ᱛᱟᱦᱮᱸᱱ ᱠᱷᱟᱱ ᱟᱥᱟ ᱟᱸᱴ ᱠᱟᱹᱢᱤ ᱨᱮ
ᱛᱚᱨᱟᱣᱜ ᱟᱹᱰᱤ ᱟᱞᱜᱟᱛᱮ
ᱟᱸᱴ ᱠᱟᱹᱢᱤ ᱛᱚᱨᱟᱣ ᱞᱮᱱ ᱠᱷᱟᱱ
ᱡᱤᱛᱠᱟᱹᱨᱤᱭᱟᱹᱢ ᱞᱮᱠᱷᱟᱜ ᱫᱷᱟᱹᱨᱛᱤ ᱨᱮ᱾

ᱛᱟᱦᱮᱸᱱ ᱠᱷᱟᱱ ᱟᱥᱟ ᱥᱮᱨᱮᱧ ᱨᱮ
ᱫᱟᱨᱲᱟᱣ ᱛᱩᱫᱩᱜ ᱜᱮᱭᱟ ᱨᱟᱦᱟ
ᱟᱸᱡᱚᱢ ᱛᱮ ᱱᱟᱯᱟᱭ ᱨᱟᱦᱟ ᱟᱲᱟᱝ
ᱟᱯᱱᱟᱨ ᱠᱮᱠᱚᱣᱟᱢ ᱥᱟᱱᱟᱢ ᱦᱚᱲ᱾

ᱛᱟᱦᱮᱸᱱ ᱠᱷᱟᱱ ᱟᱥᱟ ᱞᱟᱦᱟᱱᱛᱤᱜ ᱨᱮ
ᱥᱟᱦᱟᱭ ᱛᱟᱢ ᱦᱤᱸᱥᱟᱹ ᱥᱩᱭᱟᱹ
ᱟᱞᱚᱢ ᱫᱚᱦᱚᱭ ᱛᱟᱢᱟ ᱠᱟᱹᱢᱤ
ᱦᱟᱯᱮ ᱠᱟᱛᱮ ᱵᱟᱥᱟ ᱨᱮ᱾

ᱛᱟᱦᱮᱸᱱ ᱠᱷᱟᱱ ᱟᱥᱟ ᱧᱩᱛᱩᱢᱚᱜ ᱨᱮ
ᱟᱞᱚᱢ ᱛᱟᱦᱮᱸ ᱠᱚᱜ ᱦᱮᱞᱠᱚᱢ ᱨᱮ
ᱪᱷᱩᱴᱟᱹᱣ ᱟᱠᱟ ᱛᱟᱦᱮᱸ ᱠᱚᱜᱼᱢᱮ
ᱥᱟᱶᱛᱟ ᱨᱮᱱᱟᱜ ᱥᱩᱥᱟᱹᱨ ᱠᱟᱹᱢᱤ ᱨᱮ᱾

ᱛᱟᱦᱮᱸᱱ ᱠᱷᱟᱱ ᱟᱥᱟ ᱢᱟᱲᱟᱝᱚᱜ ᱨᱮ
ᱟᱞᱚᱢ ᱛᱟᱦᱮᱸᱱ ᱜᱷᱟᱱᱮ ᱛᱷᱤᱨ ᱨᱮ
ᱫᱟᱹᱲ ᱟᱛᱮ ᱜᱮ ᱞᱟᱦᱟ ᱠᱚᱜᱼᱢᱮ
ᱟᱞᱚᱢ ᱠᱚᱭᱚᱜ ᱨᱩᱣᱟᱹᱲ ᱛᱟᱭᱚᱢ ᱩᱱᱨᱮ᱾