ᱡᱩᱜᱽ ᱥᱮᱸᱜᱮᱞ ᱡᱩᱞᱩᱜ ᱠᱟᱱ
ᱥᱟᱶᱟᱨ ᱥᱟᱶᱛᱟ ᱞᱚᱜ ᱠᱟᱱ,
ᱟᱨᱟᱜ ᱜᱮ ᱜᱚᱴᱟ ᱯᱟᱥᱱᱟᱣ ᱮᱱ
ᱫᱷᱩᱶᱟ ᱛᱮ ᱧᱩᱛᱟᱛ ᱧᱮᱞᱚᱜ ᱠᱟᱱ ᱿
 
ᱥᱮᱸᱜᱮᱞ ᱥᱟᱞᱜᱟᱣ ᱦᱚᱲ ᱠᱚᱢᱟ
ᱞᱟᱸᱫᱟ ᱡᱚᱝ ᱡᱩᱞᱩᱜ ᱧᱮᱞᱛᱮ,
ᱥᱮᱸᱜᱮᱞ ᱤᱸᱬᱤᱡ ᱦᱚᱲ ᱠᱚᱢᱟ
ᱨᱟᱜ ᱡᱚᱝ ᱥᱟᱶᱛᱟ ᱤᱫᱤᱭᱟᱛᱮ ᱿
 
ᱢᱤᱫ ᱜᱟᱬᱟ ᱨᱤᱱ ᱦᱚᱲ ᱠᱟᱱ
ᱜᱮᱞᱵᱟᱨ ᱯᱟᱹᱨᱤᱥ ᱦᱟᱴᱤᱧ ᱟᱠᱟᱱ,
ᱢᱤᱫ ᱵᱤᱛᱟ ᱞᱟᱡ ᱞᱟᱹᱜᱤᱫ
ᱡᱟᱱᱣᱟᱨ ᱞᱮᱠᱟ ᱵᱷᱟᱭᱟᱫᱚᱜ ᱠᱟᱱ ᱿
 
ᱡᱩᱢᱤᱫ ᱫᱟᱲᱮᱜᱮ ᱵᱟᱱᱩᱜ ᱟᱱ
ᱦᱤᱥᱟᱹ ᱥᱩᱭᱟ ᱛᱮ ᱯᱮᱨᱮᱡ ᱟᱠᱟᱱ,
ᱚᱱᱟ ᱛᱮᱪᱚ ᱥᱮᱸᱜᱮᱞ ᱡᱩᱞᱩᱜ ᱠᱟᱱ
ᱵᱟᱹᱭ ᱵᱟᱹᱭ ᱛᱮ ᱥᱟᱶᱛᱟ ᱞᱚᱜ ᱠᱟᱱ ᱿
 
ᱟᱹᱛᱩ ᱯᱤᱪᱷᱤ ᱢᱚᱬᱮᱼᱢᱟᱯᱟᱸᱡᱤ
ᱯᱚᱱᱚᱛᱼᱫᱤᱥᱚᱢ ᱠᱚᱨᱮ ᱯᱟᱨᱜᱟᱱᱟ,
ᱮᱱ ᱨᱮᱦᱚᱸ ᱪᱮᱫᱟᱜ ᱟᱫᱚ
ᱟᱹᱱᱼᱟᱹᱨᱤ ᱠᱚᱫᱚ ᱵᱷᱤᱱᱟ ᱦᱟᱱᱟ ᱿
 
ᱡᱩᱞᱩᱜ ᱡᱩᱜᱽ ᱨᱮ, ᱠᱚᱲᱟ ᱠᱩᱲᱤ ᱠᱚᱢᱟ
ᱥᱟᱨᱫᱤ ᱡᱟᱛᱨᱟ ᱯᱟᱛᱟ ᱦᱟᱴ ᱠᱚᱨᱮ,
ᱟᱹᱛᱩ ᱦᱟᱲᱟᱢ ᱵᱩᱰᱷᱤ ᱠᱚᱢᱟ
ᱠᱤᱨᱤᱧ ᱟᱠᱷᱨᱤᱧ ᱦᱟᱺᱰᱤ ᱵᱷᱟᱹᱴᱤᱨᱮ ᱿
 
ᱨᱟᱡᱽᱟᱹᱨᱤ ᱥᱟᱶᱛᱟᱟᱹᱨᱤ ᱠᱟᱛᱷᱟ
ᱞᱟᱹᱭ ᱛᱮᱢᱟ ᱵᱚᱦᱚᱜ ᱜᱮ ᱦᱟᱹᱥᱩ,
ᱡᱷᱚᱛᱚ ᱜᱮᱠᱚ ᱞᱟᱭᱩᱜ ᱱᱤᱛᱚᱜ ᱯᱚᱸᱰᱮᱛ
ᱦᱚᱠ ᱞᱟᱹᱜᱤᱫ ᱞᱟᱹᱰᱷᱟᱭ ᱛᱟᱭᱚᱢ ᱨᱮ ᱿
 
ᱱᱚᱜᱚᱭ ᱱᱚᱝᱠᱟ ᱠᱷᱟᱛᱤᱨ ᱛᱮᱪᱚ
ᱡᱩᱼᱡᱩᱞ ᱦᱚᱲ ᱠᱚᱫᱚ ᱢᱟᱬᱟᱝ ᱟᱠᱟ,
ᱩᱱᱠᱩᱠᱚ ᱫᱟᱨᱟᱢ ᱨᱩᱣᱟᱲ ᱠᱚ ᱞᱟᱹᱜᱤᱫ
ᱱᱤᱛ ᱦᱚᱸ ᱥᱟᱱᱛᱟᱲ ᱡᱟᱹᱯᱤᱫ ᱦᱟᱠᱟ ᱿
 
ᱵᱟᱢ ᱢᱮᱫ ᱞᱩᱛᱩᱨᱟᱜ ᱠᱷᱟᱱ
ᱦᱮᱱᱟᱝ ᱫᱤᱱᱨᱮ ᱥᱟᱶᱛᱟ ᱞᱚ~ᱛᱚᱨᱚᱡᱚᱜ,
ᱦᱚᱭ ᱫᱟᱜ ᱞᱮᱠᱟ ᱧᱩᱛᱟᱛ ᱦᱚᱸᱭ ᱛᱚᱸᱜᱮ
ᱟᱛᱮ ᱡᱟᱹᱛᱤ ᱫᱷᱚᱨᱚᱢᱮ ᱟᱹᱛᱩᱤᱫᱤᱜ ᱿
 
ᱮᱱᱠᱷᱟᱱ ᱡᱷᱚᱛᱚ ᱠᱚᱛᱮ ᱫᱮᱞᱟ ᱛᱚᱵᱮ
ᱦᱤᱥᱟᱹ ᱥᱩᱭᱟ ᱱᱤᱥᱟ ᱠᱷᱚᱱ ᱥᱟᱦᱟ ᱟᱛᱮ,
ᱡᱩᱞᱩᱜ ᱡᱩᱜᱽ ᱥᱮᱸᱜᱮᱞ ᱤᱸᱬᱤᱡ ᱟᱛᱮ
ᱫᱷᱟᱹᱨᱛᱤ ᱨᱮ ᱩᱯᱨᱩᱢ ᱵᱚ ᱵᱮᱨᱮᱫᱟ ᱿
*