ᱚᱱᱚᱞᱤᱭᱟᱹ ᱢᱟᱱᱥᱤᱝ ᱢᱟᱹᱡᱷᱤ ᱱᱟᱦᱟᱜ ᱡᱩᱜᱽ ᱨᱤᱱᱤᱡ ᱥᱟᱱᱛᱟᱲ ᱥᱟᱶᱦᱮᱫ ᱨᱮ ᱢᱤᱫ ᱟᱹᱰᱤ ᱵᱟᱰᱟᱭᱟᱱ ᱧᱩᱛᱩᱢ, ᱥᱟᱶᱦᱮᱫ ᱥᱟᱶ ᱡᱟᱹᱛᱤ ᱥᱟᱶᱛᱟ, ᱮᱱᱮᱡ ᱥᱮᱨᱮᱧ ᱞᱟᱭ ᱞᱟᱠᱪᱟᱨ ᱨᱮ ᱟᱹᱰᱤ ᱫᱩᱞᱟᱹᱲ ᱾ ᱚᱞ ᱛᱚᱞ ᱥᱟᱶᱛᱮ ᱨᱩᱥᱤᱠᱟ ᱦᱚᱸ ᱟᱹᱰᱤ ᱜᱮ ᱨᱩᱥᱤᱠᱟ ᱦᱟᱭ ᱾ ᱦᱟᱞᱮᱜᱮ ᱥᱤᱥᱩ ᱥᱟᱶᱦᱮᱫ ᱵᱟᱠᱷᱨᱟ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱥᱤᱨᱯᱟᱹᱭ ᱟᱛᱟᱝ ᱟᱠᱟᱫᱼᱟ ᱾ ᱱᱚᱣᱟ ᱚᱠᱛᱚᱨᱮ ᱟᱞᱮ ᱵᱤᱨ ᱢᱟᱹᱞᱤ ᱜᱷᱟᱨᱚᱸᱡᱽ ᱯᱟᱦᱴᱟ ᱠᱷᱱ ᱦᱚᱸ ᱢᱟᱹᱱ ᱢᱟᱹᱱᱥᱤᱝ ᱢᱟᱹᱡᱷᱤ ᱥᱟᱨᱦᱟᱣ ᱥᱟᱶ ᱟᱞᱮᱭᱤᱡ ᱥᱟᱯᱲᱮᱫ ᱯᱷᱟᱹᱜᱩ ᱵᱟᱥᱠᱮ ᱟᱡ ᱥᱟᱞᱟᱜ ᱮ ᱨᱚᱯᱚᱲ ᱞᱮᱱᱟ ᱾ ᱚᱱᱟ ᱨᱚᱯᱚᱲ ᱟᱨ ᱜᱟᱞᱚᱪ ᱞᱟᱛᱟᱨ ᱨᱮᱞᱮ ᱟᱹᱬᱛᱤ ᱠᱮᱫᱼᱟ ᱾

᱑- ᱯᱩᱭᱞᱩ ᱨᱮ ᱥᱤᱥᱩ ᱥᱟᱶᱦᱮᱫᱽ ᱥᱤᱨᱯᱷᱟ ᱧᱟᱢ ᱛᱤᱱᱟᱜ ᱨᱟᱹᱥᱠᱟ ᱵᱤᱱ ᱟᱹᱭᱠᱟᱣ ᱮᱫᱽ ᱟ?
ᱛᱮᱞᱟ – ᱵᱤᱨᱢᱟᱹᱞᱤ ᱯᱟᱛᱦᱟᱢ ᱥᱟᱹᱜᱩᱱ ᱫᱟᱨᱟᱢ ᱤᱠ ᱪᱟᱞ ᱟᱭᱟ, ᱤᱠ ᱥᱟᱨᱦᱟᱣ ᱞᱟᱹᱜᱤᱫ ᱾ ᱥᱤᱨᱯᱟᱹ ᱧᱟᱢ ᱞᱮᱠᱷᱟᱱ ᱠᱩᱥᱤ ᱨᱟᱹᱥᱠᱟᱹ ᱫᱚ ᱟᱹᱭᱠᱟᱹᱣᱚᱜ ᱜᱮᱭᱟ,ᱚᱱᱟ ᱥᱟᱶ-ᱥᱟᱶᱛᱮ ᱟᱭᱢᱟ ᱟᱸᱜᱤᱵᱷᱟᱨ ᱦᱚᱸ ᱛᱟᱨᱮᱱ ᱨᱮ ᱦᱤᱡᱩᱜ ᱟ ᱾ ᱪᱮᱫᱟᱜ ᱥᱮ ᱥᱤᱨᱯᱟᱹ ᱧᱟᱢ ᱛᱟᱭᱚᱢ ᱥᱟᱶᱦᱮᱫᱤᱭᱟᱹ ᱟᱨ ᱵᱟᱝ ᱢᱟ ᱯᱟᱴᱷᱚᱠᱤᱭᱟᱹ ᱠᱚᱣᱟᱜᱽ ᱟᱸᱥ ᱟᱯᱱᱟᱨ ᱴᱷᱮᱱ ᱵᱟᱹᱼᱛᱤᱜ ᱟ ᱾ ᱚᱱᱟ ᱟᱸᱥ ᱟᱨ ᱛᱮᱛᱟᱝ ᱛᱤᱱᱟᱹᱜ ᱤᱧ ᱛᱤᱨᱯᱤᱫᱽ ᱫᱟᱲᱮᱭᱟᱜ ᱟ, ᱚᱱᱟ ᱜᱮ ᱢᱚᱱᱮ ᱡᱤᱣᱤ ᱨᱮ ᱵᱚᱛᱚᱨ ᱛᱟᱦᱮᱱ ᱠᱟᱱᱟ ᱾

᱒- ᱛᱤᱥ ᱠᱷᱚᱱ ᱮᱢ ᱚᱞ ᱮᱫ-ᱟ ? ᱟᱨ ᱚᱞ ᱨᱮᱭᱟᱜ ᱩᱫᱜᱟᱹᱣ ᱫᱚ ᱚᱠᱟ ᱠᱷᱚᱱ ᱵᱤᱱ ᱧᱟᱢ ᱠᱮᱫ-ᱟ ?
ᱛᱮᱞᱟ – ᱤᱧ ᱚᱞ ᱛᱚᱞ ᱫᱚ ᱑᱙᱘᱖ ᱠᱷᱚᱱ ᱜᱮᱧ ᱮᱦᱚᱵ ᱟᱠᱟᱫᱟ ᱾ ᱵᱟᱵᱟ ᱢᱟᱹᱱ ᱵᱤᱠᱨᱚᱢ ᱢᱟᱹᱡᱷᱤ ( ᱥᱩᱱᱟᱹ ᱢᱟᱥᱴᱚᱨ ᱧᱩᱛᱩᱢ ᱛᱮ ᱵᱟᱹᱲᱛᱤ ᱦᱚᱲ ᱠᱚ ᱵᱟᱰᱟᱭ ᱮᱭᱟ ) ᱚᱞᱪᱤᱠᱤ ᱢᱟᱪᱮᱫ ᱮ ᱛᱟᱦᱮᱸ ᱠᱟᱱᱟ ᱟᱨ ᱤᱧ ᱠᱩᱢᱟᱹᱝ ᱢᱟᱹᱱ ᱨᱟᱢᱠᱤᱥᱱᱚ ᱴᱤᱰᱩ ᱢᱤᱫ ᱚᱱᱚᱲᱦᱤᱭᱟᱹ ᱾ ᱠᱩᱢᱟᱹᱝ ᱟᱞᱮ ᱚᱲᱟᱜ ᱛᱮ ᱦᱮᱡ ᱞᱮᱱ ᱠᱷᱟᱱ ᱵᱟᱵᱟ ᱛᱤᱠᱤᱱ ᱠᱩᱢᱟᱹᱝ ᱡᱟᱦᱟᱸ ᱠᱚᱭ ᱚᱞ ᱠᱟᱜᱼᱟ ᱚᱱᱟ ᱨᱮᱭᱟᱜ ᱠᱤᱱ ᱛᱩᱱᱠᱷᱤᱭᱟ ᱾ ᱢᱮᱱ ᱜᱟᱱᱚᱜ ᱟ ᱠᱩᱢᱟᱹᱝ ᱚᱞᱟᱜ ᱚᱱᱚᱲᱦᱮ ᱤᱫᱤ ᱠᱟᱛᱮ ᱠᱤᱱ ᱛᱷᱩᱛᱤᱭᱟ ᱾ ᱤᱧ ᱫᱚ ᱟᱹᱠᱤᱱ ᱥᱩᱨ ᱨᱮᱠᱤᱱ ᱫᱩᱲᱩᱵ ᱤᱧᱟ ᱾ ᱠᱩᱢᱟᱹᱝ ᱫᱚ ᱢᱤᱫ ᱢᱤᱫ ᱠᱷᱚᱫᱽ ᱮ ᱯᱟᱲᱦᱟᱣ ᱚᱪᱚᱭᱤᱧᱟ ᱟᱨ ᱟᱹᱠᱤᱱ ᱫᱚ ᱚᱱᱟ ᱨᱮᱱᱟᱜ ᱠᱤᱱ ᱛᱷᱩᱛᱤᱭᱟ ᱾ ᱱᱚᱶᱟ ᱥᱟᱱᱟᱢᱟᱜ ᱠᱤᱫᱩᱜ ᱡᱚᱢ ᱠᱟᱛᱮ ᱧᱤᱫᱟᱹ ᱵᱮᱲᱟ ᱥᱟᱱᱟᱢ ᱠᱚ ᱡᱟᱹᱯᱤᱫ ᱛᱟᱭᱚᱢ ᱜᱮᱠᱤᱱ ᱮᱦᱚᱵᱟ ᱾ ᱤᱧ ᱦᱚᱧ ᱫᱩᱫᱩᱲᱩᱢ ᱜᱮᱭᱟ ᱮᱱᱦᱚᱸ ᱠᱤᱱ ᱯᱟᱲᱦᱟᱣ ᱚᱪᱚᱭᱤᱧᱟ ᱾ ᱠᱩᱢᱟᱹᱝ ᱦᱤᱡᱩᱜ ᱯᱤᱪᱷᱤ ᱱᱚᱣᱟ ᱠᱚᱫᱚ ᱡᱟᱣ ᱜᱮ ᱦᱩᱭᱩᱜ ᱟ ᱾ ᱟᱫᱚ ᱚᱱᱮ ᱚᱱᱠᱟ ᱛᱮ ᱤᱧᱟᱜ ᱚᱱᱚᱲᱦᱮ ᱥᱟᱶ ᱥᱟᱹᱜᱟᱹᱭ ᱫᱚ ᱛᱚᱯᱚᱞ ᱤᱫᱤ ᱮᱱᱟ ᱾

᱓. ᱥᱟᱶᱦᱮᱫ ᱪᱟᱨᱪᱟ ᱨᱮ ᱪᱮᱫ ᱠᱚ ᱮᱴᱠᱮᱴᱚᱬᱮᱢ ᱧᱟᱢ ᱟᱠᱟᱫᱟ ᱟᱨ ᱚᱱᱟ ᱠᱚ ᱚᱠᱟ ᱞᱮᱠᱟᱢ ᱥᱟᱦᱟ ᱟᱠᱟᱫᱟ?
ᱛᱮᱞᱟ – ᱤᱧ ᱥᱟᱶᱦᱮᱫ ᱡᱤᱭᱚᱱ ᱨᱮ ᱮᱴᱠᱮᱴᱚᱬᱮ ᱫᱚ ᱵᱟᱹᱧ ᱧᱟᱢ ᱟᱠᱟᱫᱟ ᱾ ᱚᱲᱟᱜ ᱨᱮ ᱠᱟᱹᱣᱰᱤ ᱟᱱᱟᱴ ᱠᱚ ᱛᱟᱦᱮᱸ ᱠᱟᱱ ᱤᱫᱤ ᱠᱟᱱᱛᱮ ᱟᱹᱰᱤ ᱟᱬᱜᱟᱛ (᱑᱙᱘᱑) ᱨᱮ ᱴᱟᱴᱟ ᱥᱴᱤᱞ ᱨᱮᱧ ᱜᱩᱛᱤ ᱞᱮᱱᱟ ᱢᱮᱱᱮᱫ ᱪᱟᱹᱠᱨᱤᱧ ᱥᱟᱵ ᱠᱮᱫᱟ ᱾ ᱟᱫᱚ ᱚᱠᱛᱚ ᱯᱟᱨᱚᱢ ᱥᱮ ᱠᱷᱮᱢᱟᱣ ᱞᱟᱹᱜᱤᱫ ᱚᱱᱚᱲᱦᱮ ᱠᱚ ᱚᱞᱤᱧ ᱮᱦᱚᱵ ᱠᱮᱫᱟ ᱾ ᱢᱟᱹᱱ ᱥᱭᱟᱢ ᱥᱤ ᱴᱩᱰᱩ ᱢᱤᱫ ᱚᱠᱛᱮ ᱢᱮᱛᱟᱫ ᱫᱤᱧᱟᱭ ᱛᱮᱧᱟᱝ ᱠᱮᱥᱮᱴ ᱠᱚᱨᱮ ᱢᱟ ᱟᱭᱢᱟ ᱥᱮᱨᱮᱧ ᱠᱚ ᱛᱟᱢ ᱩᱪᱷᱟᱹᱱ ᱥᱚᱫᱚᱨᱜ ᱠᱟᱱᱟ, ᱚᱱᱟ ᱫᱚ ᱦᱤᱡᱩᱜ ᱠᱟᱱ ᱫᱤᱱ ᱨᱮ ᱟᱫ ᱫᱟᱲᱮᱭᱟᱜ ᱟ ᱾ ᱚᱱᱟ ᱥᱮᱨᱮᱧ ᱠᱚ ᱫᱚ ᱯᱚᱛᱚᱵ ᱞᱮᱠᱟ ᱛᱮᱞᱟᱝ ᱪᱷᱟᱯᱟ ᱥᱚᱫᱚᱨ ᱟ ᱾ ᱚᱱᱮ ᱚᱱᱠᱟ ᱛᱮ ᱟᱫᱚ ᱟᱡ ᱜᱮ ᱪᱷᱟᱯᱟ ᱟᱫ ᱫᱤᱧᱟ ᱾ ᱱᱚᱜᱼᱚᱭ ᱱᱚᱝᱠᱟ ᱛᱮ ᱤᱧᱟᱜ ᱥᱟᱶᱦᱮᱫ ᱰᱟᱦᱟᱨ ᱨᱮ ᱛᱟᱲᱟᱢ ᱮᱛᱚᱦᱚᱵ ᱟᱠᱟᱱᱟ ᱾

᱔. ᱟᱢᱟᱜ ᱩᱭᱦᱟᱹᱨ ᱛᱮ ᱥᱟᱱᱛᱟᱲᱤ ᱥᱟᱶᱦᱮᱫ ᱫᱚ ᱛᱤᱱᱟᱹᱜ ᱞᱟᱦᱟ ᱟᱠᱟᱱᱟ? ᱮᱴᱟᱜ ᱵᱷᱟᱨᱚᱛᱤᱭᱟᱹ ᱥᱟᱶᱦᱮᱫ ᱠᱷᱚᱱ ᱥᱟᱱᱛᱟᱲᱤ ᱥᱟᱶᱦᱮᱫ ᱫᱚ ᱛᱟᱭᱚᱢ ᱟᱠᱟᱱᱟ?
ᱛᱮᱞᱟ – ᱟᱵᱚᱣᱟᱜ ᱥᱟᱶᱦᱮᱫ ᱫᱚ ᱢᱮᱱ ᱜᱟᱱᱚᱜ ᱟ ᱞᱮᱛᱟᱲ ᱞᱟᱦᱟ ᱤᱫᱤᱜ ᱠᱟᱱ ᱜᱮᱭᱟ ᱾ ᱮᱴᱟᱜ ᱜᱟᱸᱛᱟᱠ ᱠᱚ ᱵᱚᱱ ᱥᱮᱴᱮᱨ ᱤᱫᱤᱭᱮᱫ ᱠᱚ ᱜᱮᱭᱟ ᱾ ᱢᱮᱱᱠᱷᱟᱱ ᱤᱧᱟᱜ ᱩᱭᱦᱟᱹᱨ ᱫᱤᱥᱟᱹ ᱛᱮᱫᱚ ᱟᱵᱚᱣᱟᱜ/ᱚᱞ ᱯᱚᱛᱚᱵ ᱠᱚ ᱮᱴᱟᱜ ᱯᱟᱹᱨᱥᱤ ᱛᱮ ᱛᱚᱨᱡᱚᱢᱟ ᱞᱮᱠᱷᱟᱱ ᱯᱟᱞᱮ ᱟᱹᱰᱤ ᱱᱟᱯᱟᱭᱚᱜᱼᱟ ᱾ ᱮᱴᱟᱜ ᱜᱟᱸᱛᱟᱠ ᱥᱮ ᱯᱟᱹᱨᱥᱤ ᱨᱮᱱ ᱠᱚ ᱟᱵᱚᱣᱟᱜ ᱯᱚᱛᱚᱵ/ ᱥᱟᱶᱦᱮᱫ ᱤᱫᱤ ᱠᱟᱛᱮ ᱛᱩᱞᱟᱹ ᱡᱚᱠᱷᱟ ᱦᱩᱭᱩᱜ ᱼᱟ ᱾ ᱩᱱᱨᱮ ᱮᱱᱟᱝ ᱛᱤᱱᱟᱹᱜ ᱟᱵᱚᱣᱟᱜ ᱥᱟᱶᱦᱮᱫ ᱟᱠᱚ ᱵᱟᱨᱟ ᱵᱟᱹᱨᱤ ᱟᱠᱟᱱᱟ ᱥᱮ ᱵᱟᱝ ᱚᱱᱟ ᱧᱮᱞ ᱧᱟᱢᱚᱜᱼᱟ ᱥᱮ ᱴᱷᱤᱠᱟᱹᱜᱼᱟ ᱾

᱕ᱹ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱥᱤᱥᱩ ᱥᱟᱶᱦᱮᱫ ᱫᱚ ᱚᱠᱟ ᱞᱮᱠᱟ ᱢᱮᱱᱟᱜᱼᱟ, ᱛᱤᱱᱟᱹᱜ ᱞᱟᱦᱟ ᱟᱠᱟᱱᱟ?
ᱛᱮᱞᱟ – ᱥᱤᱥᱩ ᱥᱟᱶᱦᱮᱫ ᱫᱚ ᱥᱤᱥᱩ ᱜᱮᱭᱟ ᱢᱮᱱ ᱜᱟᱱᱚᱜ ᱟ ᱾ᱪᱮᱫᱟᱜ ᱥᱮ ᱤᱧᱟᱜ ᱵᱟᱰᱟᱭ ᱞᱮᱠᱟᱛᱮ ᱥᱤᱥᱩ ᱥᱟᱶᱦᱮᱫ/ᱯᱚᱛᱚᱵ ᱦᱚᱸ ᱥᱮᱬᱟ ᱠᱚᱜᱮ ᱵᱚᱱ ᱯᱟᱲᱦᱟᱣ ᱠᱟᱱᱟ ᱾ᱤᱧᱟᱜ ᱢᱮᱱ ᱨᱮᱱᱟᱜ ᱞᱚᱲᱟ ᱫᱚ ᱱᱚᱣ ᱟᱜᱮ, ᱥᱤᱥᱩ ᱠᱚ ᱞᱟ.ᱜᱤᱫ ᱡᱟᱦᱟᱸᱯᱚᱛᱚᱵ ᱚᱞᱚᱜᱚᱜ ᱠᱟᱱᱟ ᱚᱱᱟ ᱡᱩᱫᱤ ᱥᱤᱥᱩ ᱜᱮ ᱵᱟ.ᱲᱛᱤ ᱠᱟᱨ ᱛᱮᱠᱚ ᱯᱟᱲᱦᱟᱣ ᱠᱷᱟᱱ ᱟ ᱹᱰᱤ ᱱᱟᱯᱟᱭᱚᱜ ᱟ ᱾ ᱩᱱᱠᱩᱣᱟᱜ ᱛᱮᱞᱟ ᱥᱮ ᱩᱱᱠᱩᱣᱟᱜ ᱛᱩᱞᱟ-ᱡᱚᱠᱷᱟ ᱛᱮ ᱞᱟ.ᱭ ᱨᱩᱣᱟ.ᱲ ᱠᱟᱛᱷᱟ ᱟᱠᱚᱣᱟᱜ ᱢᱚᱪᱟ ᱛᱮ ᱟᱸᱡᱚᱢ ᱥᱟᱱᱟ ᱠᱟᱱᱟ ᱾

᱖. ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱭᱟᱜ ᱚᱠᱟ ᱦᱟᱹᱴᱤᱧ ᱫᱚ ᱟᱵᱚ ᱵᱚ ᱰᱷᱤᱞᱟᱹᱣ ᱧᱚᱜ ᱟᱠᱟᱫᱟ ᱟᱨ ᱵᱟᱝᱢᱟ ᱵᱟᱹᱲᱛᱤ ᱢᱮᱫ ᱞᱩᱛᱩᱨᱟᱜ ᱨᱮᱭᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ ᱢᱮᱱᱛᱮ ᱟᱢᱮᱢ ᱢᱚᱱᱮ ᱮᱫᱟ?
ᱛᱮᱞᱟ –ᱦᱟᱹᱴᱤᱧ ᱢᱮᱱ ᱞᱮᱠᱷᱟᱱ ᱟᱭᱢᱟ ᱜᱮ ᱠᱚᱢᱚᱜ ᱠᱟᱱᱟ ᱾ ᱰᱨᱟᱢᱟ/ᱱᱟᱴᱚᱠ ᱞᱟᱹᱫᱟᱹᱲᱤ Travelling/ᱭᱟᱛᱨᱟ ᱵᱟᱨᱤᱛᱟᱱᱛ ᱮᱢᱟᱱ ᱠᱚ ᱢᱮᱱ ᱜᱟᱱᱚᱜ ᱟ ᱥᱟᱱᱟᱢᱟᱜ ᱜᱮ ᱟᱨ ᱦᱚᱸ ᱵᱟᱹᱲᱛᱤ ᱠᱟᱛᱮ ᱵᱚᱱ ᱚᱞ ᱛᱚᱞ ᱠᱷᱟᱱ ᱤᱧᱟᱜ ᱩᱭᱦᱟᱹᱨ ᱛᱮ ᱦᱚᱸ ᱱᱟᱯᱟᱭᱚᱜᱼᱟ ᱾

᱗. ᱯᱷᱤᱞᱤᱢ ᱟᱨ ᱵᱟᱝᱢᱟ ᱥᱮᱨᱮᱧ ᱫᱩᱱᱤᱭᱟᱹ ᱠᱷᱚᱱᱟᱜ ᱥᱟᱶᱦᱮᱫ ᱫᱩᱱᱤᱭᱟᱹ ᱛᱮ ᱚᱠᱟ ᱞᱮᱠᱟᱛᱮᱢ ᱦᱮᱡ ᱮᱱᱟ?
ᱛᱮᱞᱟ –ᱱᱟᱯᱟᱭ ᱠᱩᱠᱞᱤ, ᱥᱟᱶᱦᱮᱫ ᱫᱩᱱᱤᱭᱟᱹ ᱛᱮ ᱟᱹᱜᱩ ᱞᱟᱹᱜᱤᱫ ᱫᱚ ᱟᱵᱚᱭᱤᱡ ᱡᱩᱣᱟᱹᱱ ᱟᱜᱭᱩᱨᱤᱭᱟᱹ ᱢᱟᱹᱱ ᱥᱭᱟᱢ ᱥᱤ ᱴᱩᱰᱩ ᱜᱚᱢᱠᱮ ᱠᱟᱱᱟᱭ ᱾ ᱩᱱᱤ ᱜᱮ ᱢᱤᱫ ᱫᱤᱱ ᱦᱤᱞᱚᱜ ᱮ ᱢᱮᱛᱟᱫ ᱫᱤᱧᱟ- ᱥᱮᱨᱮᱧ ᱠᱟᱹᱦᱱᱤ ᱠᱚᱢᱟᱢ ᱚᱞᱮᱫ ᱜᱮᱭᱟ ᱚᱠᱟ ᱦᱤᱞᱚᱜ ᱠᱮᱥᱮᱴ ᱥᱮ ᱥᱤ ᱰᱤᱱ ᱨᱮᱱᱟᱜ ᱵᱮᱵᱷᱟᱨ ᱪᱟᱵᱟ ᱞᱮᱱ ᱠᱷᱟᱱ ᱟᱢ ᱦᱚᱸᱢ ᱟᱫᱚᱜᱼᱟ ᱾ ᱟᱢᱟᱜ ᱚᱞ ᱥᱮᱨᱮᱧ ᱟᱨ ᱠᱟᱹᱦᱱᱤ ᱠᱚ ᱢᱤᱫ ᱢᱤᱫ ᱛᱮᱞᱟᱝ ᱪᱷᱟᱯᱟ ᱥᱚᱫᱚᱨ ᱟ ᱾ ᱤᱧ ᱦᱚᱸᱧ ᱩᱭᱦᱟᱹᱨ ᱠᱮᱫᱟ ᱟᱹᱰᱤ ᱥᱟᱹᱨᱤ ᱠᱟᱛᱷᱟᱭ ᱞᱟᱹᱭ ᱠᱮᱫᱟ ᱾ ᱥᱟᱬᱮᱥ ᱡᱩᱜᱽ ᱨᱮ ᱥᱟᱱᱟᱢᱟᱜ ᱞᱮᱛᱟᱲ ᱵᱚᱫᱚᱞ ᱤᱫᱤᱜ ᱠᱟᱱᱟ, ᱯᱚᱛᱚᱵ ᱞᱮᱠᱟᱛᱮ ᱪᱷᱟᱯᱟ ᱥᱚᱫᱚᱨ ᱠᱟᱜ ᱜᱮ ᱱᱟᱯᱟᱭᱚᱜᱼᱟ ᱾ ᱱᱚᱜᱼᱚᱭ ᱱᱚᱝᱠᱟ ᱛᱮ ᱯᱷᱤᱞᱤᱢ ᱫᱩᱱᱤᱭᱟᱹ ᱠᱷᱚᱱ ᱥᱟᱶᱦᱮᱫ ᱫᱩᱱᱤᱭᱟᱹ ᱛᱮᱧ ᱦᱮᱡ ᱥᱮᱴᱮᱨ ᱮᱱᱟ ᱾

᱘. ᱟᱹᱰᱤ ᱚᱠᱛᱚ ᱨᱮ ᱠᱟᱛᱷᱟ ᱟᱸᱧᱡᱚᱢᱚᱜᱼᱟ ᱞᱟᱦᱟ ᱟᱠᱟᱱ ᱥᱟᱶᱦᱮᱫ ᱞᱮᱠᱟ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱫᱚ Quality ᱥᱟᱶᱦᱮᱫ ᱵᱟᱝ ᱚᱞᱚᱜ ᱠᱟᱱᱟ ᱾ ᱱᱚᱣᱟ ᱪᱮᱛᱟᱱ ᱨᱮ ᱪᱮᱫ ᱮᱢ ᱢᱮᱱᱟ?
ᱛᱮᱞᱟ –ᱚᱞᱚᱜ ᱠᱟᱱ ᱜᱮᱭᱟ ᱵᱟᱝ ᱢᱮᱱ ᱛᱮᱫᱚ ᱵᱟᱝ, ᱯᱟᱲᱦᱟᱣ ᱤᱡ ᱚᱠᱟ ᱴᱟᱜ ᱪᱚ ᱠᱣᱟᱞᱤᱴᱤ ᱢᱚᱱᱮᱭᱮᱫ ᱚᱱᱟ ᱫᱚ ᱩᱱᱤᱭᱟᱜ ᱚᱱᱛᱚᱨ ᱢᱚᱱᱮ ᱜᱮ ᱞᱟᱹᱭ ᱫᱟᱲᱮᱭᱟᱜᱼᱟ ᱾ ᱥᱟᱱᱟᱢ ᱦᱚᱲᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱡᱩᱫᱟᱹ ᱡᱩᱫᱟᱹ ᱜᱮ ᱛᱟᱵᱚᱱᱟ ᱾

᱙. ᱥᱤᱨᱯᱷᱟᱹ ᱫᱚ ᱢᱤᱫ ᱥᱟᱶᱦᱮᱫᱤᱭᱟᱹ ᱞᱟᱹᱜᱤᱫ ᱛᱤᱱᱟᱹᱜ ᱞᱟᱹᱠᱛᱤᱭᱟ, ᱛᱤᱱᱟᱹᱜ ᱡᱟᱹᱨᱩᱲᱟ?
ᱛᱮᱞᱟ –ᱥᱟᱶᱦᱮᱫᱤᱭᱟᱹ ᱞᱟᱹᱜᱤᱫ ᱥᱤᱨᱯᱷᱟᱹ ᱫᱚ ᱩᱱᱟᱹᱜ ᱵᱟᱝ ᱞᱟᱹᱠᱛᱤᱭᱟ, ᱡᱟᱦᱟᱸᱭ ᱥᱟᱶᱦᱮᱤ ᱟᱜ ᱦᱚᱲᱢᱚ ᱥᱤᱨ ᱨᱮ ᱥᱟᱶᱦᱮᱫ ᱛᱤᱡᱩᱭ ᱡᱟᱱᱟᱢ ᱞᱮᱱ ᱠᱷᱟᱱ ᱩᱱᱤ ᱥᱟᱶᱦᱮᱫᱤᱭᱟᱹ ᱫᱚ ᱟᱡᱟᱜ ᱥᱟᱶᱦᱮᱫ ᱪᱟᱨᱪᱟ ᱫᱚ ᱡᱤᱣᱤᱫ ᱛᱟᱦᱮᱱ ᱵᱷᱩᱨ ᱵᱟᱭ ᱵᱟᱹᱜᱤᱭᱟ ᱾ ᱢᱤᱫ ᱵᱟᱨ ᱦᱚᱲ ᱟᱡᱟᱜ ᱯᱚᱛᱚᱵ ᱞᱟᱹᱜᱤᱫ ᱵᱟᱨ ᱠᱟᱛᱷᱟ ᱥᱟᱨᱦᱟᱣᱱᱟ ᱠᱟᱛᱷᱟ ᱟᱧᱡᱚᱢ ᱞᱮᱠᱷᱟᱱ ᱚᱠᱥᱤᱡᱮᱱ ᱮ ᱧᱟᱢ ᱠᱮᱫ ᱞᱮᱠᱟ ᱟᱨᱦᱚᱸᱭ ᱪᱷᱩᱴᱟᱹᱣᱜᱼᱟ ᱾ ᱢᱮᱱ ᱜᱟᱱᱚᱜ ᱟ ᱥᱤᱨᱯᱷᱟᱹ ᱫᱚ ᱢᱤᱫ ᱥᱟᱶᱦᱮᱫᱤᱭᱟᱹ ᱞᱟᱹᱜᱤᱫ ᱫᱚ ᱮᱱᱟᱨᱡᱤ ᱴᱚᱱᱤᱠ ᱠᱟᱱᱟ ᱾

᱑᱐. ᱥᱤᱨᱯᱷᱟᱹ ᱧᱟᱢ ᱨᱮ ᱵᱤᱞᱚᱢ ᱮᱱ ᱞᱮᱠᱟᱢ ᱢᱚᱱᱮ ᱮᱫᱟ?
ᱛᱮᱞᱟ –ᱵᱟᱝ ᱤᱧ ᱜᱮ ᱵᱤᱞᱚᱢ ᱛᱮ ᱥᱟᱶᱦᱮᱫ ᱥᱚᱠᱲᱟ ᱛᱮᱧ ᱟᱬᱜᱚ ᱟᱠᱟᱱᱟ ᱾

᱑᱑. ᱞᱟᱦᱟ ᱟᱠᱟᱱ ᱥᱟᱶᱦᱮᱫ ᱥᱟᱶ ᱥᱚᱢᱟᱱᱚᱜ ᱞᱟᱹᱜᱤᱫ ᱚᱠᱟ ᱞᱮᱠᱟ ᱠᱟᱹᱢᱤ ᱦᱩᱭ ᱟᱵᱚᱱᱟ ᱚᱱᱟ ᱞᱟᱹᱜᱤᱫ ᱛᱤᱱᱟᱹᱜ ᱚᱠᱛᱚ ᱞᱟᱜᱟᱣᱜᱼᱟ?
ᱛᱮᱞᱟ –ᱞᱟᱦᱟ ᱟᱠᱟᱱ ᱥᱟᱶᱦᱮᱫ ᱥᱟᱶ ᱥᱚᱢᱟᱱᱚᱜ ᱞᱟᱹᱜᱤᱫ ᱟᱨ ᱚᱠᱛᱚ ᱤᱫᱤ ᱠᱟᱛᱮ ᱫᱚ ᱤᱧ ᱫᱚᱸᱧ ᱢᱮᱱᱟ ᱟᱵᱚ ᱨᱮᱱ ᱯᱚᱛᱚᱵ ᱯᱟᱴᱷᱚᱠᱤᱭᱟᱹ / ᱯᱟᱲᱦᱟᱣ ᱟᱨ ᱠᱤᱨᱤᱧ ᱛᱮᱱ ᱠᱚᱠᱚ ᱵᱟᱹᱲᱛᱤ ᱤᱫᱤ ᱞᱮᱱᱠᱷᱟᱱ ᱜᱮ ᱟᱵᱚ ᱚᱱᱚᱞᱤᱭᱟᱹ ᱠᱚᱣᱟᱜ ᱦᱚᱲᱢᱚ ᱨᱮ ᱚᱠᱥᱤᱡᱮᱱ ᱵᱟᱹᱲᱛᱤ ᱜᱚᱫᱚᱜ ᱛᱮ ᱟᱨ ᱦᱚᱸ ᱚᱞ ᱵᱮᱞ ᱵᱚᱱ ᱥᱮᱬᱟ ᱤᱫᱤ ᱜᱚᱫᱟ, ᱚᱱᱠᱟ ᱤᱧᱟᱜ ᱯᱟᱹᱛᱭᱟᱹᱣ ᱾

᱑᱒. ᱢᱩᱪᱟᱹᱫ ᱠᱩᱠᱞᱤ ᱾ ᱱᱤᱛ ᱠᱚ ᱡᱩᱣᱟᱹᱱ ᱚᱱᱚᱞᱤᱭᱟᱹ ᱠᱚ ᱪᱮᱫ ᱮᱢ ᱢᱮᱛᱟ ᱠᱚᱣᱟ, ᱪᱮᱫ ᱥᱟᱱᱫᱮᱥ ᱮᱢ ᱮᱢᱟ ᱠᱚᱣᱟ?
ᱛᱮᱞᱟ –ᱡᱩᱣᱟᱹᱱ ᱚᱱᱚᱞᱤᱭᱟᱹ ᱠᱚᱴᱷᱮᱫ ᱤᱧᱟᱜ ᱥᱟᱱᱫᱮᱥ ᱫᱚ ᱱᱚᱣᱟ ᱱᱚᱣᱟ ᱜᱮ ᱡᱮ ᱥᱟᱱᱟᱢ ᱞᱮᱠᱟᱱ ᱯᱚᱛᱚᱵ ᱯᱟᱲᱦᱟᱣ ᱛᱟᱵᱚᱱ ᱯᱮ ᱮᱱᱠᱷᱟᱱ ᱟᱹᱰᱤ ᱠᱤᱪᱷᱩ ᱟᱹᱲᱟᱹ ᱠᱚ ᱡᱟᱴᱟᱜ ᱡᱟᱨᱣᱟ ᱜᱟᱱᱚᱜ ᱛᱮ ᱚᱞ ᱛᱚᱞ ᱨᱮ ᱟᱭᱢᱟ ᱜᱚᱲᱚ ᱧᱟᱢᱚᱜ ᱟ ᱾ ᱞᱮᱛᱟᱲ ᱪᱷᱩᱴᱟᱹᱣ ᱠᱚᱜ ᱢᱟ , ᱮᱱ ᱮᱱᱟᱝ ᱡᱚᱥ ᱛᱮᱫᱚᱢ ᱥᱮᱴᱮᱨ ᱠᱮᱭᱟ, ᱵᱟᱝ ᱢᱟ ᱚᱱᱟᱢ ᱦᱟᱢᱮᱴ ᱠᱮᱭᱟ ᱾

ᱢᱩᱪᱟᱹᱫ ᱨᱮ ᱵᱤᱨᱢᱟᱹᱞᱤ ᱯᱟᱛᱷᱟᱢ ᱥᱚᱦᱮᱛᱤᱭᱟᱹ/ᱯᱟᱴᱷᱚᱠᱤᱭᱟᱹ ᱠᱚ ᱤᱧᱟᱜ ᱜᱩᱱᱢᱟᱱᱟᱣ ᱢᱟᱱᱚᱛ ᱡᱚᱦᱟᱨ ᱟᱨ ᱫᱩᱞᱟᱹᱲ ᱾