ᱥᱟᱱᱟᱢ ᱥᱟᱱᱛᱟᱲᱤ ᱥᱮᱨᱮᱧ ᱟᱧᱡᱚᱢᱤᱭᱟᱹ ᱠᱚᱣᱟᱜ ᱢᱚᱱᱮ ᱠᱤᱨᱤᱧ ᱟᱠᱟᱫ, ᱵᱚᱥᱮᱱ ᱢᱩᱨᱢᱩ ᱞᱟᱹᱜᱤᱫ ᱛᱮᱦᱮᱧ ᱜᱚᱴᱟ ᱫᱩᱱᱤᱭᱟᱹᱭ ᱦᱚᱢᱚᱨ ᱦᱟᱞᱟᱝᱚᱜ ᱠᱟᱱ ᱾ ᱦᱟᱦᱟᱲᱟ ᱜᱮ ᱪᱟᱞᱟᱣᱮᱱ ᱘ ᱡᱩᱱ ᱒᱐᱒᱐ ᱥᱮᱛᱟᱜ ᱘ ᱴᱟᱬᱟᱝ ᱠᱷᱚᱱ facebook, whatsapp ᱞᱮᱠᱟᱱ ᱥᱚᱥᱤᱭᱟᱞ ᱢᱤᱰᱤᱭᱟ ᱨᱮ ᱟᱡᱟᱜ ᱪᱤᱛᱟᱹᱨ ᱥᱟᱶᱛᱮ ᱟᱡ ᱠᱚ ᱦᱚᱢᱚᱨ ᱦᱟᱞᱟᱝ ᱮ ᱠᱟᱱ ᱛᱟᱦᱮᱸᱫ ᱾ ᱵᱤᱦᱟᱨ, ᱵᱮᱝᱜᱚᱞ, ᱟᱥᱟᱢ, ᱳᱰᱤᱥᱟ ᱥᱟᱶᱛᱮ ᱯᱩᱲᱥᱟᱹ ᱫᱤᱥᱤᱢ ᱵᱟᱝᱞᱟᱫᱮᱥ, ᱱᱮᱯᱟᱞ ᱠᱷᱚᱱ ᱟᱡ ᱧᱩᱛᱩᱢ ᱦᱚᱢᱚᱨ ᱦᱟᱞᱟᱝ ᱜᱮ ᱛᱟᱠᱮᱨᱚᱜ ᱠᱟᱱ ᱾ ᱯᱷᱮᱥᱵᱩᱠ ᱨᱮᱱᱟᱜ ᱴᱟᱭᱤᱢᱞᱟᱭᱤᱱ, ᱜᱽᱨᱩᱯ, ᱯᱮᱡᱽ(ᱥᱟᱦᱴᱟ) ᱮᱢᱟᱱ ᱠᱚᱨᱮ ᱥᱩᱢᱩᱝ ᱟᱡᱟᱜ ᱪᱤᱛᱟᱹᱨ, ᱟᱡᱟᱜ ᱥᱮᱨᱮᱧ ᱮᱢᱟᱱ ᱪᱤᱨᱤᱫ ᱵᱤᱨᱤᱫ ᱟᱴᱮᱫ ᱟᱠᱟᱱ ᱞᱮᱠᱟ ᱯᱟᱥᱱᱟᱣᱜ ᱠᱟᱱ ᱛᱟᱦᱮᱸᱫ ᱾ ᱱᱚᱝᱠᱟ ᱢᱚᱱᱮ ᱜᱚᱫᱚᱜ ᱠᱟᱱᱟ, ᱡᱟᱹᱱᱤᱡ ᱫᱩᱱᱤᱭᱟᱹ ᱨᱮᱱᱟᱜ ᱥᱟᱱᱟᱢ ᱠᱷᱚᱵᱚᱨ ᱰᱚᱜᱚᱨ ᱱᱚᱸᱰᱮ ᱜᱮ ᱦᱟᱹᱯᱤᱫ ᱟᱠᱟᱱᱟ ᱾ ᱪᱮᱫᱟᱜ ᱵᱟᱝ ᱦᱟᱹᱯᱤᱫᱚᱜ-ᱟ, ᱱᱤᱥᱚᱱ ᱮᱠᱞᱟ, ᱵᱤᱪᱷᱚᱠ ᱢᱚᱱᱮ, ᱠᱟᱹᱢᱤ ᱞᱟᱝᱜᱟ ᱦᱚᱲᱢᱚ ᱨᱮ ᱨᱟᱹᱥᱠᱟᱹ ᱟᱹᱜᱩᱭ ᱞᱟᱹᱜᱤᱫ ᱛᱮ ᱵᱚᱥᱮᱱ ᱢᱩᱨᱢᱩ ᱟᱜ ᱥᱮᱨᱮᱧ ᱟᱲᱟᱝ ᱥᱟᱹᱨᱤ ᱜᱮ ᱨᱟᱱ ᱢᱩᱨᱜᱟᱹᱱ ᱞᱮᱠᱟ ᱜᱮ ᱾ ᱢᱚᱱᱮ ᱦᱚᱸ ᱢᱟᱨᱛᱚᱠ ᱜᱚᱫᱚᱜ ᱛᱮᱛᱟᱝ ᱢᱮᱴᱟᱣ ᱜᱚᱫᱚᱜ-ᱟ ᱾ ᱫᱮᱞᱟᱵᱚᱱ ᱵᱟᱰᱟᱭ ᱞᱮᱜᱮ ᱟᱡ ᱵᱟᱵᱚᱫᱽ ᱢᱤᱫ ᱵᱟᱨ ᱠᱟᱛᱷᱟ ᱾
ᱵᱚᱥᱮᱱ ᱢᱩᱨᱢᱩ ᱫᱚ ᱥᱤᱧᱚᱛ ᱫᱤᱥᱚᱢ, ᱳᱰᱤᱥᱟ ᱯᱚᱱᱚᱛ, ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ, ᱵᱤᱡᱟᱹᱛᱟᱲᱟ ᱵᱽᱞᱚᱠ ᱛᱟᱹᱨᱤ ᱨᱮ ᱢᱮᱱᱟᱜ ᱵᱟᱨᱦᱟᱡᱤᱭᱟᱹᱬᱤ ᱟᱹᱛᱩ ᱨᱮ ᱡᱟᱱᱟᱢ ᱞᱮᱱᱟᱭ ᱙ ᱮᱯᱨᱤᱞ ᱑᱙᱘᱗ ᱥᱟᱹᱦᱤᱛ ᱨᱮ ᱾
ᱟᱡᱤᱡ ᱟᱯᱟᱛ ᱫᱚ ᱵᱚᱝᱜᱟ ᱛᱟᱞᱟ ᱦᱟᱠᱟᱱ ᱱᱟᱨᱟᱱ ᱢᱩᱨᱢᱩ, ᱮᱸᱜᱟᱛ ᱫᱚ ᱢᱟᱭᱱᱚ ᱢᱩᱨᱢᱩ ᱟᱨ ᱡᱤᱭᱚᱱ ᱥᱚᱦᱮᱫ (wife) ᱫᱚ ᱢᱚᱢᱚᱛᱟ ᱢᱩᱨᱢᱩ ᱧᱩᱛᱩᱢ ᱟᱭᱟ ᱾ ᱟᱹᱠᱤᱱᱤᱡ ᱢᱤᱫ ᱦᱚᱯᱚᱱ ᱮᱨᱟ ᱵᱷᱟᱜᱽᱭᱚ ᱞᱚᱠᱥᱢᱤ ᱢᱩᱨᱢᱩ ᱢᱮᱱᱟᱭᱟ ᱾
ᱵᱚᱥᱮᱱ ᱛᱮᱠᱚ ᱫᱚ ᱡᱚᱛᱚᱨᱮ ᱢᱚᱬᱮ ᱵᱚᱭᱦᱟ ᱟᱠᱚ ᱾ ᱓ ᱵᱚᱭᱦᱟ ᱠᱚᱲᱟ ᱟᱨ ᱒ ᱦᱚᱲ ᱠᱩᱲᱤ ᱾ ᱠᱚᱲᱟ ᱵᱚᱭᱦᱟ ᱠᱷᱚᱱ ᱟᱡ ᱫᱚᱭ ᱦᱩᱰᱤᱧ ᱜᱮᱭᱟ ᱾ ᱟᱡᱤᱡ ᱢᱟᱨᱟᱝ ᱫᱟᱫᱟ ᱢᱚᱦᱮᱱᱫᱽᱨᱚ ᱢᱩᱨᱢᱩ ᱫᱚ ᱪᱟᱥᱵᱟᱥ ᱟᱨ ᱛᱟᱞᱟ ᱫᱟᱫᱟ ᱵᱷᱟᱜᱽᱵᱚᱛ ᱢᱩᱨᱢᱩ ᱫᱚ ᱩᱥᱩᱞ ᱵᱤᱨᱫᱟᱹᱜᱟᱲ (High school) ᱨᱤᱱᱤᱡ ᱢᱟᱪᱮᱫ ᱠᱟᱱᱟᱭ ᱾
ᱟᱡᱟᱜ ᱥᱮᱪᱮᱫ ᱡᱤᱭᱚᱱ ᱫᱚ ᱟᱠᱚ ᱟᱹᱛᱩ ᱵᱚᱨᱟᱡᱤᱭᱟᱬᱤ ᱯᱨᱟᱭᱢᱮᱨᱤ ᱤᱥᱠᱩᱞ (BARAJIANI PRIMARY SCHOOL) ᱠᱷᱚᱱ ᱮ ᱮᱦᱚᱵ ᱞᱮᱫ ᱛᱟᱦᱮᱸᱫ ᱾ ᱚᱸᱰᱮ ᱑ ᱪᱟᱱᱚᱪ ᱠᱷᱚᱱ ᱕ ᱪᱟᱱᱚᱪ ᱦᱟᱹᱵᱤᱡ ᱮ ᱯᱟᱲᱦᱟᱣᱮᱱ ᱛᱟᱭᱚᱢ ᱖ ᱪᱟᱱᱚᱪ ᱠᱷᱚᱱ ᱗ ᱪᱟᱱᱚᱪ ᱯᱟᱲᱦᱟᱣᱜ ᱞᱟᱹᱜᱤᱫ ᱠᱷᱚᱱᱰᱚᱫᱮᱣᱲᱤ ᱩᱯᱯᱚᱨ ᱯᱨᱟᱭᱢᱮᱨᱤ ᱤᱥᱠᱩᱞ (KHANDADEULI UPPER PRIMARY SCHOOL) ᱛᱮ ᱪᱟᱞᱟᱣ ᱞᱮᱱ ᱛᱟᱦᱮᱸᱫ ᱾ ᱚᱸᱰᱮ ᱯᱟᱲᱦᱟᱣᱜ ᱚᱠᱛᱚᱨᱮ ᱟᱡᱤᱡ ᱡᱟᱱᱟᱢ ᱵᱟᱵᱟᱭ ᱵᱳᱸᱜᱟ ᱫᱤᱥᱚᱢᱮᱱ ᱛᱟᱭᱚᱢ, ᱠᱟᱹᱣᱰᱤ ᱠᱚᱨᱮᱱᱟᱜ ᱚᱵᱷᱟᱵᱽ ᱛᱮ ᱟᱡᱟᱜ ᱯᱟᱲᱦᱟᱣ ᱡᱤᱭᱚᱱ ᱫᱚ ᱗ ᱪᱟᱱᱚᱪ ᱥᱟᱹᱛ ᱛᱟᱭᱚᱢ ᱛᱷᱩᱠᱟᱹᱢ ᱮᱱᱟ ᱾
ᱜᱤᱫᱽᱨᱟᱹ ᱵᱮᱲᱟ ᱠᱷᱚᱱ ᱜᱮ ᱥᱮᱨᱮᱧ ᱪᱮᱛᱟᱱ ᱨᱮ ᱟᱹᱰᱤ ᱛᱮᱫ ᱜᱮ ᱜᱚᱨᱚᱡᱽ ᱛᱟᱦᱮᱸ ᱠᱟᱱᱟ ᱟᱨ ᱢᱤᱫ ᱥᱮᱨᱮᱧ ᱥᱤᱠᱟᱹᱨᱤᱭᱟᱹ ᱵᱟᱝᱢᱟ ᱥᱮᱨᱮᱧ ᱨᱩᱥᱤᱠᱟ ᱵᱮᱱᱟᱣᱜ ᱨᱮᱱᱟᱜ ᱟᱸᱥ ᱛᱟᱦᱮᱸᱠᱟᱱ ᱛᱟᱭᱟ ᱾ ᱮᱛᱚᱦᱚᱵ ᱫᱚ ᱟᱠᱚ ᱟᱹᱛᱩ ᱨᱮᱱᱟᱜ ᱠᱷᱟᱴᱚ ᱜᱟᱭᱟᱱ ᱠᱚᱨᱮ ᱥᱮᱨᱮᱧ ᱵᱟᱲᱟᱭ ᱛᱟᱦᱮᱸᱫ ᱟᱨ ᱦᱚᱲ ᱦᱚᱸ ᱟᱡᱟᱜ ᱥᱮᱨᱮᱧ ᱟᱹᱰᱤ ᱠᱚ ᱠᱩᱥᱩᱭᱟᱜ-ᱟ ᱟᱨ ᱛᱷᱩᱢ ᱥᱟᱨᱦᱟᱣ ᱠᱚ ᱪᱟᱞ ᱟᱭ ᱠᱟᱱ ᱛᱟᱦᱮᱸᱫ ᱾
ᱯᱩᱭᱞᱩ ᱫᱷᱟᱣ “ᱢᱟᱨᱟᱝ ᱵᱳᱨᱳ ᱟᱢᱫᱚ ᱚᱠᱟᱨᱮ” ᱧᱩᱛᱩᱢᱟᱱ ᱥᱟᱱᱛᱟᱲᱤ ᱯᱷᱤᱞᱢ ᱨᱮᱱᱟᱜ ᱥᱮᱨᱮᱧ “ᱟᱢᱮᱢ ᱦᱮᱞᱠᱟᱣ ᱤᱧᱤᱧ ᱪᱷᱤᱞᱠᱟᱹᱣ” ᱥᱮᱨᱮᱧ ᱨᱮ ᱥᱮᱨᱮᱧ ᱞᱮᱫ ᱛᱟᱦᱮᱸᱫ ᱾ ᱩᱱ ᱚᱠᱛᱚ ᱚᱱᱟ ᱥᱮᱨᱮᱧ ᱟᱹᱰᱤ ᱜᱮ ᱥᱩᱯᱚᱨᱦᱤᱴ ᱞᱮᱱ ᱛᱟᱦᱮᱸᱫ ᱟᱨ ᱟᱡᱟᱜ ᱥᱮᱨᱮᱧ ᱥᱤᱠᱟᱹᱨᱤᱭᱟᱹ (singer) ᱡᱤᱭᱚᱱ ᱰᱷᱚᱝᱜᱟ ᱦᱚᱸ ᱚᱸᱰᱮ ᱠᱷᱚᱱ ᱜᱮ ᱦᱮᱞᱠᱟᱣ ᱠᱟᱛᱮ ᱫᱤᱥᱚᱢ ᱦᱚᱲᱟᱜ ᱢᱚᱱᱮᱨᱮ ᱛᱟᱹᱠᱤᱡ ᱛᱟᱹᱯᱩᱜ ᱮᱦᱚᱵ ᱞᱮᱱ ᱛᱟᱦᱮᱸᱫ ᱾
ᱚᱱᱟ ᱛᱟᱭᱚᱢ “ᱠᱩᱞᱢᱤ ᱫᱟᱨᱮ ᱞᱮᱠᱟ ᱠᱩᱲᱤᱢ ᱦᱟᱨᱟᱭᱮᱱ”, “ᱵᱚᱝᱜᱟ ᱠᱚᱲᱟ”, “ᱧᱤᱫᱟᱹ ᱟᱞᱚᱢ ᱟᱝᱜᱟᱭ”, “ᱮ ᱡᱩᱨᱤ ᱢᱚᱱ ᱡᱩᱨᱤ”, “ᱪᱟᱸᱫᱚ ᱟᱞᱚᱢ ᱟᱝᱜᱟᱭ ᱱᱚᱶᱟ ᱛᱮᱫᱮᱡ” ᱮᱢᱟᱱ ᱡᱚᱛᱚ ᱥᱮᱨᱮᱧ ᱜᱮ ᱥᱩᱯᱚᱨᱦᱤᱴ ᱞᱮᱱ ᱛᱟᱦᱮᱸᱫ ᱾ ᱚᱱᱠᱟᱛᱮ ᱕᱐᱐ ᱜᱚᱴᱟᱝ ᱠᱷᱚᱱ ᱵᱟᱹᱲᱛᱤ ᱥᱮᱨᱮᱧ ᱮ ᱥᱮᱨᱮᱧ ᱟᱠᱟᱫ-ᱟ ᱾
ᱥᱮᱨᱮᱧ ᱨᱩᱥᱤᱠᱟ ᱵᱮᱜᱚᱨ ᱩᱱᱤ ᱫᱚ “ᱨᱟᱹᱥᱤ ᱟᱹᱛᱩ” ᱟᱞᱵᱚᱢ ᱨᱮᱱᱟᱜ “ᱫᱟᱫᱟᱭ ᱪᱟᱞᱟᱣ ᱟᱠᱟᱱ” ᱥᱮᱨᱮᱧ ᱨᱮ ᱥᱮᱨᱮᱧ ᱥᱟᱶᱛᱮᱭ ᱯᱟᱴ (acting) ᱞᱮᱫ ᱛᱟᱦᱮᱸᱫ ᱾ ᱥᱮᱨᱮᱧ ᱥᱤᱠᱟᱹᱨᱤᱭᱟᱹ ᱵᱮᱱᱟᱣᱜ ᱞᱟᱦᱟ ᱨᱮ ᱩᱱᱤ ᱫᱚ ᱪᱤᱛᱟᱹᱨ ᱵᱟᱰᱚᱦᱤ (Artist-painter) ᱞᱮᱠᱟᱛᱮᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾
ᱱᱚᱶᱟ ᱠᱷᱚᱵᱚᱨ ᱥᱟᱢᱴᱟᱣ ᱨᱮ ᱜᱚᱲᱚ ᱠᱤᱱ ᱮᱢ ᱞᱮᱫᱼᱟ ᱢᱟᱹᱱ ᱞᱤᱣᱤᱥ ᱠᱟᱹᱱᱦᱩ ᱦᱮᱢᱵᱽᱨᱚᱢ, ᱟᱹᱛᱩ ᱵᱟᱨᱦᱟᱡᱤᱭᱟᱹᱝ (ᱵᱷᱚᱸᱡᱽ – ᱳᱰᱤᱥᱟ) ᱥᱟᱶᱛᱮ ᱥᱟᱯᱲᱟᱣ ᱠᱮᱫᱤᱡ ᱤᱧᱜᱮ ᱨᱟᱢᱡᱤᱛ ᱴᱩᱰᱩ (ᱦᱚᱯᱚᱱᱵᱟᱹᱵᱩ) ᱾
