ᱤᱧ ᱫᱚ ᱟᱢᱟᱜ ᱢᱚᱱᱮ ᱨᱮᱱ
ᱥᱩᱫᱟᱹᱭ ᱫᱤᱱ ᱨᱮᱱ ᱡᱩᱨᱤ ᱜᱮ,
ᱟᱢ ᱨᱮᱜᱮ ᱵᱟᱥᱟᱜ ᱥᱟᱹᱱᱟᱹᱧ ᱠᱟᱱ
ᱟᱢᱟᱜ ᱨᱤᱫᱟᱹᱭ ᱛᱟᱞᱟ ᱨᱮᱜᱮ᱾
ᱤᱧ ᱫᱚ ᱟᱢᱟᱜ ᱢᱚᱱᱮ ᱠᱚᱪᱟ ᱨᱮᱱ
ᱨᱮᱸᱜᱮᱡ ᱱᱟᱪᱟᱨ ᱡᱩᱨᱤ ᱜᱟᱛᱮ ᱜᱮ,
ᱟᱢᱟᱜ ᱫᱩᱞᱟᱹᱲ ᱯᱩᱠᱷᱨᱤ ᱨᱮ
ᱛᱟᱺᱜᱤ ᱢᱮᱱᱟᱹᱧ ᱩᱱᱩᱢ ᱜᱩᱡᱩᱜ ᱜᱮ᱾
ᱤᱧ ᱫᱚ ᱥᱟᱹᱨᱩ ᱥᱟᱠᱟᱢ ᱨᱮ
ᱴᱚᱞᱚᱢᱚᱞᱚᱜ ᱥᱤᱥᱤᱨ ᱜᱮ,
ᱩᱢ ᱟᱬᱜᱚ ᱥᱟᱹᱱᱟᱹᱧ ᱠᱟᱱ
ᱟᱢᱟᱜ ᱢᱚᱱᱮ ᱨᱮᱱᱟᱜ ᱨᱟᱹᱜᱤ ᱟᱹᱲᱤᱥ ᱜᱮ᱾
ᱯᱟᱸᱠ ᱪᱮᱛᱟᱱ ᱵᱟᱦᱟ ᱟᱠᱟᱱ
ᱤᱧ ᱫᱚ ᱩᱯᱟᱹᱞ ᱵᱟᱦᱟ ᱜᱮ,
ᱟᱛᱟᱝ ᱤᱧ ᱜᱮᱭᱟᱢ ᱤᱧ ᱫᱚ
ᱟᱢᱟᱜ ᱢᱚᱱᱮ ᱡᱤᱣᱤ ᱥᱟᱡᱟᱣ ᱜᱮ᱾
ᱤᱧ ᱫᱚ ᱟᱢᱟᱜ ᱢᱚᱱᱮ ᱨᱮᱱ
ᱥᱟᱨᱚ ᱢᱤᱨᱩ ᱪᱮᱬᱮ ᱜᱮ,
ᱥᱟᱨᱟ ᱜᱷᱟᱱᱮᱧ ᱨᱟᱹᱲ ᱮᱫᱟ
ᱟᱢᱟᱜ ᱧᱩᱛᱩᱢ ᱫᱤᱥᱟᱹ ᱜᱮ᱾
ᱢᱚᱱᱮ ᱡᱤᱣᱤ ᱨᱮᱱᱟᱜ ᱫᱩᱠ ᱫᱚ
ᱥᱟᱨᱦᱟᱣ ᱥᱮᱛᱮᱧ ᱢᱮᱫ ᱼᱫᱟᱜ ᱜᱮ,
ᱟᱸᱡᱚᱢ ᱛᱤᱧᱢᱮ ᱟᱯᱱᱟᱨ ᱠᱟᱹᱧ ᱢᱮ
ᱱᱮᱦᱚᱨ ᱫᱚ ᱛᱤᱧ ᱱᱤᱭᱟᱹ ᱜᱮ᱾
