ᱪᱟᱸᱫᱚ ᱜᱚᱲᱦᱚᱱ ᱦᱚᱲᱢᱚ ᱫᱟᱨᱮ ᱨᱮ
ᱪᱟᱸᱫᱚᱭ ᱮᱢᱚᱜ ᱡᱤᱣᱤ ᱪᱮᱬᱮ
ᱩᱰᱟᱹᱣ ᱟᱵᱚᱜ ᱦᱟᱨᱮ ᱯᱷᱟᱨᱮ ᱾
ᱡᱚᱛᱚ ᱦᱚᱲᱢᱚ ᱨᱮᱜᱮ ᱢᱟᱭᱟᱢ
ᱡᱚᱛᱚ ᱡᱤᱣᱤ ᱨᱮᱜᱮ ᱢᱟᱭᱟ
ᱦᱚᱲᱢᱚ ᱡᱟᱹᱱᱤᱡ ᱢᱟᱭᱟᱢ ᱟᱯᱟᱱ ᱟᱹᱯᱤᱱ ᱾
ᱯᱩᱸᱰ ᱟᱨ ᱨᱟᱺᱜᱤᱭᱟᱹ ᱢᱟᱭᱟᱢ ᱨᱩᱠᱷᱤ ᱛᱮ
ᱢᱟᱹᱱᱢᱤ ᱦᱚᱲᱢᱚ ᱨᱮ, ᱢᱟᱭᱟᱢ ᱦᱚᱲᱢᱚ
ᱦᱟᱹᱴᱤᱧ ᱟᱠᱟᱱ ᱜᱮᱞᱵᱟᱨ ᱯᱟᱹᱨᱤᱥ ᱨᱮ ᱾
ᱢᱚᱸᱜᱚᱫ ᱢᱚᱱᱮ ᱡᱩᱞᱩᱥ ᱥᱮᱸᱜᱮᱞ
ᱦᱚᱲᱢᱚ ᱠᱟᱸᱰᱟ ᱨᱮ ᱵᱟᱥᱟᱝ ᱢᱟᱭᱟᱢ
ᱦᱮᱰᱮᱡ ᱞᱮᱱᱟ ᱫᱤᱥᱚᱢ ᱯᱷᱩᱨᱜᱟᱹᱞ ᱞᱟᱹᱜᱤᱱ᱾
ᱫᱤᱥᱚᱢ ᱯᱷᱩᱨᱜᱟᱹᱞ ᱠᱟᱛᱮ ᱦᱚᱸ
ᱱᱤᱛ ᱞᱩᱦᱩᱠ ᱞᱤᱰᱩᱨ ᱪᱷᱤᱞᱠᱟᱹ ᱪᱷᱤᱞᱠᱤ
ᱦᱤᱨᱤᱡ ᱯᱟᱹᱥᱤᱨᱚᱜ ᱠᱟᱱᱟ
ᱦᱚᱲᱢᱚ ᱫᱚᱲᱦᱚ ᱫᱟᱲᱮ᱾
ᱥᱤᱨᱡᱚᱱ ᱨᱮᱭᱟᱜ ᱫᱷᱟᱹᱲ ᱥᱩᱛᱩᱨ
ᱦᱚᱲᱢᱚ ᱪᱤᱠᱟᱹᱭ ᱮᱨᱮᱲ ᱠᱮᱭᱟ ᱡᱩᱣᱟᱹᱱ ᱡᱟᱹᱲᱤ
ᱛᱟᱲᱟᱢ ᱛᱩᱞᱩᱡ ᱵᱷᱚᱸᱡᱚᱲᱚᱜ ᱜᱮ ᱫᱷᱩᱛᱤ ᱟᱧᱪᱟᱨ ᱥᱟᱹᱲᱤ ᱾
ᱠᱚᱴᱟ ᱠᱚᱴᱟ ᱠᱚᱴᱟ ᱢᱤᱫᱟᱵᱚᱱ
ᱟᱹᱠᱤᱞ,ᱜᱮᱭᱟᱱ,ᱵᱩᱫᱽ,ᱵᱤᱨᱫᱟᱹ ᱱᱚᱝᱠᱟ
ᱛᱤᱸᱜᱩ ᱛᱤᱸᱜᱩ ᱛᱤᱸᱜᱩ ᱠᱮᱴᱮᱡᱟ ᱵᱚᱱ
ᱟᱵᱚ ᱯᱟᱹᱨᱥᱤ ᱥᱟᱶᱦᱮᱫ ᱟᱲᱮ
ᱥᱟᱶᱦᱮᱫ ᱨᱮᱜᱮ ᱡᱚᱛᱚ ᱥᱟᱶᱛᱟ ᱫᱚᱲᱦᱚ ᱫᱟᱲᱮ ᱾
ᱡᱩᱫᱤ ᱦᱚᱲᱢᱚ ᱨᱮ ᱢᱮᱱᱟᱜ ᱤᱱᱩᱝᱤᱭᱟᱹ
ᱰᱤᱯᱷᱮᱱᱰᱚᱨᱟᱜ ᱢᱟᱭᱟᱢ,
ᱫᱚᱞ ᱨᱮᱱᱤᱡ ᱟᱹᱜᱼᱭᱩᱨᱤᱭᱟᱹ ᱞᱮᱠᱟ ᱛᱮᱫᱚ ᱵᱟᱝ,
ᱯᱷᱟᱣᱩᱞ ᱠᱟᱛᱮᱢ ᱟᱴᱠᱟᱣ ᱜᱮᱭᱟ
ᱟᱢ ᱯᱟᱹᱦᱩᱲ ᱮ ᱴᱟᱰᱮᱭᱟᱠᱟᱱ ᱪᱤᱸᱰᱩ᱾
ᱪᱤᱠᱤ, ᱯᱟᱹᱨᱥᱤ, ᱥᱟᱶᱦᱮᱫ ᱪᱟᱨᱪᱟ
ᱚᱨᱡᱚ ᱫᱚ ᱧᱟᱢᱚᱜᱼᱟ ᱥᱮ ᱵᱟᱝ
ᱪᱟᱨᱪᱟ ᱠᱟᱜ ᱠᱷᱟᱱ ᱦᱟᱯᱮᱱ
ᱠᱟᱹᱢᱤ ᱨᱮ ᱞᱟᱜᱟᱣᱚᱜ ᱜᱮᱭᱟ
ᱡᱮᱢᱚᱱ ᱯᱚᱴᱚᱢ ᱢᱟᱨᱮ ᱡᱚᱡᱚ᱾
