ᱟᱫ ᱟᱠᱟᱜ ᱟᱹᱧ ᱮᱱᱟᱝ ᱟᱜ ᱡᱚᱛᱚ ᱛᱤᱧ
ᱨᱤᱫᱟᱹᱭ ᱨᱮᱱᱟᱝ ᱡᱟᱞᱟᱠᱟᱨ ᱛᱟᱞᱟᱨᱮ ᱤᱧ
ᱛᱤᱥ ᱦᱚᱸ ᱵᱟᱝ ᱨᱩᱣᱟᱹᱲ ᱚᱱᱟ
ᱡᱟᱦᱟᱸ ᱛᱤᱱᱟᱹᱜ ᱤᱧ ᱯᱟᱱᱛᱮ ᱨᱮᱦᱚᱸ ᱚᱱᱟ |
ᱥᱚᱦᱟᱜᱽ ᱫᱩᱞᱟᱹᱲ ᱫᱚ ᱤᱱᱟᱹᱝ ᱵᱷᱩᱨ ᱜᱮ
ᱵᱟᱧᱪᱟᱣᱜ ᱨᱮᱱᱟᱜ ᱠᱩᱠᱢᱩ ᱧᱮᱞ ᱥᱩᱢᱩᱝ ᱜᱮ
ᱯᱚᱞᱚᱢ ᱟᱠᱟᱱ ᱫᱤᱱ ᱠᱚᱜᱮ ᱛᱚ
ᱨᱤᱫᱟᱹᱭ ᱨᱤᱧ ᱥᱟᱡᱟᱣ ᱚᱱᱟ ᱠᱚ ᱤᱧ ᱫᱚ |
ᱟᱨ ᱥᱮ ᱨᱩᱣᱟᱹᱲᱟ ᱥᱤᱥᱩ ᱚᱠᱛᱚ
ᱫᱷᱩᱲᱤ ᱞᱩᱥᱩ ᱯᱩᱱᱰᱩ ᱨᱮ ᱤᱱᱩᱝ ᱡᱚᱝ ᱥᱚᱠᱛᱚ
ᱡᱟᱦᱟᱢ ᱠᱷᱚᱡᱟᱨ ᱨᱮᱦᱚᱸ ᱵᱟᱢ ᱧᱟᱢ ᱚᱱᱟ
ᱵᱚᱭᱦᱟ ᱢᱤᱥᱤ ᱠᱚᱣᱟᱜ ᱫᱩᱞᱟᱹᱲ ᱥᱟᱱᱟᱢᱟᱜ |
ᱠᱟᱢ ᱠᱟᱡ ᱛᱮᱠᱚ ᱛᱚᱞ ᱟᱠᱟᱱ ᱡᱚᱛᱚ
ᱚᱠᱚᱭ ᱴᱷᱮᱱ ᱦᱚᱸ ᱵᱟᱹᱱᱩᱜ ᱛᱟᱠᱚ ᱚᱱᱟ ᱚᱠᱛᱚ
ᱮᱱᱟᱝ ᱱᱟᱝ ᱠᱟᱛᱷᱟ ᱠᱚ ᱜᱮᱛᱚ
ᱧᱟᱢᱟᱹᱧ ᱚᱠᱟ ᱞᱮᱠᱟ ᱨᱮ ᱚᱱᱟ ᱠᱚ ᱤᱧ ᱫᱚ |
ᱟᱫ ᱠᱮᱫᱟᱹᱧ ᱮᱱᱟᱝ ᱥᱤᱥᱩ ᱚᱠᱛᱚ
ᱵᱚᱦᱮᱞ ᱮᱱᱟ ᱚᱱᱟ ᱜᱤᱛᱤᱞ ᱵᱟᱹᱞᱤ ᱚᱲᱟᱜ ᱡᱚᱛᱚ
ᱪᱟᱞᱟᱣ ᱮᱱᱟ ᱛᱤᱢᱤᱱ ᱥᱟᱺᱜᱤᱧ ᱚᱱᱟ
ᱛᱟᱦᱮᱸ ᱞᱮᱱᱟ ᱥᱟᱨᱟ ᱵᱮᱲᱟ ᱤᱧ ᱥᱟᱶ ᱚᱱᱟ |
ᱚᱠᱛᱚ ᱨᱮᱱᱟᱝ ᱡᱦᱟᱨᱱᱟ ᱨᱮ ᱟᱹᱛᱩᱭᱮᱱ
ᱮᱱᱟᱝ ᱚᱱᱟ ᱠᱚ ᱡᱚᱛᱚ ᱟᱹᱰᱤ ᱥᱟᱺᱜᱤᱧ ᱪᱟᱞᱟᱣᱮᱱ
ᱚᱱᱟ ᱠᱚ ᱥᱟᱱᱟᱢ ᱠᱷᱚᱡᱟᱨ ᱞᱟᱹᱜᱤᱱ
ᱩᱭᱦᱟᱹᱨ ᱮᱫᱟᱹᱧ ᱥᱟᱨᱟ ᱵᱮᱲᱟ ᱥᱟᱲᱟ ᱥᱟᱹᱛᱤᱧ |
ᱨᱩᱣᱟᱹᱲ ᱦᱤᱡᱩᱜ ᱛᱤᱧ ᱢᱟᱥᱮ ᱚᱱᱟ
ᱮᱱᱟᱝ ᱨᱮᱱᱟᱜ ᱡᱚᱛᱚ ᱞᱮᱠᱟᱱ ᱚᱠᱛᱚ ᱚᱱᱟ
ᱨᱩᱣᱟᱹᱲ ᱯᱮᱥᱮ ᱛᱤᱧ ᱥᱟᱹᱜᱟᱹᱭᱟᱱ ᱠᱚ
ᱩᱭᱦᱟᱹᱨᱮᱫ ᱯᱮᱭᱟᱹᱧ ᱫᱤᱱᱟᱹᱢ ᱤᱟ ᱫᱚ ᱟᱯᱮᱠᱚ |
ᱟᱯᱮᱭᱟᱜ ᱛᱷᱩᱢ ᱟᱹᱥᱤᱥ ᱥᱟᱱᱟᱢ
ᱞᱤᱸᱜᱤ ᱟᱬᱜᱚᱱ ᱢᱟ ᱡᱚᱛᱚ ᱤᱧ ᱪᱮᱛᱟᱱ ᱨᱮ
ᱟᱯᱮᱭᱟᱜ ᱥᱚᱦᱟᱜᱽ ᱫᱩᱞᱟᱹᱲ ᱛᱮ
ᱡᱤᱭᱟᱹᱲ ᱨᱩᱣᱟᱹᱲᱚᱜ ᱢᱟ ᱢᱚᱱᱮ ᱛᱤᱧ ᱨᱮ |
