ᱡᱷᱩᱲ ᱫᱟᱨᱮ ᱞᱟᱴᱟ ᱠᱷᱚᱱ
ᱪᱮᱫᱟᱜ ᱮᱢ ᱠᱩᱦᱩ ᱮᱫ ᱠᱚᱭᱮᱞ
ᱟᱢᱟᱜ ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱤᱧᱟᱜ ᱢᱚᱱᱮ ᱵᱟᱹᱲᱤᱡᱚᱜ ᱠᱟᱱ᱾
ᱟᱢ ᱞᱮᱠᱟ ᱢᱟ ᱵᱟᱹᱧ ᱠᱩᱦᱩ
ᱫᱟᱲᱮᱭᱟᱜ ᱠᱟᱱ ᱠᱚᱭᱮᱞ
ᱟᱢ ᱞᱮᱠᱟ ᱢᱟ ᱵᱟᱹᱧ ᱟᱲᱟᱝ
ᱫᱟᱲᱮᱭᱟᱜ ᱠᱟᱱ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱞᱟᱴᱟ ᱠᱷᱚᱱ
ᱪᱮᱫᱟᱜ ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ
ᱠᱚᱭᱮᱞ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱟᱢ ᱞᱮᱠᱟᱱ ᱟᱲᱟᱝ
ᱤᱧᱟᱜ ᱦᱚᱸ ᱛᱟᱦᱮᱸ ᱞᱮᱱ ᱠᱷᱟᱱ
ᱠᱚᱭᱮᱞ ᱟᱢ ᱞᱮᱠᱟ ᱫᱷᱤ ᱫᱟᱲᱮ
ᱤᱧᱟᱜ ᱦᱚᱸ ᱛᱟᱦᱮᱸ ᱞᱮᱱ ᱠᱷᱟᱱ ᱠᱚᱭᱮᱞ
ᱟᱢ ᱞᱮᱠᱟ ᱫᱤᱥᱚᱢ ᱫᱤᱥᱚᱢ ᱤᱧ
ᱩᱰᱟᱹᱣ ᱟᱹᱪᱩᱨ ᱠᱚᱜ ᱠᱚᱭᱮᱞ,
ᱡᱩᱢᱤᱫᱚᱜ ᱞᱟᱹᱜᱤᱫ ᱥᱤᱵᱤᱞ ᱥᱟᱹᱜᱟᱹᱭ
ᱟᱲᱟᱝ ᱤᱧ ᱠᱩᱦᱩ ᱠᱮ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱞᱟᱴᱟ ᱠᱷᱚᱱ
ᱪᱮᱫᱟᱜ ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱤᱧᱤᱧ ᱮᱠᱞᱟ ᱟᱠᱟᱱ ᱠᱚᱭᱮᱞ
ᱢᱟᱨᱟᱝ ᱵᱳᱨᱳ ᱞᱟᱹᱭᱟᱭ ᱢᱮᱥᱮ
ᱤᱧᱟᱜ ᱟᱲᱟᱝ ᱢᱟᱹᱱᱢᱤ
ᱵᱟᱝ ᱠᱚ ᱟᱸᱡᱚᱢᱮᱫ ᱠᱚᱭᱮᱞ
ᱡᱟᱦᱮᱨ ᱟᱭᱳ ᱞᱟᱹᱭ ᱟᱭ ᱢᱮᱥᱮ
ᱤᱧ ᱜᱚᱲᱚ ᱞᱟᱹᱜᱤᱫ
ᱢᱟᱹᱱᱢᱤ ᱠᱤᱱ ᱥᱤᱨᱡᱚᱱ ᱮ ᱢᱟᱥᱮ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱪᱮᱫᱟᱜ ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱟᱢᱟᱜ ᱫᱚ ᱪᱚᱨᱚᱠ ᱟᱲᱟᱝ ᱠᱚᱭᱮᱞ
ᱚᱱᱟᱛᱮ ᱤᱧ ᱞᱟᱹᱜᱤᱫ ᱠᱟᱹᱢᱤ ᱢᱮᱥᱮ
ᱤᱧ ᱦᱚᱸ ᱥᱤᱨᱡᱚᱱ ᱴᱷᱮᱱ ᱪᱚᱨᱚᱠ ᱟᱲᱟᱝ
ᱠᱚᱭ ᱟᱹᱧ ᱢᱮᱥᱮ ᱠᱚᱭᱮᱞ
ᱟᱢ ᱞᱮᱠᱟ ᱩᱰᱟᱹᱣ ᱟᱹᱪᱩᱨᱚᱜ ᱫᱷᱤ ᱫᱟᱲᱮ
ᱠᱚᱭ ᱟᱹᱧ ᱢᱮᱥᱮ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱪᱮᱫᱟᱜ ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱚᱱᱟ ᱪᱚᱨᱚᱠ ᱟᱲᱟᱝ ᱛᱮ ᱠᱚᱭᱮᱞ
ᱢᱟᱹᱱᱢᱤᱭᱟᱜ ᱢᱮᱫ ᱟᱨ ᱞᱩᱛᱩᱨ ᱤᱧ
ᱵᱩᱥᱟᱹᱲ ᱠᱮ ᱦᱩᱱᱟᱹᱝ ᱠᱚᱭᱮᱞ
ᱡᱷᱩᱲ ᱫᱟᱱᱟᱝ ᱠᱷᱚᱱ ᱫᱚ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱢᱚᱱᱮ ᱟᱞᱚᱢ ᱵᱟᱹᱲᱤᱡᱽ ᱛᱤᱧ᱾
ᱥᱮᱛᱟᱜ ᱵᱮᱨᱮᱫ ᱛᱟᱨᱟ ᱠᱷᱚᱱ ᱠᱚᱭᱮᱞ
ᱤᱧᱟᱜ ᱪᱚᱨᱚᱠ ᱟᱲᱟᱝ ᱠᱚ
ᱟᱛᱮᱱ ᱠᱮ ᱦᱩᱱᱟᱹᱝ
ᱥᱟᱱᱛᱟᱲ ᱥᱟᱶᱛᱟ ᱞᱟᱦᱟᱱᱛᱤ ᱞᱟᱹᱜᱤᱫ
ᱡᱩᱢᱤᱫᱽ ᱨᱮᱱᱟᱜ ᱟᱲᱟᱝ ᱠᱚ
ᱟᱛᱮᱱ ᱠᱮ ᱦᱩᱱᱟᱹᱝ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱢᱚᱱᱮ ᱟᱞᱚᱢ ᱵᱟᱹᱲᱤᱡᱽ ᱛᱤᱧ᱾
ᱛᱩᱠᱟᱹ ᱢᱟ ᱵᱟᱹᱱᱩᱜ ᱛᱟᱢ ᱠᱚᱭᱮᱞ
ᱠᱟᱹᱦᱩ ᱛᱩᱠᱟᱹᱨᱮ ᱦᱚᱯᱚᱱ ᱮᱢ ᱟᱲᱟᱜᱮᱫ ᱠᱚ
ᱮᱴᱟᱜ ᱚᱲᱟᱜ ᱨᱮ ᱪᱮᱠᱟ ᱛᱮᱠᱚ ᱦᱟᱨᱟᱜ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱢᱚᱱᱮ ᱪᱮᱫᱟᱜ ᱮᱢ ᱵᱟᱹᱲᱤᱡᱽ ᱛᱤᱧ᱾
ᱟᱢ ᱞᱮᱠᱟ ᱟᱞᱮ ᱦᱚᱸ ᱛᱩᱠᱟᱹ ᱞᱮ ᱟᱫ ᱟᱠᱟᱫ ᱠᱚᱭᱮᱞ
ᱦᱚᱯᱚᱱ ᱢᱟᱹᱭ ᱚᱞ ᱪᱤᱠᱤ ᱫᱚ
ᱚᱠᱟ ᱨᱮᱞᱮ ᱦᱟᱨᱟ ᱮ ᱠᱚᱭᱮᱞ
ᱮᱴᱟᱜ ᱛᱩᱠᱟᱹ ᱨᱮᱫᱚ ᱥᱮᱵᱮᱫᱚᱜ ᱠᱟᱱ ᱚᱞ ᱪᱤᱠᱤ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱪᱮᱫᱟᱜ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱟᱢ ᱞᱮᱠᱟ ᱪᱚᱨᱚᱠ ᱟᱲᱟᱝ ᱛᱮ
ᱞᱟᱹᱭ ᱢᱟ ᱵᱟᱞᱮ ᱜᱟᱱ ᱮᱫ ᱠᱟᱱ ᱠᱚᱭᱮᱞ,
ᱨᱟᱜ ᱟᱱᱛᱮ ᱞᱟᱹᱭ ᱮᱫ ᱨᱮᱦᱚᱸ,
ᱚᱠᱚᱭ ᱦᱚᱸ ᱵᱟᱝ ᱠᱚ ᱟᱸᱜᱡᱚᱢ ᱠᱟᱱ,
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱪᱮᱫᱟᱜ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱟᱞᱮ ᱞᱮ ᱛᱷᱩᱢ ᱟᱢ ᱠᱟᱱ ᱠᱚᱭᱮᱞ,
ᱟᱢ ᱛᱮ ᱟᱢ ᱛᱩᱠᱟᱹ ᱵᱮᱱᱟᱣ ᱡᱚᱝ ᱢᱮ ᱠᱚᱭᱮᱞ,
ᱟᱢᱟᱜ ᱛᱩᱠᱟᱹ ᱨᱮᱜᱮ ᱦᱚᱯᱚᱱ ᱠᱚ ᱦᱟᱨᱟ ᱠᱚᱢ ᱠᱚᱭᱮᱞ,
ᱥᱮᱛᱟᱜ ᱟᱹᱭᱩᱵ ᱦᱤᱥᱤᱫ ᱦᱚᱭ ᱥᱟᱶᱛᱮ ᱠᱩᱦᱩᱭ ᱢᱮ ᱠᱚᱭᱮᱞ,
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱪᱮᱫᱟᱜ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱟᱞᱮ ᱦᱚᱸ ᱛᱷᱩᱢ ᱟᱞᱮ ᱢᱮ ᱠᱚᱭᱮᱞ
ᱚᱞ ᱪᱤᱠᱤ ᱦᱟᱨᱟᱜ ᱞᱟᱹᱜᱤᱫ
ᱛᱩᱠᱟᱹ ᱞᱮ ᱵᱮᱱᱟᱣ ᱫᱟᱲᱮ ᱡᱚᱝ ᱢᱟ ᱠᱚᱭᱮᱞ
ᱚᱞ ᱪᱤᱠᱤ ᱦᱟᱨᱟᱭ ᱞᱟᱹᱜᱤᱫ
ᱫᱷᱤᱻ ᱫᱟᱲᱮ ᱞᱮ ᱧᱟᱢ ᱢᱟ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱪᱮᱫᱟᱜ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱫᱷᱟᱹᱨᱛᱤ ᱨᱮ ᱠᱟᱻ ᱠᱟᱻ
ᱠᱟᱹᱦᱩ ᱟᱲᱟᱝ ᱞᱟᱹᱜᱤᱫ
ᱛᱩᱠᱟᱹ ᱜᱮ ᱯᱮᱨᱮᱡ ᱮᱱ ᱫᱚ ᱠᱚᱭᱮᱞ,
ᱟᱢᱟᱜ ᱥᱤᱵᱤᱞ ᱟᱲᱟᱝ ᱞᱟᱹᱜᱤᱫ
ᱛᱩᱠᱟᱹ ᱵᱟᱹᱱᱩᱜ ᱟᱱ ᱠᱚᱭᱮᱞ
ᱟᱞᱮᱭᱟᱜ ᱥᱤᱵᱤᱞ ᱟᱲᱟᱝ ᱞᱟᱹᱜᱤᱫ
ᱛᱩᱠᱟᱹ ᱵᱟᱹᱱᱩᱜ ᱟᱱ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱪᱮᱫᱟᱜ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
ᱵᱟᱝ ᱫᱚ ᱥᱤᱨᱡᱚᱱᱤᱭᱟᱹ ᱜᱮ
ᱵᱟᱭ ᱠᱩᱥᱤᱭᱟᱫ ᱵᱚᱱ ᱠᱚᱭᱮᱞ
ᱛᱩᱠᱟᱹ ᱵᱮᱱᱟᱣ ᱫᱟᱲᱮ
ᱵᱟᱭ ᱮᱢᱟᱫ ᱵᱚᱱ ᱠᱚᱭᱮᱞ
ᱵᱟᱝ ᱫᱚ ᱟᱵᱚ ᱜᱮ ᱵᱟᱵᱚᱱ
ᱫᱟᱲᱮᱭᱟᱜ ᱠᱟᱱ ᱠᱚᱭᱮᱞ
ᱡᱷᱩᱲ ᱫᱟᱨᱮ ᱫᱟᱱᱟᱝ ᱠᱷᱚᱱ
ᱠᱩᱦᱩ ᱠᱩᱦᱩ ᱟᱲᱟᱝ ᱛᱮ ᱠᱚᱭᱮᱞ
ᱪᱮᱫᱟᱜ ᱢᱚᱱᱮᱢ ᱵᱟᱹᱲᱤᱡᱽ ᱛᱤᱧ᱾
***
