ᱥᱩᱜᱤ ᱫᱚ ᱢᱤᱫ ᱚᱞᱚᱜ ᱠᱩᱲᱤ ᱜᱤᱫᱽᱨᱟ. ᱠᱟᱱᱟᱭ ᱾ ᱱᱮ ᱦᱟ.ᱞᱤ ᱜᱮ ᱥᱚᱱᱮᱨ ᱮ ᱥᱟ.ᱛ ᱜᱚᱫ ᱟᱠᱟᱫᱼᱟ ᱾ ᱪᱮᱛᱟᱱ ᱥᱮᱫ ᱯᱟᱲᱦᱟᱣᱜ ᱨᱮᱱᱟᱜ ᱟ.ᱰᱤ ᱜᱮ ᱛᱟᱭ ᱟᱸᱥ ᱤᱠᱷᱟ.ᱱ ᱯᱮᱲᱟ ᱠᱚ ᱞᱟᱜᱟᱣ ᱮᱱᱠᱷᱟᱱ ᱟᱡ, ᱡᱟᱶᱟᱭ ᱠᱟᱭ ᱞᱟ.ᱜᱤᱫ ᱫᱩᱨᱢᱟᱨ ᱠᱚ ᱥᱟᱯᱲᱟᱣᱜ ᱠᱟᱱᱟ ᱾ ᱥᱩᱜᱤᱭᱟᱜ ᱢᱚᱱᱮ ᱨᱮ ᱱᱟᱥᱮ ᱠᱟ.ᱦᱤᱸᱥ ᱨᱮᱦᱚᱸ, ᱚᱲᱟᱜ ᱦᱚᱲᱟᱜ ᱠᱩᱥᱤ ᱞᱟ.ᱜᱤᱫ ᱛᱮᱭ ᱨᱮᱵᱮᱱ ᱟᱠᱟᱱ ᱜᱮᱭᱟ ᱾
ᱥᱩᱜᱤ ᱠᱤᱥᱟ.ᱬ ᱚᱲᱟᱜ ᱨᱮᱜᱮ ᱠᱚ ᱡᱟᱶᱟᱭ ᱠᱮᱫᱮᱭᱟ ᱾ ᱫᱟᱨᱟ ᱦᱟᱨᱟ ᱚᱲᱟᱜ ᱨᱤᱱᱤᱡ ᱮᱠᱞᱟ ᱦᱚᱯᱚᱱ ᱾ ᱟᱡ ᱡᱟᱶᱟᱭ ᱚᱞ ᱯᱟᱲᱦᱟᱣ ᱟᱠᱟᱱ ᱜᱮᱭᱟᱭ, ᱤᱠᱷᱟ.ᱱ ᱪᱟ.ᱠᱨᱤ ᱵᱟ.ᱠᱨᱤ ᱵᱟᱝᱛᱮ ᱚᱲᱟᱜ ᱨᱮᱜᱮᱭ ᱛᱟᱦᱮᱸᱱᱟ ᱾ ᱵᱟᱯᱞᱟ ᱠᱟᱛᱮ ᱛᱤᱱᱟ.ᱝ ᱥᱮᱨᱢᱟ ᱫᱚ ᱱᱟᱯᱟᱭ ᱜᱮ ᱵᱟᱯᱞᱟ ᱡᱤᱭᱚᱱ ᱠᱤᱱ ᱠᱷᱮᱢᱟᱣ ᱠᱮᱫᱼᱟ ᱾ ᱢᱚᱬᱮ ᱥᱮᱨᱢᱟ ᱦᱩᱭ ᱮᱱᱟ, ᱵᱟᱨᱭᱟ ᱦᱚᱯᱚᱱ ᱮ ᱡᱟᱱᱟᱢ ᱟᱱᱟ ᱾
ᱟᱡ ᱡᱟᱶᱟᱭ ᱫᱚ ᱪᱟᱹᱠᱨᱤ ᱵᱟᱹᱠᱨᱤ ᱞᱟᱹᱜᱤᱫ ᱫᱟᱹᱲ ᱫᱷᱟᱯ ᱠᱟᱛᱮ ᱨᱮᱦᱚᱸ ᱪᱟᱹᱠᱨᱤ ᱵᱟᱭ ᱧᱟᱢ ᱞᱮᱫ ᱠᱷᱟᱱ, ᱛᱤᱥ ᱠᱚᱨᱮ kᱷᱚᱱ ᱪᱚ ᱦᱟᱺᱰᱤ ᱯᱟᱹᱨᱩᱣᱟᱹ ᱥᱟᱶ ᱥᱟᱹᱜᱟᱹᱭ ᱮ ᱡᱚᱲᱟᱣ ᱦᱩᱭ ᱟᱠᱟᱫ-ᱟ ᱟᱡ ᱦᱚᱸ ᱵᱟᱭ ᱴᱷᱤᱠᱟᱹ ᱡᱚᱝ ᱠᱟᱱᱟ ᱾ ᱟᱹᱛᱩ ᱡᱚᱴᱟᱣ ᱠᱚ ᱥᱟᱸᱜᱮ ᱟᱠᱟᱱ ᱛᱟᱭᱟ, ᱫᱤᱱ ᱜᱮᱠᱚ ᱰᱚᱜᱰᱮ ᱠᱟᱱᱟ ᱡᱟᱛᱨᱟ, ᱯᱟᱛᱟ, ᱛᱟᱢᱥᱟ ᱵᱚᱞ ᱮᱱᱮᱡ ᱮᱢᱟᱱ ᱾ ᱫᱟᱬᱟᱱ ᱵᱟᱹᱲᱛᱤ ᱟᱠᱟᱱᱟ, ᱧᱩ ᱞᱮᱛᱟᱲ ᱟᱠᱟᱱᱟ ᱾ ᱛᱟᱞᱟ ᱛᱟᱞᱟ ᱨᱮ ᱡᱚᱴᱟᱣ ᱠᱟᱛᱮ ᱵᱟᱦᱨᱮ ᱠᱟᱹᱢᱤ ᱦᱚᱸᱠᱚ ᱥᱮᱱᱚᱜ ᱠᱟᱱ ᱜᱮᱭᱟ ᱾ ᱛᱤᱱᱟᱹᱝ ᱫᱤᱱ ᱠᱷᱚᱱ ᱪᱚ ᱥᱩᱜᱤ ᱫᱚ ᱟᱡ ᱡᱟᱶᱟᱭ ᱟᱜ ᱢᱚᱦᱚᱨ ᱢᱩᱴᱷᱟᱹᱱ ᱦᱚᱸ ᱴᱷᱤᱠ ᱥᱟᱺᱦᱤᱡ ᱵᱟᱭ ᱧᱮᱞ ᱟᱠᱟᱫ-ᱟ ᱾ ᱚᱲᱟᱜ ᱨᱮᱦᱚᱸ ᱥᱤᱧ ᱧᱤᱫᱟᱹ ᱵᱟᱭ ᱛᱟᱦᱮᱸᱱ ᱠᱟᱱᱟ ᱟᱨ ᱮ ᱦᱤᱡᱩᱜ ᱠᱟᱱ ᱠᱷᱟᱱ ᱚᱲᱟᱜ ᱵᱷᱤᱛᱨᱤ ᱠᱚᱨᱮᱭ ᱜᱷᱚᱞᱴᱟᱣ ᱵᱟᱭᱚᱜ ᱠᱟᱱᱟ ᱾ ᱱᱮᱛᱟᱨ ᱪᱮᱫ ᱠᱟᱹᱢᱤ ᱠᱚᱪᱚ ᱵᱟᱭ ᱠᱩᱥᱤᱭᱟᱜ ᱠᱟᱱᱟ, ᱡᱟᱦᱟᱸ ᱠᱷᱟᱹᱛᱤᱨ ᱥᱩᱜᱤ ᱪᱮᱛᱟᱱ ᱨᱮ ᱛᱤ ᱦᱚᱸᱭ ᱨᱟᱠᱟᱵ ᱮᱫ ᱜᱮᱭᱟ ᱾ ᱛᱟᱞᱟ ᱛᱟᱞᱟ ᱨᱮ ᱪᱤᱞᱤ ᱠᱩᱲᱤ ᱠᱚᱪᱚ ᱚᱲᱟᱜ ᱫᱷᱟᱹᱵᱤᱡ ᱦᱚᱸᱭ ᱥᱮᱴᱮᱨ ᱮᱫ ᱠᱚ ᱜᱮᱭᱟ ᱟᱨ ᱮ ᱫᱷᱚᱢᱠᱟᱣ ᱮᱭᱟ, ‘ᱟᱢᱟᱜ ᱚᱠᱛᱚ ᱫᱚ ᱪᱟᱵᱟ ᱮᱱᱟ ᱢᱚᱦᱟᱨᱟᱹᱱᱤ, ᱤᱧᱟᱜ ᱡᱤᱭᱚᱱ ᱨᱤᱱᱤᱡ ᱨᱟᱹᱱᱤ ᱫᱚ ᱱᱤᱛᱚᱜ ᱱᱩᱭ ᱠᱟᱱᱟᱭ ᱾’ ᱥᱩᱜᱤᱭ ᱟᱹᱲᱤᱥᱚᱜ ᱨᱮᱦᱚᱸ ᱢᱚᱱᱮ ᱡᱚᱝ ᱟᱭ, ᱛᱤᱱᱟᱹᱝ ᱫᱤᱱ ᱵᱟᱭ ᱱᱚᱝᱠᱟ ᱵᱟᱲᱟᱜ, ᱜᱤᱫᱽᱨᱟᱹ ᱠᱤᱱ ᱦᱟᱨᱟ ᱞᱮᱱᱠᱷᱟᱱ ᱟᱡ ᱛᱮᱜᱮᱭ ᱥᱚᱡᱷᱮᱜ ᱟ ᱱᱷᱟᱜ ᱾ ᱤᱠᱷᱟᱹᱱ ᱱᱚᱶᱟ ᱚᱠᱛᱚ ᱵᱟᱝ ᱜᱮ ᱥᱮᱴᱮᱨᱚᱜ ᱠᱟᱱ ᱠᱷᱟᱹᱛᱤᱨ ᱥᱩᱜᱤ ᱫᱚ ᱵᱟᱹᱭ ᱵᱟᱹᱭ ᱛᱮᱭ ᱛᱟᱺᱜᱤ ᱞᱟᱸᱜᱟ ᱤᱫᱤ ᱟᱠᱟᱱᱟ ᱾ ᱡᱩᱨᱤ ᱡᱟᱸᱫᱮᱛᱟᱸᱫᱮ ᱮᱠᱞᱟ ᱟᱹᱭᱠᱟᱹᱣ ᱛᱮ ᱱᱮᱛᱟᱨ ᱢᱮᱫ ᱫᱟᱜ ᱜᱮ ᱛᱟᱭ ᱥᱮᱛᱮᱧᱚᱜ ᱠᱟᱱᱟ ᱾ ᱮᱠᱞᱟ ᱜᱮᱭ ᱟᱹᱭᱠᱟᱹᱣᱮᱫ-ᱟ ᱡᱟᱦᱟᱸ ᱠᱷᱟᱹᱛᱤᱨ ᱟᱨ ᱡᱟᱶᱟᱭ ᱚᱲᱟᱜ ᱨᱮ ᱛᱟᱦᱮᱸᱱ ᱜᱮ ᱵᱟᱝ ᱥᱟᱱᱟᱭᱮ ᱠᱟᱱᱟ ᱾ ᱪᱮᱫᱟᱜ ᱥᱮ ᱢᱤᱫ ᱠᱩᱲᱤ ᱦᱚᱯᱚᱱ ᱡᱚᱛᱚᱣᱟᱜ ᱮ ᱥᱟᱦᱟᱣᱟ, ᱤᱠᱷᱟᱹᱱ ᱟᱡᱤᱡ ᱦᱚᱲ ᱮᱴᱟᱜ ᱠᱩᱲᱤ ᱥᱟᱶ ᱦᱟᱹᱴᱤᱧ ᱫᱚ ᱵᱟᱝ ᱜᱮᱭ ᱥᱟᱦᱟᱣ ᱫᱟᱲᱮᱭᱟᱜ-ᱟ ᱾ ᱨᱟᱹᱯᱩᱫ ᱩᱛᱟᱹᱨᱚᱜ ᱟᱭ ᱚᱱᱛᱚᱨ ᱠᱷᱚᱱ ᱢᱚᱥᱨᱟ ᱡᱟᱹᱱᱩᱢ ᱞᱮᱠᱟ ᱨᱟᱯᱨᱚᱯ ᱾
ᱢᱤᱫ ᱫᱤᱱ ᱫᱚ ᱜᱤᱫᱽᱨᱟᱹ ᱟᱥᱲᱟ ᱠᱤᱱ ᱥᱮᱱ ᱟᱠᱟᱱ ᱚᱠᱛᱚ ᱨᱮ ᱵᱮᱜᱽ ᱨᱮ ᱛᱤᱱᱟᱹᱝ ᱜᱟᱱ ᱞᱩᱜᱽᱲᱤ ᱪᱚᱭ ᱥᱟᱸᱵᱟᱣ ᱠᱮᱫᱛᱮ ᱚᱲᱟᱜ ᱜᱟᱱᱟᱰᱮᱭ ᱛᱟᱞᱚᱢ ᱯᱟᱨᱚᱢ ᱦᱩᱭ ᱟᱠᱟᱫ-ᱟ ᱟᱨ ᱛᱤᱥ ᱦᱚᱸ ᱵᱟᱝ ᱨᱩᱣᱟᱹᱲ ᱩᱭᱦᱟᱹᱨ ᱠᱟᱛᱮ ᱾ ᱤᱱᱟᱹ ᱚᱠᱛᱚ ᱨᱮ ᱦᱟᱱᱦᱟᱨ ᱟᱭᱳ ᱦᱚᱦᱚ ᱛᱮᱭ ᱦᱤᱡᱩᱜ ᱠᱟᱱᱟ, ‘ᱵᱟᱹᱦᱩ~ ᱮ ᱵᱟᱹᱦᱩ, ᱦᱚᱯᱚᱱᱤᱧ ᱮ ᱦᱮᱡ ᱞᱮᱱᱠᱷᱟᱱ …,’ ᱴᱟᱴᱠᱟ ᱜᱮᱭ ᱧᱮᱞᱮᱭᱟ ᱵᱮᱜᱽ ᱥᱟᱵ ᱠᱟᱛᱮ ᱚᱠᱟᱛᱮ ᱪᱚᱭ ᱥᱮᱱᱚᱜ ᱠᱟᱱᱟ ᱾ ᱵᱩᱡᱷᱟᱹᱣ ᱞᱟᱹᱜᱤᱫ ᱵᱟᱹᱲᱛᱤ ᱚᱠᱛᱚ ᱵᱟᱝ ᱞᱟᱜᱟᱣ ᱟᱫᱮᱭᱟ, ᱫᱩ ᱨᱮᱦᱚᱸ ᱱᱩᱭ ᱫᱚᱭ ᱧᱤᱨ ᱠᱟᱱ ᱜᱮᱭᱟ ᱾ ᱟᱫᱚ ᱱᱮᱢᱚᱥ ᱟᱲᱟᱝ ᱛᱮᱭ ᱠᱩᱞᱤ ᱠᱮᱫᱮᱭᱟ, ‘ᱚᱠᱟᱛᱮ ᱵᱟᱹᱦᱩ?’ ᱠᱷᱟᱹᱞᱤ ᱛᱮᱦᱚᱸ ᱞᱟᱸᱫᱟ ᱫᱷᱟᱨᱟ ᱠᱟᱛᱮᱭ ᱢᱮᱱ ᱜᱚᱫ ᱟᱫᱮᱭᱟ, ‘ᱚᱦᱚ ! ᱢᱟᱢᱚ ᱚᱲᱟᱜ ᱯᱟᱞᱮ ᱯᱮ ᱥᱮᱱᱚᱜ ᱠᱟᱱᱟ ᱾ ᱞᱟᱹᱭ ᱦᱚᱸ ᱵᱟᱯᱮ ᱞᱟᱹᱭ ᱟᱹᱧ ᱠᱟᱱ ᱫᱚ ᱵᱟᱹᱦᱩ, ᱜᱚᱲᱚᱢᱤᱧ ᱛᱤᱠᱤᱱ ᱫᱚ ᱟᱥᱲᱟ ᱠᱷᱚᱱ ᱠᱤᱱ ᱦᱮᱡ ᱮᱱᱟ ᱟᱨ ᱦᱚᱯᱚᱱᱤᱧ ᱫᱚ ?’

ᱥᱩᱜᱤ ᱫᱚ ᱦᱤᱰᱤᱨ ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱠᱟᱱ ᱛᱩᱞᱩᱡ ᱮ ᱛᱤᱸᱜᱩ ᱛᱷᱤᱨ ᱟᱠᱟᱱᱟ ᱾ ᱦᱟᱱᱦᱟᱨ ᱟᱭᱳ ᱥᱮᱫ ᱦᱚᱸ ᱵᱟᱭ ᱠᱚᱭᱚᱜᱮᱫᱼᱟ ᱥᱮ ᱢᱮᱱ ᱦᱚᱸ ᱪᱮᱫ ᱦᱚᱸ ᱵᱟᱭ ᱢᱮᱱᱮᱫᱼᱟ ᱾ ᱵᱟᱹᱦᱩ, ᱛᱷᱤᱨ ᱮᱱ ᱫᱚᱢ ᱪᱮᱫ ᱪᱤᱠᱟᱹᱭᱮᱱᱟ ? ᱢᱮᱱ ᱥᱟᱶᱛᱮ ᱛᱤ ᱨᱮᱭ ᱥᱟᱵ ᱜᱚᱫ ᱠᱮᱫᱮᱭᱟ ᱾ ᱥᱩᱜᱤ ᱫᱚ ᱟᱹᱲᱤᱥ ᱥᱟᱛᱞᱟᱜ ᱟᱡ ᱦᱟᱱᱦᱟᱨ ᱟᱭᱳᱣᱟᱜ ᱛᱤ ᱤᱨᱪᱤ ᱜᱤᱰᱤ ᱠᱟᱛᱮ ᱨᱟᱜ ᱟᱲᱟᱝ ᱛᱮᱭ ᱢᱮᱛᱟ ᱫᱮᱭᱟ– ‘ᱵᱟᱝ ᱵᱟᱰᱟᱭᱤᱡ ᱞᱮᱠᱟᱢ ᱛᱮᱛᱷᱟᱜ ᱠᱟᱱᱟ ᱭᱳ, ᱛᱤᱱᱟᱹᱜ ᱫᱤᱱ ᱫᱚ ᱱᱚᱝᱠᱟ ᱮᱠᱞᱟ ᱡᱤᱭᱚᱱ ᱤᱧ ᱛᱟᱦᱮᱸᱱᱟ ᱾ ᱦᱚᱯᱚᱱ ᱢᱮ ᱢᱟ ᱚᱲᱟᱜ ᱨᱮᱜᱮ ᱵᱟᱭ ᱛᱟᱦᱮᱸᱱ ᱠᱟᱱᱟ ᱰᱤᱸᱜᱤ ᱰᱟᱺᱜᱽᱣᱟᱹ ᱦᱚᱲ ᱞᱮᱠᱟ ᱫᱤᱱ ᱦᱟᱴ, ᱡᱟᱛᱨᱟ, ᱯᱟᱛᱟ, ᱵᱟᱥᱟ ᱠᱟᱹᱢᱤ ᱾ ᱵᱩᱞᱹ ᱛᱚᱣᱮᱞ, ᱦᱟᱹᱱᱤ ᱱᱷᱟᱹᱭ ᱠᱩᱲᱤ ᱥᱟᱶ ᱫᱟᱬᱟᱱ ᱾ ᱚᱲᱟᱜ ᱫᱷᱟᱹᱵᱤᱡ ᱮ ᱥᱮᱴᱮᱨ ᱮᱫ ᱠᱚᱣᱟ ᱾ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱨᱮᱱᱟᱜ ᱪᱤᱱᱛᱟᱹ ᱵᱟᱹᱱᱩᱜ ᱟᱱ ᱛᱟᱭᱟ ᱾ ᱴᱩᱣᱟᱹᱨ ᱜᱤᱫᱽᱨᱟᱹ ᱞᱮᱠᱟ ᱢᱤᱫ ᱧᱤᱫᱟᱹ ᱟᱯᱟᱛ ᱵᱮᱜᱚᱨ ᱞᱩᱴᱩᱜ ᱞᱩᱴᱩᱜ ᱠᱤᱱ ᱡᱟᱹᱯᱤᱫ ᱡᱚᱝ ᱠᱟᱱᱟ ᱾ ᱤᱧ ᱫᱚ ᱱᱚᱶᱟ ᱠᱚ ᱵᱟᱹᱧ ᱧᱮᱞ ᱥᱟᱦᱟᱣ ᱫᱟᱲᱮᱭᱟᱜ ᱠᱟᱱᱟ ᱭᱳ, ᱚᱱᱟᱛᱮᱧ ᱚᱰᱚᱠ ᱥᱮᱱᱚᱜ ᱠᱟᱱᱟ ᱾’

ᱟᱨ ᱟᱢᱮᱢ ᱥᱮᱱ ᱞᱮᱱ ᱠᱷᱟᱱ ᱯᱩᱨᱟᱹ ᱟᱭᱳ ᱵᱟᱵᱟ ᱛᱮ ᱠᱤᱱ ᱴᱩᱣᱟᱹᱨᱚᱜᱼᱟ ᱾ ᱟᱫᱚ ᱟᱭᱳ ᱵᱟᱵᱟ ᱵᱮᱜᱚᱨ ᱢᱤᱫ ᱧᱤᱫᱟᱹ ᱞᱩᱴᱩᱜ ᱞᱩᱴᱩᱜ ᱵᱟᱹᱠᱤᱱ ᱡᱟᱹᱯᱤᱫᱟ ᱵᱟᱹᱦᱩ, ᱤᱧ ᱢᱮᱱᱟᱹᱧ ᱫᱚ ᱾ ᱥᱮᱱᱚᱜ ᱢᱮ ᱫᱩ, ᱞᱚᱜᱚᱱ ᱥᱮᱱᱚᱜ ᱢᱮ ᱾ ᱢᱮᱱ ᱠᱟᱛᱮ ᱚᱛᱨᱮ ᱫᱚᱦᱚ ᱞᱮᱱ ᱵᱮᱜᱽ ᱛᱤ ᱨᱮᱭ ᱥᱟᱵ ᱟᱭᱟ ᱾ ᱫᱩ, ᱫᱩ ᱥᱮᱱᱚᱜ ᱢᱮ ᱾ ᱥᱩᱜᱤ ᱪᱮᱫ ᱦᱚᱸ ᱵᱟᱝ ᱢᱮᱱ ᱠᱟᱛᱮ ᱢᱮᱫ ᱫᱟᱜ ᱡᱚᱫ ᱟᱛᱮ, ᱢᱤᱫ ᱢᱚᱦᱰᱟ ᱴᱟᱹᱴᱤ ᱫᱩᱣᱟᱹᱨ ᱮ ᱥᱮᱴᱮᱨ ᱠᱮᱫᱼᱟ ᱾ ᱤᱠᱷᱟᱹᱱ ᱯᱟᱹᱪᱷᱞᱟᱹ ᱠᱷᱚᱱ ᱨᱚᱲ ᱮ ᱟᱸᱡᱚᱢ ᱠᱮᱫᱼᱟ, ᱤᱠᱷᱟᱹᱱ, ᱚᱠᱟᱨᱮᱢ ᱥᱮᱱᱚᱜ ᱠᱟᱱᱟ ᱵᱟᱹᱦᱩ, ᱟᱢ ᱟᱭᱳ ᱵᱟᱵᱟ ᱚᱲᱟᱜ ᱾ ᱚᱱᱟ ᱟᱭᱳ ᱵᱟᱵᱟ ᱚᱲᱟᱜ ᱡᱟᱦᱟᱸᱨᱮ ᱟᱭᱳ ᱵᱟᱵᱟ ᱠᱤᱱ ᱜᱚᱡ ᱢᱩᱪᱟᱹᱫ ᱟᱠᱟᱱᱟ ? ᱫᱟᱫᱟ ᱦᱤᱞᱤ ᱫᱚ ᱛᱤᱱᱟᱹᱜ ᱫᱤᱱ ᱠᱚ ᱥᱤᱵᱤᱞ ᱟᱢᱟ ? ᱵᱟᱢ ᱨᱩᱣᱟᱹᱲ ᱛᱮ ᱱᱚᱶᱟ ᱚᱲᱟᱜ ? ᱡᱩᱫᱤᱢ ᱨᱩᱣᱟᱹᱲᱟ, ᱥᱮᱱᱚᱜ ᱠᱟᱱᱟᱢ ᱪᱮᱫᱟᱜ ? ᱡᱟᱦᱟᱸ ᱛᱷᱩ ᱟᱢᱮᱢ ᱡᱟᱞ ᱨᱩᱣᱟᱹᱲᱟ, ᱚᱱᱟ ᱛᱷᱩ ᱫᱚ ᱟᱢ ᱛᱷᱩ ᱜᱮ ᱪᱮᱫᱟᱜ ᱮᱢ ᱛᱷᱩᱭᱟ !! ᱦᱟᱱᱦᱟᱨ ᱟᱭᱳ ᱥᱮᱫ ᱮ ᱫᱮᱭᱟ ᱟᱠᱟᱫ ᱥᱩᱜᱤ, ᱛᱮᱣᱮᱧ ᱟᱠᱟᱫ ᱵᱮᱜᱽ ᱜᱤᱰᱤ ᱠᱟᱛᱮ ᱴᱟᱠ ᱞᱮᱠᱟᱭ ᱛᱤᱸᱜᱩ ᱛᱷᱤᱨ ᱮᱱᱟ ᱾ ᱦᱟᱱᱦᱟᱨ ᱟᱭᱳ ᱥᱮᱱ ᱠᱟᱛᱮ ᱵᱮᱜᱽ ᱮ ᱥᱟᱵ ᱠᱮᱫ ᱛᱟᱭ ᱛᱮ ᱡᱚᱡᱚᱢ ᱛᱤᱨᱮ ᱥᱟᱵ ᱠᱟᱛᱮᱭ ᱜᱚᱦᱚᱲ ᱟᱹᱜᱩ ᱠᱮᱫᱮ ᱛᱮ ᱢᱮᱞᱟ ᱯᱟᱨᱠᱚᱢ ᱨᱮᱭ ᱫᱩᱲᱩᱵ ᱚᱪᱚ ᱠᱮᱫᱮᱭᱟ ᱾ ᱟᱨ ᱟᱡ ᱦᱚᱸ ᱩᱱᱤ ᱥᱩᱨ ᱨᱮ ᱫᱩᱲᱩᱵ ᱠᱟᱛᱮ ᱟᱹᱰᱤ ᱱᱮᱢᱚᱥ ᱟᱲᱟᱝ ᱛᱮᱭ ᱢᱮᱛᱟᱭᱟ, ᱧᱮᱞ ᱢᱮ ᱵᱟᱹᱦᱩ, ᱵᱟᱨ ᱥᱮᱨᱢᱟ ᱦᱩᱭᱩᱜ ᱠᱟᱱᱟ ᱟᱢ ᱵᱟᱵᱟᱭ ᱜᱚᱡ ᱵᱟᱹᱜᱤᱭᱟᱫ ᱵᱚᱱᱟ, ᱵᱟᱞᱟᱧ ᱛᱤᱠᱤᱱ ᱥᱮ ᱟᱢ ᱟᱭᱳ ᱵᱟᱵᱟ ᱛᱤᱠᱤᱱ ᱢᱤᱫ ᱦᱚᱲ ᱛᱟᱭᱚᱢ ᱢᱤᱫ ᱦᱚᱲ ᱠᱤᱱ ᱫᱟᱱᱟᱝ ᱥᱟᱹᱨᱤ ᱮᱱᱟ ᱾ ᱱᱤᱛᱚᱜ ᱤᱧᱟᱜ ᱚᱠᱛᱚ ᱦᱚᱸ ᱥᱮᱴᱮᱨ ᱦᱩᱭ ᱟᱠᱟᱱᱟ, ᱚᱠᱟ ᱵᱮᱲᱟᱨᱮ ᱦᱚᱦᱚ ᱥᱮᱴᱮᱨᱚᱜᱼᱟ ᱴᱷᱤᱠᱟᱹᱬ ᱵᱟᱹᱱᱩᱜᱼᱟ ᱾ ᱱᱚᱝᱠᱟᱱ ᱵᱮᱲᱟᱨᱮ ᱱᱚᱶᱟ ᱚᱲᱟᱜ ᱫᱩᱣᱟᱹᱨ, ᱦᱟᱥᱟ ᱥᱚᱢᱯᱚᱛᱤ ᱟᱢᱟᱜ ᱵᱷᱚᱨᱚᱥᱟ ᱨᱮᱜᱤᱧ ᱟᱞᱟᱭ ᱟᱠᱟᱫᱼᱟ ᱾ ᱵᱟᱵᱟᱨᱮᱭᱟ ᱜᱤᱫᱽᱨᱟᱹ ᱛᱟᱢ ᱱᱚᱜᱼᱚᱭ ᱠᱤᱱ ᱦᱟᱨᱟ ᱨᱟᱠᱟᱵ ᱮᱱ ᱜᱮᱭᱟ ᱾ ᱦᱚᱯᱚᱱᱤᱧ ᱜᱮᱥᱮ ᱜᱤᱫᱽᱨᱟᱹ ᱵᱟᱹᱜᱤ ᱠᱟᱛᱮᱭ ᱫᱟᱬᱟ ᱡᱚᱝ ᱠᱟᱱᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱟᱫᱷᱟ ᱴᱩᱣᱟᱹᱨ ᱞᱮᱠᱟ ᱱᱩᱠᱤᱱᱟᱜ ᱜᱤᱫᱽᱨᱟᱹ ᱡᱤᱭᱚᱱ ᱠᱤᱱ ᱠᱷᱮᱢᱟᱣ ᱮᱫᱼᱟ ᱾ ᱟᱨ ᱟᱢ ᱦᱚᱸ ᱦᱚᱯᱚᱱᱤᱧ ᱟᱜ ᱦᱚᱨ ᱜᱮ ᱡᱩᱫᱤᱢ ᱯᱟᱸᱡᱟᱭᱟ, ᱱᱩᱠᱤᱱ ᱜᱤᱫᱽᱨᱟᱹ ᱢᱟ ᱟᱭᱳ ᱵᱟᱵᱟ ᱛᱟᱦᱮᱸᱱ ᱛᱩᱞᱩᱡ ᱠᱤᱱ ᱴᱩᱣᱟᱹᱨ ᱥᱟᱹᱨᱤᱜᱼᱟ ᱾ ᱟᱢᱮᱢ ᱥᱮᱱ ᱞᱮᱱ ᱠᱷᱟᱱ ᱚᱠᱚᱭ ᱮ ᱧᱮᱞ ᱠᱤᱱᱟ ᱱᱩᱠᱤᱱ ᱫᱚ ᱢᱤᱫ ᱫᱤᱱ ᱜᱟᱱ ᱛᱮᱢ ᱩᱭᱦᱟᱹᱨ ᱟᱠᱟᱫᱼᱟ ? ᱢᱤᱫᱴᱟᱹᱝ ᱠᱩᱲᱤ ᱦᱚᱯᱚᱱ ᱢᱤᱫ ᱫᱷᱟᱣ ᱡᱟᱶᱟᱭ ᱚᱲᱟᱜ ᱮ ᱵᱤᱫᱟᱹᱭ ᱮᱱ ᱛᱟᱭᱚᱢ ᱡᱟᱱᱟᱢ ᱟᱭᱳ ᱵᱟᱵᱟ ᱚᱲᱟᱜ ᱨᱮᱫᱚ ᱥᱩᱢᱩᱝ ᱢᱤᱫ ᱯᱮᱲᱟ ᱠᱟᱱᱟᱭ ᱾ ᱡᱟᱦᱟᱸ ᱛᱤᱥᱨᱮ ᱯᱮᱲᱟ ᱞᱮᱠᱟᱢ ᱥᱮᱱᱚᱜᱼᱟ ᱱᱟᱯᱟᱭ ᱠᱟᱛᱷᱟ ᱜᱮ ᱾ ᱤᱠᱷᱟᱹᱱ ᱥᱮᱱ ᱥᱟᱹᱨᱤᱜ ᱟᱢ, ᱟᱢ ᱠᱷᱟᱹᱛᱤᱨ ᱛᱮ ᱛᱤᱱᱟᱹᱝ ᱦᱚᱲ ᱠᱚ ᱦᱟᱨᱠᱮᱛᱚᱜᱼᱟ ᱩᱭᱦᱟᱹᱨ ᱟᱠᱟᱫ ᱟᱢ ᱛᱚ! ᱡᱚᱛᱚ ᱚᱲᱟᱜ ᱨᱮᱜᱮ ᱡᱟᱦᱟᱸᱱᱟᱜ ᱵᱟᱝ ᱡᱟᱦᱟᱸᱱᱟᱜ ᱮᱴᱠᱮᱴᱚᱬᱮ ᱛᱟᱦᱮᱸᱱᱟ ᱾ ᱟᱢ ᱱᱚᱰᱮᱱᱟᱜ ᱡᱷᱟᱢᱮᱞᱟ ᱤᱫᱤ ᱠᱟᱛᱮᱢ ᱥᱮᱱᱚᱜᱼᱟ ᱾ ᱟᱢ ᱫᱟᱫᱟ ᱟᱜ ᱦᱚᱸ ᱛᱚ ᱟᱡᱟᱜ ᱜᱷᱟᱨᱚᱸᱡᱽ ᱢᱮᱱᱟᱜᱼᱟ ᱾ ᱩᱱᱤ ᱫᱚ ᱟᱡᱟᱜ ᱜᱷᱟᱨᱚᱸᱡᱽ ᱮ ᱧᱮᱞᱟ ᱥᱮ ᱟᱢᱟᱜ ᱫᱩᱠ ᱥᱩᱠ ᱮ ᱵᱩᱡᱷᱟᱹᱣᱟ ᱾ ᱟᱢ ᱠᱷᱟᱹᱛᱤᱨ ᱛᱮ ᱚᱸᱰᱮ ᱮᱯᱮᱨᱦᱮᱸᱰᱮ ᱥᱤᱨᱡᱟᱹᱣᱚᱜᱼᱟ, ᱚᱱᱟ ᱠᱚ ᱧᱮᱞ ᱠᱟᱛᱮ ᱪᱮᱫ ᱚᱸᱰᱮ ᱥᱩᱠ ᱨᱮᱢ ᱛᱟᱦᱮᱸ ᱫᱟᱲᱮᱭᱟᱜᱼᱟ ? ᱚᱸᱰᱮ ᱠᱷᱚᱱ ᱥᱟᱦᱟ ᱠᱟᱛᱮ ᱟᱨ ᱦᱚᱸ ᱚᱠᱟᱨᱮ ᱫᱚ ᱥᱩᱠ ᱮᱢ ᱛᱚᱞᱟᱥᱟ ? ᱱᱚᱶᱟ ᱫᱷᱟᱹᱨᱛᱤ ᱨᱮ ᱚᱠᱟᱨᱮ ᱦᱚᱸ ᱥᱩᱠ ᱫᱚ ᱵᱟᱹᱱᱩᱜ ᱟᱱᱟ ᱾ ᱥᱩᱠ ᱫᱚ ᱟᱯᱚᱱ ᱛᱮ ᱵᱮᱱᱟᱣ ᱦᱩᱭᱩᱜᱼᱟ ᱟᱨ ᱢᱤᱫ ᱠᱩᱲᱤ ᱦᱚᱯᱚᱱ ᱞᱟᱹᱜᱤᱫ ᱚᱱᱟ ᱴᱷᱟᱶ ᱫᱚ ᱡᱟᱶᱟᱭ ᱚᱲᱟᱜ ᱜᱮ ᱾ ᱠᱩᱲᱤ ᱦᱚᱯᱚᱱ ᱴᱷᱮᱱ ᱩᱱᱟᱹᱝ ᱫᱟᱲᱮ ᱛᱟᱦᱮᱸᱱᱟ, ᱦᱩᱫᱽ ᱦᱩᱫᱽ ᱡᱩᱞᱩᱜ ᱥᱮᱸᱜᱮᱞ ᱠᱷᱚᱱ ᱟᱸᱜᱽᱨᱟ ᱚᱨᱞᱚᱜ ᱛᱩᱫ ᱠᱟᱛᱮ ᱦᱤᱨᱟᱹ ᱞᱮᱠᱟ ᱵᱚᱱ ᱡᱷᱟᱞᱠᱟᱣ ᱚᱪᱚ ᱫᱟᱲᱮᱭᱟᱜᱼᱟ ᱾ ᱡᱟᱦᱟᱸᱭ ᱡᱩᱞᱩᱜ ᱥᱮᱸᱜᱮᱞ ᱠᱷᱚᱱ ᱦᱩᱨᱩᱢ ᱟᱸᱜᱽᱨᱟ ᱚᱨᱞᱚᱜ ᱛᱩᱫ ᱠᱟᱛᱮ ᱦᱤᱨᱟᱹ ᱨᱮᱭ ᱟᱹᱨᱩᱯᱷᱮᱨᱟᱣᱟ, ᱩᱱᱤ ᱜᱮ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱤᱭᱚᱱ ᱮ ᱡᱤᱛᱠᱟᱹᱨ ᱠᱮᱫᱼᱟ ᱢᱮᱱᱛᱮᱭ ᱵᱤᱠᱱᱟᱹᱣᱜᱼᱟ ᱾ ᱠᱩᱲᱤ ᱦᱚᱯᱚᱱᱟᱜ ᱡᱤᱭᱚᱱ ᱦᱚᱸ ᱚᱱᱠᱟ ᱜᱮ ᱾ ᱯᱟᱹᱣᱲᱤ ᱞᱟᱦᱟᱭ ᱯᱤᱪᱷᱤ ᱵᱤᱱᱤᱰ ᱮᱢ ᱦᱩᱭᱩᱜ ᱛᱟᱭᱟ ᱠᱩᱲᱤ ᱦᱚᱯᱚᱱ ᱾ ᱢᱮᱫ ᱫᱟᱜ ᱡᱚᱨᱚᱜ ᱨᱮᱦᱚᱸ ᱞᱟᱸᱫᱟ ᱦᱩᱭ ᱟᱭᱟ, ᱦᱚᱨ ᱨᱮ ᱠᱷᱚᱪᱟ ᱰᱷᱚᱰᱟ ᱨᱮᱦᱚᱸ ᱛᱟᱲᱟᱢ ᱦᱩᱭ ᱟᱭᱟ, ᱢᱟᱬᱟᱝ ᱞᱟᱦᱟᱜ ᱦᱩᱭ ᱟᱭᱟ ᱾ ᱢᱤᱫ ᱠᱩᱲᱤ ᱦᱚᱯᱚᱱ ᱢᱤᱫ ᱫᱷᱟᱣ ᱮᱸᱜᱟᱛ ᱮ ᱵᱮᱱᱟᱣ ᱮᱱ ᱛ ᱟᱭᱚᱢ, ᱵᱟᱝ ᱫᱚ ᱩᱱᱤ ᱚᱠᱚᱭᱤᱡ ᱦᱚᱯᱚᱱ ᱮᱨᱟ ᱠᱟᱱᱟᱭ, ᱟᱨ ᱵᱟᱝ ᱫᱚᱭ ᱢᱤᱥᱨᱟ ᱠᱟᱱᱟ, ᱵᱟᱝ ᱫᱚ ᱠᱤᱢᱤᱱ ᱵᱟᱝ ᱫᱚ ᱚᱠᱚᱭᱤᱡ ᱮᱨᱟ !!

ᱩᱱᱤ ᱫᱚ ᱥᱩᱢᱩᱝ ᱮᱸᱜᱟᱛ ᱵᱮᱱᱟᱣ ᱠᱟᱛᱮᱭ ᱛᱟᱦᱮᱸ ᱫᱚᱦᱚᱜᱼᱟ ᱾ ᱢᱤᱫ ᱮᱸᱜᱟᱛ ᱥᱟᱢᱟᱝ ᱨᱮᱫᱚ ᱡᱚᱛᱚ ᱞᱮᱠᱟᱱ ᱥᱟᱹᱜᱟᱹᱭ ᱯᱮᱸᱰᱚᱜ ᱜᱮᱭᱟ ᱾ ᱡᱚᱛᱚ ᱠᱩᱲᱤ ᱦᱚᱯᱚᱱ ᱜᱮ ᱮᱨᱟ ᱨᱩᱯ ᱨᱮ, ᱮᱸᱜᱟᱛ ᱨᱩᱯ ᱨᱮ ᱵᱤᱱᱤᱰ ᱮᱢ ᱦᱩᱭ ᱟᱠᱚ ᱜᱮᱭᱟ ᱾ ᱟᱨ ᱱᱚᱶᱟ ᱫᱚ ᱟᱢᱟᱜ ᱦᱚᱸ ᱚᱱᱟ ᱵᱤᱱᱤᱰ ᱢᱮᱱᱛᱮ ᱜᱮ ᱢᱚᱱᱮ ᱢᱮ ᱾ ᱥᱩᱠ ᱦᱚᱸ ᱦᱤᱡᱩᱜᱼᱟ ᱵᱟᱹᱦᱩ, ᱚᱱᱟ ᱞᱟᱹᱜᱤᱫ ᱛᱮ ᱛᱮᱦᱮᱧᱟᱜ ᱱᱚᱶᱟ ᱵᱤᱱᱤᱰ ᱨᱮ ᱯᱟᱨᱚᱢᱚᱜ ᱦᱩᱭ ᱟᱢᱟ ᱾ ᱥᱩᱜᱤ ᱯᱷᱮᱸᱠᱮᱨ ᱯᱷᱮᱸᱠᱮᱨ ᱨᱟᱜ ᱠᱟᱛᱮ ᱟᱡ ᱦᱟᱱᱦᱟᱨ ᱟᱭᱳᱣᱟᱜ ᱛᱤ ᱥᱟᱵ ᱠᱟᱛᱮᱭ ᱢᱮᱛᱟ ᱫᱮᱭᱟ, ᱤᱠᱟᱹ ᱠᱟᱹᱧ ᱢᱮᱭᱳ, ᱛᱮᱦᱮᱧ ᱤᱧᱟᱜ ᱢᱚᱱᱮᱢ ᱪᱮᱸᱜᱷᱟ ᱠᱮᱫᱼᱟ ᱾ ᱮᱠᱞᱟ ᱡᱤᱭᱚᱱ ᱫᱩᱠ ᱛᱮ ᱛᱚᱯᱟ ᱠᱟᱛᱮ ᱢᱤᱫ ᱰᱚᱸᱰᱮᱠ ᱞᱟᱹᱜᱤᱫ ᱤᱧ ᱦᱤᱲᱤᱧ ᱥᱟᱹᱨᱤ ᱞᱮᱫᱼᱟ, ᱤᱧ ᱵᱮᱜᱚᱨ ᱤᱧ ᱨᱤᱱ ᱜᱤᱫᱽᱨᱟᱹ ᱪᱮᱫ ᱞᱮᱠᱟ ᱠᱤᱱ ᱛᱟᱦᱮᱸᱱᱟ, ᱦᱟᱱᱦᱟᱨ ᱟᱭᱳ ᱨᱩᱯ ᱨᱮ ᱡᱟᱱᱟᱢ ᱟᱭᱳ ᱞᱮᱠᱟᱱ ᱩᱢᱩᱞ ᱵᱟᱹᱜᱤ ᱠᱟᱛᱮ ᱚᱠᱟᱨᱮ ᱫᱚ ᱥᱩᱠ ᱤᱧ ᱛᱚᱞᱟᱥ ᱠᱮᱭᱟ ᱾ ᱢᱮᱱ ᱠᱟᱛᱮ ᱢᱮᱫ ᱫᱟᱜ ᱮ ᱡᱚᱫ ᱥᱟᱯᱷᱟ ᱵᱟᱲᱟᱜ ᱛᱮᱜᱮ, ᱡᱷᱟᱹᱱᱴᱤ ᱫᱩᱣᱟᱹᱨ ᱠᱷᱚᱱ ᱜᱤᱫᱽᱨᱟᱹ ᱟᱜ ᱟᱲᱟᱝ ᱮ ᱟᱸᱡᱚᱢᱟ, ᱭᱳ, ᱭᱳ ᱟᱥᱲᱟ ᱴᱷᱩᱴᱤ ᱮᱱᱟ ᱾ ᱥᱩᱜᱤ ᱵᱮᱨᱮᱫ ᱠᱟᱛᱮᱭ ᱠᱚᱭᱚᱜ ᱞᱮᱫᱼᱟ ᱫᱚ ᱦᱩᱰᱤᱧ ᱦᱚᱯᱚᱱ ᱫᱚ ᱟᱡ ᱵᱟᱵᱟ ᱟᱜ ᱠᱚᱞᱮᱨᱮᱭ ᱦᱮᱸᱭᱚ ᱟᱠᱟᱱᱟ ᱟᱨ ᱢᱟᱨᱟᱝ ᱵᱟᱹᱵᱩ ᱫᱚ ᱥᱩᱛᱩᱜ ᱟᱠᱟᱫᱮ ᱛᱩᱞᱩᱡ ᱚᱲᱟᱜ ᱛᱮᱠᱚ ᱵᱚᱞᱚ ᱦᱤᱡᱩᱜ ᱠᱟᱱᱟ ᱾ ᱥᱩᱜᱤ ᱨᱟᱹᱥᱠᱟᱹ ᱥᱟᱛᱞᱟᱜ ᱢᱮᱫᱨᱮ ᱢᱮᱫ ᱫᱟᱜ ᱟᱱᱛᱮ ᱦᱟᱱᱦᱟᱨ ᱟᱭᱳ ᱥᱮᱫ ᱮ ᱠᱚᱭᱚᱜ ᱠᱮᱫ ᱠᱷᱟᱱ, ᱦᱟᱱᱦᱟᱨ ᱟᱭᱳ ᱫᱚ ᱢᱩᱞᱩᱡ ᱞᱟᱸᱫᱟ ᱠᱟᱛᱮ ᱫᱟᱨᱟᱢ ᱠᱚ ᱨᱮᱱᱟᱜ ᱮᱸᱜᱮᱫ ᱮ ᱮᱢᱟ ᱫᱮᱭᱟ ᱟᱨ ᱥᱩᱜᱤ ᱫᱚ ᱫᱟᱨᱟᱢ ᱟᱹᱜᱩ ᱠᱚ ᱞᱟᱹᱜᱤᱫ ᱢᱮᱞᱟ ᱠᱷᱚᱱ ᱮ ᱫᱟᱹᱲ ᱚᱰᱚᱠ ᱮᱱᱟ ᱾
***