᱗᱕ ᱥᱮᱨᱢᱟ ᱯᱩᱨᱟᱹᱣ ᱟᱹᱯᱱᱟᱹᱛ ᱢᱟᱦᱟᱸ ᱨᱮ ᱥᱟᱱᱟᱢ ᱫᱤᱥᱩᱣᱟᱹ ᱟᱨ ᱵᱤᱨᱢᱟᱹᱞᱤ ᱫᱩᱞᱟᱹᱲᱤᱭᱟᱹ ᱠᱚ ᱥᱟᱹᱜᱩᱱ ᱥᱟᱨᱦᱟᱣ ᱞᱮ ᱪᱟᱞ ᱟᱯᱮ ᱠᱟᱱᱟ ᱾ ᱫᱤᱥᱚᱢ ᱟᱹᱯᱱᱟᱹᱛ ᱮᱱ ᱛᱟᱭᱚᱢ ᱟᱯᱱᱟᱨ ᱛᱮ ᱥᱟᱥᱚᱱ ᱨᱮᱱᱟᱜ ᱢᱤᱫᱴᱟᱝ ᱰᱟᱦᱟᱨ ᱩᱫᱩᱜ ᱮᱱᱟ ᱾ ᱟᱯᱱᱟᱨ ᱛᱮᱢ ᱥᱟᱥᱚᱱ ᱞᱮᱱᱠᱷᱟᱱ ᱟᱯᱱᱟᱨ-ᱟ ᱦᱚᱠ ᱟᱨ ᱟᱹᱭᱫᱟᱹᱨ ᱨᱟᱠᱷᱟ ᱛᱟᱦᱮᱱ-ᱟ ᱢᱮᱱᱛᱮᱫ ᱟᱵᱚ ᱞᱟᱹᱜᱤᱫ ᱟᱹᱱᱟᱹᱨᱤ ᱠᱚ ᱥᱟᱯᱲᱟᱣ ᱞᱮᱫ ᱜᱚᱢᱚᱠᱮ ᱠᱚᱣᱟ ᱟᱸᱥ ᱯᱟᱹᱛᱭᱟᱹᱣ ᱛᱟᱦᱮᱸ ᱠᱟᱱᱟ ᱾ ᱫᱤᱥᱚᱢ ᱟᱹᱰᱤᱜᱟᱱ ᱞᱟᱦᱟ ᱤᱫᱤ ᱟᱠᱟᱱᱟ, ᱟᱵᱚ ᱦᱚᱸ ᱟᱹᱰᱤᱜᱟᱱ ᱵᱚ ᱞᱟᱦᱟ ᱤᱫᱤ ᱟᱠᱟᱱᱟ ᱾ᱟᱯᱱᱟᱨ ᱛᱮ ᱥᱟᱥᱚᱱ ᱨᱮᱱᱟᱜ ᱦᱚᱨᱟ ᱨᱮ ᱗᱕ ᱥᱮᱨᱢᱟ ᱛᱟᱭᱚᱢ ᱱᱚᱣᱟ ᱟᱹᱭᱠᱟᱹᱣ ᱠᱟᱱᱟ ᱗᱕ ᱥᱮᱨᱢᱟ ᱞᱟᱦᱟ ᱫᱚ ᱟᱵᱚ ᱟᱵᱚᱣᱟᱜ ᱦᱚᱠ ᱪᱮᱫ ᱠᱟᱱᱟ ᱵᱟᱵᱚᱱ ᱵᱟᱰᱟᱭ ᱛᱟᱦᱮᱸᱫ ᱟᱨ ᱛᱮᱦᱮᱧ ᱟᱵᱚᱣᱟᱜ ᱦᱚᱠ ᱵᱟᱰᱟᱭ ᱛᱩᱞᱩᱡ ᱦᱚᱸ ᱦᱚᱠ ᱵᱟᱵᱚ ᱠᱷᱚᱡ ᱫᱟᱲᱮᱭᱟᱜ ᱠᱟᱱᱟ ᱾ ᱚᱱᱟ ᱨᱮᱱᱟᱜ ᱢᱤᱫ ᱚᱡᱮ ᱫᱚ ᱱᱚᱣᱟᱜᱮ ᱵᱩᱡᱷᱟᱹᱣ-ᱟ ᱛᱮᱦᱮᱧ ᱡᱟᱦᱟᱸᱭ ᱠᱚᱠᱚ ᱥᱟᱥᱚᱱ ᱮᱫ ᱵᱚᱱᱟ ᱩᱱᱠᱩᱣᱟᱜ ᱩᱭᱦᱟᱹᱨ ᱟᱹᱰᱤᱛᱮᱫ ᱵᱚᱰᱮ ᱜᱮ ᱧᱮᱞ ᱧᱟᱢᱚᱜ ᱠᱟᱱᱟ ᱾ ᱛᱮᱦᱮᱧ ᱟᱵᱚ ᱵᱤᱨ ᱵᱩᱨᱩ ᱠᱷᱚᱱ ᱠᱚ ᱞᱟᱜᱟ ᱮᱫ ᱵᱚᱱᱟ, ᱚᱛ ᱦᱟᱥᱟ ᱠᱷᱚᱱ ᱠᱚ ᱞᱟᱜᱟᱭᱮᱫ ᱵᱚᱱᱟ ᱾ ᱢᱚᱪᱟ ᱛᱮ ᱨᱚᱲ ᱢᱟ ᱥᱤᱵᱤᱞ ᱤᱠᱷᱟᱹᱱ ᱟᱱᱟᱹᱨᱤ ᱡᱟᱦᱟᱸ ᱞᱮᱠᱟ ᱥᱟᱯᱲᱟᱣ ᱟᱠᱟᱱᱟ ᱚᱱᱰᱮ ᱟᱵᱚ ᱨᱮᱱ ᱟᱜᱟᱢ ᱯᱤᱲᱦᱤ ᱵᱟᱧᱪᱟᱣ ᱫᱚ ᱚᱦᱚ ᱜᱮᱭᱟ ᱾ᱪᱟᱹᱠᱨᱤ ᱱᱩᱠᱨᱤ ᱨᱮᱱᱟᱜ ᱮᱲᱮ ᱮᱯᱮᱲᱮ ᱠᱟᱛᱷᱟ ᱵᱟᱝ ᱞᱟᱹᱭ ᱜᱮ ᱵᱷᱟᱹᱜᱤᱭᱟ ᱾ ᱢᱤᱫ ᱜᱩᱴ ᱠᱚ ᱪᱷᱩᱴᱟᱹᱣ ᱟᱠᱟᱱᱟ ᱥᱚᱨᱠᱟᱨᱤ ᱪᱟᱹᱠᱨᱤ ᱠᱷᱚᱱ ᱟᱵᱚ ᱞᱟᱹᱜᱤᱫ ᱢᱮᱱᱟᱜ ᱨᱟᱠᱷᱟ ᱵᱮᱵᱚᱥᱛᱟ ᱢᱩᱪᱟᱹᱫ ᱞᱟᱹᱜᱤᱫ ᱾ ᱟᱨ ᱢᱤᱫ ᱜᱩᱴ ᱱᱚᱠᱞᱤ ᱥᱟᱨᱴᱯᱷᱤᱠᱮᱴ ᱛᱮ ᱟᱵᱚᱣᱟᱜ ᱵᱷᱟᱜ ᱟᱵᱚ ᱠᱚ ᱮᱲᱮ ᱤᱫᱤᱭᱮᱫ ᱵᱚᱱᱟ ᱾ᱱᱚᱛᱮ ᱥᱚᱨᱠᱟᱨ ᱥᱚᱨᱠᱟᱨᱤ ᱪᱟᱹᱠᱨᱤ ᱦᱚᱸᱭ ᱠᱚᱢ ᱤᱫᱤ ᱭᱮᱫ-ᱟ᱾ ᱯᱨᱟᱭᱵᱷᱮᱴ ᱪᱟᱹᱠᱨᱤ ᱨᱮ ᱟᱵᱚᱣᱟᱜ ᱯᱟᱹᱨᱥᱤ ᱧᱮᱞ ᱛᱮ ᱪᱟᱹᱠᱨᱤ ᱠᱚ ᱮᱢᱟ ᱠᱚ ᱠᱟᱱᱟ ᱾ ᱟᱹᱛᱩ ᱴᱚᱞᱟ ᱯᱟᱲᱟ ᱨᱮ ᱢᱮᱱᱟᱜ ᱥᱚᱨᱠᱟᱨᱤ ᱟᱥᱲᱟᱠᱚ ᱨᱮ ᱩᱱᱟᱹᱜ ᱠᱮᱴᱮᱡ ᱚᱞ ᱯᱟᱲᱟᱦᱟᱣ ᱦᱚᱸ ᱵᱟᱝ ᱪᱟᱞᱟᱜ ᱠᱟᱱᱟ ᱟᱵᱚᱨᱤᱱ ᱜᱤᱫᱨᱟᱹ ᱠᱚ ᱟᱹᱠᱤᱞ ᱜᱮᱭᱟᱱ ᱪᱮᱫ ᱞᱮᱠᱟ ᱨᱮᱠᱚ ᱥᱮᱬᱟᱭᱟ !!!! ᱵᱷᱟᱵᱱᱟ ᱜᱮ ᱵᱩᱡᱷᱟᱹᱣ ᱠᱟᱱᱟ ᱾ ᱦᱟᱺᱰᱤ ᱯᱟᱹᱨᱣᱟᱹ ᱛᱮ ᱡᱟᱦᱟᱸᱛᱤᱱᱟᱹᱜ ᱵᱩᱞ ᱛᱚᱦᱮᱞ ᱵᱟᱝ-ᱟ ᱚᱱᱟ ᱠᱷᱷᱚᱱ ᱡᱟᱹᱥᱛᱤ ᱵᱚᱱ ᱵᱩᱞ ᱟᱠᱟᱱᱟ ᱮᱴᱟᱜ ᱦᱚᱲ-ᱟ ᱥᱮᱨᱣᱟ ᱯᱟᱸᱡᱟ ᱨᱮ ᱾ ᱱᱚᱣᱟ ᱠᱚᱫᱚ ᱟᱵᱚᱣᱟᱜ ᱫᱚᱥ ᱫᱚ ᱵᱟᱝ ᱠᱟᱱᱟ ᱾ ᱱᱚᱣᱟ ᱠᱚᱫᱚ ᱢᱤᱫᱴᱟᱝ ᱵᱮᱵᱚᱥᱛᱟ ᱨᱮᱱᱟᱜ ᱡᱟᱞᱟᱢ ᱠᱟᱱᱟ ᱾ᱡᱟᱦᱟᱸ ᱡᱟᱞᱟᱢ ᱑᱐᱐ ᱥᱮᱨᱢᱟ ᱞᱟᱦᱟ ᱠᱷᱚᱱ ᱟᱹᱰᱤ ᱩᱭᱦᱟᱹᱨ ᱵᱤᱪᱟᱹᱨ ᱟᱛᱮᱫ ᱟᱵᱚ ᱠᱚ ᱢᱟᱞᱚᱴ ᱟᱨ ᱟᱠᱚ ᱫᱤᱥᱚᱢ ᱥᱟᱥᱚᱱ ᱨᱮᱱᱟᱜ ᱡᱟᱞᱟᱢ ᱠᱚ ᱚᱰᱟᱣ ᱡᱩᱛ ᱟᱠᱟᱫ-ᱟ ᱾ ᱡᱟᱦᱟᱸ ᱡᱟᱞᱟᱢᱨᱮ ᱟᱵᱤ ᱥᱟᱱᱟᱢ ᱵᱚ ᱪᱷᱟᱸᱫᱟ ᱡᱩᱛ ᱟᱠᱟᱱᱟ ᱾ ᱚᱱᱟ ᱡᱟᱞᱟᱢ ᱠᱷᱚᱱ ᱫᱩᱜ ᱵᱟᱧᱪᱟᱣ ᱨᱮᱱᱟᱜ ᱦᱚᱨᱟ ᱵᱤᱪᱟᱹᱨ ᱞᱟᱹᱜᱤᱫ ᱛᱮᱦᱮᱧ ᱞᱮᱠᱟᱱᱟ ᱟᱹᱯᱱᱟᱹᱛ ᱢᱟᱦᱟ ᱨᱮᱱᱟᱜ ᱜᱚᱱᱚᱝ ᱟᱹᱰᱤᱜᱟᱱ ᱢᱮᱱᱟ-ᱟ ᱾ ᱱᱚᱣᱟ ᱨᱮᱱᱟᱜ ᱥᱚᱞᱷᱮ ᱫᱚ ᱥᱤᱠᱷᱱᱟᱹᱛ ᱟᱨ ᱡᱩᱢᱤᱫ ᱪᱷᱟᱰᱟ ᱪᱮᱫ ᱦᱚᱸ ᱵᱟᱹᱱᱩ ᱟᱹᱱᱤᱰ ᱾ ᱟᱵᱚ ᱟᱵᱚᱞᱟᱹᱜᱤᱫ ᱛᱮᱦᱮᱧ ᱚᱞ ᱤᱛᱩᱱ ᱟᱥᱲᱟ ᱠᱚ ᱟᱵᱚ ᱞᱟᱹᱜᱤᱫ ᱵᱮᱨᱮᱫ ᱦᱩᱭ ᱟᱵᱚᱱᱟ , ᱡᱟᱦᱟᱸ ᱞᱮᱠᱟ ᱢᱤᱥᱱᱟᱨᱤ ᱥᱠᱩᱞ, ᱥᱤᱥᱩ ᱢᱚᱱᱫᱤᱨ, ᱢᱤᱥᱚᱱ ᱥᱠᱩᱞ ᱚᱱᱠᱟ ᱵᱮᱵᱚᱥᱛᱟ ᱵᱮᱨᱮᱫ ᱦᱩᱭ ᱟᱵᱚᱱᱟ ᱡᱟᱦᱟᱸ ᱠᱷᱚᱱ ᱟᱵᱚ ᱞᱟᱹᱜᱤᱫ ᱟᱭᱮᱥ , ᱟᱭᱯᱤᱮᱥ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱩᱠᱤᱞ ,ᱡᱚᱡᱽ , ᱨᱟᱡᱽᱟᱹᱨᱤ ᱵᱩᱫ ᱜᱮᱭᱟᱱ ᱦᱚᱲ ᱠᱚᱦᱚᱸ ᱠᱚ ᱵᱮᱱᱟᱣ-ᱟ ᱾ ᱚᱱᱠᱟ ᱜᱮ ᱵᱮᱯᱟᱨ ᱵᱟᱹᱱᱤᱡ ᱠᱟᱹᱢᱤᱦᱚᱨᱟ ᱨᱮᱦᱚᱸ ᱢᱟᱹᱨᱣᱟᱹᱰᱤ ᱞᱮᱠᱟ ᱟᱵᱚ ᱵᱷᱤᱛᱨᱤ ᱨᱮ ᱜᱚᱲᱚ ᱜᱚᱯᱚᱲᱚ ᱞᱟᱹᱠᱛᱤ ᱠᱟᱱᱟ ᱾ ᱟᱵᱚ ᱵᱷᱤᱛᱨᱤ ᱨᱮ ᱯᱩᱸᱡᱤ ᱛᱟᱦᱮᱱ ᱞᱟᱹᱴᱩ ᱦᱚᱲ ᱦᱚᱸ ᱮᱠᱟᱞ ᱜᱮ ᱞᱟᱹᱠᱛᱤ ᱠᱟᱱᱟ ᱾ ᱢᱩᱪᱟᱹᱫ ᱨᱮ ᱦᱚᱠ ᱟᱨ ᱟᱹᱭᱫᱟᱹᱨ ᱞᱟᱹᱰᱷᱟᱹᱭ ᱨᱮ ᱥᱟᱱᱟᱢ ᱠᱚᱣᱟᱜ ᱡᱩᱢᱤᱫ ᱮᱠᱟᱞ ᱜᱮ ᱡᱟᱹᱨᱩᱲ ᱠᱟᱱᱟ ᱾