ᱜᱤᱫᱽᱱᱤ ᱵᱩᱨᱩ ᱦᱟᱹᱛᱤ ᱵᱩᱨᱩ ᱮᱛᱚᱢ ᱠᱚᱧᱮ ᱵᱟᱨᱥᱮᱫ
ᱟᱨᱦᱚᱸ ᱩᱥᱩᱞ ᱪᱷᱮᱯᱚ ᱵᱤᱨ ᱵᱩᱨᱩ ᱛᱮ ᱟᱲᱮ ᱮᱴᱮᱫ
ᱟᱹᱫᱤᱢ ᱠᱚᱣᱟᱜ ᱟᱛᱳ ᱦᱩᱰᱤᱧ ᱦᱩᱰᱤᱧ ᱴᱚᱞᱟ
ᱧᱩᱛᱩᱢ ᱫᱚ ᱛᱤᱞᱜᱟ ᱢᱮᱱᱟᱜ ᱜᱟᱡᱟᱲ ᱛᱟᱞᱟ
ᱞᱮᱠᱷᱟ ᱥᱩᱢᱩᱝ ᱚᱲᱟᱜ, ᱵᱟᱹᱱᱩᱜ ᱛᱟᱠᱳ ᱡᱟᱹᱥᱛᱤ
ᱠᱷᱟᱯᱨᱟ ᱫᱟᱞᱚᱵ ᱪᱟᱞ; ᱩᱢᱮᱹᱨ ᱵᱟᱹᱱᱩᱜ ᱵᱟᱹᱲᱛᱤ
ᱧᱮᱻᱧᱮᱞ ᱠᱟᱹᱱᱟᱹᱧ; ᱥᱚᱝᱠᱷᱚ ᱱᱟᱹᱭ ᱟᱲᱮ ᱠᱷᱚᱱ
ᱡᱷᱟᱨᱠᱷᱟᱱᱰ ᱯᱚᱱᱚᱛ ᱦᱟᱹᱨᱤᱭᱟᱹᱲ ᱟᱛᱳ ᱫᱤᱥᱳᱢ᱿
ᱵᱟᱝ ᱦᱟᱹᱲᱩᱵ ᱥᱩᱢᱩᱱᱚᱜ ᱩᱞ ᱡᱚᱡᱚ ᱢᱟᱛᱠᱚᱢ ᱵᱟᱹᱨᱩ ᱵᱟᱲᱮ
ᱥᱟᱭ ᱥᱮᱨᱢᱟ ᱯᱟᱨᱚᱢ ᱛᱮᱸᱜᱳ ᱢᱮᱱᱟᱜ ᱟᱹᱰᱤ ᱢᱟᱨᱮ
ᱦᱚᱭᱛᱮ ᱞᱤᱣᱮᱹᱨ ᱠᱚᱫᱚᱨ ᱦᱤᱞᱟᱹᱜ ᱜᱟᱡᱟᱲ ᱢᱟᱫ
ᱫᱟᱨᱮ ᱜᱟᱡᱟᱲ ᱨᱮ ᱥᱟᱨᱜᱟ ᱜᱳᱰᱳ ᱠᱳ ᱚᱲᱟᱜ ᱟᱠᱟᱫ
ᱪᱮᱛᱟᱱ ᱨᱮ ᱠᱚᱝᱥᱚᱡᱳᱲ ᱟᱨ ᱪᱟᱝᱜᱟ ᱰᱮᱢ ᱠᱷᱚᱱ
ᱦᱤᱡᱩᱜ ᱠᱟᱱᱟ ᱫᱟᱜ ᱞᱮᱜᱮᱢ ᱜᱮ ᱟᱹᱛᱩ ᱯᱟᱨᱚᱢ
ᱧᱮᱻᱧᱮᱞ ᱠᱟᱹᱱᱟᱹᱧ; ᱥᱚᱝᱠᱷᱚ ᱱᱟᱹᱭ ᱟᱲᱮ ᱠᱷᱚᱱ
ᱡᱟᱹᱯᱩᱫ ᱢᱟᱦᱟ ᱫᱟᱜ ᱧᱮᱞᱚᱜ ᱵᱟᱫᱟᱢ ᱵᱚᱨᱚᱱ᱿
ᱵᱟᱹᱵᱩ ᱢᱟᱹᱭ ᱛᱟᱠᱳ ᱫᱚ ᱫᱩᱠᱟᱹᱱᱟᱠᱳ ᱵᱤᱨᱫᱟᱹ ᱜᱟᱲᱷ ᱛᱮ
ᱟᱭᱳ ᱫᱟᱹᱭ ᱛᱟᱠᱳ ᱫᱚ ᱫᱩᱠᱟᱹᱱᱟᱠᱳ ᱵᱟᱡᱟᱨ ᱠᱟᱹᱢᱤ ᱛᱮ
ᱚᱠᱚᱭ ᱫᱚ ᱟᱞᱟᱡᱷᱟᱞᱟ ᱥᱮᱨᱢᱟ ᱥᱮᱛᱳᱝ ᱮᱞᱟᱝ ᱨᱮ
ᱠᱷᱮᱛ ᱵᱟᱹᱫᱽ ᱛᱟᱞᱟ ᱠᱟᱹᱢᱤ ᱠᱟᱹᱥᱱᱤ ᱵᱷᱮᱹᱫᱽ ᱨᱮ
ᱥᱟᱨᱮᱡ ᱠᱳ ᱫᱚ ᱫᱤᱱᱟᱹᱢ ᱰᱟᱝᱜᱽᱨᱟ ᱢᱮᱨᱚᱢ ᱵᱷᱤᱰᱤ
ᱟᱨ ᱵᱟᱝᱠᱷᱟᱱ ᱟᱸᱜᱟ ᱛᱚᱨᱟ ᱜᱟᱹᱭ ᱵᱤᱛᱠᱤᱞ ᱠᱟᱰᱟ ᱜᱩᱯᱤ
ᱧᱮᱻᱧᱮᱞ ᱠᱟᱹᱱᱟᱹᱧ; ᱥᱚᱝᱠᱷᱚ ᱱᱟᱹᱭ ᱟᱲᱮ ᱠᱷᱚᱱ
ᱩᱫᱽᱜᱟᱹᱨ ᱠᱳ ᱦᱟᱣᱮᱫᱼᱮᱫ ᱮᱸᱜᱟ ᱟᱯᱟ ᱦᱚᱱ᱿
ᱮᱨ ᱟᱠᱟᱫᱼᱟᱠᱳ ᱢᱩᱜᱽ ᱥᱟᱱᱟᱢ ᱜᱚᱰᱟ ᱯᱮᱨᱮᱡ
ᱜᱚᱰᱟ ᱦᱳᱲᱳ ᱟᱨ ᱠᱚᱫᱮ ᱦᱤᱞᱟᱹᱜ ᱞᱮᱜᱮᱡ ᱞᱮᱜᱮᱡ
ᱵᱟᱹᱱᱩᱜ ᱟᱠᱟᱫᱼᱟ ᱚᱠᱟᱥᱮᱫ ᱦᱚᱸ ᱯᱩᱲᱭᱟᱹ ᱰᱟᱹᱦᱤ
ᱨᱚᱦᱚᱭ ᱟᱠᱟᱫᱼᱟᱠᱳ ᱪᱤᱱᱟᱹ ᱵᱟᱫᱟᱢ ᱯᱟᱹᱦᱤ ᱯᱟᱹᱦᱤ
ᱵᱩᱨᱩ ᱪᱚᱴᱮ ᱨᱮ ᱫᱷᱩᱸᱣᱟᱹᱜ ᱡᱟᱹᱲᱤᱭ ᱞᱮᱻᱨᱮ ᱫᱟᱜ
ᱥᱮᱨᱢᱟ ᱨᱮ ᱢᱮᱥᱟ ᱠᱟᱛᱮᱫ ᱚᱱᱟᱦᱚᱸ ᱨᱤᱢᱤᱞ ᱨᱟᱦᱞᱟᱜ
ᱧᱮᱧᱮᱞ ᱠᱟᱹᱱᱟᱹᱧ ᱥᱚᱝᱠᱷᱚ ᱱᱟᱹᱭ ᱟᱲᱮ ᱠᱷᱚᱱ
ᱨᱮᱸᱜᱮᱡ ᱛᱮ ᱠᱤᱥᱟᱹᱬ ᱟᱹᱫᱤᱢ ᱠᱚᱣᱟᱜ ᱡᱤᱭᱚᱱ᱿
