ᱚᱠᱛᱚᱭ ᱦᱚᱦᱚᱣᱟᱢ ᱠᱟᱱᱟ
ᱟᱢᱟᱜ ᱫᱚ ᱫᱟᱣ ᱪᱟᱵᱟᱜ ᱠᱟᱱ
ᱨᱩᱣᱟᱹᱲ ᱦᱩᱭᱩᱜ ᱟ
ᱡᱚᱛᱚᱣᱟᱜ ᱵᱟᱹᱜᱤ ᱠᱟᱛᱮ ᱾

ᱫᱷᱟᱹᱨᱛᱤ ᱠᱷᱮᱞᱚᱸᱰ ᱟᱠᱷᱲᱟᱨᱮ
ᱠᱷᱮᱞᱸᱰ ᱛᱟᱢ ᱪᱟᱵᱟᱜ ᱠᱟᱱ
ᱢᱩᱪᱟᱹᱫ ᱚᱠᱛᱚ ᱥᱮᱴᱮᱨᱚᱜ ᱠᱟᱱ
ᱟᱠᱷᱲᱟ ᱠᱷᱚᱱ ᱥᱟᱦᱟ ᱦᱩᱭᱟᱢ ᱾

ᱦᱚᱲᱢᱚ ᱨᱮ ᱫᱟᱲᱮ ᱦᱚᱸ
ᱵᱟᱹᱭ ᱵᱟᱹᱭ ᱛᱮ ᱪᱟᱵᱟ ᱤᱫᱤᱜ ᱠᱟᱱ
ᱡᱟᱦᱟᱸ ᱛᱤᱱᱟᱹᱜ ᱮᱢ ᱨᱤᱠᱟᱹᱭᱮᱫ ᱨᱮᱦᱚᱸ
ᱵᱟᱝᱜᱮᱢ ᱫᱟᱵᱚᱱ ᱫᱟᱲᱮᱭᱟᱜ ᱠᱟᱱ ᱾

ᱛᱤᱱᱟᱹᱜ ᱪᱚᱢ ᱪᱷᱩᱴᱟᱹᱣ ᱞᱮᱱᱟ
ᱠᱩᱨᱩᱢᱩᱴᱩ ᱫᱷᱚᱱ ᱮᱢ ᱟᱨᱡᱟᱣ ᱞᱮᱜ ᱟ
ᱚᱱᱟ ᱦᱚᱸ ᱡᱚᱛᱚᱢ ᱵᱟᱹᱜᱤ ᱚᱴᱚᱣᱟᱜ
ᱪᱮᱫ ᱦᱚᱸ ᱵᱟᱝᱜᱮᱢ ᱤᱫᱤ ᱠᱮ ᱾

ᱮᱨᱟ ᱦᱚᱯᱚᱱ ᱜᱤᱫᱟᱹᱨ ᱯᱤᱫᱟᱹᱨ
ᱵᱟᱝ ᱠᱚ ᱛᱚᱞ ᱫᱚᱦᱚ ᱫᱟᱲᱮᱭᱟᱢ
ᱨᱩᱣᱟᱹᱲ ᱦᱩᱭᱟᱢ ᱜᱮᱭᱟ
ᱟᱯᱱᱟᱨ ᱦᱚᱲ ᱦᱚᱸ ᱵᱟᱹᱜᱤ ᱠᱟᱛᱮ ᱾

ᱥᱟᱦᱮᱫ ᱴᱷᱟᱠᱮᱫᱚᱜ
ᱢᱟᱭᱟᱢ ᱦᱚᱸ ᱥᱟᱹᱠᱤᱫᱚᱜ
ᱦᱚᱲᱢᱚ ᱠᱷᱚᱱ ᱡᱤᱣᱤ ᱚᱰᱚᱠᱚᱜ
ᱫᱷᱟᱹᱛᱤ ᱛᱟᱞᱟᱠᱷᱚᱱ ᱟᱢᱮᱢ ᱟᱫᱚᱜ ᱾

***