ᱥᱤᱢ ᱨᱟᱜ ᱔ᱹ᱓᱐ ᱴᱟᱲᱟᱝ ᱚᱠᱛᱚ, ᱥᱩᱨᱟᱹᱭ ᱴᱷᱮᱱ ᱯᱷᱚᱱ ᱦᱮᱡ ᱮᱱᱟᱼ
‘‘ᱛᱤᱱ ᱨᱤᱵᱤᱱ ᱟᱰᱚᱠᱚᱜ ᱠᱟᱱᱟ ? ᱥᱟᱯᱲᱟᱣ ᱦᱩᱭ ᱮᱱᱟ ᱪᱤᱵᱤᱱ ᱵᱟᱝᱟ ? ᱦᱚᱨ ᱨᱮ ᱡᱚᱢ ᱵᱟᱠᱷᱨᱟ ᱪᱮᱫ ᱠᱩᱵᱤᱱ ᱥᱟᱢᱵᱟᱣ ᱦᱟᱠᱟ ᱟ ᱪᱮ ᱵᱟᱝᱼᱟ’’ ?
“ᱦᱚᱭ, ᱥᱟᱯᱲᱟᱣ ᱥᱟᱹᱛ ᱮᱱᱟᱞᱤᱧ, ᱡᱚᱢ ᱵᱟᱠᱷᱨᱟ ᱛᱟᱵᱮᱱ, ᱵᱤᱥᱠᱩᱴ ᱟᱨ ᱫᱟᱜ ᱞᱤᱧ ᱡᱩᱜᱟᱹᱲ ᱟᱠᱟᱫᱼᱟ ᱾ ᱨᱚᱢᱮᱥ ᱦᱚᱸ ᱵᱮᱜᱽ ᱨᱮ ᱟᱹᱰᱤᱜᱟᱱ ᱡᱚᱢ ᱠᱚᱭ ᱥᱟᱢᱵᱟᱣ ᱟᱠᱟᱫᱼᱟ” ᱾
“ᱱᱟᱯᱟᱭ ᱛᱮᱜᱮ ᱥᱮᱱᱚᱜ ᱵᱤᱱ ᱾ ᱵᱩᱜᱤ ᱵᱟᱹᱲᱤᱡ ᱵᱟᱰᱟᱭ ᱚᱪᱚᱭᱤᱧ ᱵᱤᱱ ᱾ ᱚᱠᱛᱚ ᱚᱠᱛᱚ ᱨᱮ ᱯᱷᱚᱱ ᱟᱹᱧ ᱵᱤᱱ ᱾ ᱢᱟᱨᱟᱝ ᱵᱩᱨᱩ ᱛᱷᱩᱢ ᱫᱟᱲᱮ ᱛᱮ ᱱᱟᱯᱟᱭ ᱛᱮᱜᱮᱵᱤᱱ ᱥᱮᱴᱮᱨᱚᱜ ᱟ” ᱾
ᱱᱚᱣᱟᱫᱚ ᱥᱩᱨᱟᱹᱭ ᱟᱨ ᱢᱟᱞᱚᱛᱤᱭᱟᱜ ᱯᱷᱚᱱ ᱛᱮ ᱜᱟᱞᱚᱪ ᱾ ᱠᱚᱨᱚᱱᱟ ᱟᱡᱟᱨ ᱠᱷᱟᱹᱛᱤᱨ ᱜᱚᱴᱟ ᱫᱤᱥᱚᱢ ᱠᱟᱨᱦᱟᱲ ᱯᱟᱴᱮᱫ ᱮᱱ ᱛᱟᱭᱚᱢ ᱵᱟᱝᱜᱟᱞᱚᱨ ᱵᱟᱡᱟᱨ ᱠᱷᱚᱱ ᱛᱮᱦᱮᱧ ᱠᱤᱱ ᱨᱩᱣᱟᱹᱲ ᱠᱟᱱᱟ ᱥᱩᱨᱟᱹᱭ ᱟᱨ ᱨᱚᱢᱮᱥ ᱟᱹᱠᱤᱱᱟᱜ ᱡᱟᱱᱟᱢ ᱫᱤᱥᱚᱢ ᱛᱮ ᱾ ᱠᱟᱨᱦᱟᱲ ᱯᱟᱴᱮᱫ ᱠᱷᱟᱹᱛᱤᱨ ᱜᱚᱴᱟ ᱫᱤᱥᱚᱢ ᱥᱤᱬᱤᱡ ᱛᱟᱦᱟᱢ, ᱜᱟᱹᱰᱤ ᱢᱚᱴᱚᱨ ᱵᱚᱸᱫᱽ, ᱫᱚᱠᱟᱱ ᱵᱟᱡᱟᱨ ᱵᱚᱸᱫᱽ ᱾ ᱥᱟᱝᱜᱤᱧ ᱫᱤᱥᱚᱢ ᱨᱮ ᱟᱹᱰᱤ ᱟᱸᱴ ᱠᱤᱱ ᱵᱩᱡᱷᱟᱣ ᱠᱮᱫ ᱛᱮ ᱚᱲᱟᱜ ᱨᱩᱣᱟᱹᱲ ᱠᱤᱱ ᱴᱷᱟᱹᱣᱠᱟᱹ ᱞᱮᱜᱼᱟ ᱾ ᱚᱱᱟ ᱪᱷᱟᱰᱟ ᱟᱨ ᱪᱮᱫ ᱩᱯᱟᱭ ᱦᱚᱸ ᱵᱟᱭ ᱛᱟᱦᱮᱸ ᱠᱟᱱᱟ ᱾
ᱟᱹᱣᱨᱤ ᱢᱟᱨᱥᱟᱞᱚᱜ ᱨᱮᱜᱮ ᱥᱩᱨᱟᱹᱭ ᱟᱨ ᱟᱡᱤᱡ ᱢᱟᱢᱚ ᱦᱚᱯᱚᱱ ᱨᱚᱢᱮᱥ ᱥᱟᱞᱟᱜ ᱟᱹᱠᱤᱱᱟᱜ ᱵᱟᱥᱟ ᱠᱷᱚᱱ ᱠᱤᱱ ᱚᱰᱚᱠ ᱮᱱᱟ ᱾ ᱥᱟᱭᱠᱚᱞ ᱛᱮᱠᱤᱱ ᱥᱮᱱᱚᱜ ᱟ ᱵᱟᱝᱜᱟᱞᱚᱨ ᱠᱷᱚᱱ ᱚᱲᱟᱜ, ᱵᱷᱚᱸᱡᱽ ᱫᱤᱥᱚᱢ ᱳᱰᱤᱥᱟ ᱯᱚᱱᱚᱛ ᱛᱮ ᱾ ᱦᱟᱦᱟᱲᱟ ᱜᱮ ᱟᱴᱠᱟᱨᱚᱜ ᱠᱟᱱ ᱨᱮᱦᱚᱸ ᱩᱯᱟᱹᱭ ᱵᱟᱱᱩᱜ ᱟ ᱾
ᱥᱩᱨᱟᱹᱭᱼᱟᱜ ᱡᱟᱱᱟᱢ ᱫᱚ ᱟᱹᱰᱤ ᱨᱮᱝᱜᱮᱡ ᱚᱲᱟᱜ ᱨᱮ ᱾ ᱚᱲᱟᱜ ᱨᱮᱫᱚ ᱟᱡ ᱨᱤᱱ ᱟᱭᱚ ᱵᱟᱵᱟ ᱟᱨ ᱢᱤᱥᱨᱟ ᱾ ᱚᱛ ᱦᱟᱥᱟ ᱦᱚᱸ ᱵᱟᱱᱩᱜ ᱟ ᱾ ᱮᱴᱟᱜ ᱚᱲᱟᱜ ᱨᱮ ᱱᱟᱞᱦᱟ ᱛᱩᱢᱟᱹᱞ ᱠᱟᱛᱮ ᱟᱭᱚ ᱵᱟᱵᱟ ᱥᱩᱨᱟᱹᱭ ᱠᱤᱱ ᱚᱞ ᱯᱟᱲᱦᱟᱣ ᱚᱪᱚ ᱞᱮᱫᱮᱭᱟ ᱾ ᱠᱚᱞᱮᱡᱽ ᱨᱮ ᱢᱩᱪᱟᱹᱫ ᱵᱤᱱᱤᱰ ᱮᱢ ᱛᱟᱭᱚᱢ, ᱚᱨᱡᱚ ᱟᱣᱨᱤ ᱚᱰᱚᱠᱚᱜ ᱨᱮᱜᱮ ᱵᱟᱝᱜᱟᱞᱚᱨ ᱮ ᱥᱮᱱ ᱞᱮᱱᱟ ᱵᱟᱨ ᱯᱩᱭᱥᱟᱹ ᱟᱨᱡᱟᱣ ᱞᱟᱹᱜᱤᱫ ᱾ ᱚᱸᱰᱮ ᱞᱩᱜᱽᱲᱤ ᱠᱟᱹᱨᱜᱟᱲ ᱨᱮ ᱠᱟᱹᱢᱤ ᱠᱮᱜᱼᱟᱭ ᱾ ᱡᱟᱸᱦᱟᱸ ᱛᱤᱱᱟᱹᱜ ᱠᱩᱲᱟᱭ ᱮ ᱧᱟᱢ ᱟ, ᱪᱟᱸᱫᱚ ᱯᱤᱪᱷᱤ ᱜᱮ ᱚᱲᱟᱜ ᱮ ᱵᱷᱮᱡᱟᱭᱟ ᱾
ᱢᱤᱫ ᱥᱮᱨᱢᱟ ᱢᱟᱬᱟᱝ ᱵᱟᱝᱜᱟᱞᱚᱨ ᱵᱟᱡᱟᱨ ᱨᱮᱜᱮ ᱢᱤᱫᱴᱟᱝ ᱢᱚᱞ ᱨᱮ ᱠᱤᱱ ᱧᱮᱯᱮᱞ ᱞᱮᱱᱟ ᱥᱩᱨᱟᱹᱭ ᱟᱨ ᱢᱟᱞᱚᱛᱤ ᱾ ᱢᱟᱞᱚᱛᱤᱭᱟᱜ ᱡᱟᱱᱟᱢ ᱫᱤᱥᱚᱢ ᱫᱚ ᱵᱷᱚᱸᱡᱽ ᱫᱤᱥᱚᱢ ᱵᱟᱹᱨᱯᱟᱫᱟ ᱥᱩᱨ ᱨᱮ ᱾ ᱟᱡ ᱢᱟᱢᱚ ᱫᱚ ᱵᱟᱝᱜᱟᱞᱚᱨ ᱨᱮ ᱵᱮᱸᱠ ᱨᱮ ᱠᱟᱹᱢᱤᱭᱟ ᱾ ᱥᱮᱨᱢᱟ ᱯᱤᱪᱷᱤᱜᱮ ᱥᱤᱛᱩᱝ ᱟᱨ ᱮᱢᱟᱱ ᱪᱷᱩᱴᱤ ᱨᱮ ᱵᱟᱝᱜᱟᱞᱚᱨ ᱮ ᱦᱤᱡᱩᱜ ᱟ ᱾ ᱯᱩᱭᱞᱩ ᱧᱮᱯᱮᱞ ᱨᱮᱜᱮ ᱯᱷᱚᱱ ᱱᱚᱢᱵᱚᱨ ᱦᱚᱸᱠᱤᱱ ᱮᱯᱮᱢ ᱞᱮᱱᱟ ᱾ ᱵᱟᱹᱭ ᱵᱟᱹᱭ ᱛᱮ ᱫᱩᱞᱟᱹᱲ ᱥᱟᱹᱜᱟᱹᱭ ᱦᱚᱸ ᱥᱟᱜᱮᱱ ᱞᱮᱱᱟ ᱾ ᱠᱟᱛᱷᱟ ᱦᱚᱸ ᱢᱟᱬᱟᱝ ᱤᱫᱤᱭᱮᱱᱟ ᱟᱨ ᱟᱹᱠᱤᱱ ᱜᱮ ᱠᱤᱱ ᱵᱟᱯᱞᱟᱜ ᱟ ᱢᱮᱱᱛᱮ ᱠᱤᱱ ᱴᱷᱟᱹᱣᱠᱟ ᱞᱮᱜᱼᱟ ᱾
ᱥᱩᱨᱟᱹᱭ ᱱᱚᱣᱟ ᱠᱟᱛᱷᱟ ᱟᱭᱚ ᱵᱟᱵᱟ ᱦᱚᱸᱭ ᱵᱟᱰᱟᱭ ᱚᱪᱚ ᱞᱮᱫ ᱠᱤᱱᱟ ᱾ ᱫᱟᱨᱟᱭ ᱠᱟᱱ ᱨᱚᱡᱚ ᱯᱟᱨᱟᱵᱽ ᱨᱮ ᱥᱩᱨᱟᱹᱭ ᱚᱲᱟᱜ ᱮ ᱦᱤᱡᱩᱜ ᱟ ᱟᱨ ᱢᱟᱞᱚᱛᱤ ᱥᱟᱞᱟᱜ ᱮ ᱵᱟᱯᱞᱟᱜ ᱟ ᱢᱮᱱ ᱛᱮ ᱜᱚᱴᱟ ᱞᱮᱜᱼᱟᱭ ᱾ ᱱᱚᱣᱟ ᱠᱟᱛᱷᱟ ᱵᱟᱰᱟᱭ ᱠᱟᱛᱮ ᱥᱩᱨᱟᱹᱭ ᱟᱭᱚ ᱵᱟᱵᱟ ᱦᱚᱸ ᱟᱰᱤ ᱥᱚᱠᱚᱛ ᱠᱤᱱ ᱠᱩᱥᱤ ᱞᱮᱱᱟ ᱾ ᱢᱟᱞᱚᱛᱤ ᱦᱚᱸ ᱵᱟᱯᱞᱟ ᱛᱟᱭᱚᱢ ᱥᱩᱨᱟᱹᱭ ᱟᱭᱚ ᱵᱟᱵᱟ ᱟᱹᱰᱤ ᱱᱟᱯᱟᱭ ᱮ ᱡᱚᱛᱚᱱ ᱠᱤᱱᱟ ᱢᱮᱱᱛᱮ ᱠᱟᱛᱦᱟᱭ ᱮᱢ ᱞᱮᱜᱼᱟ ᱾
ᱤᱱᱟ ᱢᱟᱸᱫᱽ ᱨᱮ ᱠᱚᱨᱚᱱᱟ ᱟᱡᱟᱨ ᱠᱷᱟᱹᱛᱤᱨ ᱥᱟᱨᱟ ᱫᱤᱥᱚᱢ ᱠᱟᱨᱦᱟᱲ ᱯᱟᱴᱮᱫ ᱮᱱᱟ ᱾ ᱢᱤᱫ ᱵᱚᱝᱜᱟ ᱟᱹᱰᱤ ᱟᱸᱴ ᱟᱨ ᱠᱚᱥᱴᱚ ᱛᱮ ᱨᱚᱢᱮᱥ ᱥᱟᱞᱟᱜ ᱟᱹᱠᱤᱱᱟᱜ ᱵᱟᱥᱟ ᱨᱤᱠᱤᱱ ᱠᱷᱟᱸᱰᱟᱣ ᱞᱮᱜᱼᱟ ᱾ ᱠᱟᱢᱤ ᱠᱚ ᱵᱟᱝ ᱛᱮ ᱟᱠᱤᱱ ᱴᱷᱮᱱ ᱴᱟᱠᱟ ᱯᱩᱭᱥᱟᱹ ᱦᱚᱸ ᱪᱟᱵᱟᱭᱮᱱᱟ ᱾ ᱚᱱᱟ ᱠᱷᱟᱹᱛᱤᱨ ᱚᱲᱟᱜ ᱨᱩᱣᱟᱹᱲ ᱠᱤᱱ ᱴᱷᱟᱹᱣᱠᱟ ᱞᱮᱜᱼᱟ ᱾
ᱵᱟᱹᱭᱥᱟᱠᱷ ᱵᱚᱝᱜᱟ ᱥᱤᱛᱩᱝ ᱞᱚᱞᱚ ᱛᱩᱞᱩᱡ ᱥᱮᱱᱚᱜ ᱦᱩᱭᱩᱜ ᱟ ᱾ ᱩᱱᱟᱹᱜ ᱥᱟᱹᱝᱜᱤᱧ ᱾ ᱥᱤᱛᱩᱝ ᱨᱮ, ᱧᱤᱸᱫᱟ ᱚᱠᱛᱮ ᱚᱠᱟᱨᱤᱠᱤᱱ ᱡᱤᱨᱟᱹᱣᱜ ᱟ ? ᱚᱠᱟᱨᱤᱠᱤᱱ ᱡᱚᱢ ᱟ ? ᱚᱱᱠᱟ ᱜᱮ ᱟᱹᱰᱤᱜᱟᱱ ᱠᱩᱠᱞᱤ ᱛᱮ ᱦᱩᱰᱩᱜᱚᱜ ᱛᱟᱦᱮᱸᱫ ᱮ ᱢᱟᱞᱚᱛᱤ ᱾
ᱛᱟᱞᱟ ᱛᱟᱞᱟᱨᱮ ᱯᱷᱚᱱ ᱟᱹᱧ ᱵᱤᱱ ᱾ ᱚᱠᱟᱨᱤᱵᱤᱱ ᱥᱮᱴᱮᱨᱮᱱᱟ ᱵᱟᱰᱟᱭ ᱦᱚᱪᱚᱭᱤᱧ ᱵᱤᱱ ᱾ ᱮᱢᱟᱱ ᱠᱟᱛᱷᱟ ᱠᱚ ᱥᱩᱨᱟᱹᱭ ᱠᱮ ᱢᱮᱛᱟᱫ ᱫᱮ ᱛᱟᱦᱮᱸᱫ ᱮ ᱾ ᱥᱩᱨᱟᱹᱭ ᱦᱚᱸ ᱵᱩᱜᱤ ᱵᱟᱹᱲᱤᱡ ᱮ ᱵᱟᱰᱟᱭ ᱚᱪᱚᱭᱮᱭᱟ ᱢᱮᱱ ᱛᱮ ᱠᱟᱛᱷᱟᱭ ᱮᱢᱟᱫ ᱫᱮ ᱛᱟᱦᱮᱸᱫ ᱾ ᱦᱚᱨ ᱦᱚᱨ ᱛᱮ ᱦᱩᱣᱟᱴᱥ ᱟᱯ ᱛᱮ ᱠᱷᱚᱵᱚᱨ ᱮ ᱵᱷᱮᱡᱟᱭ ᱛᱟᱸᱦᱮᱫᱚᱜ ᱾ ᱯᱷᱚᱱ ᱦᱚᱭ ᱯᱷᱚᱱ ᱛᱟᱸᱦᱮᱫᱚᱜ ᱾ ᱢᱟᱞᱚᱛᱤ ᱦᱚᱸ ᱥᱩᱨᱟᱹᱭ ᱦᱟᱜ ᱯᱷᱚᱱ ᱟᱨ ᱢᱮᱥᱮᱡᱽ ᱛᱟᱹᱝᱜᱤ ᱨᱮᱜᱮ ᱛᱟᱦᱮᱱ ᱛᱟᱦᱮᱸᱫᱚᱜ ᱮ ᱾
ᱢᱤᱫ ᱫᱤᱱ ᱚᱲᱟᱜ ᱨᱮ ᱫᱩᱲᱩᱵ ᱠᱟᱛᱮ ᱟᱹᱰᱤᱜᱟᱱ ᱠᱟᱛᱷᱟᱭ ᱩᱭᱦᱟᱨ ᱮᱫ ᱛᱟᱦᱮᱸᱫᱚᱜ ᱢᱟᱞᱚᱛᱤ ᱾ ᱟᱡᱟᱜ ᱯᱷᱚᱱ ᱨᱮ ᱦᱩᱣᱟᱴᱥ ᱟᱯ ᱢᱮᱥᱮᱡᱽ ᱦᱮᱡ ᱮᱱᱟᱼ
“ᱤᱧᱟᱜ ᱯᱷᱚᱱ ᱨᱮ ᱵᱮᱴᱨᱤ ᱪᱟᱵᱟᱜ ᱞᱟᱹᱜᱤᱫ, ᱟᱨ ᱯᱟᱞᱮᱱ ᱵᱟᱞᱟᱝ ᱠᱟᱛᱷᱟ ᱫᱟᱲᱮ ᱭᱟᱜᱼᱟ” ᱾
ᱤᱱᱟ ᱛᱟᱭᱚᱢ ᱟᱰᱤᱫᱷᱟᱣ ᱯᱷᱚᱱ ᱮ ᱞᱟᱜᱟᱣ ᱞᱮᱜ ᱟ, ᱤᱠᱷᱟᱹᱱ ᱛᱤᱥ ᱦᱚᱸ ᱯᱷᱚᱱ ᱜᱮ ᱵᱟᱭ ᱞᱟᱜᱟᱣ ᱞᱮᱱᱟ ᱾ ᱥᱩᱣᱤᱪ ᱚᱯᱷ ᱮ ᱢᱮᱱᱮᱜ ᱟ ᱾ ᱥᱟᱨᱟᱜᱷᱟᱹᱲᱤ ᱛᱟᱹᱝᱜᱤᱨᱮ ᱛᱟᱦᱮᱸᱭᱮᱱᱟᱭ ᱯᱟᱪᱷᱮ ᱛᱤᱱ ᱨᱮ ᱥᱩᱨᱟᱹᱭ ᱴᱷᱮᱱᱠᱷᱚᱱ ᱯᱷᱚᱱ ᱦᱤᱡᱩᱜ ᱟ ᱢᱮᱱᱛᱮ ᱾
ᱢᱤᱫ ᱦᱟᱴ ᱯᱟᱨᱚᱢ ᱮᱱᱟ…ᱹᱹ ᱵᱟᱨ ᱦᱟᱴ ᱯᱟᱨᱚᱢ ᱮᱱᱟ ᱾ ᱧᱮᱞ ᱧᱮᱞ ᱛᱮ ᱢᱤᱫ ᱵᱚᱝᱜᱟ ᱯᱟᱨᱚᱢ ᱮᱱᱟ ᱾ ᱮᱱᱦᱚᱸ ᱥᱩᱨᱟᱹᱭᱼᱟᱜ ᱯᱷᱚᱱ ᱪᱮ ᱢᱮᱥᱮᱡᱽ ᱜᱮ ᱵᱟᱭ ᱦᱮᱡ ᱞᱮᱱᱟ ᱾
ᱢᱟᱞᱚᱛᱤᱼᱭᱟᱜ ᱢᱚᱱᱮᱨᱮ ᱟᱹᱰᱤᱜᱟᱱ ᱵᱚᱛᱚᱨ ᱟᱨ ᱠᱩᱠᱞᱤ ᱦᱮᱡ ᱮᱱᱟ ᱾ ᱥᱩᱨᱟᱹᱭ ᱟᱨ ᱨᱚᱢᱮᱥ ᱚᱲᱟᱜ ᱠᱤᱱ ᱥᱮᱴᱮᱨᱮᱱᱟ ᱪᱮ ᱵᱟᱝᱼᱟ ? ᱯᱟᱪᱷᱮ ᱦᱚᱨ ᱠᱚᱨᱮ ᱪᱮᱫ ᱜᱷᱚᱴᱚᱱ ᱠᱚ ᱦᱩᱭ ᱮᱱᱟ? ᱯᱟᱪᱷᱮ ᱥᱩᱨᱟᱹᱭ ᱫᱚ ᱤᱧ ᱫᱚᱭ ᱦᱤᱲᱤᱧ ᱠᱤᱫᱤᱧᱟ, ᱮᱢᱟᱱ ᱠᱩᱠᱞᱤ ᱛᱮ ᱢᱚᱱᱮ ᱟᱰᱤ ᱥᱚᱠᱚᱛ ᱦᱩᱰᱩᱜ ᱦᱩᱰᱩᱜ ᱞᱮᱱᱟ ᱾ ᱟᱰᱤ ᱡᱩᱨ ᱨᱮ ᱨᱤᱠᱟᱹ ᱞᱮᱜᱼᱟ ᱠᱷᱚᱵᱚᱨ ᱧᱟᱢ ᱞᱟᱹᱜᱤᱫ, ᱤᱠᱷᱟᱹᱱ ᱪᱮᱫ ᱠᱷᱚᱵᱚᱨ ᱦᱚᱸ ᱵᱟᱝ ᱮ ᱧᱟᱢ ᱫᱟᱲᱮᱭᱟᱫᱼᱟ ᱾
ᱟᱰᱤ ᱫᱤᱱ ᱛᱟᱭᱚᱢ ᱟᱹᱰᱤ ᱠᱷᱚᱡᱽ ᱠᱷᱚᱵᱚᱨ ᱠᱟᱛᱮ ᱢᱟᱞᱚᱛᱤ ᱠᱷᱚᱵᱚᱨ ᱮ ᱧᱟᱢ ᱠᱮᱜ ᱟ ᱡᱮ ᱥᱩᱨᱟᱹᱭ ᱟᱨ ᱨᱚᱢᱮᱥ ᱫᱚ ᱢᱤᱫᱴᱟᱝ ᱮᱠᱥᱤᱰᱮᱱᱴ ᱛᱮ ᱱᱚᱣᱟ ᱫᱷᱟᱹᱨᱛᱤ ᱠᱷᱚᱱᱠᱤᱱ ᱫᱟᱱᱟᱝ ᱦᱟᱠᱟᱱᱟ ᱾ ᱠᱟᱨᱦᱟᱲ ᱯᱟᱴᱮᱫ ᱤᱫᱤᱠᱟᱛᱮ ᱟᱠᱤᱱᱟᱜ ᱦᱚᱲᱢᱚ ᱦᱚᱸ ᱡᱟᱱᱟᱢ ᱫᱤᱥᱚᱢ ᱛᱮ ᱵᱟᱭ ᱥᱮᱴᱮᱨ ᱫᱟᱲᱮᱭᱟᱫ ᱟ ᱾ ᱯᱩᱞᱤᱥ ᱦᱮᱯᱟᱡᱚᱛ ᱨᱮ ᱟᱹᱠᱤᱱᱟᱜ ᱜᱚᱡ ᱦᱚᱲᱢᱚ ᱚᱱᱛᱮᱨᱮᱜᱮ ᱞᱚ ᱛᱚᱨᱚᱡ ᱦᱩᱭ ᱟᱠᱟᱱᱟ ᱾ ᱱᱚᱣᱟ ᱠᱷᱚᱵᱚᱨ ᱟᱸᱡᱚᱢ ᱛᱮ ᱢᱟᱞᱚᱛᱤ ᱭᱟᱜ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱜᱮ ᱡᱚᱨᱚᱭᱮᱱᱟ ᱾ ᱪᱮᱫ ᱦᱚᱸ ᱵᱟᱝᱜᱮ ᱫᱤᱥᱟᱹ ᱫᱟᱲᱮᱭᱟᱫ ᱟ ᱾ ᱟᱡ ᱵᱟᱠᱷᱨᱟ ᱜᱚᱴᱟ ᱫᱷᱟᱹᱨᱛᱤ ᱧᱩᱛᱟᱹᱛ ᱜᱮ ᱟᱴᱠᱟᱨᱮᱱᱟ ᱾
