ᱥᱚᱦᱚᱨᱟᱭ ᱪᱟᱸᱫᱚᱭ ᱧᱤᱨ ᱠᱟᱱᱟ ᱟᱨ ᱟᱜᱷᱟᱬ ᱪᱟᱸᱫᱚ ᱦᱚᱸᱭ ᱧᱚᱦᱚᱜ ᱜᱚᱫᱚᱜ ᱠᱟᱱᱟ ᱾ ᱪᱟᱥ ᱵᱟᱥ ᱠᱟᱹᱢᱤ ᱡᱟᱠᱮ ᱡᱮᱢᱚᱱ ᱜᱷᱩᱴᱩ ᱵᱟᱹᱫ ᱠᱚᱨᱮᱱᱟᱜ ᱦᱩᱲᱩ ᱠᱚᱫᱚ ᱠᱚ ᱥᱟᱢᱴᱟᱣ ᱥᱟᱭ ᱵᱟᱲᱟ ᱟᱠᱟᱫᱟ ᱟᱨ ᱢᱤᱻᱢᱤᱫ ᱦᱚᱲ ᱫᱚ ᱵᱟᱹᱭᱦᱟᱹᱲ ᱵᱟᱹᱫ ᱨᱮ ᱢᱩᱞᱤᱭᱟᱹ ᱟᱱᱛᱮ ᱤᱨᱩᱜ ᱠᱚ ᱮᱛᱚᱦᱚᱵ ᱵᱟᱲᱟ ᱜᱚᱫ ᱮᱫᱟ ᱾ ᱟᱸᱜᱷᱟᱬ ᱨᱟᱵᱟᱝ ᱦᱚᱸ ᱢᱟᱹᱱᱢᱤ ᱦᱚᱲᱢᱚ ᱛᱮ ᱟᱹᱪᱟᱹᱰᱤ ᱜᱮ ᱜᱩᱜᱩ ᱦᱤᱡᱩᱜ ᱠᱟᱱᱟᱭ ᱾

ᱱᱚᱝᱠᱟᱱ ᱵᱮᱲᱟ ᱨᱮ ᱞᱮᱢᱯᱟ ᱠᱤᱢᱤᱱ ᱠᱩᱸᱫᱤ ᱪᱷᱟᱹᱴᱭᱟᱹᱨ ᱧᱩᱛᱩᱢ ᱫᱚ ᱠᱩᱱᱟᱹᱢᱤ ᱠᱷᱟᱹᱨᱟᱹᱭ ᱨᱮᱭᱟᱜ ᱨᱟᱠᱟᱵ ᱦᱩᱲᱩ ᱵᱤᱸᱰᱟᱹ ᱥᱤᱢ ᱤᱪᱷᱟᱹ ᱥᱤᱢ ᱢᱮᱨᱚᱢ ᱤᱪᱷᱟᱹ ᱢᱮᱨᱚᱢ ᱠᱚ ᱡᱚᱢᱮᱫ ᱵᱮᱲᱟ ᱨᱮ ᱥᱟᱹᱜᱤᱧ ᱫᱤᱥᱚᱢ ᱱᱟᱞᱦᱟ ᱥᱮᱱ ᱟᱠᱟᱱ ᱡᱤᱣᱤ ᱡᱤᱛᱟᱹ ᱠᱟᱹᱫᱩ ᱣᱟᱜ ᱠᱟᱛᱷᱟ ᱠᱚᱭ ᱩᱭᱦᱟᱹᱨ ᱟᱠᱟᱫᱟ ᱾ ᱡᱤᱣᱤ ᱡᱤᱛᱟᱹᱭ ᱛᱟᱦᱮᱸ ᱠᱚᱜ ᱠᱷᱟᱱ ᱵᱟᱱᱟ ᱦᱚᱲ ᱛᱮ ᱵᱩᱫᱷᱤ ᱵᱟᱲᱟ ᱠᱟᱛᱮ ᱠᱤᱱ ᱥᱟᱢᱴᱟᱣ ᱠᱟᱜ ᱠᱮᱭᱟ ᱾ᱦᱟᱱᱦᱟᱨ ᱦᱚᱧᱟᱨ ᱢᱟ ᱟᱡ ᱥᱟᱶ ᱥᱤᱵᱤᱞ ᱵᱟᱝᱠᱤᱱ ᱨᱚᱲ ᱜᱮ ᱢᱮᱱᱠᱷᱟᱱ ᱦᱩᱲᱩ ᱥᱟᱢᱴᱟᱣ ᱞᱟᱹᱜᱤᱫ ᱦᱚᱸ ᱪᱮᱫ ᱜᱮ ᱵᱟᱝ ᱠᱤᱱ ᱵᱩᱫᱷᱤ ᱵᱟᱲᱟ ᱭᱮᱫᱟ ᱟᱨ ᱦᱟᱱᱦᱟᱨ ᱛᱮᱫ ᱫᱚ ᱢᱤᱫ ᱡᱮᱠᱷᱟ ᱱᱤᱥᱟᱹ ᱧᱩᱸᱭ ᱮᱛᱚᱦᱚᱵ ᱞᱮᱠᱷᱟᱱ ᱵᱟᱨ ᱮᱢᱦᱟᱸ ᱜᱟᱱ ᱫᱚ ᱩᱢ ᱛᱩᱯᱩ ᱠᱚ ᱵᱟᱹᱜᱤ ᱠᱟᱛᱮ ᱜᱤᱛᱤᱡ ᱫᱩᱲᱩᱵ ᱛᱮᱜᱮ ᱠᱷᱟᱸᱰᱟᱣᱟᱭ ᱟᱨ ᱤᱨᱤᱞ ᱠᱚᱲᱟ ᱠᱚᱸᱫᱟ ᱦᱚᱸ ᱡᱟᱸᱦᱟᱸ ᱥᱮᱱ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱫᱟᱠᱟ ᱢᱟᱺᱰᱤ ᱠᱚᱭ ᱮᱢᱟᱭ ᱨᱮᱦᱚᱸ ᱦᱤᱞᱤᱛ ᱛᱟᱭ ᱫᱩᱫᱲᱩᱢ ᱵᱷᱟᱜᱟᱣ ᱨᱮᱦᱚᱸ ᱵᱟᱹᱴᱤ ᱫᱟᱠᱟ ᱜᱟᱸᱰᱚ ᱥᱩᱨ ᱨᱮᱜᱮ ᱛᱟᱦᱮᱱᱟ ᱾

ᱢᱤᱫ ᱫᱤᱱ ᱚᱠᱟ ᱨᱮᱱᱤᱡ ᱯᱮᱲᱟ ᱪᱚ ᱴᱷᱤᱠ ᱛᱤᱠᱤᱱ ᱟᱹᱪᱩᱨ ᱮ ᱦᱮᱡ ᱮᱱᱟ ᱞᱮᱢᱯᱟ ᱚᱲᱟᱜ ᱾ᱠᱤᱢᱤᱱ ᱛᱟᱭ ᱫᱚ ᱜᱤᱫᱽᱨᱟᱹ ᱢᱟᱹᱢᱟᱹ ᱢᱟᱹᱢᱟᱹ ᱠᱷᱟᱹᱨᱟᱹᱭ ᱥᱮᱫ ᱨᱮ ᱥᱤᱢ ᱦᱚᱸᱭ ᱞᱟᱜᱟ ᱭᱮᱫ ᱠᱚᱣᱟ ᱟᱨ ᱱᱟᱹᱠᱤᱡ ᱦᱚᱸᱭ ᱱᱟᱹᱠᱤᱡᱚᱜ ᱠᱟᱱᱟ ᱾ ᱩᱱᱤ ᱯᱮᱲᱟ ᱦᱚᱲ ᱫᱚ ᱠᱩᱞᱦᱤ ᱫᱷᱟᱨᱮ ᱥᱮᱱ ᱠᱷᱚᱱ ᱚᱠᱚᱭ ᱦᱚᱸ ᱵᱟᱭ ᱧᱮᱞ ᱧᱟᱢ ᱞᱮᱫ ᱠᱚ ᱠᱷᱟᱱ ᱦᱚᱻᱦᱚᱻ ᱦᱚᱻᱦᱚᱻ ᱛᱮ ᱵᱚᱞᱚ ᱭᱮᱱᱟ ᱠᱤᱢᱤᱱ ᱛᱮᱫ ᱫᱚᱭ ᱟᱸᱡᱚᱢ ᱞᱮᱫ ᱨᱮᱦᱚᱸ ᱪᱮᱫ ᱛᱮᱞᱟ ᱵᱟᱝ ᱮᱢ ᱠᱟᱛᱮ ᱜᱤᱫᱨᱟᱹᱭ ᱦᱮᱢᱮ ᱠᱮᱫᱮ ᱛᱮ ᱧᱮᱧᱮᱞ ᱮ ᱦᱮᱡ ᱮᱱᱟ ᱟᱨ ᱩᱭᱩᱝ ᱧᱮᱞ ᱧᱟᱢ ᱠᱮᱫᱮ ᱛᱩᱞᱩᱡ ᱮ ᱢᱮᱛᱟᱭ ᱠᱟᱱᱟ;”ᱚᱠᱚᱭ ᱵᱤᱱ ᱫᱚᱨᱠᱟᱨᱮᱫ ᱠᱚᱣᱟ?”
“ᱚᱠᱚᱭ ᱵᱟᱝ ᱱᱚᱣᱟ ᱚᱲᱟᱜ ᱦᱚᱲ ᱠᱚ ᱜᱮ!”
“ᱳᱻ ᱤᱧ ᱟᱭᱳ ᱫᱚ ᱱᱷᱟᱜᱟᱭ ᱢᱟᱛᱠᱚᱢ ᱵᱩᱴᱟᱹ ᱥᱮᱱ ᱨᱮ ᱜᱤᱛᱤᱡ ᱟᱠᱟᱱᱟᱭ᱾”
ᱟᱫᱚ ᱩᱱᱤ ᱯᱮᱲᱟ ᱦᱚᱲ ᱠᱩᱸᱫᱤ ᱦᱟᱱᱦᱟᱨ ᱛᱮᱫ ᱜᱤᱛᱤᱡ ᱟᱠᱟᱱ ᱴᱷᱮᱱ ᱥᱮᱱ ᱠᱟᱛᱮ ᱵᱟᱨ ᱯᱮ ᱡᱮᱠᱷᱟᱭ ᱦᱚᱻᱦᱚᱻ ᱜᱚᱫ ᱞᱮᱫ ᱠᱷᱟᱱ ᱜᱮ ᱞᱮᱢᱯᱟ ᱦᱟᱲᱟᱢ ᱵᱟᱲᱜᱮ ᱞᱟᱛᱟᱨ ᱥᱮᱫ ᱠᱷᱚᱱ ᱮ ᱥᱮᱴᱮᱨ ᱮᱱᱟ ᱟᱨᱮ ᱢᱮᱱ ᱜᱚᱫ ᱠᱮᱫᱟ” ᱮᱭᱟ ᱩᱱᱤ ᱫᱚ ᱦᱩᱸᱥ ᱨᱮ ᱵᱟᱹᱱᱩᱜ ᱟᱠᱟᱫᱮᱭᱟ ᱟᱞᱚᱢ ᱦᱚᱜᱼᱦᱚᱻᱣᱟ ᱾”
“ᱪᱤᱠᱟᱹ ᱤᱧ ᱦᱤᱞᱤ ᱫᱚᱭ ᱨᱩᱣᱟᱹᱜ ᱠᱟᱱᱟ ᱥᱮ ᱪᱮᱫ?”
“ᱨᱩᱣᱟᱹ ᱱᱟ ᱜᱷᱩᱲᱟᱹᱜ ᱠᱟᱱᱟᱭ ᱯᱩᱸᱰ ᱯᱩᱠᱷᱨᱤ ᱨᱮᱢ ᱯᱟᱭᱨᱟ ᱞᱮᱱᱠᱷᱟᱱ ᱡᱟᱦᱟᱸ ᱦᱩᱭᱩᱜᱼᱟ! ᱴᱷᱤᱠᱟᱹᱭ ᱢᱮ᱾”
ᱠᱤᱢᱤᱱ ᱛᱮᱫ ᱠᱩᱸᱫᱤᱭᱟᱜ ᱢᱚᱱᱮ ᱵᱤᱪᱷᱚᱠ ᱛᱟᱦᱮᱸ ᱠᱟᱱ ᱨᱮᱦᱚᱸ ᱠᱟᱛᱷᱟ ᱠᱚ ᱟᱸᱡᱚᱢ ᱠᱟᱛᱮ ᱢᱩᱞᱩᱡ ᱢᱩᱞᱩᱡ ᱮ ᱞᱟᱸᱫᱟ ᱟᱱᱟ ᱟᱡᱤᱡ ᱜᱤᱫᱽᱨᱟᱹ ᱥᱟᱶ ᱟᱨ ᱟᱡ ᱫᱚ ᱱᱤᱛᱚᱜ ᱮᱱᱟᱭ ᱴᱷᱤᱠᱟᱹ ᱭᱮᱫᱟ ᱪᱮ ᱩᱱᱤ ᱫᱚ ᱦᱚᱯᱚᱱ ᱵᱟᱵᱟ ᱥᱟᱹᱜᱟᱹᱭ ᱯᱮᱲᱟ ᱠᱟᱱᱟᱭ ᱢᱮᱱᱛᱮ᱾
ᱟᱫᱚ ᱩᱱᱤ ᱯᱮᱲᱟ ᱜᱮ ᱞᱚᱴᱟ ᱫᱟᱜ ᱞᱚᱲᱟ ᱱᱟᱹᱯᱤᱛ ,ᱜᱤᱫᱽᱨᱟᱹ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱮ ᱮᱢᱟ ᱫᱮᱭᱟ ᱟᱨ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱦᱚᱸᱭ ᱢᱮᱱ ᱠᱮᱫᱟ
“ᱮᱜᱳ ᱵᱟᱹᱦᱩ ᱤᱭᱟ. ᱜᱳ ᱞᱚᱴᱟ ᱫᱟᱜ ᱠᱚ ᱢᱟᱥᱮ……
“ᱦᱚᱭ ᱵᱟ ᱜᱟᱥᱟᱣ ᱧᱚᱜ ᱞᱮᱜᱮᱹᱧ…….
“ᱦᱚᱭ ᱢᱟ……………

ᱟᱫᱚ ᱞᱮᱢᱯᱟ ᱦᱟᱲᱟᱢ ᱰᱟᱺᱨᱤ ᱜᱚᱴ ᱵᱟᱲᱜᱮ ᱞᱟᱛᱟᱨ ᱥᱮᱱ ᱨᱮ ᱵᱟᱹᱜᱤ ᱟᱠᱟᱫ ᱠᱚ ᱠᱷᱟᱹᱛᱤᱨ ᱦᱚᱨᱚ ᱵᱚᱨᱚ ᱫᱚᱨᱠᱟᱨ ᱠᱷᱚᱵᱚᱨ ᱠᱚ ᱠᱤᱱ ᱠᱟᱛᱷᱟ ᱭᱮᱱᱟ ᱟᱨ ᱠᱤᱢᱤᱱ ᱛᱮᱫ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ ᱜᱚᱰ ᱟᱫ ᱠᱤᱱᱟᱭ ᱟᱨ ᱞᱮᱢᱯᱟ ᱦᱚᱸ ᱥᱟᱠᱟᱢ ᱨᱮᱫ ᱫᱚᱠᱛᱟ ᱵᱟᱝ ᱠᱟᱛᱮ ᱰᱟᱰᱟᱸ ᱨᱮᱭᱟᱜ ᱫᱚᱠᱛᱟ ᱜᱮ ᱛᱤᱨᱢᱤᱫ ᱠᱮᱫ ᱛᱮ ᱛᱤ ᱨᱮ ᱪᱟᱞ ᱠᱟᱛᱮ ᱡᱚᱦᱟᱨ ᱟᱫᱮᱭᱟᱭ ᱟᱨ ᱠᱤᱢᱤᱱ ᱛᱮᱡ ᱮ ᱢᱮᱛᱟᱭ ᱠᱟᱱᱟ
“ᱮᱜᱳ ᱵᱟᱥᱠᱮ ᱫᱟᱜ ᱠᱚ ᱫᱟᱠᱟ ᱠᱚ ᱜᱳ ᱟᱢ ᱦᱚᱯᱚᱱ ᱵᱟ ᱫᱚ………

ᱟᱫᱚ ᱠᱩᱸᱫᱤ ᱩᱱᱤ ᱯᱮᱲᱟ ᱥᱟᱶ ᱩᱯᱨᱩᱢ ᱵᱟᱲᱟ ᱠᱟᱛᱮ ᱫᱟᱜ ᱢᱟᱺᱰᱤ ᱮᱢᱟᱭ ᱠᱟᱱ ᱡᱷᱚᱜ ᱩᱱᱤ ᱯᱮᱲᱟ ᱦᱚᱲᱟᱜ ᱯᱷᱳᱱ ᱦᱮᱡ ᱮᱱᱟ ᱟᱨ ᱠᱟᱛᱷᱟᱜ ᱞᱮᱠᱟ ᱠᱷᱟᱱ ᱜᱮ ᱯᱷᱳᱱ ᱫᱚ ᱠᱟᱴ ᱮᱱᱟ ᱾

ᱟᱫᱚ ᱠᱩᱸᱫᱤ ᱩᱭᱦᱟᱹᱨ ᱠᱮᱫᱟᱭ ᱪᱮ ᱟᱡᱤᱡ ᱡᱤᱛᱟ ᱠᱟᱹᱫᱩ ᱴᱷᱮᱱ ᱯᱷᱳᱱ ᱠᱟᱛᱮ ᱦᱩᱲᱩ ᱥᱟᱢᱴᱟᱣ ᱫᱤᱥᱟᱹ ᱭᱮ ᱠᱩᱞᱤ ᱮᱭᱟ ᱟᱨ ᱩᱭᱦᱟᱹᱨ ᱥᱚᱸᱜᱮ ᱩᱱᱤ ᱯᱮᱲᱟ ᱦᱚᱲ ᱮ ᱢᱮᱛᱟ ᱟᱠᱟᱫᱮᱭᱟ-
“ᱮ ᱦᱚᱯᱚᱱ ᱵᱟ ᱤᱭᱟᱹ ᱯᱷᱳᱱ ᱨᱮ ᱯᱩᱭᱥᱟᱹ ᱢᱮᱱᱟᱜ ᱠᱷᱟᱱ ᱦᱚᱯᱚᱱ ᱢᱮ ᱴᱷᱮᱱ ᱯᱷᱳᱱ ᱧᱚᱜ ᱵᱤᱱ ᱥᱮ ᱢᱤᱫ ᱵᱟᱨ ᱯᱚᱫ………………..᱾”
“ᱱᱟᱢᱵᱟᱨ ᱫᱚ…………᱾”
“ᱱᱚᱜ ᱚᱭ ᱱᱚᱣᱟ ᱠᱟᱜᱚᱡ ᱨᱮ ᱚᱞ ᱚᱴᱚ ᱟᱠᱟᱣᱟᱫ ᱞᱤᱧᱟᱭ ᱟᱹᱰᱤ ᱫᱤᱱ ᱦᱩᱭ ᱮᱱᱟ ᱵᱟᱝ ᱞᱤᱧ……………᱾”

ᱯᱮᱲᱟ ᱦᱚᱲ ᱯᱳᱱ ᱠᱮᱫᱟᱭ ᱟᱨ ᱵᱟᱝ ᱠᱚ ᱛᱩᱞᱟᱹᱣ ᱞᱮᱫᱟ ᱾ᱫᱚᱲᱦᱟᱭ ᱯᱷᱳᱱ ᱠᱮᱫᱟ ᱩᱱᱡᱷᱚᱜ ᱦᱚᱸ ᱵᱟᱠᱚ ᱛᱩᱞᱟᱹᱣ ᱨᱟᱠᱟᱵ ᱞᱮᱫᱟ ᱾

ᱯᱮᱲᱟ ᱦᱚᱲ ᱫᱟᱠᱟᱭ ᱡᱚᱢ ᱦᱩᱭ ᱠᱮᱫᱟ ᱟᱨ ᱞᱟᱡ ᱵᱤᱭᱟᱜ ᱛᱟᱯᱟᱜ ᱮᱫ ᱛᱩᱞᱩᱡ ᱜᱮ ᱯᱷᱳᱱ ᱦᱮᱡ ᱮᱱᱟ ᱟᱨ ᱠᱟᱹᱫᱩ ᱠᱩᱲᱤ ᱟᱲᱟᱝ ᱦᱮᱞᱳ ᱠᱷᱚᱱ ᱮ ᱴᱷᱤᱠᱟᱹ ᱠᱮᱫᱟ ᱪᱮ ᱟᱡ ᱡᱩᱛᱤ ᱠᱩᱸᱫᱤ ᱯᱷᱳᱱ ᱟᱠᱟᱫᱟᱭ ᱢᱮᱱᱛᱮ ᱾
“ᱱᱚᱣᱟ ᱠᱷᱟᱹᱨᱟᱹᱭ ᱨᱮᱭᱟᱜ ᱦᱩᱲᱩ ᱜᱮ ᱪᱮᱫ ᱞᱮᱠᱟᱛᱮ ᱥᱟᱢᱴᱟᱣ ᱠᱟᱛᱮ ᱵᱟᱭ ᱦᱩᱭ ᱠᱚᱜᱼᱟ ᱦᱩᱱᱟᱹᱝ?”
“ᱦᱚᱭ ᱛᱚᱵᱮ ᱢᱩᱞᱤᱭᱟᱹ ᱠᱚᱢ ᱡᱟᱦᱟ ᱜᱮ ᱠᱩᱲᱤ ᱵᱟᱠᱷᱟᱱ ᱠᱚᱲᱟ ᱨᱮᱦᱚᱸ ᱯᱩᱭᱥᱟᱹ ᱫᱚ ᱢᱮᱱᱟᱜᱼᱟ ᱥᱮ ᱵᱤᱱ ᱪᱟᱵᱟ ᱠᱮᱫᱟ ᱟᱨ ᱜᱤᱫᱽᱨᱟᱹ ᱦᱚᱯᱚᱱ ᱪᱮᱫ ᱞᱮᱠᱟ ᱢᱮᱱᱟᱭᱟ, ᱧᱮᱞ ᱮᱫᱟᱹᱧ ᱜᱟᱯᱟ ᱢᱮᱭᱟᱝ ᱵᱟᱡᱟᱨ ᱥᱮᱫ ᱪᱟᱞᱟᱣ ᱠᱟᱛᱮᱧ ᱵᱷᱮᱡᱟ ᱟᱹᱵᱤᱱᱟ᱾”
“ᱟᱨ ᱛᱤ ᱛᱮ ᱫᱟᱞ ᱦᱩᱭᱩᱜᱼᱟ ᱥᱮ ᱢᱤᱥᱤᱱ ᱠᱚᱲ ᱛᱮ?”
“ᱢᱤᱥᱤᱱ ᱛᱮᱜᱮ! ᱵᱟᱹᱵᱩ ᱱᱷᱟᱜ ᱤᱧ ᱞᱟᱹᱭ ᱟᱭᱟ ᱟᱹᱜᱩᱭᱟᱭ ᱾ ᱟᱢ ᱫᱚ ᱠᱷᱟᱹᱞᱤ ᱢᱩᱞᱤᱭᱟᱹ ᱠᱚᱢ ᱟᱨ ᱚᱠᱟ ᱚᱲᱟᱜ ᱜᱮ ᱯᱷᱟᱝᱠᱟ ᱦᱟ ᱚᱱᱟ ᱚᱲᱟᱜ ᱨᱮᱜᱮ ᱵᱟᱭ ᱚᱪᱚ ᱠᱚᱢ ᱾ᱦᱩᱭ ᱮᱱᱟ ᱟᱨ ᱢᱩᱪᱟᱹᱫ ᱦᱤᱞᱚᱜ ᱫᱚ ᱧᱮᱞᱢᱮ ᱢᱤᱫᱴᱟᱝ ᱜᱟᱱ ᱥᱤᱢ ᱫᱟᱞ ᱜᱚᱡ ᱟᱠᱚᱢᱮ ᱡᱟᱦᱟᱸᱭ ᱡᱟᱦᱟᱸ ᱱᱟᱜ ᱠᱚ ᱢᱮᱱ ᱨᱮᱦᱚᱸ ᱪᱮᱫ ᱦᱚᱸ ᱟᱞᱚᱢ ᱢᱮᱱ ᱨᱩᱣᱟᱹᱲ ᱟᱠᱚᱣᱟ ᱾”

ᱯᱮᱲᱟ ᱦᱚᱲ ᱢᱩᱪᱟᱹᱫ ᱨᱮᱭᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱵᱟᱰᱟᱭ ᱫᱟᱲᱮᱭᱟᱫ ᱟᱭ ᱱᱚᱣᱟ ᱚᱲᱟᱜ ᱨᱮ ᱚᱠᱟ ᱞᱮᱠᱟ ᱪᱮᱫ ᱪᱟᱞᱟᱜ ᱠᱟᱱᱟ ᱢᱮᱱᱛᱮ ᱟᱨ ᱠᱩᱸᱫᱤ ᱠᱮ ᱠᱩᱞᱤ ᱠᱮᱫᱭᱟᱭ “ᱛᱤᱥ ᱫᱤᱱ ᱨᱮ ᱦᱚᱯᱚᱱᱤᱧ ᱫᱚᱭ ᱥᱮᱱ ᱟᱠᱟᱱᱟ?”
ᱴᱟᱹᱦᱨᱤ ᱟᱲᱟᱝ ᱛᱮ
“ᱦᱚᱸ ᱤᱱᱟᱹ , ᱵᱟᱹᱫᱽ ᱛᱚᱲᱟ ᱠᱚ ᱜᱤᱰᱤ ᱦᱚᱴᱚ ᱵᱟᱲᱟ ᱠᱟᱛᱮ᱾”
“ᱪᱮᱫ ᱠᱚᱭ ᱞᱟᱹᱭ ᱟᱫ ᱵᱤᱱᱟ ᱤᱱᱟᱹ ᱠᱚᱜᱮ ᱠᱟᱹᱢᱤ ᱵᱤᱱ ᱪᱮᱫ ᱦᱚᱸ ᱵᱟᱝ ᱵᱤᱱ ᱚᱥᱩᱵᱤᱫᱷᱟᱜᱼᱟ!”

ᱯᱮᱲᱟ ᱦᱚᱲ ᱰᱩᱞᱩᱝ ᱮ ᱴᱷᱮᱞᱟᱣᱮᱫ ᱛᱩᱞᱩᱡ ᱠᱩᱸᱫᱤ” ᱮ ᱦᱚᱯᱚᱱ ᱵᱟ ᱤᱭᱟᱹ ᱵᱟᱹᱲᱤᱡ ᱟᱞᱚ ᱵᱤᱱ ᱢᱚᱱᱮᱭᱟ ᱟᱞᱮ ᱚᱲᱟᱜ ᱫᱚ ᱟᱭᱢᱟ ᱦᱚᱲ ᱦᱟᱺᱰᱤ ᱯᱟᱹᱣᱨᱟᱹ ᱧᱩᱸ ᱠᱚ ᱦᱤᱡᱩᱜᱼᱟ ᱚᱱᱟᱛᱮ ᱤᱧ ᱫᱚ ᱵᱟᱹᱧ ᱴᱷᱤᱠᱟᱹ ᱞᱮᱫ ᱵᱤᱱᱟ ᱛᱤᱱ ᱠᱷᱚᱱ ᱪᱚ ᱱᱚᱣᱟ ᱠᱩᱞᱦᱤ ᱯᱤᱸᱰᱟᱹ ᱨᱮᱵᱤᱱ ᱫᱩᱲᱩᱵ ᱟᱠᱟᱱ ?᱾”
“ᱵᱟᱝᱜᱮ ᱜᱳ ᱵᱟᱹᱲᱤᱡ ᱫᱚ! ᱵᱟᱝ ᱪᱤᱱᱦᱟᱹᱯ ᱟᱨ ᱵᱟᱠᱚ ᱞᱟᱹᱭ ᱟᱹᱵᱤᱱ ᱠᱷᱟᱱ ᱪᱤᱠᱟᱹᱵᱤᱱ ᱵᱟᱰᱟᱭᱟ!”
“ᱦᱳᱭ ᱛᱚᱵᱮ ᱦᱚᱯᱚᱱ ᱵᱟ ᱢᱟ ᱫᱚᱢᱮᱤᱧ ᱜᱷᱟᱹᱲᱤᱠ ᱮᱫ ᱵᱤᱱᱟ ᱱᱷᱟᱜ………..

ᱟᱫᱚ ᱠᱩᱸᱫᱤ ᱠᱟᱹᱫᱩᱣᱟᱜ ᱞᱟᱹᱭ ᱞᱮᱠᱟ ᱛᱮ ᱡᱚᱛᱚ ᱠᱟᱹᱢᱤ ᱢᱩᱞᱤᱭᱟᱹ ᱟᱱᱛᱮ ᱜᱮ ᱥᱟᱹᱛ ᱠᱮᱫᱟᱭ ᱟᱨ ᱢᱩᱸᱪᱟᱹᱫ ᱦᱤᱞᱚᱜ ᱫᱚ ᱢᱤᱫᱴᱟᱝ ᱚᱲᱟᱜ ᱨᱮᱱᱤᱡ ᱯᱚᱦᱟᱲᱤᱭᱟᱹ ᱥᱤᱢ ᱥᱮᱛᱟᱜ ᱨᱮ ᱦᱟᱹᱨᱩᱵ ᱠᱟᱫᱮᱭᱟᱭ ᱟᱨ ᱦᱩᱲᱩ ᱠᱚ ᱥᱟᱢᱴᱟᱣ ᱵᱟᱭ ᱵᱟᱲᱟ ᱛᱮᱜᱮ ᱜᱚᱡ ᱠᱮᱫᱮ ᱛᱮ ᱢᱩᱞᱤᱭᱟᱹ ᱠᱚᱭ ᱡᱚᱢ ᱧᱩᱸ ᱚᱪᱚ ᱠᱮᱫ ᱠᱚᱣᱟ ᱾ ᱡᱚᱛᱚ ᱠᱷᱚᱱ ᱢᱩᱸᱪᱟᱹᱫ ᱨᱮ ᱦᱟᱱᱦᱟᱨ ᱦᱚᱧᱟᱨ ᱞᱚᱴᱟ ᱫᱟᱜ ᱮ ᱤᱫᱤᱭᱟᱫ ᱠᱟᱱᱟ ᱢᱮᱱᱠᱷᱟᱱ ᱟᱹᱰᱤ ᱜᱷᱟᱹᱲᱤᱠ ᱛᱟᱺᱜᱤ ᱠᱟᱛᱮ ᱨᱮᱦᱚᱸ ᱵᱟᱝᱠᱤᱱ ᱦᱮᱡ ᱞᱮᱱᱠᱷᱟᱱ ᱫᱚᱲᱦᱟ ᱦᱚᱸᱭ ᱦᱚᱻᱦᱚᱣᱟᱫ ᱠᱤᱱᱟ ᱮᱱᱦᱚᱸ ᱵᱟᱝ ᱠᱤᱱ ᱵᱮᱨᱮᱫ ᱞᱮᱱᱟ᱾ᱠᱩᱸᱫᱤ ᱜᱤᱫᱨᱟᱹᱭ ᱦᱚᱦᱚ ᱵᱮᱨᱮᱫ ᱠᱮᱫᱮ ᱛᱮ ᱡᱚᱢ ᱡᱷᱚᱜ ᱮ ᱩᱭᱦᱟᱹᱨᱚᱜ ᱠᱟᱱᱟ,” ᱛᱤᱱᱟᱹᱜ ᱟᱜᱟᱢ ᱱᱟᱜᱟᱢ ᱩᱭᱦᱟᱹᱨ ᱠᱟᱛᱮᱧ ᱡᱟᱶᱟᱭ ᱮᱱᱠᱷᱟᱱ ᱱᱤᱛᱚᱜ ᱠᱟᱹᱢᱤ ᱠᱟ.ᱢᱤ ᱛᱮᱹᱧ ᱫᱚᱢ ᱵᱟᱷᱨᱟᱣᱚᱜ ᱠᱟᱱ ᱨᱮᱦᱚᱸ ᱠᱟᱹᱢᱤ ᱜᱮ ᱵᱟᱝ ᱧᱮᱞᱚᱜ ᱠᱟᱱ ᱛᱤᱧᱟ ᱾ ᱜᱤᱫᱽᱨᱟᱹ ᱟᱱᱛᱮ ᱵᱟᱹᱫ ᱵᱟᱹᱭᱦᱟᱹᱲ ᱨᱚᱦᱚᱭ ᱛᱩᱫ ᱪᱟᱵᱟ ᱭᱮᱱ ᱠᱷᱟᱱ ᱨᱚᱲ ᱜᱮ ᱵᱟᱝ ᱚᱰᱚᱠᱚᱜ ᱠᱟᱱᱟ ᱾”
ᱱᱚᱝᱠᱟ ᱱᱟᱜ ᱟᱭᱢᱟ ᱜᱷᱚᱴᱚᱱ ᱟᱡᱟᱜ ᱜᱷᱟᱨᱚᱸᱡᱽ ᱨᱮ ᱧᱮᱞ ᱯᱟᱨᱚᱢ ᱟᱹᱜᱩ ᱟᱠᱟᱫᱟᱭ ᱢᱮᱱᱠᱷᱟᱱ ᱛᱮᱦᱮᱧ ᱡᱟᱦᱟᱸ ᱞᱮᱠᱟ ᱢᱚᱱᱮ ᱡᱤᱣᱤ ᱨᱮ ᱫᱩᱠ ᱠᱚᱥᱴᱚᱭ ᱧᱟᱢ ᱠᱮᱫᱟ ᱚᱱᱟ ᱫᱚ ᱵᱟᱝ ᱥᱟᱦᱟᱣ ᱞᱮᱱᱟ ᱢᱚᱱᱮ ᱡᱤᱣᱤ ᱦᱚᱲᱢᱚ ᱨᱮ ᱾

ᱫᱚᱥᱟᱨ ᱦᱤᱞᱚᱜ ᱢᱩᱞᱤᱭᱟᱹ ᱠᱚ ᱯᱩᱭᱥᱟᱹ ᱮᱢ ᱵᱟᱲᱟ ᱠᱟᱛᱮ ᱛᱟᱨᱟᱥᱤᱧ ᱵᱮᱲᱟ ᱛᱤᱱᱟᱹᱜ ᱜᱟᱱ ᱞᱩᱜᱽᱲᱤ ᱟᱨ ᱜᱤᱫᱨᱟᱹ ᱦᱟᱜ ᱫᱚᱛᱚ ᱠᱚ ᱧᱟᱢ ᱥᱟᱢᱴᱟᱣ ᱠᱟᱛᱮ ᱠᱩᱸᱫᱤ ᱵᱟᱠᱷᱨᱟ ᱠᱟᱹᱫᱩᱭ ᱠᱤᱨᱤᱧ ᱞᱮᱫ ᱢᱟᱹᱭᱡᱩ ᱰᱩᱞᱩᱝ (ᱞᱮᱰᱤᱡ ᱥᱟᱭᱠᱮᱞ) ᱛᱮ ᱟᱯᱟ ᱵᱟᱨᱮ ᱚᱲᱟᱜ ᱛᱮ ᱠᱤᱱ ᱥᱮᱱ ᱮᱱᱟ ᱾

ᱫᱚᱥᱟᱨ ᱥᱮᱨᱢᱟ ᱠᱟᱹᱫᱩ ᱢᱟᱜᱽ ᱪᱟᱸᱫᱚ ᱠᱩᱱᱟᱹᱢᱤ ᱫᱚᱥᱟᱨ ᱠᱟᱹᱢᱤ ᱠᱷᱚᱱ ᱨᱩᱣᱟᱹᱲ ᱚᱠᱛᱮ ᱨᱮᱞ ᱮ.ᱥᱤ ᱵᱚᱜᱤ ᱨᱮ ᱫᱮᱡ ᱟᱠᱟᱱᱟᱭ ᱟᱨ ᱱᱟᱥᱮᱱᱟᱜ ᱡᱟᱹᱯᱤᱫ ᱮᱫ ᱞᱮᱠᱟ ᱡᱷᱚᱜ ᱦᱩᱰᱤᱧ ᱢᱟᱪᱷᱟ ᱠᱩᱠᱢᱩᱸ ᱧᱮᱞ ᱛᱮ ᱪᱚᱢᱠᱟᱣ ᱟᱠᱟᱱᱟ ᱪᱮᱺ-
“ᱜᱤᱫᱽᱨᱟᱹ ᱦᱚᱯᱚᱱ ᱛᱟᱭ ᱜᱟᱰᱟ ᱫᱟᱜ ᱨᱮ ᱛᱩᱯᱩᱭᱮ ᱠᱟᱱ ᱛᱩᱞᱩᱡ ᱮ ᱞᱤᱸᱡᱤ ᱚᱪᱚᱠᱮᱫᱭᱟ”᱾ ᱜᱤᱫᱽᱨᱟᱹ ᱫᱚᱭ ᱠᱩᱲᱤ ᱠᱟᱱ ᱨᱮᱦᱚᱸ ᱢᱮᱱᱠᱷᱟᱱ ᱡᱤᱣᱤ ᱢᱟ ᱦᱚᱲ ᱡᱤᱣᱤ ᱠᱟᱱ ᱜᱮᱭᱟ ᱾ ᱠᱩᱸᱫᱤ ᱠᱟᱹᱫᱩᱣᱟᱜ ᱡᱩᱫᱤ ᱫᱩᱞᱟᱹᱲ ᱥᱟᱹᱜᱟᱹᱭ ᱨᱮᱭᱟᱜ ᱡᱟᱦᱟᱸ ᱱᱟᱜ ᱥᱚᱱᱛᱚᱠ ᱡᱩᱫᱤ ᱢᱮᱱᱟᱜ ᱼᱟ ᱚᱱᱟ ᱫᱚ ᱟᱹᱠᱤᱱᱤᱡ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱧᱩᱛᱩᱢ ᱛᱟᱭ ᱫᱚ ” ᱢᱟᱛᱠᱚᱢ “᱾ ᱟᱨ ᱡᱚᱛᱚ ᱠᱷᱚᱱ ᱢᱟᱨᱟᱝ ᱜᱷᱚᱴᱚᱱ ᱢᱟᱨᱟᱝ ᱦᱟᱥᱯᱟᱛᱟᱞ ᱨᱮ ᱡᱚᱠᱷᱚᱱ “ᱢᱟᱛᱠᱚᱢ” ᱫᱷᱩᱲᱤ ᱫᱷᱟᱹᱨᱛᱤ ᱛᱮ ᱦᱚᱸᱥᱚᱨᱚᱜ ᱚᱠᱛᱚ ᱰᱟᱠᱛᱚᱨ ᱦᱚᱸ ᱪᱮᱫ ᱠᱚ ᱪᱤᱠᱟᱹᱭᱟ ᱪᱮᱫ ᱵᱟᱠᱚ ᱪᱤᱠᱟᱹᱭᱟ ᱵᱷᱟᱵᱽᱱᱟ ᱥᱟᱭ ᱞᱮᱱᱟ ᱠᱚ ᱪᱤᱠᱟᱹᱛᱮ ᱵᱟᱝ ᱠᱩᱸᱫᱤ ᱭᱟᱜ ᱦᱩᱸᱥ ᱚᱴᱟᱝ ᱞᱮᱱᱟ ᱟᱨ ᱥᱮᱞᱟᱭᱤᱱ ᱱᱚᱞᱤ ᱛᱮ ᱠᱩᱸᱫᱤ ᱭᱟᱜ ᱢᱟᱭᱟᱢ ᱪᱮᱛᱟᱱ ᱥᱮᱫ ᱨᱟᱠᱟᱵ ᱞᱮᱱᱟ ᱟᱨ ᱩᱱ ᱚᱠᱛᱚ ᱢᱤᱫ ᱱᱚᱨᱥ ᱠᱩᱲᱤ ᱠᱟᱹᱫᱩ ᱛᱮᱡ ᱮ ᱦᱳᱻ ᱦᱳᱻ ᱟᱹᱜᱩ ᱞᱮᱫᱮᱭᱟ ᱞᱮᱵᱟᱨ ᱨᱳᱢ ᱛᱮ ᱡᱟᱦᱟᱸᱨᱮ ᱰᱟᱠᱛᱚᱨ ᱪᱷᱟᱰᱟ ᱠᱚᱲᱟ ᱦᱚᱯᱚᱱ ᱵᱚᱞᱚᱱ ᱮᱠᱟᱞ ᱢᱟᱱᱟ ᱜᱮᱭᱟ ᱩᱱ ᱨᱮ ᱠᱟᱹᱫᱩ ᱠᱩᱸᱫᱤ ᱭᱟᱜ ᱦᱚᱲᱢᱚ ᱡᱚᱴᱮᱫ ᱠᱟᱛᱮ ᱚᱲᱟᱜ ᱨᱤᱱ ᱦᱟᱯᱲᱟᱢ ᱵᱚᱸᱜᱟ ᱠᱷᱚᱱ ᱮᱦᱚᱵ ᱠᱟᱛᱮ ᱥᱮᱨᱢᱟ ᱥᱟᱱᱟᱢ ᱥᱤᱧ ᱵᱚᱸᱜᱟ ᱦᱟᱹᱵᱤᱡ ᱢᱤᱫ ᱥᱟᱛᱟᱦᱮᱫ ᱛᱮ ᱧᱩᱢ ᱯᱩᱨᱟᱹᱣ ᱞᱮᱫ ᱠᱚᱣᱟ ᱟᱨ ᱦᱩᱸᱥ ᱦᱮᱡ ᱛᱟᱭᱚᱢ “ᱢᱟᱛᱠᱚᱢ” ᱱᱚᱣᱟ ᱫᱷᱟᱹᱨᱛᱤ ᱛᱮ ᱦᱮᱡ ᱞᱮᱱᱟ ᱾

ᱯᱟᱨᱚᱢ ᱟᱠᱟᱱ ᱫᱤᱱ ᱨᱮᱭᱟᱜ ᱠᱟᱛᱷᱟ ᱠᱚ ᱵᱷᱟᱹᱵᱤ ᱵᱷᱟᱹᱵᱤ ᱛᱮ ᱛᱤᱱ ᱨᱮ ᱡᱟᱹᱯᱤᱫ ᱜᱚᱫ ᱠᱟᱫᱟᱭ ᱵᱟᱭ ᱵᱟᱰᱟᱭ ᱟᱱᱟ ᱾ᱴᱟᱴᱠᱟ ᱜᱮ ᱮᱵᱷᱮᱱ ᱟᱠᱟᱱᱟᱭ ᱟᱨ ᱧᱮᱞ ᱫᱚᱭ ᱟᱡ ᱟᱬᱜᱚᱱ ᱥᱴᱮᱥᱚᱱ ᱟᱨ ᱜᱮᱞ,ᱜᱮᱢᱚᱬ ᱴᱤᱬᱤᱡ ᱠᱷᱟᱱ ᱜᱮ ᱥᱮᱴᱮᱨᱚᱜ ᱼᱟ᱾ ᱛᱟᱭᱚᱢ ᱥᱴᱮᱥᱚᱱ ᱨᱮ ᱟᱬᱜᱚ ᱠᱟᱛᱮ ᱵᱚᱥᱛᱮ ᱟᱠᱚᱣᱟᱜ ᱥᱚᱫᱚᱨ ᱵᱟᱡᱟᱨ ᱮ ᱥᱮᱴᱮᱨ ᱮᱱᱟ ᱟᱨ ᱵᱟᱡᱟᱨ ᱨᱮ ᱜᱤᱫᱽᱨᱟᱹ ᱞᱟᱹᱜᱤᱫ ᱫᱚᱛᱚ ᱯᱮᱸᱴ ᱟᱨ ᱟᱡ ᱵᱟᱹᱦᱩ, ᱮᱸᱜᱟᱛ ᱛᱮᱫ ᱟᱨ ᱢᱤᱥᱨᱟᱛ ᱛᱟᱭ ᱞᱟᱹᱜᱟᱫ ᱫᱚ ᱵᱟᱨ ᱡᱚᱲ ᱠᱟᱛᱮ ᱢᱤᱫ ᱞᱮᱠᱟᱱ ᱥᱟᱹᱲᱤ ᱭᱮ ᱦᱟᱛᱟᱣ ᱠᱮᱫᱟ, ᱟᱯᱟᱛ ᱛᱮᱫ ᱵᱚᱠᱚᱛ ᱛᱮᱫ ᱟᱨ ᱟᱡ ᱞᱟᱹᱜᱤᱫ ᱫᱚ ᱢᱤᱫ ᱞᱮᱠᱟᱱ ᱯᱷᱩᱴᱟᱹ ᱭᱮ ᱠᱤᱨᱤᱧ ᱠᱮᱫᱟ ᱪᱤᱠᱟᱹᱛᱮ ᱵᱟᱝ ᱢᱟ ᱯᱷᱟᱹᱜᱩᱱ ᱪᱟᱸᱫᱚ ᱵᱟᱦᱟ ᱵᱚᱸᱜᱟ ᱥᱮᱴᱮᱨᱚᱜ ᱠᱟᱱᱟ ᱟᱨ ᱞᱟᱹᱰᱩ ᱢᱤᱴᱷᱟᱹᱭ ᱠᱚᱢᱟ ᱢᱮᱱᱟᱜ ᱜᱮ ᱾

ᱟᱹᱭᱩᱵ ᱯᱟᱭᱟᱝ ᱯᱩᱭᱩᱝ ᱚᱜ ᱠᱟᱱᱟ ᱠᱟᱹᱫᱩ ᱚᱲᱟᱜ ᱮ ᱥᱮᱴᱮᱨ ᱮᱱᱟ ᱟᱨ ᱚᱲᱟᱜ ᱨᱮᱫᱚ ᱚᱠᱚᱭ ᱦᱚᱸ ᱵᱟᱹᱱᱩᱜ ᱠᱚᱣᱟ ᱾ ᱚᱲᱟᱜ ᱨᱤᱱ ᱢᱮᱨᱚᱢ ᱵᱷᱤᱰᱤ ᱯᱤᱰᱟᱹ ᱨᱮ ᱢᱮᱱᱟᱜ ᱵᱩᱞᱩᱝ ᱥᱩᱸᱫᱲᱟᱹ ᱥᱩᱸᱫᱲᱤ ᱟᱛᱮ ᱠᱚ ᱡᱚᱢ ᱮᱫᱟ ᱟᱨ ᱢᱮᱨᱚᱢ ᱫᱚ ᱚᱲᱮᱡ ᱵᱚᱥᱛᱟ ᱛᱮ ᱫᱟᱯᱟᱞ ᱟᱠᱟᱱ ᱡᱚᱡᱚ ᱥᱚᱢᱫᱟᱱ ᱧᱟᱢ ᱠᱟᱛᱮ ᱞᱟᱹᱴᱤᱡ ᱟᱛᱮ ᱠᱚ ᱯᱟᱹᱜᱩᱨ ᱡᱚᱝ ᱠᱟᱱᱟ ᱾ ᱩᱱᱠᱩ ᱠᱚ ᱞᱟᱜᱟ ᱠᱷᱟᱹᱲ ᱵᱟᱲᱟᱭᱮᱫ ᱠᱚ ᱡᱷᱚᱜ ᱠᱟᱹᱫᱩ ᱢᱤᱥᱨᱟᱛ ᱛᱮᱫ ᱡᱷᱩᱨᱤ ᱠᱚ ᱦᱚᱵᱚᱨ ᱠᱟᱛᱮ ᱚᱲᱟᱜ ᱥᱮᱱ ᱮ ᱵᱚᱞᱚᱭᱮᱱᱟ ᱟᱨ ᱠᱤᱪᱷᱩ ᱜᱷᱟᱹᱲᱤᱠ ᱠᱷᱟᱱ ᱜᱮ ᱚᱠᱟ ᱥᱮᱱ ᱠᱷᱚᱱ ᱪᱚ ᱠᱟᱹᱫᱩ ᱮᱸᱜᱟᱛ ᱵᱩᱞ ᱵᱷᱩᱛᱟᱹᱲ ᱠᱟᱛᱮ ᱚᱲᱟᱜ ᱮ ᱵᱚᱞᱚ ᱦᱮᱡ ᱮᱱᱟ ᱟᱨ ᱠᱟᱹᱫᱩ ᱥᱮᱱ ᱜᱷᱟᱹᱲᱤᱠ ᱧᱚᱜ ᱠᱚᱭᱚᱜ ᱴᱷᱤᱠᱟᱹ ᱠᱟᱛᱮ “ᱛᱤᱱ ᱨᱮᱢ ᱦᱮᱡ ᱮᱱᱟ ᱵᱟᱹᱵᱩ,ᱫᱟᱠᱟ ᱠᱚ ᱫᱚᱢ ᱡᱚᱢ ᱟᱠᱟᱫᱟ ᱪᱮ ᱵᱟᱝ ᱜᱮ ?”

ᱜᱷᱟᱹᱲᱤᱠ ᱧᱚᱜ ᱯᱚᱨ ᱟᱯᱟᱛ ᱛᱮᱫ ᱦᱟᱴ ᱠᱷᱚᱱ ᱡᱤᱞ ᱟᱹᱜᱩ ᱠᱟᱛᱮ ᱠᱟᱹᱫᱩ ᱢᱤᱥᱨᱟ ᱠᱚ ᱢᱮᱛᱟᱭ ᱠᱟᱱᱟ ᱢᱟ ᱦᱚᱯᱚᱱ ᱵᱤᱴᱤ ᱱᱚᱣᱟ ᱠᱚᱨᱦᱟᱭ ᱢᱮᱥᱮ ᱾

ᱠᱟᱹᱫᱩ ᱢᱚᱱᱮ ᱛᱮ ᱢᱮᱱ ᱮᱫᱟᱭ “ᱠᱩᱸᱫᱤ ᱟᱨ ᱢᱟᱛᱠᱚᱢ ᱫᱚ ᱠᱤᱱ ᱚᱠᱟ ᱭᱮᱱᱟ?”ᱠᱤᱪᱷᱩ ᱜᱷᱟᱹᱲᱤᱠ ᱯᱚᱨᱮ ᱮᱸᱜᱟᱛ ᱛᱮᱫᱟᱜ ᱠᱟᱛᱷᱟ ᱠᱚᱨᱮ ᱠᱷᱚᱱ ᱮ ᱵᱟᱰᱟᱭ ᱧᱟᱢ ᱠᱮᱫᱟ ᱵᱟᱝ ᱢᱟ ᱩᱱᱠᱤᱱ ᱫᱚ ᱠᱤᱱ ᱧᱤᱨ ᱟᱠᱟᱱᱟ ᱢᱮᱱᱛᱮ ᱾ᱤᱱᱟᱹ ᱦᱤᱞᱚᱜ ᱠᱟᱹᱫᱩ ᱜᱮ ᱵᱟᱦᱨᱮ ᱪᱩᱞᱦᱟᱹ ᱨᱮ ᱡᱤᱞ ᱮ ᱩᱛᱩ ᱤᱥᱤᱱ ᱠᱮᱫᱟ ᱟᱨ ᱡᱚᱢ ᱠᱟᱛᱮ ᱠᱚ ᱡᱟᱹᱯᱤᱫ ᱟᱱᱟ ᱾

ᱫᱚᱥᱟᱨ ᱥᱮᱛᱟᱜ ᱠᱟᱹᱫᱩ ᱩᱢ ᱯᱟᱨᱪᱷᱟ ᱵᱟᱲᱟ ᱠᱟᱛᱮ ᱞᱩᱜᱽᱲᱤ ᱞᱟᱯᱚ ᱠᱚᱭ ᱪᱟᱞᱟᱫ ᱠᱚᱣᱟ ᱾ ᱜᱤᱫᱽᱨᱟᱹ
ᱟᱨ ᱵᱟᱹᱦᱩᱛᱟᱭᱟᱜ ᱞᱩᱜᱽᱲᱤ ᱫᱚ ᱡᱩᱨᱤ ᱨᱮ ᱜᱮ ᱛᱟᱦᱮᱸ ᱭᱮᱱᱟ ᱟᱨ ᱯᱟᱸᱡᱟ ᱟᱹᱜᱩ ᱠᱤᱱ ᱨᱮᱭᱟᱜ ᱡᱟᱦᱟᱸᱱ ᱟᱲᱟᱝ ᱦᱚᱸ ᱵᱟᱭ ᱟᱸᱡᱚᱢ ᱞᱮᱫᱟ ᱟᱭᱳ ᱵᱟᱵᱟᱣᱟᱜ ᱢᱚᱪᱟ ᱠᱷᱚᱱ ᱚᱱᱟᱛᱮ ᱟᱡᱦᱚᱸᱵᱟᱭ ᱯᱟᱸᱡᱟ ᱨᱩᱣᱟᱹᱲ ᱞᱮᱫ ᱠᱤᱱᱟ ᱾

ᱠᱩᱸᱫᱤ ᱦᱚᱸ ᱵᱟᱨᱮᱛ ᱛᱮᱫ ᱛᱮᱠᱚᱣᱟᱜ ᱢᱮᱫ ᱨᱮ ᱫᱷᱩᱲᱤ ᱮᱨ ᱠᱟᱛᱮ ᱭᱮ ᱡᱟᱶᱟᱭ ᱞᱮᱱ ᱠᱷᱟᱹᱛᱤᱨ ᱟᱡᱟᱜ ᱠᱟᱛᱷᱟ ᱥᱟᱢᱴᱟᱣ ᱞᱟᱹᱜᱤᱫ ᱛᱮᱫᱚ ᱵᱟᱝᱠᱚ ᱢᱮᱫ ᱞᱩᱛᱩᱨᱟᱫ ᱛᱟᱭᱟ ᱾

ᱢᱤᱫ ᱵᱟᱨ ᱥᱮᱨᱢᱟ ᱯᱚᱨᱮ ᱵᱩᱨᱩ ᱫᱷᱟᱨᱮ ᱥᱮᱱ ᱠᱷᱚᱱ ᱠᱟᱹᱫᱩ ᱫᱚ ᱫᱚᱲᱦᱟ ᱴᱩᱝᱠᱤ ᱫᱤᱯᱤᱞ ᱛᱮ ᱴᱟᱴᱠᱟ ᱜᱮᱠᱚ ᱵᱟᱯᱞᱟ ᱠᱮᱫᱮᱭᱟ ᱾ᱠᱩᱸᱫᱤ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱱᱟᱥᱮ ᱟᱹᱵᱤ ᱵᱷᱟᱹᱵᱤ ᱭᱮᱱ ᱜᱮᱭᱟᱭ ᱟᱨ ᱢᱚᱱᱮ ᱢᱚᱱᱮ ᱛᱮ ᱢᱮᱱ ᱡᱚᱝ ᱠᱟᱱᱟᱭ ᱪᱮ “ᱤᱧ ᱫᱚ ᱤᱧᱤᱡ ᱦᱚᱲ ᱥᱟᱞᱟᱜ ᱠᱟᱛᱷᱟ, ᱮᱴᱟᱜ ᱠᱚᱣᱟᱜ ᱠᱟᱛᱷᱟ ᱫᱚ ᱪᱟᱜ ᱤᱧ ᱵᱷᱟᱵᱽᱱᱟᱜᱼᱟ”
ᱵᱟᱯᱞᱟ ᱛᱟᱭᱚᱢ ᱞᱮᱢᱯᱟ ᱦᱟᱲᱟᱢ ᱞᱮᱢᱯᱟ ᱵᱩᱰᱷᱤ ᱪᱷᱩᱴᱠᱤ ᱛᱤ ᱛᱮ ᱤᱥᱤᱱ ᱵᱟᱥᱟᱝ ᱨᱟᱹᱥᱠᱟᱹ ᱛᱮ ᱠᱤᱱ ᱟᱛᱟᱝ ᱟᱠᱟᱫ ᱵᱮᱲᱟ ᱨᱮ ᱠᱟᱹᱫᱩ ᱫᱚ ᱞᱩ ᱫᱟᱠᱟ ᱦᱚᱸᱭ ᱵᱮᱨᱮᱫ ᱵᱟᱹᱜᱤ ᱚᱴᱚ ᱟᱠᱟᱫᱟ ᱾ᱪᱷᱩᱴᱠᱤ ᱛᱟᱭ ᱢᱤᱫ ᱵᱟᱨ ᱮᱢᱦᱟᱸ ᱜᱟᱱ ᱵᱷᱤᱛᱤᱨ ᱨᱮ ᱜᱮ ᱦᱟᱴᱟᱜ ᱛᱮ ᱫᱟᱯᱟᱞ ᱞᱮᱫᱮ ᱦᱟᱹᱛᱤ ᱫᱚᱭ ᱚᱴᱟᱜ ᱧᱟᱢ ᱠᱮᱫᱮᱭᱟ, ᱢᱮᱱᱠᱷᱟᱱ ᱥᱟᱹᱨᱤ ᱪᱮ ᱠᱷᱟᱹᱞᱤ ᱡᱚᱨ ᱡᱚᱵᱚᱨ ᱠᱟᱹᱫᱩᱭ ᱦᱟᱹᱲᱩᱵ ᱚᱪᱚ ᱟᱠᱟᱱᱟ ᱛᱟᱨᱟᱥᱤᱧ ᱰᱟᱝᱨᱟ ᱛᱚᱛᱚᱞ ᱜᱚᱲᱟ ᱨᱮ ,ᱩᱱ ᱨᱮ ᱠᱟᱹᱫᱩ ᱠᱷᱮᱪᱲᱟ ᱠᱷᱤᱪᱲᱤ ᱛᱩᱞᱩᱡ ᱮ ᱢᱮᱱ ᱟᱠᱟᱫᱟ –
“ᱟᱢ ᱫᱚ ᱤᱧ ᱟᱭᱳ ᱤᱧ ᱵᱟᱵᱟ ᱠᱤᱱ ᱟᱹᱜᱩ ᱟᱠᱟᱫ ᱢᱮᱭᱟ ᱤᱧ ᱥᱟᱶ ᱫᱚ ᱚᱦᱚᱜᱮᱢ ᱥᱚᱝᱥᱟᱨ ᱠᱮᱭᱟ ᱾”

ᱪᱷᱩᱴᱠᱤ ᱢᱮᱫᱦᱟᱶ,ᱥᱮᱛᱟᱜ ᱵᱟᱞᱮ ᱛᱟᱨᱟᱥ ᱦᱤᱸᱥᱤᱫ ᱦᱟᱹᱨᱭᱟᱹᱲ ᱠᱟᱭᱨᱟ ᱥᱟᱠᱟᱢ ᱡᱷᱟᱨᱠᱟᱣ ᱡᱟᱹᱨᱩᱵ ᱦᱮᱸᱫᱮ ᱥᱟᱠᱟᱢ ᱞᱮᱠᱟ ᱜᱚᱥᱚ ᱢᱚᱥᱚ ᱭᱮᱱᱟ ᱾

ᱪᱷᱩᱴᱠᱤ ᱨᱮᱹᱱ ᱱᱤᱡᱚᱨ ᱢᱮᱱᱛᱮ ᱫᱚ ᱪᱤᱞᱤ ᱦᱚᱸ ᱵᱟᱹᱱᱩᱜ ᱠᱚᱣᱟ ᱟᱡ ᱫᱚ ᱠᱟᱠᱟᱛ ᱛᱮᱫ ᱛᱮᱠᱚ ᱴᱷᱮᱱ ᱜᱮ ᱦᱟᱨᱟ ᱟᱠᱟᱱᱟᱭ ᱾ ᱫᱤᱥᱚᱢ ᱯᱮᱲᱟ ᱢᱟᱲᱟᱝ ᱠᱚ ᱦᱮᱡ ᱞᱮᱱ ᱜᱮᱭᱟ ᱢᱮᱱᱠᱷᱟᱱ ᱵᱟᱝ ᱠᱚ ᱜᱚᱝ ᱟᱠᱟᱫᱮᱭᱟ᱾

ᱥᱤᱧ ᱵᱚᱸᱜᱟ ᱱᱚᱝᱠᱟᱱ ᱴᱩᱣᱟᱹᱨ ᱴᱷᱟᱯᱟᱨ ᱦᱚᱲ ᱜᱮ ᱪᱮᱫᱟᱜ ᱱᱚᱝᱠᱟᱱ ᱫᱩᱠ ᱮ ᱮᱢᱟ ᱠᱚᱣᱟ ᱟᱡ ᱮ ᱵᱟᱰᱟᱭᱟ ᱾ ᱜᱚᱲᱟ ᱫᱩᱣᱟᱹᱨ ᱫᱷᱟᱨᱮ ᱯᱤᱸᱰᱟᱹ ᱨᱮ ᱫᱩᱲᱩᱵᱽ ᱠᱟᱛᱮ ᱟ.ᱰᱤ ᱟᱭᱢᱟᱭ ᱩᱭᱦᱟᱹᱨ ᱵᱷᱟᱵᱽᱱᱟ ᱟᱠᱟᱱᱟ ᱟᱨ ᱛᱤᱱ ᱠᱚᱨᱮ ᱥᱟᱹᱲᱤ ᱟᱧᱪᱟᱨ ᱨᱮᱭᱟᱜ ᱢᱤᱫ ᱠᱚᱬ ᱮ ᱞᱚᱦᱚᱫ ᱪᱟᱵᱟ ᱠᱮᱫᱟ ᱢᱮᱫ ᱫᱟᱜ ᱡᱚᱫ ᱛᱮ ᱵᱟᱰᱟᱭ ᱜᱮ ᱵᱟᱝ ᱾

ᱧᱮᱞ ᱧᱮᱞ ᱛᱮ ᱱᱚᱝᱠᱟ ᱛᱩᱨᱩᱭ ᱮᱭᱟᱭ ᱪᱟᱸᱫᱚ ᱜᱟᱱ ᱯᱚᱞᱚᱢ ᱮᱱᱟ ᱾ᱪᱷᱩᱴᱠᱤᱭᱟᱜ ᱦᱟᱱᱦᱟᱨ ᱦᱚᱧᱦᱟᱨ ᱠᱤᱱ ᱪᱮᱛᱟᱱ ᱨᱮ ᱟᱪᱟᱨ ᱵᱮᱵᱷᱟᱨ ᱵᱚᱫᱚᱞ ᱮᱱᱟ ᱾ ᱩᱱᱨᱮ ᱩᱱᱤ ᱢᱟᱛᱠᱚᱢ ᱜᱚᱲᱚᱢ ᱠᱩᱲᱤ ᱟᱨ ᱢᱟᱨᱟᱝ ᱠᱤᱢᱤᱱᱟᱜ ᱯᱮᱨᱮᱡ ᱪᱮᱲᱮᱢ ᱞᱚᱴᱟ ᱫᱟᱜ, ᱱᱤᱛᱚᱜ ᱫᱟᱜ ᱟᱨᱮᱡ ᱥᱟᱹᱠᱲᱤ ᱜᱷᱟᱴ ᱨᱮ ᱡᱷᱟᱞᱠᱟᱣᱚᱜ ᱠᱟᱱ ᱞᱮᱠᱟ ᱠᱤᱱ ᱟᱴᱠᱟᱨ ᱮᱫᱟ ᱟᱨ ᱪᱷᱩᱴᱠᱤ,ᱠᱟᱹᱫᱩ ᱛᱩᱞᱩᱡ ᱥᱩᱯᱩᱨ ᱥᱟᱹᱜᱟᱹᱭ ᱱᱤᱛᱚᱜ ᱵᱟᱹᱥᱭᱟᱹᱢ,ᱢᱟᱡᱟᱱ,ᱠᱤᱫᱩᱜ ᱡᱚᱢ ᱫᱩᱲᱩᱵ ᱨᱚᱲ ᱞᱟᱸᱫᱟ ᱠᱷᱚᱱ ᱟᱹᱰᱤ ᱜᱮ ᱞᱟᱦᱟ ᱟᱠᱟᱱᱟ ᱾

ᱢᱤᱫ ᱫᱤᱱ ᱪᱷᱩᱴᱠᱤ ᱛᱟᱨᱟᱥᱤᱧ ᱵᱮᱲᱟ ᱢᱮᱨᱚᱢ ᱰᱟᱹᱝᱨᱤ ᱠᱚ ᱵᱟᱭ ᱠᱟᱛᱮ ᱛᱤ ᱡᱟᱝᱜᱟ ᱟᱹᱨᱩᱵ ᱯᱟᱨᱪᱷᱟ ᱵᱟᱲᱟ ᱭᱮᱱ ᱛᱮ ᱢᱟᱨᱟᱝ ᱚᱲᱟᱜ ᱛᱮ ᱦᱳᱲᱳ ᱚᱰᱚᱠ ᱱᱟᱹᱯᱤᱛ ᱴᱷᱮᱠᱟ ᱟᱨ ᱢᱟᱫ ᱴᱷᱚᱝᱜᱟ ᱥᱟᱵ ᱠᱟᱛᱮ ᱚᱲᱟᱜ ᱛᱮ ᱵᱚᱞᱚ ᱟᱠᱟᱱᱟ ᱟᱨ ᱰᱷᱩᱞᱟᱹ ᱪᱮᱛᱟᱱ ᱢᱟᱨᱟᱝ ᱢᱟᱨᱮ ᱵᱟᱺᱫᱤ ᱪᱮᱛᱟᱱ ᱨᱮ ᱴᱷᱮᱠᱟ ᱭᱮ ᱫᱚᱦᱚ ᱟᱠᱟᱫᱟ ᱟᱨ ᱵᱟᱺᱫᱤ ᱨᱮ ᱢᱟᱫ ᱴᱷᱚᱝᱜᱟ ᱥᱚᱵᱚᱜ ᱠᱷᱟᱹᱲ ᱞᱟᱹᱜᱤᱫ ᱵᱮᱫᱷᱟᱣ ᱵᱚᱲ ᱪᱮᱛᱟᱱ ᱞᱟᱛᱟᱨ ᱠᱟᱛᱮ ᱢᱟᱫ ᱴᱷᱚᱝᱜᱟ ᱦᱚᱸᱭ ᱥᱚᱵᱚᱜ ᱠᱷᱟᱹᱲ ᱜᱚᱫ ᱠᱟᱫᱟ ᱟᱨ ᱟᱪᱠᱟ ᱜᱮ ᱴᱷᱮᱠᱟ ᱠᱟᱝᱠᱷᱟ ᱨᱮ ᱢᱤᱫ ᱯᱩᱞᱛᱷᱤᱱ ᱨᱮ ᱛᱟᱦᱮᱸ ᱠᱟᱱ ᱞᱩᱜᱽᱲᱤ ᱪᱟᱜᱟᱲ ᱧᱩᱨ ᱮᱱᱟ ᱴᱷᱮᱠᱟ ᱠᱚ ᱚᱛ ᱥᱮᱱ ᱧᱩᱨ ᱮᱱᱟ ᱾ᱠᱷᱟᱱ ᱜᱮ ᱵᱟᱺᱫᱤ ᱦᱩᱲᱩ ᱢᱟ ᱴᱷᱮᱠᱟ ᱵᱟᱝ ᱠᱟᱛᱮ ᱚᱛᱨᱮ ᱧᱩᱨᱩᱜ ᱠᱟᱱᱟ, ᱪᱷᱩᱴᱠᱤ ᱪᱩᱨᱟ ᱢᱟᱨᱟ ᱴᱷᱮᱠᱟᱭ ᱥᱟᱵ ᱥᱚᱡᱷᱮ ᱠᱮᱫᱟ ᱟᱨᱮ ᱟᱛᱟᱝ ᱠᱮᱫᱟ ᱾ ᱵᱟᱨ ᱴᱷᱮᱠᱟ ᱦᱩᱲᱩ, ᱪᱩᱞᱦᱟᱹ ᱨᱮ ᱫᱚᱲᱚᱢ ᱟᱠᱟᱱ ᱢᱟᱨᱟᱝ ᱦᱟᱸᱰᱟ ᱨᱮ ᱥᱚᱞᱚᱝ ᱠᱮᱜᱟᱭ ᱾ ᱛᱟᱭᱚᱢ ᱚᱱᱟ ᱰᱷᱩᱞᱟᱹ ᱞᱟᱛᱟᱨ ᱨᱮ ᱦᱤᱨᱤᱡ ᱞᱮᱱ ᱦᱩᱲᱩ ᱠᱚᱭ ᱡᱚᱜ ᱥᱟᱢᱴᱟᱣ ᱠᱮᱫᱟ ᱟᱨ ᱚᱱᱮ ᱧᱩᱨ ᱞᱮᱱ ᱞᱩᱜᱽᱲᱤ ᱭᱮ ᱚᱰᱚᱠ ᱟᱹᱜᱩ ᱠᱮᱫᱟ ᱦᱩᱲᱩ ᱛᱤᱠᱤᱭᱮᱫ ᱪᱩᱞᱦᱟᱹ ᱵᱩᱴᱟᱹ ᱥᱮᱱ ᱾ ᱚᱱᱟ ᱵᱷᱟᱹᱜᱤ ᱞᱮᱠᱟ ᱨᱟᱲᱟ ᱠᱟᱛᱮ ᱧᱮᱞ ᱫᱚᱭ ᱯᱩᱸᱰ ᱥᱩᱛᱟᱹᱢ ᱪᱷᱟᱯᱟ ᱥᱟᱹᱲᱤ ᱠᱟᱱᱟ,ᱚᱱᱟ ᱦᱚᱸ ᱢᱤᱫᱴᱟᱝ ᱥᱮ ᱪᱮᱫ ᱵᱟᱵᱟᱨᱮᱭᱟ ᱟᱨ ᱦᱚᱸ ᱠᱟᱹᱴᱤᱡ ᱞᱮᱴᱠᱟᱣᱟᱜ ᱫᱚᱛᱚ ᱯᱮᱸᱴ ᱢᱮᱱᱟᱜᱼᱟ ᱾ᱚᱱᱟ ᱛᱟᱭᱚᱢ ᱥᱟᱹᱲᱤ ᱨᱮ ᱞᱟᱴᱷᱟ ᱞᱮᱱ ᱵᱤᱸᱫᱤ ᱜᱟᱱᱟᱜ ᱯᱷᱩᱸᱯᱰᱟᱹ ᱠᱚᱭ ᱠᱚᱴᱟ ᱯᱟᱨᱪᱷᱟ ᱭᱮᱫ ᱛᱟᱦᱮᱸᱱ ,ᱠᱷᱟᱱ ᱜᱮ ᱠᱟᱹᱫᱩ ᱦᱚᱠᱟ ᱥᱮᱱ ᱠᱷᱚᱱ ᱪᱚᱭ ᱥᱮᱴᱮᱨ ᱮᱱᱟ ᱢᱮᱱ ᱜᱚᱫ ᱠᱮᱫᱟᱭ,
“ᱥᱮᱝᱜᱮᱞ ᱵᱟᱝ ᱩᱥᱠᱩᱨ ᱠᱟᱛᱮ ᱪᱮᱫ ᱛᱮᱫ ᱮᱢ ᱠᱚᱜᱴᱟ ᱠᱟᱱᱟ ?”
“ᱪᱮᱛᱟᱛ ᱵᱟᱝ,ᱚᱠᱟ ᱥᱮᱱ ᱪᱚᱢ ᱪᱟᱞᱟᱣ ᱞᱮᱱ ᱵᱟᱵᱟ, ᱮᱱᱟᱝ ᱨᱮ ᱦᱩᱲᱩᱧ ᱛᱤᱠᱤ ᱦᱩᱭ ᱟᱠᱟᱫᱟ ,ᱟᱨ ᱦᱚᱹᱧ ᱡᱩᱞᱟᱜᱼᱟ ᱵᱟᱝ ᱫᱚ?”
ᱟᱫᱚ ᱵᱟᱱᱟ ᱦᱚᱲ ᱛᱮ ᱠᱤᱱ ᱛᱩᱞ ᱟᱬᱜᱚ ᱠᱮᱫᱟ ᱾ ᱟᱨ ᱪᱷᱩᱴᱠᱤ ᱢᱮᱱ ᱮᱫᱟᱭ”ᱱᱚᱣᱟ ᱞᱩᱜᱽᱲᱤ ᱫᱚ ᱚᱠᱚᱭᱟᱜ ᱠᱟᱱᱟ ?”
ᱠᱟᱹᱫᱩ,”ᱱᱚᱣᱟ ᱫᱚ ᱟᱢ ᱞᱟᱜᱟᱫ ᱜᱤᱧ ᱠᱤᱨᱤᱧ ᱞᱮᱫᱟ ᱮᱢᱚᱜ ᱤᱧ ᱦᱤᱬᱤᱧ ᱞᱮᱫᱟ ᱾”
ᱪᱷᱩᱴᱠᱤ,”ᱱᱚᱣᱟ ᱥᱟᱹᱲᱤ ᱜᱮᱥᱮ ᱵᱟᱝᱠᱷᱟᱱ ᱤᱧᱟᱜ ᱢᱮᱱᱠᱷᱟᱱ ᱱᱚᱣᱟ ᱜᱤᱫᱽᱨᱟᱹ ᱫᱚᱛᱚ ᱯᱮᱸᱴ ᱫᱚ ᱚᱠᱚᱭᱟᱜ? ,ᱟᱨ ᱤᱧ ᱢᱟ ᱱᱚᱸᱰᱮ ᱦᱮᱡ ᱠᱟᱛᱮ ᱢᱟ ᱡᱟᱹᱥᱛᱤ ᱫᱤᱱ ᱦᱚᱸ ᱵᱟᱹᱧ ᱦᱩᱭ ᱟᱠᱟᱱᱟ ᱟᱨ ᱱᱚᱣᱟ ᱞᱩᱜᱽᱲᱤ ᱡᱟᱦᱟᱸ ᱡᱩᱨᱤ ᱨᱮ ᱛᱟᱦᱮᱸ ᱠᱟᱱᱟ ᱚᱱᱟ ᱡᱩᱨᱤ ᱢᱟ ᱱᱟᱥᱮ ᱥᱟᱵ ᱞᱮᱠᱷᱟᱱ ᱵᱤᱫᱨᱟᱹᱣ ᱟᱛᱮ ᱜᱮᱡᱮᱨᱚᱜ ᱠᱟᱱᱟ ᱪᱮᱫᱟᱜ?”
ᱱᱟᱥᱮ ᱵᱮᱡᱟᱨ ᱧᱚᱜ ᱠᱟᱛᱮ ᱠᱟᱹᱫᱩ,”ᱤᱧ ᱫᱚ ᱪᱮᱫ ᱦᱚᱸ ᱵᱟᱹᱧ ᱵᱟᱰᱟᱭᱟ ᱟᱞᱚᱢ ᱠᱩᱞᱤᱧᱟ ᱪᱮᱫ ᱦᱚᱸ!”
ᱱᱚᱨᱚᱢ ᱟᱲᱟᱝ ᱛᱮ ᱪᱷᱩᱴᱠᱤ,”ᱚᱱᱟᱛᱮᱜᱮᱛᱩᱧ ᱢᱮᱛᱟᱢ ᱠᱟᱱᱟ ᱜᱳ ᱦᱤᱨᱚᱢᱤᱧ ᱛᱤᱠᱤᱱ ᱫᱚ ᱞᱟᱝ ᱯᱟᱸᱡᱟ ᱟᱹᱜᱩ ᱠᱤᱱᱟ ᱪᱮᱫ ᱮᱢ ᱢᱮᱱ ᱮᱫᱟ?”
ᱦᱚᱨᱚ ᱵᱚᱨᱚᱛᱮ ᱠᱟᱹᱫᱩᱭ ᱢᱮᱱ ᱠᱮᱫᱟ,”ᱟᱹᱲᱤᱥ ᱛᱮ ᱩᱱᱤ ᱧᱤᱨ ᱟᱠᱟᱱᱟᱭ ᱟᱨ ᱱᱷᱟᱜ ᱠᱩᱲᱤᱫ ᱨᱟᱢᱟ ᱠᱟᱹᱠᱩᱜ ᱡᱟᱹᱱᱩᱢ ᱧᱮᱞ ᱛᱮ ᱦᱮᱡ ᱵᱟᱲᱟ ᱟᱢ ᱞᱟᱜᱟᱱ ᱮ ?”
ᱪᱷᱩᱴᱠᱤ ᱚᱱᱟ ᱞᱩᱜᱽᱲᱤ ᱵᱟᱭ ᱠᱟᱜ ᱱᱟᱹᱯᱤᱛ ᱚᱲᱟᱜ ᱥᱮᱱ ᱵᱚᱞᱚᱱ ᱡᱷᱚᱜ,”ᱵᱟᱝ ᱵᱟᱝ ᱵᱟᱝ ᱜᱟᱯᱟ ᱥᱮᱛᱟᱜ ᱨᱮᱜᱮ ᱞᱟᱝ ᱚᱰᱚᱠᱚᱜᱼᱟ,ᱟ.ᱵᱤᱱ ᱫᱚ ᱚᱠᱟ ᱞᱮᱠᱟ ᱪᱚᱝ ᱵᱤᱱ ᱵᱷᱩᱞᱟᱹᱣ ᱵᱷᱩᱯᱩᱞᱟᱹᱣ ᱞᱮᱱ,ᱢᱮᱱ ᱠᱷᱟᱱ ᱱᱤᱭᱟᱹ ᱫᱷᱟᱣ ᱫᱚ ᱟᱢ ᱤᱧ ᱢᱮᱥᱟ ᱠᱟᱛᱮ ᱞᱟᱝ ᱵᱷᱩᱞᱟᱹᱣ ᱟᱹᱜᱩ ᱠᱤᱱᱟ᱾”
ᱞᱮᱢᱯᱟ ᱦᱟᱲᱟᱢ ᱠᱤᱢᱤᱱ ᱛᱮᱫᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱢᱚᱱᱮ ᱢᱚᱱᱮ ᱛᱮ ᱱᱤᱱᱟᱹᱜ ᱜᱮ ᱢᱮᱱ ᱟᱠᱟᱫᱟᱭ ᱪᱮ,”ᱵᱟᱠᱚ ᱛᱚᱞᱮᱭᱟ ᱛᱚ ᱠᱟᱹᱫᱩ?”