ᱩᱨᱩᱱ ᱵᱩᱨᱩᱱ ᱢᱚᱧᱪᱳ ᱯᱩᱨᱤ
ᱵᱤᱨ ᱢᱟ ᱜᱚᱴᱟ ᱯᱮᱨᱮᱡ ᱞᱮᱱ
ᱡᱤᱵᱼᱡᱤᱭᱟᱹᱞᱤ ᱡᱤᱱᱛᱤᱼᱯᱤᱯᱤᱲᱤ
ᱟᱰᱤ ᱜᱟᱱ ᱠᱚ ᱥᱟᱸᱜᱮ ᱭᱮᱱ ᱾
ᱵᱤᱨ ᱜᱟᱡᱟᱲ ᱠᱚ ᱢᱟᱜ ᱯᱷᱟᱫᱟ ᱠᱟᱛᱮ
ᱟᱛᱩ ᱫᱤᱥᱚᱢ ᱮᱢ ᱵᱮᱱᱟᱣ ᱠᱮᱛ
ᱟᱹᱫᱤᱢ ᱢᱮᱱᱛᱮᱢ ᱩᱯᱨᱩᱢ ᱟᱱᱛᱮ
ᱨᱮᱞᱟᱣ ᱮᱱᱮᱢ ᱞᱟᱦᱟ ᱥᱮᱛ ᱾
ᱞᱟᱦᱟ ᱞᱮᱱᱮᱢ ᱠᱤᱥᱟᱹᱬ ᱞᱮᱱᱮᱢ
ᱨᱮᱡ ᱦᱚᱪᱚᱭᱮᱱᱮᱢ
ᱵᱩᱫᱷᱤ ᱜᱮᱭᱟᱱ ᱠᱩᱨᱩᱢᱩᱴᱩ ᱛᱟᱭᱚᱢ
ᱠᱷᱟᱞᱤᱭᱮᱱ ᱛᱟᱢ ᱮᱱᱮᱢ ᱾
ᱪᱟᱹᱭ ᱪᱟᱢᱯᱟ ᱵᱟᱫᱚᱞᱤ ᱠᱚᱭᱸᱰᱟ
ᱜᱮᱞᱵᱟᱨ ᱪᱩᱲᱟᱹ ᱫᱚᱞᱟᱱ
ᱵᱚᱨᱚ ᱦᱚᱪᱚᱭᱮᱱᱮᱢ ᱛᱩᱲᱩᱠ ᱛᱩᱯᱩᱫ ᱨᱮ
ᱥᱟᱦᱟ ᱵᱟᱜᱤ ᱠᱟᱛᱮ ᱢᱮᱞᱟᱱ ᱾
ᱤᱱᱟᱹ ᱛᱟᱭᱚᱢ ᱟᱨᱡᱚ ᱮᱢᱟᱱ
ᱵᱤᱨᱫᱟᱹ ᱵᱷᱤᱞᱠᱤ ᱠᱮᱛ ᱢᱮ
ᱟᱠᱚᱛᱮ ᱵᱮᱱᱟᱣ ᱟᱨᱤᱪᱟᱞᱤ
ᱥᱮᱛ ᱠᱚ ᱜᱚᱭᱚᱱ ᱠᱮᱛ ᱢᱮ ᱾
ᱟᱯᱱᱟᱨ ᱥᱟᱶᱛᱟ ᱥᱚᱨᱮᱥ ᱥᱟᱶᱛᱟ
ᱢᱟᱨᱟᱝ ᱚᱜ ᱮᱢ ᱚᱱᱟ ᱛᱮᱜᱮ
ᱩᱱᱡᱷᱚᱜ ᱚᱱᱟᱢ ᱦᱤᱲᱤᱧ ᱠᱮᱛ ᱛᱮ
ᱱᱤᱛ ᱦᱚᱸᱢ ᱛᱟᱭᱚᱢ ᱮᱱ ᱜᱮ ᱾
ᱡᱚᱛᱚ ᱠᱚᱜᱮ ᱠᱚ ᱞᱟᱦᱟ ᱭᱮᱱᱟ
ᱚᱠᱛᱚ ᱛᱩᱞᱩᱡ ᱟᱱᱠᱚ
ᱟᱯᱱᱟᱨ ᱴᱷᱮᱱ ᱜᱮ ᱦᱟᱬᱟᱜ
ᱢᱮᱱᱟᱢ ᱵᱟᱭᱨᱤ ᱠᱟᱱ ᱠᱚ ᱾
ᱟᱢ ᱦᱚᱸ ᱢᱟᱹᱱᱢᱤ ᱩᱱᱠᱩ ᱦᱚᱸ ᱢᱟᱹᱱᱢᱤ
ᱪᱟᱜ ᱫᱚ ᱟᱹᱫᱤᱢ ᱛᱟᱭᱚᱢ
ᱠᱟᱹᱭ ᱢᱮᱱᱟᱜ ᱛᱮᱜᱮ ᱚᱱᱟᱛᱮ ᱱᱚᱜ ᱚᱭ
ᱚᱠᱛᱚᱭ ᱨᱚᱨᱚᱲ ᱵᱟᱢ ᱟᱸᱡᱚᱢ ᱾
ᱨᱮᱸᱜᱮᱡ ᱚᱲᱟᱜ ᱨᱮᱢ ᱡᱟᱱᱟᱢ ᱮᱱᱛᱮ
ᱪᱤᱠᱟᱹᱢ ᱜᱩᱱᱦᱟᱹ ᱦᱟᱠᱟᱛ
ᱨᱮᱸᱜᱮᱡ ᱠᱷᱚᱱᱮᱢ ᱠᱤᱥᱟᱹᱬᱚᱜ ᱟ
ᱴᱷᱤᱠᱟᱹ ᱢᱮᱠᱚ ᱫᱷᱟᱨᱛᱤ ᱡᱟᱠᱟᱛ᱾
ᱱᱟᱦᱟᱜ ᱡᱩᱜ ᱢᱟ ᱴᱟᱠᱟ ᱯᱩᱭᱥᱟᱹ
ᱟᱨᱡᱟᱣ ᱦᱩᱭᱩᱜ ᱜᱮᱭᱟ
ᱚᱱᱟ ᱜᱮ ᱟᱹᱫᱤᱢ ᱥᱟᱧᱪᱟᱣ ᱠᱟᱜ ᱢᱮ
ᱡᱚᱛᱚ ᱠᱚ ᱢᱟᱱᱚᱛ ᱢᱮᱭᱟ ᱾
ᱟᱨᱡᱟᱣ ᱠᱟᱛᱮ ᱟᱨᱡᱟᱣ ᱵᱟᱝ ᱠᱟᱱ
ᱥᱟᱧᱪᱟᱣ ᱵᱟᱹᱱᱩᱜ ᱠᱷᱟᱱ
ᱥᱟᱧᱪᱟᱣ ᱠᱟᱛᱮ ᱴᱟᱠᱟ ᱵᱟᱹᱰ ᱵᱟᱝᱠᱷᱟᱱ
ᱠᱤᱥᱟᱹᱬᱚᱜ ᱪᱤᱠᱟᱹᱢ ᱜᱟᱱ ᱾
ᱱᱤᱛ ᱦᱚᱸ ᱟᱫᱤᱢ ᱮᱢ ᱵᱩᱞ ᱟᱠᱟᱱ ᱜᱮ
ᱚᱠᱛᱚ ᱱᱟᱥᱟᱣ ᱠᱚᱨᱮ
ᱱᱚᱝᱠᱟ ᱛᱮᱫᱚ ᱚᱦᱚᱢ ᱠᱤᱥᱟᱹᱬᱚᱜ
ᱟᱢ ᱜᱮ ᱱᱟᱥᱟᱣᱜ ᱦᱚᱨ ᱨᱮ ᱾
ᱠᱩᱠᱢᱩᱢ ᱧᱮᱞᱟ ᱡᱟᱯᱤᱛ ᱠᱟᱛᱮ
ᱨᱟᱹᱥᱠᱟᱹ ᱨᱚᱢᱚᱡ ᱨᱮᱢ ᱩᱰᱟᱹᱣᱜ
ᱟᱨᱡᱟᱣ ᱵᱟᱝᱠᱷᱟᱱ ᱮᱵᱷᱮᱱ ᱠᱟᱛᱮ ᱦᱚᱸ
ᱵᱚᱝᱥᱚ ᱡᱟᱠᱮᱢ ᱵᱩᱰᱟᱹᱣᱜ ᱾
ᱜᱮᱭᱟᱱ ᱵᱟᱹᱱᱩᱜ ᱦᱚᱲ ᱠᱩᱨᱩᱢᱩᱴᱩ ᱠᱟᱛᱮ
ᱡᱚᱢᱟᱜ ᱥᱩᱢᱩᱝ ᱠᱚ ᱟᱨᱡᱟᱣ
ᱜᱮᱭᱟᱱ ᱟᱱ ᱦᱚᱲ ᱫᱚ ᱟᱨᱡᱟᱣ ᱥᱟᱶᱛᱮ
ᱥᱮᱪᱮᱫᱚᱜ ᱥᱮᱱ ᱠᱚ ᱥᱟᱡᱟᱣ ᱾
ᱦᱚᱲ ᱠᱚ ᱨᱚᱲᱟ ᱢᱚᱱᱮ ᱠᱚ ᱜᱚᱦᱚᱲᱟ
ᱵᱟᱢ ᱜᱟᱱᱟ ᱠᱚ ᱢᱮᱱᱟ
ᱞᱟᱦᱟ ᱞᱮᱱ ᱠᱷᱟᱱᱮᱢ ᱦᱚᱨ ᱠᱚ ᱠᱚᱭᱚᱜᱽ
ᱟᱢᱟᱜ ᱯᱟᱸᱡᱟ ᱠᱚ ᱨᱟᱱᱟ ᱾
ᱪᱮᱫᱚᱜ ᱢᱮ ᱟᱨᱡᱟᱣ ᱥᱟᱶᱛᱮ ᱪᱟᱨᱦᱮ
ᱚᱱᱟᱜᱮ ᱵᱩᱫᱷᱤ ᱜᱮᱭᱟᱱᱚᱜ
ᱚᱱᱟᱛᱮ ᱫᱤᱱ ᱜᱮ ᱞᱟᱦᱟ ᱦᱟᱠᱟᱢ ᱛᱟᱦᱮᱸ ᱱ
ᱨᱮᱸᱜᱮᱡ ᱠᱷᱚᱱᱮᱢ ᱠᱤᱥᱟᱹᱬᱚᱜ ᱾
