ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱥᱟᱥᱛᱟ ᱥᱚᱨᱯᱷᱟ ᱡᱤᱱᱤᱥ
ᱡᱚᱛᱚ ᱦᱚᱲ ᱴᱷᱮᱱ ᱢᱮᱱᱟᱜ
ᱮᱱ ᱦᱚᱸ ᱦᱟᱭᱟ ᱟᱼᱟᱸᱥ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱟᱹᱛᱩ ᱞᱤᱸᱜᱤᱜ ᱡᱤᱭᱟᱹᱲ ᱡᱷᱟᱨᱱᱟ
ᱚᱱᱛᱚᱨ ᱡᱤᱣᱤ ᱵᱟᱹᱠᱷᱩᱞ ᱠᱷᱚᱱ
ᱥᱟᱨᱥᱟᱣ ᱥᱮᱛᱮᱧ ᱵᱚᱦᱮᱞᱚᱜᱼᱟ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱯᱷᱹᱠᱬᱟᱜ ᱟᱱ ᱪᱮᱬᱮᱸ ᱠᱟᱱᱟᱭ
ᱟᱵᱚᱣᱟᱜ ᱢᱚᱱ ᱥᱮᱨᱢᱟ ᱨᱮ
ᱩᱰᱟᱹᱩ ᱟᱹᱪᱩᱨ ᱵᱟᱲᱟᱭ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱢᱤᱫ ᱵᱩᱥᱟᱹᱲ ᱵᱟᱦᱟ ᱞᱮᱠᱟ
ᱛᱤᱥ ᱦᱚᱸ ᱵᱟᱝ ᱢᱚᱥᱚᱫᱚᱜ
ᱫᱤᱱᱟᱹᱢ ᱥᱚ ᱢᱚᱦᱠᱟᱣᱼᱟ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱤᱛᱟᱹ ᱨᱟᱹᱱᱩ ᱡᱟᱝ ᱠᱟᱱᱟ
ᱮᱨ ᱟᱢ ᱢᱮᱱ ᱠᱷᱟᱹᱱ
ᱵᱟᱢ ᱤᱨ ᱪᱟᱵᱟ ᱫᱟᱲᱮᱭᱟᱜᱼᱟ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱢᱚᱡᱽ ᱟᱲᱟᱝ ᱨᱟᱦᱟ ᱠᱟᱱᱟ
ᱡᱟᱦᱟᱸ ᱛᱤᱱᱟᱜ ᱮᱢ ᱥᱮᱨᱮᱧ
ᱛᱤᱥ ᱦᱚᱸ ᱵᱟᱝ ᱵᱷᱟᱜᱟᱣᱼᱟ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱫᱟᱨᱦᱟ ᱦᱟᱨᱟ ᱫᱚᱨᱮᱭᱟ ᱞᱮᱠᱟ
ᱡᱤᱵᱚᱱ ᱵᱷᱩᱨᱼᱮᱢ ᱢᱚᱠᱚᱭᱟ
ᱮᱱ ᱦᱚᱸ ᱵᱟᱝ ᱡᱚᱠᱷᱟᱼᱟ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱢᱤᱫ ᱚᱨᱚᱱ ᱵᱚᱨᱚᱱ ᱵᱤᱨ
ᱵᱚᱞᱚ ᱞᱮᱱ ᱠᱷᱟᱱᱮᱢ ᱵᱷᱤᱛᱟᱹᱨ
ᱵᱟᱝ ᱧᱟᱢᱚᱜ ᱚᱰᱚᱠᱚᱜ ᱦᱚᱨ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱠᱚᱭ ᱠᱤᱨᱤᱧ ᱛᱮ ᱵᱟᱝ ᱧᱟᱢᱚᱜ
ᱦᱟᱹᱴᱤᱧ ᱟᱹᱬᱛᱤ ᱞᱮᱠᱷᱟᱱ
ᱟᱹᱰᱤ ᱥᱚᱸᱜᱮ ᱧᱟᱢ ᱨᱩᱣᱟᱹᱲᱚᱜ ᱾
ᱜᱚᱨᱚᱡᱽ ᱥᱤᱵᱤᱞ ᱫᱩᱞᱟᱹᱲ
ᱵᱟᱝ ᱠᱮᱪᱟᱜ ᱛᱚᱯᱟᱜ ᱛᱷᱩᱠᱟᱹᱢᱚᱜ
ᱦᱮᱲᱦᱮᱫ ᱠᱩᱠᱩᱴ ᱠᱟᱜ ᱠᱷᱟᱱ
ᱦᱤᱸᱥᱟᱹ ᱥᱩᱭᱟᱹ ᱛᱟᱥᱟᱫ ᱡᱷᱟᱲᱟ ᱾
***