ᱢᱮᱛᱟᱢᱟᱹᱧ ᱪᱟᱥᱟ
ᱫᱚᱦᱚᱭ ᱢᱮ ᱟᱥᱟ
ᱢᱮᱱᱟᱜ ᱛᱟᱢᱟ ᱦᱟᱥᱟ
ᱪᱟᱜ-ᱮᱢ ᱟᱹᱭᱠᱟᱹᱣ ᱮᱫᱟ ᱠᱟᱥᱟ?
ᱠᱟᱹᱢᱤ ᱢᱮ ᱨᱤᱠᱤᱲ
ᱟᱞᱚᱢ ᱟᱹᱭᱠᱟᱹᱣᱟ ᱥᱤᱠᱤᱲ
ᱫᱷᱩᱨᱟᱹᱣ ᱛᱟᱦᱮᱸᱱ ᱢᱮ ᱨᱤᱠᱤᱲ
ᱟᱨ ᱵᱟᱝᱠᱷᱟᱱ ᱮᱢ ᱤᱥᱤᱲ ᱾
ᱵᱮᱨᱮᱫ ᱢᱮ ᱫᱮᱞᱟᱝ
ᱨᱤᱭᱟᱹᱜ ᱟᱞᱟᱝ
ᱠᱟᱹᱢᱤᱭᱟᱞᱟᱝ ᱟᱨ
ᱵᱟᱝᱠᱷᱟᱱ ᱮᱠᱷᱮᱱ ᱪᱮᱞᱟᱝ ᱾
ᱵᱮᱨᱮᱫ ᱢᱮ ᱥᱤᱭᱟᱹᱜ
ᱤᱧ ᱫᱚ ᱢᱮᱨᱚᱢ ᱛᱤᱭᱟᱹᱜ
ᱵᱟᱞᱟᱝ ᱨᱤᱭᱟᱹᱜ
ᱦᱚᱲ ᱠᱚ ᱨᱚᱲ ᱞᱟᱝ ᱪᱷᱤᱭᱟᱹᱜ᱾
ᱢᱮᱱᱟᱢᱟ ᱟᱰᱟ
ᱯᱟᱹᱨᱥᱤ ᱢᱮᱱᱟᱜ ᱜᱚᱰᱟ
ᱯᱮᱨᱮᱡ ᱮᱱᱟ ᱜᱟᱰᱟ
ᱪᱮᱠᱟᱛᱮᱢ ᱞᱮᱰᱟ ?
ᱨᱚᱦᱚᱭ ᱞᱮᱠᱷᱟᱱ ᱦᱳᱲᱳ
ᱡᱟᱦᱟᱸ ᱞᱮᱠᱟ ᱡᱷᱟᱯᱚ ᱛᱚᱲᱚ
ᱢᱮᱱᱟᱜ ᱨᱮ ᱱᱤᱛ ᱜᱚᱲᱚ
ᱛᱚᱵᱮ ᱛᱟᱦᱮᱸᱱᱟ ᱚᱲᱟᱜ ᱨᱮ ᱦᱳᱲᱳ ᱾
ᱤᱧᱟᱜ ᱢᱟᱱᱟ ᱥᱟᱹᱦᱤ
ᱥᱟᱰᱮ ᱥᱚᱞᱚ ᱟᱱᱟ
ᱠᱟᱢᱤ ᱠᱚᱱᱟ ᱠᱚᱱᱟ
ᱟᱹᱭᱠᱟᱹᱣ ᱢᱮ ᱥᱟᱱᱟ ᱾
ᱢᱮᱛᱟᱢᱟᱹᱧ ᱪᱟᱥᱟ
ᱫᱚᱦᱚᱭ ᱢᱮ ᱟᱥᱟ
ᱟᱞᱚᱢ ᱟᱹᱭᱠᱟᱹᱣ ᱠᱟᱥᱟ
ᱛᱚᱵᱮᱢ ᱧᱟᱢᱟ ᱥᱮᱵᱮᱞ ᱨᱟᱥᱟ ᱾
***
