ᱛᱟᱨᱟᱥ ᱓ ᱥᱮᱨᱢᱟᱭ ᱛᱟᱦᱮᱸ ᱠᱟᱱ ᱛᱟᱦᱮᱸᱫ ᱩᱱ ᱚᱠᱛᱚ ᱜᱮ ᱟᱡ ᱵᱟᱵᱟ ᱫᱚ ᱦᱟᱱᱟ ᱯᱩᱨᱤ ᱨᱮ ᱫᱤᱥᱚᱢ ᱡᱚᱝ ᱟᱱᱟᱭ᱾ ᱢᱟᱭᱱᱚ ᱛᱤᱱᱟᱹᱜ ᱫᱩᱠᱼᱦᱟᱨᱠᱮᱛ, ᱠᱚᱥᱴᱚ, ᱥᱟᱦᱟᱣ ᱠᱟᱛᱮ ᱦᱚᱯᱚᱱ ᱮ ᱦᱟᱨᱟᱼᱵᱩᱨᱩ ᱠᱮᱫᱮᱭᱟ ᱾ ᱵᱟᱰᱟᱭ ᱟᱠᱟᱱ ᱠᱟᱛᱷᱟ ᱠᱟᱱ ᱜᱮᱭᱟ, ᱟᱭᱳᱼᱵᱟᱵᱟ ᱛᱟᱞᱟ ᱠᱷᱚᱱ ᱡᱟᱦᱟᱸᱭ ᱜᱮ ᱢᱤᱫ ᱦᱚᱲ ᱵᱟᱝᱠᱤᱱ ᱛᱟᱦᱮᱸ ᱞᱮᱱᱠᱷᱟᱱ ᱡᱤᱭᱚᱱ ᱨᱮ ᱛᱤᱱᱟᱹᱜ ᱟᱱᱟᱴ ᱦᱤᱡᱩᱜᱼᱟ ᱮᱱ ᱦᱚᱸ ᱢᱟᱭᱱᱚ ᱫᱚ ᱡᱟᱦᱟᱸ ᱵᱟᱝ ᱡᱟᱦᱟᱸ ᱞᱮᱠᱟ ᱠᱟᱛᱮ ᱜᱮ, ᱪᱟᱥᱼᱵᱟᱥ ᱠᱟᱹᱢᱤ ᱠᱷᱟᱴᱟᱣ ᱠᱟᱛᱮ ᱢᱟᱨᱟᱝ ᱠᱮᱫᱮ ᱛᱮ ᱚᱞ ᱯᱟᱲᱦᱟᱣ ᱚᱪᱚ ᱠᱮᱫᱮᱭᱟᱭ ᱾ ᱚᱱᱮ ᱠᱚ ᱢᱮᱱᱟᱼ
“ ᱡᱟᱱᱟᱢ ᱟᱭᱳ ᱫᱚᱭ ᱨᱮᱸᱜᱮᱡ ᱨᱮᱦᱚᱸ ᱩᱱᱤ ᱜᱮ ᱦᱟᱜᱼᱨᱟ ᱦᱟᱭ
ᱡᱟᱱᱟᱢ ᱟᱭᱳ ᱫᱚᱭ ᱱᱤᱫᱷᱟᱹᱱ ᱨᱮᱦᱚᱸ ᱩᱱᱤ ᱜᱮ ᱥᱮᱜᱼᱬᱟ ᱦᱟᱭ”᱾

ᱛᱟᱨᱟᱥ ᱦᱚᱸ ᱜᱤᱫᱽᱨᱟᱹ ᱚᱠᱛᱚ ᱠᱷᱚᱱ ᱜᱮ ᱟᱡ ᱟᱭᱳᱣᱟᱜ ᱫᱩᱠᱼᱦᱟᱨᱠᱮᱛ ᱠᱚᱭ ᱟᱹᱭᱠᱟᱹᱣ ᱟᱠᱟᱫ ᱛᱮ ᱢᱚᱱᱮ ᱢᱩᱠᱨᱩᱲ ᱠᱟᱛᱮ ᱯᱟᱲᱦᱟᱣ ᱮᱱᱛᱮ ᱵᱮᱸᱠ ᱨᱮ ᱪᱟᱹᱠᱨᱤᱭ ᱧᱟᱢ ᱠᱮᱫᱟ ᱾ ᱱᱤᱛ ᱫᱚ ᱠᱚᱞᱠᱟᱛᱟ ᱨᱮ ᱢᱮᱱᱟᱭᱟ ᱾
ᱱᱤᱛ ᱫᱚ ᱜᱷᱟᱨᱚᱸᱡᱽ ᱨᱮ ᱥᱩᱠᱷᱟᱹᱞᱤ ᱟᱦᱞᱟ ᱡᱷᱟᱞᱠᱟᱣᱚᱜ ᱠᱟᱱᱟ ᱾ ᱢᱟᱭᱱᱚᱭ ᱩᱭᱦᱟᱹᱨ-ᱟ ᱯᱟᱨᱚᱢ ᱟᱠᱟᱱ ᱫᱤᱱ ᱨᱮᱱᱟᱜ ᱠᱟᱛᱷᱟ ᱠᱚ ᱾ ᱡᱤᱭᱚᱱ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱨᱮ ᱛᱤᱱᱟᱹᱜ ᱡᱟᱸᱜᱮ, ᱛᱤᱱᱟᱹᱜ ᱟᱱᱟᱴ, ᱮᱴᱠᱮᱴᱚᱬᱮ ᱥᱟᱢᱟᱝ ᱦᱩᱭ ᱟᱠᱟᱱᱟ ᱚᱱᱟ ᱫᱚ ᱢᱚᱱ ᱟᱹᱨᱥᱤ ᱨᱮ ᱱᱤᱛ ᱦᱚᱸ ᱡᱷᱟᱞᱠᱟᱣ ᱨᱟᱠᱟᱵ ᱟᱭ ᱜᱮᱭᱟ ᱾ ᱮᱱᱛᱮ ᱨᱮᱦᱚᱸ ᱢᱚᱱᱮ ᱠᱚ ᱜᱚᱴᱟ ᱠᱟᱛᱮ ᱟᱡᱟᱜ ᱠᱟᱹᱢᱤ ᱨᱮ ᱫᱷᱩᱨᱟᱹᱣ ᱮ ᱛᱟᱦᱮᱸ ᱠᱟᱱᱟ ᱾ ᱱᱤᱛᱚᱜ ᱢᱟᱭᱱᱚ ᱜᱚᱲᱚᱢ ᱠᱚᱲᱟ, ᱜᱚᱲᱚᱢ ᱠᱩᱲᱤ ᱜᱤᱫᱽᱨᱟᱹ ᱥᱟᱶ ᱠᱮᱱᱮᱼᱠᱚᱛᱮᱭᱟᱛᱮ ᱥᱟᱨᱮᱡ ᱟᱠᱟᱱ ᱡᱤᱭᱚᱱ ᱠᱷᱟᱸᱰᱟᱣ ᱨᱮᱱᱟᱜ ᱠᱩᱠᱢᱩᱭ ᱧᱮᱞᱟ᱾
ᱼ “ᱟᱭᱳ, ᱛᱤᱱᱟᱹᱜ ᱟᱫᱚ ᱟᱹᱛᱩ ᱨᱮᱜᱮᱢ ᱛᱟᱦᱮᱸᱱᱟ, ᱫᱮᱞᱟ ᱱᱤᱛᱚᱜ ᱫᱚ ᱥᱟᱶᱼᱥᱟᱶ ᱵᱟᱡᱟᱨ ᱨᱮᱞᱟᱝ ᱛᱟᱦᱮᱸᱱᱟ᱾” ᱦᱚᱯᱚᱱ ᱮ ᱢᱮᱱ ᱠᱮᱫᱼᱟ᱾
ᱼ“ᱵᱟᱝᱟ ᱵᱮᱴᱟ, ᱱᱚᱣᱟ ᱚᱲᱟᱜᱼᱫᱩᱣᱟᱹᱨ ᱟᱢ ᱵᱟᱵᱟ ᱥᱟᱶ ᱛᱤᱱᱟᱹᱜ ᱜᱚᱨᱚᱡᱽᱼ ᱫᱩᱞᱟᱹᱲ ᱛᱮᱞᱤᱧ ᱵᱮᱱᱟᱣ ᱟᱠᱟᱫᱟ ᱾ ᱟᱢ ᱵᱟᱵᱟ ᱜᱮᱥᱮᱱ ᱵᱟᱹᱱᱩᱜ ᱮᱭᱟ ᱢᱮᱱᱠᱷᱟᱱ ᱱᱚᱣᱟ ᱚᱲᱟᱜ ᱨᱤᱧ ᱛᱟᱦᱮᱱ ᱠᱟᱱ ᱠᱷᱟᱱ ᱚᱱᱠᱟᱹᱧ ᱟᱹᱭᱠᱟᱹᱣᱟ ᱡᱮᱢᱚᱱ ᱟᱢ ᱵᱟᱵᱟ ᱤᱧ ᱥᱟᱶᱛᱮ ᱜᱮ ᱢᱮᱱᱟᱭ ᱞᱮᱠᱟ᱾ ᱚᱱᱟᱛᱮ ᱤᱧ ᱫᱚ ᱱᱚᱰᱮ ᱜᱤᱧ ᱛᱟᱦᱮᱸᱱᱟ” ᱾
“ᱴᱷᱤᱠ ᱜᱮᱭᱟ ᱭᱳ, ᱟᱢᱟᱜ ᱡᱚᱠᱷᱚᱱ ᱱᱚᱣᱟ ᱜᱮ ᱩᱭᱦᱟᱹᱨ ᱮᱱᱠᱷᱟᱱ ᱵᱟᱹᱧ ᱡᱚᱵᱚᱨ ᱢᱮᱭᱟ, ᱟᱫᱚ ᱡᱟᱦᱟᱸ ᱛᱤᱥ ᱜᱮ ᱦᱤᱡᱩᱜ ᱥᱟᱱᱟᱢᱟ ᱞᱟᱹᱭ ᱟᱹᱧ ᱢᱮ ᱱᱚᱛᱮ ᱠᱷᱚᱱ ᱤᱧ ᱴᱤᱠᱤᱴ ᱟᱢᱟ ᱟᱨ ᱩᱱᱤ ᱞᱚᱠᱷᱚᱱ ᱫᱟᱫᱟᱹᱧ ᱢᱮᱛᱟᱭᱟ ᱡᱤᱞᱤᱧ ᱜᱟᱹᱰᱤ ᱨᱮ ᱫᱮᱡ  ᱚᱴᱚ ᱠᱟᱢᱟᱭ ᱾”
ᱦᱚᱯᱚᱱ ᱟᱨ ᱟᱡ ᱛᱟᱞᱟ ᱨᱮᱭᱟᱜ ᱥᱟᱱᱟᱢ ᱨᱚᱯᱚᱲ ᱠᱟᱛᱷᱟ ᱩᱭᱦᱟᱹᱨ ᱨᱮ ᱩᱱᱩᱢ ᱟᱠᱟᱱ ᱛᱟᱦᱮᱸᱫ ᱢᱟᱭᱱᱚ ᱫᱚ, ᱟᱪᱠᱟ ᱡᱤᱞᱤᱧ ᱜᱟᱹᱰᱤ ᱦᱚᱸ ᱦᱟᱵᱽᱲᱟ ᱴᱮᱥᱚᱱ ᱨᱮ ᱛᱤᱸᱜᱩ ᱜᱚᱫ ᱮᱱᱟ ᱟᱨ ᱢᱟᱭᱱᱚ ᱦᱚᱸ ᱩᱭᱦᱟᱹᱨ ᱵᱮᱸᱜᱮᱫ ᱠᱷᱚᱱ ᱮ ᱮᱵᱷᱮᱱ ᱜᱚᱫ ᱮᱱᱟ ᱾ ᱠᱤᱪᱷᱩ ᱜᱷᱟᱹᱲᱤᱠ ᱯᱚᱨᱮ ᱜᱮ ᱧᱮᱞᱮᱭᱟᱭ ᱫᱚ ᱛᱟᱨᱟᱥ ᱵᱮᱴᱟ ᱟᱡ ᱴᱷᱮᱱ ᱮ ᱥᱮᱴᱮᱨ ᱜᱚᱫ ᱟᱠᱟᱱᱟ ᱾

ᱼᱵᱮᱴᱟ ᱛᱟᱨᱟᱥ, ᱛᱤᱱ ᱨᱮᱢ ᱥᱮᱴᱮᱨ ᱟᱠᱟᱱᱟ?
ᱼᱠᱟᱹᱡ ᱜᱷᱟᱹᱲᱤᱠ ᱦᱩᱭ ᱮᱱᱟ ᱭᱳ ᱾ ᱱᱚᱰᱮ ᱥᱮᱴᱮᱨᱚᱜ ᱨᱮ ᱡᱟᱦᱟᱸᱱᱟᱜ ᱮᱴᱠᱮᱴᱚᱬᱮ ᱢᱟᱛᱚ ᱵᱟᱭ ᱦᱩᱭ ᱞᱮᱱᱟ ?
ᱼᱵᱟᱝᱟ ᱵᱟ, ᱱᱟᱭ ᱱᱟᱯᱟᱭ ᱛᱮᱜᱤᱧ ᱥᱮᱴᱮᱨ ᱮᱱᱟ ᱾
ᱠᱤᱪᱷᱩ ᱜᱷᱟᱹᱲᱤᱠ ᱛᱟᱭᱚᱢ ᱜᱮ ᱨᱮᱞ ᱯᱟᱨᱠᱤᱝ ᱨᱮ ᱟᱡᱟᱜ ᱠᱟᱨ ᱜᱟᱹᱰᱤ ᱛᱤᱸᱜᱩ ᱟᱠᱟᱫ ᱜᱟᱹᱰᱤ ᱨᱮᱠᱤᱱ ᱫᱩᱲᱩᱵ ᱮᱱᱟ ᱾
ᱼᱵᱮᱴᱟ ᱛᱟᱨᱟᱥ, ᱵᱟᱹᱦᱩ ᱫᱚ ᱪᱮᱫ ᱞᱮᱠᱟ ᱢᱮᱱᱟᱭᱟ ᱵᱟ ?
ᱼᱚᱲᱟᱜ ᱮᱢ ᱪᱟᱞᱟᱜ ᱠᱟᱱᱜᱮᱫᱚ, ᱧᱮᱞᱮ ᱢᱮ ᱱᱷᱟᱜ ᱾ ᱢᱩᱞᱩᱡ ᱫᱷᱟᱨᱟ ᱞᱟᱸᱫᱟ ᱧᱚᱜ ᱟᱛᱮ ᱛᱟᱨᱟᱥ ᱮ ᱢᱮᱱ ᱠᱮᱫᱼᱟ ᱾

     “ᱛᱩᱨᱩᱭ ᱪᱟᱸᱫᱚ ᱢᱟᱲᱟᱝ ᱜᱮ ᱛᱟᱨᱟᱥᱟᱜ ᱵᱟᱯᱞᱟ ᱦᱩᱭ ᱟᱠᱟᱱ ᱛᱟᱦᱮᱸᱫ ᱟᱨ ᱚᱱᱟ ᱒ ᱦᱟᱯᱛᱟ ᱛᱟᱭᱚᱢ ᱜᱮ ᱱᱚᱰᱮ ᱠᱤᱱ ᱦᱮᱡ ᱮᱱᱟ ᱾ ᱠᱚᱞᱠᱟᱛᱟ ᱨᱮ ᱵᱟᱱᱟᱦᱚᱲ ᱠᱤᱱ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾ ᱢᱟᱭᱱᱚ ᱦᱚᱸ ᱡᱟᱹᱥᱛᱤ ᱫᱤᱱ ᱵᱟᱹᱦᱩ ᱥᱟᱶ ᱛᱟᱦᱮᱱ ᱨᱮᱱᱟᱜ ᱚᱠᱛᱚ ᱜᱮ ᱵᱟᱭ ᱧᱟᱢ ᱞᱮᱫᱟ ᱢᱮᱱᱠᱷᱟᱱ ᱯᱷᱚᱱ ᱛᱮᱫᱚ ᱛᱟᱞᱟᱼᱢᱟᱞᱟ ᱨᱮᱠᱤᱱ ᱠᱟᱛᱷᱟᱜ ᱜᱮ ᱛᱟᱦᱮᱸᱫ ᱾ “ᱛᱮᱦᱮᱧ ᱫᱚ ᱦᱚᱯᱚᱱᱟᱜ ᱟᱹᱰᱤ ᱛᱮᱫ ᱜᱮ ᱩᱭᱦᱟᱹᱨ ᱦᱮᱡ ᱮᱱᱟ, ᱪᱮᱫᱟᱜ ᱪᱚᱝ ᱧᱮᱞ ᱜᱮ ᱥᱟᱱᱟ ᱠᱤᱫᱤᱧᱟ ᱚᱱᱟᱛᱤᱧ ᱦᱮᱡ ᱮᱱᱟ᱾” ᱱᱚᱣᱟ ᱠᱚ ᱩᱭᱦᱟᱹᱨᱼᱩᱭᱦᱟᱹᱨ ᱛᱮ ᱪᱮᱠᱟᱛᱮ ᱚᱠᱛᱚ ᱯᱚᱞᱚᱢ ᱮᱱᱟ ᱵᱟᱝ ᱴᱷᱤᱠᱟᱹ ᱞᱮᱱᱟ ᱾ ᱩᱭᱦᱟᱹᱨ ᱠᱷᱚᱱ ᱮ ᱮᱵᱷᱮᱱ ᱜᱚᱫ ᱮᱱᱟ ᱡᱚᱠᱷᱚᱱ ᱛᱟᱨᱟᱥ ᱮ ᱢᱮᱛᱟᱫ ᱫᱮᱭᱟ –  “ ᱫᱮᱞᱟ ᱭᱳ, ᱚᱲᱟᱜ ᱞᱟᱝ ᱥᱮᱴᱮᱨ ᱮᱱᱟ ᱾”
ᱼ“ ᱦᱮᱸ! ᱩᱱᱟᱹᱜ ᱞᱚᱜᱚᱱ ᱞᱟᱝ ᱥᱮᱴᱮᱨ ᱜᱚᱫ ᱮᱱᱟ ᱾” ᱢᱟᱭᱱᱚᱭ ᱢᱮᱱ ᱜᱚᱫ ᱠᱮᱫᱟ ᱾
ᱼ“ ᱞᱚᱜᱚᱱ……! ᱠᱟᱹᱡ ᱜᱷᱟᱹᱲᱤᱠ ᱫᱚ ᱦᱩᱭ ᱮᱱ ᱜᱮᱭᱟ ᱢᱟᱱᱮ ᱟᱫᱷᱟ ᱜᱷᱚᱱᱴᱟ᱾” ᱛᱟᱨᱟᱥ ᱮ ᱢᱮᱱ ᱠᱮᱫᱟ ᱾
ᱡᱟᱦᱟᱸ ᱞᱮᱠᱟ ᱚᱲᱟᱜ ᱠᱤᱱ ᱵᱚᱞᱚᱭᱮᱱᱟ ᱚᱱᱠᱟ ᱜᱮ ᱫᱩᱣᱟᱹᱨ ᱨᱮ ᱥᱩᱢᱤᱭ ᱛᱟᱦᱮᱸ ᱠᱟᱱᱟ ᱾ ᱵᱩᱡᱷᱟᱹᱣᱚᱜ ᱠᱟᱱᱟ ᱡᱮ ᱟᱹᱠᱤᱱᱟᱜ ᱠᱚᱭᱚᱜ ᱦᱚᱨ ᱨᱮᱜᱮ ᱛᱟᱦᱮᱸ ᱠᱟᱱᱟᱭ ᱾ ᱢᱩᱞᱩᱡ ᱫᱷᱟᱨᱟ ᱞᱟᱸᱫᱟ ᱧᱚᱜ ᱟᱛᱮ ᱥᱟᱹᱜᱩᱱ ᱫᱟᱨᱟᱢ ᱠᱮᱫ ᱠᱤᱱᱟᱭ – “ ᱫᱮᱞᱟ ᱭᱳ, ᱦᱤᱡᱩᱜ ᱵᱤᱱ ᱾”
ᱢᱟᱭᱱᱚ ᱡᱟᱦᱟᱸ ᱞᱮᱠᱟᱭ ᱵᱚᱞᱚᱭᱮᱱᱟ ᱜᱚᱴᱟ ᱯᱟᱲᱟᱭ ᱠᱚᱭᱚᱜ ᱟᱹᱪᱩᱨ ᱠᱮᱫᱟ, ᱡᱚᱛᱚ ᱡᱤᱱᱤᱥ ᱱᱟᱭᱼᱱᱟᱯᱟᱭ ᱛᱮ ᱴᱷᱟᱹᱣᱠᱟᱹ ᱡᱟᱭᱜᱟ ᱨᱮᱜᱮ ᱫᱚᱦᱚ ᱟᱠᱟᱱ ᱛᱟᱦᱮᱸᱫ, ᱚᱲᱟᱜ ᱠᱚᱦᱚᱸ ᱯᱷᱟᱨᱪᱟᱼᱯᱷᱟᱹᱨᱪᱤ ᱧᱮᱞᱚᱜ ᱠᱟᱱ ᱛᱟᱦᱮᱸᱫ ᱾ ᱟᱫᱚ ᱰᱟᱭᱱᱤᱝ ᱦᱚᱞ ᱨᱮ ᱥᱚᱯᱷᱟ ᱨᱮ ᱫᱩᱲᱩᱵ ᱮᱱᱟᱭ ᱾ ᱵᱟᱹᱦᱩ ᱠᱩᱲᱤ ᱫᱚ ᱯᱮᱨᱮᱡ ᱞᱚᱴᱟ ᱫᱟᱜ ᱟᱹᱜᱩ ᱠᱟᱛᱮ ᱜᱚᱰ ᱡᱚᱦᱟᱨ ᱟᱫᱮᱭᱟᱭ ᱾ ᱢᱟᱭᱱᱚ ᱦᱚᱸ ᱧᱮᱞ ᱛᱮ ᱟᱹᱰᱤᱡ ᱮ ᱠᱩᱥᱤ ᱮᱱᱟ ᱩᱭᱦᱟᱹᱨ ᱠᱮᱫᱼᱟᱭ “ᱵᱟᱡᱟᱨ ᱫᱤᱥᱚᱢ ᱨᱮ ᱢᱮᱱᱟᱭ ᱨᱮᱦᱚᱸ ᱟᱵᱚ ᱥᱟᱶᱛᱟ ᱨᱮᱱᱟᱜ ᱟᱹᱨᱤᱼᱪᱟᱹᱞᱤ , ᱟᱪᱟᱨᱼᱵᱮᱵᱷᱟᱨ ᱠᱚᱫᱚ ᱵᱟᱭ ᱦᱤᱲᱤᱧ ᱟᱠᱟᱫ ᱜᱮᱭᱟ ᱢᱮᱱᱠᱷᱟᱱ ᱩᱱᱤᱭᱟᱜ ᱱᱚᱡᱚᱨ ᱥᱩᱢᱤᱭᱟᱜ ᱛᱤ ᱨᱮ ᱯᱟᱲᱟᱣ ᱜᱚᱫ ᱮᱱᱟ ᱾ ᱥᱩᱢᱤ ᱫᱚ ᱞᱮᱸᱜᱟ ᱛᱤ ᱨᱮ ᱥᱩᱢᱩᱝ ᱢᱮᱲᱦᱮᱫ ᱥᱟᱠᱚᱢ ᱮ ᱦᱚᱨᱚᱜ ᱟᱠᱟᱫ ᱛᱟᱦᱮᱸᱫ ᱾ ᱢᱟᱭᱱᱚ ᱧᱮᱞ ᱛᱮ ᱦᱟᱦᱟᱲᱟ ᱜᱚᱫ ᱮᱱᱟᱭ –“ᱱᱚᱣᱟ ᱫᱚ ᱪᱮᱫ! ᱵᱟᱹᱦᱩ ᱠᱩᱲᱤ ᱦᱩᱭ ᱠᱟᱛᱮ ᱵᱟᱹᱦᱩᱠᱩᱲᱤᱭᱟᱜ ᱥᱟᱡᱽ ᱜᱮ ᱵᱟᱹᱱᱩᱜᱼᱟ ? ᱪᱩᱲᱟᱹ, ᱥᱟᱝᱠᱷᱟᱼᱯᱚᱞᱟ, ᱛᱤ ᱨᱮ ᱪᱩᱲᱤ ᱜᱮ ᱵᱟᱝ……… ᱮᱠᱷᱮᱱ ᱠᱷᱟᱹᱞᱤ ᱛᱤ! ᱵᱟᱡᱟᱨ ᱫᱤᱥᱚᱢ ᱨᱮ ᱛᱟᱦᱮᱸ ᱠᱟᱛᱮ ᱪᱷᱟᱹᱛᱤᱠ ᱞᱮᱠᱟ ᱦᱚᱨᱚᱜᱼᱵᱟᱸᱫᱮ ………ᱹ! ᱴᱷᱤᱠ ᱜᱮᱭᱟ ᱥᱟᱞᱣᱟᱨ ᱥᱩᱴ ᱠᱚ ᱦᱚᱨᱚᱜᱽ ᱢᱮ, ᱠᱚᱲᱟ ᱞᱮᱠᱟ ᱫᱚᱛᱚ ᱯᱮᱸᱴ ᱦᱚᱨᱚᱜᱽ ᱢᱮ ᱢᱱᱮᱠᱷᱟᱱ ᱛᱤ ᱫᱚ ᱪᱮᱫᱟᱜ ᱠᱷᱟᱹᱞᱤ ᱢᱮᱱᱟᱜᱼᱟ ? ᱱᱚᱝᱠᱟ ᱢᱟ ᱡᱟᱦᱟᱸᱭ ᱵᱟᱭ ᱡᱟᱶᱟᱭ ᱠᱚᱜᱼᱟ ᱟᱨᱵᱟᱝ ᱡᱟᱶᱟᱭ ᱠᱟᱛᱮ ᱦᱟᱹᱴᱤᱧ ᱠᱚᱜᱼᱟᱭ ……ᱹ ᱩᱱᱠᱩᱣᱟᱜ ᱱᱚᱣᱟ ᱨᱩᱯ ᱫᱚ ᱾ ᱟᱨ ᱵᱟᱹᱦᱩ ᱢᱟ ………ᱹ! ᱦᱟᱱᱦᱟᱨ ᱟᱭᱳ ᱟᱹᱰᱤ ᱛᱮᱫ ᱜᱮ ᱦᱟᱹᱥᱩ ᱟᱹᱭᱠᱟᱹᱣ ᱠᱮᱫᱼᱟᱭ ᱢᱮᱱᱠᱷᱟᱱ ᱡᱟᱦᱟᱸᱱᱟᱜ ᱵᱟᱭ ᱢᱮᱱ ᱫᱟᱲᱮ ᱭᱟᱫᱮᱭᱟ ᱾

                ᱚᱠᱛᱚ ᱠᱚ ᱯᱟᱨᱚᱢᱮᱱ ᱛᱮ ᱧᱤᱫᱟᱹ ᱠᱤᱫᱩᱵ ᱫᱟᱠᱟ ᱠᱚ ᱡᱚᱢ ᱵᱟᱲᱟ ᱠᱟᱛᱮ ᱡᱚᱛᱚ ᱡᱟᱹᱯᱤᱫ ᱞᱟᱹᱜᱤᱫ ᱜᱤᱛᱤᱡ ᱚᱲᱟᱜ ᱠᱚ ᱪᱟᱞᱟᱣ ᱮᱱᱟ᱾ ᱢᱟᱭᱱᱚᱣᱟᱜ ᱢᱮᱫ ᱨᱮ ᱜᱚᱴᱟ ᱧᱤᱫᱟᱹ ᱡᱟᱹᱯᱤᱫ ᱜᱮ ᱵᱟᱭ ᱦᱮᱡ ᱞᱮᱱᱟ ᱾ ᱜᱷᱟᱱᱮ ᱦᱟᱱᱛᱮ ᱟᱭ ᱱᱷᱟᱛᱮ ᱟᱭ, ᱢᱤᱢᱤᱫᱷᱟᱣ ᱫᱚ ᱢᱚᱱᱮ ᱜᱚᱫᱟᱭ ᱱᱤᱛ ᱜᱮ ᱥᱮᱱ ᱠᱟᱛᱮ ᱵᱟᱹᱦᱩᱧ ᱢᱮᱛᱟᱭᱟ …ᱹᱹ ᱦᱟᱱᱦᱟᱨ ᱟᱭᱳ ᱠᱟᱹᱱᱟᱹᱧ ! ᱤᱱᱟᱹᱜ ᱦᱚᱠ ᱫᱚ ᱢᱮᱱᱟᱜ ᱜᱮᱭᱟ ᱤᱧᱟᱜ ᱾ ᱱᱚᱣᱟ ᱠᱚ ᱩᱭᱦᱟᱹᱨᱼᱩᱭᱦᱟᱹᱨ ᱛᱮ ᱛᱤᱱ ᱨᱮ ᱥᱮᱛᱟᱜ ᱮᱱᱟ ᱵᱟᱝ ᱮ ᱴᱷᱤᱠᱟ ᱞᱮᱫᱼᱟ ᱾
ᱼ“ ᱟᱭᱳ ……ᱹᱹ ᱭᱳ……ᱹᱹ ᱵᱮᱨᱮᱫ ᱵᱤᱱ ᱥᱮᱛᱟᱜ ᱮᱱᱟ ᱾ ᱵᱟᱹᱥᱤᱭᱟᱢ ᱫᱟᱠᱟ ᱡᱚᱢ ᱨᱮᱱᱟᱜ ᱚᱠᱛᱚ ᱠᱚ ᱦᱩᱭ ᱮᱱᱟ ᱾” ᱥᱮᱛᱟᱜ ᱟᱹᱰᱤ ᱜᱷᱟᱹᱲᱤᱠ ᱦᱩᱭ ᱮᱱ ᱨᱮᱦᱚᱸ ᱦᱟᱱᱦᱟᱨ ᱟᱭᱳ ᱵᱟᱭ ᱵᱮᱨᱮᱫ ᱞᱮᱱᱛᱮ ᱥᱩᱢᱤ ᱦᱚᱦᱚ ᱪᱟᱞᱟᱣ ᱮᱱᱟᱭ ᱾
ᱼ“ ᱦᱚᱭ ᱜᱚ ᱵᱟᱹᱦᱩ …… ᱵᱮᱨᱮᱫ ᱠᱟᱹᱱᱟᱹᱧ, ᱪᱮᱠᱟᱛᱮ ᱪᱚᱝ ᱢᱮᱫ ᱩᱱᱟᱹᱜ ᱞᱟᱴᱷᱟ ᱜᱚᱫ ᱮᱱᱟ ᱾” ᱢᱟᱭᱱᱚ ᱵᱟᱹᱭᱼᱵᱟᱹᱭ ᱛᱮ ᱵᱮᱨᱮᱫ ᱛᱩᱞᱩᱡ ᱮ ᱢᱮᱱ ᱠᱮᱫᱟ ᱾
ᱼ“ᱜᱟᱹᱰᱤ ᱨᱮ ᱫᱩᱲᱩᱵᱼᱫᱩᱲᱩᱵ ᱛᱮᱵᱤᱱ ᱞᱟᱸᱜᱟᱭᱮᱱᱟ ᱭᱳ ᱯᱟᱞᱮᱫ ᱚᱱᱟᱛᱮ ᱾ ᱴᱷᱤᱠ ᱜᱮᱭᱟ ᱵᱩᱨᱩᱥ ᱵᱟᱲᱟ ᱠᱟᱛᱮ ᱤᱧ ᱱᱟᱥᱛᱟᱹᱧ ᱟᱹᱜᱩᱣᱟᱵᱤᱱ ᱠᱟᱱᱟ᱾”
ᱼ“ ᱦᱚᱭᱜᱳ, ᱦᱟᱯᱮ ! ᱤᱧ ᱫᱚ ᱟᱹᱛᱩ ᱠᱷᱚᱱ ᱱᱤᱢ ᱫᱟᱹᱛᱟᱹᱱᱤᱧ ᱟᱹᱜᱩ ᱛᱟᱨᱟ ᱟᱠᱟᱫᱼᱟ ᱹᱹᱹᱹᱹᱹ ᱱᱚᱣᱟ ᱵᱩᱨᱩᱥ ᱠᱚᱛᱮ ᱢᱟ ᱠᱟᱹᱡ ᱦᱚᱸ ᱯᱷᱩᱨᱪᱟᱹ ᱵᱟᱹᱧ ᱵᱩᱡᱷᱟᱹᱣᱟ᱾”
ᱼ“ᱢᱟᱥᱮᱹᱹᱹᱹᱹᱫᱟᱹᱛᱟᱹᱱᱤ ᱠᱚ ᱵᱤᱱ ᱯᱮᱴᱮᱡ ᱛᱟᱨᱟ ᱟᱠᱟᱫᱼᱟ ᱾ ᱱᱚᱛᱮ ᱢᱟᱭᱳ ᱵᱟᱭ ᱧᱟᱢᱚᱜ ᱫᱚ ᱾” ᱟᱨ ᱮ ᱚᱰᱚᱠ ᱮᱱᱟ ᱾
ᱧᱮᱞ ᱠᱮᱫᱮᱭᱟᱭ ᱟᱡ ᱵᱮᱨᱮᱫ ᱛᱮᱫᱚ ᱜᱚᱴᱟ ᱚᱲᱟᱜ ᱥᱟᱯᱷᱟᱼᱥᱩᱛᱷᱟᱨᱟᱹ ᱟᱠᱟᱫ ᱛᱟᱦᱮᱸᱫ ᱾ ᱢᱟᱭᱱᱚ ᱦᱚᱸ ᱧᱮᱞ ᱛᱮ ᱟᱹᱰᱤᱡ ᱮ ᱠᱩᱥᱤ ᱮᱱᱟ ᱾ ᱠᱤᱪᱷᱩ ᱜᱷᱟᱹᱲᱤᱠ ᱛᱟᱭᱚᱢ ᱩᱢ ᱵᱟᱲᱟᱭᱮᱱ ᱛᱮ ᱱᱟᱥᱛᱟᱭ ᱟᱹᱜᱩᱣᱟᱫ ᱫᱮᱭᱟ ᱾ ᱱᱟᱥᱛᱟ ᱠᱚ ᱡᱚᱢ ᱵᱟᱲᱟ ᱠᱟᱛᱮ ᱟᱨᱟᱜ ᱪᱟᱭ ᱟᱹᱜᱩᱣᱟᱫᱮᱭᱟᱭ (ᱚᱱᱟ ᱨᱮ ᱟᱫᱟ, ᱜᱩᱴᱤ ᱢᱟᱹᱨᱤᱪ, ᱛᱩᱞᱥᱤ ᱥᱟᱠᱟᱢ ᱢᱮᱥᱟ ᱠᱟᱛᱮ) ᱾ ᱧᱩᱧᱩ ᱛᱩᱞᱩᱡ ᱜᱮ ᱢᱟᱭᱱᱚᱭ ᱢᱮᱱ ᱜᱚᱫ ᱠᱮᱫᱼᱟ – ᱦᱮᱸ ᱜᱳ, ᱪᱮᱠᱟᱛᱮ ᱵᱤᱱ ᱵᱟᱰᱟᱭ ᱠᱮᱫᱼᱟ ᱤᱧ ᱫᱚ ᱥᱮᱛᱟᱜ ᱚᱠᱛᱚ ᱱᱚᱝᱠᱟᱱ ᱪᱟᱭ ᱜᱤᱧ ᱠᱩᱥᱤᱭᱟᱜᱼᱟ᱾
“ᱪᱮᱫᱟᱜ ᱭᱳ, ᱤᱧ ᱟᱹᱵᱤᱱᱤᱡ ᱦᱚᱯᱚᱱ ᱮᱨᱟᱹᱧ ᱵᱟᱝ ᱠᱟᱱ ᱛᱮ ? ᱤᱧ ᱟᱹᱵᱤᱱ ᱦᱚᱯᱚᱱᱮᱨᱟ ᱵᱤᱱ ᱵᱷᱟᱹᱵᱷᱤ ᱤᱧᱟ ᱛᱚ……ᱹᱹ! ᱮᱱᱠᱷᱟᱱ ᱟᱭᱳ ᱪᱮᱫ ᱮ ᱠᱩᱥᱤᱭᱟᱜᱼᱟ ᱪᱮᱫ ᱫᱚ ᱵᱟᱝ ᱱᱚᱣᱟ ᱡᱤᱱᱤᱥ ᱟᱹᱡᱤᱡ ᱦᱚᱯᱚᱱᱮᱨᱟ ᱵᱟᱭ ᱵᱟᱰᱟᱭ ᱠᱷᱟᱱ ᱟᱨ ᱚᱠᱚᱭ ᱮ ᱵᱟᱰᱟᱭ ᱫᱟᱲᱮᱭᱟᱜ ᱭᱳ ᱾” ᱥᱩᱢᱤ ᱱᱟᱥᱮ ᱞᱟᱸᱫᱟ ᱧᱚᱜ ᱟᱛᱮ ᱢᱮᱱ ᱠᱮᱫᱼᱟᱭ ᱾
ᱢᱟᱭᱱᱚ ᱠᱚᱭᱚᱜ ᱨᱚᱸᱜᱮᱭ ᱛᱟᱦᱮᱸᱭᱮᱱᱟ ᱾ ᱟᱡ ᱫᱚᱭ ᱵᱷᱟᱹᱵᱤᱭᱮᱫ ᱜᱮᱭᱟ ᱯᱟᱞᱮᱫ ᱡᱚᱛᱚᱣᱟᱜ ᱛᱟᱨᱟᱥ ᱵᱮᱴᱟ ᱜᱮ ᱞᱟᱹᱭ ᱟᱠᱟᱣᱟᱫᱮᱭᱟᱭ ᱾ ᱢᱮᱱ ᱫᱚ ᱟᱹᱰᱤ ᱛᱮᱫ ᱮ ᱠᱩᱥᱤ ᱮᱱᱟᱭ ᱹᱹᱹᱹᱹᱹ ᱮᱱᱦᱚᱸ ᱚᱱᱟ ᱠᱷᱟᱹᱞᱤ ᱛᱤ ᱫᱚᱦᱚ ᱟᱠᱟᱫ ᱫᱚ ᱚᱱᱟ ᱜᱮ ᱥᱟᱨᱟ ᱜᱷᱟᱱᱮ ᱢᱮᱫ ᱨᱮ ᱪᱩᱵᱟᱹᱜᱚᱜ ᱠᱟᱱ ᱛᱟᱦᱮᱸᱫ ᱾
ᱱᱟᱥᱛᱟ ᱠᱚ ᱡᱚᱢ ᱵᱟᱲᱟ ᱠᱟᱛᱮ ᱵᱟᱱᱟᱨ ᱦᱚᱯᱚᱱ ᱠᱤᱢᱤᱱ ᱥᱟᱯᱲᱟᱣ ᱮᱱ ᱛᱮ ᱚᱯᱷᱤᱥ ᱠᱤᱱ ᱥᱮᱱᱚᱜ ᱠᱟᱱ ᱚᱠᱛᱚ ᱢᱟᱭᱱᱚ ᱢᱮᱱ ᱜᱚᱫ ᱠᱮᱫᱼᱟᱭ – “ᱮ ᱜᱳ, ᱛᱤᱠᱤᱱ ᱞᱟᱹᱜᱤᱫ ᱫᱚ ᱪᱮᱫ ᱠᱚ ᱤᱥᱤᱱᱚᱜᱼᱟ ᱹᱹᱹᱹᱹ ᱞᱟᱹᱭ ᱚᱴᱚᱣᱟᱹᱧ ᱵᱤᱱ ᱹᱹᱹᱹᱹᱤᱥᱤᱱ ᱦᱟᱱᱛᱟᱲ ᱟᱹᱧ᱾”
ᱼ“ᱵᱟᱝᱟ ᱭᱳ, ᱚᱱᱟ ᱫᱚ ᱞᱟᱹᱠᱛᱤ ᱵᱟᱝ …ᱹᱹᱹᱹᱤᱧ ᱡᱚᱛᱚᱣᱟᱜ ᱤᱧ ᱤᱥᱤᱱ ᱟᱠᱟᱫᱼᱟ ᱾ ᱟᱹᱵᱤᱱ ᱫᱚ ᱠᱷᱟᱹᱞᱤ ᱡᱤᱨᱟᱹᱣᱚᱜ ᱵᱤᱱ᱾ ᱦᱚᱯᱚᱱᱢᱮ ᱫᱚ ᱚᱯᱷᱤᱥ ᱨᱮᱜᱮ ᱡᱚᱢᱟᱭ ᱱᱷᱟᱜ ᱟᱨ ᱤᱧ ᱫᱚ ᱛᱤᱠᱤᱱ ᱪᱷᱩᱴᱤ ᱦᱮᱡ ᱠᱟᱛᱮ ᱢᱤᱫ ᱥᱟᱶᱛᱮ ᱞᱟᱝ ᱡᱚᱢᱟ᱾” ᱥᱩᱢᱤ ᱢᱮᱱ ᱠᱟᱛᱮᱭ ᱚᱰᱚᱠ ᱮᱱᱟ ᱾
ᱢᱟᱭᱱᱚ ᱫᱚ ᱱᱚᱣᱟ ᱠᱚ ᱟᱸᱡᱚᱢ ᱛᱮ ᱟᱨᱦᱚᱸ ᱠᱩᱥᱤ ᱟᱴᱠᱟᱨ ᱠᱮᱫᱼᱟᱭ ᱡᱮ ᱵᱟᱹᱦᱩ ᱫᱚ ᱤᱧ ᱛᱤᱱᱟᱹᱜᱼᱮ ᱡᱚᱛᱚᱱ ᱤᱧ ᱠᱟᱱᱟ ᱾ ᱟᱨ ᱦᱚᱸ ᱵᱷᱟᱹᱵᱤ ᱜᱚᱫ ᱠᱮᱫᱼᱟᱭ– “ᱦᱩᱸ (ᱨᱟᱹᱜᱤ ᱧᱚᱜ ᱟᱛᱮ) ᱥᱟᱞᱟᱥ ᱤᱧ ᱦᱮᱡ ᱟᱠᱟᱱ ᱛᱮ ᱱᱚᱝᱠᱟᱭ ᱞᱩᱲᱩ ᱞᱩᱲᱩ ᱵᱟᱲᱟᱭᱤᱧ ᱠᱟᱱᱟ ᱹᱹᱹᱹᱹᱹᱹᱹ ᱫᱤᱱᱟᱹᱢ ᱤᱧ ᱛᱟᱦᱮᱱ ᱢᱟ ᱱᱷᱟᱜ ᱟᱨ ᱱᱚᱝᱠᱟᱭ ᱥᱮᱵᱟᱭᱤᱧ ᱢᱟᱛᱚ, ᱱᱚᱝᱠᱟ ᱩᱭᱦᱟᱹᱨ ᱛᱩᱞᱩᱡ ᱚᱲᱟᱜ ᱵᱷᱤᱛᱤᱨ ᱥᱮᱫ ᱠᱷᱚᱱ ᱮ ᱯᱟᱴᱮᱫ ᱠᱮᱫᱼᱟ ᱾
ᱚᱠᱛᱚ ᱯᱟᱨᱚᱢᱚᱜ ᱨᱮᱫᱚ ᱠᱟᱹᱡ ᱦᱚᱸ ᱵᱟᱭ ᱜᱷᱟᱹᱲᱤᱠᱚᱜᱼᱟ ᱾ ᱪᱮᱫ ᱞᱮᱠᱟᱛᱮ ᱵᱟᱨ ᱦᱟᱯᱛᱟ ᱦᱚᱯᱚᱱ ᱟᱨ ᱠᱤᱢᱤᱱ ᱥᱟᱶ ᱟᱹᱰᱤ ᱱᱟᱯᱟᱭ ᱛᱮ ᱚᱠᱛᱚ ᱯᱟᱨᱚᱢ ᱮᱱᱟ ᱵᱟᱝ ᱴᱷᱤᱠᱟᱹ ᱞᱮᱱᱟ ᱾ ᱱᱚᱣᱟ ᱛᱟᱞᱟ ᱨᱮ ᱥᱩᱢᱤ ᱦᱟᱱᱦᱟᱨ ᱟᱭᱳ ᱟᱹᱰᱤ ᱡᱚᱛᱚᱱ ᱠᱮᱫᱮᱭᱟᱭ ᱾ ᱩᱱᱤ ᱪᱮᱫ ᱮ ᱠᱩᱥᱤᱭᱟᱜᱼᱟ ᱪᱮᱫ ᱫᱚ ᱵᱟᱝ, ᱡᱟᱦᱟᱸ ᱜᱮ ᱞᱟᱹᱠᱛᱤᱜᱼᱟᱭ ᱚᱱᱟ ᱜᱮ ᱥᱩᱨ ᱜᱚᱫ ᱟᱭᱟᱭ᱾ ᱢᱮᱱ ᱫᱚ ᱟᱹᱡᱤᱡ ᱱᱤᱡᱚᱨ ᱟᱭᱳ ᱞᱮᱠᱟ ᱜᱮᱭ ᱵᱷᱟᱹᱵᱤᱭᱮ ᱛᱟᱦᱮᱸᱫ ᱾

ᱢᱟᱭᱱᱚ ᱦᱚᱸ ᱩᱭᱦᱟᱹᱨ ᱵᱟᱲᱟ ᱠᱮᱫᱼᱟᱭ “ᱛᱟᱨᱟᱥ ᱟᱨ ᱥᱩᱢᱤ ᱛᱤᱱᱟᱹᱜ ᱨᱟᱹᱥᱠᱟᱹ ᱨᱮ ᱢᱮᱱᱟᱜ ᱠᱤᱱᱟ, ᱟᱹᱠᱤᱱ ᱛᱟᱞᱟ ᱨᱮ ᱛᱤᱱᱟᱹᱜ ᱫᱩᱞᱟᱹᱲ ᱢᱮᱱᱟᱜᱼᱟ ᱾ ᱢᱟᱥᱮ ᱹᱹᱹᱹᱹᱹᱹᱹᱹᱹ ᱤᱧ ᱦᱚᱸ ᱛᱤᱱᱟᱹᱜ ᱢᱟᱹᱱᱮ ᱤᱢᱟᱹᱧᱟ, ᱱᱤᱡᱚᱨ ᱟᱭᱳ ᱞᱮᱠᱟᱭ ᱢᱚᱱᱮ ᱤᱧᱟ ᱹᱹᱹᱹᱹᱹᱹᱹᱱᱚᱝᱠᱟ ᱨᱮ ᱱᱚᱣᱟ ᱠᱟᱛᱷᱟᱧ ᱨᱟᱠᱟᱵ ᱞᱮᱠᱷᱟᱱ ᱱᱮᱭᱟᱣᱼᱨᱚᱯᱚᱲ ᱚᱰᱚᱠᱚᱜᱼᱟ ᱾ ᱥᱩᱞᱩᱠ ᱜᱷᱟᱨᱚᱸᱡᱽ ᱨᱮ ᱥᱮᱸᱜᱮᱞ ᱡᱩᱞ ᱵᱟᱨᱟᱵᱟᱹᱨᱤ ᱜᱮ ᱹᱹᱹᱹᱹᱹᱹᱹᱵᱟᱝᱟ, ᱵᱟᱝᱟ ᱹᱹᱹᱹᱹᱹᱹ ᱚᱦᱚᱜᱤᱧ ᱢᱮᱛᱟᱭᱟ ᱹᱹᱹᱹᱹᱹᱹᱹᱹ ᱛᱤ ᱨᱮ ᱥᱚᱦᱟᱜᱽ ᱨᱮᱱᱟᱜ ᱥᱟᱡᱽ ᱵᱟᱹᱱᱩᱜᱼᱟ ᱢᱮᱱᱠᱷᱟᱱ ᱢᱮᱲᱦᱮᱫ ᱥᱟᱠᱚᱢ ᱢᱟᱛᱚ ᱢᱮᱱᱟᱜ ᱜᱮᱭᱟ ᱾ ᱯᱟᱞᱮᱫ ᱱᱟᱦᱟᱜ ᱡᱩᱜᱽ ᱫᱚ ᱚᱠᱛᱚ ᱥᱟᱶᱛᱮ ᱵᱚᱫᱚᱞ ᱤᱫᱤᱜ ᱠᱟᱱᱟ ᱟᱨ ᱵᱟᱡᱟᱨ ᱫᱤᱥᱚᱢ ᱨᱮᱫᱚ ᱦᱚᱨᱚᱜᱼᱵᱟᱸᱫᱮ ᱦᱚᱸ ᱟᱹᱛᱩ ᱫᱤᱥᱚᱢ ᱞᱮᱠᱟ ᱫᱚ ᱵᱟᱠᱚ ᱦᱚᱨᱚᱜᱮᱜᱼᱟ᱾ ᱚᱠᱛᱚ ᱥᱟᱶ ᱵᱚᱫᱚᱞᱚᱜ ᱦᱚᱸ ᱞᱟᱹᱠᱛᱤ ᱠᱟᱱᱟ ᱾ ᱢᱮᱱᱠᱷᱟᱱ ᱟᱵᱚ ᱥᱟᱶᱛᱟ ᱨᱮᱭᱟᱜ ᱞᱟᱭᱼᱞᱟᱠᱪᱟᱨ, ᱟᱹᱨᱤᱼᱪᱟᱹᱞᱤ, ᱟᱪᱟᱨᱼᱵᱮᱵᱷᱟᱨ, ᱢᱟᱹᱱ–ᱥᱚᱢᱢᱟᱱ ᱡᱚᱛᱚᱣᱟᱜ ᱜᱮ ᱩᱭᱦᱟᱹᱨ ᱢᱮᱱᱟᱜᱼᱟ, ᱱᱚᱣᱟᱜᱮ ᱟᱹᱰᱤ ᱢᱟᱨᱟᱝ ᱠᱟᱛᱷᱟ ᱠᱟᱱᱟ ᱾” ᱱᱚᱣᱟ ᱠᱚ ᱩᱭᱦᱟᱹᱨ ᱠᱮᱫ ᱛᱮ ᱢᱟᱭᱱᱚ ᱫᱚ ᱥᱩᱢᱤ ᱠᱮ ᱡᱟᱦᱟᱸᱱᱟᱜ ᱵᱟᱭ ᱢᱮᱛᱟᱫ ᱫᱮᱭᱟ ᱾ ᱟᱨ ᱢᱟᱭᱱᱚ ᱫᱚ ᱟᱡᱟᱜ ᱟᱹᱛᱩ ᱫᱤᱥᱚᱢ ᱛᱮ ᱨᱩᱣᱟᱹᱲ ᱦᱮᱡ ᱮᱱᱟᱭ ᱾

ᱚᱠᱛᱚ ᱦᱚᱸ ᱜᱷᱩᱲᱤ ᱨᱮᱱᱟᱜ ᱥᱩᱭ ᱞᱮᱠᱟ ᱯᱟᱨᱚᱢ ᱤᱫᱤᱭᱮᱱᱟ ᱾ ᱛᱮᱦᱮᱧ ᱥᱩᱢᱤ ᱟᱨ ᱛᱟᱨᱟᱥᱟᱜ ᱵᱟᱯᱞᱟ ᱠᱟᱛᱮ ᱜᱮᱞ ᱥᱮᱨᱢᱟ ᱦᱩᱭ ᱮᱱᱟ ᱾ ᱵᱟᱨᱭᱟ ᱜᱤᱫᱽᱨᱟᱹ ᱢᱤᱫ ᱠᱚᱲᱟ ᱟᱨ ᱢᱤᱫ ᱠᱩᱲᱤ ᱜᱤᱫᱽᱨᱟᱹ᱾ ᱱᱤᱛ ᱫᱚ ᱢᱟᱭᱱᱚ ᱦᱚᱸ ᱦᱚᱲᱢᱚ ᱠᱚ ᱚᱥᱩᱵᱤᱫᱷᱟ ᱤᱫᱤᱛᱮ ᱟᱹᱠᱤᱱ ᱥᱟᱶ ᱜᱮ ᱵᱟᱡᱟᱨ ᱫᱤᱥᱚᱢ ᱨᱮ ᱛᱟᱦᱮᱱ ᱠᱟᱱᱟᱭ ᱾ ᱩᱱᱠᱤᱱ ᱜᱚᱲᱚᱢ ᱜᱤᱫᱽᱨᱟᱹ ᱦᱚᱸ ᱥᱟᱨᱟ ᱜᱷᱟᱱᱮ “ᱟᱭᱳ ᱹᱹᱹᱹᱹ ᱟᱭᱳᱹᱹᱹᱹᱹᱹᱹ” ᱢᱮᱱ ᱠᱟᱛᱮ ᱜᱚᱲᱚᱢ ᱵᱩᱰᱤ ᱟᱭᱳ ᱥᱟᱶ ᱠᱤᱱ ᱜᱷᱚᱭᱞᱮ ᱵᱟᱲᱟᱜ-ᱟ᱾ ᱱᱤᱛ ᱥᱩᱢᱤ ᱟᱨ ᱟᱡ ᱦᱟᱱᱦᱟᱨ ᱟᱭᱳ ᱛᱟᱞᱟ ᱨᱮ ᱦᱟᱱᱦᱟᱨᱼᱠᱤᱢᱤᱱ ᱵᱟᱝ ᱠᱟᱛᱮ ᱟᱭᱳ ᱟᱨ ᱦᱚᱯᱚᱱ ᱮᱨᱟᱦᱟᱜ ᱥᱟᱹᱜᱟᱹᱭ ᱢᱮᱱᱟᱜᱼᱟ ᱾ ᱱᱤᱛ ᱦᱚᱸ ᱥᱩᱢᱤᱭᱟᱜ ᱫᱩᱞᱟᱹᱲ ᱢᱟᱭᱱᱚ ᱥᱟᱶ ᱚᱱᱠᱟ ᱜᱮ ᱢᱮᱱᱟᱜᱼᱟ ᱡᱟᱦᱟᱸ ᱞᱮᱠᱟ ᱜᱮᱞ ᱥᱮᱨᱢᱟ ᱢᱟᱲᱟᱝ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩᱣᱟᱜ ᱥᱩᱞᱩᱠ ᱡᱤᱭᱚᱱ ᱟᱹᱰᱤ ᱥᱩᱠᱷᱟᱹᱞᱤ ᱛᱮ ᱠᱩᱥᱤᱼᱨᱟᱹᱥᱠᱟᱹ ᱛᱮ ᱠᱷᱟᱸᱰᱟᱣᱚᱜ ᱠᱟᱱᱟ᱾