ᱥᱚᱱᱚᱛ ᱫᱷᱟᱹᱨᱛᱤ ᱨᱮᱱᱟᱜ ᱯᱩᱱᱟᱹᱭ ᱰᱟᱦᱟᱨᱰᱤ ᱟᱹᱛᱩ ᱨᱮ,
ᱩᱯᱮᱞ ᱞᱮᱱᱟᱭ ᱯᱟᱹᱨᱥᱤ ᱥᱤᱧ ᱪᱟᱸᱫᱚ, ᱵᱟᱹᱭᱥᱟᱹᱠ ᱠᱩᱱᱟᱹᱢᱤ ᱨᱮ ᱾
ᱨᱩᱯ ᱢᱚᱦᱚᱨ ᱨᱮ ᱡᱷᱟᱞᱠᱟᱣᱚᱜ ᱢᱤᱫ ᱢᱟᱨᱥᱟᱞ ᱩᱱᱩᱨᱩᱢ,
ᱚᱱᱛᱚᱨ ᱢᱚᱱᱮ ᱨᱮ ᱢᱮᱱᱟᱜ ᱦᱟᱦᱟᱲᱟ ᱫᱟᱲᱮ ᱚᱱᱟ ᱜᱮ ᱛᱟᱭ ᱩᱯᱨᱩᱢ ᱾
ᱩᱫᱩᱜ ᱞᱮᱫᱟᱭ ᱦᱚᱨ ᱼᱰᱟᱦᱟᱨ, ᱢᱟᱹᱱᱢᱤ ᱠᱚᱣᱟᱜ ᱡᱤᱭᱚᱱ ᱨᱮ,
ᱥᱟᱹᱨᱤᱼᱱᱤᱨᱲᱟ ᱛᱮ ᱠᱷᱟᱸᱰᱟᱣ ᱨᱮᱱᱟᱜ ᱱᱟᱯᱟᱭ ᱥᱚᱛ ᱪᱩᱨᱤᱛ ᱢᱚᱱᱮ ᱨᱮ ᱾
ᱜᱩᱱᱢᱟᱱ ᱛᱮ ᱩᱢᱟᱹᱲ ᱯᱮᱨᱮᱡ ᱢᱮᱱᱟᱜ ᱥᱟᱨᱱᱟ ᱫᱷᱚᱨᱚᱢ ᱞᱟᱹᱜᱤᱫ,
ᱢᱚᱱᱮ ᱢᱩᱠᱨᱩᱲ ᱮᱱ ᱡᱟᱱᱟᱢ ᱟᱲᱟᱝ ᱛᱮ ᱩᱛᱷᱱᱟᱹᱣ ᱨᱟᱠᱟᱵ ᱞᱟᱹᱜᱤᱫ ᱾
ᱡᱟᱱᱟᱢ ᱯᱟᱹᱨᱥᱤ ᱵᱟᱝ ᱛᱮ ᱢᱟᱱᱣᱟ ᱠᱚᱣᱟᱜ ᱡᱤᱭᱚᱱ ᱧᱩᱛᱟᱹᱛ ᱨᱮ,
ᱪᱤᱠᱤ ᱞᱟᱹᱜᱤᱫ ᱛᱟᱦᱮᱸ ᱮᱱᱟᱭ ᱥᱤᱧᱼᱧᱤᱫᱟᱹ ᱜᱟᱹᱦᱤᱨ ᱩᱭᱦᱟᱹᱨ ᱨᱮ ᱾
ᱵᱤᱫᱩ-ᱪᱟᱸᱫᱟᱱ ᱵᱷᱮᱭᱟᱬ ᱨᱮ ᱛᱟᱦᱮᱸ ᱠᱟᱛᱮ, ᱩᱱᱠᱤᱱᱟᱜ ᱛᱷᱩᱢ ᱫᱟᱲᱮ ᱛᱮ,
ᱪᱤᱠᱤ ᱥᱤᱨᱡᱚᱱ ᱫᱟᱲᱮ ᱮᱱᱟ, ᱥᱟᱹᱨᱤ ᱮᱱᱟ ᱠᱩᱠᱢᱩ ᱚᱱᱟ ᱟᱢᱟᱜ ᱠᱩᱨᱩᱢᱩᱴᱩ ᱛᱮ ᱾
ᱡᱟᱱᱟᱢ ᱟᱲᱟᱝ, ᱡᱟᱱᱟᱢ ᱯᱟᱹᱨᱥᱤ ᱚᱞ ᱪᱤᱠᱤ ᱛᱮᱜᱮ ᱢᱤᱫ ᱩᱯᱨᱩᱢ ᱫᱚ ᱧᱟᱢᱚᱜᱼᱟ,
ᱥᱟᱹᱨᱤ ᱛᱟᱞᱟ ᱛᱮ ᱫᱷᱚᱨᱚᱢ ᱨᱮᱱᱟᱜ ᱰᱟᱦᱟᱨ ᱠᱷᱚᱱ ᱜᱮ ᱩᱛᱷᱱᱟᱹᱣ ᱫᱚ ᱦᱩᱭᱩᱜᱼᱟ ᱾
ᱡᱟᱱᱟᱢ ᱟᱲᱟᱝ, ᱡᱟᱱᱟᱢ ᱯᱟᱹᱨᱥᱤ ᱚᱞ ᱪᱤᱠᱤ ᱪᱟᱨᱦᱟᱣ-ᱯᱟᱥᱱᱟᱣ ᱞᱟᱹᱜᱤᱫ,
ᱫᱤᱥᱚᱢ -ᱫᱤᱥᱚᱢ ᱮ ᱫᱟᱬᱟ ᱠᱮᱫᱼᱟ ᱢᱟᱱᱣᱟ ᱠᱚ ᱛᱟᱞᱟ ᱨᱮ ᱥᱟᱢᱟᱝ ᱥᱚᱫᱚᱨ ᱞᱟᱹᱜᱤᱫ ᱾
ᱦᱟᱨᱠᱮᱛ ᱼᱥᱟᱥᱮᱛ ᱥᱟᱦᱟᱣ ᱞᱮᱫᱟᱭ ᱡᱟᱱᱟᱢ ᱟᱲᱟᱝ ᱯᱟᱹᱨᱥᱤ ᱞᱟᱹᱜᱤᱫ,
ᱚᱱᱟᱛᱮ ᱛᱟᱦᱮᱸ ᱮᱱᱟ ᱜᱩᱨᱩ ᱜᱚᱢᱠᱮᱭᱟᱜ ᱧᱩᱛᱩᱢ ᱡᱩᱜᱮ- ᱡᱟᱭᱡᱩᱜᱽ ᱞᱟᱹᱜᱤᱫ ᱾
ᱩᱭᱦᱟᱹᱨ ᱫᱚᱦᱚᱭ ᱢᱟ ᱟᱹᱫᱤᱢ, ᱯᱟᱹᱨᱥᱤ ᱥᱤᱧ ᱪᱟᱸᱫᱚᱣᱟᱜ ᱫᱤᱥ- ᱦᱩᱫᱤᱥ,
ᱟᱞᱚᱵᱚᱱ ᱪᱷᱤᱛᱤᱼᱵᱤᱛᱤ ᱢᱟ, ᱥᱟᱶᱛᱟ ᱨᱮᱱᱟᱜ ᱜᱚᱨᱚᱵᱟᱱ ᱚᱞ ᱪᱤᱠᱤ ᱡᱟᱱᱟᱢ ᱯᱟᱹᱨᱥᱤ ᱾
ᱡᱩᱢᱤᱫ ᱫᱟᱲᱮ ᱫᱚᱦᱚ ᱠᱟᱛᱮ ᱯᱟᱥᱱᱟᱣᱟᱵᱚᱱ ᱜᱩᱨᱩ ᱜᱚᱢᱠᱮ ᱥᱤᱨᱡᱚᱱ ᱫᱷᱚᱱ,
ᱡᱮᱜᱮᱛ ᱡᱟᱠᱟᱛ ᱨᱮ ᱞᱮᱜᱮᱡ ᱦᱟᱹᱨᱤᱭᱟᱹᱲ ᱯᱟᱹᱨᱥᱤ ᱫᱟᱨᱮ ᱨᱚᱦᱚᱭ ᱡᱚᱛᱚᱱ ᱟᱵᱚᱱ ᱾
ᱫᱮᱞᱟ ᱵᱚᱱ ᱟᱹᱫᱤᱢ ᱜᱩᱨᱩ ᱜᱚᱢᱠᱮᱭᱟᱜ ᱩᱫᱩᱜ ᱦᱚᱨ ᱼᱰᱟᱦᱟᱨ ᱵᱚ ᱯᱟᱸᱡᱟᱭᱟ,
ᱥᱤᱧᱚᱛ ᱫᱤᱥᱚᱢ ᱨᱮ ᱥᱟᱱᱟᱢ ᱠᱷᱮᱨᱣᱟᱲ ᱦᱚᱯᱚᱱ, ᱟᱵᱚᱣᱟᱜ ᱩᱯᱨᱩᱢ ᱵᱚ ᱫᱚᱦᱚᱭᱟ ᱾
——–*******——–
