ᱦᱚᱲ ᱦᱚᱯᱚᱱᱟᱜ ᱡᱤᱭᱚᱱ
ᱥᱩᱞᱩᱠ ᱥᱟᱹᱜᱟᱹᱭ ᱞᱟᱦᱟᱱᱛᱤ
ᱞᱚ ᱨᱚᱸᱜᱚ ᱛᱚᱨᱚᱡᱚᱜ ᱠᱟᱱᱟ᱾
ᱱᱟᱦᱟᱜ ᱚᱱᱚᱲᱦᱮᱸ ᱨᱮ
ᱦᱟᱭᱪᱚᱜ ᱟᱲᱟᱝ ᱛᱟᱨᱠᱳᱜ ᱠᱟᱱᱟ
ᱞᱟᱞᱚᱪ ᱟᱡᱟᱨ ᱨᱮᱱᱟᱜ ᱨᱟᱱ ᱯᱟᱸᱡᱟ ᱨᱮ
ᱥᱮᱞᱮᱫ ᱵᱮᱜᱚᱨ ᱦᱚᱨᱟ ᱜᱮ ᱵᱟᱹᱱᱩᱜ᱾
ᱡᱟᱸᱦᱟᱭ ᱠᱚ ᱞᱟᱞᱚᱪ ᱟᱡᱟᱨ
ᱧᱟᱢ ᱮᱫ ᱠᱚᱣᱟ
ᱩᱱᱠᱩ ᱫᱚ ᱡᱤᱭᱚᱱ ᱵᱷᱳᱨ ᱠᱟᱹᱢᱤ ᱠᱟᱛᱮ ᱦᱚᱸ
ᱟᱫ ᱮᱫᱟ ᱠᱚ ᱢᱟᱱᱢᱤ ᱢᱟᱹᱱ ᱵᱷᱚᱨᱚᱢ᱾
ᱱᱚᱣᱟ ᱢᱟᱱᱢᱤ ᱢᱚᱱᱮ ᱡᱤᱣᱤ ᱡᱤᱭᱚᱱᱨᱮ
ᱡᱟᱸᱦᱟᱭ ᱞᱟᱞᱚᱪ ᱛᱮᱠᱚ ᱠᱟᱸᱲᱟᱜ ᱠᱟᱱᱟ
ᱩᱱᱠᱩ ᱫᱚ ᱟᱹᱰᱤ ᱵᱟᱲᱤᱡ ᱢᱚᱞᱚᱝ ᱟᱱ ᱜᱮ᱾
ᱪᱮᱫᱟᱜ ᱥᱮ ᱡᱤᱭᱚᱱ ᱵᱷᱳᱨ ᱠᱟᱹᱢᱤ ᱠᱟᱛᱮ
ᱡᱟᱸᱦᱟ ᱯᱟᱹᱛᱭᱟᱹᱣ ᱢᱟᱹᱱ ᱢᱟᱱᱚᱛ
ᱟᱨᱡᱟᱣ ᱞᱮᱱᱟ ᱚᱱᱟ ᱫᱚ ᱞᱟᱞᱚᱪ ᱟᱡᱟᱨ ᱛᱮ
ᱡᱚᱛᱚ ᱪᱟᱵᱟᱜ ᱠᱟᱱᱟ᱾
ᱡᱩᱣᱟᱹᱱ ᱠᱚ ᱥᱟᱢᱟᱝ ᱨᱮ
ᱞᱟᱞᱚᱪᱟᱱ ᱠᱟᱹᱢᱤ ᱥᱚᱫᱚᱨᱛᱮ
ᱱᱟᱥᱟᱜ ᱠᱟᱱᱟ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱢᱟᱹᱱ᱾
ᱡᱟᱸᱦᱟᱱ ᱠᱟᱹᱢᱤᱨᱮᱜᱮ ᱡᱩᱫᱤ ᱡᱟᱸᱦᱟᱭ
ᱦᱚᱲ ᱮᱲᱮ ᱯᱚᱥᱲᱟ ᱨᱮᱱᱟᱜ ᱮ ᱨᱤᱠᱟᱹᱭᱟ
ᱩᱱᱤ ᱫᱚᱭ ᱥᱟᱵ ᱧᱟᱢ ᱦᱚᱪᱚᱜ ᱜᱮᱭᱟ ᱾
ᱚᱠᱛᱚ ᱨᱮᱱᱟᱜ ᱵᱤᱪᱟᱹᱨ ᱨᱮ
ᱥᱟᱨᱤ ᱫᱚ ᱥᱚᱫᱚᱨᱚᱜ ᱜᱮᱭᱟ
ᱱᱟᱦᱟᱜ ᱚᱱᱚᱞᱤᱭᱟᱹ ᱠᱚ ᱵᱤᱪᱟᱹᱨ ᱮᱫᱟ
ᱚᱠᱚᱭ ᱟᱠᱟ ᱞᱮᱠᱟ ᱵᱚᱱ ᱠᱟᱹᱢᱤ ᱠᱟᱱᱟ?
ᱡᱟᱸᱦᱟᱭ ᱱᱟᱯᱟᱭ ᱮ ᱠᱟᱹᱢᱤᱭᱟ
ᱩᱱᱤ ᱫᱚ ᱱᱟᱯᱟᱭ ᱜᱮ ᱾
ᱟᱨ ᱡᱟᱸᱦᱟᱭ ᱠᱚ ᱢᱚᱱᱮᱜ ᱠᱟᱱᱟ
ᱫᱚᱢᱮ ᱟᱹᱠᱤᱞᱟᱱ ᱩᱱᱠᱩ ᱜᱮ ᱠᱚ
ᱥᱟᱵ ᱧᱟᱢᱚᱜ ᱠᱟᱱᱟ ᱛᱮᱦᱮᱧ ᱫᱚ᱾
ᱚᱠᱛᱚ ᱫᱚ ᱚᱠᱚᱭ ᱦᱚᱸ
ᱵᱟᱝ ᱮ ᱤᱠᱟᱹ ᱠᱚᱣᱟ
ᱥᱟᱨᱤ ᱫᱚ ᱥᱚᱫᱚᱨᱚᱜ ᱜᱮᱭᱟ
ᱡᱟᱸᱦᱟᱭ ᱡᱟᱸᱦᱟ ᱞᱮᱠᱟᱭ ᱠᱟᱹᱢᱤᱭᱟ
ᱩᱱᱤ ᱫᱚ ᱚᱱᱠᱟᱜᱮ ᱩᱯᱨᱩᱢᱚᱜ ᱟᱭ᱾
ᱟᱢ ᱥᱟᱸᱣ ᱥᱟᱹᱜᱟᱹᱭ ᱥᱟᱦᱟ ᱦᱚᱪᱚ
ᱚᱱᱟ ᱫᱚ ᱤᱧ ᱦᱚᱸ ᱮᱠᱟᱞ ᱵᱟᱹᱧ ᱠᱷᱚᱡᱟ᱾
ᱢᱮᱱᱠᱷᱟᱱ ᱡᱚᱠᱷᱚᱱ ᱤᱧ ᱵᱟᱲᱟᱭ ᱛᱤᱭᱩᱜ ᱠᱮᱫᱟ
ᱟᱢ ᱦᱚᱸ ᱞᱟᱞᱚᱪ ᱟᱡᱟᱨ ᱡᱚᱴᱟᱣ ᱟᱠᱟᱫ ᱢᱮᱭᱟ
ᱩᱱ ᱫᱚ ᱟᱫᱚ ᱪᱮᱫ ᱤᱧ ᱪᱤᱠᱟᱹᱭᱟ?
ᱢᱟᱨᱟᱝᱵᱩᱨᱩ ᱡᱟᱦᱮᱨᱮᱨᱟ ᱫᱷᱚᱨᱚᱢ ᱢᱚᱲᱮ ᱠᱚ ᱛᱩᱨᱩᱭ ᱠᱚ
ᱥᱤᱧᱵᱳᱸᱜᱟ ᱥᱟᱠᱠᱷᱤ ᱫᱚᱦᱚᱠᱟᱛᱮ ᱱᱚᱣᱟ ᱜᱮᱧ ᱱᱮᱦᱚᱨᱟ
ᱟᱢ ᱫᱚ ᱱᱟᱯᱟᱭ ᱩᱭᱦᱟᱹᱨᱟᱱ ᱦᱚᱲ
ᱚᱱᱟᱛᱮᱜᱮ ᱛᱚ ᱟᱢ ᱫᱚ ᱢᱟᱱᱢᱤ ᱞᱟᱜᱤᱫ ᱩᱭᱦᱟᱹᱨ ᱠᱟᱛᱮ
ᱥᱤᱧ ᱧᱤᱫᱟᱹ ᱵᱮᱸᱜᱮᱫ ᱠᱟᱛᱮ ᱨᱮᱸᱜᱮᱪ ᱛᱮᱛᱟᱝ ᱥᱟᱦᱟᱣ ᱠᱟᱛᱮ
ᱡᱤᱣᱤ ᱦᱚᱲᱢᱚ ᱟᱞᱟᱭ ᱠᱟᱛᱮ ᱚᱜ ᱚᱞ ᱠᱟᱱᱟᱢ
ᱫᱤᱥ ᱦᱩᱫᱤᱥ ᱠᱟᱛᱷᱟ
ᱟᱨ ᱟᱢᱜᱮ ᱡᱩᱫᱤ ᱞᱟᱞᱚᱪ ᱟᱡᱟᱨ ᱛᱮᱢ ᱠᱟᱸᱲᱟᱜ ᱟ
ᱛᱚᱵᱮᱠᱷᱟᱱ ᱯᱟᱹᱛᱭᱟᱹᱣ ᱫᱚ ᱚᱠᱟᱨᱮ ᱚᱠᱚᱭ ᱨᱮ
ᱡᱤᱭᱟᱹᱲ ᱛᱟᱦᱮᱱᱟ?
ᱟᱞᱚᱢ ᱱᱟᱥᱟᱣ ᱟ ᱟᱨᱡᱟᱣ ᱢᱟᱹᱱ
ᱟᱢᱟᱜ ᱟᱨᱡᱟᱣ ᱟᱠᱟᱫ ᱢᱟᱹᱱ ᱢᱚᱦᱚᱛ ᱫᱚ
ᱫᱤᱥᱚᱢ ᱦᱚᱲᱟᱜ ᱯᱟᱹᱛᱭᱟᱹᱣ ᱫᱩᱤᱟᱹᱲ ᱛᱷᱩᱢ
ᱫᱤᱞᱫᱟᱲᱮ ᱟᱞᱚᱢ ᱵᱟᱲᱤᱡᱟ ᱠᱟᱹᱢᱤ
ᱟᱞᱚᱢ ᱞᱚ ᱛᱚᱨᱚᱡᱟ ᱫᱤᱥᱚᱢ ᱦᱚᱲ ᱥᱟᱸᱣ
ᱟᱢᱟᱜ ᱥᱩᱞᱩᱠ ᱥᱟᱹᱜᱟᱹᱭ᱾
ᱼᱼᱼᱼ
