᱱᱚᱶᱟ ᱠᱟᱛᱷᱟ ᱫᱚ ᱵᱟᱦᱟ ᱦᱚᱸᱭ ᱟᱸᱡᱚᱢ ᱠᱮᱫᱼᱟ ᱟᱨ ᱚᱱᱛᱚᱨ ᱜᱟᱺᱦᱤᱨ ᱨᱮ ᱨᱮᱵᱮᱫ ᱠᱟᱛᱮᱭ ᱫᱚᱦᱚ ᱠᱮᱫᱼᱟ᱾ ᱱᱚᱝᱠᱟ ᱛᱮ ᱟᱨᱮ ᱪᱟᱱᱚᱪ ᱵᱤᱱᱤᱰ ᱮ ᱮᱢ ᱠᱮᱫᱼᱟ᱾ ᱢᱤᱫ ᱫᱤᱱ ᱫᱚ ᱴᱟᱴᱠᱟ ᱜᱮ ᱟᱡ ᱦᱤᱞᱤᱭᱟᱜ ᱢᱚᱪᱟ ᱠᱷᱚᱱ ᱮ ᱟᱸᱡᱚᱢ ᱠᱮᱫᱼᱟ, ᱮ ᱦᱚᱯᱚᱱ ᱵᱤᱴᱤ, ᱟᱢ ᱧᱩᱛᱩᱢ ᱯᱮᱲᱟ ᱠᱚ ᱞᱟᱜᱟᱣ ᱮᱱ ᱫᱚ, ᱡᱟᱶᱟᱭ ᱢᱮ ᱞᱟᱹᱜᱤᱫ ᱵᱚᱱ᱾ ᱵᱟᱦᱟ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱵᱚᱦᱚᱜᱨᱮ ᱵᱚᱡᱚᱨ ᱧᱩᱨ ᱟᱫᱮ ᱞᱮᱠᱟᱭ ᱟᱹᱭᱠᱟᱹᱣ ᱠᱮᱫᱼᱟ᱾ ᱪᱮᱫ ᱦᱚᱸ ᱵᱟᱭ ᱨᱚᱲ ᱞᱮᱫᱼᱟ, ᱤᱠᱷᱟᱹᱱ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱫᱚ ᱦᱤᱰᱤᱨ ᱦᱤᱰᱤᱨ ᱡᱚᱨᱚ ᱮᱱ ᱛᱟᱭᱟ᱾ ᱵᱷᱟᱹᱜᱤ ᱞᱮᱠᱟᱭ ᱵᱟᱰᱟᱭ ᱛᱟᱦᱮᱸᱫ, ᱠᱷᱟᱱᱮᱠ ᱱᱚᱶᱟ ᱠᱟᱛᱷᱟ ᱥᱟᱹᱨᱤᱭᱟ, ᱞᱟᱯᱷᱟᱝ ᱯᱟᱲᱦᱟᱣᱜ ᱨᱮᱭᱟᱜ ᱤᱧᱟᱜ ᱠᱩᱠᱢᱩ ᱫᱚ ᱫᱷᱟᱥᱟᱣ ᱢᱮᱴᱟᱣᱜᱼᱟ᱾ ᱤᱧᱟᱜ ᱟᱸᱥ ᱚᱠᱚᱭ ᱦᱚᱸ ᱵᱟᱝ ᱠᱚ ᱠᱩᱞᱤ ᱤᱧᱟ, ᱤᱧᱟᱜ ᱠᱟᱛᱷᱟ ᱚᱠᱚᱭ ᱦᱚᱸ ᱵᱟᱠᱚ ᱢᱟᱱᱟᱣ ᱛᱤᱧᱟ᱾
ᱱᱚᱶᱟ ᱠᱟᱛᱷᱟ ᱥᱟᱹᱨᱤ ᱜᱮᱭᱟ, ᱵᱟᱯᱞᱟᱜ ᱥᱟᱯᱲᱟᱣᱜ ᱠᱚ ᱮᱛᱚᱦᱚᱵ ᱠᱮᱫᱼᱟ᱾ ᱢᱤᱫ ᱫᱤᱱ ᱫᱚ ᱵᱟᱦᱟ ᱥᱟᱦᱟᱥ ᱡᱚᱴᱟᱣ ᱠᱟᱛᱮᱭ ᱢᱮᱱ ᱠᱮᱫᱼᱟ, ᱜᱮᱞ ᱪᱟᱱᱚᱪ ᱛᱮᱫ ᱯᱩᱨᱟᱹᱣ ᱚᱪᱚᱣᱟᱹᱧ ᱯᱮ, ᱤᱱᱟᱹ ᱛᱟᱭᱚᱢ ᱫᱚ ᱡᱟᱦᱟᱸ ᱨᱮᱜᱮ ᱯᱮ ᱡᱟᱶᱟᱭ ᱤᱧᱟ, ᱚᱸᱰᱮ ᱜᱮᱧ ᱠᱩᱥᱤᱜᱼᱟ᱾ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱡ ᱫᱟᱫᱟᱭ ᱨᱚᱦᱮᱫ ᱠᱮᱫᱼᱟᱼ ᱩᱱᱤᱭᱟᱜ ᱠᱟᱛᱷᱟ ᱫᱚ ᱟᱞᱚ ᱯᱮ ᱟᱸᱡᱚᱢᱟ, ᱪᱮᱫ ᱮ ᱵᱟᱰᱟᱭᱟ ᱩᱱᱤ ᱫᱚ᱾ ᱟᱡ ᱡᱟᱶᱟᱭ ᱠᱟᱭ ᱯᱟᱹᱪᱷᱞᱟᱹ ᱨᱮᱫᱚ ᱟᱡᱟᱜ ᱛᱟᱭᱚᱢ ᱫᱟᱨᱟᱢ ᱢᱟᱨᱥᱟᱞ ᱡᱤᱭᱚᱱ ᱞᱟᱹᱜᱤᱫ ᱜᱮ ᱟᱹᱞᱤᱧᱟᱜ ᱟᱸᱥ ᱫᱚ᱾ ᱦᱟᱨᱟ ᱮᱱᱟᱭ, ᱛᱟᱭᱚᱢ ᱛᱮ ᱯᱮᱲᱟ ᱠᱚ ᱵᱟᱝ ᱠᱚ ᱞᱟᱜᱟᱣᱜ ᱠᱷᱟᱱ, ᱚᱠᱚᱭ ᱮ ᱟᱱᱟᱜᱚᱱᱟ ᱮᱭᱟ ᱱᱩᱭ ᱫᱚ᱾ ᱵᱟᱦᱟᱦᱟᱜ ᱢᱮᱫ ᱫᱟᱜ ᱦᱤᱰᱤᱨ ᱦᱤᱰᱤᱨ ᱡᱚᱨᱚᱜ ᱠᱟᱱ ᱛᱟᱦᱮᱸᱫ, ᱤᱠᱷᱟᱹᱱ ᱪᱮᱫ ᱦᱚᱸ ᱵᱟᱭ ᱢᱮᱱ ᱞᱮᱫᱼᱟ᱾
ᱵᱟᱦᱟ ᱠᱚ ᱡᱟᱶᱟᱭ ᱠᱮᱫᱮᱭᱟ᱾ ᱤᱠᱷᱟᱹᱱ ᱵᱟᱦᱟ ᱟᱜ ᱢᱚᱱᱮ ᱫᱚ ᱱᱤᱛᱚᱜ ᱦᱚᱸ ᱚᱞᱚᱜ ᱨᱮᱜᱮ᱾ ᱢᱚᱱᱮᱭ ᱢᱮᱱ ᱛᱟᱭᱟ, ᱚᱞᱚᱜ ᱜᱮᱭᱟᱹᱧ᱾ ᱵᱟᱦᱟ ᱫᱚ ᱛᱩᱨᱩᱭ ᱪᱟᱱᱚᱪ ᱠᱷᱚᱱ ᱦᱚᱥᱴᱮᱞ ᱨᱮ ᱛᱟᱦᱮᱸ ᱠᱟᱛᱮᱭ ᱚᱞᱚᱜ ᱠᱟᱱ ᱛᱟᱦᱮᱸᱱ᱾ ᱡᱟᱶᱟᱭ ᱠᱟᱛᱮ ᱦᱚᱸ ᱟᱡ ᱡᱟᱶᱟᱭ ᱮ ᱨᱮᱵᱮᱱ ᱚᱪᱚ ᱠᱮᱫᱮᱭᱟ ᱟᱡ ᱚᱞᱚᱜ ᱞᱟᱹᱜᱤᱫ᱾ ᱤᱠᱷᱟᱹᱱ ᱵᱟᱦᱟ ᱟᱡ ᱫᱟᱫᱟ ᱦᱤᱞᱤ ᱫᱚ ᱵᱟᱹᱠᱤᱱ ᱨᱮᱵᱮᱱ ᱞᱮᱱᱟ᱾ ᱢᱮᱱ ᱠᱮᱫ ᱟᱹᱠᱤᱱ, ᱡᱟᱶᱟᱭ ᱠᱟᱛᱮᱢ ᱚᱞᱚᱜᱼᱟ ᱦᱚᱲ ᱪᱮᱫ ᱠᱚ ᱢᱮᱱᱟ᱾ ᱟᱵᱚ ᱦᱚᱸ ᱥᱟᱶᱛᱟ ᱛᱟᱞᱟᱨᱮ ᱢᱮᱱᱟᱜ ᱵᱚᱱᱟ, ᱥᱟᱶᱛᱟ ᱨᱮᱱᱟᱜ ᱛᱤᱱᱟᱹᱝ ᱜᱟᱱ ᱨᱟᱭᱨᱤᱛ ᱫᱚ ᱢᱟᱱᱟᱣ ᱛᱮᱜᱮ ᱦᱩᱭᱩᱜᱼᱟ᱾ ᱵᱟᱦᱟᱭ ᱢᱮᱱ ᱠᱮᱫᱼᱟ, ᱠᱟᱹᱭ ᱢᱟ ᱵᱟᱹᱧ ᱠᱟᱹᱢᱤ ᱠᱟᱱᱟ ᱫᱟᱫᱟ, ᱤᱧᱟᱜ ᱠᱟᱹᱢᱤ ᱛᱮ ᱥᱟᱶᱛᱟᱨᱮ ᱡᱟᱦᱟᱸᱱ ᱵᱟᱹᱲᱤᱡ ᱚᱨᱥᱚᱝ ᱯᱟᱲᱟᱣᱜᱼᱟ ᱚᱱᱠᱟ ᱦᱚᱸ ᱛᱚ ᱵᱟᱝᱟ᱾ ᱦᱚᱲ ᱫᱚ ᱡᱟᱦᱟᱸᱱᱟᱜ ᱜᱮᱠᱚ ᱢᱮᱱ᱾ ᱵᱟᱦᱟᱭ ᱥᱟᱯᱲᱟᱣ ᱮᱱᱟ, ᱦᱚᱥᱴᱮᱞ ᱨᱩᱣᱟᱹᱲ ᱠᱟᱛᱮ ᱜᱮ ᱜᱮᱞ ᱪᱟᱱᱚᱪ ᱮ ᱥᱟᱹᱛ ᱟᱹᱜᱩᱭ ᱞᱟᱹᱜᱤᱫ᱾ ᱡᱟᱦᱟᱸ ᱠᱷᱟᱹᱛᱤᱨ ᱵᱟᱦᱟ ᱦᱚᱥᱴᱮᱞ ᱮ ᱥᱮᱴᱮᱨ ᱮᱱᱟ᱾ ᱤᱠᱷᱟᱹᱱ ᱦᱚᱥᱴᱮᱞ ᱥᱮᱴᱮᱨ ᱠᱟᱛᱮᱭ ᱵᱟᱰᱟᱭ ᱠᱮᱫᱼᱟ, ᱟᱡ ᱫᱟᱫᱟ ᱜᱮ ᱦᱮᱡ ᱠᱟᱛᱮᱭ ᱞᱟᱹᱭ ᱚᱴᱚ ᱟᱠᱟᱫᱼᱟ ᱡᱮᱼ ᱵᱟᱦᱟ ᱫᱚᱞᱮ ᱡᱟᱶᱟᱭ ᱠᱮᱫᱮᱭᱟ ᱟᱨ ᱚᱞᱚᱜ ᱞᱟᱹᱜᱤᱫ ᱵᱟᱭ ᱨᱩᱣᱟᱹᱲᱟ᱾ ᱦᱚᱥᱴᱮᱞ ᱨᱤᱱᱤᱡ ᱥᱩᱯᱚᱨᱤᱱᱴᱮᱸᱰ ᱱᱚᱶᱟ ᱠᱟᱛᱷᱟ ᱜᱮᱭ ᱢᱮᱱ ᱠᱮᱫᱼᱟᱼ ᱡᱟᱶᱟᱭ ᱠᱟᱛᱮ ᱦᱚᱸ ᱟᱢ ᱡᱩᱫᱤ ᱦᱚᱥᱴᱮᱞ ᱨᱮᱢ ᱛᱟᱦᱮᱸᱱᱟ, ᱟᱢ ᱠᱷᱟᱹᱛᱤᱨ ᱮᱴᱟᱜ ᱜᱤᱫᱽᱨᱟᱹ ᱪᱮᱛᱟᱱ ᱨᱮ ᱵᱟᱹᱲᱤᱡ ᱚᱨᱥᱚᱝ ᱯᱟᱲᱟᱣᱜᱼᱟ᱾ ᱚᱱᱟᱛᱮ ᱟᱢ ᱫᱚ ᱦᱚᱥᱴᱮᱞ ᱨᱮᱫᱚ ᱴᱷᱟᱶ ᱵᱟᱢ ᱧᱟᱢᱟ᱾ ᱟᱹᱰᱤᱜᱟᱱ ᱱᱮᱦᱚᱸᱨ ᱡᱚᱦᱟᱨ ᱠᱟᱛᱮ ᱨᱮᱦᱚᱸ ᱵᱟᱦᱟ ᱦᱚᱥᱴᱮᱞ ᱨᱮ ᱛᱟᱦᱮᱸᱱ ᱨᱮᱱᱟᱜ ᱦᱚᱠ ᱵᱟᱭ ᱧᱟᱢ ᱞᱮᱫ ᱜᱮᱭᱟ᱾ ᱡᱟᱦᱟᱸ ᱠᱷᱟᱹᱛᱤᱨ ᱨᱩᱣᱟᱹᱲ ᱦᱮᱡ ᱦᱩᱭ ᱟᱫᱮᱭᱟ ᱪᱟᱹᱠᱨᱤ ᱫᱤᱥᱚᱢ ᱚᱲᱟᱜ ᱛᱮ᱾
ᱮᱱ ᱦᱚᱸ ᱢᱚᱱᱮᱨᱮ ᱡᱤᱫᱽ ᱫᱚ ᱢᱮᱱᱟᱜ ᱜᱮᱭᱟ, ᱚᱞᱚᱜ ᱜᱮᱭᱟᱹᱧ᱾ ᱤᱠᱷᱟᱹᱱ ᱚᱠᱟᱨᱮ? ᱟᱡ ᱡᱟᱶᱟᱭᱟᱜ ᱢᱚᱱᱮᱨᱮ ᱠᱩᱠᱞᱤ ᱛᱟᱦᱮᱸ ᱠᱟᱱᱟ᱾ ᱱᱚᱝᱠᱟ ᱛᱮ ᱤᱱᱟᱹ ᱥᱮᱨᱢᱟ ᱫᱚ ᱵᱮᱠᱟᱨ ᱮᱱ ᱛᱟᱭᱟ ᱵᱟᱦᱟ᱾ ᱪᱟᱹᱠᱨᱤ ᱫᱤᱥᱚᱢ ᱨᱮ ᱮᱴᱟᱜ ᱯᱟᱹᱨᱥᱤ ᱛᱮ ᱚᱞᱚᱜ ᱚᱦᱚᱣᱟᱱ ᱜᱮ ᱛᱟᱦᱮᱸ ᱠᱟᱱᱟ᱾ ᱤᱱᱟᱹ ᱥᱮᱨᱢᱟ ᱵᱷᱤᱛᱨᱤ ᱨᱮ ᱟᱡ ᱡᱟᱶᱟᱭ ᱚᱱᱠᱟᱱ ᱟᱥᱲᱟᱭ ᱯᱟᱱᱛᱮ ᱧᱟᱢ ᱠᱮᱫ ᱜᱮᱭᱟ, ᱡᱟᱦᱟᱸ ᱨᱮᱫᱚ ᱵᱟᱦᱟᱭ ᱚᱞᱚᱜ ᱠᱟᱱ ᱯᱟᱹᱨᱥᱤ ᱛᱮ ᱯᱟᱲᱦᱟᱣ ᱦᱩᱭᱩᱜ ᱠᱟᱱᱟ᱾ ᱤᱠᱷᱟᱹᱱ ᱱᱚᱰᱮ ᱟᱨ ᱦᱚᱸ ᱢᱤᱫᱴᱟᱹᱝ ᱮᱴᱠᱮᱴᱚᱬᱮ ᱛᱟᱦᱮᱸ ᱠᱟᱱᱟ, ᱮᱴᱟᱜ ᱟᱥᱲᱟᱨᱮ ᱥᱤᱫᱷᱟᱹ ᱜᱮᱞ ᱪᱟᱱᱚᱪ ᱨᱮ ᱵᱷᱩᱨᱛᱤ ᱵᱟᱠᱚ ᱦᱟᱛᱟᱣ ᱠᱚᱣᱟ᱾ ᱤᱠᱷᱟᱹᱱ ᱵᱟᱦᱟ ᱟᱜ ᱡᱤᱫᱽ ᱟᱨ ᱵᱟᱦᱟ ᱞᱟᱹᱜᱤᱫ ᱟᱡ ᱡᱟᱶᱟᱭ ᱟᱜ ᱱᱮᱦᱚᱸᱨ ᱥᱟᱢᱟᱝ ᱨᱮ ᱟᱥᱲᱟ ᱨᱮᱱᱟᱜ ᱡᱚᱛᱚ ᱨᱤᱛ ᱯᱮᱸᱰᱚᱜ ᱢᱟᱹᱞᱪᱷᱟᱹ ᱮᱱᱟ᱾ ᱟᱨ ᱵᱟᱦᱟ ᱚᱞᱚᱜ ᱞᱟᱹᱜᱤᱫ ᱚᱱᱟ ᱟᱥᱲᱟ ᱨᱮᱭ ᱵᱷᱩᱨᱛᱤ ᱮᱱᱟ᱾ ᱚᱞᱚᱜ ᱨᱮ ᱚᱱᱠᱟᱭ ᱵᱟᱹᱭ ᱮᱱᱟ ᱵᱟᱦᱟ, ᱱᱚᱶᱟ ᱫᱚᱭ ᱦᱤᱲᱤᱧ ᱥᱟᱹᱨᱤ ᱠᱮᱫᱼᱟ ᱡᱮ ᱡᱟᱶᱟᱭ ᱚᱲᱟᱜ ᱡᱤᱭᱚᱱ, ᱯᱟᱞᱮ ᱚᱞᱚᱜ ᱞᱟᱹᱜᱤᱫ ᱪᱮᱫ ᱞᱮᱠᱟᱱ ᱮᱴᱠᱮᱴᱚᱬᱮ ᱠᱚ ᱥᱟᱢᱟᱝ ᱦᱩᱭ ᱟᱹᱧᱟ᱾ ᱱᱚᱶᱟ ᱠᱟᱛᱷᱟ ᱜᱮ ᱥᱟᱹᱨᱤ ᱮᱱᱟ᱾ ᱟᱡᱟᱜ ᱚᱞᱚᱜ ᱨᱮᱱᱟᱜ ᱛᱩᱨᱩᱭ ᱪᱟᱸᱫᱚ ᱠᱷᱟᱱ ᱜᱮ ᱦᱚᱲᱢᱚᱨᱮ ᱱᱟᱶᱟ ᱡᱤᱣᱤ ᱡᱩᱲᱟᱹᱭ ᱟᱫᱮᱭᱟ᱾ ᱤᱠᱷᱟᱹᱱ ᱚᱱᱠᱟ ᱛᱮᱜᱮ ᱵᱟᱦᱟ ᱜᱮᱞ ᱪᱟᱱᱚᱪ ᱚᱞᱚᱜ ᱫᱚᱭ ᱥᱟᱹᱛ ᱠᱮᱫᱼᱟ᱾ ᱵᱟᱞᱮ ᱵᱮᱠᱮᱨ ᱜᱤᱫᱽᱨᱟᱹ ᱠᱷᱟᱹᱛᱤᱨ ᱟᱨ ᱦᱚᱸ ᱫᱩᱲᱩᱵ ᱫᱚᱦᱚ ᱦᱩᱭ ᱟᱫᱮᱭᱟ ᱵᱟᱦᱟ᱾ ᱱᱤᱛᱚᱜ ᱦᱚᱸ ᱟᱸᱥ ᱫᱚ ᱱᱚᱶᱟ ᱜᱮ ᱵᱟᱦᱟ ᱟᱜ – ᱚᱞᱚᱜ ᱜᱮᱭᱟᱹᱧ᱾
ᱫᱚᱥᱟᱨ ᱥᱮᱨᱢᱟ ᱛᱮᱫᱚ ᱟᱨ ᱦᱚᱸ ᱪᱮᱛᱟᱱ ᱛᱟᱱᱟᱞᱟ ᱚᱞᱚᱜ ᱞᱟᱹᱜᱤᱫ ᱮ ᱵᱷᱩᱨᱛᱤ ᱮᱱᱟ᱾ ᱜᱷᱟᱨᱚᱸᱡᱽ ᱨᱮᱱᱟᱜ ᱡᱚᱛᱚ ᱞᱮᱠᱟᱱ ᱵᱩᱜᱤ ᱡᱩᱫᱟᱹ ᱛᱟᱞᱟᱨᱮ ᱟᱹᱰᱤ ᱦᱟᱨᱠᱮᱛ ᱛᱮ ᱱᱚᱶᱟ ᱦᱚᱸᱭ ᱥᱟᱹᱛ ᱠᱮᱫᱼᱟ᱾ ᱱᱤᱭᱟᱹ ᱛᱟᱭᱚᱢ ᱚᱲᱟᱜ ᱨᱮᱱᱟᱜ ᱟᱹᱰᱤᱜᱟᱱ ᱮᱴᱠᱮᱴᱚᱬᱮ ᱛᱟᱞᱟᱨᱮ ᱵᱟᱦᱟ ᱫᱚ ᱟᱨ ᱦᱚᱸ ᱚᱞᱚᱜ ᱠᱷᱚᱱ ᱥᱟᱦᱟᱜ ᱦᱩᱭ ᱟᱫᱮᱭᱟ᱾ ᱤᱠᱷᱟᱹᱱ ᱯᱚᱛᱚᱵ ᱯᱩᱛᱷᱤ ᱠᱷᱚᱱ ᱫᱚ ᱚᱠᱚᱭ ᱦᱚᱸ ᱵᱟᱝ ᱠᱚ ᱥᱟᱦᱟ ᱫᱟᱲᱮ ᱟᱫᱮᱭᱟ᱾ ᱯᱚᱛᱚᱵ, ᱞᱟᱪᱷᱟ, ᱱᱚᱱᱚᱞ ᱥᱟᱶ ᱫᱚ ᱟᱡᱟᱜ ᱟᱹᱰᱤ ᱜᱟᱺᱦᱤᱨ ᱥᱟᱹᱜᱟᱹᱭ ᱛᱟᱦᱮᱸ ᱮᱱᱟ᱾<br>
ᱢᱤᱫ ᱫᱤᱱ ᱫᱚ ᱟᱨ ᱦᱚᱸ ᱟᱡ ᱫᱟᱹᱭ ᱮ ᱢᱮᱛᱟᱭ ᱠᱟᱱᱟᱼ ᱫᱟᱹᱭ, ᱟᱨ ᱦᱩᱸᱧ ᱚᱞᱚᱜ ᱜᱮᱭᱟ᱾ ᱢᱤᱫᱴᱟᱹᱝ ᱰᱤᱜᱽᱨᱤ ᱟᱢᱮᱴ ᱨᱮᱱᱟᱜ ᱟᱹᱰᱤ ᱢᱟᱨᱟᱝ ᱠᱩᱠᱢᱩ ᱥᱟᱨᱮᱡ ᱫᱚᱦᱚ ᱟᱠᱟᱱ ᱛᱤᱧᱟ ᱫᱟᱹᱭ᱾ ᱫᱟᱫᱟ ᱛᱤᱠᱤᱱ ᱰᱟᱠᱛᱚᱨ ᱵᱮᱱᱟᱣᱤᱧ ᱨᱮᱱᱟᱜ ᱠᱩᱠᱢᱩ ᱠᱤᱱ ᱥᱟᱡᱟᱣ ᱟᱹᱫᱤᱧ ᱛᱟᱦᱮᱸᱫ, ᱤᱠᱷᱟᱹᱱ ᱡᱚᱛᱚ ᱠᱩᱠᱢᱩ ᱡᱟᱹᱯᱤᱫ ᱟᱛᱨᱟ ᱨᱮᱜᱮ ᱫᱷᱟᱥᱟᱣ ᱫᱷᱩᱲᱤ ᱮᱱᱟ᱾ ᱛᱮᱦᱮᱧ ᱢᱤᱫᱴᱟᱹᱝ ᱰᱤᱜᱽᱨᱤ ᱧᱟᱢ ᱞᱟᱹᱜᱤᱫ ᱡᱤᱣᱤ ᱛᱤᱧ ᱟᱴᱚᱜ ᱴᱟᱸᱵᱚᱜᱚᱜ ᱠᱟᱱᱟ᱾ ᱟᱡ ᱫᱟᱹᱭ ᱱᱟᱥᱮ ᱨᱟᱹᱜᱤ ᱠᱟᱛᱮᱭ ᱢᱮᱱ ᱠᱮᱫᱼᱟᱼ ᱟᱢ ᱦᱚᱸ ᱦᱚᱯᱚᱱ ᱴᱤ, ᱚᱞᱚᱜ, ᱚᱞᱚᱜ ᱚᱞᱚᱜ᱾ ᱚᱞᱚᱜ ᱜᱮᱛᱟᱢ ᱛᱤᱥ ᱦᱚᱸ ᱵᱟᱝ ᱪᱟᱵᱟ ᱞᱮᱱᱟ᱾ ᱱᱚᱶᱟ ᱫᱤᱜᱽᱵᱷᱟᱜᱽ ᱠᱚᱨᱮ ᱩᱱᱟᱹᱜ ᱵᱟᱹᱦᱩ ᱠᱩᱲᱤ, ᱧᱮᱞᱮᱫ ᱠᱚᱣᱟᱢ ᱚᱠᱚᱭ ᱠᱚ ᱚᱞᱚᱜ ᱠᱟᱱᱟ? ᱱᱟᱯᱟᱭ ᱪᱚᱨᱚᱠ ᱫᱟᱠᱟ ᱩᱛᱩ ᱤᱥᱤᱱ ᱠᱟᱛᱮ, ᱨᱚᱱᱮᱵᱚᱱᱮ ᱥᱟᱡᱟᱣ ᱠᱟᱛᱮ ᱴᱤᱵᱷᱤ ᱠᱚ ᱧᱮᱞ ᱡᱚᱝ ᱠᱟᱱᱟ᱾ ᱟᱨ ᱟᱢ ᱫᱚ ᱚᱞᱚᱜ ᱯᱟᱹᱪᱷᱞᱟᱹ ᱨᱮ, ᱚᱞᱚᱜ ᱜᱮᱭᱟᱹᱧ!!<br>
ᱵᱟᱦᱟ ᱢᱚᱴᱟ ᱥᱟᱺᱦᱤᱡ ᱥᱟᱦᱮᱫ ᱠᱟᱛᱮᱭ ᱢᱮᱱ ᱠᱮᱫᱼᱟᱼ ᱥᱟᱹᱨᱤᱢ ᱢᱮᱱᱮᱫᱼᱟ ᱫᱟᱹᱭ, ᱯᱚᱛᱚᱵ, ᱯᱩᱛᱷᱤ, ᱱᱚᱱᱚᱞ, ᱞᱟᱪᱷᱟ, ᱚᱞ, ᱯᱟᱲᱦᱟᱣ ᱥᱟᱶ ᱚᱱᱠᱟ ᱪᱮᱫ ᱥᱟᱹᱜᱟᱹᱭ ᱢᱮᱱᱟᱜᱼᱟ ᱤᱧᱟᱜ, ᱯᱚᱛᱚᱵ ᱯᱩᱛᱷᱤ ᱠᱷᱚᱱ ᱜᱮ ᱵᱟᱹᱧ ᱥᱟᱦᱟ ᱫᱟᱲᱮᱭᱟᱜ ᱠᱟᱱᱟ, ᱚᱞᱚᱜ ᱜᱮ ᱵᱟᱹᱧ ᱵᱟᱹᱜᱤ ᱫᱟᱲᱮᱭᱟᱜ ᱠᱟᱱᱟ᱾ ᱧᱮᱞᱤᱧ ᱠᱟᱱ ᱜᱮᱭᱟᱢ ᱫᱟᱹᱭ, ᱤᱧᱟᱜ ᱡᱤᱭᱚᱱ ᱨᱮ ᱯᱟᱞᱮ ᱚᱞᱚᱜ ᱨᱮᱭᱟᱜ ᱦᱚᱠ ᱜᱮ ᱵᱟᱹᱱᱩᱜ ᱟᱱᱟ᱾ ᱦᱚᱲ ᱛᱤᱱᱟᱹᱜ ᱟᱞᱜᱟ ᱛᱮᱠᱚ ᱚᱞᱚᱜ ᱠᱟᱱᱟ᱾ ᱟᱨ ᱤᱧ ᱞᱟᱹᱜᱤᱫ ᱫᱚ ᱛᱟᱲᱟᱢ ᱯᱤᱪᱷᱤ ᱡᱟᱸᱜᱮ᱾ ᱢᱤᱫᱴᱟᱹᱝ ᱰᱤᱜᱽᱨᱤ ᱞᱟᱹᱜᱤᱫ ᱚᱛ ᱥᱮᱨᱢᱟ ᱢᱤᱫ ᱦᱩᱭ ᱟᱹᱧ ᱠᱟᱱᱟ, ᱤᱠᱷᱟᱹᱱ ᱮᱱ ᱦᱚᱸ ᱤᱧ ᱫᱚ ᱮᱠᱷᱮᱱ ᱛᱤ᱾ ᱵᱟᱹᱧ ᱵᱟᱰᱟᱭᱟ, ᱤᱧᱟᱜ ᱠᱚᱯᱟᱲ ᱨᱮ ᱪᱮᱫ ᱚᱞ ᱟᱠᱟᱱᱟ, ᱤᱠᱷᱟᱹᱱ ᱱᱤᱛ ᱫᱷᱟᱹᱵᱤᱡ ᱦᱚᱸ ᱤᱧᱟᱜ ᱚᱱᱛᱚᱨ ᱟᱲᱟᱝ ᱮ ᱦᱚᱦᱚ ᱟᱹᱧ ᱠᱟᱱ ᱜᱮᱭᱟ ᱱᱚᱶᱟ ᱢᱮᱱ ᱠᱟᱛᱮ ᱛᱤᱱ ᱵᱷᱩᱨ ᱢᱤᱫᱴᱟᱹᱝ ᱦᱚᱸ ᱰᱤᱜᱽᱨᱤ ᱵᱟᱹᱧ ᱟᱢᱮᱴᱟ, ᱩᱱ ᱵᱷᱩᱨ ᱚᱞ ᱟᱠᱟ ᱜᱮᱧ ᱛᱟᱦᱮᱸᱱᱟ ᱟᱨ ᱚᱞᱚᱜ ᱜᱮᱭᱟᱹᱧ᱾ ᱢᱮᱱ ᱢᱮᱱᱛᱮ ᱵᱟᱦᱟᱦᱟᱜ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱦᱤᱰᱤᱨ ᱢᱮᱱᱛᱮ ᱡᱚᱨᱚ ᱮᱱᱟ᱾
ᱟᱡ ᱫᱟᱹᱭ ᱵᱟᱦᱟᱦᱟᱜ ᱢᱮᱫ ᱫᱟᱜ ᱡᱚᱫᱽ ᱛᱤᱞᱩᱡ ᱮ ᱢᱮᱛᱟ ᱟᱫᱮᱭᱟ, ᱦᱚᱯᱚᱱ ᱴᱤ, ᱚᱞᱚᱜ ᱞᱟᱹᱜᱤᱫ ᱫᱚ ᱛᱤᱱᱟᱹᱜ ᱮᱢ ᱨᱟᱜᱟ?ᱟᱢᱟᱜ ᱠᱚᱯᱟᱲ ᱨᱮ ᱡᱟᱦᱟᱸᱱᱟᱜ ᱜᱮ ᱚᱞ ᱟᱠᱟᱱ, ᱤᱠᱷᱟᱹᱱ ᱤᱧᱟᱜ ᱯᱟᱹᱛᱭᱟᱹᱣ ᱟᱢ ᱪᱮᱛᱟᱱ ᱨᱮ ᱢᱮᱱᱟᱜᱼᱟ, ᱟᱢᱟᱜ ᱠᱩᱠᱢᱩ ᱱᱤᱦᱟᱹᱛᱤ ᱜᱮ ᱯᱩᱨᱟᱹᱣᱜᱼᱟ᱾ ᱟᱢ ᱫᱚ ᱚᱞ ᱟᱠᱟ ᱛᱟᱦᱮᱸᱱ ᱢᱮᱥᱮ᱾ ᱵᱟᱦᱟ ᱛᱤᱨᱩᱵ ᱠᱟᱛᱮ ᱴᱟᱹᱦᱨᱤ ᱟᱲᱟᱝ ᱛᱮᱭ ᱢᱮᱱ ᱠᱮᱫᱼᱟᱼ ᱫᱟᱹᱭ, ᱤᱧᱟᱜ ᱠᱩᱠᱢᱩ ᱯᱩᱨᱟᱹᱣᱜᱼᱟ ᱥᱮ ᱵᱟᱝᱟ, ᱵᱟᱹᱧ ᱵᱟᱰᱟᱭᱟ᱾ ᱤᱠᱷᱟᱹᱱ ᱯᱚᱛᱚᱵ ᱯᱩᱛᱷᱤ ᱠᱷᱚᱱ ᱫᱚ ᱵᱟᱹᱧ ᱥᱟᱦᱟ ᱫᱟᱲᱮᱭᱟᱜᱼᱟ ᱱᱚᱶᱟ ᱫᱚ ᱟᱹᱰᱤ ᱥᱟᱹᱨᱤ ᱠᱟᱛᱷᱟ ᱠᱟᱱᱟ᱾ ᱚᱱᱟᱛᱮ ᱟᱸᱥ ᱫᱚ ᱱᱤᱛᱚᱜ ᱦᱚᱸ ᱱᱚᱶᱟ ᱜᱮ ᱤᱧᱟᱜ, ᱞᱟᱯᱷᱟᱝ ᱥᱮᱪᱮᱫ ᱟᱢᱮᱴ ᱞᱟᱹᱜᱤᱫ “ᱚᱞᱚᱜ ᱜᱮᱭᱟᱹᱧ”᱾

***