ᱛᱤᱱᱟᱹᱜ ᱥᱮᱫᱟᱭ ᱡᱩᱜᱽ ᱠᱷᱚᱱ ᱪᱚ ᱥᱟᱱᱛᱟᱲ ᱡᱟᱹᱛᱤ ᱫᱚ ᱦᱟᱹᱱᱤ ᱱᱷᱟᱹᱭᱟᱜ ᱠᱟᱹᱲᱯᱩ ᱦᱟᱯᱟ ᱥᱟᱵ ᱠᱟᱛᱮ ᱱᱤᱪᱚᱞ ᱱᱤᱥᱚᱱ ᱦᱚᱨ ᱵᱤᱨ ᱫᱚᱭ ᱛᱟᱲᱟᱢ ᱞᱟᱦᱟᱣ ᱟᱹᱜᱩ ᱟᱠᱟᱫᱼᱟ᱾ᱱᱚᱣᱟ ᱠᱟᱛᱷᱟ ᱚᱠᱚᱭ ᱯᱩᱨᱩᱫᱷᱩᱞ ᱜᱮ ᱵᱟᱝ ᱠᱚ ᱞᱟᱹᱭ ᱠᱮᱭᱟ᱾ ᱚᱠᱟ ᱡᱟᱱᱟᱢ ᱨᱮᱭᱟᱜ ᱯᱟᱯ ᱪᱚ ᱱᱚᱝᱠᱟ ᱢᱮᱫ ᱵᱟᱹᱱᱩᱜ ᱦᱚᱲ ᱞᱮᱠᱟᱭ ᱠᱷᱟᱸᱰᱟᱣ ᱟᱹᱜᱩᱭᱮᱫ ᱛᱟᱦᱮᱱ ᱚᱠᱚᱭ ᱞᱟᱹᱭ ᱠᱮ? ᱢᱮᱱᱠᱷᱟᱱ ᱟᱨ ᱛᱤᱱᱟᱹᱜ ᱫᱤᱱ ᱱᱚᱝᱠᱟᱭ ᱛᱟᱲᱟᱢᱟ ᱦᱟᱹᱱᱤ ᱱᱷᱟᱹᱭᱟᱜ ᱦᱟᱯᱟ ᱥᱟᱵ ᱠᱟᱛᱮ? ᱫᱤᱱ ᱢᱟ ᱮᱴᱟᱜ ᱦᱚᱲ ᱦᱟᱯᱟ ᱵᱟᱝ ᱠᱚ ᱮᱢᱚᱜᱼᱟ᱾ ᱵᱟᱝ ᱫᱚ ᱪᱟᱸᱫᱚ ᱜᱚᱸᱜᱟ ᱥᱤᱻᱥᱤᱨᱡᱟᱹᱣᱤᱡᱟᱜ ᱫᱟᱭᱟ ᱵᱟᱝ ᱫᱚ ᱥᱟᱱᱛᱟᱲ ᱦᱚᱯᱚᱱ ᱠᱚᱣᱟᱜ ᱰᱟᱦᱟᱨ ᱢᱟᱜ ᱵᱮᱱᱟᱣ ᱡᱚᱦᱚᱜᱟᱜ ᱵᱤᱨ ᱫᱤᱥᱚᱢ ᱛᱤᱨᱤᱞ ᱠᱟᱹᱲᱯᱩ ᱴᱷᱮᱸᱜᱟ ᱵᱮᱱᱟᱣ ᱮᱱᱟ ᱴᱷᱚᱠ ᱴᱷᱩᱠᱤ ᱨᱩᱯᱤ “ᱚᱞ ᱪᱤᱠᱤ”ᱚᱞ ᱴᱷᱮᱸᱜᱟ᱾

ᱫᱷᱟᱹᱨᱛᱤ ᱥᱤᱨᱡᱚᱱ ᱢᱟᱹᱱᱢᱤ ᱥᱤᱨᱡᱚᱱ ᱠᱷᱚᱱᱟᱜ ᱱᱤᱛᱚᱜ ᱦᱟᱹᱵᱤᱡᱛᱮ ᱟᱭ ᱩᱢᱟᱹᱱ ᱠᱟᱛᱮ ᱧᱮᱞ ᱞᱮᱠᱷᱟᱱ ᱥᱟᱱᱛᱟᱲ ᱡᱟᱹᱛᱤ ᱨᱮᱭᱟᱜ “ᱚᱞ ᱪᱤᱠᱤ” ᱚᱞ ᱵᱷᱮᱜᱮᱫ ᱚᱠᱟ ᱡᱟᱹᱛᱤ ᱥᱮ ᱚᱠᱟ ᱯᱟᱹᱨᱥᱤ ᱨᱮᱭᱟᱜ ᱚᱞ ᱥᱤᱨᱡᱚᱱ ᱱᱟᱜᱟᱢ ᱠᱟᱛᱷᱟ ᱫᱚ ᱵᱟᱹᱱᱩᱜ ᱟᱠᱟᱫᱼᱟ᱾ᱯᱟᱹᱨᱥᱤ ᱨᱮᱭᱟᱜ ᱱᱟᱜᱟᱢ ᱫᱚ ᱵᱟᱠᱷᱟᱱ ᱛᱟᱦᱟᱬ ᱵᱤᱦᱟᱹᱬ ᱢᱮᱱᱟᱜ ᱜᱮᱭᱟ ᱢᱮᱱ ᱠᱷᱟᱱ”ᱚᱠᱚᱭ ᱵᱮᱱᱟᱣ ᱥᱮ ᱜᱟᱲᱦᱟᱣ ᱞᱮᱫᱟ??ᱱᱚᱣᱟ ᱠᱩᱠᱞᱤ ᱨᱮᱭᱟᱜ ᱛᱮᱞᱟ ᱚᱠᱚᱭ ᱢᱟᱹᱱᱢᱤ ᱦᱚᱸ ᱵᱟᱠᱚ ᱢᱮᱱ ᱫᱟᱲᱮ ᱠᱮᱭᱟ᱾ ᱢᱮᱱᱢᱮ ᱳᱰᱤᱭᱟᱹ ᱯᱟᱹᱨᱥᱤ ᱨᱮᱭᱟᱜ ᱳᱰᱤᱭᱟᱹ ᱪᱤᱠᱤ ᱨᱮᱱᱤᱡ ᱡᱟᱱᱟᱢ ᱫᱟᱛᱟ ᱚᱠᱚᱭ? ᱫᱮᱵᱽᱱᱟᱜᱽᱨᱤ ᱪᱤᱠᱤ ᱨᱮᱱᱤᱡ ᱡᱟᱱᱟᱢ ᱫᱟᱛᱟ ᱚᱠᱚᱭ? ᱨᱳᱢᱟᱱ ᱪᱤᱠᱤ ᱨᱮᱱᱤᱡ ᱡᱟᱱᱟᱢ ᱫᱟᱛᱟ ᱚᱠᱚᱭ? ᱟᱨ ᱦᱚᱸ ᱟᱭᱢᱟ ᱪᱤᱠᱤ ᱨᱤᱱ ᱡᱟᱱᱟᱢ ᱫᱟᱛᱟ ᱠᱚᱣᱟᱜ ᱧᱩᱛᱩᱢ ᱞᱟᱹᱭ ᱫᱚ ᱚᱦᱚᱣᱟᱱ ᱜᱮᱭᱟ᱾

ᱫᱷᱟᱹᱨᱛᱤ ᱯᱩᱨᱤ ᱨᱮ ᱥᱤᱸᱜᱤ ᱧᱤᱸᱫᱟᱹ ᱦᱩᱭᱩᱜ ᱠᱟᱱ ᱵᱮᱲᱟ ᱨᱮ ᱦᱚᱸ ᱥᱟᱱᱛᱟᱲ ᱡᱟᱹᱛᱤ ᱫᱚ ᱧᱩᱛᱟᱹᱛ ᱥᱩᱢᱩᱝ ᱨᱮᱜᱮ ᱡᱤᱭᱚᱱ ᱫᱚ ᱠᱚ ᱠᱷᱟᱸᱰᱟᱣ ᱮᱫ ᱛᱟᱦᱮᱱ᱾ᱚᱱᱟ ᱧᱩᱛᱟᱹᱛ ᱫᱚ ᱥᱮᱪᱮᱫ ᱨᱮᱭᱟᱜ ᱧᱩᱛᱟᱹᱛ ᱛᱟᱦᱮᱸ ᱠᱟᱱᱟ᱾ᱚᱱᱟ ᱥᱮᱪᱮᱫ ᱨᱮᱭᱟᱜ ᱧᱩᱛᱟᱹᱛ ᱨᱮ ᱥᱤᱧ ᱵᱚᱸᱜᱟ ᱟᱨ ᱧᱤᱸᱫᱟᱹ ᱪᱟᱸᱫᱚ ᱞᱮᱠᱟ ᱥᱮᱪᱮᱫ ᱰᱟᱦᱟᱨ ᱢᱟᱨᱥᱟᱞ ᱠᱤᱱ ᱛᱟᱨᱥᱮ ᱞᱮᱫᱟ ᱜᱩᱨᱩ ᱜᱚᱢᱠᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱟᱨ ᱠᱚᱵᱤ ᱜᱩᱨᱩ ᱥᱟᱹᱫᱷᱩ ᱨᱟᱢᱪᱟᱸᱫ ᱢᱩᱨᱢᱩ ᱾ ᱢᱮᱱᱠᱷᱟᱱ ᱥᱚᱢᱚᱭ ᱨᱮᱭᱟᱜ ᱮᱯᱮᱨᱦᱮᱸᱰᱮᱡ ᱤᱭᱟᱹ ᱛᱮ ᱪᱮ ᱱᱤᱛ ᱦᱚᱸ ᱵᱟᱨᱟᱝ ᱵᱟᱨᱟᱝ ᱮ ᱡᱩᱞᱩᱜ ᱠᱟᱱ ᱥᱤᱧ ᱵᱚᱸᱜᱟᱣᱟᱜ ᱠᱷᱮᱞ ᱠᱚᱵᱤ ᱜᱩᱨᱩᱣᱟᱜ ᱵᱮᱱᱟᱣ ᱚᱞ “ᱢᱚᱡᱽ ᱫᱟᱸᱫᱮᱨ ᱟᱸᱠ”ᱫᱚ ᱫᱤᱥᱚᱢ ᱨᱮ ᱵᱟᱝ ᱪᱷᱟᱨᱟᱣ ᱞᱮᱱᱟ, ᱜᱩᱨᱩ ᱜᱚᱢᱠᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱣᱟᱜ ᱜᱟᱲᱦᱟᱣ ᱚᱞ”ᱚᱞᱪᱤᱠᱤ”ᱜᱮ ᱪᱮᱢᱮᱧ ᱡᱩᱲᱤ ᱢᱤᱫᱩᱱ ᱨᱮ ᱫᱤᱥᱚᱢ ᱦᱚᱲ ᱴᱷᱮᱱ ᱜᱩᱨᱩ ᱜᱚᱢᱠᱮ ᱭᱮ ᱥᱚᱫᱚᱨ ᱠᱮᱫᱟ᱾ᱟᱨ ᱟᱵᱚ ᱦᱚᱲ ᱠᱚ ᱚᱱᱟ ᱚᱞ ᱧᱮᱞ ᱟᱨ ᱵᱟᱰᱟᱭ ᱠᱟᱛᱮ ᱳᱰᱤᱥᱟ,ᱵᱤᱦᱟᱨ,ᱵᱮᱸᱜᱚᱞ ᱟᱨ ᱟᱥᱟᱢ ᱦᱚᱲ ᱨᱟᱹᱥᱠᱟᱹ ᱭᱮᱱᱟ ᱠᱚ ᱟᱨ ᱢᱤᱫᱩᱱ ᱠᱚ ᱥᱟᱹᱠᱷᱤ ᱥᱚᱵᱷᱟ ᱞᱮᱫᱟ᱾

ᱡᱚᱦᱟ ᱜᱮ ᱚᱞ ᱢᱮᱱᱟᱜ ᱚᱞ ᱠᱚᱨᱮ ᱠᱷᱚᱱ ᱥᱚᱨᱮᱥ ᱫᱚ “ᱚᱞᱪᱤᱠᱤ”ᱚᱞ ᱜᱮ ᱥᱚᱨᱚᱥ ᱼᱟ᱾ ᱢᱮᱱᱠᱷᱟᱱ ᱫᱤᱥᱚᱢ ᱡᱟᱠᱟᱛ ᱨᱮᱭᱟᱜ ᱚᱞ ᱠᱚᱨᱮᱱᱟᱜ ᱜᱩᱱ ᱪᱮ ᱫᱟᱲᱮ ᱫᱚ ᱥᱚᱢᱟᱱ ᱜᱮᱭᱟ᱾ ᱟᱨ ᱚᱞ ᱫᱚ ᱩᱱᱨᱮ ᱵᱷᱟᱹᱜᱤ ᱫᱟᱲᱮ ᱧᱟᱢᱟᱭ ᱡᱚᱠᱷᱚᱱ ᱢᱤᱫᱴᱟᱝ ᱚᱞ ᱡᱟᱹᱥᱛᱤ ᱦᱚᱲ ᱠᱚ ᱵᱮᱵᱷᱟᱨᱟ ᱾ ᱛᱮᱦᱮᱧ ᱡᱟᱦᱟᱸ ᱚᱞ ᱜᱮᱵᱚ ᱧᱮᱞᱮᱫ ᱪᱮ ᱟᱨ ᱵᱚ ᱮᱛᱚ ᱟᱠᱟᱱᱫᱚ ᱚᱱᱟ ᱡᱚᱛᱚ ᱚᱞ ᱜᱮ ᱢᱤᱻᱢᱤᱫᱴᱟᱝ ᱜᱚᱸᱜᱟ ᱧᱩᱛᱩᱢ ᱪᱮ ᱫᱟᱲᱮ ᱥᱟᱞᱟᱜ ᱵᱟᱨᱟ ᱵᱟᱹᱨᱤᱭᱟ᱾ ᱟᱨ ᱛᱮᱦᱮᱧ ᱚᱱᱟ ᱢᱤᱻᱢᱤᱫᱴᱟᱝ ᱚᱞ ᱨᱮᱭᱟᱜ ᱢᱤᱻᱢᱤᱫᱴᱟᱝ ᱫᱟᱲᱮ ᱠᱷᱟᱹᱛᱤᱨ ᱱᱚᱣᱟ ᱡᱩᱜᱽ ᱫᱚ ᱚᱞ ᱵᱮᱨ ᱥᱟᱶᱛᱮᱜᱮ ᱛᱟᱲᱟᱢ ᱟᱠᱟᱫᱟᱭ᱾ᱥᱚᱡᱷᱮ ᱫᱷᱟᱨᱟ ᱢᱮᱱ ᱜᱟᱱᱚᱜᱼᱟ ᱡᱩᱜᱽ ᱢᱚᱪᱟ ᱨᱮ ᱛᱮᱦᱮᱧ ᱚᱞ ᱨᱩᱯᱤ ᱞᱟᱜᱟᱢ ᱾ ᱚᱞ ᱚᱠᱟ ᱞᱮᱠᱟ ᱡᱩᱜᱽ ᱦᱚᱸ ᱚᱱᱠᱟ ᱪᱟᱞᱟᱜ ᱠᱟᱱᱟ᱾

ᱛᱮᱦᱮᱧ ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱵᱚᱸᱜᱟ ᱥᱮᱵᱟ ᱦᱚᱲ ᱟᱹᱰᱤ ᱟᱢᱫᱟ ᱢᱮᱱᱟᱜ ᱵᱚᱱᱟ᱾ ᱵᱚᱸᱜᱟ ᱧᱩᱛᱩᱢ ᱦᱚᱸ ᱵᱚ ᱵᱟᱰᱟᱭ ᱜᱮᱭᱟ ᱥᱮᱵᱟ ᱥᱮᱨᱣᱟ ᱯᱮᱨᱮᱡ ᱩᱢᱟᱹᱬ ᱦᱚᱸ ᱵᱚ ᱵᱟᱰᱟᱭ ᱜᱮᱭᱟ᱾ ᱢᱮᱱᱠᱷᱟᱱ ᱚᱞ ᱵᱚᱸᱜᱟ ᱥᱮᱵᱟ ᱥᱮᱨᱣᱟ ᱫᱚ ᱵᱟᱝ ᱵᱚ ᱵᱟᱰᱟᱭᱟ᱾ ᱱᱟᱭᱠᱮ ᱠᱷᱚᱸᱰ ᱠᱟᱛᱮ ᱵᱚᱸᱜᱟ ᱧᱩᱛᱩᱢ ᱵᱟᱰᱟᱡ ᱵᱩᱰᱩᱡ ᱢᱮᱱᱠᱟᱛᱮ ᱵᱟᱠᱷᱮᱬ ᱥᱟᱶᱛᱮ ᱥᱩᱱᱩᱢ ᱥᱤᱸᱫᱩᱨ ᱴᱤᱰᱟᱹᱜ ᱞᱮᱠᱷᱟᱱ ᱵᱚᱸᱜᱟ ᱭᱮ ᱯᱮᱨᱮᱡ ᱪᱮ ᱥᱮᱵᱟᱭ ᱧᱟᱢᱟ᱾ ᱟᱨ ᱟᱵᱚᱣᱟᱜ ᱟᱸᱥ ᱠᱩᱠᱢᱩ ᱪᱮ ᱫᱩᱠ ᱦᱟᱞᱟᱠ ᱟᱱᱟᱴ ᱮᱴᱠᱮᱴᱚᱬᱮ ᱥᱟᱦᱟᱜ ᱨᱮᱭᱟᱜ ᱢᱤᱫ ᱛᱚᱦᱚᱨ ᱧᱮᱞᱚᱜ ᱠᱟᱱᱟ᱾

ᱟᱵᱚ ᱱᱤᱛᱚᱜ ᱥᱮᱪᱮᱫ ᱡᱩᱜᱽ ᱨᱤᱱ ᱵᱚᱸᱜᱟ ᱥᱮᱜᱼᱵᱟ ᱠᱩᱱ ᱟᱨ ᱥᱟᱱᱟᱢ ᱥᱟᱱᱛᱟᱲ ᱵᱚᱭᱦᱟ ᱠᱚ ᱠᱚᱢᱥᱮ ᱮᱴᱟᱜ ᱚᱞ ᱵᱟᱝ ᱠᱟᱛᱮ ᱟᱵᱚ ᱡᱟᱱᱟᱢ ᱟᱲᱟᱝ ᱯᱟᱹᱨᱥᱤ”ᱚᱞᱪᱤᱠᱤ”ᱠᱚ ᱥᱮᱬᱟ ᱞᱮᱠᱷᱟᱱ ᱯᱟᱞᱮ ᱱᱩᱱᱟᱹᱜ ᱱᱤᱫᱷᱟᱹᱱ ᱱᱟᱪᱟᱨ ᱨᱮ ᱵᱟᱝ ᱵᱚ ᱛᱟᱦᱮᱸ ᱠᱚᱜ ᱼᱟ᱾ ᱚᱞ ᱢᱟ ᱤᱱᱠᱟᱹ ᱛᱮᱦᱚᱸ ᱱᱤᱝᱠᱟᱹ ᱛᱮᱦᱚᱸ ᱵᱚ ᱚᱞᱚᱜ ᱠᱟᱱ ᱜᱮ ᱢᱮᱱᱠᱷᱟᱱ ᱟᱯᱱᱟᱨᱟᱜ ᱡᱟᱱᱟᱢ ᱨᱚᱲ ᱚᱞ ᱪᱤᱠᱟᱹᱛᱮ ᱵᱚ ᱮᱛᱚᱢ ᱠᱮᱭᱟ? ᱚᱱᱟ ᱠᱚ ᱩᱭᱦᱟᱹᱨ ᱵᱟᱲᱟ ᱞᱮᱠᱷᱟᱱ ᱢᱤᱫ ᱠᱟᱛᱷᱟ ᱩᱭᱦᱟᱹᱨ ᱜᱚᱫᱚᱜᱼᱟ:-

“ᱨᱚᱲ ᱨᱮ ᱮᱱᱛᱮ ᱪᱮᱫ ᱪᱚᱝ ᱢᱮᱱᱟᱜ?
ᱟᱲᱟᱝ ᱨᱮ ᱚᱱᱠᱟ ᱪᱮᱫ ᱪᱚ ᱟᱹᱭᱠᱟᱹᱣᱚᱜ?

ᱫᱷᱤᱨᱤ ᱠᱟᱯᱟᱴ ᱥᱤᱠᱲᱤ ᱡᱷᱤᱸᱡᱤᱨ ᱡᱷᱤᱡᱩᱜ,
ᱡᱚᱻᱡᱚᱢ ᱠᱩᱞᱮ ᱯᱟᱹᱪᱷᱞᱟᱹ ᱪᱤᱠᱤᱡᱚᱜ᱾

ᱚᱞ ᱨᱮ ᱮᱱᱛᱮ ᱪᱮᱫ ᱪᱚᱝ ᱢᱮᱱᱟᱜ?
ᱪᱤᱱᱦᱟᱹ ᱨᱮ ᱚᱱᱠᱟ ᱪᱮᱫ ᱪᱚ ᱪᱤᱱᱦᱟᱺᱣᱚᱜ?

ᱵᱟᱝ ᱧᱮᱞ ᱴᱚᱴᱷᱟ ᱟᱢ ᱛᱮᱢ ᱥᱮᱴᱮᱨ,
ᱜᱚᱜᱼᱜᱚᱡ ᱦᱚᱨ ᱠᱷᱚᱱ ᱟᱢᱛᱮᱜᱮᱢ ᱥᱟᱦᱟᱜ!!