ᱫᱟᱜ ᱛᱟᱞᱟᱨᱮ ᱚᱯᱮᱞ ᱟᱢᱫᱚ
ᱧᱮᱞᱚᱜ ᱡᱮᱸᱜᱮᱫ ᱡᱮᱸᱜᱮᱫ
ᱧᱤᱫᱟᱹ ᱜᱚᱴᱟᱢ ᱡᱟᱹᱯᱤᱫᱽ ᱢᱟᱥᱮ
ᱥᱮᱛᱟᱜ ᱠᱷᱟᱱᱮᱢ ᱵᱮᱸᱜᱮᱫᱽ ᱾

ᱪᱟᱸᱫᱚ ᱨᱟᱠᱟᱵ ᱛᱟᱨᱟᱥ ᱵᱟᱡᱟᱣ
ᱵᱷᱩᱴᱩᱜ ᱯᱷᱩᱴᱟᱣ ᱮᱢ ᱞᱟᱸᱫᱟᱭ
ᱦᱚᱨᱛᱮ ᱦᱤᱡᱩᱜ ᱥᱮᱱᱚᱜ ᱦᱚᱲᱟᱹᱜ
ᱢᱳᱱᱮ ᱡᱤᱣᱤᱢ ᱪᱷᱟᱸᱫᱟᱭ ᱾

ᱞᱚᱥᱚᱫ ᱠᱷᱚᱱᱟᱹᱜ ᱦᱟᱨᱟ ᱨᱟᱠᱟᱵ
ᱮᱱ ᱦᱚᱸ ᱞᱮᱜᱮᱡ ᱞᱮᱜᱮᱡ
ᱛᱟᱨᱟᱥᱤᱧ ᱵᱮᱲᱟ ᱟᱢ ᱥᱟᱣ
ᱧᱟᱯᱟᱢ ᱫᱟᱠᱟ ᱦᱚᱸ ᱵᱟᱭ ᱨᱮᱸᱜᱮᱡ ᱾

ᱛᱷᱟᱹᱨᱤ ᱞᱮᱠᱟ ᱫᱟᱜ ᱨᱮ ᱪᱟᱯᱮ ᱠᱚᱜ
ᱥᱟᱠᱟᱢ ᱟᱢᱟᱜ ᱦᱟᱹᱨᱭᱟᱹᱲ
ᱦᱟᱹᱲᱩᱵ ᱢᱤᱫᱩᱜ ᱥᱟᱠᱟᱢ ᱥᱤᱸᱜᱟᱹᱲ
ᱧᱮᱞᱛᱮ ᱵᱩᱡᱷᱟᱹᱣ ᱢᱚᱱᱮ ᱡᱤᱭᱟᱹᱲ ᱾

ᱟᱨᱟᱜ ᱯᱩᱸᱰ ᱵᱟᱦᱟ ᱥᱟᱣᱛᱮ
ᱯᱟᱭᱨᱟ ᱮᱱᱮᱡ ᱠᱳ ᱵᱚᱝᱜᱟ
ᱨᱚᱴᱮ, ᱨᱚᱠᱚᱡᱽ ᱯᱟᱸᱛᱮ ᱠᱚᱜ ᱠᱚ
ᱥᱟᱠᱟᱢ ᱪᱮᱛᱟᱱ ᱨᱮ ᱰᱷᱚᱝᱜᱟ ᱾

ᱴᱮᱢᱮᱡ ᱫᱟᱜ ᱨᱮ ᱯᱩᱴᱷᱤ ᱦᱟᱹᱠᱩ
ᱫᱟᱹᱲ ᱵᱟᱲᱟᱭ ᱠᱳ ᱪᱤᱞᱼᱵᱤᱞ
ᱦᱮᱴᱮᱡ ᱥᱟᱠᱟᱢ ᱞᱟᱫ ᱦᱟᱹᱠᱩ
ᱥᱟᱥᱟᱝ ᱟᱛᱮ ᱟᱹᱰᱤ ᱠᱳ ᱥᱤᱵᱤᱞ ᱾

ᱩᱱᱩᱢ ᱦᱟᱛᱣᱟ ᱧᱟᱢ ᱩᱞᱰᱷᱟᱹ
ᱱᱤᱢ, ᱠᱟᱹᱨᱩᱭᱞᱟ ᱞᱮᱠᱟ ᱦᱮᱣᱮᱨᱟ
ᱠᱚᱴᱮᱡ ᱜᱮᱡᱮᱨ ᱨᱟᱥᱟ ᱪᱮᱯᱮᱡ
ᱞᱟᱡ ᱦᱟᱹᱥᱩᱠᱚ ᱞᱟᱜᱮ ᱵᱮᱵᱮᱥᱟ ᱾

ᱥᱚ ᱥᱚᱸᱫᱷᱟᱹᱬ, ᱜᱩᱱᱛᱮ ᱩᱨᱩᱱ ᱯᱩᱨᱩᱱ
ᱛᱤᱠᱤ ᱩᱞᱰᱷᱟ ᱩᱛᱩ ᱱᱚᱨᱚᱢ ᱞᱩᱛᱩᱭ
ᱯᱟᱹᱨᱟᱹᱵᱽ ᱯᱩᱱᱟᱹᱭ ᱥᱟᱡᱟᱣ ᱟᱠᱷᱲᱟ
ᱰᱚᱰᱮ ᱰᱚᱯᱚᱰᱮ ᱵᱟᱦᱟ ᱢᱟᱞᱟ ᱞᱮ ᱜᱩᱛᱩᱭ ᱾

ᱛᱤᱱᱟᱹᱜ ᱦᱟᱦᱟᱲᱟ ᱱᱚᱣᱟ ᱫᱷᱟᱹᱨᱛᱤ
ᱥᱟᱹᱨᱤᱜᱮ ᱥᱤᱥᱤᱨᱡᱟᱣᱟᱹᱜ ᱥᱤᱨᱡᱚᱱ
ᱥᱮᱛᱟᱜ ᱠᱷᱚᱱᱟᱹᱜ ᱟᱹᱭᱩᱵ ᱟᱢᱟᱹᱜ
ᱨᱩᱯ ᱛᱟᱹᱢ ᱵᱚᱫᱚᱞᱚᱜ ᱵᱟᱨᱚ ᱵᱚᱨᱚᱱ ᱾

ᱥᱤᱧ ᱪᱟᱸᱫᱚ ᱥᱟᱣ ᱥᱟᱹᱜᱟᱹᱭ ᱢᱮᱱᱟᱹᱜ
ᱠᱚᱯᱟᱲ ᱞᱤᱠᱷᱚᱱ ᱛᱟᱢ ᱥᱚᱡᱷᱮ ᱜᱮᱭᱟ
ᱚᱱᱟᱛᱮ ᱥᱤᱧᱚᱛ ᱫᱤᱥᱚᱢ ᱨᱮ ᱡᱟᱹᱛᱤᱭᱟᱹᱨᱤ
ᱧᱩᱢᱛᱮ ᱯᱚᱨᱟᱭᱱᱤ ᱟᱢ ᱞᱮ ᱵᱟᱰᱟᱭ ᱢᱮᱭᱟ ᱾