ᱤᱧ ᱫᱚ ᱛᱮᱦᱮᱧ
ᱨᱟᱹᱥᱠᱟᱹ ᱨᱮᱭᱟᱜ ᱠᱩᱰᱟᱹᱢ ᱨᱮ
ᱮᱠᱞᱟ ᱜᱮᱧ ᱫᱩᱲᱩᱵ ᱟᱠᱟᱱᱟ ᱾
ᱟᱢᱮᱢ ᱦᱤᱡᱩᱜᱼᱟ ᱢᱮᱱᱛᱮ
ᱟᱢᱟᱜ ᱛᱟᱸᱜᱤ ᱛᱟᱬᱟᱜ ᱨᱮ ᱾

ᱢᱮᱫ ᱯᱮᱨᱮᱡ ᱢᱮᱫ ᱫᱟᱜ
ᱞᱤᱸᱜᱤᱱ ᱠᱟᱱᱟ ᱫᱩᱠᱷ ᱫᱚᱨᱭᱟ ᱨᱮ,
ᱟᱢᱜᱮᱧ ᱯᱟᱸᱡᱟ ᱢᱮᱭᱟ
ᱮᱱᱦᱚᱸ ᱥᱟᱨᱟ ᱜᱷᱟᱲᱤ ᱜᱮ ᱾
ᱥᱩᱠ ᱯᱟᱸᱡᱟ ᱜᱮᱧ ᱪᱟᱞᱟᱣ ᱞᱮᱱᱟ
ᱟᱢᱟᱜ ᱛᱟᱭᱚᱢ ᱛᱟᱭᱚᱢ ᱛᱮ
ᱥᱤᱵᱤᱞ ᱥᱳᱦᱟᱜ ᱫᱩᱞᱟᱹᱲ ᱟᱛᱮ,
ᱳᱦᱟᱭ ᱥᱩᱠ ᱜᱮᱧ ᱧᱟᱢ ᱠᱮᱫᱟ ᱾

ᱨᱟᱹᱥᱠᱟᱹ ᱛᱮ ᱪᱮᱦᱮᱞ ᱪᱮᱯᱮᱞ
ᱠᱷᱤᱞᱰᱩ ᱠᱷᱟᱢᱰᱟ ᱛᱮ ᱵᱷᱚᱨ ᱡᱩᱣᱟᱹᱱ,
ᱟᱢ ᱟᱨ ᱤᱧ ᱫᱩᱞᱟᱹᱲ ᱨᱮᱭᱟᱜ ᱠᱩᱸᱵᱳ ᱚᱲᱟᱜ ᱨᱮ ᱾
ᱚᱠᱟᱥᱮᱫ ᱨᱮᱭᱟᱜ ᱜᱩᱨᱞᱟᱹᱣ ᱦᱚᱭᱛᱮ
ᱟᱢᱫᱚᱢ ᱚᱴᱟᱝ ᱪᱟᱞᱟᱣᱮᱱ !
ᱵᱟᱢ ᱧᱮᱞᱚᱜ ᱟᱫᱚ ᱟᱢ ᱜᱮ
ᱟᱢ ᱵᱮᱜᱚᱨ ᱤᱧ ᱫᱚ ᱮᱠᱞᱟ
ᱫᱩᱠᱷ ᱦᱟᱨᱠᱮᱛ ᱢᱚᱱᱮ ᱵᱟᱲᱤᱡ
ᱵᱮᱡᱟᱨ ᱠᱟᱸᱦᱤᱥ ᱟᱲᱤᱥ᱾
ᱚᱠᱟᱛᱮᱢ ᱪᱟᱞᱟᱣᱮᱱᱟ
ᱠᱩᱠᱢᱩ ᱞᱮᱠᱟ ᱪᱮᱫᱟᱜᱮᱢ ᱦᱮᱡ ᱮᱱᱟ ?
ᱚᱱᱟᱛᱮ ᱤᱧ ᱫᱩᱧ ᱨᱟᱨᱟᱜ ᱠᱟᱱᱟ
ᱨᱟᱹᱥᱠᱟᱹ ᱨᱮᱭᱟᱜ ᱠᱩᱰᱟᱹᱢ
ᱥᱟᱛᱮ ᱞᱟᱛᱟᱨ ᱨᱮ ᱿